ADVERTISEMENT

ADVERTISEMENT

അതിഥി തൊഴിലാളികളെ ചോദ്യം ചെയ്യാന്‍ പട്ടാളക്കാരുടെ സഹായവും

കോട്ടയം: ക്രിമിനല്‍ കേസുകളില്‍പ്പെടുന്ന അതിഥി തൊഴിലാളികളില്‍നിന്ന് മൊഴിയെടുക്കുക പോലീസിന് ദുഷ്‌കരമായ ജോലി. ആസാം, ബംഗാള്‍, ഒഡീഷ സംസ്ഥാനങ്ങളില്‍നിന്നുള്ളവരാണ് കൊലപാതകം, മയക്കുമരുന്ന് കേസുകളില്‍ കൂടുതലായി ഉള്‍പ്പെടുന്നത്.

പ്രദേശിക ഭാഷകള്‍ സംസാരിക്കുന്ന ഇവരില്‍നിന്ന് വിവരം ആരായാന്‍ മുന്‍പ് പട്ടാളത്തില്‍ ജോലി ചെയ്തിരുന്ന ഹോം ഗാര്‍ഡുകളുടെയും കോട്ടയം സൈനിക കാന്‍റീനിലെ ഉദ്യോഗസ്ഥരുടെയും സഹായം തേടാറുണ്ട്.

വിവിധ സംസ്ഥാനങ്ങളില്‍ ഇവര്‍ ജോലി ചെയ്തപ്പോഴുള്ള ഭാഷാ പരിജ്ഞാനം പ്രതികളില്‍നിന്ന് വിവരം ആരായുന്നതില്‍ പ്രയോജനപ്പെടുന്നു. ഹിന്ദി പൊതുഭാഷയാണെങ്കിലും പ്രാദേശിക ഹിന്ദിയും ഗോത്രഭാഷകളും സംസാരിക്കുന്നവര്‍ കേസുകളില്‍ പെടുന്നുണ്ട്.

കോടതിയില്‍ പ്രതിയെ ഹാജരാക്കുമ്പോഴും വിചാരണവേളയിലും ജഡ്ജിമാരും സൈനികരുടെ ഭാഷാ സഹായം തേടാറുണ്ട്. അടുത്തയിടെയായി വിവിധ ലേബര്‍ ക്യാമ്പുകളില്‍ മലയാളം അറിയാവുന്ന അതിഥി തൊഴിലാളികളെ വിളിച്ചുവരുത്തി ചോദ്യം ചെയ്യല്‍ വേളയില്‍ പോലീസ് ഭാഷ മൊഴിമാറ്റം തേടുന്നതും പതിവാണ്.

ജില്ലയില്‍ ഏറ്റവുമധികം കൊലക്കേസുകളില്‍ പ്രതിയായത് ആസാം സ്വദേശികളാണ്. കഴുത്തു മുറിച്ചും തലയ്ക്കടിച്ചും കൊല നടത്തുകയാണ് ഇവരുടെ രീതി.

ADVERTISEMENT

കാറുകൾ കൂട്ടിയിടിച്ച് അപകടം

കടുത്തുരുത്തി: നിയന്ത്രണംവിട്ട കാര്‍ എതിരേവന്ന കാറുമായി കൂട്ടിയിടിച്ച് അപകടം. കാര്‍ യാത്രികാര്‍ നിസാര പരിക്കുകളോടെ രക്ഷപ്പെട്ടു. രണ്ട് കാറുകളുടെയും മുന്‍ഭാഗം തകര്‍ന്നു. ഏറ്റുമാനൂര്‍-എറണാകുളം റോഡില്‍ കുറുപ്പന്തറ ആറാംമൈലിലാണ് അപകടം. ഇന്നലെ വൈകുന്നേരം അഞ്ചോടെയാണ് അപകടം. മുട്ടുചിറ ഭാഗത്തുനിന്നു കോട്ടയത്തേക്ക് പോകുകയായിരുന്ന വാഗണര്‍ കാര്‍ നിയന്ത്രണംവിട്ട് കുറുപ്പന്തറ ഭാഗത്തുനിന്നു വരികയായിരുന്ന കാറില്‍ ഇടിക്കുകയായിരുന്നു. വാഗണര്‍ കാറിന്‍റെ ഡ്രൈവര്‍ ഉറങ്ങിയതാണ് അപകട കാരണമെന്നു നാട്ടുകാര്‍ പറഞ്ഞു. ഇതുവഴിയുള്ള ഗതാഗതം 15 മിനിറ്റ്‌ തടസപ്പെട്ടു.

നാട്ടുമത്സ്യങ്ങളുടെ ലഭ്യത കുറയുന്നു : മത്സ്യത്തൊഴിലാളികള്‍ പ്രതിസന്ധിയില്‍

കടുത്തുരുത്തി: തോടുകളിലും പുഴകളിലും നാട്ടുമത്സ്യങ്ങളുടെ ലഭ്യത കുറയുന്നു. ഉള്‍നാടന്‍ മത്സ്യത്തൊഴിലാളികള്‍ പ്രതിസന്ധിയില്‍. സാധാരണ വെള്ളപ്പൊക്കസമയത്ത് മീന്‍ പിടിക്കാനിറങ്ങുന്നവർക്ക് കുട്ട നിറയെ മീന്‍ കിട്ടുമായിരുന്നു. എന്നാല്‍ അടുത്ത കാലങ്ങളിലൊന്നും വെള്ളപ്പൊക്കത്തില്‍ പറയുന്നത്ര മീനൊന്നും കിട്ടിയില്ലെന്നാണ് ഈ മേഖലയില്‍ പ്രവര്‍ത്തിക്കുന്നവര്‍ പറയുന്നത്. കടുത്തുരുത്തിയുടെ പടിഞ്ഞാറന്‍ പ്രദേശങ്ങളിലെ തോടുകളിലും പുഴകളിലും നാട്ടുമത്സ്യങ്ങളുടെ ലഭ്യത കുറയുകയാണ്. ഇതോടെ ഉള്‍നാടന്‍ മത്സ്യത്തൊഴിലാളികളുടെ ജീവിതമാണ് പ്രതിസന്ധിയിലായിരിക്കു ന്നത്. അപ്പര്‍കുട്ടനാടന്‍ മേഖലയിലെ പാടശേഖരങ്ങളിലും ചെറുതോടുകളിലും മത്സ്യങ്ങളുടെ ലഭ്യത കുറഞ്ഞതോടെ ഒരു പകല്‍ മുഴുവന്‍ പണിയെടുത്താലും കാര്യമായ നേട്ടമില്ലാത്ത അവസ്ഥയാണെന്ന് ഉള്‍നാടന്‍ മത്സ്യത്തൊഴിലാളികള്‍ പറയുന്നു. മുന്‍കാലങ്ങളില്‍ ദിവസം 20 മുതല്‍ 25 കിലോ വരെ മത്സ്യം കിട്ടിയിരുന്നു. തോടുകളില്‍നിന്നു കാരി, വരാല്‍, വാള, കൂരി, ചെമ്പല്ലി, പരല്‍, പള്ളത്തി, മണല്‍വാള, ആറ്റുചെമ്പല്ലി, മഞ്ഞക്കൂരി എന്നിങ്ങനെയുള്ള മീനുകളാണ് ലഭിച്ചിരുന്നത്. ഇത്തരം നാട്ടുമത്സ്യങ്ങള്‍ മാര്‍ക്കറ്റില്‍ എത്തിച്ചാല്‍ മറ്റു മത്സ്യങ്ങളേക്കാള്‍ ആവശ്യക്കാരുണ്ടായിരുന്നു. അതുകൊണ്ടുതന്നെ ഇവയ്ക്കു ഉയര്‍ന്ന വിലയും ലഭിച്ചിരുന്നു. കരിമീനിന് കിലോ 300 മുതല്‍ 500 വരെയാണ് വലുപ്പത്തിനനുസരിച്ച് വില. മഞ്ഞക്കൂരി - 300, വരാല്‍ - 500 മുതല്‍ 600, കാരി - 400, വാള - 200 മുതല്‍ 400 വരെ, ചെമ്പല്ലി - 250, കറൂപ്പ് - 200 എന്നിങ്ങനെയാണ് വിവിധയിടങ്ങളിലെ വില. കടുത്തുരുത്തി മാര്‍ക്കറ്റ്, കുറുപ്പന്തറ, കല്ലറ, മാന്നാര്‍, തലയോലപ്പറമ്പ്, മുളക്കുളം എന്നിവിടങ്ങളിലെല്ലാം ഇത്തരം മത്സ്യങ്ങള്‍ വില്പന നടക്കുന്നുണ്ട്. കല്ലറ, കടുത്തുരുത്തി, മാഞ്ഞൂര്‍, നീണ്ടൂര്‍, തലയാഴം, വെച്ചൂര്‍, ചെമ്പ്, മുളക്കുളം, തലയോലപ്പറമ്പ്, മറവന്തുരുത്ത്, വെള്ളൂര്‍ പഞ്ചായത്തുകളിലെ തോടുകളും പുഴകളും ഒരുകാലത്ത് മത്സ്യസമൃദ്ധമായിരുന്നു. പ്ലാസ്റ്റിക് ഉള്‍പ്പെടെയുള്ള മാലിന്യങ്ങള്‍ മത്സ്യസമ്പത്ത് നശിപ്പിക്കാനിടയാക്കിയതായി മത്സ്യതൊഴിലാളിയായ മുണ്ടാര്‍ സ്വദേശി പത്മനാഭന്‍ പറഞ്ഞു. പാടശേഖരങ്ങളിലെ നെല്ലിന് അമിതമായി കീടനാശിനിയും രാസവളപ്രയോഗവും നടത്തിയതും ഈ വെള്ളം തോടുകളിലേക്ക് ഒഴുക്കുന്നതും മീനുകളുടെ നാശത്തിന് കാരണമായി. കായലില്‍നിന്ന് ഉപ്പുവെള്ളം കയറ്റിവിടാത്തതും ചില മത്സ്യങ്ങളുടെ വളര്‍ച്ചയെ കാര്യമായി ബാധിച്ചു. തോടുകളില്‍ നാട്ടുമത്സ്യങ്ങള്‍ കുറഞ്ഞതോടെ മത്സ്യഫെഡ് രോഹു, കട്‌ല, വലിയവാള എന്നിവയുടെ കുഞ്ഞുങ്ങളെ നിക്ഷേപിക്കാറുണ്ടെങ്കിലും ഇത്തരം വലിയ മത്സ്യങ്ങള്‍ ചെറി നാട്ടുമത്സ്യങ്ങളെ തിന്നൊടുക്കിയെന്ന് പരമ്പരാഗത മത്സ്യത്തൊഴിലാളിയായ കുട്ടപ്പന്‍ പറഞ്ഞു.

മരിയൻ കോളജിൽ കിക്‌ബോക്സിംഗ് പരിശീലനക്യാമ്പ്

കുട്ടിക്കാനം: മരിയൻ കോളജിൽ 30 വരെ നടക്കുന്ന പത്താമത് അന്തർദേശീയ കിക്‌ബോക്സിംഗ് പരിശീലന ക്യാമ്പ് ആരംഭിച്ചു. വാക്കോ ഇന്ത്യ കേരള അസോസിയേഷനും മരിയൻ കോളജിലെ ഹെൽത്ത് ആൻഡ് വെൽനെസ് ഡിപ്പാർട്ട്മെന്‍റും സംയുക്തമായാണ് ക്യാമ്പ് സംഘടിപ്പിച്ചിരിക്കുന്നത്. ദേശീയ, അന്തർദേശീയ തലത്തിൽ അംഗീകരിക്കപ്പെട്ടിട്ടുള്ള പരിശീലകരുടെ നേതൃത്വത്തിലാണ് ക്യാമ്പ് നടത്തപ്പെടുന്നത്. ഏകദേശം 200ഓളം കായികപ്രതിഭകൾ പരിശീലനത്തിൽ പങ്കെടുക്കുന്നുണ്ട്. കിക്‌ബോക്സിംഗിനെപ്പറ്റി ആഴത്തിൽ പഠിക്കാൻ സാധിക്കുന്നതോടൊപ്പം ആഗോളതലത്തിൽ അംഗീകരിക്കപ്പെടുന്ന പരിശീലന മാതൃകകൾ വഴി താരങ്ങൾക്ക് അത്യുന്നതമായ പരിശീലനം ലഭ്യമാകുന്നു. വിവിധ സംസ്ഥാനങ്ങളിൽനിന്നുമെത്തിയ കായികതാരങ്ങൾക്കും ഉയർന്ന നിലവാരത്തിലുള്ള പരിശീലനം നേടാൻ ആഗ്രഹിക്കുന്നവർക്കും ഈ ക്യാമ്പ് പുതിയ അനുഭവങ്ങളും അറിവുകളും പകരുന്ന പ്രധാന വേദിയായിരിക്കുമെന്ന് സംഘാടകർ വ്യക്തമാക്കി.

കോട്ടയം നഗരത്തില്‍ ഇന്ന് ഉച്ചകഴിഞ്ഞ് ഗതാഗത ക്രമീകരണം

കോട്ടയം: സംസ്ഥാന സർക്കാരിന്‍റെ നാലാം വാര്‍ഷികത്തിന്‍റെ ഭാഗമായ “എന്‍റെ കേരളം പ്രദര്‍ശന വിപണന മേള’’യുടെ ഉദ്ഘാടനത്തോടനുബന്ധിച്ചുള്ള സാംസ്‌കാരിക ഘോഷയാത്രയുടെ ഭാഗമായി കോട്ടയം നഗരത്തില്‍ ഇന്നു മൂന്നുമുതല്‍ അഞ്ചുവരെ ഗതാഗത ക്രമീകരണം ഏര്‍പ്പെടുത്തി. എംസി റോഡിലൂടെ നാട്ടകം ഭാഗത്തുനിന്നു വരുന്ന വലിയ വാഹനങ്ങള്‍ സിമന്‍റ് കവലയില്‍നിന്ന് ഇടത്തേക്കു തിരിഞ്ഞ് പാറേച്ചാല്‍ ബൈപാസ്, തിരുവാതുക്കല്‍, കുരിശുപള്ളി വഴി അറുത്തൂട്ടി ജംഗ്ഷനിലെത്തി വലത്തേക്ക് തിരിഞ്ഞു ചാലുകുന്ന് ജംഗ്ഷനിലെത്തി മെഡിക്കല്‍ കോളജ് ഭാഗത്തേക്ക് പോവുക. കുമരകം ഭാഗത്തേക്കു പോകേണ്ട വാഹനങ്ങള്‍ തിരുവാതുക്കല്‍, അറുത്തൂട്ടി വഴി പോവുക. എംസി റോഡിലൂടെ വരുന്ന കിഴക്കോട്ടു പോകേണ്ട ചെറുവാഹനങ്ങള്‍ മണിപ്പുഴനിന്നു വലത്തോട്ടു തിരിഞ്ഞ് ബൈപാസ് റോഡ്, ഈരയില്‍ക്കടവ് വഴി മനോരമ ജംഗ്ഷനിലെത്തി കിഴക്കോട്ടു പോവുക. വലിയ വാഹനങ്ങള്‍ മണിപ്പുഴ ജംഗ്ഷനിൽനിന്നു തിരിഞ്ഞ് കടുവാക്കുളം, കൊല്ലാടുവഴി കഞ്ഞിക്കുഴിയിലെത്തി പോവുക. എംസി റോഡ് നാഗമ്പടത്തുനിന്നു വരുന്ന വാഹനങ്ങള്‍ സീസേഴ്സ് ജംഗ്ഷന്‍, റെയില്‍വേ സ്റ്റേഷന്‍, ലോഗോസ് വഴി ചന്തക്കവലയിലെത്തി എംഎല്‍ റോഡിലൂടെ കോടിമത ഭാഗത്തേക്കു പോവുക. കഞ്ഞിക്കുഴിക്ക് പോകേണ്ട വാഹനങ്ങള്‍ റെയിൽവേ സ്റ്റേഷന്‍ വഴി ലോഗോസിലെത്തി പോവുക. ഏറ്റുമാനൂരിൽനിന്നു വരുന്ന വലിയ വാഹനങ്ങള്‍ ഗാന്ധിനഗറില്‍നിന്നു തിരിഞ്ഞ് ചുങ്കം, ചാലുകുന്ന്, അറുത്തൂട്ടി വഴി തിരുവാതുക്കല്‍ എത്തി സിമെന്‍റ് കവലവഴി പോവുക.കുമരകം ഭാഗത്തു നിന്നുവരുന്ന വാഹനങ്ങള്‍ ബേക്കര്‍ ജംഗ്ഷനിലെത്തി സീസേഴ്സ് ജംഗ്ഷന്‍ വഴി വലത്തേക്കു തിരിഞ്ഞ് ബസ് സ്റ്റാന്‍ഡിലേക്ക് പോവുക. നാഗമ്പടം സ്റ്റാന്‍ഡില്‍നിന്നു കാരാപ്പുഴ, തിരുവാതുക്കല്‍ ഭാഗത്തേക്കു പോകേണ്ട ബസുകള്‍ ബേക്കര്‍ ജംഗ്ഷനിലെത്തി അറുത്തൂട്ടി വഴി തിരുവാതുക്കല്‍ ഭാഗത്തേക്ക് പോവുക. കെകെ റോഡിലൂടെ വരുന്ന ചങ്ങനാശേരി ഭാഗത്തേക്കു പോകേണ്ട വലിയ വാഹനങ്ങള്‍ കഞ്ഞിക്കുഴി, ദേവലോകം, കടുവാക്കുളം വഴി പോവുക. ആര്‍.ആര്‍. ജംഗ്ഷനില്‍നിന്നുള്ള എല്ലാ വാഹനങ്ങളും തിരുനക്കര സ്റ്റാന്‍ഡുവഴി ചിത്രാ സ്റ്റുഡിയോയുടെ മുന്‍വശത്തുകൂടി ബേക്കര്‍ ജംഗ്ഷനിലെത്തി പോവുക. കുമരകം റോഡിലൂടെ വരുന്ന എല്ലാ വാഹനങ്ങളും ബേക്കര്‍ ജംഗഷനില്‍ നിന്നും എം.സി. റോഡ് സീസേഴ്സ് ജംഗ്ഷനിലെത്തി നാഗമ്പടം വഴി പോവുക. കെകെ റോഡിലൂടെ വരുന്ന കെഎസ്ആര്‍ടിസി ഒഴികെയുള്ള ബസുകള്‍ കളക്‌ടറേറ്റ് ജംഗ്ഷനില്‍നിന്നു തിരിഞ്ഞ് ലോഗോസ് വഴി നാഗമ്പടം സ്റ്റാന്‍ഡിലേക്കും അവിടെനിന്നു തിരികെ മുന്‍സിപ്പല്‍ പാര്‍ക്കിനു മുന്‍വശത്തുവന്ന് ഇടത്തേക്കു തിരിഞ്ഞ് ലോഗോസ് ജംഗ്ഷന്‍ വഴിയും പോകേണ്ടതാണ്.

പുതുപ്പള്ളി പള്ളി പെരുന്നാളിന് 28നു കൊടിയേറും

പുതുപ്പള്ളി: ജോര്‍ജിയന്‍ തീര്‍ഥാടനകേന്ദ്രമായ സെന്‍റ് ജോര്‍ജ് ഓര്‍ത്തഡോക്‌സ് വലിയ പള്ളിയില്‍ വിശുദ്ധ ഗീവര്‍ഗീസ് സഹദായുടെ പെരുന്നാളിന് 28നു കൊടിയേറും. ഉച്ചകഴിഞ്ഞു രണ്ടിനു പുതുപ്പള്ളി, എറികാട് കരകളില്‍നിന്നു കൊടിമര ഘോഷയാത്ര ആരംഭിക്കും. വൈകുന്നേരം അഞ്ചിനു വികാരി ഫാ. വര്‍ഗീസ് വര്‍ഗീസ് കൊടിയേറ്റും. 29നും 30നും രാവിലെ 6.30നു പ്രഭാത നമസ്‌കാരം, വിശുദ്ധ കുര്‍ബാന. വൈകുന്നേരം 5.30നു സന്ധ്യാ നമസ്‌കാരം. മേയ് ഒന്നു മുതല്‍ മൂന്നു വരെ രാത്രി 6.15നു പുതുപ്പള്ളി കണ്‍വന്‍ഷനും രാത്രി എട്ടിനു മധ്യസ്ഥപ്രാര്‍ഥനയും നടക്കും. മേയ് ഒന്നിനു രാവിലെ ഒന്പതിനു വെച്ചൂട്ടിനുള്ള മാങ്ങാ അരിയല്‍ ആരംഭിക്കും.നാലിനു രാവിലെ 11.30നു സാംസ്‌കാരിക സമ്മേളനം മഹാരാഷ്‌ട്ര ഗവര്‍ണര്‍ സി.പി. രാധാകൃഷ്ണന്‍ ഉദ്ഘാടനം ചെയ്യും. ഓര്‍ഡര്‍ ഓഫ് സെന്‍റ് ജോര്‍ജ് പുരസ്‌കാരം കുര്യാക്കോസ് മാര്‍ ക്ലീമീസിനു സമ്മാനിക്കും. അഞ്ചിനു രാത്രി ആറിനു വിവിധ കുരിശടികളില്‍നിന്നുള്ള പുതുപ്പള്ളി തീര്‍ഥാടനം. രാത്രി ഏഴിനു വിശുദ്ധ ഗീവര്‍ഗീസ് സഹദാ അനുസ്മരണം. ആറിനു രാവിലെ 11നു പൊന്നിന്‍കുരിശ് മദ്ബഹയില്‍ പ്രതിഷ്ഠിക്കും. ഉച്ചകഴിഞ്ഞു രണ്ടിനു വിറകിടീല്‍ ഘോഷയാത്ര, വൈകുന്നേരം 4.30നു പന്തിരുനാഴി പുറത്തെടുക്കല്‍. 5.30നു ബസേലിയോസ് മാര്‍ത്തോമ്മാ മാത്യൂസ് തൃതീയന്‍ കാതോലിക്കാ ബാവായുടെ മുഖ്യകാര്‍മികത്വത്തില്‍ പെരുന്നാള്‍ സന്ധ്യാനമസ്‌കാരം. ഏഴിനു പ്രദക്ഷിണം. വലിയ പെരുന്നാള്‍ ദിനമായ ഏഴിനു പുലര്‍ച്ചെ ഒന്നിന് വെച്ചൂട്ടിനുള്ള അരിയിടീല്‍. രാവിലെ 7.30നു പ്രഭാത നമസ്‌കാരം, 8.30നു ബസേലിയോസ് മാര്‍ത്തോമ്മാ മാത്യൂസ് തൃതീയന്‍ കാതോലിക്കാ ബാവായുടെ മുഖ്യകാര്‍മികത്വത്തില്‍ ഒന്പതിന്മേല്‍ കുര്‍ബാന. 11.15നു വെച്ചൂട്ട് നേര്‍ച്ചസദ്യ, വടക്കേപ്പന്തലില്‍ കുട്ടികള്‍ക്ക് ആദ്യ ചോറൂട്ട്. ഉച്ചകഴിഞ്ഞു രണ്ടിനു പ്രദക്ഷിണം, നാലിനു നേര്‍ച്ചവിളമ്പ്. മേയ് 23നു രാവിലെ വിശുദ്ധ കുര്‍ബാനയ്ക്കുശേഷം കൊടിയിറക്കും.

തക്കാളിയുമായി പോയ പിക്കപ്പ് വാന്‍ മറിഞ്ഞു

കോട്ടയം: തക്കാളിയുമായി പോയ പിക്കപ്പ് വാന്‍ മറിഞ്ഞു റോഡ് നിറയെ തക്കാളി. ഇന്നലെ പുലര്‍ച്ചെ എംസി റോഡില്‍ കോട്ടയം എസ്എച്ച് മൗണ്ട് ജംഗ്ഷനിലാണ് തക്കാളിവണ്ടി മറിഞ്ഞത്. മൈസൂരില്‍നിന്നു തക്കാളിയുമായി കൊല്ലത്തേക്ക് പോകുകയായിരുന്നു പിക്കപ്പ് വാന്‍. അലക്ഷ്യമായി പാഞ്ഞുവന്ന വാഹനത്തെ ഇടിക്കാതിരിക്കാൻ വെട്ടിച്ചപ്പോഴാണ് അപകടമുണ്ടായത്. അപകടത്തില്‍ ആര്‍ക്കും പരിക്കില്ല. മറിഞ്ഞ പിക്കപ്പ് വാനിലുണ്ടായിരുന്ന തക്കാളി മുഴുവന്‍ റോഡില്‍ നിരന്നു. രാവിലെ നാട്ടുകാരും സമീപവാസികളും റോഡില്‍ നിരന്ന തക്കാളി പെറുക്കിയെടുത്തു. ഏതാനു നാളുകള്‍ക്ക് മുമ്പ് എസ്എച്ച് മൗണ്ടിനു സമീപം ചെമ്പരത്തിമൂട്ടില്‍ കോഴിയുമായി പോയ ലോറി മറിഞ്ഞിരുന്നു. അന്നു റോഡില്‍ വീണ കോഴികളെ നാട്ടുകാര്‍ കൊണ്ടുപോയിരുന്നു.

കോട്ടയം നഗരസഭയുടെ പദ്ധതികൾക്ക് അംഗീകാരം

കോട്ടയം: കോട്ടയം നഗരസഭയുടെ 2024-25 വാർഷിക പദ്ധതിയിലെ പുതിയ പദ്ധതികൾക്ക് സർക്കാർ മാർഗനിർദേശ പ്രകാരമുള്ള സമയക്രമം പാലിച്ച് ജില്ലാ ആസൂത്രണ സമിതിയുടെ അംഗീകാരം ലഭിച്ചു. നഗരസഭയുടെ സ്പിൽ ഓവർ പദ്ധതികൾ റദ്ദു ചെയ്ത സർക്കാർ നടപടികൾ പിൻവലിച്ചതായി അറിയിപ്പു ലഭിച്ചെന്നും നഗരസഭാ ചെയർപേഴ്സൺ ബിൻസി സെബാസ്റ്റ്യൻ അറിയിച്ചു. സ്പിൽ ഓവർ പദ്ധതികൾ ഉൾപ്പെടുത്തി 2024-25 സന്പൂർണ വാർഷിക പദ്ധതിക്ക് അംഗീകാരം വാങ്ങണമെന്നുള്ള സർക്കാർ നിർദേശത്തിന്‍റെ അടിസ്ഥാനത്തിൽ സ്പിൽ ഓവർ പദ്ധതികൾക്കു നഗരസഭാ കൗൺസിൽ അംഗീകാരം നൽകിയിരുന്നു. എന്നാൽ, ഒരു കൗൺസിലർ സ്പിൽ ഓവർ പദ്ധതികൾ അംഗീകരിച്ച കൗൺസിൽ തീരുമാനം റദ്ദാക്കണമെന്നാവശ്യപ്പെട്ടു സർക്കാരിനു പരാതി നൽകുകയായിരുന്നു. തുടർന്ന് സർക്കാർ സ്പിൽ ഓവർ പദ്ധതികൾ നടപ്പാക്കുന്നത് തടഞ്ഞിരുന്നു. പൊതുമരാമത്ത് വർക്കുകൾ ഉൾപ്പെടെ തടസപ്പെട്ടതോടെ നഗരസഭാ കൗൺസിൽ സർക്കാർ ഉത്തരവ് പിൻവലിക്കണമെന്ന് ആവശ്യപ്പെട്ടിരുന്നു. ഈയാവശ്യം ഉന്നയിച്ച് നഗരസഭാ കൗൺസിൽ സർക്കാരിന് പലതവണ കത്തുനൽകുകയും ചെയ്തിരുന്നു. ഇതേത്തുടർന്ന് നഗരസഭയുടെ ആവശ്യം പരിഗണിച്ച സർക്കാർ ഉത്തരവ് പിൻവലിക്കുകയായിരുന്നു. ഉത്തരവു വന്നതോടെ സ്പിൽ ഓവർ പദ്ധതികളുടെ പേയ്മെന്‍റ് ഉൾപ്പെടെയുള്ള നടപടികൾ പൂർത്തീകരിക്കാൻ സാധിച്ചെന്നും ചെയർപേഴ്സൺ അറിയിച്ചു.

കോത്തലയിൽ കുറുക്കന്മാരുടെ ശല്യം വ്യാപകം

കോത്തല: കുറുക്കന്‍റെ ഭീതിയിൽ നാട്ടുകാർ; പ്രതിരോധവുമായി പഞ്ചായത്ത്. കോത്തലയിലെ പറയരുകുന്ന് പ്രദേശത്ത് കുറുക്കന്മാരുടെ ശല്യം വ്യാപകമായി. കുറുക്കന്‍റെ ആക്രമണത്തിൽ വളർത്തുമൃഗങ്ങൾക്ക് പരിക്കേറ്റു. രണ്ടാഴ്ചയിലധികമായി കുറുക്കന്മാരെ കോത്തലയിലും പറയരുകുന്നിലും പരിസരപ്രദേശങ്ങളിലും കാണുന്നുണ്ട്. കുറുക്കന്‍റെ കടിയേറ്റ നായ്ക്കൾക്ക് പ്രതിരോധ കുത്തിവയ്പ് എടുത്തു. ജനപ്രതിനിധികളുടെയും ആരോഗ്യ പ്രവർത്തകരുടെയും നേതൃത്വത്തിൽ പത്താം വാർഡിലെ പറയരുകുന്നിലും പരിസരപ്രദേശത്തും വീടുകൾ സന്ദർശിച്ച് രോഗ പ്രതിരോധ പ്രവർത്തനങ്ങളും ബോധവത്കരണവും നടത്തി. ജനങ്ങളുടെ ആശങ്കകളും പരാതികളും പരിഹരിക്കുന്നതിനുള്ള നടപടികൾ സ്വീകരിക്കുമെന്ന് ഉറപ്പും നൽകി. വനം വകുപ്പിനെ വിവരം അറിയിച്ചിട്ടുണ്ട്. ഇന്നു രാവിലെ 9.30 മുതൽ കോത്തല എൻഎസ്എസ് ഹൈസ്കൂൾ മൈതാനിയിൽ പക്ഷിമൃഗാദികൾക്കുള്ള രോഗപ്രതിരോധ കുത്തിവയ്പ് നടക്കും. ആശങ്കപ്പെടേണ്ട സാഹചര്യമില്ലെന്ന് കൂരോപ്പട കുടുംബാരോഗ്യ കേന്ദ്രത്തിലെ ഡോ. തസ്‌ലിം ഹാഷിം പറഞ്ഞു. പഞ്ചായത്ത് പ്രസിഡന്‍റ് അമ്പിളി മാത്യു, വൈസ് പ്രസിഡന്‍റ് ഗോപി ഉല്ലാസ്, പഞ്ചായത്തംഗങ്ങളായ പി.എസ്.രാജൻ, അനിൽ കൂരോപ്പട, വെറ്ററിനറി ഡോ. ലിൻഡ, ആരോഗ്യ പ്രവർത്തകരായ പ്രവീൺ, സന്തോഷ്, ശ്രീനിവാസൻ, ആശാ പ്രവർത്തകരായ ഇന്ദിരാദേവി, മാലിനി,റംലി തുടങ്ങിയവർ നേതൃത്വം നൽകി.

വിലങ്ങുപാറ-മരോട്ടിപ്പുഴ റോഡിൽ മാലിന്യം തള്ളുന്നതായി പരാതി

ളാക്കാട്ടൂർ: മണർകാട്, കൂരോപ്പട പഞ്ചായത്തുകളുടെ അതിർത്തിയായ വിലങ്ങുപാറ - മരോട്ടിപ്പുഴ റോഡിൽ പതിവായി മാലിന്യം തള്ളുന്നെന്നു പരാതി. തോട്ടപ്പള്ളി കുടുംബാരോഗ്യ കേന്ദ്രത്തിനു സമീപമുള്ള റോഡരികിൽ രാത്രികാലങ്ങളിൽ വാഹനങ്ങളിൽ കൊണ്ടുവന്ന് അറവുശാല മാലിന്യങ്ങളും പ്ലാസ്റ്റിക് മാലിന്യങ്ങളും തള്ളുകയാണ്. പ്ലാസ്റ്റിക് കൂടുകളിൽ തള്ളുന്ന ഭക്ഷണാവശിഷ്ടങ്ങൾ രാത്രി കുറുക്കനും നായ്ക്കളും ഉൾപ്പെടെയുള്ള ജീവികൾ ഇവ വലിച്ചു റോഡിലേക്ക് ഇടുകയും യാത്രക്കാർക്ക് ബുദ്ധിമുട്ടുണ്ടാക്കുകയും ചെയ്യുന്നു. മാസങ്ങൾക്കു മുൻപ് അറവുശാല മാലിന്യങ്ങൾ ചാക്കിൽ കെട്ടി ഇവിടെ തള്ളിയിരുന്നു. ദുർഗന്ധം അസഹ്യമായതിനെത്തുടർന്ന് നാട്ടുകാർതന്നെ മറവു ചെയ്യുകയായിരുന്നു. റോഡിനു സമീപത്തൂടെയാണ് വിലങ്ങുപാറ തോട് ഒഴുകുന്നത്. മാലിന്യങ്ങൾ ഒഴുകി തോട്ടിൽ പതിക്കുന്നത് നിരവധി ആരോഗ്യപ്രശ്നങ്ങൾക്കു വഴിയ്ക്കുന്നുണ്ടെന്ന് നാട്ടുകാർ പറയുന്നു.

