പാണക്കാട് തങ്ങൾ പെരുമാറുന്നതു ജമാ അത്തെ ഇസ്‌ലാമിയുടെ അനുയായിയെപ്പോലെ: മുഖ്യമന്ത്രി
Monday, November 18, 2024 6:22 AM IST
പാലക്കാട്: സാദിഖലി തങ്ങൾ ജമാ അത്തെ ഇസ്‌ലാമിയുടെ സാധാരണക്കാരായ അനുയായിയെപ്പോലെ പെരുമാറുകയാണെന്നു മുഖ്യമന്ത്രി പിണറായി വിജയൻ. പാലക്കാട്ടെ കണ്ണാടിയിൽ നടന്ന എൽഡിഎഫ് തെരഞ്ഞെടുപ്പ് കൺവൻഷനിൽ പ്രസംഗിക്കുകയായിരുന്നു അദ്ദേഹം. സന്ദീപ് വാര്യർ തങ്ങളെ കാണാൻ പോയതിനക്കുറിച്ചായിരുന്നു പ്രതികരണം.
നേരത്തേയുണ്ടായിരുന്ന തങ്ങൾമാർ സമൂഹത്തിന്‍റെ വലിയ ആദരവും ബഹുമാനവും നേടിയവരായിരുന്നു. സാദിഖലി തങ്ങൾ അങ്ങനെയല്ല. ഇന്നലെവരെ അയാൾ സ്വീകരിച്ച നിലപാടുകളിലെ അമർഷം ലീഗണികളിലും മതേതരവാദികളിലുമുള്ളതു പാണക്കാട്ടെത്തി ഒരു സന്ദർശനംകൊണ്ടു മാറ്റാനാവുമോ? സന്ദീപ് വാര്യരുടെ പേരുപറയാതെ മുഖ്യമന്ത്രി ചോദിച്ചു.
സന്ദീപിനെ പാർട്ടിയിൽ എത്തിച്ചതിന്‍റെ യഥാർഥവശം വി.ഡി. സതീശൻ പരസ്യമാക്കുന്ന നിലയാണു കാണുന്നത്. അവസരവാദ നിലപാടുകളിലൂടെ നാടിന്‍റെ പൊതു അന്തരീക്ഷം മാറ്റിമറിക്കാമെന്നു കരുതേണ്ട. യുഡിഎഫ് ക്യാമ്പിനെ ഉടനേ പാണക്കാട്ടു പോകാൻ പ്രേരിപ്പിച്ചത് പാർട്ടിയിൽ എത്തിച്ച ആൾ ഉയർത്തുന്ന ആശങ്ക മറികടക്കാനാണ്.
കേന്ദ്രസർക്കാർ കേരളത്തെ തകർക്കുന്ന സമീപനമാണു സ്വീകരിക്കുന്നത്. ഇപ്പോഴത്തെ കേന്ദ്ര സർക്കാരും മുൻ യുപിഎ സർക്കാരും പാവപ്പെട്ടവരെ കൂടുതൽ പാവപ്പെട്ടവരാക്കുന്ന നയം സ്വീകരിച്ചവരാണ്. എന്നാൽ കേരളത്തിൽ അതിദരിദ്രരെ അതിൽനിന്നും ഉയർത്തിക്കൊണ്ടുവരുന്ന നയമാണുള്ളതെന്നു മുഖ്യമന്ത്രി പറഞ്ഞു.