നെന്മാറ: കാറ്റും മഴയും നെല്ലിയാമ്പതിയിലും നെന്മാറയിലും മരംവീണ് ഗതാഗത തടസം.
നെല്ലിയാമ്പതി ചെറുനെല്ലിയിൽ ഇന്നലെ രാവിലെ 6.30 നാണ് റോഡിലേക്കു മരം കടപുഴകി വീണത്. നെല്ലിയാമ്പതിയിലേക്കുള്ള കെഎസ്ആർടിസി ബസും നെന്മാറയിലേക്കുവന്ന സ്വകാര്യബസും മറ്റു യാത്രക്കാരും മൂന്നു മണിക്കൂറോളം റോഡിൽ കുടുങ്ങി.
രാവിലെ ഏഴിനു എത്തേണ്ട കെഎസ്ആർടിസി ബസ് 9.45 നാണ് നെല്ലിയാമ്പതിയിലെത്തിയത്. കൊല്ലങ്കോടുനിന്ന് അഗ്നിരക്ഷാസേനയും വനംജീവനക്കാരും എത്തിയാണ് മരം മുറിച്ചുമാറ്റി ഗതാഗതം പുനഃസ്ഥാപിച്ചത്. കഴിഞ്ഞ നാലുദിവസവും നെല്ലിയാമ്പതിറൂട്ടിൽ മരംവീണ് ഗതാഗതം തടസപ്പെട്ടിരുന്നു. നെന്മാറ- പോത്തുണ്ടി റോഡിൽ പേഴുംപാറയിൽ റോഡരികിലെ കൂറ്റൻ വേപ്പുമരം ഉച്ചയ്ക്ക് 12.45 ന് കടപുഴകി വീണു. ഗതാഗതം രണ്ടുമണിക്കൂറോളം മുടങ്ങി. അഗ്നിരക്ഷാസേനയും പ്രദേശവാസികളും ചേർന്നു മരം മുറിച്ചുമാറ്റി.