ഭവനങ്ങളില്‍ ബാങ്ക് അക്കൗണ്ട് പ്രോത്സാഹിപ്പിക്കാന് ഫിനോ ബാങ്ക് ഗുല്ലക് അക്കൗണ്ട്
Monday, November 18, 2024 6:22 AM IST
കൊച്ചി: ഫിനോ പേമെന്‍റ്സ് ബാങ്ക് കുടുംബങ്ങളില്‍ നിക്ഷേപശീലം വളര്‍ത്താനായി ‘ഗുല്ലക്’ എന്നപേരില്‍ അക്കൗണ്ട് ആരംഭിച്ചു. കേരളത്തിലുടനീളമുള്ള ഫിനോ ബാങ്കിന്‍റെ 6500 മര്‍ച്ചന്‍റ് പോയിന്‍റുകളില്‍ ഏതെങ്കിലുമൊന്നില്‍ ഗുല്ലക് അക്കൗണ്ട് തുറക്കാം. കുറഞ്ഞത് 1000 രൂപ അക്കൗണ്ട് ബാലന്‍സ് ഉണ്ടാകണം.
ഗുല്ലക് അക്കൗണ്ടിന്‍റെ ഭാഗമായി ഫിനോപേ മൊബൈല്‍ ആപ്പ് വഴി മാസത്തില്‍ 500 രൂപ വിലമതിക്കുന്ന അഞ്ച് യുപിഐ ഇടപാടുകള്‍ അല്ലെങ്കില്‍ ഫിനോയുടെ പങ്കാളി ബാങ്ക് നല്‍കുന്ന കുറഞ്ഞത് 5000 രൂപയുടെ ഒരു വര്‍ഷത്തെ സ്ഥിരനിക്ഷേപം ബുക്ക് ചെയ്യാനോ സര്‍ക്കാര്‍ ക്ഷേമ പദ്ധതി ആനുകൂല്യത്തിന്‍റെ ക്രെഡിറ്റ് ഉപയോഗപ്പെടുത്താനോ കഴിയും. പദ്ധതിയുടെ ഭാഗമായി ഗുല്ലക് ഉപഭോക്താക്കള്‍ക്ക് ഡെബിറ്റ് കാര്‍ഡിലും പ്രതിമാസ പലിശയിലും രണ്ടു ലക്ഷം രൂപ വരെ ഇന്‍ഷ്വറന്‍സ് പരിരക്ഷ ലഭിക്കും.