“ജീവനേക്കാള്‍ വിലയുണ്ടിതിന്’’ : ഫ്രാൻസിസ് പാപ്പാ സമ്മാനിച്ച ജപമാല നെഞ്ചോടു ചേർത്ത് സിമിൽ

കോട്ടയം: “എന്‍റെ ജീവനേക്കാള്‍ വിലയുണ്ടിതിന്’’ എന്നു പറഞ്ഞ് ഫ്രാന്‍സിസ് പാപ്പായുടെ സമ്മാനമായ ജപമാല നെഞ്ചോടു ചേര്‍ത്ത് ഓര്‍മ പങ്കിടുകയാണ് കോട്ടയം വിജയപുരം രൂപത, കുന്നുംഭാഗം മൗണ്ട് കാര്‍മല്‍ പള്ളി ഇടവകയിലെ ചന്ദനപ്പറമ്പില്‍ സെബാസ്റ്റ്യന്‍റെയും ലില്ലിക്കുട്ടിയുടെയും ഇളയ മകള്‍ സിമില്‍ സെബാസ്റ്റ്യന്‍. ജന്മനാ നട്ടെല്ലുരോഗബാധിതയായി തളര്‍ന്ന സിമില്‍, വീല്‍ച്ചെയറിന്‍റെ സഹായത്തോടെയാണ് ജീവിതം മുന്നോട്ടു കൊണ്ടുപോകുന്നത്. രോഗത്തെ അതിജീവിച്ച് മുന്നേറാൻ സിമിലിനെ സഹായിച്ചത് കരകൗശലരംഗത്തെ കഴിവുകളാണ്. പതിനഞ്ചു വര്‍ഷത്തോളമായി പെയിന്‍റിംഗുകള്‍, മറ്റു കരകൗശല വസ്തുക്കള്‍, പേന, കുടകള്‍ തുടങ്ങിയവ നിര്‍മിച്ച് നല്‍കി ജീവിതം മുന്നോട്ടു കൊണ്ടുപോകുകയാണ് സിമില്‍. സിമിലിന്‍റെ കഴിവുകള്‍ തിരിച്ചറിഞ്ഞ ഫാ. വര്‍ഗീസ് കോട്ടക്കാട്ടാണ് മാര്‍പാപ്പയ്ക്ക് ഒരു സമ്മാനം നല്‍കാന്‍ സിമിലിനെ പ്രചോദിപ്പിച്ചത്. വ്യത്യസ്തമായ രീതിയില്‍ ചെടികളുടെ വിത്തുകള്‍ ഉള്ളില്‍വച്ച പേപ്പര്‍ പേന സിമില്‍ മാര്‍പാപ്പയ്ക്കായി നിര്‍മിച്ചു. വിജയപുരം രൂപത സഹായമെത്രാനായ ബിഷപ് ഡോ. ജസ്റ്റിന്‍ മഠത്തിൽപ്പറമ്പില്‍ സ്ഥാനമേറ്റതിനെത്തുടര്‍ന്ന് റോമില്‍ പാപ്പായെ സന്ദര്‍ശിക്കാന്‍ പോയ വേളയില്‍ പാപ്പായ്ക്കു സിമിലിന്‍റെ സമ്മാനം നല്‍കുകയും സിമിലിനെക്കുറിച്ചും രോഗവിവരങ്ങളെക്കുറിച്ചും ധരിപ്പിക്കുകയും ചെയ്തു. സിമിലിന്‍റെ സ്‌നേഹസമ്മാനം സ്വീകരിച്ച മാര്‍പാപ്പ, വെളുത്ത മുത്തുമണികളുള്ള ജപമാല സിമിലിനു സമ്മാനമായി നല്‍കണമെന്നു നിര്‍ദേശിച്ചു ഡോ. ജസ്റ്റിന്‍ മഠത്തില്‍പ്പറമ്പിലിനെ ഏല്പിച്ചു. മാര്‍പാപ്പയുടെ സമ്മാനമായ ജപമാല തന്‍റെ നെഞ്ചോടു ചേര്‍ത്ത് ഓരോ മുത്തുമണിയിലും ആയിരം പ്രാര്‍ഥനകളര്‍പ്പിച്ച് സ്‌നേഹാര്‍ദ്രമായ ഓര്‍മ പുതുക്കുകയാണ് സിമില്‍. ഒപ്പം പാപ്പായ്ക്കു നിത്യശാന്തി നേര്‍ന്നു പ്രാര്‍ഥിക്കുകയും ചെയ്യുന്നു.

ഇരട്ടക്കൊലപാതകം; 24 മണിക്കൂറിനുള്ളില്‍ പ്രതി പിടിയിൽ

കോട്ടയം: ഇരട്ടക്കൊലപാതക കേസിലെ പ്രതിയെ 24 മണിക്കൂറിനുള്ളില്‍ പിടികൂടി പോലീസ് സംഘം. 23നു രാവിലെ 8.45നായിരുന്നു നാടിനെ നടുക്കിയ സംഭവം പുറത്തറിഞ്ഞത്. വിവരം അറിഞ്ഞ ഉടന്‍തന്നെ പോലീസ് സ്ഥലത്തെത്തി. തുടര്‍ന്ന് ജില്ലാ പോലീസ് മേധാവി എ. ഷാഹുല്‍ ഹമീദ് നേരിട്ടെത്തി അന്വേഷണത്തിനു നേതൃത്വം നല്‍കി. സൈബര്‍ വിഭാഗം ഉള്‍പ്പെടെയുള്ള പോലീസുദ്യോഗസ്ഥര്‍ പ്രതിയുടെ പിന്നാലെയായിരുന്നു. പിറ്റേദിവസം രാവിലെതന്നെ പ്രതിയെ കസ്റ്റഡിയിലെടുക്കാന്‍ സാധിച്ചത് പോലീസിന്‍റെ അന്വേഷണ മികവാണ്. കൊല്ലപ്പെട്ട വിജയകുമാറിന്‍റെ വീട്ടിലെ ജോലിക്കാരനായിരുന്നു അന്യസംസ്ഥാനക്കാരനായ പ്രതി അമിത്. സ്വഭാവദൂഷ്യംമൂലം ജോലിയില്‍നിന്നും പിരിച്ചുവിട്ടതിനുശേഷം പ്രതി വിജയകുമാറിന്‍റെ രണ്ട് ബാങ്ക് അക്കൗണ്ടുകളില്‍ നിന്നായി രണ്ടേമുക്കാല്‍ ലക്ഷം രൂപ ഓണ്‍ലൈനായി തട്ടിയെടുത്തതിന് അറസ്റ്റിലാകുകയും കോടതി റിമാന്‍ഡ് ചെയ്യുകയും ചെയ്തിരുന്നു. തുടര്‍ന്ന് ഈ മാസമാണ് ജാമ്യത്തില്‍ ഇറങ്ങിയത്. മരണപ്പെട്ടവരോട് തനിക്കുള്ള മുന്‍വൈരാഗ്യം കാരണമാണ് കൊലപാതകം നടത്തിയതെന്ന് പ്രതി പോലീസിനോട് സമ്മതിച്ചു. പ്രതിയെ അറസ്റ്റു ചെയ്ത സംഘത്തില്‍ കോട്ടയം ഡിവൈഎസ്പി കെ.ജി. അനീഷ്, കോട്ടയം വെസ്റ്റ് എസ്എച്ച്ഒ പ്രശാന്ത് കുമാര്‍, ഈസ്റ്റ് എസ്എച്ച്ഒ യു. ശ്രീജിത്ത്, ഗാന്ധിനഗര്‍ എസ്എച്ച്ഒ ടി. ശ്രീജിത്ത്, എസ്‌ഐമാരായ അനുരാജ്, വിദ്യ, സൈബര്‍ സെല്‍ പോലീസ് ഉദ്യോഗസ്ഥരായ ജോര്‍ജ്, ശ്യാം, സുബിന്‍ എന്നിവരും ഉണ്ടായിരുന്നു.

എന്‍റെ കേരളം പ്രദര്‍ശന-വിപണനമേള ഇന്നുമുതല്‍ 30 വരെ നാഗമ്പടത്ത്

കോട്ടയം: രണ്ടാം പിണറായി വിജയന്‍ മന്ത്രിസഭയുടെ നാലാം വാര്‍ഷികത്തിന്‍റെ ഭാഗമായി എന്‍റെ കേരളം പ്രദര്‍ശന-വിപണനമേള ഇന്നുമുതല്‍ 30 വരെ നാഗമ്പടം മൈതാനത്തു നടക്കും. മന്ത്രിസഭയുടെ നാലാം വാര്‍ഷികാഘോഷത്തിന്‍റെയും പ്രദര്‍ശന-വിപണനമേളയുടെയും ജില്ലാതല ഉദ്ഘാടനം ഇന്നു വൈകുന്നേരം നാഗമ്പടം മൈതാനത്ത് മന്ത്രി വി.എന്‍. വാസവന്‍ നിര്‍വഹിക്കും. സര്‍ക്കാര്‍ ചീഫ് വിപ്പ് ഡോ. എന്‍. ജയരാജ് ആധ്യക്ഷ്യം വഹിക്കും. ഉദ്ഘാടനത്തിനു മുന്നോടിയായി ഉച്ചകഴിഞ്ഞ് 2.30ന് തിരുനക്കര മൈതാനത്തുനിന്നു നാഗമ്പടം മൈതാനത്തേക്ക് സാംസ്‌കാരികഘോഷയാത്ര സംഘടിപ്പിക്കും. മേളയില്‍ സര്‍ക്കാര്‍ വകുപ്പുകളുടെയും പൊതുമേഖലാ-സ്വയംഭരണ സ്ഥാപനങ്ങളുടെയും 186 സ്റ്റാളുകളാണുള്ളത്. 45000 ചതുരശ്ര അടി ശീതീകരിച്ച പവലിയന്‍ ഉള്‍പ്പെടെ 69000 ചതുരശ്ര അടിയിലാണ് പ്രദര്‍ശന വിപണനമേള . എല്ലാദിവസവും രാവിലെ 9.30 മുതല്‍ രാത്രി 9.30 വരെയാണ് മേള. പ്രവേശനം സൗജന്യമാണ്. കേരളം കൈവരിച്ച നേട്ടങ്ങളുടെ പ്രദര്‍ശനം കാഴ്ചവയ്ക്കുന്ന വിവര-പൊതുജനസമ്പര്‍ക്ക വകുപ്പിന്‍റെ പ്രദര്‍ശനം, ആധുനികസാങ്കേതികവിദ്യകള്‍ പരിചയപ്പെടുത്തുന്ന പ്രദര്‍ശനം, കാര്‍ഷിക പ്രദര്‍ശന-വിപണനമേള, സാംസ്‌കാരിക-കലാപരിപാടികള്‍, മെഗാ ഭക്ഷ്യമേള, വിവിധ തൊഴിലുകളിലേര്‍പ്പെട്ടിട്ടുള്ളവരുടെയും സവിശേഷപരിഗണന അര്‍ഹിക്കുന്നവരുടെയും സംഗമങ്ങള്‍, കായിക-വിനോദപരിപാടികള്‍, ടൂറിസം പദ്ധതികളുടെ പരിചയപ്പെടുത്തല്‍, ടൂറിസം-കാരവന്‍ ടൂറിസം പ്രദര്‍ശനം, സ്റ്റാര്‍ട്ടപ്പ് മിഷന്‍ പ്രദര്‍ശനം, ശാസ്ത്ര-സാങ്കേതിക പ്രദര്‍ശനങ്ങള്‍, സ്പോര്‍ട്സ് പ്രദര്‍ശനം, സ്‌കൂള്‍ മാര്‍ക്കറ്റ്, കായിക-വിനോദ പരിപാടികള്‍, പോലീസ് ഡോഗ് ഷോ, മിനി തിയറ്റര്‍ ഷോ എന്നിവ മേളയുടെ ഭാഗമാകും. വിവിധ വകുപ്പുകള്‍ സൗജന്യമായി സര്‍ക്കാര്‍ സേവനങ്ങള്‍ ലഭ്യമാക്കും. ഉദ്ഘാടന ചടങ്ങില്‍ ജില്ലയിലെ ജനപ്രതിനിധികളും ഉന്നത ഉദ്യോഗസ്ഥരും പങ്കെടുക്കും. സംഗമങ്ങള്‍, ആദരിക്കല്‍ മേളയോടനുബന്ധിച്ചു വിവിധ തൊഴില്‍ മേഖലകളിലേര്‍പ്പെട്ടിട്ടുള്ളവരുടെയും ഭിന്നശേഷി കലാനിപുണരുടെയും സംഗമങ്ങള്‍ നാഗമ്പടം മൈതാനത്തെ വേദിയില്‍ നടക്കും. നാളെ രാവിലെ എക്‌സൈസ് വകുപ്പിന്‍റെ നേതൃത്വത്തില്‍ ലഹരിവിരുദ്ധസംഗമം നടക്കും. ഉച്ചകഴിഞ്ഞ് ഭിന്നശേഷി കലാനിപുണരുടെ സംഗമം നടക്കും. 27ന് രാവിലെ ആരോഗ്യവകുപ്പിന്‍റെ നേതൃത്വത്തില്‍ ആശാ-ആരോഗ്യ പ്രവര്‍ത്തകരുടെ സംഗമവും ആദരിക്കലും നടക്കും. ഉച്ചകഴിഞ്ഞ് ക്ഷീരകര്‍ഷകസംഗമം നടക്കും. 28നു രാവിലെ ഹരിതകര്‍മസേന സംഗമവും ആദരിക്കലും നടക്കും. ഉച്ചകഴിഞ്ഞ് കര്‍ഷക-കര്‍ഷകത്തൊഴിലാളി സംഗമം നടക്കും. 30ന് രാവിലെ അങ്കണവാടി ജീവനക്കാരുടെ സംഗമവും ഉച്ചകഴിഞ്ഞു ലൈഫ് ഗുണഭോക്താക്കളുടെ സംഗമവും സംഘടിപ്പിക്കും. കലാപരിപാടികള്‍ മേളയുടെ ഭാഗമായി ഇന്നു മുതല്‍ 30 വരെ വൈകിട്ട് മുഖ്യവേദിയില്‍ പ്രമുഖ കലാകാരന്മാര്‍ പങ്കെടുക്കുന്ന കലാവിരുന്ന് ഒരുക്കിയിട്ടുണ്ട്. ഇന്ന് ഗ്രൂവ് ബാന്‍ഡ് അവതരിപ്പിക്കുന്ന ലൈവ് മ്യൂസിക് ഷോ. നാളെ അക്മ-കൊച്ചിന്‍ ആരോസ് മെഗാഷോ, 27ന് രൂപാ രേവതി വയലിന്‍ ഫ്യൂഷന്‍, 28ന് അന്‍വര്‍ സാദത്തിന്‍റെ മ്യൂസിക് നൈറ്റ്, 29ന് വൈക്കം മാളവിക അവതരിപ്പിക്കുന്ന നാടകം ജീവിതത്തിന് ഒരു ആമുഖം എന്നിവ നടക്കും. 30ന് പ്രണവം ശശിയും സംഘവും അവതരിപ്പിക്കുന്ന നാടന്‍പാട്ടും ദൃശ്യാവിഷ്‌കാരവും നടക്കും. തുടര്‍ന്ന് സൂരജ് സന്തോഷ് ബാന്‍ഡ് അവതരിപ്പിക്കുന്ന ലൈവ് മ്യൂസിക് ഷോയോടെ മേളയ്ക്കു കൊടിയിറങ്ങും. മുഖ്യമന്ത്രിയുടെ മുഖാമുഖം 29ന് ജില്ലയിലെ വിവിധ മേഖലകളില്‍നിന്നുള്ളവരുമായുള്ള മുഖ്യമന്ത്രി പിണറായി വിജയന്‍റെ മുഖാമുഖം 29ന് രാവിലെ 10.30 മുതല്‍ 12.30 വരെ കോട്ടയം ഈരയില്‍ക്കടവ് ആന്‍സ് കണ്‍വന്‍ഷന്‍ സെന്‍ററില്‍ നടക്കും. സര്‍ക്കാര്‍ സേവനങ്ങളുടെ ഗുണഭോക്താക്കളുടെ പ്രതിനിധികള്‍, ട്രേഡ് യൂണിയന്‍-തൊഴിലാളി പ്രതിനിധികള്‍, യുവജനങ്ങള്‍, വിദ്യാര്‍ഥികള്‍, സാംസ്‌കാരിക-കായിക രംഗത്തെ പ്രതിഭകള്‍, പ്രഫഷണലുകള്‍, ഡോക്ടര്‍മാര്‍, എന്‍ജിനിയര്‍മാര്‍, അഭിഭാഷകര്‍, അധ്യാപകര്‍, വ്യവസായികള്‍, പ്രവാസികള്‍, പ്രശസ്ത വ്യക്തികള്‍, പൗരപ്രമുഖര്‍, സാമുദായിക നേതാക്കള്‍, കര്‍ഷകതൊഴിലാളികള്‍, കര്‍ഷകര്‍ തുടങ്ങി വിവിധ മേഖലയില്‍നിന്നുള്ള അഞ്ഞൂറിലധികം പേര്‍ മുഖാമുഖത്തില്‍ പങ്കെടുക്കും.

പ്രവിത്താനം ഫൊറോന പള്ളി വെബ്‌സൈറ്റ് ഉദ്ഘാടനം

പ്രവിത്താനം: സെന്‍റ് അഗസ്റ്റിൻസ് ഫൊറോന പള്ളിയുടെ വെബ്‌സൈറ്റ് ബിഷപ് മാര്‍ ജോസഫ് കല്ലറങ്ങാട്ട് ഉദ്ഘാടനം ചെയ്തു. പ്രവിത്താനം ഇടവകയുടെ 400 വര്‍ഷത്തെ ചരിത്രവും വളര്‍ച്ചയും സമഗ്രമായി പ്രതിപാദിക്കുന്ന വെബ്‌സൈറ്റില്‍ കഴിഞ്ഞകാലങ്ങളില്‍ ഇടവകയെ നയിച്ച വികാരിമാര്‍, ഇടവകാംഗങ്ങളായ ശ്രേഷ്ഠ വ്യക്തിത്വങ്ങള്‍, മാര്‍ മാത്യു കാവുകാട്ട്, മോണ്‍. ജോസഫ് കുഴിഞ്ഞാലില്‍, മഹാകവി പി.എം. ദേവസ്യ എന്നിവരെക്കുറിച്ചുള്ള വിവരണങ്ങളും ഉള്‍പ്പെടുത്തിയിട്ടുണ്ട്. ഏവര്‍ക്കും സൗകര്യപ്രദമായി ഉപയോഗിക്കാവുന്ന രീതിയില്‍ ഡിസൈന്‍ ചെയ്തിട്ടുള്ള വെബ്‌സൈറ്റില്‍ പ്രവിത്താനം ഫൊറോനയുടെ കീഴില്‍ പ്രവര്‍ത്തിക്കുന്ന വിദ്യാഭ്യാസ, ആതുരാലയ സ്ഥാപനങ്ങളുടെ വിവരങ്ങളും ഉള്‍ക്കൊള്ളിച്ചിട്ടുണ്ട്. വിശ്വാസത്തില്‍ മുന്നോട്ട് എന്ന ആപ്തവാക്യത്തെ അധിഷ്ഠിതമാക്കിയാണ് www. pravithanamchurch.com എന്ന പേരില്‍ വെബ്‌സൈറ്റ് ആരംഭിച്ചിരിക്കുന്നത്. ചടങ്ങില്‍ രൂപത വികാരി ജനറാള്‍ മോണ്‍. ജോസഫ് കണിയോടിക്കല്‍, വികാരി ഫാ. ജോര്‍ജ് വേളൂപ്പറമ്പില്‍, സഹവികാരിമാരായ ഫാ. ജോര്‍ജ് പോളച്ചിറകുന്നുംപുറം, ഫാ. ആന്‍റണി കൊല്ലിയില്‍, കൈക്കാരന്മാരായ മാത്യൂസ് ഏബ്രഹാം പുതിയിടം, സി.എ. ജിമ്മിച്ചന്‍ ചന്ദ്രന്‍കുന്നേല്‍, ജോണി ജോസഫ് പൈക്കാട്ട്, ജോഫ് തോമസ് വെള്ളിയേപ്പള്ളില്‍ തുടങ്ങിയവര്‍ സന്നിഹിതരായിരുന്നു.

മാർപാപ്പയ്ക്കായി ഇന്ന് പാലാ രൂപതയിൽ പ്രത്യേക പ്രാർഥന

പാലാ: ഫ്രാന്‍സിസ് മാര്‍പാപ്പയുടെ സ്മരണാര്‍ഥം പാലാ രൂപതയുടെ ആഭിമുഖ്യത്തിൽ ഇന്ന് ഉച്ചകഴിഞ്ഞ് മൂന്നിന് കത്തീഡ്രലില്‍ അനുസ്മരണയോഗവും പ്രാര്‍ഥനാശുശ്രൂഷകളും ഉണ്ടായിരിക്കും. രൂപതയിലെ വൈദികരും പാസ്റ്ററൽ‍ കൗണ്‍സില്‍ അംഗങ്ങളും അനുസ്മരണ യോഗത്തില്‍ പങ്കെടുക്കും. 26ന് എല്ലാ ഇടവക പള്ളികളിലും വിശുദ്ധ കുര്‍ബാനയും തുടര്‍ന്ന് ഒപ്പീസും ഉണ്ടായിരിക്കുമെന്ന് രൂപത കാര്യാലയത്തില്‍നിന്ന് അറിയിച്ചു. കുറവിലങ്ങാട് പള്ളിയിൽ കുറവിലങ്ങാട്: കാലം ചെയ്ത ഫ്രാൻസിസ് മാർപാപ്പയ്ക്കായി കുറവിലങ്ങാട് മേജർ ആർക്കി എപ്പിസ്‌കോപ്പൽ തീർഥാടന ദേവാലയത്തിൽ പ്രത്യേക പ്രാർഥാനാ ശുശ്രൂഷ നടത്തും. പാലാ രൂപതാധ്യക്ഷൻ മാർ ജോസഫ് കല്ലറങ്ങാട്ടിന്‍റെ നിർദേശപ്രകാരം 26നു വൈകുന്നേരം അഞ്ചിനാണ് വിശുദ്ധ കുർബാന അർപ്പണവും പ്രത്യേക പ്രാർഥനാ ശുശ്രൂഷകളും നടത്തുന്നത്. ആർച്ച്പ്രീസ്റ്റ് റവ.ഡോ. തോമസ് മേനാച്ചേരി മുഖ്യകാർമികത്വം വഹിക്കും. വിശുദ്ധ കുർബാനയെത്തുടർന്ന് ഫ്രാൻസിസ് പാപ്പാ ഏറ്റവും മധ്യസ്ഥത തേടിയിരുന്ന ദൈവമാതാവിന്‍റെ മാധ്യസ്ഥ്യം യാചിച്ച് ജപമാല മെഴുകുതിരി പ്രദക്ഷിണവും നടത്തും.

വേനൽമഴ: ജനങ്ങൾ ജാഗ്രത പാലിക്കണം

പാലാ: ഇടവിട്ട് വേനല്‍മഴ തുടരുന്ന സാഹചര്യത്തില്‍ കൊതുക് വളരാനുള്ള സാഹചര്യം വീടുകളിലോ പരിസര പ്രദേശങ്ങളിലോ ഇല്ലെന്ന് ഉറപ്പാക്കണമെന്ന് പാലാ നഗരസഭാ പൊതുജനാരോഗ്യ പരിസ്ഥിതി പരിപാലന വിഭാഗം ജാഗ്രതാ നിര്‍ദേശം നല്‍കി. ജലക്ഷാമമുള്ള പ്രദേശങ്ങളില്‍ ജലം ശേഖരിച്ചു വയ്ക്കുന്ന പാത്രങ്ങള്‍ മൂടിവച്ച് ഉപയോഗിക്കണം. വീടിന്‍റെ പുറത്തും അടുത്തുമുള്ള പുരയിടങ്ങളിലും വെള്ളം കെട്ടിക്കിടക്കുന്നില്ലെന്ന് ഉറപ്പാക്കണം. റഫ്രിജറേറ്ററിന്‍റെ പിറകിലെ ടാങ്ക്, ഇന്‍ഡോര്‍ ചെടികള്‍ വളര്‍ത്തുന്ന ചെടിച്ചട്ടികള്‍, ചിരട്ടകള്‍, ഉപേക്ഷിക്കപ്പെട്ട ടയറുകള്‍, അലക്ഷ്യമായി വലിച്ചെറിയുന്ന പ്ലാസ്റ്റിക് മാലിന്യങ്ങള്‍, റബര്‍ ടാപ്പിംഗ് ചിരട്ടകള്‍, പാഴ്‌വസ്തുക്കള്‍ തുടങ്ങിയവയില്‍ വെള്ളം കെട്ടിക്കിടക്കാനുള്ള സാഹചര്യം ഒഴിവാക്കുന്നതിനു പൊതുജനങ്ങള്‍ ശ്രദ്ധിക്കണം. നഗരസഭാ പ്രദേശത്തെ പാഴ്‌വസ്തു സംഭരണകേന്ദ്രങ്ങളില്‍ നഗരസഭാ ക്ലീന്‍സിറ്റി മാനേജര്‍ ആറ്റ്‌‌ലി പി. ജോണ്‍, സീനിയര്‍ പബ്ലിക് ഹെല്‍ത്ത് ഇന്‍സ്പെക്ടര്‍ സി.ജി. അനീഷ്, പബ്ലിക് ഹെല്‍ത്ത് ഇന്‍സ്പെക്ടര്‍മാരായ ബിനു പൗലോസ്, രഞ്ജിത് ആര്‍. ചന്ദ്രന്‍ എന്നിവരുടെ നേതൃത്വത്തില്‍ പരിശോധന നടത്തി കര്‍ശന നിര്‍ദേശങ്ങള്‍ നല്‍കി. പല പ്രദേശങ്ങളിലും ജലക്ഷാമം രൂക്ഷമായ സാഹചര്യത്തില്‍ ജലജന്യ രോഗങ്ങള്‍ക്കെതിരേയും ജാഗ്രത പാലിക്കണമെന്ന് നഗരസഭാ പൊതുജനാരോഗ്യ പരിസ്ഥിതി പരിപാലന വിഭാഗം നിര്‍ദേശം നല്‍കി.

ചൂണ്ടച്ചേരിയില്‍ സാമൂഹ്യവിരുദ്ധശല്യം രൂക്ഷം

ഭരണങ്ങാനം: ഭരണങ്ങാനം പഞ്ചായത്തിന്‍റെ ചൂണ്ടച്ചേരിയിലുള്ള ആയുര്‍വേദ ആശുപത്രി ഭാഗത്ത് സാമൂഹ്യവിരുദ്ധശല്യം രൂക്ഷമാകുന്നതായി പരാതി. കഴിഞ്ഞദിവസം രാത്രിയില്‍ മെഡിക്കല്‍ ഓഫീസറുടെ മുറിയുടെ ജനലിന്‍റെ ബോര്‍ഡുകള്‍ എറിഞ്ഞുപൊട്ടിച്ചു. നേരത്തെ ചില്ലുകള്‍ തകര്‍ത്തതിനെത്തുടര്‍ന്ന് ബോര്‍ഡ് കൊണ്ട് മറച്ച ഭാഗമാണ് കഴിഞ്ഞ ദിവസം തകര്‍ത്തത്. ടൗണില്‍നിന്ന് ഉള്ളിലേക്കു മാറി ഒറ്റപ്പെട്ട സ്ഥലത്ത് സ്ഥിതിചെയ്യുന്ന ആശുപത്രിയുടെ പരിസരത്ത് ലഹരി ഉപയോഗിക്കുന്നവര്‍ തമ്പടിക്കുന്നതായി ആക്ഷേപമുണ്ട്. ആയുര്‍വേദ ആശുപത്രിക്കു പുറമേ വെറ്ററിനറി സബ്‌സെന്‍ററും അങ്കണവാടിയും ഇവിടെയുണ്ട്. ഈ സ്ഥാപനങ്ങളെല്ലാം സാമൂഹ്യവിരുദ്ധരുടെ താവളങ്ങളാണെന്ന് നാട്ടുകാര്‍ പറഞ്ഞു. അങ്കണവാടിക്കുള്ളിലേക്ക് മാലിന്യം വാരിയിട്ട സംഭവങ്ങള്‍ പലപ്പോഴും ഉണ്ടായിട്ടുണ്ട്. വെറ്ററിനറി സബ് സെന്‍ററിന്‍റെ ജനലുകളുടെ ചില്ലുകള്‍ കല്ലെറിഞ്ഞു പൊട്ടിച്ച നിലയിലാണ്. ചുറ്റും തറയോടുകള്‍ പാകി മനോഹരമാക്കിയ ആശുപത്രി പരിസരവും പിന്‍വശവുമാണ് സാമൂഹ്യവിരുദ്ധരെ ആകര്‍ഷിക്കുന്നത്. ഭക്ഷണവും മദ്യവുമായെത്തി ഇവിടെയിരുന്ന് കഴിക്കുന്നതും ഭക്ഷണാവശിഷ്ടങ്ങളും പ്ലാസ്റ്റിക് മാലിന്യങ്ങളും പരിസരമാകെ വിതറി മടങ്ങുന്നതും ആശുപത്രി ജീവനക്കാരെ വലയ്ക്കുകയാണ്. സമീപ പ്രദേശങ്ങളില്‍ നിന്നെത്തുന്ന ചിലരാണ് പ്രശ്‌നങ്ങള്‍ക്കിടയാക്കുന്നതെന്നു പറയപ്പെടുന്നു. പാലാ പോലീസ് ചില ദിവസങ്ങളില്‍ പട്രോളിംഗിനെത്താറുണ്ടെങ്കിലും സാമൂഹ്യവിരുദ്ധരെ പിടികൂടാനായില്ല. സംഭവത്തില്‍ പരാതി മെയില്‍ ചെയ്തതായി മെഡിക്കല്‍ ഓഫീസര്‍ പറഞ്ഞു. പ്രദേശത്ത് നിരീക്ഷണ കാമറ സ്ഥാപിക്കുമെന്ന് പഞ്ചായത്ത് പ്രസിഡന്‍റ് ബീന ടോമി പറഞ്ഞു.

വാളക്കയം കടവിൽ മാലിന്യം തള്ളി

ചിറക്കടവ്: വാളക്കയം കടവിൽ ചാക്കിൽക്കെട്ടി മാലിന്യം തള്ളിയ നിലയിൽ. ചിറക്കടവിനെ മാലിന്യമുക്ത പഞ്ചായത്തായി പ്രഖ്യാപിച്ചതിന് പിന്നാലെയാണ് പാഴ്‌വസ്തുക്കളടങ്ങിയ മാലിന്യം ചാക്കിൽക്കെട്ടി തള്ളിയിരിക്കുന്നത്. രാത്രികാലങ്ങളിൽ വാഹനങ്ങളിൽ വന്നാണ് മാലിന്യങ്ങൾ തള്ളുന്നതെന്ന് നാട്ടുകാർ ആരോപിച്ചു. പാഴ്‌വസ്തുക്കൾ പരിശോധിച്ചപ്പോൾ കിട്ടിയ മേൽവിലാസം കാഞ്ഞിരപ്പള്ളിയിലേതാണെന്നും മറ്റു തെളിവുകൾ കൂടി ശേഖരിച്ചതിനുശേഷം മാലിന്യം തള്ളിയവരെ കണ്ടുപിടിച്ച് അധികൃതർക്ക് കൈമാറുമെന്നും നാട്ടുകാർ പറഞ്ഞു. മാലിന്യങ്ങൾ തള്ളുന്നവർക്കെതിരേ അധികൃതർ കർശന നടപടി സ്വീകരിക്കണമെന്നു നാട്ടുകാർ ആവശ്യപ്പെട്ടു.

