ഏറ്റുമാനൂർ കുടുംബാരോഗ്യകേന്ദ്രം ഒപി, അത്യാഹിത വിഭാഗം ബ്ലോക്ക് നിര്‍മാണം അന്തിമഘട്ടത്തില്‍
1337514
Friday, September 22, 2023 3:58 AM IST
ഏറ്റുമാനൂർ: ഏറ്റുമാനൂരിലെ കോട്ടയം മെഡിക്കല്‍ കോളജ് കുടുംബാരോഗ്യ കേന്ദ്രത്തിൽ ഒ.പി, അത്യാഹിത വിഭാഗങ്ങൾക്കായി പുതിയതായി നിർമിക്കുന്ന ബ്ലോക്കിന്‍റെ നിര്‍മാണ പ്രവര്‍ത്തനങ്ങള്‍ അന്തിമഘട്ടത്തില്‍.
പ്ലംബിംഗ്, ഇലക്‌ട്രിക്കല്‍ ജോലികളാണ് ഇനി പൂര്‍ത്തീകരിക്കാനുള്ളത്. കഴിഞ്ഞവര്‍ഷം സെപ്റ്റംബറില്‍ സഹകരണ-സാംസ്കാരിക മന്ത്രി വി.എന്‍. വാസവനാണ് നിര്‍മാണോദ്ഘാടനം നിര്‍വഹിച്ചത്.
രണ്ടു നിലകളിലായി 9188 ചതുരശ്രയടി വരുന്ന കെട്ടിടം ദേശീയ ആരോഗ്യ മിഷന്‍ പദ്ധതിയില്‍ ഉള്‍പ്പെടുത്തി 2.78 കോടി രൂപ ചെലവഴിച്ചാണ് നിര്‍മിക്കുന്നത്.
താഴത്തെനിലയില്‍ നാല് ഒപി കേന്ദ്രം, അത്യാഹിത വിഭാഗം, മൈനര്‍ ഓപ്പറേഷൻ തിയറ്റർ, ഡ്രെസിംഗ് റൂം, നഴ്‌സിംഗ് സ്റ്റേഷന്‍, കുത്തിവയ്പ് മുറി, നെബുലൈസേഷന്‍ മുറി, ശൗചാലയം, ഭിന്നശേഷിക്കാര്‍ക്കായുള്ള പ്രത്യേക ശൗചാലയങ്ങള്‍ എന്നിവയും ഒന്നാം നിലയില്‍ ഹൗസ് സര്‍ജന്‍മാരുടെ ഡ്യൂട്ടിമുറി, ലോബി ഹാള്‍, ഇ- ഹെല്‍ത്ത് റൂം എന്നിവയുമുണ്ട് ഒരുക്കിയിട്ടുള്ളത്. നിലവില്‍ 400 രോഗികള്‍ ദിനംപ്രതി കുടുംബാരോഗ്യ കേന്ദ്രത്തില്‍ എത്തുന്നുണ്ട്.