കല്ലടിക്കോട്: കോങ്ങാട് മണിക്കശേരി പാലാട്ടുപറമ്പിൽ ഹരിദാസന്റെ വീടിനു മുകളിലേക്കു തേക്കുമരംവീണ് മൂന്നുപേർക്കു പരിക്ക്. ഹരിദാസന്റെ ഭാര്യ പാർവതി (48) അമ്മായി ശാന്തകുമാരി (67) മകൻ ഹൃതിക്ദാസ് (26) എന്നിവർക്കാണ് പരിക്കേറ്റത്.
ശാന്തകുമാരിയുടെ കൈയുടെ എല്ലിനു പൊട്ടൽ സംഭവിച്ചു, പാർവതിയുടെ നെറ്റിയിൽ ഓടുവീണ് ആഴത്തിൽ മുറിവേറ്റു. ഹൃതിക്ദാസിന്റെ ദേഹത്ത് ഓടുകൾ വീണ് ചെറിയ പരിക്കുപറ്റി. ഇന്നലെ പുലർച്ചെ രണ്ടിനുണ്ടായ കാറ്റിലാണ് വീടിനു പുറകിലെ മരം കടപുഴകി വീണത്.