ഫാ. ജോയി ചെഞ്ചേരിൽ എംസിബിഎസ്

“കു​രി​ശി​ൽ മ​ന​സു​റ​പ്പി​ച്ചു​കൊ​ണ്ട് ഉ​ത്ഥാ​ന​ത്തി​ലേ​ക്കു പ്ര​യാ​ണം ചെ​യ്യു​ക എ​ന്ന​താ​ണ് നോ​ന്പി​ന്‍റെ സാ​രം” (അ​ല​ക്സാ​ണ്ട്രി​യാ​യി​ലെ വിശുദ്ധ സി​റി​ൾ). കു​രി​ശി​ൽ കാ​ഴ്ച​ കൂ​ർ​പ്പി​ച്ചു നി​ൽ​ക്കു​ന്ന ചൈ​ത​ന്യ​മാ​ണ് നോ​ന്പ്. ഉ​ത്ഥാ​ന​മെ​ന്ന ല​ക്ഷ്യ​ത്തി​ലെ​ത്താ​ൻ എ​ത്ര ​മാ​ത്രം ന​മ്മു​ടെ മി​ഴി​ക​ളും മ​നസും കു​രി​ശ് എ​ന്ന യാ​ഥാ​ർഥ്യത്തി​ൽ ഉ​റ​പ്പി​ക്ക​പ്പെ​ട്ടി​ട്ടു​ണ്ട്?

കു​രി​ശ് വെ​റു​മൊ​രു വ​സ്തു​വ​ല്ല; നെ​ടു​കെ​യും കു​റു​കെ​യും വ​യ്ക്ക​പ്പെ​ട്ട സു​വി​ശേ​ഷ​ത്തി​ന്‍റെ പേ​രാ​ണ് കു​രി​ശ്. ആ​ദി​ദോ​ഷം കൊ​ണ്ട​ട​ച്ച സ്വ​ർ​ഗ​വാ​തി​ൽ തു​റ​ക്കാ​ൻ ഈ​ശോ തേ​ടി​യ മാ​ർ​ഗ​വും മു​ന്പു​കൊ​ണ്ട ക​ട​ങ്ങ​ൾ വീ​ട്ടാ​ൻ അ​ൻ​പൊ​ടു​ നേ​ടി​യ ധ​ന​വും കു​രി​ശു​ത​ന്നെ​യാ​യി​രു​ന്നു. അ​തി​നാ​ലാ​ണ് കു​രി​ശി​ന്‍റെ നാ​ലു​ ത​ല​ങ്ങ​ളി​ലേ​ക്കും ക്രി​സ്തു​ജീ​വി​തം പ​ട​ർ​ന്നു​പ​ന്ത​ലി​ച്ചു നി​ൽ​ക്കു​ന്ന​ത്.

എ​ന്തി​നേ​റെ അ​വ​ന്‍റെ ജ​ന​ന​ത്തി​ന് ഇ​ടം കൊ​ടു​ത്ത കാ​ലി​ക്കൂ​ട്ടി​ലും പി​ള്ള​ത്തൊ​ട്ടി​യി​ലു​മെ​ല്ലാം ചി​ത​റിക്കി​ട​ക്കു​ന്ന​ത് കാ​ൽ​വ​രി​യി​ലെ കു​രി​ശി​ന്‍റെ മ​ര​ച്ചീ​ളു​ക​ളാ​ണ്. വ​ധി​ക്ക​പ്പെ​ടു​ന്ന നി​ഷ്ക​ള​ങ്ക​രാ​യ ശി​ശു​ക്ക​ളും ത​ല​വെ​ട്ട​പ്പെ​ടു​ന്ന യോ​ഹ​ന്നാ​നുമെ​ല്ലാം നി​ഷ്ക​ള​ങ്ക​ന്‍റെ ബ​ലി​യ​ർ​പ്പ​ണ​ത്തി​ന്‍റെ മു​ന്നൊ​രു​ക്ക​ങ്ങ​ൾ ത​ന്നെ​യാ​യി​രു​ന്നു.

സ​ഹ​ന​ത്തി​ന്‍റെ അ​ട​യാ​ള​മി​ല്ലാ​തെ സ്നേ​ഹി​ച്ചെ​ന്ന് അ​വ​കാ​ശ​പ്പെ​ടാ​ൻ ആ​ർ​ക്കാ​ണ് സാ​ധി​ക്കു​ന്ന​ത്? ഈ ​പാ​ന​പാ​ത്രം ഞാ​ൻ കു​ടി​ക്കേ​ണ്ട​ത​ല്ല​യോ എ​ന്ന​താ​യി​രു​ന്നു അ​വ​ന്‍റെ ജീ​വി​താ​വ​ബോ​ധം. ഈ ​തെ​ളി​മ ജീ​വി​ത​ത്തി​ൽ വീ​ണ്ടെ​ടു​ക്കു​ന്പോ​ഴാ​ണ് ഓ​രോ വ്യ​ക്തി​യും ജീ​വി​ത​ത്തെ അ​ർ​ഥ​പൂ​ർ​ണ​മാ​ക്കു​ന്ന​ത്. “എ​ന്നെ അ​നു​ഗ​മി​ക്കാ​ൻ ആ​ഗ്ര​ഹി​ക്കു​ന്ന​വ​ൻ കു​രി​ശു​മെ​ടു​ത്ത് എ​ന്നെ അ​നു​ഗ​മി​ക്ക​ട്ടെ”(മ​ത്താ​യി 16:24) എ​ന്നാ​ണ​ല്ലോ അ​വ​ന്‍റെ ആ​ഹ്വാ​നം. ഗു​രു​മൊ​ഴി​ക​ൾ മ​ന​സാ​ സ്വീ​ക​രി​ക്കു​ന്ന​തി​ലാ​ണ് ശി​ഷ്യ​ത്വ​ത്തി​ന്‍റെ പൂ​ർ​ണ​ത. അ​വി​ടെ​യാ​ണ് നോ​ന്പി​ന്‍റെ​യും ഉ​പ​വാ​സ​ത്തി​ന്‍റെ​യും ദാ​ന​ധ​ർ​മ​ത്തി​ന്‍റെ​യും സ​ഹാ​നു​ക​ന്പ​യു​ടെ​യു​മെ​ല്ലാം പു​ണ്യ​ങ്ങ​ൾ പൂക്കുന്നത്.


