അന്തര്‍സര്‍വകലാശാലാ വോളി: കാലിക്കട്ടും കേരളയും ക്വാര്‍ട്ടറില്‍
1493327
Wednesday, January 8, 2025 2:16 AM IST
പാലാ: സെന്‍റ് തോമസ് കോളജില്‍ നടന്നുവരുന്ന അഖിലേന്ത്യാ അന്തര്‍ സര്‍വകലാശാലാ പുരുഷ വിഭാഗം വോളിബോള്‍ ചാമ്പ്യന്‍ഷിപ്പില്‍ കാലിക്കട്ട്, കേരള യൂണിവേഴ്‌സിറ്റി ടീമുകള്‍ ക്വാര്‍ട്ടര്‍ ഫൈനലില്‍ പ്രവേശിച്ചു.
ഇന്നലെ രാവിലെ നടന്ന ആദ്യ മത്സരത്തില്‍ കേരള യൂണിവേഴ്‌സിറ്റി കല്‍ക്കട്ട അടമാസ് യൂണിവേഴ്‌സിറ്റിയെ ഏകപക്ഷീയമായ മൂന്ന് സെറ്റുകള്‍ക്ക് കീഴടക്കി ക്വാര്‍ട്ടര്‍ ബര്‍ത്ത്
ഉറപ്പിച്ചു. സ്‌കോര്‍: 25-5, 25-19, 25-16.
മദ്രാസ് യൂണിവേഴ്‌സിറ്റി, പഞ്ചാബ് യൂണിവേഴ്‌സിറ്റിയെ തോൽപ്പിച്ചും (സ്‌കോര്‍: 28-26, 25-18, 17-25, 20-25, 15-12) ഗുരുനാനാക് ദേവ് യൂണിവേഴ്‌സിറ്റി, അമൃത്‌സര്‍ ഭാരതി വിദ്യാ
പീഠ് പൂനയെ കീഴടക്കിയും (സ്‌കോര്‍: 25-20, 25-15, 26-24) ക്വാര്‍ട്ടര്‍ ഫൈനല്‍ ഉറപ്പിച്ചു.
കാലിക്കട്ട് യൂണിവേഴ്‌സിറ്റി ഏകപക്ഷീയമായ മൂന്ന് സെറ്റുകള്‍ക്ക് മഹാരാജ ശ്രീരാം ചന്ദ്ര യൂണിവേഴ്‌സിറ്റി ഒഡീഷയെ കീഴടക്കി ക്വാര്‍ട്ടര്‍ ബര്‍ത്ത് ഉറപ്പിച്ചു. സ്‌കോര്‍ 25-10, 25-07, 25-15. മറ്റൊരു മത്സരത്തില്‍ എസ്ആര്‍എം യൂണിവേഴ്‌സിറ്റി ചെന്നൈ, ഗുരുകുല്‍ കാന്‍ഗ്രി യൂണിവേഴ്‌സിറ്റിയെ പരാജയപ്പെടുത്തി ക്വാര്‍ട്ടര്‍ ഉറപ്പാക്കി. സ്‌കോര്‍: 25-16, 25-11, 25-16.
ലീഗ് റൗണ്ടിലെ തങ്ങളുടെ അവസാന മത്സരത്തില്‍ കേരള യൂണിവേഴ്‌സിറ്റി നേരിട്ടുള്ള മൂന്നു സെറ്റുകള്‍ക്ക് ഭാരതി വിദ്യാപീഠ് യൂണിവേഴ്‌സിറ്റി പൂനയെ പരാജയപ്പെടുത്തി പൂള്‍ ചാമ്പ്യന്മാരായാണ് ക്വാര്‍ട്ടര്‍ ഫൈനലില്‍ പ്രവേശിച്ചത്.
ക്വാര്‍ട്ടര്‍ ഫൈനല്‍ മത്സരങ്ങള്‍ ഇന്ന് ഉച്ചകഴിഞ്ഞ് 3.30 ന് പാലാ സെന്‍റ് തോമസ് കോളജിലെ ജിമ്മി ജോര്‍ജ് സ്റ്റേഡിയത്തില്‍ ആരംഭിക്കും. ടൂര്‍ണമെന്‍റ് വെള്ളിയാഴ്ച സമാപിക്കും.