ചെമ്പൈ പുരസ്‌കാരം എ. കന്യാകുമാരിക്ക്
Monday, November 18, 2024 6:22 AM IST
ഗുരുവായൂര്‍: ഗുരുവായൂര്‍ ദേവസ്വത്തിന്‍റെ ശ്രീഗുരുവായൂരപ്പന്‍ ചെമ്പൈ സ്മാരക പുരസ്‌കാരം പ്രശസ്ത വയലിന്‍ കലാകാരി എ. കന്യാകുമാരിക്ക്. ഗുരുവായൂരപ്പന്‍റെ രൂപം ആലേഖനംചെയ്ത പത്തു ഗ്രാം സ്വര്‍ണപ്പതക്കവും 50,001 രൂപയും പ്രശസ്തിപത്രവും ഫലകവുമടങ്ങിയതാണ് പുരസ്‌കാരം.
ആറു പതിറ്റാണ്ടായി വയലിന്‍വാദനരംഗത്തെ സമഗ്രസംഭാവന കണക്കിലെടുത്താണ് കന്യാകുമാരിയെ പുരസ്‌കാരത്തിനു തെരഞ്ഞെടുത്തത്. ഗുരുവായൂര്‍ ഏകാദശിയോടനുബന്ധിച്ചുള്ള ചെമ്പൈ സംഗീതോത്സവത്തിന്‍റെ ഉദ്ഘാടനദിനമായ 26 നു പുരസ്‌കാരം സമ്മാനിക്കും.