പോലീസ് മർദനം: വീഡിയോ ക്ലിപ്പ് കോടതിയിൽ; ജാമ്യാപേക്ഷ ഇന്ന് പരിഗണിക്കും

എരുമേലി: ടൗണിൽ കഴിഞ്ഞ ദിവസമുണ്ടായ സംഘർഷത്തിൽ റിമാൻഡിലായ എരുമേലി മറ്റന്നൂർക്കര പാടിക്കൽ റഫീഖ് (44), മകൻ അജാസ് (21), സുഹൃത്ത് ഇരുമ്പൂന്നിക്കര പാലയ്ക്കൽ അനന്ദു ബാബു (22) എന്നിവരുടെ ജാമ്യപേക്ഷ ഇന്നു പരിഗണിക്കും. സ്റ്റേഷനിൽവച്ചു മൃഗീയമായി മർദിച്ചെന്നു പ്രതി അജാസ് കോടതിയിൽ അറിയിച്ചതിനെത്തുടർന്ന് രഹസ്യ മൊഴി കോടതി രേഖപ്പെടുത്തി. പോലീസ് മർദനത്തിന്‍റെ തെളിവായ വീഡിയോ ക്ലിപ്പ് കോടതി പരിശോധനയ്ക്കു വാങ്ങിയെന്നും തുടർന്നാണ് ജാമ്യ അപേക്ഷയിൽ ഇന്നു തീർപ്പ് അറിയിക്കുമെന്നു കോടതി വ്യക്തമാക്കിയതെന്നും പ്രതികൾക്കുവേണ്ടി ഹാജരായ അഭിഭാഷകൻ മുഹമ്മദ്‌ ഹാരിസ് പറഞ്ഞു. സ്റ്റേഷനിൽ വച്ച് മർദിച്ചു എന്നതു സംബന്ധിച്ച് പോലീസ് വകുപ്പിനുള്ളിൽ അന്വേഷണം ആരംഭിച്ചിട്ടുണ്ട്. ജില്ലാ പോലീസ് മേധാവിയുടെ നിർദേശപ്രകാരം മണിമല പോലീസ് സ്റ്റേഷൻ എസ്എച്ച്ഒയാണ് അന്വേഷണം നടത്തുന്നത്. ഇതിന്‍റെ ഭാഗമായി പോലീസ് സ്റ്റേഷനിലെ കാമറ ദൃശ്യങ്ങൾ പരിശോധനയ്ക്കായി ശേഖരിച്ചിട്ടുണ്ട്. സംഭവസമയത്ത് ഡ്യൂട്ടിയിലുണ്ടായിരുന്ന പോലീസ് ഉദ്യോഗസ്ഥരുടെ മൊഴി രേഖപ്പെടുത്തി. അന്വേഷണം പൂർത്തിയാക്കി ജില്ലാ പോലീസ് മേധാവിക്കു റിപ്പോർട്ട് ലഭിച്ച ശേഷമാകും തുടർനടപടികൾ. അതേസമയം, മർദനം സംബന്ധിച്ചു പോലീസിനെതിരേ പരാതി ലഭിച്ചിട്ടില്ലെന്നും വകുപ്പുതലത്തിൽ നടക്കുന്ന അന്വേഷണമാണ് ഇപ്പോൾ നടക്കുന്നതെന്നും കാഞ്ഞിരപ്പള്ളി ഡിവൈഎസ്പി എം. അനിൽകുമാർ അറിയിച്ചു. പോലീസ് മർദനം സംബന്ധിച്ച് അന്വേഷണം ആവശ്യപ്പെട്ടു പ്രതികളിൽ അജാസിന്‍റെ മാതാവ് ഇന്നലെ എരുമേലി സ്റ്റേഷനിൽ പരാതി നൽകാൻ എത്തിയെങ്കിലും എസ്എച്ച്ഒ അവധിയിലായതിനാൽ പരാതി സ്വീകരിച്ചില്ല. പ്രതികളിൽ ഒരാൾ സിവിൽ പോലീസ് ഓഫീസർ അൻഷു സുലൈമാനെ കഴുത്തിനു താഴെ പോറൽ ഏൽപ്പിച്ചെന്നു പ്രതികളുടെ ജാമ്യ അപേക്ഷയുടെ ഹിയറിംഗിൽ പോലീസ് കോടതിയിൽ അറിയിച്ചിരുന്നു. മുറിവ് കഴുത്തിൽ ആയിരുന്നുവെങ്കിൽ മരണംവരെ സംഭവിക്കാമെന്നാണ് പോലീസ് സമർപ്പിച്ച റിപ്പോർട്ടിൽ അറിയിച്ചത്. ഇതു മുൻനിർത്തി വധശ്രമ വകുപ്പ് കൂടി കേസിൽ ചുമത്തിയിട്ടുണ്ട്. എന്നാൽ, പിടിവലിക്കിടെ പ്രതികളിൽ ഒരാളുടെ ആഭരണത്തിലെ ലോക്കറ്റ് കൊണ്ട് പോറലുണ്ടായതാണെന്നും ഇതു വധശ്രമമായി കണക്കാക്കാവുന്നതല്ലെന്നും അഡ്വ. മുഹമ്മദ്‌ ഹാരിസ് പറഞ്ഞു. ഇരു വിഭാഗം തമ്മിൽ സംഘർഷം ഉണ്ടായതിനെത്തുടർന്നാണ് നടപടി സ്വീകരിച്ചതെന്നാണ് പോലീസ് കോടതിയിൽ അറിയിച്ചത്. എന്നാൽ, പോലീസ് കേസെടുത്തത് ഒരു വിഭാഗത്തിൽപ്പെട്ടവർക്കെതിരേ മാത്രമാണെന്നു പ്രതിഭാഗം പറഞ്ഞു. ഡ്യൂട്ടിയിൽ ഇല്ലാതിരുന്ന പോലീസ് ഓഫീസറും മർദിച്ചെന്നാണ് പ്രതിഭാഗത്തിന്‍റെ ആരോപണം. പ്രതികളിൽ അജാസ് കാക്കനാട് ചിൽഡ്രൻസ് ഹോമിലും മറ്റു രണ്ടു പേരെ പൊൻകുന്നം സബ് ജയിലിലുമാണ് റിമാൻഡ് ചെയ്തിരിക്കുന്നത്.

എരുമേലി പഞ്ചായത്ത് ഉദ്യോഗസ്ഥർക്കെതിരേ വിജിലൻസ് അന്വേഷണം

എരുമേലി: പഞ്ചായത്ത്‌ പ്രസിഡന്‍റ് നൽകിയ പരാതിയിൽ എരുമേലി പഞ്ചായത്ത്‌ സെക്രട്ടറി ഉൾപ്പെടെ അഞ്ച് ഉദ്യോഗസ്ഥർക്കെതിരേ തദ്ദേശ സ്വയംഭരണ വകുപ്പിലെ ഇന്‍റേണൽ വിജിലൻസ് വിഭാഗം അന്വേഷണം തുടങ്ങി. ഇതിന്‍റെ ഭാഗമായി നാലംഗ വിജിലൻസ് ഉദ്യോഗസ്ഥർ പഞ്ചായത്ത്‌ ഓഫീസിലെത്തി തെളിവെടുപ്പും വിവരശേഖരണവും നടത്തി. പഞ്ചായത്ത്‌ പ്രസിഡന്‍റ് തദ്ദേശ സ്വയംഭരണ വകുപ്പ് മന്ത്രിക്ക് നൽകിയ പരാതിയെത്തുടർന്നാണ് അന്വേഷണം. പഞ്ചായത്ത്‌ സെക്രട്ടറി, ജൂണിയർ സൂപ്രണ്ട്, മൂന്ന് സീനിയർ ക്ലാർക്കുമാർ എന്നിവർക്കെതിരെയാണ് പരാതി. ഈ ഉദ്യോഗസ്ഥർ ജോലി കൃത്യമായി നടത്തുന്നില്ലെന്നാണ് പരാതിയിൽ ഉന്നയിച്ചിട്ടുള്ളത്. വിവരശേഖരണം നടത്തിയ വിജിലൻസ് വിഭാഗം പഞ്ചായത്ത്‌ ഓഫീസിൽ ഫയലുകൾ, അപേക്ഷകൾ, പരാതികൾ തുടങ്ങിയവ തീർപ്പാക്കാത്തതുണ്ടോയെന്ന് വിവരങ്ങൾ ശേഖരിച്ചു. ആരോപണവിധേയരായ ഉദ്യോഗസ്ഥരുടെ ഹാജർനിലയും പരിശോധിച്ചു. ഉദ്യോഗസ്ഥരോട് വിജിലൻസ് സംഘം വിവരങ്ങൾ തേടിയിരുന്നു. കൈക്കൂലി ഉൾപ്പെടെ അഴിമതി സംബന്ധിച്ച് പരാതികൾ ഇവർക്കെതിരേ ഇല്ലെന്നും ജോലിയിൽ കൃത്യവിലോപം ആണെന്നുമാണ് പരാതിയെന്നും അന്വേഷണത്തിന്‍റെ ഭാഗമായി വിജിലൻസ് സംഘം ഇവരോട് വെളിപ്പെടുത്തിയിരുന്നു. അതേസമയം, ഏറെ കാര്യക്ഷമതയോടെയാണ് ജോലി ചെയ്യുന്നതെന്നും യാതൊരുവിധ വീഴ്‌ചകളും ഉണ്ടായിട്ടില്ലെന്നും ഇവർ വിജിലൻസ് വിഭാഗത്തെ അറിയിച്ചു. അന്വേഷണം പൂർത്തിയായ ശേഷം തദ്ദേശ സ്വയംഭരണ വകുപ്പ് ഓഫീസ് മേധാവിക്ക് റിപ്പോർട്ട് സമർപ്പിക്കും. തുടർന്ന് മന്ത്രിക്ക് റിപ്പോർട്ട് ലഭിക്കും. ഇതിനു ശേഷമാകും പരാതി സംബന്ധിച്ച് തീർപ്പുണ്ടാവുക.

മുണ്ടക്കയം ടൗണിലെ മൂന്ന് വ്യാപാര സ്ഥാപനങ്ങളിൽ മോഷണം

മുണ്ടക്കയം: മുണ്ടക്കയം ടൗണിലെ മൂന്നോളം വ്യാപാര സ്ഥാപനങ്ങളിൽ മോഷണം. ദേശീയപാതയിൽ മുണ്ടക്കയം പോലീസ് സ്റ്റേഷന് താഴെ ഭാഗത്തുള്ള രണ്ടു കടകളിലും ടൗണിലെ ഒരു പച്ചക്കറിക്കടയിലുമാണ് മോഷണം നടന്നത്. സിപിഎം പാർട്ടി ഓഫീസിനോട് ചേർന്ന് മാടക്കട നടത്തുന്ന ശ്രീവിലാസത്തിൽ സരോജത്തിന്‍റെ കടയിൽ നിന്നു 4000 രൂപ മോഷ്ടാവ് അപഹരിച്ചു. പ്ലാസ്റ്റിക്ക് പടുത വലിച്ചുകെട്ടി മറച്ചിരുന്ന കട പൂട്ടാനുള്ള സംവിധാനങ്ങൾ ഇല്ലായിരുന്നു. ബാങ്കിൽ അടയ്ക്കാനായി ചില്ലറ ഉൾപ്പെടെ പാത്രത്തിൽ സൂക്ഷിച്ചിരുന്ന പണമാണ് നഷ്ടമായത്. കഴിഞ്ഞ വർഷവും സമാനമായ രീതിയിൽ ഇവരുടെ കടയിൽ മോഷണം നടന്നിരുന്നു. ഇതിന് എതിർവശത്തായി ചെറുകടികൾ വിൽക്കുന്ന ബഷീറിന്‍റെ കടയിൽനിന്നു സാധനങ്ങളും കുടുക്കയിൽ സൂക്ഷിച്ചിരുന്ന പണവും മോഷ്ടിച്ചു. ഇത് കൂടാതെ മുണ്ടക്കയം ടൗണിലെ രഹന ഷൈജുവിന്‍റെ പച്ചക്കറിക്കടയിലും മോഷണം നടന്നിട്ടുണ്ട്. സാധനങ്ങൾ ഉൾപ്പെടെ 5000ത്തോളം രൂപ ഇവിടെ നഷ്ടമായി. മോഷ്ടാവിന്‍റെ ദൃശ്യങ്ങൾ സിസിടിവിയിൽ പതിഞ്ഞിട്ടുണ്ട്. സംഭവത്തിൽ പോലീസ് അന്വേഷണം നടത്തിവരികയാണ്.

കുട്ടിക്കാനം മരിയൻ കോളജിൽ അന്തർദേശീയ കിക്ക്‌ബോക്സിംഗ് പരിശീലന ക്യാമ്പ് ആരംഭിച്ചു

കുട്ടിക്കാനം: മരിയൻ കോളജിൽ 30 വരെ നടക്കുന്ന 10ാമത് അന്തർദേശീയ കിക്ക്‌ബോക്സിംഗ് പരിശീലന ക്യാമ്പ് ആരംഭിച്ചു. വാക്കോ ഇന്ത്യ കേരള അസോസിയേഷനും മരിയൻ കോളജിലെ ഹെൽത്ത് ആൻഡ് വെൽനെസ് ഡിപ്പാർട്ട്മെന്‍റും ചേർന്നാണ് പരിശീലന ക്യാമ്പ് സംയുക്തമായി സംഘടിപ്പിച്ചിരിക്കുന്നത്. ദേശീയ, അന്തർദേശീയ തലത്തിൽ അംഗീകരിക്കപ്പെട്ടിട്ടുള്ള പരിശീലകരുടെ നേതൃത്വത്തിലാണ് ക്യാമ്പ് നടത്തപ്പെടുന്നത്. ഏകദേശം ഇരുനൂറോളം കായികപ്രതിഭകൾ പരിശീലനത്തിൽ പങ്കെടുക്കുന്നുണ്ട്. കിക്ക്‌ബോക്സിംഗിനെപ്പറ്റി ആഴത്തിൽ പഠിക്കാൻ സാധിക്കുന്നതോടൊപ്പം ആഗോള തലത്തിൽ അംഗീകരിക്കപ്പെടുന്ന പരിശീലന മാതൃകകൾവഴി താരങ്ങൾക്ക് വിദഗ്ധ പരിശീലനം ലഭ്യമാകുന്നു. വിവിധ സംസ്ഥാനങ്ങളിൽ നിന്നുമെത്തിയ കായികതാരങ്ങൾക്കും ഉയർന്ന നിലവാരത്തിലുള്ള പരിശീലനം നേടാൻ ആഗ്രഹിക്കുന്നവർക്കും ഈ ക്യാമ്പ് പുതിയ അനുഭവങ്ങളും അറിവുകളും പകരുന്ന പ്രധാന വേദിയായിരിക്കുമെന്ന് സംഘാടകർ വ്യക്തമാക്കി.

വിശുദ്ധ ഗീവർഗീസ് സഹദായുടെ തിരുസ്വരൂപം പരസ്യവണക്കത്തിനായി പ്രതിഷ്ഠിച്ചു

അരുവിത്തുറ: അരുവിത്തുറ വല്യച്ചന്‍റെ തിരുനാളിന്‍റെ ഭാഗമായി വിശുദ്ധ ഗീവർഗീസ് സഹദായുടെ തിരുസ്വരൂപം എഴുന്നള്ളിച്ച് പരസ്യ വണക്കത്തിനായി മോണ്ടളത്തിൽ പ്രതിഷ്ഠിച്ചു. കാലംചെയ്ത ഫ്രാൻസിസ് മാർപാപ്പയോടുള്ള ബഹുമാനാർഥം വാദ്യമേളങ്ങളും കരിമരുന്നും ഒഴിവാക്കിയായിരുന്നു തിരുസ്വരൂപ പ്രതിഷ്ഠ. ലളിതമായി ആഘോഷിക്കുന്ന തിരുനാളിൽ വല്യച്ചനെ വണങ്ങാനും നേർച്ച കാഴ്ചകൾ അർപ്പിക്കാനും നൂറുകണക്കിനാളുകളാണ് ഇന്നലെ എത്തിയത്. ഉച്ചകഴിഞ്ഞ് ബിഷപ് മാർ ജോസഫ് കല്ലറങ്ങാട്ട് സുറിയാനി കുർബാന അർപ്പിച്ച് സന്ദേശം നൽകി. തുടർന്ന് നടത്തിയ പ്രദക്ഷിണം ദേവാലയത്തിന് ചുറ്റുമായി പരിമിതപ്പെടുത്തി. ഇന്നു രാവിലെ 5.30നും 6.45നും എട്ടിനും, വിശുദ്ധ കുർബാന, നൊവേന. 10ന് തിരുനാൾ റാസ. സീറോ മലബാർ സഭ കൂരിയ ബിഷപ് മാർ സെബാസ്റ്റ്യൻ വാണിയപ്പുരയ്ക്കൽ മുഖ്യകാർമികത്വം വഹിക്കും. 12.30ന് വാദ്യമേളങ്ങളും കരിമരുന്നും ഒഴിവാക്കി പ്രദക്ഷിണം. തുടർന്ന് 3നും 4.15നും 5.30നും 6.45നും വിശുദ്ധ കുർബാന, നൊവേന. നാളെ ഇടവകക്കാരുടെ തിരുനാൾ ദിനത്തിൽ രാവിലെ 5.30 നും 6.45 നും എട്ടിനും 9.15നും 10.30നും 12 നും 1.30 നും 2.45 നും വിശുദ്ധ കുർബാന, നൊവേന. 4.30ന് ബിഷപ് മാർ ജോസ് പുളിക്കൽ വിശുദ്ധ കുർബാന അർപ്പിക്കും. രാത്രി ഏഴിനു തിരുസ്വരൂപം അൾത്താരയിൽ പുനഃപ്രതിഷ്ഠിക്കും.

ലഹരിക്കെതിരേ ഓട്ടോ തൊഴിലാളികൾ; ഷോർട്ട് ഫിലിം ശ്രദ്ധേയമാകുന്നു

കാഞ്ഞിരപ്പള്ളി: ഓട്ടോറിക്ഷ തൊഴിലാളികൾ ചേർന്ന് ലഹരിക്കെതിരേ ഒരുക്കിയ ഷോർട്ട്ഫിലിം ശ്രദ്ധേയമാകുന്നു. കാഞ്ഞിപ്പള്ളി പട്ടിമറ്റം ഒന്നാംമൈൽ സ്വദേശികളായ 17 ഓട്ടോറിക്ഷ തൊഴിലാളികൾ ചേർന്നാണ് ലഹരിക്കെതിരേയുള്ള സന്ദേശമുയർത്തി കെഎൽ 34 കാഞ്ഞിരപ്പള്ളി എന്ന ഷോർട്ട് ഫിലിം ഒരുക്കിയിരിക്കുന്നത്. സ്കൂളുകളിൽ ലഹരി എത്തിക്കുന്ന സംഘത്തെ ഓട്ടോറിക്ഷ തൊഴിലാളികൾ ചേർന്ന് കുടുക്കുന്നതും പോലീസിൽ ഏൽപ്പിക്കുന്നതുമായ കഥയാണ്10 മിനിറ്റ് ദൈർഘ്യമുള്ള ഷോർട്ട് ഫിലിമിലൂടെ പറയുന്നത്. ഷോർട്ട് ഫിലിം നിർമിക്കാൻ 7000 രൂപയാണ് ചെലവ് വന്നത്. ഇത് ഇവർതന്നെ കണ്ടെത്തുകയായിരുന്നു. പൂർണമായും ഐ ഫോണിലായിരുന്നു ചിത്രീകരണം. കഥ, തിരക്കഥ, സംവിധാനം എന്നിവ ഓട്ടോറിക്ഷ തൊഴിലാളിയായ ബെന്നി ജോർജ് മലയിലിന്‍റേതാണ്. പൊൻകുന്നം സ്വദേശിയായ ജോമോൻ ജോയിയാണ് കാമറ കൈകാര്യം ചെയ്തത്. എഡിറ്റിംഗ് നിർവഹിച്ചത് സുബിൻ തോമസും. ലഹരിക്കെതിരെ സന്ദേശം നൽകുന്നതടക്കം എട്ടോളം ഷോർട്ട് ഫിലിമുകൾ ബെന്നി മുന്പ് പുറത്തിറക്കിയിട്ടുണ്ട്. എരുമേലി സ്വദേശിയായ സുധി ഒഴികെയുള്ള ഷോർട്ട് ഫിലിമിലെ അഭിനേതാക്കളെല്ലാം ഓട്ടോ തൊഴിലാളികളാണെന്ന പ്രത്യേകതയുമുണ്ട്. കാഞ്ഞിരപ്പള്ളി ജനമൈത്രി പോലീസിലെ രഞ്ജു രമണൻ, ടി. അജീഷ് എന്നിവരുടെ സഹായവും ലഭിച്ചു. മൂന്നു ദിവസം കൊണ്ടാണ് ഷോർട്ട് ഫിലിം തയാറാക്കിയത്.

ഉല്ലാസയാത്രക്കിടയിൽ ഗൃഹനാഥൻ കായലിൽ മുങ്ങിമരിച്ചു

വൈക്കം: ഉല്ലാസയാത്രക്കിടയിൽ ഗൃഹനാഥൻ കായലിൽ മുങ്ങിമരിച്ചു. തിരുവനന്തപുരം വട്ടിയൂർക്കാവ് മഹാരാജ ഗാർഡനിലെ തോമസ് കോട്ടേജിൽ ഏബ്രഹാമാണ് (67, റിട്ട. ഡിവിഷണൽ മാനേജർ കെൽട്രോൺ) മരിച്ചത്. ഇന്നലെ ഉച്ചയ്ക്ക് 12ന് മുറിഞ്ഞപുഴയുടെ പടിഞ്ഞാറ് ഭാഗത്ത് വേമ്പനാട്ടുകായലിലായിരുന്നു സംഭവം. ഹൗസ് ബോട്ടിലെത്തിയ 30 അംഗ സംഘം ഉച്ചഭക്ഷണം കഴിക്കാനായി ഹൗസ് ബോട്ടിൽ കയറുന്നതിനിടയിൽ എബ്രഹാം നീന്താൻ ശ്രമിച്ചതിനെ തുടർന്ന് ആഴമുള്ള ഭാഗത്ത് മുങ്ങി താഴുകയായിരുന്നു. കൂടെയുള്ളവർ ഉടൻ വെള്ളത്തിൽ നിന്ന് ഇദ്ദേഹത്തെ ഹൗസ് ബോട്ടിൽ കയറ്റി ചെമ്മനാകരിയിലെ സ്വകര്യ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. ഭാര്യ: കത്രി. മക്കൾ: ജോയൽ, ജെയിൻ ആൻ ഏബ്രഹാം (കാനഡ). മൃതദേഹം ചെമ്മ നാകരി ഇൻഡോ അമേരിക്കൻ ആശുപത്രി മോർച്ചറിയിൽ.

അവശനിലയിലായ വയോധികനെ ആശുപത്രിയിലേക്കു മാറ്റി

കാഞ്ഞിരപ്പള്ളി: വീടിനുള്ളിൽ അവശനിലയിൽ കണ്ട വയോധികന് സാന്ത്വനമായി സിപിഎം പ്രവർത്തകരും പാലിയേറ്റീവ് അംഗങ്ങളും. കാഞ്ഞിരപ്പള്ളി തോട്ടുമുഖം പുളിമൂട്ടിൽ കെ.എച്ച്. നൗഷാദിനാണ് ഇവർ തുണയായത്. ചൊവ്വാഴ്ച വൈകുന്നേരമാണ് സംഭവം. ഇദ്ദേഹം അവശനിലയിൽ വീട്ടിൽ കിടക്കുകയാണെന്ന വിവരം നാട്ടുകാർ അറിയിച്ചതിനെത്തുടർന്നാണ് ജനപ്രതിനിധിയും സിപിഎം കാഞ്ഞിരപ്പള്ളി ഏരിയ കമ്മിറ്റിയംഗവുമായ ബി.ആർ. അൻഷാദിന്‍റെ നേതൃത്വത്തിൽ സിപിഎം പ്രവർത്തകരും പഞ്ചായത്ത് പാലിയേറ്റീവ് പ്രവർത്തകരും സ്ഥലത്തെത്തിയത്. ഇവർ സ്ഥലത്തെത്തുമ്പോൾ വളരെ അവശനിലയിൽ കാണപ്പെട്ട ഇദ്ദേഹത്തിന്‍റെ ശരീരത്തിന്‍റെ പിൻഭാഗത്ത് പുഴുക്കൾ മൂടിയ നിലയിലായിരുന്നു. തുടർന്ന് പ്രവർത്തകർ വേണ്ട പ്രാഥമിക പരിചരണങ്ങളും ഭക്ഷണവും നൽകി. നൗഷാദും സഹോദരനും തനിച്ചായിരുന്നു ഈ വീട്ടിൽ താമസിച്ചിരുന്നത്. മാതാപിതാക്കളുടെ മരണത്തോടെയാണ് ഇവർ തനിച്ചായത്. ഇരുവരും അവിവാഹിതരാണ്. നൗഷാദിനെ അവശനിലയിൽ കണ്ട സമയത്ത് സഹോദരൻ വീട്ടിലുണ്ടായിരുന്നില്ല. ഇദ്ദേഹത്തെ ബന്ധപ്പെടാൻ നാട്ടുകാർ ശ്രമിച്ചെങ്കിലും സാധിക്കാതെ വന്നതോടെയാണ് വീടിനുള്ളിൽ പ്രവേശിച്ചത്. ഇന്നലെ രാവിലെ നൗഷാദിനെ ആംബുലൻസിൽ കോട്ടയം മെഡിക്കൽ കോളജ് ആശുപത്രിയിലേക്കു മാറ്റി. സിപിഎം ലോക്കൽ കമ്മിറ്റിയംഗങ്ങളായ കെ.ബി. ഷാനവാസ്, ബിപിൻ ബഷീർ, പാലിയേറ്റീവ് നഴ്സ് ഷാന്‍റി ജോസഫ്, പാലിയേറ്റീവ് ഡ്രൈവർ റിജോ ജോസ്, ആശാ പ്രവർത്തക നുസൈഫാ ഇർഷാദ് എന്നിവരും സംഘത്തിലുണ്ടായിരുന്നു.

പൊൻകുന്നം പ്രൈവറ്റ് ബസ് സ്റ്റാൻഡിലെ കംഫർട്ട് സ്റ്റേഷൻ അടച്ചിട്ട് പത്തു ദിവസം; അറ്റകുറ്റപ്പണി ഇഴയുന്നു

പൊൻകുന്നം: ചിറക്കടവ് പഞ്ചായത്തിന്‍റെ ചുമതലയിലുള്ള പൊൻകുന്നം സ്വകാര്യ ബസ് സ്റ്റാൻഡിലെ കംഫർട്ട് സ്റ്റേഷൻ അടച്ചിട്ടു പത്തുദിവസത്തോളമായി. സെപ്റ്റിക് ടാങ്ക് നിറഞ്ഞതിനെത്തുടർന്ന് അടച്ചിട്ട കംഫർട്ട് സ്റ്റേഷന്‍റെ മുന്പിൽ ടാങ്കിന്‍റെ ഒരുവശത്തെ മണ്ണെടുത്തു മാറ്റിയിട്ടു ദിവസങ്ങളായി. ഇതല്ലാതെ മറ്റൊരു പണിയും ഇവിടെ നടന്നില്ല. സർക്കാരിന്‍റെ വഴിയിടം പദ്ധതിയിൽ പഴയ കംഫർട്ട് സ്റ്റേഷൻ ലക്ഷങ്ങൾ മുടക്കി നവീകരിച്ചെങ്കിലും സെപ്റ്റിക് ടാങ്ക് പ്രശ്‌നം മൂലം പലതവണ അടച്ചിടേണ്ടി വന്നു. സെപ്റ്റിക് ടാങ്ക് പൊട്ടിയൊലിച്ച് അടുത്തിടെ സ്റ്റാൻഡിലാകെ മാലിന്യം നിരന്നതോടെയാണ് പൂട്ടേണ്ടി വന്നത്. ദേശീയപാതയിലും പൊൻകുന്നം-പാലാ, പൊൻകുന്നം-മണിമല റൂട്ടിലും ചങ്ങനാശേരി റൂട്ടിലുമായി നൂറുകണക്കിനു ബസുകൾ പ്രതിദിനം പല ട്രിപ്പുകളായി എത്തുന്ന സ്റ്റാൻഡിൽ എപ്പോഴും യാത്രക്കാരുടെ തിരക്കാണ്. ആയിരക്കണക്കിനു യാത്രക്കാരെത്തുന്ന സ്റ്റാൻഡിൽ കംഫർട്ട് സ്റ്റേഷൻ ഇല്ലാതായതോടെ യാത്രക്കാർ പലരും സമീപവഴികളും ഇടനാഴികളും പ്രാഥമിക കൃത്യത്തിനായി ഉപയോഗിക്കുന്നതു വലിയ മാലിന്യപ്രശ്‌നമായിരിക്കുന്നു. കടകളുടെ സമീപത്തും ഒഴിഞ്ഞയിടങ്ങളിലുമെല്ലാം യാത്രക്കാരും ബസ് ജീവനക്കാരും പ്രാഥമിക കൃത്യം നിർവഹിക്കേണ്ട ഗതികേടിലാണ്. അറ്റകുറ്റപ്പണി വൈകുമെങ്കിൽ മുൻകാലത്ത് ചെയ്തതുപോലെ താത്കാലിക ടോയ്‌ലറ്റ് സ്ഥാപിച്ചു പ്രശ്‌നപരിഹാരമുണ്ടാക്കണമെന്ന ആവശ്യം ശക്തമായിരിക്കുകയാണ്.

സിവിൽ സർവീസ് പരീക്ഷയിൽ മികച്ച വിജയം; സോനറ്റിന് അഭിനന്ദന പ്രവാഹം

മുണ്ടക്കയം: സിവിൽ സർവീസ് പരീക്ഷയിൽ മികച്ച വിജയം നേടി നാടിന് അഭിമാനമായി മാറിയ സോനറ്റ് ജോസിന് അഭിനന്ദനങ്ങളുമായി എത്തുന്നത് നിരവധി ആളുകൾ. മുണ്ടക്കയം പുലിക്കുന്ന് ഈറ്റക്കക്കുന്നേല്‍ ജോസ്-മേരിക്കുട്ടി ദമ്പതികളുടെ ഇളയ മകളായ സോനറ്റ് ജോസ് സിവിൽ സർവീസ് പരീക്ഷയിൽ 54-ാം റാങ്ക് നേടിയാണ് മികച്ച വിജയം കൈവരിച്ചത്. സെബാസ്റ്റ്യൻ കുളത്തുങ്കൽ എംഎൽഎ രാവിലെ വീട്ടിലെത്തി സോനറ്റിന് അഭിനന്ദനം അറിയിക്കുകയും പൊന്നാടയണിയിച്ച് ആദരിക്കുകയും ചെയ്തു.പഞ്ചായത്ത് മെംബർമാരായ കെ.എൻ. സോമരാജൻ, ഫൈസൽമോൻ, പൊതുപ്രവർത്തകരായ ടി.ജെ. ചാക്കോ, ജോയി പുളിക്കൽ, തങ്കച്ചൻ കാരക്കാട്, അനിയാച്ചൻ മൈലപ്ര തുടങ്ങിയവരും സന്നിഹിതരായിരുന്നു. കാഞ്ഞിരപ്പള്ളി ബ്ലോക്ക് പഞ്ചായത്തിന്‍റ നേതൃത്വത്തിൽ ബ്ലോക്ക് പഞ്ചായത്ത് പ്രസിഡന്‍റ് അജിത രതീഷ് വീട്ടിലെത്തി ആദരിച്ചു. ബ്ലോക്ക് പഞ്ചായത്തംഗം പി.കെ. പ്രദീപ്, ബിഡിഒ ഫൈസൽ സാലി, എൻആർഇജി എ.ഇ. മനിഷ് മണി, ഓവർസിയർ മനു തുടങ്ങിയവർ ഒപ്പമുണ്ടായിരുന്നു. മുണ്ടക്കയം പഞ്ചായത്ത് പ്രസിഡന്‍റ് രേഖ ദാസ്, സ്റ്റാൻഡിംഗ് കമ്മിറ്റി ചെയർമാൻമാരായ സി.വി. അനിൽകുമാർ, ഷിജി ഷാജി, ദിലീഷ് ദിവാകരൻ എന്നിവർ ചേർന്ന് പൊന്നാടയണിയിച്ചും മെമന്‍റോ നൽകിയും ആദരിച്ചു. കോൺഗ്രസ്‌ മുണ്ടക്കയം മണ്ഡലം കമ്മിറ്റിയുടെ നേതൃത്വത്തിൽ നൽകിയ ആദരവിൽ മണ്ഡലം പ്രസിഡന്‍റ് കെ.എസ്. രാജു, ബെന്നി ചേറ്റുകുഴി, ടി.ടി. സാബു, ടോമി താമരശേരി, മറിയാമ്മ ആന്‍റണി എന്നിവർ പങ്കെടുത്തു. അഭിനന്ദിച്ചു മുണ്ടക്കയം: സിവിൽ സർവീസ് പരീക്ഷയിൽ 54-ാം റാങ്ക് നേടിയ സെന്‍റ് ആന്‍റണീസ് ഹൈസ്കൂൾ പൂർവ വിദ്യാർഥിയും 2014-16 ബാച്ച് എസ്പിസി കേഡറ്റുമായ സോനറ്റ് ജോസിനെ മുണ്ടക്കയം സെന്‍റ് ആന്‍റണീസ് സ്കൂൾ മാനേജ്മെന്‍റ്, അധ്യാപകർ, കുട്ടികൾ എന്നിവർ അഭിനന്ദിച്ചു.

മരിയൻ കോളജിൽ കിക്ക്‌ ബോക്സിംഗ് പരിശീലന ക്യാമ്പ്

കുട്ടിക്കാനം: മരിയൻ കോളജിൽ 10-മത് അന്തർദേശീയ കിക്ക്‌ ബോക്സിംഗ് പരിശീലന ക്യാമ്പ് തുടങ്ങി. ഏപ്രിൽ 21ന് ആരംഭിച്ച ക്യാമ്പ് 30ന് അവസാനിക്കും. വാക്കോ ഇന്ത്യ കേരള അസോസിയേഷനും മരിയൻ കോളജിലെ ഹെൽത്ത് ആൻഡ് വെൽനെസ് ഡിപ്പാർട്ട്മെന്‍റും ചേർന്നാണ് പരിശീലന ക്യാമ്പ് സംഘടിപ്പിച്ചിരിക്കുന്നത്. ദേശീയ, അന്തർദേശീയ അംഗീകാരങ്ങൾ നേടിയ പരിശീലകരുടെ നേതൃത്വത്തിലാണ് ക്യാമ്പ് നടക്കുന്നത്. ഏകദേശം 200 ഓളം കായിക പ്രതിഭകൾ ക്യാമ്പിൽ പങ്കെടുക്കുന്നുണ്ട്. കിക്ക് ബോക്സിംഗിനെക്കുറിച്ച് കൂടുതൽ പഠിക്കാനും മികച്ച പരിശീലനം ലഭിക്കാനും ക്യാമ്പിലൂടെ കഴിയുമെന്ന് സംഘാടകർ വ്യക്തമാക്കി. വിവിധ സംസ്ഥാനങ്ങളിൽ നിന്നുള്ള യുവജനങ്ങൾ ക്യാമ്പിൽ പങ്കെടുക്കാൻ എത്തിയിട്ടുണ്ട്.