വീണു കിടക്കേണ്ടവരല്ല

കു​രി​ശു​മാ​യി നി​ലം​പൊ​ത്തു​ന്ന ഓ​രോ​യി​ട​ത്തും അ​വി​ടെ​നി​ന്ന് എ​ഴു​ന്നേ​ൽ​ക്കാ​നു​ള്ള ജീ​വ​ന്‍റെ പ്ര​തീ​ക്ഷ​യാ​യി​രു​ന്നു ആ മ​ന​സുനി​റ​യെ. വീ​ണു​പോ​കു​ന്ന​വ​ർ​ക്കൊ​ക്കെ നോ​ന്പു ന​ൽ​കു​ന്ന​ത് ഈ ​വി​ശു​ദ്ധ പാ​ത​യും പാ​ദ​വു​മാ​ണ്. വീ​ണു​കി​ട​ക്കേ​ണ്ട​വ​ര​ല്ല നമ്മൾ. വീ​ണ്ടെ​ടു​ക്ക​പ്പെ​ട്ട​തി​ന്‍റെ വി​ല​യും നി​ല​യും ഓ​ർ​ത്തു​കൊ​ണ്ട് പ്ര​ത്യാ​ശ​യോ​ടെ എ​ഴു​ന്നേ​ൽ​ക്കാ​നും അ​വ​ന്‍റെ ഉ​ത്ഥാ​നം പ്ര​ഘോ​ഷി​ക്കാ​നും കഴിയേണ്ടവരാണ്.

മാ​റാ​യി​ലെ ജ​ലം ക​യ്പ്പാ​ണെ​ന്ന് ഇ​സ്ര​യേ​ൽ ജ​നം വിലപി ച്ചപ്പോൾ ആ ​വെ​ള്ള​ത്തെ മ​ധു​ര​മു​ള്ള​താ​ക്കാ​ൻ നി​യോ​ഗി​ക്ക​പ്പെ​ട്ട​ത് ഒ​രു മ​ര​ക്ക​ഷ​ണ​മാ​ണ്. അ​തു പു​തി​യ​ നി​യ​മ​ത്തി​ലെ കു​രി​ശി​ന്‍റെ പ്ര​തീ​ക​മാ​ണെ​ന്ന് സ​ഭാ​പ്ര​ബോ​ധ​ന​ങ്ങ​ൾ ന​മ്മെ പ​ഠി​പ്പി​ക്കു​ന്നു. ഇ​ന്നും ജീ​വി​ത​ത്തി​ന്‍റെ ക​യ്പേ​റി​യ അ​നു​ഭ​വ​ങ്ങ​ളെ മ​ധു​ര​ത​ര​മാ​യി കാ​ണാ​നും മാ​റ്റി​യെ​ഴു​താ​നും ഒ​രേ​യൊ​രു മ​ര​ക്ക​ഷ​ണ​ത്തി​നേ ​പ​റ്റൂ അ​തു കു​രി​ശാ​ണ്; സ്ലീ​വാ​യാ​ണ്.

ര​ക്ഷാ​ക​ര​മാ​യ കു​രി​ശി​ലൂ​ടെ​യാ​ണ് ദി​വ്യ​കാ​രു​ണ്യ​മാ​യി മാ​റി​യ ഈ​ശോ ന​മ്മു​ടെ ഉ​ള്ളി​ലേ​ക്ക് ഇ​ന്നും ക​ട​ന്നു​വ​രു​ന്ന​ത്.

"​കാ​ൽ​വ​ര​യി​ൽ പൂ​ത്തു​ല​ഞ്ഞ കാ​ല​ത്തി​ന്‍റെ ക​വി​ത​യാ​യി മാ​റി​യ ഒ​രു ര​ക്ത​പു​ഷ്പം' സ​ക​ല​നൊ​ന്പ​ര​ങ്ങ​ളും സ​ങ്ക​ട​ങ്ങ​ളും സ​ങ്കീ​ർ​ത്ത​ന​മാ​ക്കാ​നു​ള്ള സാ​ധ്യ​ത​യാ​ണെ​ന്നു ന​മ്മെ ഓ​ർ​മ​പ്പെ​ടു​ത്തു​ന്നു. ര​ക്ഷാ​ക​ര​മാ​യ ഓ​ർ​മ​ക​ളോ​ടെ കു​രി​ശി​നെ​യും കു​രി​ശ​നു​ഭ​വ​ങ്ങ​ളെ​യും നേ​രി​ടാ​നു​ള്ള ആ ​വ​ലി​യ ചൈ​ത​ന്യം ന​മു​ക്കു സ്വീ​ക​രി​ക്കാം.

"​കാ​ൽ​വ​രി​ക്കു​ന്നി​ൽ നി​ന്നേ​റ്റു​വാ​ങ്ങൂ
കാ​ലം കെ​ടു​ത്താ​ത്ത സ്നേ​ഹ​നാ​ളം.'