കാഞ്ഞങ്ങാട്: നവംബര്‍ 14 ന് നടക്കുന്ന ശിശുദിന റാലിയില്‍ കുട്ടികളുടെ പ്രധാനമന്ത്രി, പ്രസിഡന്‍റ്, പ്രതിപക്ഷനേതാവ്, സ്പീക്കര്‍ എന്നീ പദവികളിലേക്കുള്ള കുട്ടികളെ തെരഞ്ഞെടുക്കുന്നതിനായി വിവിധ മത്സരങ്ങൾ സംഘടിപ്പിക്കുന്നു. ഈ മാസം 27 ന് ഹോസ്ദുര്‍ഗ് ഗവ. ഹയര്‍ സെക്കൻഡറി സ്‌കൂളില്‍ നടക്കുന്ന വര്‍ണോത്സവം എന്നു പേരിട്ട പരിപാടിയുടെ ഭാഗമായി പ്രസംഗം, സാഹിത്യരചന, നാടന്‍ പാട്ട്, ലളിതഗാനം, കവിതാലാപനം, കഥ പറച്ചില്‍ മത്സരങ്ങളാണ് സംഘടിപ്പിക്കുക. പരിപാടിയുടെ സംഘാടകസമിതി രൂപീകരണ യോഗം കാഞ്ഞങ്ങാട് നഗരസഭാധ്യക്ഷ കെ.വി. സുജാത ഉദ്ഘാടനം ചെയ്തു. വൈസ് ചെയര്‍മാന്‍ ബില്‍ടെക് അബ്ദുള്ള അധ്യക്ഷത വഹിച്ചു. ടി.എം.എ. കരീം, കെ. സതീശന്‍, കെ. വിജയപാലന്‍, ഭാനുമതി, എം.വി. നാരായണന്‍, സി.വി. ഗിരീശന്‍ എന്നിവര്‍ പ്രസംഗിച്ചു.