ഭാഗവത സപ്താഹ യജ്ഞം

കറുകച്ചാല്‍: നെത്തല്ലൂര്‍ ഏകാത്മതാ കേന്ദ്രത്തില്‍ ഭാഗവത സപ്താഹ യജ്ഞ പരമ്പരയുടെ 23-ാമത് യജ്ഞം ആരംഭിച്ചു. 27നു സമാപിക്കും. ഇളയിടം ശങ്കരനാരായണന്‍ നമ്പൂതിരി യജ്ഞാചാര്യനായും കല്ലമ്പള്ളി ശൈലേഷ് നമ്പൂതിരി, കൊരമ്പൂര്‍ പ്രമോദ് നമ്പൂതിരി എന്നിവര്‍ സഹ ആചാര്യന്മാരുമായിരിക്കും.

സര്‍ഗക്ഷേത്ര അക്കാദമിയിൽ സൗജന്യ ജർമൻഭാഷാപഠനം ഉദ്ഘാടനം

ചങ്ങനാശേരി: കുട്ടികളുടെ വിദേശ ഭാവി പഠനത്തിന് സഹായകമായി സിഎംഐ വൈദികര്‍ നേതൃത്വം നല്‍കുന്ന ചെത്തിപ്പുഴ കേന്ദ്രമാക്കി പ്രവര്‍ത്തിക്കുന്ന സര്‍ഗക്ഷേത്ര അക്കാദമിയുടെ കീഴില്‍ പ്ലസ് ടു പഠനം കഴിഞ്ഞവര്‍ക്കും നഴ്‌സിംഗ് പഠനം പൂര്‍ത്തിയാക്കിയവര്‍ക്കും സൗജന്യമായി നല്‍കുന്ന എവണ്‍ മുതല്‍ ബിടുവരെയുള്ള ജര്‍മന്‍ ഭാഷാ പഠന ക്ലാസുകളുടെ ഉദ്ഘാടനം സിഎംഐ സഭയുടെ പ്രൊവിന്‍ഷ്യല്‍ ഫാ. ആന്‍റണി ഇളംതോട്ടം നിര്‍വഹിച്ചു. ഫാ. ജയിംസ് മുല്ലശേരി സിഎംഐ, ഫാ. അലക്‌സ് പ്രായിക്കളം സിഎംഐ, ആശ ആനി തോമസ്, ത്രേസ്യമ്മ കെ. ജോസഫ് എന്നിവര്‍ പ്രസംഗിച്ചു. ഐഇഎല്‍ടിഎസ്, പിടിഇ, സ്‌പോക്കണ്‍ ഇംഗ്ലീഷ്, എന്നീ ക്ലാസുകളും അക്കാദമിയുടെ കീഴില്‍ പ്രവര്‍ത്തിക്കുന്നു. താത്പര്യമുള്ളവര്‍ സര്‍ഗക്ഷേത്ര അക്കാഡമിയുമായി ബന്ധപ്പെടുക. 9496802200.

മാര്‍പാപ്പയുടെ വിയോഗം : വിശുദ്ധ കുർബാനയും വൈദികസമ്മേളനവും നടത്തി

ചങ്ങനാശേരി: ഫ്രാന്‍സിസ് മാര്‍പാപ്പയുടെ വിയോഗത്തില്‍ അനുശോചിച്ച് ആര്‍ച്ച്ബിഷപ് മാര്‍ തോമസ് തറയിലിന്‍റെ മുഖ്യകാര്‍മികത്വത്തില്‍ സെന്‍റ് മേരീസ് മെത്രാപ്പോലീത്തന്‍പള്ളിയില്‍ വിശുദ്ധ കുര്‍ബാനയും മൃതിയടഞ്ഞവര്‍ക്കായുള്ള പ്രാര്‍ഥനയും നടത്തി. ആര്‍ച്ച്ബിഷപ് മാര്‍ ജോസഫ് പെരുന്തോട്ടം, അപ്പൊസ്‌തോലിക സ്ഥാനപതി ആര്‍ച്ച്ബിഷപ് മാര്‍ ജോര്‍ജ് കോച്ചേരി, പ്രോട്ടോസിഞ്ചെല്ലൂസ് ഫാ. ആന്‍റണി എത്തയ്ക്കാട്ട്, സിഞ്ചെല്ലൂസുമാരായ ഫാ. മാത്യു ചങ്ങങ്കരി, ഫാ. സ്‌കറിയ കന്യാകോണില്‍, ഫാ. ജോണ്‍ തെക്കേക്കര, മെത്രാപ്പോലീത്തന്‍ പള്ളി വികാരി ഫാ. ജോസഫ് വാണിയപ്പുരയ്ക്കല്‍, അതിരൂപത-സന്യസ്തവൈദികര്‍ എന്നിവര്‍ സഹകാര്‍മികരായിരുന്നു. ആര്‍ച്ച്ബിഷപ് മാര്‍ ജോസഫ് പെരുന്തോട്ടം അനുസ്മരണസന്ദേശം നല്‍കി. വിശുദ്ധ കുര്‍ബാനയ്ക്കുശേഷം മെത്രാപ്പോലീത്തന്‍പള്ളിയങ്കണത്തില്‍ ഒരുക്കിയ ഫ്രാന്‍സിസ് മാര്‍പാപ്പയുടെ ഛായാചിത്രത്തിനു മുമ്പില്‍ നിലവിളക്കു തെളിച്ചു പുഷ്പാര്‍ച്ചന നടത്തി. തുടര്‍ന്നു നടന്ന വൈദികസമ്മേളനത്തില്‍ മെത്രാഭിഷേകത്തിന്‍റെ എട്ടാം വാര്‍ഷികമാഘോഷിക്കുന്ന ആര്‍ച്ച്ബിഷപ് മാര്‍ തോമസ് തറയില്‍, 80-ാം ജന്മദിനമാഘോഷിക്കുന്ന ആര്‍ച്ച്ബിഷപ് മാര്‍ ജോര്‍ജ് കോച്ചേരി, 2024 ഡിസംബര്‍-2025 ജനുവരി മാസങ്ങളില്‍ പൗരോഹിത്യം സ്വീകരിച്ച നവവൈദികര്‍ എന്നിവര്‍ക്കു പൂക്കള്‍ നല്‍കി ആശംസകളറിയിച്ചു. എംഎസ്ടി സന്യാസസമൂഹാംഗം ഫാ. ജോസഫ് ചെറിയമ്പനാട്ട് ഒഡീഷ മിഷനെക്കുറിച്ചു സമ്മേളനത്തിനു പരിചയപ്പെടുത്തി. ഫാ. തോമസ് വള്ളിയാനിപ്പുറം ബൈബിളിലെ പ്രവാചകരെക്കുറിച്ചു രചിച്ച പ്രവാചകര്‍ ദൈവികവിപ്ലവത്തിന്‍റെ തീപ്പന്തങ്ങള്‍ എന്ന പഠനഗ്രന്ഥം ആര്‍ച്ച്ബിഷപ് മാര്‍ തോമസ് തറയില്‍ ആര്‍ച്ച്ബിഷപ് മാര്‍ ജോര്‍ജ് കോച്ചേരിക്കു നല്‍കി പ്രകാശനം ചെയ്തു.

റേഷന്‍കടകളില്‍ വാതില്‍പ്പടി സാധനങ്ങളെത്തിക്കല്‍ താളംതെറ്റുന്നു

ചങ്ങനാശേരി: ചങ്ങനാശേരി താലൂക്കിലെ റേഷന്‍കടകളില്‍ വാതില്‍പ്പടി സാധനങ്ങളെത്തിക്കല്‍ താളംതെറ്റുന്നു. എന്‍എഫ്എസ്എ ഗോഡൗണിനുമുമ്പില്‍ റേഷന്‍ വ്യാപാരികള്‍ പ്രതിഷേധ ധര്‍ണ നടത്തി. ഓള്‍ കേരള റീട്ടെയില്‍ റേഷന്‍ ഡീലേഴ്സ് അസോസിയേഷന്‍റെ നേതൃത്വത്തിലാണ് ഗോഡൗണിനുമുമ്പില്‍ പ്രതിഷേധ ധര്‍ണ നടത്തിയത്. എന്‍എഫ്എസ്എ ട്രാന്‍സ്പോര്‍ട്ടേഷന്‍ കരാറുകാരനും ഉദ്യോഗസ്ഥരും തമ്മിലുള്ള അവിശുദ്ധ കൂട്ടുകെട്ട് മൂലം പൊതുജനങ്ങള്‍ക്ക് നല്‍കേണ്ട പ്രതിമാസ റേഷന്‍ സാധനങ്ങള്‍ മാസവസാനം മാത്രമാണ് ചങ്ങനാശേരി താലൂക്കിലെ റേഷന്‍ കടകളില്‍ എത്തുന്നത്. ഇതുമൂലം ജനങ്ങള്‍ക്ക് മുഴുവന്‍ റേഷന്‍ സാധനങ്ങളും വിതരണം ചെയ്യാന്‍ കഴിയുന്നില്ല. അതിന്‍റെ ഫലമായി വ്യാപാരികള്‍ക്ക് കമ്മീഷനില്‍ വലിയ കുറവ് ഉണ്ടാകുന്നു. കഴിഞ്ഞ ആറുമാസക്കാലമായി ഈ സ്ഥിതി തുടരുകയാണ്. മാസത്തിന്‍റെ ആരംഭത്തില്‍ തന്നെ റേഷന്‍ സാധനങ്ങള്‍ കടകളില്‍ എത്തിക്കുമെന്നാണ് ഭക്ഷ്യവകുപ്പിന്‍റെ നിബന്ധന. വാതിപ്പടിക്കല്‍ റേഷന്‍ സാധനങ്ങള്‍ എത്തിക്കാന്‍ താമസിപ്പിക്കുന്നത് മനപൂര്‍വമാണന്നും വാതില്‍പ്പടിയില്‍ സാധനങ്ങള്‍ തൂക്കിനല്‍കാതിരിക്കാനും റേഷന്‍ സാധനങ്ങളില്‍ വലിയ തോതിലുള്ള വെട്ടിപ്പ് നടത്താനും ചങ്ങനാശേരി താലൂക്കിലെ സിവില്‍ സപ്ലൈസ്, സപ്ലൈകോ ഉദ്യോഗസ്ഥര്‍ ട്രാന്‍സ്പോര്‍റ്റേഷന്‍ കരാറുകര്‍ക്ക് ഒത്താശ ചെയ്ത് കൊടുക്കുകയാണെന്നും റീട്ടെയില്‍ റേഷന്‍ ഡിലേഴ്സ് അസോസിയേഷന്‍ ആരോപിച്ചു. സംസ്ഥാന വൈസ് പ്രസിഡന്‍റ് സി.മോഹനന്‍പിള്ള ധര്‍ണ ഉദ്ഘാടനം ചെയ്തു. ഏത് കടകളിലും പോയി റേഷന്‍ വാങ്ങാമെന്നുള്ള പോര്‍ട്ടബിലിറ്റി സിസ്റ്റം നിലനില്‍ക്കുന്നതുമൂലം കാര്‍ഡ് ഉടമകള്‍ക്ക് റേഷന്‍ സാധനങ്ങള്‍ സ്റ്റോക്കുള്ള കടകളില്‍ പോയി റേഷന്‍ വാങ്ങാന്‍ കഴിയും. ഇതുമൂലം കടയില്‍ സ്റ്റോക്കില്ലാത്ത വ്യാപാരികള്‍ തൂക്കം നോക്കാതെ തന്നെ ലോഡ് ഇറക്കാന്‍ നിര്‍ബന്ധിതരാകുന്നു. ഈ അവസരം മുതലെടുത്താണ് കരാറുകാരന്‍ തൂക്കത്തില്‍ വെട്ടിപ്പ് നടത്തുന്നതെന്നും വ്യാപാരികള്‍ ആരോപിച്ചു. ഓള്‍ കേരള റീറ്റെയ്ല്‍ റേഷന്‍ ഡീലേഴ്സ് അസോസിയേഷന്‍ താലൂക്ക് പ്രസിഡന്‍റ് രമേശ് കുമാര്‍ അധ്യക്ഷത വഹിച്ചു. ജില്ലാ പ്രസിഡന്‍റ് ബാബു ചെറിയാന്‍, സെക്രട്ടറി സന്തോഷ്, ഓര്‍ഗനൈസിംഗ് സെക്രട്ടറി മുരളീധരന്‍ നായര്‍, ജില്ലാ വൈസ് പ്രസിഡന്‍റ് അഫ്‌സല്‍ പ്രയാറ്റ്, താലൂക്ക് സെക്രട്ടറി സനില്‍ മാത്യ, എം.എസ്. സോമന്‍ എന്നിവര്‍ പ്രസംഗിച്ചു.

ബൈക്കില്‍ സഞ്ചരിച്ച് കഞ്ചാവ് വില്‍പ്പന നടത്തുന്നതിനിടെ യുവാവിനെ എക്സൈസ് പിടികൂടി

തയോലപ്പറമ്പ്: വെള്ളൂർ കരിപ്പാടത്തുനിന്ന് കഞ്ചാവുമായി യുവാവിനെ എക്‌സൈസ് സംഘം പിടികൂടി. വെള്ളൂര്‍ തോന്നല്ലൂര്‍ സ്രാങ്കുഴി കൊല്ലംപറമ്പിൽ പി.കെ. അശ്വിനെ(19)യാണ് കടുത്തുരുത്തി എക്‌സൈസിന്‍റെ നേതൃത്വത്തിൽ പിടികൂടിയത്. യുവാവ് കരിപ്പാടംപള്ളിക്ക് സമീപം വാടകയ്ക്ക് വീടെടുത്ത് താമസിച്ചുവരികയായിരുന്നു. ഇന്നലെ രാവിലെ 8.30 ഓടെ കരിപ്പാടം ഭാഗത്തുകൂടി ബൈക്കിൽ വന്ന ഇയാളിൽനിന്ന് എക്‌സൈസ് സംഘം കഞ്ചാവ് കണ്ടെടുക്കുകയായിരുന്നു. യുവാവിന്‍റെ ബൈക്കില്‍ സൂക്ഷിച്ചിരുന്ന 150 ഗ്രാം കഞ്ചാവും ബൈക്കും സംഘം കസ്റ്റഡിയിലെടുത്തു. കടുത്തുരുത്തി എക്‌സൈസ് ഓഫിസിലെ മുന്‍ കഞ്ചാവ് കേസിലെ പ്രതിയായ സ്രാങ്കുഴി സ്വദേശി വിപിന്‍ദാസിന്‍റെ നിര്‍ദേശപ്രകാരമാണ് അശ്വിന്‍ കഞ്ചാവ് കച്ചവടം നടത്തിയിരുന്നതെന്നും അശ്വിന്‍ ആവശ്യക്കാര്‍ക്ക് കഞ്ചാവ് എത്തിച്ചുകൊടുക്കുന്ന ഏജന്‍റായി പ്രവര്‍ത്തിക്കുകയായിരുന്നെന്നും അധികൃതർ പറഞ്ഞു. അശ്വിനെ ഒന്നാം പ്രതിയായും വിപിന്‍ദാസിനെ രണ്ടാം പ്രതിയായും ചേർത്ത് കേസെടുത്തതായി എക്‌സൈസ് ഇന്‍സ്പെക്ടര്‍ കെ.എസ്. അനില്‍കുമാര്‍ പറഞ്ഞു. അസിസ്റ്റന്‍റ് എക്‌സൈസ് ഇന്‍സ്പെക്ടര്‍മാരായ വി.ആര്‍. രാജേഷ്, ജി. രാജേഷ്, പ്രിവന്‍റീവ് ഓഫിസര്‍ പ്രമോദ് എന്നിവരുടെ നേതൃത്വത്തിലുള്ള സംഘമാണ് രഹസ്യവിവരത്തെത്തുടര്‍ന്നു നടത്തിയ പരിശോധനയ്ക്കിടെ യുവാവിനെ പിടികൂടിയത്.

യുവാവിനെയും ബന്ധുവിനെയും ആക്രമിച്ച് പരിക്കേൽപ്പിച്ച കേസിൽ രണ്ടു പേർ പിടിയിൽ

തലയോലപ്പറമ്പ്: ക്ഷേത്രോത്സവത്തിനു ബന്ധുവിന്‍റെ കൂടെ ബൈക്കില്‍ പോകുന്നതിനിടെ തടഞ്ഞുനിര്‍ത്തി കമ്പിവടി ഉപയോഗിച്ച് യുവാവിനെ ആക്രമിച്ച സംഭവത്തില്‍ രണ്ടുപേര്‍ പിടിയില്‍. ബ്രഹ്‌മമംഗലം വൈപ്പാടമ്മേല്‍ പനച്ചാംതറ സ്വദേശി രാഹുല്‍ (31), ഇയാളുടെ സുഹൃത്തും സമീപവാസിയുമായ അനുരാജ് (39) എന്നിവരെയാണ് തലയോലപ്പറമ്പ് പോലീസ് പിടികൂടിയത്. ഈ മാസം 10ന് രാത്രി 10.30ന് ബ്രഹ്‌മമംഗലം മണക്കാട്ടുചിറ ഭാഗത്താണ് ആക്രമണം നടന്നത്. അരയന്‍കാവ് ക്ഷേത്രത്തിലെ ഉത്സവത്തില്‍ പങ്കെടുക്കുന്നതിനായി പോവുകയായിരുന്ന ബ്രഹ്‌മമംഗലം കൃഷ്ണന്‍തുരുത്ത് സ്വദേശി ദേവദാസ് (21), ഇയാളുടെ ബന്ധു അഭിജിത്ത് എന്നിവര്‍ക്കാണ് ആക്രമണത്തില്‍ പരിക്കേറ്റത്. സംഭവം തടയാന്‍ ശ്രമിച്ച ഇവരുടെ സുഹൃത്തുക്കളായ അഭിരാജ്, അലന്‍, ആദിത്ത്, വിശാഖ് എന്നിവര്‍ക്കും ആക്രമണത്തില്‍ പരിക്കേറ്റു. പരിക്കേറ്റ ദേവദാസ് വൈക്കം താലൂക്ക് ആശുപത്രിയില്‍ ചികിത്സതേടിയിരുന്നു. കഴിഞ്ഞ വര്‍ഷം പ്രദേശത്തെ ക്ലബിന്‍റെ കാവടി ഘോഷയാത്രയില്‍ പ്രശ്നങ്ങള്‍ ഉണ്ടാക്കിയെന്ന് ആരോപിച്ച് രാഹുലിനെ ക്ലബ് ഭാരവാഹികൂടിയായ ദേവദാസ് ഉള്‍പ്പെടെയുള്ളവര്‍ പരിപാടിയില്‍നിന്ന് മാറ്റി നിര്‍ത്തിയതുമായി ബന്ധപ്പെട്ട വൈരാഗ്യമാണ് ആക്രമണത്തിന് പിന്നിലെന്ന് പോലീസ് പറഞ്ഞു. ആക്രമണവുമായി ബന്ധപ്പെട്ട് രണ്ട് പ്രതികളെക്കൂടി ഇനി പിടികൂടാനുണ്ടെന്ന് പോലീസ് അറിയിച്ചു.

റോളർ സ്പോർട്സിൽ പരിശീലനം നേടാൻ ഗ്രാമപ്രദേശത്തെ കുട്ടികളും

തലയോലപ്പറമ്പ്: അന്താരാഷ്‌ട്ര കായിക വേദിയിൽ തരംഗമായ റോളർ സ്പോർട്സിൽ പരിശീലനം നേടാൻ ഗ്രാമപ്രദേശത്തെ കുട്ടികളും. വൈക്കം തലയോലപ്പറമ്പ് എ.ജെ. ജോൺ മെമ്മോറിയൽ ഗവൺമെന്‍റ് സ്കൂളിൽ മുൻ സ്പോർട്സ് അഥോറിറ്റി ഓഫ് ഇന്ത്യ വിമൻസ് ഫുട്ബോൾ കോച്ച് ജോമോൻ ജേക്കബിന്‍റെ ശിക്ഷണത്തിൽ 40 വിദ്യാർഥികളാണ് ഇപ്പോൾ റോളർ സ്പോർട്സിലും ഫുട്ബോളിലുമായി പരിശീലനം നടത്തുന്നത്. തലയോലപ്പറമ്പ് സിഐ ബിബിൻ ചന്ദ്രനാണ് ക്യാമ്പിന്‍റെ ഉദ്ഘാടനം നിർവഹിച്ചത്. സ്കൂൾ പ്രിൻസിപ്പൽ എസ്. ശ്രീലത, ഹെഡ്മിസ്ട്രസ് സി. മായാദേവി, സ്കൂൾ പിടിഎ പ്രസിഡന്‍റ് ടി.എസ്. താജു, എസ്എംസി ചെയർമാൻ എം.എസ്. തിരുമേനി, സ്റ്റാഫ് സെക്രട്ടറി ടി.എസ്. ഫെബി, കെഎസ്‌ഇബി വെറ്ററൻ വോളിബോൾ താരം ബാലകൃഷ്ണൻ മാധവശേരി, ശ്രീനിധി, മുഖ്യ പരിശീലകൻ ജോമോൻ ജേക്കബ്, കായികാധ്യാപിക രേഷ്മ തുടങ്ങിയവർ പ്രസംഗിച്ചു.

കരിയാര്‍ സ്പില്‍വേ തുറക്കാന്‍ നടപടി സ്വീകരിക്കണം

കടുത്തുരുത്തി: തോട്ടകം കരിയാര്‍ സ്പില്‍വേ ഏപ്രില്‍ 30ന് മുമ്പ് തുറക്കാന്‍ നടപടി സ്വീകരിക്കണമെന്ന് മോന്‍സ് ജോസഫ് എംഎല്‍എ സര്‍ക്കാരിനോട് ആവശ്യപ്പെട്ടു. കരിയാര്‍ സ്പില്‍വേയുടെ മുഖ്യ ചുമതലയുള്ള ജില്ലാ കളക്ടര്‍ ജോണ്‍ വി. സാമുവലുമായി ഇതുസംബന്ധിച്ചു എംഎല്‍എ ചര്‍ച്ച നടത്തി. ഇക്കാര്യം ഉന്നയിച്ചു കടുത്തുരുത്തി പഞ്ചായത്ത് എടുത്ത കമ്മിറ്റി തീരുമാനം മെംബര്‍ നോബി മുണ്ടയ്ക്കന്‍ ജില്ലാകളക്ടറെ നേരില്‍ക്കണ്ട് സമര്‍പ്പിച്ചിരുന്നു. വൈക്കം താലൂക്കിലെ മുഴുവന്‍ പഞ്ചായത്തുകളിലും നെല്‍കൃഷിയും മറ്റ് അനുബന്ധ കൃഷികളും പ്രയോജനകരമായി നടപ്പാക്കുന്നതിന് കരിയാര്‍ സ്പില്‍വേ തുറക്കേണ്ടത് അത്യന്താപേക്ഷിതമാണ്. വിവിധ തോടുകളിലെ നീരൊഴുക്ക് സുഗമമാക്കുന്നതിനും ജലാശയങ്ങള്‍ വൃത്തിയാക്കുന്നതിനും മലിനജലംമൂലമുണ്ടാകുന്ന സാംക്രമിക രോഗങ്ങള്‍ ഒഴിവാക്കുന്നതിനും കരിയാര്‍ സ്പില്‍വേ തുറക്കുന്നതിലൂടെ സഹായകരമാകുമെന്ന് എംഎല്‍എയും കടുത്തുരുത്തി പഞ്ചായത്തും നല്‍കിയ നിവേദനങ്ങളില്‍ ചൂണ്ടിക്കാണിച്ചിട്ടുണ്ട്. പ്രകൃതി സംരക്ഷണത്തിനും ജനവാസ വ്യവസ്ഥിതിക്കും ഓരുവെള്ളം കയറ്റിയിറക്കുന്നത് അനിവാര്യമാണ്. ഇക്കാര്യത്തില്‍ അടിയന്തര നടപടി ഉണ്ടാകുമെന്ന് ജില്ലാ കളക്ടര്‍ ഉറപ്പ് നല്‍കിയതായി എംഎല്‍എ അറിയിച്ചു.

തിരുനാൾ മാറ്റിവച്ചു

തലയോലപ്പറമ്പ്: ഫ്രാൻസിസ് മാർപ്പാപ്പയുടെ ദേഹ വിയോഗത്തെത്തുടർന്ന് തലയോലപ്പറമ്പ് പള്ളിയിൽ 25 മുതൽ 27വരെ നടത്താൻ നിശ്ചയിച്ചിരുന്ന വിശുദ്ധ ഗീവർഗീസ് സഹദായുടെ തിരുനാൾ മെയ് ആദ്യ ആഴ്ചയിലേക്ക് മാറ്റിയതായി ഇടവക വികാരി റവ.ഡോ. ബെന്നി ജോൺ മാരാംപറമ്പിൽ അറിയിച്ചു. 27ന് രാവിലെ ഏഴിന് നടക്കുന്ന കുർബാനയ്ക്ക് ശേഷം ഇടവകയുടെ നേതൃത്വത്തിൽ മൗനജാഥയും തുടർന്ന് പാരിഷ് ഹാളിൽ തലയോലപ്പറമ്പ് പൗരാവലിയുടെ ആഭിമുഖ്യത്തിൽ അനുസ്മരണ സമ്മേളനവും നടക്കും. 27ന് രാവിലെ 8.30ന് പള്ളിയിൽ വിശുദ്ധ കുർബാന ഉണ്ടായിരിക്കില്ലെന്നും വികാരി റവ.ഡോ. ബെന്നി ജോൺ മാരാംപറമ്പിൽ അറിയിച്ചു.

മാന്‍വെട്ടം സെന്‍റ് ജോര്‍ജ് പള്ളിയില്‍ വിശുദ്ധ ഗീവര്‍ഗീസ് സഹദായുടെ തിരുനാളിന് നാളെ കൊടിയേറും

കടുത്തുരുത്തി: മാന്‍വെട്ടം സെന്‍റ് ജോര്‍ജ് പള്ളിയില്‍ വിശുദ്ധ ഗീവര്‍ഗീസ് സഹദായുടെ തിരുനാളിന് നാളെ കൊടിയേറും. 27ന് പ്രധാന തിരുനാള്‍ ആഘോഷിക്കും. ഇന്ന് രാവിലെ ആറിനും ഏഴിനും വിശുദ്ധ കുര്‍ബാന, 2.30ന് കര്‍ഷക സമ്മേളനം, അഞ്ചിന് വിശുദ്ധ കുര്‍ബാന, സന്ദേശം - റവ ഡോ. ആന്‍ഡ്രൂസ് മേക്കാട്ടുകുന്നേല്‍, ആറിന് ഭക്ഷ്യമേള, ഉത്പന്ന ലേലം. നാളെ രാവിലെ ആറിനും ഏഴിനും വിശുദ്ധ കുര്‍ബാന, 4.15ന് ജപമാല, തുടര്‍ന്ന് 4.45ന് കൊടിയേറ്റ് വികാരി റവ.ഡോ. തോമസ് കക്കാട്ടുതടത്തില്‍ കാര്‍മികത്വം വഹിക്കും. അഞ്ചിന് വിശുദ്ധ കുര്‍ബാന, സന്ദേശം - മോണ്‍ ജോസഫ് കണിയോടിക്കല്‍, 6.30ന് സ്നേഹവിരുന്ന്, തുടര്‍ന്ന് കലാസന്ധ്യ. 25ന് രാവിലെ ആറിനും ഏഴിനും വിശുദ്ധ കുര്‍ബാന, വൈകുന്നേരം അഞ്ചിന് വിശുദ്ധ കുര്‍ബാന, സന്ദേശം - റവ.ഡോ. സൈറസ് വേലംപറമ്പില്‍, 6.30ന് മെഴുകുതിരി ജപമാല പ്രദക്ഷിണം, ഏഴിന് സമാപനാശീര്‍വാദം. 26ന് രാവിലെ ആറിനും ഏഴിനും വിശുദ്ധ കുര്‍ബാന, തുടര്‍ന്ന് ജോര്‍ജ് നാമധാരികളുടെ സംഗമം. അഞ്ചിന് തിരുസ്വരൂപങ്ങള്‍ പരസ്യവണക്കത്തിനായി മോണ്ടളത്തില്‍ പ്രതിഷ്ഠിക്കും. തുടര്‍ന്ന് പാട്ടുകുര്‍ബാന, സന്ദേശം - മോണ്‍. ജോസഫ് തടത്തില്‍, 6.30ന് പ്രദക്ഷിണം, 8.30ന് സന്ദേശം - ഫാ. ജോണ്‍സണ്‍ നീലനിരപ്പേല്‍, 9.15ന് ആശീര്‍വാദം. പ്രധാന തിരുനാള്‍ ദിനത്തിൽ ആറിനും 7.15 നും വിശുദ്ധ കുര്‍ബാന, 9.30ന് തിരുനാൾ റാസ - ഫാ. അരുണ്‍ തെരുവില്‍ മുഖ്യ കാര്‍മികത്വം വഹിക്കും. പത്തിന് തിരുനാള്‍ പ്രസംഗം - റവ ഡോ. ജോര്‍ജ് ഞാറകുന്നേല്‍, 11.30ന് പ്രദക്ഷിണം, തുടര്‍ന്ന് സമാപനാശീര്‍വാദം, പ്രസുദേന്തി വാഴ്ച, കോഴി ലേലം, ഏഴിന് മെഗാഷോ. സമാപനദിനമായ 28ന് രാവിലെ ആറിന് മരിച്ചവര്‍ക്കുവേണ്ടിയുള്ള വിശുദ്ധ കുര്‍ബാന, സെമിത്തേരി സന്ദര്‍ശനം, 7.15ന് വിശുദ്ധ കുര്‍ബാന, തിരുസ്വരൂപ പുനഃപ്രതിഷ്ഠ, കൊടിയിറക്കല്‍.

വിവരാവകാശ കമ്മീഷന്‍ സിറ്റിംഗ്: 31 പരാതികള്‍ തീര്‍പ്പാക്കി

കോട്ടയം: എയ്ഡഡ് സ്‌കൂള്‍ മാനേജ്മെന്‍റിന് വിവരാവകാശ നിയമം ബാധകമെന്ന് വിവരാവകാശ കമ്മീഷന്‍. എയ്ഡഡ് സ്‌കൂളിലെ നിയമനത്തിന് അംഗീകാരം നല്‍കുന്നത് ഹയര്‍ സെക്കന്‍ഡറി റീജണല്‍ ഡെപ്യൂട്ടി ഡയറക്ടറാണ്. അതിനാല്‍ നിയമനങ്ങള്‍ സംബന്ധിച്ച വിവരങ്ങള്‍ ശേഖരിച്ചുനല്‍കേണ്ട ബാധ്യത റീജണല്‍ ഡെപ്യൂട്ടി ഡയറക്ടര്‍ക്ക് ഉണ്ടെന്ന് കമ്മീഷന്‍ പറഞ്ഞു. കെ.എസ്. സാബു എന്ന ഹര്‍ജിക്കാരന്‍റെ പരാതി പരിഗണിക്കവേയാണ് കമ്മീഷന്‍ വിലയിരുത്തല്‍ നടത്തിയത്. സംസ്ഥാന വിവരാവകാശ കമ്മീഷണര്‍ ഡോ. കെ.എം. ദിലീപിന്‍റെ നേതൃത്വത്തില്‍ കളക്ടറേറ്റ് വിപഞ്ചിക ഹാളില്‍ നടന്ന വിവരാവകാശ കമ്മീഷന്‍ സിറ്റിംഗില്‍ 31 പരാതികള്‍ തീര്‍പ്പാക്കി. 39 പരാതികള്‍ പരിഗണിച്ചു. എട്ട് പരാതികള്‍ അടുത്ത സിറ്റിംഗിലേക്ക് മാറ്റി. തദ്ദേശസ്വയംഭരണ വകുപ്പ്, പൊതുമരാമത്ത്, റവന്യൂ വകുപ്പ്, കെഎസ്ഇബി, പോലീസ്, മഹാത്മാഗാന്ധി സര്‍വകലാശാല എന്നിവയുമായി ബന്ധപ്പെട്ട പരാതികളാണ് സിറ്റിംഗില്‍ കൂടുതലായി എത്തിയതെന്ന് കമ്മീഷന്‍ പറഞ്ഞു.

ദിലീപ് കുമാര്‍ മുഖര്‍ജിയെ അനുസ്മരിച്ചു

കോട്ടയം: ഗ്രാമീണ ബാങ്ക് എംപ്ലോയിസ് യൂണിയന്‍/ഓഫീസേഴ്‌സ് യൂണിയന്‍, ഗ്രാമീണ ബാങ്ക് റിട്ടയറീസ് ഫോറം സംഘടനകളുടെ ആഭിമുഖ്യത്തില്‍ ദിലീപ് കുമാര്‍ മുഖര്‍ജിയെ അനുസ്മരിച്ചു. എഐആര്‍ ആര്‍ബിഇഎയുടെ സ്ഥാപക നേതാക്കളില്‍ ഒരാളായിരുന്നു മുഖര്‍ജി. എകെബിആര്‍എഫ് സംസ്ഥാന പ്രസിഡന്‍റ് എന്‍. സുരേഷ് അനുസ്മരണ പ്രഭാഷണം നടത്തി. കെജിബിആര്‍എഫ് സംസ്ഥാന കമ്മിറ്റി അംഗം കെ. ആര്‍. നാരായണന്‍ നമ്പൂതിരി അധ്യക്ഷത വഹിച്ചു. എം.ആര്‍. നിതീഷ്, എബിന്‍ എം. ചെറിയാന്‍, കെജിബിഒയു സംസ്ഥാന പ്രസിഡന്‍റ് ടി.ജി. അനൂപ്, എകെബിആര്‍എഫ് ജില്ലാ പ്രസിഡന്‍റ് സി. നാരായണന്‍ രമ്യാരാജ്, സി. ലക്ഷ്മി, യു. അഭിനന്ദ്, വി.പി. ശ്രീരാമന്‍ തുടങ്ങിയവര്‍ പ്രസംഗിച്ചു.

