ഡോ. സെല്‍വരാജന്‍റെ മെത്രാഭിഷേകം 25ന്
Wednesday, March 19, 2025 2:18 AM IST
നെയ്യാറ്റിന്‍കര: നെയ്യാറ്റിന്‍കര രൂപതയുടെ നിയുക്ത സഹമെത്രാന്‍ ഡോ. സെല്‍വരാജന്‍റെ മെത്രാഭിഷേക ചടങ്ങുകള്‍ 25ന് ഉച്ചകഴിഞ്ഞ് 3.30ന് നെയ്യാറ്റിന്‍കര മുനിസിപ്പല്‍ സ്റ്റേഡിയത്തില്‍ നടക്കും.
തിരുക്കര്‍മങ്ങളില്‍ തിരുവനന്തപുരം ആര്‍ച്ച്ബിഷപ് ഡോ. തോമസ് ജെ. നെറ്റോ, നെയ്യാറ്റിന്‍കര ബിഷപ് ഡോ. വിന്‍സെന്‍റ് സാമുവല്‍, പുനലൂര്‍ ബിഷപ് ഡോ. സില്‍വിസ്റ്റര്‍ പൊന്നുമുത്തന്‍ തുടങ്ങിയവര്‍ കാര്‍മികരാവും.
പരിപാടികളില്‍ വത്തിക്കാന്‍ സ്ഥാനപതി ആര്‍ച്ച്ബിഷപ് ലിയോ പോള്‍ദോ ജിറേലി, സിബിസിഐ പ്രസിഡന്‍റ് ആർച്ച്ബിഷപ് മാര്‍ ആൻഡ്രൂസ് താഴത്ത്, തിരുവനന്തപുരം മലങ്കര അതിരൂപത സഹായ മെത്രാന്‍ മാത്യുസ് മാര്‍ പോളികോര്‍പ്പസ് തുടങ്ങിയവര്‍ ആശംസകളര്‍പ്പിക്കും.
മെത്രാഭിഷേക തിരുക്കര്‍മങ്ങള്‍ക്ക് കേരളത്തിലെയും തമിഴ്നാട്ടിലെയും വിവിധ രൂപതകളില്‍ നിന്നുളള മുപ്പതിലധികം ബിഷപ്പുമാര്‍ സഹകാര്‍മികത്വം വഹിക്കും. മുന്നൂറിലധികം വൈദികരുള്‍പ്പെടെ പതിനായിരത്തോളം വിശ്വാസികളെ പ്രതീക്ഷിച്ചാണ് ഒരുക്കങ്ങള്‍ പുരോഗമിക്കുന്നത്.
കഴിഞ്ഞ എട്ടിനാണ് ജുഡീഷല്‍ വികാറായി സേവനമനുഷ്ഠിച്ച് വരികയായിരുന്ന ഡോ. സെല്‍വരാജനെ നെയ്യാറ്റിന്‍കര രൂപതയുടെ സഹമെത്രാനായി ഫ്രാന്‍സിസ് മാർപാപ്പ നിയമിച്ചത്. മെത്രാഭിഷേകത്തിന്‍റെ ഒരുക്കങ്ങള്‍ പൂര്‍ത്തിയായതായി മെത്രാഭിഷേക കമ്മിറ്റി ചെയര്‍മാൻ മോണ്‍. ജി. ക്രിസ്തുദാസ് അറിയിച്ചു.