ചായ്പൻകുഴി: വെട്ടിക്കുഴിയിൽ വീണ്ടും കാട്ടാനകൾ ഇറങ്ങി വാഴകളും തെങ്ങുകളും കവുങ്ങുകളും നശിപ്പിച്ചു.
പൊറായ് വർഗീസ്, പൊറായി ബെന്നി എന്നിവരുടെ 200 ഓളം വാഴകളും ആറ് കവുങ്ങുകളും പ്ലാവുകളും കടപ്പാവും നശിപ്പിച്ചു. കാവുങ്ങൽ ആന്‍റണി പൊറായി ദേവസിക്കുട്ടി എന്നിവരുടെ പറമ്പുകളിൽ പ്രവേശിച്ച് ജാതി, തെങ്ങ് എന്നിവ നശിപ്പിച്ചു. കഴിഞ്ഞദിവസം പുലർച്ചെ രണ്ടുമണിയോടെ എത്തിയ കാട്ടാനകളെ ബഹളംവച്ച് ഓടിച്ചുവെങ്കിലും തിരികെ എത്തിയാണ് കൃഷികൾ നശിപ്പിച്ചത്. പുലർച്ചെ അഞ്ചിനാണ് തിരിച്ചുപോയത്. ഫെൻസിംഗ് തകർത്താണ് കൃഷിയിടങ്ങളിലേക്ക് കടന്നത്. ഈ മേഖലകളിൽ ആനയിറങ്ങുന്നത് നിത്യസംഭവമായിട്ടുണ്ട്. ഹാങ്ങിംഗ് ഫെൻസിംഗ് പോലുളള സുരക്ഷാ ക്രമീകരണങ്ങൾ അടിയന്തരമായി സ്ഥാപിക്കണമെന്ന് കോടശേരി പഞ്ചായത്ത് പ്രസിഡന്‍റ് കെ.പി. ജെയിംസ് അധികൃതരോട് ആവശ്യപ്പെട്ടു.