ഇത്തിത്താനം ഗജമേള: തൃക്കടവൂർ ശിവരാജു ഒന്നാമനായി

ചിങ്ങവനം: ആനപ്രേമികളെ ആവേശത്തിലാക്കി ഇത്തിത്താനം ഗജമേള, മസ്തകം ഉയർത്തി തലപ്പൊക്കം അറിയിച്ച് അണിനിരന്ന കൊമ്പന്മാർ ഗജമേളയ്ക്ക് കൊഴുപ്പേകി. ഉയരത്തിൽ ഒന്നാമതെത്തിയ ഗജശ്രേഷ്ഠൻ തൃക്കടവൂർ ശിവരാജു കാഴ്ചശ്രീബലിയിൽ ഇളങ്കാവിലമ്മയുടെ പൊൻതിടമ്പേറ്റി. ഗുരുവായൂർ ദേവസ്വം ബാലകൃഷ്ണൻ ഇടത്തേക്കൂട്ടായും പുതുപ്പള്ളി കേശവൻ വലത്തേക്കൂട്ടായും അകമ്പടി സേവിച്ചു. ഉയരം കൊണ്ടും ലക്ഷണം കൊണ്ടും ശ്രദ്ധേയരായ 14 ആനകളാണ് മേളയിൽ അണിനിരന്നത്. സൂര്യകാലടിമന ഏർപ്പെടുത്തിയ ഗരാജരത്‌നപട്ടം തിരുവാണിക്കാവ് രാജഗോപാലിന് തന്ത്രി സൂര്യകാലടിമന സൂര്യം സുബ്രഹ്മണ്യൻ ഭട്ടതിരിപ്പാട് നൽകി. രാവിലെ മുതൽ കാവടി സംഘങ്ങളുടെ നേതൃത്വത്തിൽ നടന്ന കാവടിഘോഷയാത്രകൾ ഇത്തിത്താനത്തെ ഗ്രാമവീഥികളെ ആവേശത്തിലാഴ്ത്തിയാണ് ഇളങ്കാവിലമ്മയുടെ തിരുമുറ്റത്തെത്തിയത്. കിഴക്കേനടയിൽ ഗജമേളയിൽ പങ്കെടുത്ത കരിവീരന്മാരെ അണിനിരത്തി കാഴ്ച ശ്രീബലിയും സേവയും നടന്നു. പഞ്ചാരിമേളം ആസ്വാദക വൃന്ദത്തെ ആവേശത്തിലാക്കി. പുലവൃത്തം കളി, പള്ളിവേട്ട, പള്ളിനായാട്ടും നടന്നു. ചങ്ങനാശേരി ഡിവൈഎസ്പി പി.കെ. വിശ്വനാഥന്‍റെ നേതൃത്വത്തിൽ പോലീസ് സംഘവും എലിഫന്‍റ് സ്‌ക്വാഡും സുരക്ഷ ഒരുക്കി.

കുറിയന്നൂർകുന്ന് റോഡിൽ പൈപ്പ് പൊട്ടി വൻ ഗർത്തം

പാമ്പാടി: പോലീസ് സ്റ്റേഷന്‍റെ എതിർ വശത്ത് കുറിയന്നൂർകുന്ന് റോഡിന്‍റെ തുടക്കഭാഗത്ത് പൈപ്പ് പൊട്ടി റോഡിന്‍റെ നടുഭാഗം തകർന്ന് വൻ ഗർത്തം രൂപപ്പെട്ടു. 8.5 ലക്ഷം രൂപ ചെലവ് ചെയ്ത് പാമ്പാടി ബ്ലോക്ക്, ഗ്രാമ പഞ്ചായത്തുകൾ സംയുക്തമായി ഒരു മാസം മുൻപ് ടാർ ചെയ്ത് വശങ്ങൾ കോൺക്രീറ്റു ചെയ്ത റോഡിന്‍റെ നടുഭാഗമാണ് ഇന്നലെ തകർന്നത്. ശനിയാഴ്ച പൈപ്പ് നന്നാക്കുവാൻ റോഡ് പൊളിക്കാൻ തുടങ്ങിയപ്പോൾ വ്യാപാരികളും നാട്ടുകാരും ചേർന്ന് തടഞ്ഞിരുന്നു. തിങ്കളാഴ്ച വാട്ടർ അഥോറിറ്റി ഉദ്യോഗസ്ഥരുടെ സാന്നിധ്യത്തിൽ ജെസിബി ഉപയോഗിച്ച് റോഡ് കുഴിച്ച് പൈപ്പ് നന്നാക്കി മണ്ണിട്ടുമൂടി. നന്നാക്കിയ പൈപ്പിൽക്കൂടി ഇന്നലെ രാവിലെ വെള്ളമെത്തിയപ്പോൾ വൻ ശബ്ദത്തോടെ പൈപ്പ് വീണ്ടും പൊട്ടുകയായിരുന്നെന്ന് നാട്ടുകാർ പറഞ്ഞു. കാലപ്പഴക്കംചെന്ന ആസ്ബസ്റ്റോസ് പൈപ്പ് പൊട്ടിയ ഭാഗം മുറിച്ചു മാറ്റി അവിടെ പിവിസി പൈപ്പ് ഘടിപ്പിച്ചതാണ് വീണ്ടും പൊട്ടുവാനിടയാക്കിയത്. ഈ ഭാഗത്ത് ടാങ്കിലെ വെള്ളം തീരുന്നതുവരെ ഒഴുക്കായിരുന്നു. വാട്ടർ അഥോറിറ്റി ഉദ്യോഗസ്ഥരുടെ അനാസ്ഥയാണ് റോഡ് തകരുവാൻ കാരണമായി നാട്ടുകാർ ചൂണ്ടിക്കാണിക്കുന്നത്. റോഡ് നന്നാക്കുന്നതിനു മുൻപ് പൈപ്പ് റോഡിന്‍റെ ഒരു വശത്തേക്കു മാറ്റിസ്ഥാപിക്കുവാൻ വ്യാപാരികളടക്കമുള്ളവർ അധികൃതരോടാവശ്യപ്പെട്ടെങ്കിലും ചെവിക്കൊണ്ടില്ല. റോഡിന് തുക അനുവദിച്ച ബ്ലോക്ക് ഗ്രാമപഞ്ചായത്തംഗങ്ങൾക്ക് അനുമോദനമർപ്പിച്ചുകൊണ്ടുള്ള ഫ്ലക്സ് ബോർഡ് റോഡ് തകർന്നതിന് തൊട്ടടുത്ത് സ്ഥാപിച്ചത് ഇവിടെ കാണാം.

ലഹരിവിരുദ്ധ പ്രതിജ്ഞയെടുത്തു

പാമ്പാടി : ഐപിസി പാമ്പാടി സെന്‍റർ സൺ‌ഡേ സ്കൂളിന്‍റെയും പിവൈപിഎയുടെയും പ്രവർത്തനോദ്ഘാടനത്തോടനുബന്ധിച്ച് ലഹരിവിരുദ്ധ പ്രതിജ്ഞയെടുത്തു. സെന്‍റർ പ്രസിഡന്‍റ്പാസ്റ്റർ സാംദാനിയിൽ ലഹരി വിരുദ്ധ സന്ദേശം നൽകി. പിവൈപിഎ സെക്രട്ടറി കെസിയ മേരി തോമസ് പ്രതിജ്ഞ ചൊല്ലിക്കൊടുത്തു. റവ. ഷിബു കെ. മാത്യു, തോമസ് ചെറിയാൻ, കൊച്ചുമോൻ തോപ്പിൽ, കെവിൻ ഫിലിപ്പ് സാബു, യോശുവ അനീഷ് തുടങ്ങിയവർ പ്രസംഗിച്ചു. സെന്‍റർ സെക്രട്ടറി പാസ്റ്റർ കെ.എ. വർഗീസ് അധ്യക്ഷനായിരുന്നു.

മണർകാട് ദേവീക്ഷേത്രത്തിലെ പത്താമുദയം ഇന്ന്

മണർകാട്: ദേവീ ക്ഷേത്രത്തിലെ പത്താമുദയ ദിനമായ ഇന്നു പുലർച്ചെ രണ്ടിന് നട തുറന്നു. വിശേഷാൽ പൂജകൾക്ക് തന്ത്രി കുരുപ്പക്കാട്ട് ഇല്ലം നാരായണൻ നമ്പൂതിരിയും മേൽശാന്തി താന്നിയിൽ ഇല്ലം ശ്രീകുമാര ശർമയും കാർമികത്വം വഹിച്ചു. രാവിലെ ആറിനു കലംകരിയ്ക്കൽ ആരംഭിക്കും. ഉച്ചയ്ക്ക് 12 മുതൽ ദേശവഴികളിൽനിന്ന് കുംഭകുട ഘോഷയാത്ര, 3.30-ന് ക്ഷേത്രത്തിൽനിന്ന് വടക്കേ ആൽത്തറയിലേക്ക് എഴുന്നള്ളത്ത് നടക്കും. വൈകുന്നേരം 4.30 ന് കുംഭകുട അഭിഷേകം, രാത്രി 10 മുതൽ തൂക്കം. ഗരുഡൻ വഴിപാടുകൾ നടക്കും. തുടർന്ന് കളിത്തട്ടിൽ ഗരുഡൻ കേളി, കളിത്തട്ടിൽ പറവ നടക്കും. പുലർച്ചെ ചരിത്ര പ്രസിദ്ധമായ 11 ഗരുഡൻ നടക്കും.

തിരുനാൾ മാറ്റിവച്ചു

തലയോലപ്പറമ്പ്: ഫ്രാൻസിസ് മാർപാപ്പയുടെ ദേഹ വിയോഗത്തെത്തുടർന്ന് തലയോലപ്പറമ്പ് പള്ളിയിൽ 25 മുതൽ 27വരെ നടത്താൻ നിശ്ചയിച്ചിരുന്ന വിശുദ്ധ ഗീവർഗീസ് സഹദായുടെ തിരുനാൾ മേയ് ആദ്യ ആഴ്ചയിലേക്ക് മാറ്റിയതായി ഇടവക വികാരി റവ.ഡോ. ബെന്നി ജോൺ മാരാംപറമ്പിൽ അറിയിച്ചു. 27ന് രാവിലെ ഏഴിന് നടക്കുന്ന കുർബാനയ്ക്ക് ശേഷം ഇടവകയുടെ നേതൃത്വത്തിൽ മൗനജാഥയും തുടർന്ന് പാരിഷ് ഹാളിൽ തലയോലപ്പറമ്പ് പൗരാവലിയുടെ ആഭിമുഖ്യത്തിൽ അനുസ്മരണ സമ്മേളനവും നടക്കും. 27ന് രാവിലെ 8.30ന് പള്ളിയിൽ വിശുദ്ധ കുർബാന ഉണ്ടായിരിക്കില്ലെന്നും വികാരി റവ.ഡോ. ബെന്നി ജോൺ മാരാംപറമ്പിൽ അറിയിച്ചു.

മെഡിക്കൽ കോളജ് ബസ് സ്റ്റാൻഡ് നാളെ തുറന്നേക്കും

ഗാന്ധിനഗർ: നവീകരണത്തിനായി അടച്ച മെഡിക്കൽ കോളജ് ബസ് സ്റ്റാൻഡ് നാളെ തുറന്നേക്കും. സ്റ്റാൻഡ് ഫ്രാൻസിസ് ജോർജ് എംപി ഉദ്ഘാടനം ചെയ്യുമെന്ന് ആർപ്പൂക്കര പഞ്ചായത്ത് പ്രസിഡന്‍റ് ദീപ ജോസ് പറഞ്ഞു. നിലവിൽ ഒരു മാസക്കാലമായി നവീകരണത്തിനായി സ്റ്റാൻഡ് അടച്ചിരിക്കുകയാണ്. സ്റ്റാൻഡിന് പുറത്ത് താത്കാലിക സ്റ്റാൻഡ് ഏർപ്പെടുത്തിയാണ് ഇപ്പോൾ ബസിൽ യാത്രക്കാരെ കയറ്റുന്നത്. സ്റ്റാൻഡ് പൊട്ടിപ്പൊളിഞ്ഞ് ഗട്ടർ നിറഞ്ഞ സ്ഥിതിയായിരുന്നു. ഇതിന് പരിഹാരമായി സ്റ്റാൻഡ് കോൺക്രീറ്റ് ചെയ്യുന്ന ജോലിയാണ് നടത്തിയത്. ഇതിനായി ഏകദേശം 40 ലക്ഷം രൂപ ചെലവായെന്ന് പഞ്ചായത്ത് പ്രസിഡന്‍റ് പറഞ്ഞു. തുടർ പദ്ധതി എന്ന നിലയ്ക്ക് സ്റ്റാൻഡിൽ ഷോപ്പിംഗ് കോംപ്ലക്സ് ഏർപ്പെടുത്താൻ ആലോചനയുണ്ട്. ഇതിനു പുറമെ സ്റ്റാൻഡിൽ ബസ് കയറി വരുന്ന ഭാഗത്ത് ശൗചാലയം, വിശ്രമകേന്ദ്രം, റീഡിംഗ് റൂം എന്നിവയും പണിയുന്നതിന് ആലോചനയുണ്ട്. ഇതിനായി എംപി ഫണ്ടിൽനിന്നു തുക അനുവദിപ്പിക്കുന്നതിനുള്ള നീക്കങ്ങളാണ് നടക്കുന്നത്. നിലവിൽ സ്റ്റാൻഡ് കോൺക്രീറ്റ് ചെയ്തതോടെ സ്റ്റാൻഡിലെ ഗട്ടറും വെള്ളക്കെട്ടും മാറിയിട്ടുണ്ട്.

കൈപ്പുഴയിൽ കാർ മതിലിലിടിച്ച് മറിഞ്ഞു

കൈപ്പുഴ: കൈപ്പുഴ കുരിശുപള്ളി ജംഗ്ഷനിൽ കാർ മതിലിൽ ഇടിച്ചു മറിഞ്ഞു.വൻ അപകടം ഒഴിവായത് തല നാരിഴയ്ക്ക്. അതിരമ്പുഴ പനയത്തിക്കവല സ്വദേശികൾ സഞ്ചരിച്ചിരുന്ന സ്വിഫ്റ്റ് കാറാണ് അപകടത്തിൽപ്പെട്ടത്. ഇന്ന് രാവിലെ 7.30 ഓടെയാണ് സംഭവം. അപകടത്തിൽ ആർക്കും പരിക്കില്ല. പനയത്തിക്കവല സ്വദേശിനി ജോഫിൻ എന്ന യുവതിയെ സമീപവാസി ഡ്രൈവിംഗ് പരിശീലിപ്പിക്കുന്നതിനിടെയാണ് അപകടം. അതിരമ്പുഴ റോഡിലൂടെ വന്ന കാർ കൈപ്പുഴ കുരിശുപള്ളി ജംഗ്‌ഷനിൽവച്ച് കല്ലറ കൈതക്കനാൽ റോഡിലേക്ക് പ്രവേശിച്ചിക്കുന്നതിനിടെ നിയന്ത്രണംവിട്ട് തൊട്ടടുത്ത മതിലിലിടിച്ച് മറിയുകയായിരുന്നു. സംഭവത്തെത്തുടർന്ന് ഓടിക്കുടിയ നാട്ടുകാർ കാറിലുണ്ടായിരുന്ന രണ്ടു പേരെയും പുറത്തെടുത്തു. ആർക്കും പരിക്കു പറ്റിയില്ല. അതേസമയം രണ്ട് മിനിറ്റ് മുമ്പാണ് കുരിശുപള്ളി ജംഗ്ഷനിൽ ബസ് കാത്തുനിന്ന യാത്രക്കാർ ബസിൽ കയറി പോയത്. യാത്രക്കാർ ബസ് കയറി പോയതിന് പിന്നാലെയാണ് ഇവർ നിന്ന ഭാഗത്ത് കാർ മതിലിലിടിച്ച് മറിഞ്ഞത്. തലനാരിഴയ്ക്കാണ് വൻ അപകടം ഒഴിവായത്.

പാമ്പാടി എക്‌സൈസിന്‍റെ കഞ്ചാവ് വേട്ട; മൂന്നു യുവാക്കൾ പിടിയിൽ

കോട്ടയം: പാറമ്പുഴയിലും പരിസരപ്രദേശങ്ങളിലും കഞ്ചാവ് വിൽപ്പന നടത്തുന്നതിനെത്തിയ മൂന്നു യുവാക്കളെ എക്‌സൈസ് സംഘം പിടികൂടി. പാറമ്പുഴ ചുങ്കത്ത് മാലിയിൽ അഖിലേഷ് ജി. കുമാർ (27) വിജയപുരം പാറമ്പുഴ കൊല്ലറക്കുഴിയിൽ അരുൺ കെ. ബാലൻ (28) , തിരുവാർപ്പ് കുറയൻകേരിൽ വീട്ടിൽ കെ.പി. ശ്രീജിത്ത് (31) എന്നിവരെയാണ് പാമ്പാടി എക്‌സൈസ് റേഞ്ച് സംഘം പിടികൂടിയത്. വിജയപുരം പഞ്ചായത്തിന്‍റെ വിവിധ പ്രദേശങ്ങളിൽ വ്യാപകമായി കഞ്ചാവ് വിൽപ്പന നടക്കുന്നതായി പാമ്പാടി എക്‌സൈസ് സംഘത്തിനു വിവരം ലഭിച്ചിരുന്നു. ഇതേത്തുടർന്ന് പ്രദേശത്ത് എക്‌സൈസ് സംഘം വ്യാപകമായി പരിശോധന നടത്തിയിരുന്നു. ഇതേത്തുടർന്ന് പുത്തേട്ട് പടിയിൽ മഹാദേവക്ഷേത്രം ഭാഗത്തുനിന്ന് അഞ്ച് ഗ്രാം കഞ്ചാവുമായി അരുൺ കെ. ബാലനെ എക്‌സൈസ് സംഘം പിടികൂടി. ഇതിനു സമീപത്ത് തന്നെയുള്ള പെരിങ്ങള്ളൂർ എൽപി സ്‌കൂളിനു സമീപത്തുനിന്ന് 15 ഗ്രാം കഞ്ചാവുമായി അഖിലേഷിനെയും 10 ഗ്രാം കഞ്ചാവുമായി ശ്രീജിത്തിനെയും പിടികൂടുകയായിരുന്നു. അഖിലേഷിനും അരുണിനും പാമ്പാടി എക്‌സൈസ് റേഞ്ച് ഓഫീസിൽ മുൻപും കഞ്ചാവ് കേസുകളുണ്ട്. പരിശോധനയ്ക്ക് എക്‌സൈസ് ഇൻസ്‌പെക്ടർ പി.ജെ. ടോംസി അസി. എക്‌സൈസ് ഇൻസ്‌പെക്ടർ കെ.എൻ. അജിത്കുമാർ, പ്രിവന്‍റീവ് ഓഫീസർ സി.എ. അഭിലാഷ്, സിവിൽ എക്‌സൈസ് ഓഫീസർ ഷെബിൻ ടി. മാർക്കോസ്, വനിതാ സിവിൽ എക്‌സൈസ് ഓഫീസർ ആശാലത എന്നിവർ നേതൃത്വം നൽകി.

കാഞ്ഞിരപ്പള്ളിയെ വ്യവസായ സംരംഭകരുടെ ഹബ്ബാക്കി മാറ്റണം: ആന്‍റോ ആന്‍റണി എംപി

കാഞ്ഞിരപ്പള്ളി: കേരളത്തില്‍ ആദ്യമായി സ്വകാര്യ മേഖലയില്‍ അനുവദിക്കപ്പെട്ട വ്യവസായപാര്‍ക്കിന്‍റെ നേത്യത്വത്തില്‍ പുതിയതും പഴയതുമായ സംരംഭകരുടെ ഒരു കൂട്ടായ്മ രൂപപ്പെടണമെന്നും അതിലൂടെ റബറിന്‍റെ നാടായ കാഞ്ഞിരപ്പള്ളിയെ വ്യവസായകരുടെ ഒരു ഹബ്ബാക്കി മാറ്റണമെന്നും ആന്‍റോ ആന്‍റണി എംപി. വ്യവസായ വകുപ്പിന്‍റെ ആഭിമുഖ്യത്തില്‍ ഭക്ഷ്യസംസ്കരണ മേഖലയിലെ വ്യവസായികളുടെ ക്ലസ്റ്റര്‍ രൂപീകരണ പരിപാടി ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. ചീഫ് വിപ്പ് ഡോ. എന്‍. ജയരാജ് അധ്യക്ഷത വഹിച്ചു. കാഞ്ഞിരപ്പള്ളി പഞ്ചായത്ത് പ്രസിഡന്‍റ് കെ.ആര്‍. തങ്കപ്പന്‍, ബ്ലോക്ക് പഞ്ചായത്ത് വൈസ് പ്രസിഡന്‍റ് ജോളി മടുക്കക്കുഴി, എംഎസ്എംബി ഡയറക്ടര്‍ ജി.എസ്. പ്രകാശ്, ബ്ലോക്ക് പഞ്ചായത്തംഗം ഷക്കീല നസീര്‍, പഞ്ചായത്തംഗങ്ങളായ നിസ സലീം, ആന്‍റണി മാര്‍ട്ടിന്‍, സുമേഷ് ആന്‍ഡ്രൂസ്, റിജോ വാളന്തറ, ബിജു ചക്കാല, ഉപജില്ലാ വ്യവസായ ഓഫീസര്‍ ഷിനോ ജേക്കബ്, ബ്ലോക്ക് വ്യവസായ ഓഫീസര്‍ കെ.കെ. ഫൈസല്‍, അജികുമാര്‍, ശ്രീനാഥ് പുന്നാംപറമ്പില്‍ തുടങ്ങിയവർ പ്രസംഗിച്ചു. തുടര്‍ന്നു നടന്ന ക്ലസ്റ്റര്‍ രൂപീകരണത്തില്‍ 108 സംരംഭകര്‍ പങ്കെടുത്തു. വിവിധ വിഷയങ്ങളില്‍ ഏകദിന ശില്പശാലയും നടത്തി. പുതിയതും പഴയതുമായ സംരംഭകരുടെ സംശയങ്ങള്‍ക്ക് വ്യവസായവകുപ്പ് അധികൃതര്‍ മറുപടിയും നല്‍കി.

ഫ്രാന്‍സിസ് മാര്‍പാപ്പ ചേർത്തുപിടിച്ച മങ്കന്താനം കുടുംബത്തിലെ കുട്ടികൾ

ജോജി പേഴത്തുവയലിൽ കാഞ്ഞിരപ്പള്ളി: ഫ്രാന്‍സിസ് മാര്‍പാപ്പയിൽനിന്നു നേരിട്ട് അനുഗ്രഹം ലഭിച്ച പുണ്യസ്മരണയിൽ മങ്കന്താനം കുടുംബത്തിലെ മൂന്നു കുട്ടികൾ. മണിപ്പുഴ മങ്കന്താനം അഡ്വ. ബിനോയി-ഷൈനി ദന്പതികളുടെ മക്കളായ ലിയ തെരേസ ബിനോയി, ലെന അന്ന ബിനോയി, ലിയോണ മരിയ ബിനോയി എന്നിവരെയാണ് 2013ൽ ഫ്രാന്‍സിസ് മാര്‍പാപ്പ ചേർത്തുപിടിച്ച് അനുഗ്രഹിച്ചത്. അന്നു ലിയയ്ക്ക് ഏഴും ലെനയ്ക്ക് അഞ്ചും ലിയോണയ്ക്ക് ഒരു വയസിനു താഴെയുമായിരുന്നു പ്രായം. അയർലൻഡിലെ പ്രവാസ ജീവിതം അവസാനിപ്പിക്കുന്നതിനു മുന്പ് യൂറോപ്പ് യാത്ര നടത്തുന്നതിന്‍റെ ഭാഗമായി 2013 നവംബർ 27നാണ് റോമിലെ സെന്‍റ് പീറ്റേഴ്സിലെത്തിയത്. എല്ലാ ബുധനാഴ്ചയും പൊതുജനങ്ങളെ കാണാനായി ഫ്രാന്‍സിസ് മാര്‍പാപ്പ സെന്‍റ് പീറ്റേഴ്സ് ബസേലിക്കയിലെത്തുന്നത് അറിഞ്ഞാണ് ഇവരും അവിടെ വന്നത്. സന്ദർശകരെ കാണുന്നതിനിടെയാണ് ഫ്രാന്‍സിസ് മാര്‍പാപ്പ ലെനയെയും ലിയോണയെയും ചേർത്തുപിടിച്ച് അനുഗ്രഹിച്ചത്. എന്നാൽ, ലിയയ്ക്ക് ഇതിനുള്ള ഭാഗ്യം ലഭിച്ചില്ല. പിന്നീട് പാപ്പാമൊബീലിൽ സഞ്ചരിച്ച് സന്ദർശകരെ ആശീർവദിച്ച് തിരികെയെത്തിയപ്പോഴാണ് ലിയയ്ക്കും പാപ്പയുടെ അനുഗ്രഹം ലഭിച്ചത്. ഫ്രാന്‍സിസ് മാര്‍പാപ്പ ദിവംഗതനായി എന്ന വാർത്ത കണ്ടപ്പോൾ തങ്ങളെ ചേർത്തുപിടിച്ച് അനുഗ്രഹിച്ചതിന്‍റെ ഹൃദയ ഹാരിയായ ഓർമകളാണ് ഇവരിലേക്ക് എത്തിയത്. ഇപ്പോൾ ലിയ പ്ലസ് ടുവും ലെന പത്തും പഠനം പൂർത്തിയാക്കി. ലിയോണ ഏഴാം ക്ലാസിൽ പഠിക്കുന്നു. ഫ്രാന്‍സിസ് മാര്‍പാപ്പയുടെ അനുഗ്രഹം ഇന്നും തങ്ങളുടെ ജീവിതത്തിലുടനീളം ഉണ്ടെന്ന് ഇവർ പറയുന്നു.

അവാർഡ് തിളക്കത്തിൽ ആലീസ് ടീച്ചർ

കാഞ്ഞിരപ്പള്ളി: അധ്യാപക ജീവിതത്തിൽനിന്ന് അഭിനയത്തിന്‍റെ അഭ്രപാളികളിലേക്കു കടന്നുവന്ന ആലീസ് ടീച്ചർ അവാർഡിന്‍റെ തിളക്കത്തിൽ. പാത്തുമ്മയുടെ ആട് എന്ന ഷോർട്ട് ഫിലിമിലെ അഭിനയത്തിനാണ് നടൻ മാമുക്കോയയുടെ പേരിലുള്ള നാഷണൽ അവാർഡ് പൊൻകുന്നം പത്തൊന്പതാംമൈൽ കൂനമ്പാലയിൽ ആലീസ് ടീച്ചറിനെ തേടിയെത്തിയിരിക്കുന്നത്. ഷാൻ ചാർളിയുടെ സംവിധാനത്തിൽ ഒരുങ്ങിയ പാത്തുമ്മയുടെ ആട് എന്ന ഷോർട്ട് ഫിലിമിൽ പ്രധാന കഥാപാത്രമായ പാത്തുമ്മയെ അവതരിപ്പിച്ചതിനാണ് ആലീസ് ടീച്ചറിന് സ്പെഷൽ ജൂറി അവാർഡ് ലഭിച്ചത്. കോഴിക്കോട് നടന്ന മാമുക്കോയ മെമ്മോറിയൽ നാഷണൽ ഡോക്കുമെന്‍ററി ആൻഡ് ഷോർട്ട് ഫിലിം ഫെസ്റ്റിവലിൽ 920 ഷോർട്ട് ഫിലിമുകളാണ് പ്രദർശിപ്പിക്കപ്പെട്ടത്. 31 വർഷത്തെ സേവനത്തിനുശേഷം കാഞ്ഞിരപ്പള്ളി സെന്‍റ് മേരീസ് സ്കൂളിൽ നിന്നാണ് ആലീസ് ടീച്ചർ വിരമിച്ചത്. ഭർത്താവ്: തോമസ് മാത്യു, മകൻ: കെവിൻ തോമസ്.

കെഎസ്ആർടിസി ഡ്രൈവറെ ആദരിച്ചു

എരുമേലി: കണമല അപകടത്തിൽ രക്ഷാപ്രവർത്തനം നടത്തിയ കെഎസ്ആർടിസി ഡ്രൈവർ ഫൈസലിനെ അഖിലേന്ത്യ ജനാധിപത്യ മഹിളാ അസോസിയേഷൻ തുമരംപാറ യൂണിറ്റ് കമ്മിറ്റിയുടെ നേതൃത്വത്തിൽ ആദരിച്ചു. കഴിഞ്ഞ ദിവസം കണമലയിൽ നടന്ന വാഹനാപകടത്തിൽ പരിക്കേറ്റ അയ്യപ്പ ഭക്തരെ രക്ഷിച്ച് ആശുപത്രിയിൽ എത്തിച്ചത് അതുവഴി പമ്പയിലേക്ക് ബസ് സർവീസുമായി എത്തിയ ഡ്രൈവർ ഫൈസലും കണ്ടക്ടർ ജോഷിയും ചേർന്നായിരുന്നു. മഹിളാ അസോസിയേഷൻ സംസ്ഥാന വൈസ് പ്രസിഡന്‍റ് തങ്കമ്മ ജോർജുകുട്ടി ആദരവ് കൈമാറി. യൂണിറ്റ് സെക്രട്ടറി ജെസീനാ റാഫി, പ്രസിഡന്‍റ് ശാന്തമണി രാജപ്പൻ, ട്രഷറർ രമ്യാ പ്രദീപ്, സിപിഎം മുക്കൂട്ടുതറ ലോക്കൽ കമ്മിറ്റിയംഗം മുഹമ്മദ് റാഫി, തുമരംപാറ ബ്രാഞ്ച് സെക്രട്ടറി ശശി നന്ദിയാട്ട് തുടങ്ങിയവർ പ്രസംഗിച്ചു.

കൊഴുവനാലിലെ ജംഗ്ഷനുകള്‍ ഇനി പ്രകാശപൂരിതം

കൊഴുവനാല്‍: ജില്ലാ പഞ്ചായത്തിന്‍റെ പദ്ധതിയില്‍ ഉള്‍പ്പെടുത്തി ജില്ലാ പഞ്ചായത്ത് മെംബര്‍ ജോസ്മോന്‍ മുണ്ടയ്ക്കല്‍ അനുവദിച്ച ഫണ്ട് ഉപയോഗിച്ച് കൊഴുവനാല്‍ പഞ്ചായത്ത് മുഖേന നിര്‍വഹണം നടത്തിയ 40 മിനി മാസ്റ്റ് ലൈറ്റുകളിലൂടെ കൊഴുവനാല്‍ പഞ്ചായത്തിലെ മുഴുവന്‍ ജംഗ്ഷനുകളും പ്രകാശപൂരിതമായി. മൂന്നു വര്‍ഷത്തെ ഗാരണ്ടിയോടുകൂടിയ 150 വാട്ടിന്‍റെ മൂന്ന് എല്‍ഇഡി ലൈറ്റുകള്‍ അടങ്ങിയ 40 മിനി മാസ്റ്റ് ലൈറ്റുകള്‍ പൊതുമേഖലാ സ്ഥാപനമായ കെല്‍ട്രോണ്‍ മുഖേനയാണ് സ്ഥാപിച്ചത്. മിനി മാസ്റ്റ് ലൈറ്റുകളുടെ പഞ്ചായത്തുതല ഉദ്ഘാടനം കൊഴുവനാലില്‍ ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍ നിര്‍വഹിച്ചു. കൊഴുവനാല്‍ പ്രദേശത്ത് സ്ഥാപിച്ച 40 ഹൈമാസ്റ്റ് ലൈറ്റുകളുടെ സ്വിച്ച്ഓണ്‍ കര്‍മം വിവിധ കേന്ദ്രങ്ങളില്‍ ജില്ലാ പഞ്ചായത്ത് മെംബര്‍ ജോസ്മോന്‍ മുണ്ടയ്ക്കല്‍, പഞ്ചായത്ത് പ്രസിഡന്‍റ് ലീലാമ്മ ബിജു, ജില്ലാ ലൈബ്രറി കൗണ്‍സില്‍ പ്രസിഡന്‍റ് ബാബു കെ. ജോര്‍ജ്, മെഡിസിറ്റി എക്സിക്യൂട്ടീവ് ഡയറക്ടര്‍ മോൺ. ജോസഫ് കണിയോടിക്കല്‍ തുടങ്ങിയവര്‍ നിര്‍വഹിച്ചു.

