അരിമ്പൂർ: തൃശൂർ - വാടാനപ്പള്ളി സംസ്ഥാന പാതയിൽ അരിമ്പൂർ ഉദയ നഗർ റോഡിനു സമീപം റോഡിൽ വാഹനമിടിച്ചുകിടന്നിരുന്ന മയിലിനെ വെറ്ററിനറി ആശുപത്രിയിൽ എത്തിച്ചെങ്കിലും ചത്തു.
ഇതുവഴി ബൈക്കിൽ വന്ന വാടാനപ്പിള്ളി സ്വദേശികളായ രണ്ടു യുവാക്കളാണ് മയിൽ റോഡിൽകിടന്ന് പിടയുന്നതുകണ്ടത്. ഉടനെ മയിലിനെ താങ്ങിയെടുത്ത് എറവ് വെറ്ററിനറി ആശുപത്രിയിൽ എത്തിച്ചു. ഡോക്ടർ പ്രഥമശുശ്രൂഷ നൽകിയെങ്കിലും ജീവൻ രക്ഷിക്കാനായില്ല. തുടർന്ന് വനം വകുപ്പ് ഉദ്യോഗസ്ഥരെത്തി ജഡം ഏറ്റുവാങ്ങി പോസ്റ്റ്മോർട്ടത്തിനു ശേഷം സംസ്കരിച്ചു.