രാമപുരത്ത് ഇന്ന് ക്രൈസ്തവ മഹാസമ്മേളനം
Sunday, November 17, 2024 1:52 AM IST
പാലാ: പാലാ രൂപതയുടെ പ്ലാറ്റിനം ജൂബിലിയോടും ഡിസിഎംഎസ് സപ്തതി വര്‍ഷത്തോടും അനുബന്ധിച്ച് രാമപുരത്തു നടക്കുന്ന ക്രൈസ്തവ മഹാസമ്മേളനത്തില്‍ പങ്കെടുക്കാന്‍ രൂപതയുടെ വിവിധ ഭാഗങ്ങളില്‍നിന്നും വിശ്വാസികള്‍ ഇന്ന് രാമപുരത്ത് എത്തിച്ചേരും.
രാമപുരം സെന്‍റ് അഗസ്റ്റിന്‍സ് ഫൊറോന പള്ളി മൈതാനിയില്‍ ഉച്ചകഴിഞ്ഞു രണ്ടിനാണ് ക്രൈസ്തവ മഹാസമ്മേളനം നടക്കുന്നത്. സമ്മേളനത്തിനു മുന്നോടിയായി അഞ്ഞൂറിലധികം പ്രതിനിധികള്‍ പങ്കെടുക്കുന്ന ദേശീയ സിമ്പോസിയവും സംഘടിപ്പിച്ചിട്ടുണ്ട്.
‘വാഴ്ത്തപ്പെട്ട തേവര്‍പറമ്പില്‍ കുഞ്ഞച്ചന്‍ ദളിത് വിമോചനത്തിനു വഴികാട്ടി’ എന്ന വിഷയത്തില്‍ രാവിലെ നടക്കുന്ന സിമ്പോസിയത്തില്‍ പാലാ ബിഷപ് മാര്‍ ജോസഫ് കല്ലറങ്ങാട്ട് അധ്യക്ഷത വഹിക്കും. കെസിബിസി എസ്‌സി, എസ്ടി, ബിസി കമ്മീഷന്‍ ചെയര്‍മാന്‍ ബിഷപ് ഗീവര്‍ഗീസ് മാര്‍ അപ്രേം ഉദ്ഘാടനം ചെയ്യും.
ഡിസിഎംഎസ് ചങ്ങനാശേരി അതിരൂപത പ്രസിഡന്‍റ് ഡോ. സിജോ ജേക്കബ് , പാലാ രൂപത വിശ്വാസപരിശീലനകേന്ദ്രം ഡയറക്ടര്‍ റവ.ഡോ. ജോര്‍ജ് വര്‍ഗീസ് ഞാറക്കുന്നേല്‍, ഡിസിഎംഎസ് പാലാ രൂപത പ്രസിഡന്‍റ് ബിനോയി ജോണ്‍ എന്നിവര്‍ വിവിധ വിഷയങ്ങളില്‍ പ്രബന്ധങ്ങള്‍ അവതരിപ്പിക്കും. വാഴ്ത്തപ്പെട്ട തേവര്‍പറമ്പില്‍ കുഞ്ഞച്ചന്‍ വൈസ് പോസ്റ്റുലേറ്റര്‍ ഫാ. തോമസ് വെട്ടുകാട്ടില്‍ സിമ്പോസിയത്തിന്‍റെ മോഡറേറ്ററായിരിക്കും.
ഉച്ചകഴിഞ്ഞ് രണ്ടിന് വാഴ്ത്തപ്പെട്ട കുഞ്ഞച്ചന്‍ നഗറില്‍ നടക്കുന്ന ക്രൈസ്തവ മഹാസമ്മേളനത്തില്‍ പാലാ ബിഷപ് മാര്‍ ജോസഫ് കല്ലറങ്ങാട്ട് അധ്യക്ഷത വഹിക്കും. ചങ്ങനാശേരി ആര്‍ച്ച്ബിഷപ് മാര്‍ തോമസ് തറയില്‍ സമ്മേളനം ഉദ്ഘാടനം ചെയ്യും. മോണ്‍. സെബാസ്റ്റ്യന്‍ വേത്താനത്ത് ആമുഖസന്ദേശം നല്‍കും.
കെസിബിസി എസ്‌സി, എസ്ടി, ബിസി കമ്മീഷന്‍ ചെയര്‍മാന്‍ ബിഷപ് ഗീവര്‍ഗീസ് മാര്‍ അപ്രേം, പാലാ രൂപത പ്രോട്ടോ സിഞ്ചെല്ലൂസ് മോണ്‍. ജോസഫ് തടത്തില്‍ എന്നിവര്‍ അനുഗ്രഹപ്രഭാഷണവും മന്ത്രി റോഷി അഗസ്റ്റിന്‍ ജൂബിലി സന്ദേശവും നല്‍കും.
ബിനോയി ജോണ്‍, എംപിമാരായ ഫാന്‍സിസ് ജോര്‍ജ്, ആന്‍റോ ആന്‍റണി, ജോസ് കെ. മാണി എന്നിവരും എംഎല്‍എമാരായ മാണി സി. കാപ്പന്‍, സെബാസ്റ്റ്യന്‍ കുളത്തുങ്കല്‍,മോന്‍സ് ജോസഫ് എന്നിവരും ഡിസിഎംഎസ് സംസ്ഥാന പ്രസിഡന്‍റ് ജെയിംസ് ഇലവുങ്കല്‍, ബിന്ദു സെബാസ്റ്റ്യന്‍ എന്നിവരും ആശംസാപ്രസംഗം നടത്തും.
രാമപുരം ഫൊറോന പള്ളി വികാരി ഫാ. ബര്‍ക്കുമാന്‍സ് കുന്നുംപുറം സ്വാഗതവും പാലാ രൂപത ഡിസിഎംഎസ് ഡയറക്ടര്‍ ഫാ. ജോസ് വടക്കേക്കുറ്റ് കൃതജ്ഞതയും പറയും.