മീനച്ചില്‍ ഫൈന്‍ ആര്‍ട്‌സ് സൊസൈറ്റി മുപ്പതാം വര്‍ഷത്തിലേക്ക്

പാലാ: പാലായുടെ മണ്ണില്‍ സവിശേഷ ശോഭയോടെ തലയുയര്‍ത്തി നില്‍ക്കുന്ന കലാ-സാംസ്‌കാരിക കൂട്ടായ്മയായ മീനച്ചില്‍ ഫൈന്‍ ആര്‍ട്‌സ് സൊസൈറ്റി മുപ്പതാം വര്‍ഷത്തിലേക്ക്. 1993 മാര്‍ച്ച് മൂന്നിന് നാടകാചാര്യന്‍ എന്‍.എന്‍. പിള്ള ഉദ്ഘാടനം ചെയ്ത മീനച്ചില്‍ ഫാസ് കലയുടെ വഴിയില്‍ അനുസ്യൂതം യാത്ര തുടരുകയാണ്. നിരവധി കലാകാരന്മാര്‍ക്ക് വേദികള്‍ ഒരുക്കുകയും പുതു തലമുറയ്ക്ക് സാംസ്‌കാരികമായ അവബോധം നല്‍കുകയും ചെയ്യുന്ന ഫൈന്‍ ആര്‍ട്‌സ് സൊസൈറ്റി വിവിധങ്ങളായ കര്‍മപരിപാടികള്‍ക്ക് ഈ കലാവര്‍ഷവും തുടക്കം കുറിക്കും. 24ന് രാത്രി ആറിന് പാലാ മുനിസിപ്പല്‍ ടൗണ്‍ ഹാളില്‍ സെബാസ്റ്റ്യന്‍ കുളത്തുങ്കല്‍ എംഎല്‍എ ഉദ്ഘാടനം ചെയ്യും. നഗരസഭാ ചെയര്‍മാന്‍ തോമസ് പീറ്റര്‍ മുഖ്യാതിഥിയായിരിക്കും. ഫൈന്‍ ആര്‍ട്‌സ് സൊസൈറ്റി പ്രസിഡന്‍റ് രാജേഷ് പല്ലാട്ട് അധ്യക്ഷത വഹിക്കും. സമ്മേളനത്തിനുശേഷം ഈ വര്‍ഷത്തെ ആദ്യത്തെ പരിപാടി അമ്പലപ്പുഴ അക്ഷരജ്വാല അവതരിപ്പിക്കുന്ന നാടകം "അനന്തരം' അരങ്ങേറും. പ്രസിഡന്‍റ് അഡ്വ. രാജേഷ് പല്ലാട്ട്, സെക്രട്ടറി ബെന്നി മൈലാടൂര്‍, ബൈജു കൊല്ലംപറമ്പില്‍, വി.എം. അബ്ദുള്ള ഖാന്‍, ഷിബു തെക്കേമറ്റം, ഉണ്ണി കുളപ്പുറം എന്നിവര്‍ പത്രസമ്മേളനത്തില്‍ പങ്കെടുത്തു.

അൽഫോൻസ കോളജിൽ സമ്മര്‍ ക്യാമ്പ്

പാലാ: അല്‍ഫോന്‍സ കോളജില്‍ പെണ്‍കുട്ടികള്‍ക്കായി സമ്മര്‍ ക്യാമ്പ് ആരംഭിച്ചു. അല്‍ഫോന്‍സ കോളജിന്‍റെയും ലയണ്‍സ് 318 യൂത്ത് എംപവര്‍മെന്‍റ് പ്രോഗ്രാമിന്‍റെ ഭാഗമായ ജൂവല്‍സ് ഓഫ് പത്തനംതിട്ടയുടെയും സംയുക്താഭിമുഖ്യത്തിലാണ് ക്യാമ്പ് സംഘടിപ്പിക്കുന്നത്. മേയ് മൂന്ന് വരെ രാവിലെ 9.30 മുതല്‍ ഉച്ചകഴിഞ്ഞ് 3.30 വരെ നടക്കുന്ന ക്യാമ്പില്‍ എട്ടുമുതല്‍ 12 വരെ ക്ലാസുകളില്‍ പഠിക്കുന്ന വിദ്യാര്‍ഥിനികള്‍ക്കാണ് പ്രവേശനം. ക്യാന്പിന്‍റെ ഉദ്ഘാടനം ജോസ് കെ. മാണി എംുപി നിർവഹിച്ചു. കോളജ് പ്രിന്‍സിപ്പല്‍, ലയണ്‍സ് ക്ലബ് പ്രതിനിധികള്‍, അധ്യാപകര്‍, രക്ഷാകര്‍ത്താക്കള്‍ എന്നിവര്‍ പങ്കെടുത്തു. ചെസ്, യോഗ, എയ്റോബിക്‌സ്, ഡ്രോയിംഗ്, കൈത്തയ്യല്‍, ബേക്കിംഗ്, പ്രസംഗ പരിശീലനം, നേതൃത്വ പരിശീലനം, കൗണ്‍സലിംഗ്, ബാസ്‌കറ്റ്‌ബോള്‍, വോളിബോള്‍, അത്‌ലറ്റിക്‌സ്, കരാട്ടെ, ഫോട്ടോഗ്രഫി, കൺടെന്‍റ് ക്രിയേഷന്‍ എന്നിവയിലും വിദ്യാര്‍ഥിനികള്‍ക്ക് പരിശീലനം ലഭിക്കും. ഓരോ കുട്ടിക്കും താത്പര്യമുള്ള വിഷയങ്ങള്‍ തെരഞ്ഞെടുക്കാനുള്ള സൗകര്യവും ഒരുക്കിയിട്ടുണ്ട്.

ജൽ ജീവൻ പദ്ധതി പൈപ്പിടീൽ: അടിവാരം-കൊടുങ്ങ-ഇളങ്കാട് റോഡ് തകർന്നു

പൂഞ്ഞാർ: ജൽ ജീവൻ പദ്ധതിയുടെ പൈപ്പിടാനായി പൊട്ടിച്ച കല്ലുകൾ യാത്രക്കാർക്ക് ഭീഷണിയാകുന്നു. പൂഞ്ഞാർ തെക്കേക്കര പഞ്ചായത്തിലെ അടിവാരം-കൊടുങ്ങ-ഇളങ്കാട് റോഡരികിലാണ് പൊട്ടിച്ച കല്ലുകൾ കൂട്ടിയിട്ടിരിക്കുന്നത്. അടിവാരം ടൗൺ മുതൽ വെട്ടുകല്ലുകുഴി വെള്ളച്ചാട്ടം വരെയുള്ള 200 മീറ്റർ ഭാഗത്താണ് കല്ല് കൂട്ടിയിട്ടിരിക്കുന്നത്. കല്ലുകൾ കിടക്കുന്നതിന്‍റെ മറുവശത്ത് വീടുകളുടെയും പുരയിടങ്ങളുടെയും കൽക്കെട്ടുകൾ ഉള്ളതിനാൽ വലിയ വാഹനങ്ങൾ കടന്നുപോകാൻ ബുദ്ധിമുട്ടുകയാണ്. ഇതുമൂലം അടിവാരം ടോപ്പ് വരെയുണ്ടായിരുന്ന ഏക ബസ് സർവീസ് നിർത്തി. ഇതോടെ യാത്രക്കാർ ഓട്ടോറിക്ഷകളെ ആശ്രയിക്കേണ്ട സ്ഥിതിയാണ്. കല്ല് പൊട്ടിച്ചുകൂട്ടിയിട്ട് അഞ്ചു മാസത്തോളമായി. നാട്ടുകാർ അധികൃതരോട് പരാതി പറഞ്ഞിട്ടും നടപടിയൊന്നുമായില്ല.

കുറവിലങ്ങാട് മുത്തിയമ്മയെ ഏറ്റുവാങ്ങിയ ഫ്രാൻസിസ് പാപ്പാ

കുറവിലങ്ങാട്: കുറവിലങ്ങാടിന്‍റെ ഹൃദയം ഫ്രാൻസിസ് പാപ്പായെക്കുറിച്ചുള്ള ഓർമകളാൽ സമൃദ്ധം. കുറവിലങ്ങാട് പള്ളിയിൽ അസി. വികാരിയായി സേവനം ചെയ്ത് ഉപരിപഠനത്തിനായി റോമിലേക്കു പോയ റവ.ഡോ. ഇമ്മാനുവൽ പാറേക്കാട്ടാണ് കുറവിലങ്ങാട് മുത്തിയമ്മയുടെ തിരുസ്വരൂപം ഫ്രാൻസിസ് പാപ്പായ്ക്കു സമ്മാനിച്ചത്. പാലാ രൂപതയുടെ ഇപ്പോഴത്തെ മുഖ്യ വികാരി ജനറാൾ മോൺ. ജോസഫ് തടത്തിൽ കുറവിലങ്ങാട് ആർച്ച്പ്രീസ്റ്റായിരിക്കേയാണ് കുമ്പിൾ തടിയിൽ തീർത്ത മുത്തിയമ്മയുടെ തിരുസ്വരൂപം മാർപാപ്പയ്ക്കായി ക്രമീകരിച്ചത്. കുറവിലങ്ങാട്ട് ആദ്യ നൂറ്റാണ്ടിൽ തുടങ്ങുന്ന ക്രൈസ്തവ പാരമ്പര്യവും ലോകചരിത്രത്തിലെ ആദ്യ മരിയൻ പ്രത്യക്ഷീകരണഭൂമിയെന്നതും രേഖപ്പെടുത്തിയാണ് തിരുസ്വരൂപം ഒരുക്കി നൽകിയത്.

നഗരം ഞെട്ടിത്തരിച്ചു ; പ്രതിയുടേത് ആസൂത്രിതനീക്കം

കോട്ടയം: കോട്ടയത്ത് ദമ്പതികള്‍ വീടിനുള്ളില്‍ കൊല്ലപ്പെട്ട വാര്‍ത്തയറിഞ്ഞ് നഗരവാസികള്‍ ഞെട്ടിത്തരിച്ചു. കൂറ്റന്‍ മതിലും സിസിടിവി കാമറകളും സെക്യൂരിറ്റി ജീവനക്കാരനുമുള്ള വീട്ടിലാണ് വീട്ടുടമയെയും ഭാര്യയെയും അതിക്രൂരമായി വെട്ടിക്കൊലപ്പെടുത്തിയത്. ഇവരുടെ വലിയ വീടിന്‍റെ ഒരു വശത്ത് രാവും പകലും വാഹനങ്ങള്‍ കടന്നു പോകുന്ന പ്രധാന വഴിയാണ്. മറ്റൊരു വശത്ത് ക്ഷേത്രത്തിലേക്കും നിരവധി വീടുകളിലേക്കും എപ്പോഴും ആളുകള്‍ സഞ്ചരിക്കുന്ന വഴിയുമാണ്. പിന്‍വശത്തു മാത്രമാണ് വീടുകളുള്ളത്. രണ്ടു വശത്തെ റോഡില്‍നിന്നു നോക്കിയാലും വീടിന്‍റെ മതില്‍ക്കെട്ടിനുള്ളിലെ കാഴ്ചകള്‍ കാണാന്‍ സാധിക്കില്ല. എപ്പോഴും തിരക്കുള്ള റോഡില്‍നിന്നും മറ്റൊരു വശത്തെ ഇടറോഡില്‍നിന്നും വീടിന്‍റെ മതില്‍ക്കെട്ടിനുള്ളിലേക്കു കടന്നുകയറാന്‍ അസാമാന്യ മെയ്‌വഴക്കം ആവശ്യമാണ്. അക്രമി പിന്‍വശത്തെ മതില്‍ ചാടിക്കടന്നുവെന്നാണ് നിഗമനം. സുരക്ഷാ ജീവനക്കാരന്‍ ഉണ്ടായിരുന്നെങ്കിലും പ്രായാധിക്യവും കേള്‍വിക്കുറവുമുള്ള ഇയാള്‍ വിവരമറിഞ്ഞത് നാട്ടുകാര്‍ക്കൊപ്പം മാത്രമാണെന്നും പോലീസ് പറയുന്നു. കോട്ടയം നഗരത്തില്‍ തിരുനക്കരയ്ക്കുസമീപം ഇന്ദ്രപ്രസ്ഥം ഓഡിറ്റോറിയത്തിന്‍റെയും വിവിധ ബിസിനസ് സ്ഥാപനങ്ങളുടെയും ഉടമയാണ് മരിച്ച വിജയകുമാര്‍. വീട്ടില്‍ വിജയകുമാറും ഭാര്യയും മാത്രമായിരുന്നു താമസം. ഇവരുടെ മകനെ ഏതാനും വര്‍ഷങ്ങള്‍ക്ക് മുന്‍പ് റെയില്‍വേ ട്രാക്കില്‍ മരിച്ച നിലയില്‍ കണ്ടെത്തിയിരുന്നു. പ്രതിയെ ഉടന്‍ പിടികൂടുമെന്ന് പോലീസ് ചീഫ് കോട്ടയം: ഇരട്ടക്കൊലപാതകത്തിലെ പ്രതിയെ ഉടന്‍ പിടികൂടാന്‍ സാധിക്കുമെന്ന് ജില്ലാ പോലീസ് ചീഫ് ഷാഹുല്‍ ഹമീദ്. പ്രതിയെക്കുറിച്ച് വ്യക്തമായ സൂചന ലഭിച്ചിട്ടുണ്ട്. ശാസ്ത്രീയ പരിശോധനകള്‍ നടന്നുവരികയാണ്. പ്രതി പ്രധാന വാതില്‍ തുറന്നാണ് അകത്തു കയറിയതെന്നാണ് സംശയിക്കുന്നത്. സ്‌ക്രൂഡ്രൈവര്‍ ഉപയോഗിച്ച് ജനാല തുറന്ന ശേഷമാണ് വാതില്‍ തുറന്നത്. തുടര്‍ന്ന് കോടാലി ഉപയോഗിച്ച് കൊലപാതകം നടത്തി. രാവിലെ വീട്ടിലെത്തിയ ജോലിക്കാരിയില്‍നിന്നും വിവരങ്ങള്‍ ശേഖരിച്ചിട്ടുണ്ട്. വീട്ടിലെ സിസിടിവി ഡിവിആര്‍ കാണാനില്ലെന്നും കൊലപാതകത്തില്‍ പ്രഫഷണല്‍ ശൈലി കാണുന്നില്ലെന്നും പോലീസ് ചീഫ് പറഞ്ഞു. സിസി ടിവി പരിശോധിക്കുന്നു കോട്ടയം: പ്രതിയെ വലയിലാക്കാന്‍ കിണഞ്ഞു പരിശ്രമിക്കുകയാണ് പോലീസ്. മുമ്പ് ഇതേ വീട്ടില്‍ ജോലി ചെയ്തിരുന്ന ആസാം സ്വദേശി അമിതിനെ കേന്ദ്രീകരിച്ചാണ് പ്രധാന തെരച്ചില്‍. കൊലപാതകത്തിനുശേഷം ഇയാള്‍ നാടുവിടാനുള്ള സാധ്യത പോലീസ് തള്ളിക്കളയുന്നില്ല. വീടിനുള്ളില്‍നിന്നും കോട്ടയം റെയില്‍വേ സ്‌റ്റേഷനിലെ പ്ലാറ്റ് ഫോം ടിക്കറ്റ് ലഭിച്ചതായി സൂചനയുണ്ട്. രാത്രി എട്ടിനുശേഷം പ്രതി റെയില്‍വേ സ്റ്റേഷനില്‍ ചെലവഴിച്ചശേഷം അര്‍ധരാത്രിയോടെ തിരുവാതുക്കലിലെത്തി വീടിന്‍റെ മതില്‍ ചാടിക്കടന്നു കൊലപാതകം നടത്തിയെന്നാണ് നിഗമനം. വീടിനുള്ളിലെ സിസിടിവി ദൃശ്യങ്ങള്‍ ലഭിക്കാതിരിക്കാന്‍ ഡിവിആര്‍ മോഷ്ടിച്ചെങ്കിലും തൊട്ടടുത്ത വീടുകളിലെയും വഴിയോരത്തെയും സിസിടിവി ദൃശ്യങ്ങള്‍ പോലീസ് ശേഖരിച്ചു വരികയാണ്. റെയില്‍വേ സറ്റേഷനില്‍ നിന്നും പ്രതി വളരെ പെട്ടെന്ന് തിരുവാതുക്കലിലെത്താന്‍ സാധിക്കുന്ന വഴികളിലെ സിസിടിവി ദൃശ്യങ്ങളും പരിശോധിക്കുന്നു. കൊലപാതകത്തിനുശേഷം പ്രതി നഗരത്തില്‍ എത്തിയാണ് രക്ഷപ്പെട്ടതെന്നും കണക്കുകൂട്ടുന്നു. സമീപത്തുള്ള സിസിടിവികളുടെ രാവിലെ വരെയുള്ള ദൃശ്യങ്ങളും പരിശോധിച്ചു വരികയാണ്. ജില്ലയെ നടുക്കിയ ഇരട്ടക്കൊലകള്‍ പലത് കോട്ടയം: കോട്ടയത്തെ നടുക്കി വീണ്ടും ഇരട്ടക്കൊലപാതകം. താഴത്തങ്ങാടി, പഴയിടം, പാറമ്പുഴ, തിരുവഞ്ചൂര്‍, നാഗമ്പടം ഇരട്ടക്കൊലപാതകങ്ങളും ഒരു വീട്ടില്‍ മൂന്നു പേരെ കൊലപ്പെടുത്തിയതും ഉള്‍പ്പെടെ ജില്ലയെ ഭീതിയിലാഴ്ത്തിയ കൊലപാതകങ്ങള്‍ ഒട്ടേറെ ഉണ്ടായിട്ടുണ്ട്. 2003-ൽ ആണ് നാഗമ്പടത്ത് ഒഡീഷ ദമ്പതികളെ ക്രൂരമായി കൊലപ്പെടുത്തിയത്. ഒഡീഷ സ്വദേശികളും നാഗമ്പടം കൈനറ്റിക് റബേഴ്സ് ഉടമകളുമായ ശ്രീധര്‍, ഭാര്യ സ്വരജലക്ഷ്മി എന്നിവരാണു കൊലപ്പെട്ടത്. നാട്ടിലേക്കു പോകാന്‍ അവധി നല്‍കാത്തതിലുള്ള പ്രതികാരത്തില്‍ ആസാം സ്വദേശികളായ തൊഴിലാളികളാണ് ക്രൂരമായി കൊലപ്പെടുത്തിയത്. പാറമ്പുഴയില്‍ ദമ്പതികളെയും മകനെയും ഉത്തര്‍പ്രദേശ് സ്വദേശിയായ അതിഥി തൊഴിലാളി കൊലപ്പെടുത്തിയത് 2015 മേയ് 16നാണ്. മോസ്‌കോ മൂലേപ്പറമ്പില്‍ ലാലസൻ, ഭാര്യ പ്രസന്നകുമാരി, പ്രവീണ്‍ എന്നിവരാണു കൊല്ലപ്പെട്ടത്. ലാലസന്‍റെ അലക്കുകമ്പനിയിലെ ജീവനക്കാരനായ നരേന്ദര്‍കുമാറായിരുന്നു പ്രതി. ഈ കേസില്‍ നരേന്ദറിനെ വധശിക്ഷയ്ക്കു വിധിച്ചിരുന്നു. മണിമലയ്ക്കു സമീപം പഴയിടത്ത് റിട്ട. സര്‍ക്കാര്‍ ഉദ്യോഗസ്ഥരായ വയോധിക ദമ്പതികളെ ബന്ധു കൊലപ്പെടുത്തിയത് 2013 ഓഗസ്റ്റിലായിരുന്നു. ഈ കേസിലും പ്രതി അരുണ്‍കുമാറിനെ വധശിക്ഷയ്ക്കു വിധിച്ചിരുന്നു. താഴത്തങ്ങാടി പാറപ്പാടം ഷാനി മന്‍സിലില്‍ എം.എ. അബ്ദുള്‍ സാലി, ഭാര്യ ഷീബ എന്നിവര്‍ കൊല്ലപ്പെട്ടത് 2020 ജൂണ്‍ ഒന്നിനാണ്. താഴത്തങ്ങാടി സ്വദേശി മുഹമ്മദ് ബിലാലായിരുന്നു പ്രതി. മോഷണമായിരുന്നു കൊലപാതകത്തിനു പിന്നിലെ കാരണം. വൈക്കത്ത് ഭാര്യയെയും ഭാര്യാമാതാവിനെയും യുവാവ് വെട്ടിക്കൊലപ്പെടുത്തിയത് 2024 നവംബറില്‍. മറവന്‍തുരുത്ത് സ്വദേശി ശിവപ്രിയ, മകള്‍ ഗീത എന്നിവരാണു കൊല്ലപ്പെട്ടത്. പ്രതിയായ മരുമകന്‍ നിധീഷ് പിന്നീട് പോലീസില്‍ കീഴടങ്ങി. കേസില്‍ വിചാരണ നടന്നുവരികയാണ്. തിരുവഞ്ചൂരില്‍ മോഷണത്തിനായി വയോധിക ദമ്പതികളെ കൊലപ്പെടുത്തിയത് രണ്ടു പതിറ്റാണ്ടു മുമ്പാണ്. തിരുവഞ്ചൂര്‍ ഇടശേരില്‍ പാപ്പച്ചന്‍, ഭാര്യ ഏലിയാമ്മ എന്നിവരെ 2004ല്‍ കൊലപ്പെടുത്തിയ സംഭവത്തില്‍ വീട്ടിലെ തെങ്ങുകയറ്റക്കാരനിലേക്ക് കേസ് നീങ്ങിയെങ്കിലും ഇയാളെ സമീപത്തെ റബര്‍തോട്ടത്തില്‍ മരിച്ച നിലയില്‍ കണ്ടെത്തുകയായിരുന്നു. കാരിത്താസ് ജംഗ്ഷനിൽ പോലീസുകാരനെ ചവിട്ടിക്കൊലപ്പെടുത്തിയതും ഗുണ്ടാനേതാവ് യുവാവിനെ കൊന്ന് പോലീസ് സ്റ്റേഷനു മുന്നില്‍ കൊണ്ടുവന്നിട്ടതുമൊക്കെ സമീപകാലത്തു ജില്ലയിലുണ്ടായ കൊലപാതകങ്ങളാണ്. അന്വേഷണം ആസാം സ്വദേശി അമിത്തിലേക്ക് കോട്ടയം: കോട്ടയം ഇന്ദ്രപ്രസ്ഥം ഓഡിറ്റോറിയം ഉടമ വിജയകുമാറിന്‍റെയും ഭാര്യയുടെയും കൊലപാതകത്തില്‍ അന്വേഷണം ആസാം സ്വദേശി അമിത്തിലേക്ക്. നേരത്തെ ഇതേവീട്ടില്‍ ജോലി ചെയ്തിരുന്ന അമിത് വീട്ടില്‍നിന്നും ഇവരുടെ ഐഫോണ്‍ മോഷ്ടിച്ചിരുന്നു. ഈ ഫോണ്‍ ഉപയോഗിച്ച് ഇയാള്‍ ബാങ്ക് അക്കൗണ്ടില്‍നിന്നും പണം പിന്‍വലിക്കുകയും ചെയ്തിരുന്നു. ഇത് സംബന്ധിച്ചു വിജയകുമാറും ഭാര്യയും പോലീസില്‍ നല്‍കിയ പരാതിയുടെ അടിസ്ഥാനത്തില്‍ അമിത്തിനെ അറസ്റ്റു ചെയ്ത് റിമാന്‍ഡ് ചെയ്തിരുന്നു. കഴിഞ്ഞ ദിവസമാണ് ഇയാള്‍ ജാമ്യത്തില്‍ ഇറങ്ങിയത്. അതിക്രൂരമായാണ് ഇരുവരെയും കൊലചെയ്തിരിക്കുന്നത്. പ്രതി അകത്തു കടന്നത് ജനലില്‍ ദ്വാരം ഉണ്ടാക്കി കോട്ടയം: പ്രതി വീടിനകത്തു കടന്നത് ജനലില്‍ ദ്വാരം ഉണ്ടാക്കിയെന്ന് പോലീസ്. വാതിലിനോട് ചേര്‍ന്ന ജനാലയില്‍ ദ്വാരമുണ്ടാക്കി, ജനാലയും വാതിലിന്‍റെ കൊളുത്തും തുറന്നാണു പ്രതി ഉള്ളില്‍ കടന്നതെന്നാണ് നിഗമനം. റിമോട്ട് ഉപയോഗിച്ചു തുറക്കുന്ന ഗേറ്റുള്ള വീടിന്‍റെ മതില്‍ ചാടിക്കടന്നു കൊലപാതകി അകത്ത് കടന്നുവെന്നാണ് സംശയിക്കുന്നത്. ജനല്‍ ഗ്ലാസ് കട്ടര്‍ ഉപയോഗിച്ച് വൃത്താകൃതിയില്‍ മുറിച്ചുമാറ്റി. ഇതിനുശേഷം ജനല്‍ പാളി തുറന്ന് വാതിലിന്‍റെ കുറ്റി എടുത്തതായി സംശയിക്കുന്നു. വിജയകുമാറിന്‍റെ മൃതദേഹം വിവസ്ത്രമായാണു കിടന്നത്. തലയില്‍ കോടാലി ഉപയോഗിച്ചു വെട്ടിയാണു കൊലപ്പെടുത്തിയിരിക്കുന്നത്. ഭാര്യ ഡോ. മീരയുടെ മൃതദേഹം തൊട്ടടുത്ത കിടപ്പുമുറിയിലാണു കണ്ടെത്തിയത്. മീരയുടെ മൃതദേഹത്തില്‍ മുഖത്ത് മുറിവുണ്ട്. ഇവരുടെ മുഖവും ശരീരവും തലയണയും തുണിയും ഉപയോഗിച്ചു മറച്ചിട്ടുണ്ട്.വീടിനുള്ളില്‍ കടന്ന പ്രതി ആദ്യം മീരയെയും പിന്നീട് വിജയകുമാറിനെയെും കൊലപ്പെടുത്തിയെന്നാണ് സൂചന. വിജിലന്‍സും അന്വേഷണം തുടങ്ങി കോട്ടയം: ദമ്പതികള്‍ കൊല്ലപ്പെട്ട സംഭവത്തില്‍ പോലീസിനൊപ്പം വിജിലന്‍സും അന്വേഷണം ആരംഭിച്ചു. കൊല്ലപ്പെട്ട വിജയകുമാര്‍ റിയല്‍ എസ്റ്റേറ്റ് ഉള്‍പ്പെടെ സ്വദേശത്തും വിദേശത്തും നിരവധി ബിസിനസുകള്‍ നടത്തിയിരുന്നു. അതിനാല്‍ അടുത്ത നാളില്‍ വിജയകുമാര്‍ നടത്തിയ സാമ്പത്തിക ഇടപാടുകള്‍ സംബന്ധിച്ച കാര്യങ്ങളാണ് വിജിലന്‍സ് അന്വേഷിക്കുന്നത്. വിജയകുമാറും ഭാര്യയും അയല്‍ക്കാരുമായി അധികം അടുപ്പം പുലര്‍ത്തിയിരുന്നില്ല. മിലിട്ടറിയിലായിരുന്ന വിജയകുമാര്‍ പിന്നീട് വിദേശത്ത് പോയി മടങ്ങിയെത്തി നാട്ടില്‍ ബിസിനസ് ആരംഭിക്കുകയായിരുന്നു. വ്യക്തി വൈരാഗ്യമെന്ന് ഉറപ്പിച്ച് പോലീസ് കോട്ടയം: വ്യക്തിപരമായ പ്രശ്‌നങ്ങളാണ് കൊലപാതകത്തിനു കാരണമെന്ന് പോലീസ്. പ്രാഥമിക നിരീക്ഷണത്തില്‍ത്തന്നെ വീടിനെക്കുറിച്ച് നല്ല അറിവുള്ളയാളാണ് കൃത്യം നടത്തിയതെന്നും വ്യക്തമായി. കൊലയ്ക്ക് ഉപയോഗിച്ച കോടാലി വീട്ടിലെ ഔട്ട് ഹൗസില്‍ നിന്നാണ് കണ്ടെടുത്തത്. വാതില്‍ തകര്‍ക്കാനാണ് അമ്മിക്കല്ല് കൊണ്ടുവന്നതെന്ന് കരുതുന്നു. കോട്ടയത്തും വിദേശത്തും നിരവധി ബിസിനസ് സംരംഭങ്ങളും റിയല്‍ എസ്റ്റേറ്റ് ബിസിനസുമുള്ള വിജയകുമാറിനു ശത്രുക്കളുണ്ടാവുക സ്വഭാവികമാണ്. ഇതു കണക്കിലെടുത്തും അന്വേഷണം പുരോഗമിക്കുന്നുണ്ട്. കിണറ്റിലെ വെള്ളം വറ്റിക്കും കോട്ടയം: ഇരട്ടക്കൊലപാതകം നടന്ന വീട്ടുമുറ്റത്തെ കിണറ്റിലെ വെള്ളം വറ്റിച്ചു പോലീസ് പരിശോധന നടത്തും. ദമ്പതികളുടെ വീട്ടില്‍നിന്നും മൂന്നു മൊബൈല്‍ ഫോണുകള്‍ കാണാതായിട്ടുണ്ട്. മൂന്നു ഫോണുകളും സ്വിച്ച് ഓഫ് ചെയ്ത നിലയിലാണ്. ഇത് കണ്ടെത്തുന്നതിനുള്ള തെരച്ചില്‍ തുടരുകയാണ്.

എംജി സര്‍വകലാശാലയില്‍ മികവിന്‍റെ കേന്ദ്രം നാളെ ഉദ്ഘാടനം ചെയ്യും

കോട്ടയം: എംജി സര്‍വകലാശാലയില്‍ സ്ഥാപിക്കുന്ന മികവിന്‍റെ കേന്ദ്രം മന്ത്രി ഡോ. ആര്‍. ബിന്ദു നാളെ ഉദ്ഘാടനം ചെയ്യും. രാവിലെ 11ന് സര്‍വകലാശാലാ അസംബ്ലി ഹാളില്‍ മന്ത്രി വി.എന്‍. വാസവന്‍ അധ്യക്ഷത വഹിക്കും. കെ. ഫ്രാന്‍സിസ് ജോര്‍ജ് എംപി, ഉന്നത വിദ്യാഭ്യാസ കൗണ്‍സില്‍ മെംബര്‍ സെക്രട്ടറി ഡോ. രാജന്‍ വര്‍ഗീസ്, വൈസ് ചാന്‍സലര്‍ ഡോ. സി.ടി. അരവിന്ദകുമാര്‍, സിന്‍ഡിക്കറ്റ് അംഗങ്ങളായ അഡ്വ. റെജി സക്കറിയ, അഡ്വ. പി.ബി. സതീഷ് കുമാര്‍, രജിസ്ട്രാര്‍ ബിസ്മി ഗോപാലകൃഷ്ണന്‍, ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍, ജില്ലാ പഞ്ചായത്തംഗം ഡോ. റോസമ്മ സോണി, അതിരമ്പുഴ പഞ്ചായത്ത് പ്രസിഡന്‍റ് ജോസ് അമ്പലക്കുളം, പഞ്ചായത്തംഗം ജോഷി ഇലഞ്ഞിയില്‍ എന്നിവര്‍ പ്രസംഗിക്കും. ഭാഭാ ആണവ ഗവേഷണകേന്ദ്രം എംജി സര്‍വകലാശാലയില്‍ സ്ഥാപിക്കുന്ന അഡ്വാന്‍സ്ഡ് നോളജ് ആന്‍ഡ് റൂറല്‍ ടെക്‌നോളജി ഇംപ്ലിമെന്‍റേഷന്‍ സെന്‍ററിന്‍റെ (അകൃതി) ഉദ്ഘാടനവും മന്ത്രി നിര്‍വഹിക്കും.

ആഘോഷങ്ങൾ ഒഴിവാക്കി അരുവിത്തുറ പള്ളിയിൽ തിരുനാളിനു കൊടിയേറി

അരുവിത്തുറ: സെന്‍റ് ജോർജ് ഫൊറോന പള്ളിയിൽ വിശുദ്ധ ഗീവർഗീസ് സഹദായുടെ തിരുനാളിന് കൊടിയേറി. ഫ്രാൻസിസ് മാർപാപ്പയോടുള്ള ആദരസൂചകമായി ആഘോഷ പരിപാടികൾ ഒഴിവാക്കി ലളിതമായാണ് തിരുനാൾ നടത്തുന്നത്. ഇന്നലെ വൈകുന്നേരം വികാരി ഫാ. സെബാസ്റ്റ്യൻ വെട്ടുകല്ലേൽ കൊടിയേറ്റ് നിർവഹിച്ചു. തുടർന്ന് പുറത്തുനമസ്കാരത്തിന് ചോലത്തടം പള്ളി വികാരി ഫാ. തോമസ് തയ്യിൽ നേതൃത്വം നൽകി. ഇന്നു രാവിലെ 5.30നും 6.45നും 8നും വിശുദ്ധ കുർബാനയും നൊവനയും. 9.30 ന് തിരുസ്വരൂപ പ്രതിഷ്ഠ. തുടർന്ന് 10നും 12നും 1.30നും 2.45നും നാലിനും വിശുദ്ധ കുർബാന, നൊവേന. വൈകുന്നേരം 4.30 ന് ബിഷപ് മാർ ജോസഫ് കല്ലറങ്ങാട്ട് വിശുദ്ധ കുർബാന അർപ്പിച്ചു സന്ദേശം നൽകും. തുടർന്ന് പ്രദക്ഷിണം. 24നു രാവിലെ 10ന് തിരുനാൾ റാസ. സീറോ മലബാർ സഭ കൂരിയ ബിഷപ് മാർ സെബാസ്റ്റ്യൻ വാണിയപ്പുരയ്ക്കൽ കാർമികത്വം വഹിക്കും. തുടർന്ന് പ്രദക്ഷിണം. 25ന് ഇടവകക്കാരുടെ തിരുന്നാൾ. രാവിലെ 5.30നും 6.45നും എട്ടിനും 9.15നും 10.30നും 12നും 1.30നും 2.45 നും വിശുദ്ധ കുർബാന, നൊവേന. 4.30ന് കാഞ്ഞിരപ്പള്ളി രൂപതാ മെത്രാൻ മാർ ജോസ് പുളിക്കൽ വി. കുർബാന അർപ്പിക്കും. ഏഴിന് വി. ഗീവർസിന്‍റെ തിരുസ്വരൂപം അൾത്താരയിൽ പുനപ്രതിഷ്ഠിക്കും. 26ന് രാവിലെ 5.30നും 6.30നും 7.30നും 10.30നും വൈകുന്നേരം നാലിനും നൊവേന. 28, 29, 30 തീയതികളിൽ രാവിലെ 5.30നും 6.30നും 7.30നും 10.30നും നാലിനും വൈകുന്നേരം ഏഴിനും വിശുദ്ധ കുർബാന, നൊവേന. എട്ടാമിടമായ മേയ് ഒന്നിന് തിരുനാൾ സമാപിക്കും. രാവിലെ 5.30, 6.45, 8.00, 10.30, 12.00, 1.30, 2.45, 4.00, 6.30 എന്നീ സമയങ്ങളിൽ വിശുദ്ധ കുർബാന, നൊവേന. രണ്ടിന് മരിച്ചവരുടെ ഓർമ ദിനം, സിമിത്തേരി സന്ദർശനം. രാവിലെ 5.30നും 6.30 നും എട്ടിനും ഒന്പതിനും 10.30നും 12നും 2.30നും നാലിനും വിശുദ്ധ കുർബാന.

വയോധികൻ കാറിടിച്ചു മരിച്ചു

വടക്കേക്കര: തുരുത്തി പുന്നമൂട് ജംഗ്ഷനിൽ വഴിയിലൂടെ നടന്നുപോകവേ വയോധികൻ കാറിടിച്ചു മരിച്ചു. അരിക്കത്തില്‍താഴ ബാബു ഗോപാലന്‍ (63) ആണ് അപകടത്തിൽ മരിച്ചത്. ഇന്നലെ പുലര്‍ച്ചെ അഞ്ചിനായിരുന്നു അപകടം. ബാബുവിനെ ഉടൻ ചങ്ങനാശേരി താലൂക്ക് ആശുപത്രിയിലും തുടര്‍ന്ന് വിദഗ്ധ ചികിത്സക്കായി കോട്ടയം മെഡിക്കല്‍ കോളേജ് ഹോസ്പിറ്റലില്‍ എത്തിച്ചങ്കിലും മരിക്കുകയായിരുന്നു. ഭാര്യ: തങ്കച്ചി. മക്കള്‍: കണ്ണന്‍, പ്രീതി, പ്രതീഷ്. മരുമകന്‍: രാജീവ്. സംസ്‌കാരം ഇന്ന് 11ന് ആനന്ദാശ്രമം ശ്മശാനത്തില്‍.

നാടക ശില്പശാല

പാലാ: അന്തരിച്ച അധ്യാപകന്‍ എം.എസ്. ശശിധരന്‍, കലാകാരന്‍ പ്രഭ പാലാ എന്നിവരുടെ സ്മരണാര്‍ഥം തിയറ്റര്‍ ഹട്ടിന്‍റെ നേതൃതത്തില്‍ പാലാ മുനിസിപ്പല്‍ ആര്‍മി, മുനിസിപ്പല്‍ കള്‍ച്ചറല്‍ ക്ലബ് എന്നിവയുടെ സഹകരണത്തില്‍ കുഞ്ഞരങ്ങ് എന്ന പേരില്‍ പത്തുദിവസം നീണ്ടുനില്‍ക്കുന്ന കുട്ടികളുടെ നാടക ശില്പശാല നടക്കും. മേയ് മൂന്നുമുതല്‍ 12 വരെ പാലാ ആര്‍വി ലൈബ്രറിയിലാണ് ശില്പശാല നടക്കുക. മീനച്ചില്‍ താലൂക്കിലെ അഭിനയ അഭിരുചിയുള്ള എട്ടുമുതല്‍ 11 വയസു വരെയുള്ള 20 കുട്ടികള്‍ക്കാണ് പ്രവേശനം. പാലായില്‍ നടക്കുന്ന പാലം 2025 എന്ന സാംസ്‌കാരിക കൂട്ടായ്മയുടെ ഭാഗമായാണ് ശില്പശാല നടക്കുന്നത്. അഭിനയം, സര്‍ഗാത്മക വികസന കളികള്‍, കളിമണ്‍ ശില്പ നിര്‍മാണം, വാസ്തുവിദ്യാ പരിശീലനം, പ്രകൃതി സംരക്ഷണം, നടത്തം, കരകൗശല നിര്‍മാണം, കുട്ടികളുടെ നാടകാവതരണം എന്നീ വിഷയങ്ങള്‍ ഉള്‍പ്പെട്ടതാണ് കുഞ്ഞരങ്ങ്. കുട്ടികളെ കലുഷിതമാക്കുന്ന ലഹരികളില്‍നിന്നു വഴിമാറ്റി അവര്‍ക്ക് കലകളില്‍ പ്രായോഗിക പരിശീലനങ്ങള്‍ നല്‍കുന്ന പ്രവര്‍ത്തനങ്ങള്‍ ശില്പശാലയില്‍ നടക്കും. ഡല്‍ഹി നാഷണല്‍ സ്‌കൂള്‍ ഓഫ് ഡ്രാമ, പൂന ഫിലിം ഇന്‍സ്റ്റിറ്റ്യൂട്ട്, തൃശൂര്‍ സ്‌കൂള്‍ ഓഫ് ഡ്രാമ, തിരുവനന്തപുരം ഫൈന്‍ ആർട്സ് കോളജ്, കെ.ആര്‍. നാരായണന്‍ ഫിലിം ഇന്‍സ്റ്റിറ്റ്യൂട്ട് എന്നിവിടങ്ങളില്‍ നിന്നുള്ള അധ്യാപകരും പ്രശസ്ത കലാകാരന്മാരും നാടോടി കലാകാരന്മാരും ക്ലാസുകള്‍ നയിക്കും. പങ്കെടുക്കാന്‍ താത്പര്യമുള്ളവര്‍ ഈ മാസം 30ന് മുന്‍പ് 9496024650, 9676145161 ഫോൺ നന്പരിൽ വിളിച്ച് പേര് രജിസ്റ്റര്‍ ചെയ്യണം.

ഫ്രാൻസിസ് മാർപാപ്പയെ ആദരപൂർവം അനുസ്മരിച്ച് കാഞ്ഞിരപ്പള്ളി രൂപത വൈദിക കൂട്ടായ്മ

കാഞ്ഞിരപ്പള്ളി: നിത്യതയിലേക്ക് യാത്രയായ ഫ്രാൻസിസ് മാർപാപ്പയെ അനുസ്മരിച്ച് കാഞ്ഞിരപ്പള്ളി രൂപത വൈദിക കൂട്ടായ്മ. കുട്ടിക്കാനം മരിയൻ കോളജിൽ രൂപതാധ്യക്ഷൻ മാർ ജോസ് പുളിക്കലിന്‍റെ അധ്യക്ഷതയിൽ ചേർന്ന വൈദികദിനം ഫ്രാൻസിസ് മാർപാപ്പയുടെ അനുസ്മരണ യോഗമായാണ് നടത്തപ്പെട്ടത്. മാർ ജോസ് പുളിക്കൽ ഒപ്പീസ് ചൊല്ലി. ആർദ്രതയോടെ സഭാ നൗകയെ നയിക്കുകയും സുവിശേഷത്തിന്‍റെ സന്തോഷം ധീരമായി പങ്കുവയ്ക്കുകയും ചെയ്ത ഫ്രാൻസിസ് മാർപാപ്പ ക്രൈസ്തവ ശിഷ്യത്വത്തിന്‍റെ നല്ല മാതൃകയായിരുന്നുവെന്ന് മാർ ജോസ് പുളിക്കൽ വൈദികർക്ക് നൽകിയ സന്ദേശത്തിൽ ഓർമിപ്പിച്ചു. ഫ്രാൻസിസ് മാർപാപ്പയുടെ കബറടക്ക ശുശ്രൂഷ നടത്തപ്പെടുന്ന ശനി‍യാഴ്ച രൂപതയിലെ എല്ലാ പള്ളികളിലും പരിശുദ്ധ പിതാവിനെ അനുസ്മരിച്ച് വിശുദ്ധ കുർബാന അർപ്പിക്കുകയും ഒപ്പീസ് നടത്തുകയും ചെയ്യേണ്ടതാണെന്നും അന്നേ ദിവസം രൂപതയിലെ എല്ലാ സ്ഥാപനങ്ങൾക്കും ഓഫീസുകൾക്കും അവധിയായിരിക്കുമെന്നും മാർ ജോസ് പുളിക്കൽ അറിയിച്ചു. പ്രോട്ടോസിഞ്ചല്ലൂസ് റവ.ഡോ. ജോസഫ് വെള്ളമറ്റം ഫ്രാൻസിസ് മാർപാപ്പ അനുസ്മരണ സന്ദേശം നൽകി. സിഞ്ചല്ലൂസ് ഫാ. ബോബി അലക്സ് മണ്ണംപ്ലാക്കൽ ആമുഖപ്രസംഗം നടത്തി. രൂപത പ്രൊക്കുറേറ്റർ ഫാ. ഫിലിപ്പ് തടത്തിൽ, ചാൻസലർ റവ.ഡോ. മാത്യു ശൗര്യാംകുഴി, മരിയൻ കോളജ് അഡ്മിനിസ്ട്രേറ്റർ ഫാ. തോമസ് ഞള്ളിയിൽ, ഡെപ്യൂട്ടി അഡ്മിനിസ്ട്രേറ്റർ ഫാ. വർഗീസ് പേഴുംകാട്ടിൽ, മരിയൻ കോളജിലെ വൈദികർ എന്നിവർ നേതൃത്വം നൽകി.

ബൈക്കപകടത്തില്‍ യുവാവ് മരിച്ചു

പാലാ: എറണാകുളത്ത് തിങ്കളാഴ്ച രാത്രിയിലുണ്ടായ ബൈക്ക് അപകടത്തില്‍ മുത്തോലി സ്വദേശിയായ യുവാവ് മരിച്ചു. ഓമലകത്ത് ജോയി - റൂബി ദമ്പതികളുടെ മകന്‍ ജോയല്‍ ജോയി (27) ആണ് മരിച്ചത്. ജോയല്‍ സഞ്ചരിച്ച ബൈക്ക് മറ്റൊരു ബൈക്കുമായി കൂട്ടിയിടിച്ചാണ് അപകടമുണ്ടായത്. സംസ്‌കാരം ഇന്ന് 11ന് ഭവനത്തില്‍ ശുശ്രൂഷകളോടെ ആരംഭിച്ച് മുത്തോലി സെന്‍റ് ജോര്‍ജ് പള്ളിയില്‍. പിതാവ് ജോയി ദീപിക ദിനപത്രത്തിന്‍റെ ഏജന്‍റും അമ്മ റൂബി ജോസ് ളാലം ബ്ലോക്ക് പഞ്ചായത്ത് മുന്‍ പ്രസിഡന്‍റും നിലവിലെ മെംബറുമാണ്. സഹോദരി: സാറാ ജോയി (വിദ്യാർഥിനി, പാലാ സെന്‍റ് തോമസ് കോളജ്).

നാഗമ്പടം നെഹ്റു സ്റ്റേഡിയത്തിനു സമീപത്തുവച്ച് യുവാവിനു കുത്തേറ്റു

കോട്ടയം: നാഗമ്പടം നെഹ്റു സ്റ്റേഡിയത്തിനു സമീപത്തു വച്ച് യുവാവിനെ കുത്തി പരിക്കേൽപ്പിച്ച് അക്രമി. കളക്‌ടറേറ്റിനു സമീപം താമസിക്കുന്ന ശിവദാസ് എന്നയാൾക്കാണ് കുത്തേറ്റത്. ഇയാളെ കോട്ടയം ജില്ലാ ജനറൽ ആശുപത്രിയിൽ പ്രവേശിപ്പിച്ചു. സംഭവത്തിൽ ഒരാളെ കോട്ടയം ഈസ്റ്റ് പോലീസ് കസ്റ്റഡിയിലെടുത്തു. ഇന്നലെ വൈകുന്നേരം ആറോടെയായിരുന്നു സംഭവം. നഗരത്തിൽ അലഞ്ഞുതിരിഞ്ഞ് ആക്രി പെറുക്കുന്ന സംഘത്തിൽപ്പെട്ടതാണ് പ്രതി. സ്റ്റേഡിയത്തിനു സമീപം അരമണിക്കൂറോളം ഭീകരാന്തരീക്ഷം സൃഷ്ട‌ിച്ച പ്രതി ജനങ്ങളെ ആശങ്കയിലാഴ്ത്തി. ഇതുവഴി പോയവരെ കത്തികാട്ടി ഭീഷണിപ്പെടുത്തുകയും കത്തിവീശുകയുമായിരുന്നു. ഇതിനിടെയാണ് ഇതുവഴിപോയ ശിവദാസിന് കുത്തേറ്റത്. ഇതോടെ നാട്ടുകാർ ചേർന്ന് പ്രതിയെ സാഹസികമായി കീഴ്പ്പെടുത്തി കെട്ടിയിടുകയായിരുന്നു. തുടർന്ന് പോലീസിനെ വിളിച്ചുവരുത്തി പ്രതിയെ കൈമാറി.

സില്‍വര്‍ലൈന്‍ പദ്ധതി സര്‍ക്കാര്‍ ഉപേക്ഷിക്കണം: പ്രമോദ് പുഴങ്കര

മാടപ്പള്ളി: കേരള ജനത തള്ളിക്കളഞ്ഞ സില്‍വര്‍ലൈന്‍ പദ്ധതി സര്‍ക്കാര്‍ ഉപേക്ഷിക്കണമെന്ന് എഴുത്തുകാരനും രാ‌ഷ്‌ട്രീയ നിരീക്ഷകനുമായ പ്രമോദ് പുഴങ്കര. സമരങ്ങളിലൂടെ അധികാരത്തിലെത്തിയ ഇടതുപക്ഷ സര്‍ക്കാര്‍ സമരങ്ങളോട് ഇപ്പോള്‍ അസഹിഷ്ണുതയാണ് പുലർത്തുന്നതെന്ന് അദ്ദേഹം ചൂണ്ടി ക്കാട്ടി. സില്‍വര്‍ലൈന്‍ പദ്ധതി കേരള സര്‍ക്കാര്‍ പിന്‍വലിക്കണമെന്നാവശ്യപ്പെട്ട് സില്‍വര്‍ ലൈന്‍വിരുദ്ധ ജനകീയ സമിതി പന്തല്‍കെട്ടി മാടപ്പള്ളിയില്‍ ആരംഭിച്ച സത്യഗ്രഹ സമരത്തിന്‍റെ മൂന്നാം വാര്‍ഷികം ഉദ്ഘാടനം ചെയ്യുകയായിരുന്നു അദ്ദേഹം. സമരസമിതി ജില്ലാ ചെയര്‍മാന്‍ ബാബു കുട്ടന്‍ചിറ അധ്യക്ഷത വഹിച്ചു. ജോസഫ് എം. പുതുശേരി, കുഞ്ഞുകോശി പോള്‍, വി.ജെ. ലാലി, സലീം പി. മാത്യു, ഫാ. വി.എം. മാത്യു, എസ്. രാജീവന്‍, കെ. ശൈവപ്രസാദ്, മിനി കെ. ഫിലിപ്പ്, തോമസ് കെ. മാറാട്ടുകളം, റോസ്‌ലിന്‍ ഫിലിപ്പ്, അരുണ്‍ ബാബു, പി.എം. മോഹനന്‍പിള്ള, പി.എ. സാലി, സൈന തോമസ്, സണ്ണി എത്തയ്ക്കാട്ട്, ഷിബു ഏഴേപുഞ്ചയില്‍, എസ്. രാധാമണി എന്നിവര്‍ പ്രസംഗിച്ചു.

ഫ്രാന്‍സിസ് പാപ്പായെ സന്ദര്‍ശിക്കാൻ ഭാഗ്യം ലഭിച്ചതിന്‍റെ ധന്യതയിൽ ചങ്ങനാശേരിക്കാര്‍

ചങ്ങനാശേരി: ഫ്രാന്‍സിസ് പാപ്പായെ സന്ദര്‍ശിച്ച് അനുഗ്രഹം നേടാന്‍ ലഭിച്ച നിമിഷത്തെ ധന്യതയോടെ സ്മരിച്ച് ചങ്ങനാശേരിക്കാര്‍. ചങ്ങനാശേരി അതിരൂപതാംഗമായ മാര്‍ ജോര്‍ജ് കൂവക്കാട്ടിന്‍റെ കര്‍ദിനാള്‍ സ്ഥാനാരോഹണ ചടങ്ങിനായി വത്തിക്കാനിലെത്തി യപ്പോഴാണ് ആഗോള കത്തോലിക്കാ സഭയുടെ പരമാധ്യക്ഷനും ലോകാരാധ്യനുമായ ഫ്രാന്‍സിസ് പാപ്പായെ കാണാനും അനുഗ്രഹം വാങ്ങാനും ചങ്ങനാശേരിക്കാരായ ഒട്ടേറെപ്പേര്‍ക്ക് അവസരം ലഭിച്ചത്. ചങ്ങനാശേരി ആര്‍ച്ച്ബിഷപ് മാര്‍ തോമസ് തറയില്‍, ആര്‍ച്ച്ബിഷപ് എമെരിറ്റസ് മാര്‍ ജോസഫ് പെരുന്തോട്ടം, വികാരി ജനറാള്‍മാരായ മോണ്‍. ആന്‍റണി എത്തയ്ക്കാട്ട്, മോണ്‍. ജോണ്‍ തെക്കേക്കര, ചാന്‍സിലര്‍ റവ.ഡോ. ജോര്‍ജ് പുതുമനമൂഴിയില്‍ എന്നിവരാണ് സംഘത്തെ നയിച്ചത്. മുന്‍ കൂരിയ അംഗങ്ങളായ ഫാ. ജോസഫ് വാണിയപ്പുരയ്ക്കല്‍, ഫാ. ജയിസ് പാലയ്ക്കല്‍, ഫാ. വര്‍ഗീസ് താനമാവുങ്കല്‍, ഫാ. ഐസക് ആലഞ്ചേരി, ഫാ. ചെറിയാന്‍ കാരിക്കൊമ്പില്‍, അതിരൂപത പാസ്റ്ററല്‍ കൗണ്‍സില്‍ സെക്രട്ടറി ഡോ. രേഖ മാത്യൂസ്, അതിരൂപത പിആര്‍ഒ അഡ്വ. ജോജി ചിറയില്‍, മുന്‍ പാസ്റ്ററല്‍ കൗണ്‍സില്‍ സെക്രട്ടറി ഡോ. റൂബിള്‍രാജ് തുടങ്ങി നൂറോളം പേര്‍ക്കാണ് ഫ്രാൻസിസ് പാപ്പായെ സന്ദര്‍ശിക്കാനുള്ള അവസരം ലഭിച്ചത്.

ഒറ്റ വീഡിയോ കോളിൽ മലയാളിമനസ് കീഴടക്കി...

ചങ്ങനാശേരി: വടക്കേക്കര കല്ലുകളം ശോശാമ്മ ആന്‍റണി (96)യെ വീഡിയോ കോളില്‍ വിളിച്ച് സന്തോഷം പങ്കുവച്ച് ജന്മദിനാശംസ നേര്‍ന്നതിലൂടെയാണ് ഫ്രാന്‍സിസ് പാപ്പ മലയാളികളുടെ പ്രത്യേകിച്ച് ചങ്ങനാശേരിക്കാരുടെ മനസില്‍ ഇടംനേടിയത്. 2023 സെപ്റ്റംബര്‍ രണ്ടിനായിരുന്നു അപ്രതീക്ഷിതമായി പാപ്പായുടെ വീഡിയോകോള്‍ ശോശാമ്മ ആന്‍റണിയെ തേടിയെത്തിയത്. കര്‍ദിനാള്‍ മാർ ജോര്‍ജ് കൂവക്കാട്ടിന്‍റെ മുത്തശിയോടും കുടുംബത്തോടും മാര്‍പാപ്പ നടത്തിയ വീഡിയോകോള്‍ സംഭാഷണമാണ് കേരളക്കരയിലെ വിശ്വാസികളുടെ മനസില്‍ ഫ്രാന്‍സിസ് മാര്‍പാപ്പയ്ക്ക് ഇടംനല്‍കിയത്. അന്നു മാര്‍പാപ്പയുടെ വിദേശയാത്രകളുടെ ചുമതല വഹിക്കുന്ന വൈദികനായിരുന്നു ചങ്ങനാശേരി അതിരൂപതയിലെ മാമ്മൂട് ഇടവകാംഗമായ ഫാ. ജോര്‍ജ് കൂവക്കാട്ട്. പിന്നീട് അദ്ദേഹത്തെ ഫ്രാന്‍സിസ് പാപ്പ കര്‍ദിനാളായി നിയമിച്ചു. പാപ്പായുടെ വിദേശയാത്രകളുടെ ചുമതലയിരിക്കേ മംഗോളിയയിലേക്കുള്ള യാത്രാമധ്യേ വല്ല്യമ്മച്ചിയുടെ ആരോഗ്യസ്ഥിതിയെക്കുറിച്ച് മാര്‍പാപ്പയുമായി ഫാ. ജോര്‍ജ് കൂവക്കാട്ട് സംസാരിച്ചിരുന്നു. പിന്നീടാണ് വീഡിയോ കോളില്‍ മാര്‍പാപ്പ ശോശാമ്മയുമായി സംസാരിച്ചത്. കര്‍ദിനാള്‍ കൂവക്കാട്ടിന്‍റെ അമ്മ ലീലാമ്മയുടെ അമ്മയാണ് ശോശാമ്മ. ആഗോള കത്തോലിക്കാ സഭയുടെ തലവനായിരിക്കുമ്പോഴും ലാളിത്യം നിറഞ്ഞ ജീവിതമാണു തന്‍റേതെന്നു തെളിയിക്കുന്നതായിരുന്നു ആ ഫോണ്‍വിളി. "സുപ്രഭാതം' എന്നര്‍ഥം വരുന്ന "ബൊഞ്ചോര്‍ണോ' എന്ന് ഇറ്റാലിയന്‍ ഭാഷയില്‍ അഭിസംബോധന ചെയ്താണു മാര്‍പാപ്പ സംസാരിച്ചു തുടങ്ങിയത്. വീഡിയോ കോള്‍ നാലു മിനിറ്റ് നീണ്ടു. മാര്‍പാപ്പ മുത്തശിയെ അനുഗ്രഹിക്കുകയും പിന്നീട് കൈവീശി കാണിക്കുകയും ചെയ്തു. മറ്റു കുടുംബാംഗങ്ങളെ പരിചയപ്പെടുകയും ചെയ്താണു കോള്‍ അവസാനിപ്പിച്ചത്. ശോശാമ്മയ്ക്കൊപ്പം മകന്‍ ചെത്തിപ്പുഴ ആശ്രമം പ്രിയോര്‍ ഫാ. തോമസ് കല്ലുകളവുമുണ്ടായിരുന്നു. ആ വീഡിയോ കോള്‍ സമൂഹ മാധ്യമങ്ങളില്‍ ഏറെ വൈറലായിരുന്നു. പിന്നീട് ശോശാമ്മയുടെ വിയോഗവേളയിൽ മാര്‍പാപ്പ അനുശോചനവും അറിയിച്ചിരുന്നു. കര്‍ദിനാള്‍ മാര്‍ ജോര്‍ജ് കൂവക്കാട്ടിന്‍റെ മാതാപിതാക്കളുടെ 50-ാം വിവാഹവാര്‍ഷിക വേളയില്‍ 2022ല്‍ ഇരുവരെയും കര്‍ദിനാള്‍ കൂവക്കാട് വത്തിക്കാനിലേക്കു കൊണ്ടുപോയിരുന്നു. മാര്‍പാപ്പയെ കാണാനുള്ള അനുമതി മുന്‍കൂട്ടി വാങ്ങിയിരുന്നില്ലെങ്കിലും ഇവർക്ക് പാപ്പായെ കാണാനായത് വലിയ സന്തോഷത്തിനിടയാക്കി. മാര്‍ കൂവക്കാട്ടിനെ കര്‍ദിനാളായി നിയോഗിച്ച ചടങ്ങില്‍ ചങ്ങനാശേരി ആര്‍ച്ച്ബിഷപ് മാര്‍ തോമസ് തറയില്‍, ആര്‍ച്ച്ബിഷപ് മാര്‍ ജോസഫ് പെരുന്തോട്ടം എന്നിവരുടെ നേതൃത്വത്തില്‍ ബന്ധുക്കളും ചങ്ങനാശേരി അതിരൂപതാംഗങ്ങളും അല്മായ സംഘടനാ പ്രതിനിധികളും മാര്‍പാപ്പയെ സന്ദര്‍ശിച്ചിരുന്നു. അടുത്ത വര്‍ഷം മാര്‍പാപ്പയുടെ ഇന്ത്യാ‍ സന്ദര്‍ശനം നടക്കുമെന്നു കരുതിയിരിക്കേയാണ് വിയോഗം. മാര്‍പാപ്പയ്ക്ക് ഇന്ത്യാ സന്ദര്‍ശനത്തിന് അതീവ താത്പര്യമുണ്ടെന്നും ഇതിനുള്ള ആലോചനകള്‍ ആരംഭിച്ചിട്ടുണ്ടെന്നും കര്‍ദിനാളായി നിയമിതനായ മാര്‍ ജോര്‍ജ് കൂവക്കാട്ട് ദീപികയോടു പങ്കുവച്ചിരുന്നു. ബെന്നി ചിറയില്‍

‘കുറുപ്പന്തറ ജംഗ്ഷന്‍ വികസനം, ഏറ്റുമാനൂര്‍-എറണാകുളം റോഡിലെ അപകടവളവ് നിവര്‍ത്തൽ നടപടികൾ‍ വേഗത്തിലാക്കും’

കടുത്തുരുത്തി: കടുത്തുരുത്തി മണ്ഡലത്തില്‍ ഉള്‍പ്പെട്ട വിവിധ സ്ഥലങ്ങള്‍ ചേര്‍ത്ത് ഏറ്റുമാനൂര്‍ - എറണാകുളം റോഡിലെ അപകടവളവുകള്‍ നിവര്‍ത്തുന്നതിന് ആദ്യഘട്ടത്തില്‍ റവന്യു വകുപ്പ് പുറപ്പെടുവിച്ച ഉത്തരവില്‍ വിട്ടുപോയ സര്‍വേ നമ്പരുകള്‍കൂടി ഉള്‍പ്പെടുത്തി പുതുക്കിയ ഭേദഗതി ഉത്തരവ് റവന്യു (ബി) വകുപ്പ് പുറപ്പെടുവിച്ചു. മോന്‍സ് ജോസഫ് എംഎല്‍എയാണ് ഇക്കാര്യമറിയിച്ചത്. ഇതുസംബന്ധിച്ചു സംസ്ഥാന സര്‍ക്കാര്‍ പുറപ്പെടുവിച്ച പുതുക്കിയ ഉത്തരവ് പ്രകാരം ജില്ലയില്‍ കാണക്കാരി, കോതനല്ലൂര്‍, മാഞ്ഞൂര്‍, മുട്ടുചിറ, കടുത്തുരുത്തി, വടയാര്‍ വില്ലേജുകളില്‍ ഉള്‍പ്പെട്ട ഭൂമി ഏറ്റുമാനൂര്‍ - എറണാകുളം റോഡിലെ അപകടകരമായ വളവുകള്‍ നിവര്‍ത്തുന്നതിന് ഏറ്റെടുക്കാനുള്ള അനുമതി നല്‍കിക്കൊണ്ടാണ് സര്‍ക്കാര്‍ ഉത്തരവ് പുറപ്പെടുവിച്ചിരിക്കുന്നത്. കുറുപ്പന്തറ ജംഗ്ഷന്‍ വികസനവും ഏറ്റുമാനൂര്‍ - എറണാകുളം റോഡിലെ അപകടവളവുകൾ‍ നിവര്‍ത്തുന്നതിന് ഭൂമി ഏറ്റെടുക്കാനുമുള്ള സര്‍ക്കാര്‍ ഉത്തരവ് നടപടികള്‍ വേഗത്തിലാക്കും. പൊതുമരാമത്ത് വകുപ്പ് റോഡ്സ് വിഭാഗവും റവന്യു വകുപ്പും സംയുക്ത പരിശോധന നടത്തി ഭൂമി ഏറ്റെടുക്കല്‍ നടപടിയിലേക്ക് കടക്കും. കുറുപ്പന്തറ ജംഗ്ഷന്‍ വികസനത്തിനാവശ്യമായ ഭൂമി ഏറ്റെടുക്കാനുള്ള സര്‍വേ നമ്പരുകളും സംസ്ഥാന സര്‍ക്കാര്‍ അംഗീകരിച്ചു പുറപ്പെടുവിച്ച ഉത്തരവില്‍ ഉള്‍പ്പെടുത്തിയിട്ടുണ്ടെന്ന് മോന്‍സ് ജോസഫ് അറിയിച്ചു. റവന്യു (ബി) വകുപ്പ് പുറപ്പെടുവിച്ചതു പ്രകാരം ബന്ധപ്പെട്ട മുഴുവന്‍ സ്ഥലങ്ങളും സര്‍ക്കാര്‍ നിശ്ചയിച്ച വിലയ്ക്ക് ഏറ്റെടുക്കാനുള്ള നടപടികള്‍ ഉടനെ ആരംഭിക്കും. ഇതുസംബന്ധിച്ചുള്ള അന്തിമനടപടികള്‍ തീരുമാനിക്കുന്നതിന് ജില്ലാ കളക്ടറുടെ അധ്യക്ഷതയില്‍ യോഗം ഉടന്‍ വിളിച്ചു ചേര്‍ക്കുമെന്നും മോന്‍സ് ജോസഫ് എംഎല്‍എ അറിയിച്ചു.

ഈസ്റ്റര്‍ദിനത്തില്‍ നിരാലംബയായ വയോധികയെ ഏറ്റെടുത്ത് നിത്യസഹായകന്‍റെ അമ്മവീട്

കടുത്തുരുത്തി: കടുത്തുരുത്തി പഞ്ചായത്തിലെ നാലാം വാര്‍ഡില്‍ തനിച്ചു താമസിച്ചിരുന്ന നിരാലംബയായ വയോധികയെ നിത്യസഹായകന്‍ പ്രവര്‍ത്തകര്‍ ഏറ്റെടുത്തു. പ്ലാച്ചേരില്‍ രത്‌നമ്മയാണ് നിത്യസഹായകന്‍റെ അമ്മവീട്ടില്‍ അഭയം തേടിയത്. സ്‌ട്രോക്ക് വന്ന് തളര്‍ന്ന രത്‌നമ്മയെ ആരും നോക്കാനില്ലാത്ത അവസ്ഥയില്‍ വീട്ടില്‍ അവശനിലയിലായിരുന്നു. തുടര്‍ന്ന് വാര്‍ഡിലെ ആശാപ്രവര്‍ത്തകയായ വിശ്വലത, പഞ്ചായത്തംഗമായ അര്‍ച്ചന കാപ്പിലിനെ വിവരമറിയിച്ചു. പഞ്ചായത്തംഗം വയോധികയെ സന്ദര്‍ശിക്കുകയും നിത്യസഹായകന്‍റെ അമ്മവീട് പ്രവര്‍ത്തകരെ വിവരമറിയിക്കുകയും ചെയ്തു. അമ്മവീട് ഭവനത്തിലെ അനില്‍ ജോസഫും സിന്ധുവും സ്ഥലത്തെത്തി സാഹചര്യങ്ങള്‍ മനസിലാക്കി. താത്കാലികമായി സംരക്ഷണം ഒരുക്കിയിരുന്ന മേരിയമ്മയെ കണ്ട് രത്‌നമ്മയുടെ കാര്യം പഞ്ചായത്തംഗത്തെ അറിയിച്ച് ആശുപത്രിയില്‍ പ്രവേശിപ്പിക്കാന്‍ നിർദേശിച്ചു. തുടര്‍ന്ന് പഞ്ചായത്തംഗവും ആശാ പ്രവര്‍ത്തകയും മേരിയമ്മയും ചേര്‍ന്ന് രത്‌നമ്മയെ മെഡിക്കല്‍ കോളജ് ആശുപത്രിയില്‍ അഡ്മിറ്റ് ചെയ്തു. മെഡിക്കല്‍ കോളജില്‍നിന്നു ഡിസ്ചാര്‍ജായ രത്‌നമ്മയെ തനിച്ചാക്കാന്‍ പറ്റാത്ത സാഹചര്യത്തില്‍ നിത്യസഹായകന്‍ വയോധികയെ ഏറ്റെടുക്കുകയായിരുന്നു. മെഡിക്കല്‍ കോളജില്‍നിന്ന് അറുനൂറ്റിമംഗലം ആശൂപത്രിയിലേക്ക് മാറ്റിയ രത്‌നമ്മയെ നിത്യസഹായകന്‍ പ്രവര്‍ത്തകര്‍ ഈസ്റ്റര്‍ ദിനത്തില്‍ ഇവിടെയെത്തിയാണ് അമ്മവീട് ഭവനത്തിലേക്ക് എത്തിച്ചത്. പഞ്ചായത്തംഗം അര്‍ച്ചന കാപ്പില്‍, ആശാ പ്രവര്‍ത്തക വിശ്വലത, അയല്‍വാസി മേരിയമ്മ, കെ.കെ. സജികുമാര്‍, ട്രസ്റ്റ് പ്രസിഡന്‍റ് അനില്‍ ജോസഫ്, വി.കെ. സിന്ധു, തോമസ് അഞ്ചമ്പില്‍, കെ.കെ. സുരേന്ദ്രന്‍, ജിജോ ജോര്‍ജ്, റീത്താ ജയ്‌സണ്‍, ചാക്കോച്ചന്‍ കുര്യന്തടം, ജയിംസ് കാവാട്ടുപറമ്പില്‍ തുടങ്ങിയവര്‍ പങ്കെടുത്തു.

ധർണ നടത്തി

ടിവിപുരം: വേതന കുടിശിക ലഭിക്കാത്തതിൽ പ്രതിഷേധിച്ച് എൻആർഇജി വർക്കേഴ്സ് ഫെഡറേഷന്‍റെ (എഐ‌ടിയുസി) നേതൃത്വത്തിൽ പ്രതിഷേധ ധർണ നടത്തി. ചെമ്മനത്തുകര പോസ്റ്റ് ഓഫീസ് പടിക്കൽ നടന്ന ധർണാസമരം സിപിഐ സംസ്ഥാന കൗൺസിൽ അംഗം ലീനമ്മ ഉദയകുമാർ ഉദ്ഘാടനം ചെയ്തു. ലോക്കൽ സെക്രട്ടറി കെ.വി. നടരാജൻ അധ്യക്ഷത വഹിച്ചു. എസ്. ബിജു, സിജീഷ്, ദീപാ ബിജു, ടി.കെ. മധു, തങ്കമ്മ തങ്കേശൻ എന്നിവർ പ്രസംഗിച്ചു.

ശില്പശാല നടത്തി

വൈക്കം: സംസ്ഥാന എനർജി മാനേജ്മെന്‍റ് സെന്‍ററിന്‍റെ സഹകരണത്തോടെ എറണാകുളം-അങ്കമാലി അതിരൂപത സാമൂഹ്യ പ്രവർത്തന, പരിസ്ഥിതി പരിപാലന വിഭാഗമായ സഹൃദയയുടെ ആഭിമുഖ്യത്തിൽ വൈക്കം നിയോജകമണ്ഡലതല കുളിർമ ഊർജസംരക്ഷണ ശില്പശാല സംഘടിപ്പിച്ചു. വീടുകളിലും കെട്ടിടങ്ങളിലും കൂൾ റൂഫ് സാങ്കേതികവിദ്യകൾ പ്രോത്സാഹിപ്പിച്ച് ഉള്ളിലെ ചൂട് കുറയ്ക്കുകയും ഫാൻ, എസി തുടങ്ങിയവയുടെ ഉപയോഗം പരമാവധി കുറയ്ക്കുകയും ചെയ്യുന്നതിനെക്കുറിച്ചുള്ള അറിവു പകരലാണ് ശില്പശാലയുടെ ലക്ഷ്യം. വൈക്കം ഫൊറോനാ പള്ളി ഹാളിൽ സഹൃദയ അസിസ്റ്റന്‍റ് ഡയറക്ടർ ഫാ. സിബിൻ മനയംപിള്ളിയുടെ അധ്യക്ഷതയിൽ നടന്ന യോഗം വൈക്കം ബ്ലോക്ക് പഞ്ചായത്ത് പ്രസിഡന്‍റ് എസ്. ബിജു ഉദ്ഘാടനം ചെയ്തു. സഹൃദയ അനിമേറ്റർ ജീന തോമസ്, സഹൃദയ ടെക്ക് റിന്യൂവബിൾ എനർജി കോ- ഓർഡിനേറ്റർ റെജി ജയിംസ്, എനർജി മാനേജ്മെന്‍റ് സെന്‍റർ റിസോഴ്സ് പേഴ്സൺ ജീസ് പി. പോൾ തുടങ്ങിയവർ പ്രസംഗിച്ചു.

കോണ്‍ഗ്രസ് പ്രവര്‍ത്തകര്‍ പ്രതിഷേധ ധര്‍ണ നടത്തി

മാഞ്ഞൂര്‍: പഞ്ചായത്തിന്‍റെ കെടുകാര്യസ്ഥതയ്ക്കും വികസന മുരടിപ്പിനും ആശാവര്‍ക്കര്‍മാരോടുള്ള അവഗണനയ്ക്കും തൊഴിലുറപ്പ് തൊഴിലാളികളുടെ കുടിശിക നല്‍കാത്തതിനുമെതിരേ കോണ്‍ഗ്രസ് പ്രവര്‍ത്തകര്‍ മാഞ്ഞൂര്‍ പഞ്ചായത്ത് ഓഫീസിന് മുന്നില്‍ പ്രതിഷേധ ധര്‍ണ നടത്തി. ഷോപ്പിംഗ് കോംപ്ലക്‌സ് നിര്‍മാണം പൂര്‍ത്തിയാക്കാത്തത്, സെക്രട്ടറി, അസിസ്റ്റന്‍റ് എൻജിനിയര്‍ തസ്തികകള്‍ ഒഴിഞ്ഞുകിടക്കുന്നത് തുടങ്ങി വിവിധ ആവശ്യങ്ങള്‍ ചൂണ്ടിക്കാണിച്ചായിരുന്നു പ്രതിഷേധം. കോണ്‍ഗ്രസ് മണ്ഡലം പ്രസിഡന്‍റ് ബിനോ സഖറിയാസ് അധ്യക്ഷത വഹിച്ചു. ഡിസിസി ജനറല്‍ സെക്രട്ടറി സുനു ജോര്‍ജ് ധര്‍ണ ഉദ്ഘാടനം ചെയ്തു. വര്‍ഗീസ് കാറുകുളം, ജോര്‍ജ് നെടുനിലം, വി.ആര്‍. ശിവദാസ്, ടോമി കറുകുളം, ചാക്കോ മത്തായി, ജെയ്‌നി തോമസ്, ബിന്ദു സുരേഷ്, ജോജോ കോട്ടപറമ്പില്‍, ജിസ് തോമസ്, ബാബു തൂമ്പില്‍ തുടങ്ങിയവര്‍ പ്രസംഗിച്ചു.

യുവാവ് വാഹനാപകടത്തിൽ മരിച്ചു

വൈക്കം: മൂന്നുവയസുകാരനായ മകന്‍റെ പിറന്നാൾ ആഘോഷത്തിൽ പങ്കെടുത്ത സുഹൃത്തിനെ ബൈക്കിൽ കൊണ്ടുപോയി വിട്ടശേഷം വീട്ടിലേക്ക് മടങ്ങിയ യുവാവ് വാഹനാപകടത്തിൽ മരിച്ചു. മറവൻതുരുത്ത് വാളംപള്ളിപ്പാലത്തിന് സമീപം നടുവിലേക്കൂറ്റിൽ പരേതരായ ജോയി-ശാന്തമ്മ ദമ്പതികളുടെ മകൻ ജിജോ തോമസാണ് (40) മരിച്ചത്. ഇന്നലെ രാവിലെ 6.30ന് പുതിയകാവ് ജംഗ്‌ഷന് സമീപമായിരുന്നു അപകടം. ജിജോ സഞ്ചരിച്ച ബൈക്ക് എതിരേ വന്ന ടൂറിസ്റ്റ് ബസുമായി കൂട്ടിയിടിക്കുകയായിരുന്നു. റോഡിൽ തെറിച്ചുവീണ് ഗുരുതരമായി പരിക്കേറ്റ ജിജോയെ ഉടൻ തൃപ്പൂണിത്തുറ താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. എറണാകുളത്തെ സ്വകാര്യ സ്ഥാപനത്തിലെ ജീവനക്കാരനാണ് മരിച്ച ജിജോ. സംസ്കാരം നടത്തി. ഭാര്യ: ജിജ. മകൻ: ജോഷ്വാ.

ഫ്രാന്‍സിസ് മാര്‍പാപ്പയെ അനുസ്മരിച്ച് സഭാതലവന്മാർ

മാറ്റത്തിന് വിത്തുവിതറിയ വ്യക്തിത്വം: മാർ ജോസഫ് കല്ലറങ്ങാട്ട് ആർക്കും അടയ്ക്കാൻ സാധിക്കാത്ത വാതിൽ തുറന്നിട്ട ശേഷമാണ് ഫ്രാൻസിസ് മാർപാപ്പ ഈ ലോകം വിട്ട് സ്വർഗരാജ്യത്തിലേക്ക് പോയത്. സമൂഹത്തിൽ ഉണ്ടാകേണ്ട മാറ്റത്തിന് വിത്ത് വിതറിയ വ്യക്തിയായിരുന്നു പിതാവ്. ലോകത്തോട് ദൈവത്തെക്കുറിച്ച് ഏറ്റവും കൂടുതൽ സംസാരിച്ച വ്യക്തിയായ പിതാവ് ദൈവം നമുക്ക് നൽകിയ അമൂല്യനിധിയാണ്. സാമൂഹികവും പാരിസ്ഥിതികവുമായ പ്രതിസന്ധികളെ തരണം ചെയ്യാൻ മാർപാപ്പ നടത്തിയ പരിശ്രമങ്ങൾ മഹത്തരമാണ്. വിവിധ മതവിഭാഗങ്ങളിൽപ്പെട്ടവരുമായിട്ടുള്ള സംവാദം പ്രോത്സാഹിപ്പിക്കുവാൻ പിതാവ് നടത്തിയ പ്രവർത്തനങ്ങൾ ശ്ലാഘനീയമാണ്. അവസാനനാളിൽ എഴുതിയ അവൻ നമ്മെ സ്നേഹിച്ചു എന്ന ചാക്രിക ലേഖനത്തിൽ ഹൃദയം നഷ്ടപ്പെട്ട ലോകത്തിന് ഹൃദയം കൊടുക്കാൻ നമ്മൾ പരിശ്രമിക്കണമെന്നാണ് പറഞ്ഞത്. സീറോമലബാർ സഭയെ സംബന്ധിച്ച പിതാവ് വലിയ ഒരു അനുഗ്രഹമായിരുന്നു. ദൈവാരാധനയെക്കുറിച്ച് പിതാവ് വളരെ വ്യക്തമായ മാനദണ്ഡങ്ങൾ സഭയ്ക്ക് നൽകിയിട്ടുണ്ട്. പാപ്പാ കാണിച്ചുതന്ന ജീവിതമാതൃക ഏവരും ശ്രദ്ധയോടെ പഠിച്ച് ഉൾക്കൊള്ളുകയും വേണം. എല്ലാവരെയും സമന്മാരായി കണ്ട വ്യക്തിത്വം: മാര്‍ മാത്യു മൂലക്കാട്ട് അജപാലനശുശ്രൂഷയില്‍ വേറിട്ട വ്യക്തിമുദ്ര പതിപ്പിച്ച ഇടയശ്രേഷ്ഠനായിരുന്നു ഫ്രാന്‍സിസ് മാര്‍പാപ്പ. അശരണരെയും പാവപ്പെട്ടവരെയും ചേര്‍ത്തുനിര്‍ത്തിയിരുന്ന പാപ്പാ തികഞ്ഞ മനുഷ്യസ്നേഹിയും എല്ലാവരെയും സമന്മാരായി കാണുന്ന വ്യക്തിത്വത്തിന് ഉടമയുമായിരുന്നു. കോട്ടയം അതിരൂപത ഫ്രാന്‍സിസ് മാര്‍പാപ്പയ്ക്കുവേണ്ടി പ്രാര്‍ഥിക്കുകയും അനുശോചനം അറിയിക്കുകയും ചെയ്യുന്നു. ലാറ്റിനമേരിക്കന്‍ പശ്ചാത്തലത്തില്‍ വളര്‍ന്നുവന്ന പാപ്പായുടെ ജീവിതപശ്ചാത്തലങ്ങളും മുന്‍കാല അനുഭവങ്ങളും സഭയെ വേറിട്ടതും ശക്തവുമായ വഴിയിലൂടെ നയിക്കുവാന്‍ അദ്ദേഹത്തിനു ശക്തി പകര്‍ന്നു. സഭയ്ക്കുള്ളിലും പുറത്തും നവീകരണത്തിന്‍റെ വക്താവായിരുന്ന മാര്‍പാപ്പ തികഞ്ഞ പരിസ്ഥിതി സ്നേഹി കൂടിയായിരുന്നു. ജീവിതം മുഴുവന്‍ സുവിശേഷാനുസരണം ജീവിച്ച് ഉയിര്‍പ്പിന്‍റെ സന്ദേശം ലോകത്തിനു നല്കി പാപ്പാ വിടവാങ്ങിയിരിക്കുകയാണ്. പല ചാക്രിക ലേഖനങ്ങളും ഗ്രന്ഥങ്ങളും രചിച്ചെങ്കിലും പാപ്പായുടെ ജീവിതമാണ് ലോകത്തിനു നല്കിയ ഏറ്റവും വലിയ സന്ദേശമടങ്ങിയ ഗ്രന്ഥം. അദ്ദേഹത്തിന്‍റെ പ്രചോദനാത്മകമായ ആത്മീയ നേതൃത്വം തലമുറകള്‍ക്ക് പ്രകാശം ചൊരിയും. സുവിശേഷത്തിന്‍റെ സര്‍ഗാത്മക മുഖം: മാര്‍ തോമസ് തറയില്‍ ഈസ്റ്റര്‍ ദിനത്തില്‍ ലോകത്തെ മുഴുവന്‍ ആശീര്‍വദിച്ചശേഷം പരിശുദ്ധ പിതാവ് ഫ്രാന്‍സിസ് പാപ്പാ നമ്മില്‍നിന്നും വേര്‍പിരിഞ്ഞിരിക്കുകയാണ്. പരിശുദ്ധ പിതാവിന്‍റെ വിയോഗത്തില്‍ സഭാംഗങ്ങളെല്ലാം ദുഃഖിതരാണ്. ഈ കാലഘട്ടത്തില്‍ കത്തോലിക്കാ സഭയെ ഏറ്റവും ജനകീയമായി അവതരിപ്പിച്ച വ്യക്തിയാണ് അദ്ദേഹം. ക്രൈസ്തവ സന്ദേശത്തെ ലോകത്തിന് ഉള്‍ക്കൊള്ളാനാവുന്ന രീതിയില്‍ അദ്ദേഹം അവതരിപ്പിച്ചു. വിശ്വാസം ക്ഷയിച്ചുകൊണ്ടിരിക്കുന്നു എന്നു കരുതുന്ന ഒരു കാലഘട്ടത്തില്‍ കത്തോലിക്കാ സഭയെ ഏറ്റവും പ്രസക്തമായി നിര്‍ത്താന്‍ അദ്ദേഹത്തിന്‍റെ നേതൃത്വത്തിനു കഴിഞ്ഞു. കോവിഡ് കാലത്ത് അടഞ്ഞുകിടന്ന ലോകം പാപ്പായെ ശ്രവിച്ചു. അദ്ദേഹത്തിന്‍റെ സന്ദേശങ്ങള്‍ അനേകര്‍ക്കു പ്രത്യാശ പകരുന്നതായിരുന്നു. സുവിശേഷത്തിന്‍റെ ആനന്ദത്തെക്കുറിച്ച് പാപ്പാ നിരന്തരം സംസാരിച്ചിരുന്നു. സഭ എല്ലാവരോടും തുറവിയുള്ളവളാകണം എന്ന ചിന്തയോടുകൂടെ വത്തിക്കാന്‍റെ പല വകുപ്പുകളുടെയും തലപ്പത്ത് വനിതകളെ നിയമിക്കുന്നതില്‍ അദ്ദേഹം ശ്രദ്ധ പുലര്‍ത്തി. അദ്ദേഹത്തെ നാലു പ്രാവശ്യം സന്ദര്‍ശിക്കാനുള്ള ഭാഗ്യം എനിക്കു ലഭിച്ചു. ഒരു സുഹൃത്തിനെപ്പോലെ ഇടപെടുന്ന അനുഭവം: മാര്‍ പെരുന്തോട്ടം ഫ്രാന്‍സിസ് മാര്‍പാപ്പയെ പല പ്രാവശ്യം അടുത്തുകണ്ടു സംസാരിക്കാന്‍ ഭാഗ്യമുണ്ടായി. വച്ചുകെട്ടൊന്നുമില്ലാത്ത സമീപനമായിരുന്നു പരിശുദ്ധ പിതാവിന്‍റേത്. ഒരിക്കല്‍ സ്വകാര്യമുറിയില്‍ വ്യക്തിപരമായി അനുവദിച്ചുകിട്ടിയ കൂടിക്കാഴ്ചയിലാണ് ഫ്രാന്‍സിസ് മാര്‍പാപ്പയോടുള്ള എന്‍റെ ആദരവും സ്‌നേഹവും ആഴപ്പെട്ടത്. മറ്റുള്ളവരെ കേള്‍ക്കാനും ആവശ്യങ്ങള്‍ അറിയാനും ഒരു ശുശ്രൂഷകനെപ്പോലെ തനിക്കു സാധിക്കുന്ന കാര്യങ്ങള്‍ ചെയ്തു സഹായിക്കാനും സന്നദ്ധനായ ഒരുത്തമ മനുഷ്യസ്‌നേഹിയെ പാപ്പായില്‍ കാണാന്‍ കഴിഞ്ഞു. എല്ലാ വിഭാഗീയതകള്‍ക്കുമുപരിയായി ലോകത്തിലെങ്ങും സമാധാനവും മാനവസാഹോദര്യവും പുലരണമെന്നു പരിശുദ്ധ പിതാവ് അതിയായി ആഗ്രഹിച്ചു. അതിനായി ശബ്ദിച്ചു. മാര്‍പാപ്പ സുഖം പ്രാപിക്കുന്നു എന്ന് എല്ലാവരും ആശ്വസിച്ചിരിക്കെ, തികച്ചും അപ്രതീക്ഷിതമായി നിത്യതയിലേക്കു യാത്രയായി. മനുഷ്യഹൃദയങ്ങളില്‍ ഇടംനേടിയ അത്യപൂര്‍വ മനുഷ്യസ്‌നേഹികളില്‍ പ്രഥമനിരയിലാണ് ഫ്രാന്‍സിസ് മാര്‍പാപ്പ. സ്നേഹത്തിന്‍റെ നല്ല മാതൃക: മാർ മാത്യു അറയ്ക്കൽ സ്വര്‍ഗീയമായ ഒരു അനുഭൂതിയായിരുന്നു ഫ്രാന്‍സിസ് മാര്‍പാപ്പയുമായുള്ള ഓരോ കൂടിക്കാഴ്ചയും. അതുല്യമായ സ്‌നേഹവും പരിഗണനയും പിതാവിന്‍റെ ഓരോ വാക്കിലും ഭാവത്തിലും പ്രകടമായിരുന്നു. വലിയ ഉള്‍ക്കാഴ്ചയും ഊര്‍ജവും പകര്‍ന്നുനല്‍കുന്നതായിരുന്നു പിതാവിന്‍റെ പ്രബോധനങ്ങള്‍. ആത്മീയമായ അനുഭൂതി പകര്‍ന്നുനല്‍കുന്ന വ്യക്തിത്വമായിരുന്നു പിതാവിന്‍റേത്. ലോകത്തിന്‍റെ ഓരോ ചലനവും കൃത്യമായി പിതാവ് നിരീക്ഷിച്ചുകൊണ്ടിരുന്നു. അത്തരത്തില്‍ ഇന്നത്തെ ലോകത്തിന് ഒരു കാവലാളും തിരുത്തല്‍ ശക്തിയുമായിരുന്നു ഫ്രാന്‍സിസ് പാപ്പാ. അനാഥരെയും അഗതികളെയും അഭയാര്‍ഥികളെയും യുദ്ധത്തിന്‍റെ ഇരകളെയുമൊക്കെ കാരുണ്യത്തോടെ കാണുകയും എക്കാലവും പാവങ്ങളുടെ പക്ഷം ചേരുകയും ചെയ്ത പിതാവ് അസീസിയിലെ വിശുദ്ധ ഫ്രാന്‍സിസിന്‍റെ അതേ ചൈതന്യത്തിലാണ് വ്യാപരിച്ചത്. ജനമനസുകളില്‍ ഫ്രാന്‍സിസ് മാര്‍പാപ്പ എക്കാലവും ജ്വലിക്കുന്ന ഓര്‍മയായി നിലകൊള്ളും. ആർദ്രതയുള്ള വലിയ ഇടയൻ: മാർ ജോസ് പുളിക്കൽ ഊഷ്മളമായ സ്‌നേഹവും കരുതലും ആര്‍ദ്രതയുമാണ് ഫ്രാന്‍സിസ് മാര്‍പാപ്പയില്‍ കാണാനിടയായത്. ലാളിത്യത്തിന്‍റെയും വിനയത്തിന്‍റെയും ആള്‍രൂപമായിരുന്ന പരിശുദ്ധ പിതാവ് പാവങ്ങളോടും പാര്‍ശ്വവത്കരിക്കപ്പെട്ടവരോടും പ്രതിബദ്ധതയും അനുകമ്പയും പുലര്‍ത്തിയ മനുഷ്യസ്‌നേഹിയായിരുന്നു. മനുഷ്യരോടു മാത്രമല്ല പ്രകൃതിയോടും പിതാവിന് വലിയ പ്രതിബദ്ധതയുണ്ടായിരുന്നു. ഭാരതസഭയുടെ വിശേഷിച്ച് സീറോമലബാര്‍ സഭയുടെ വളര്‍ച്ചയ്ക്ക് പിതാവ് വലിയ പരിഗണനയാണ് നല്‍കിയത്. കാഞ്ഞിരപ്പള്ളി രൂപതയോടുള്ള കരുതലും ആ വാക്കുകളിലുണ്ടായിരുന്നു. വന്ദ്യപിതാവിന്‍റെ വേര്‍പാടില്‍ അനുശോചിക്കുകയും കാഞ്ഞിരപ്പള്ളി രൂപതാക്കൂട്ടായ്മ ഒന്നാകെ ആത്മശാന്തിക്കായി പ്രാര്‍ഥിക്കുകയും ചെയ്യുന്നു. രൂപതയിലെ എല്ലാ പള്ളികളിലും സ്ഥാപനങ്ങളിലും പരിശുദ്ധ കുർബാനയിലും യാമ നമസ്കാരങ്ങളിലുൾപ്പെടെയുള്ള കുടുംബ പ്രാർഥനകളിലും പരിശുദ്ധ പിതാവിനെ അനുസ്മരിച്ച് പ്രാർഥിക്കേണ്ടതാണ്. കാരുണ്യത്തിന്‍റെ ആള്‍രൂപം: ബിഷപ് ഡോ. സെബാസ്റ്റ്യന്‍ തെക്കത്തെച്ചേരില്‍ ലാളിത്യത്തിന്‍റെയും കാരുണ്യത്തിന്‍റെയും ആള്‍രൂപമായിരുന്നു ഫ്രാന്‍സിസ് പാപ്പാ. പാവങ്ങളോടും പാര്‍ശ്വവത്കരിക്കപ്പെട്ടവരോടും പിതാവ് എന്നും പക്ഷം ചേര്‍ന്നു. സഭയെ കാലത്തിനൊത്തു നയിക്കാനും പ്രതിസന്ധികളില്‍പ്പെടാതെ പരിപാലിക്കാനും പിതാവിന് കഴിഞ്ഞു. ആത്മീയതയും വിശുദ്ധിയും പ്രാര്‍ഥനയുമായിരുന്നു അവിടുത്തെ കൈമുതല്‍. ആഗോള കത്തോലിക്കാ യുവജനസമ്മേളനത്തില്‍ പങ്കെടുത്തപ്പോഴാണ് പിതാവിനെ ആഴത്തില്‍ അറിയാനും ആ വ്യക്തിപ്രഭാവത്തെ അനുഭവിച്ചറിയാനും ഇടയാക്കിയത്. പ്രാര്‍ഥനയിലും ആരാധനയിലും പ്രബോധനത്തിലും അദ്ദേഹം യുവജനങ്ങളെ സഭയോടു കൂടുതല്‍ അടുപ്പിച്ചു. ആദിമസഭയുടെ ചൈതന്യത്തിലേക്ക് സഭയെ നയിക്കാന്‍ സിനഡാത്മകത എന്ന വലിയ ആശയത്തെ ഈ കാലഘട്ടത്തിന് സമ്മാനിച്ചു. വെല്ലുവിളികളെ ധീരമായി നേരിട്ട പ്രവാചകദൗത്യമാണ് പൂര്‍ത്തിയായിരിക്കുന്നത്.

പാപ്പായുടെ സ്‌നേഹവാത്സല്യം അടുത്തറിഞ്ഞതില്‍ ധന്യത

കോട്ടയം: പൊന്തിഫിക്കല്‍ അക്കാദമി അംഗം എന്ന നിലയില്‍ കഴിഞ്ഞ 12 വര്‍ഷമായി ഫ്രാന്‍സിസ് പാ പ്പായുമായി അടുത്ത ബന്ധം പുലര്‍ത്തുവാന്‍ സാധിച്ചത് ജീവിതത്തിലെ ഏറ്റവും വലിയ ഭാഗ്യമായി കാണുന്നതായി പ്രമുഖ അസ്ഥിരോഗവിദഗ്ധനായ ഡോ.പി.എസ്. ജോണ്‍. എല്ലാ വര്‍ഷവും കുടുംബസമേതം പാപ്പയെ അടുത്തുകാണുവാനും അനുഗ്രഹം സ്വീകരിക്കുവാനും അവസരം ലഭിച്ചു. കാണുമ്പോഴെല്ലാം എനിക്കുവേണ്ടി പ്രാര്‍ഥിക്കണം എന്നു പറയുന്ന പാപ്പായുടെ ലാളിത്യമാര്‍ന്ന മുഖം മനസില്‍ നിന്നും മായുന്നില്ല. പൊന്തിഫിക്കല്‍ അക്കാദമി ഫോര്‍ ലൈഫില്‍ കേരളത്തില്‍ നിന്നുളള ഏക പ്രതിനിധിയും ഇന്ത്യയില്‍നിന്നുള്ള മൂന്നു പേരില്‍ ഒരാള്‍ എന്ന നിലയിലും കഴിഞ്ഞ 14 വര്‍ഷമായി പൊന്തിഫിക്കല്‍ അക്കാദമിയില്‍ പ്രവര്‍ത്തിക്കുന്നുണ്ട്. കഴിഞ്ഞ മാര്‍ച്ച് മൂന്നിനു നടന്ന അക്കാദമിയുടെ യോഗത്തില്‍ പങ്കെടുക്കാന്‍ പാപ്പയ്ക്ക് സാധിച്ചിരുന്നില്ല. അദ്ദേഹത്തെ പ്രവേശിപ്പിച്ചിരുന്ന ആശുപത്രിയില്‍ എത്തി പ്രാര്‍ഥനകള്‍ അര്‍പ്പിച്ചിരുന്നു.

അപകടം പതിയിരിക്കുന്ന നാഗമ്പടം: മേല്‍പ്പാലവും പ്രവേശനപാതയും ചേരുന്നിടം താഴുന്നു

കോട്ടയം: നാഗമ്പടം റെയില്‍വേ മേല്‍പ്പാലത്തിന്‍റെ ഇരുവശങ്ങളിലും പ്രവേശന പാതകള്‍ പ്രധാന പാലവുമായി ചേരുന്ന ഭാഗം താഴ്ന്നതോടെ അപകടസാധ്യതയേറി. റോഡ് പാലവുമായി ചേരുന്ന ഭാഗം അല്പം താഴ്ന്നാണ് സ്ഥിതി ചെയ്യുന്നത്. ഇവ തമ്മില്‍ ചേരുന്നിടത്തു വലിയ വിള്ളലുകളും രൂപപ്പെട്ടിട്ടുണ്ട്. മേല്‍പ്പാലത്തിന്‍റെ നിര്‍മാണം നടന്ന ഘട്ടത്തില്‍തന്നെ മേല്‍പ്പാലവും പ്രവേശന പാതയും തമ്മില്‍ ഉയരത്തില്‍ ഏറ്റക്കുറച്ചിലുകളുണ്ടായിരുന്നു. ഇത് ശാസ്ത്രീയമായി പരിഹരിക്കാതെയാണ് നിര്‍മാണം പൂര്‍ത്തിയാക്കിയത്. പിന്നീട് കുറച്ചു കഴിഞ്ഞപ്പോള്‍ പാലവും റോഡും ചേരുന്നിടത്ത് വിള്ളലുകള്‍ രൂപപ്പെട്ടപ്പോള്‍ ടാറിംഗ് നടത്തി ലെവലാക്കിയിരുന്നു. ഇപ്പോള്‍ വീണ്ടും റോഡും പാലവും ചേരുന്നിടം താഴ്ന്നു വിള്ളലുകള്‍ രൂപപ്പെട്ടിരിക്കുകയാണ്. ഇരുചക്രവാഹനങ്ങള്‍ കടന്നുപോകുമ്പോള്‍ അപകടസാധ്യതയേറെയാണ്. ദിവസവും ആയിരക്കണക്കിനു വാഹനങ്ങളാണ് പാലത്തിലൂടെ കടന്നുപോകുന്നത്. വാഹനങ്ങള്‍ കടന്നുപോകുമ്പോഴുണ്ടാകുന്ന പ്രകമ്പനമാണ് കോണ്‍ക്രീറ്റ് സ്ലാബുകള്‍ തമ്മില്‍ അകലാന്‍ കാരണമെന്നു പറയുന്നു. മേല്‍പ്പാലത്തിന്‍റെ ചുമതല റെയില്‍വേക്കും അപ്രോച്ച് റോഡിന്‍റേത് പൊതുമരാമത്ത് നിരത്തു വിഭാഗത്തിനുമാണ്. റെയില്‍വേ- പൊതുമരാമത്ത് അധികൃതർ സംയുക്തമായി പാലം സന്ദര്‍ശിക്കുകയും റോഡും പാലവും ചേരുന്ന ഭാഗത്തെ വിടവ് കോണ്‍ക്രീറ്റിംഗും ടാറിംഗും നടത്തി ലെവലാക്കണമെന്നുമുള്ള ആവശ്യം ശക്തമായിരിക്കുകയാണ്. നടപ്പാതയും തകര്‍ന്നു മേല്‍പ്പാലത്തിനോടു ചേര്‍ന്നുള്ള നടപ്പാതയിലും ദുരിത യാത്രയാണ്. ഇരുവശങ്ങളിലുമുള്ള നടപ്പാതയിലെ കോണ്‍ക്രീറ്റ് സ്ലാബുകള്‍ ഇളകിമാറിയ നിലയിലാണ്. നടക്കുമ്പോള്‍ ഇവ തെന്നിമാറുന്നതും ഭയാനക ശബ്ദം ഉണ്ടാകുന്നതും പതിവാണ്. ഇതുമൂലം നടപ്പാത ഉപേക്ഷിച്ച് വാഹനങ്ങള്‍ കടന്നുപോകുന്ന പ്രധാന റോഡിലൂടെയാണു കാല്‍നടയാത്രികര്‍ നടക്കുന്നത്. ഇത് അപകടങ്ങളെ ക്ഷണിച്ചുവരുത്തുകയാണ്. ഏറ്റവും തിരക്കേറിയ മേല്‍പ്പാലം നടപ്പാതയിലെ അപര്യാപ്തകളും പരിഹരിക്കണമെന്ന ആവശ്യവും ശക്തമായിട്ടുണ്ട്. കോട്ടയം നാഗമ്പടം മേല്‍പ്പാലവും പ്രവേശനപാതയും ചേരുന്നിടത്ത് രൂപപ്പെട്ട വിള്ളല്‍. -ദീപിക

വീട് നിർമിച്ചു നൽകി

അയ്മനം: ത്രേസ്യാമ്മയും മകൻ സോജുവും ഇനി സുരക്ഷിത ഭവനത്തിൽ തല ചായ്ക്കും. ചെറിയ ഷെഡിൽനിന്ന് ഈസ്റ്റർ ദിനത്തിൽ അവർ പുതിയവീട്ടിൽ താമസമാക്കി. അയ്മനം പഞ്ചായത്തിലെ ഒന്നാം വാർഡിൽ കൊടുവത്ര മാതാ ഭവനത്തിൽ ത്രേസ്യാമ്മ എന്ന ചേച്ചമ്മയ്ക്ക് ഇത് സ്വപ്ന സാക്ഷാത്കാരം കൂടിയാണ്. ഭർത്താവിന്‍റെ മരണശേഷം ഇളയ മകനൊപ്പം അമ്മയും മകനും പാടത്തിന്‍റെ ചിറയിൽ താത്കാലികമായി നിർമിച്ച ഷെഡിലായിരുന്നു കഴിഞ്ഞുവന്നിരുന്നത്. പകൽസമയത്ത് ഓന്തും കീരിയും ഒക്കെ വീട്ടിൽ അതിഥികളായെത്തുമ്പോൾ രാത്രി ആമയും ഇഴ ജന്തുക്കളുമായിരുന്നു കൂട്ട്. ഏക ആശ്രയമായ പെയിന്‍റിംഗ് തൊഴിലാളിയായ മകൻ സോജു ജോലിക്കിടെ വീണു നട്ടെല്ലിനും മുഖത്തും പരിക്കുപറ്റിയതിനെത്തുടർന്ന് ജോലിക്ക് പോകാൻ കഴിയാത്ത സ്ഥിതിയിലുമായിരുന്നു. ഇവരുടെ ദയനീയാവസ്ഥ മനസിലാക്കിയ വാർഡ് മെംബറും പഞ്ചായത്ത് വൈസ് പ്രസിഡന്‍റുമായ മനോജ് കരീമഠം അയ്മനത്തെ ജനകീയ വാട്സ്ആപ്പ് കൂട്ടായ്മയായ അയ്മനം ടുഡേയും ഗ്രേസ് സ്റ്റഡി എബ്രോഡുമായി സഹകരിച്ച് വീട് നിർമിച്ചു നൽകുകയായിരുന്നു. വീടിന് ഒരു കിടപ്പുമുറി, അടുക്കള, ഹാൾ, വരാന്ത അറ്റാച്ച്ഡ് ബാത്ത്റൂം തുടങ്ങിയ സൗകര്യങ്ങളുണ്ട്. താക്കോൽദാനം ഗ്രേസ് സ്റ്റഡി എബ്രോഡ് ഉടമ രഞ്ജിത്ത് പന്നക്കൽ നിർവഹിച്ചു. ചടങ്ങിൽ വാർഡ് മെംബറും അയ്മനം പഞ്ചായത്ത് വൈസ് പ്രസിഡന്‍റുമായ മനോജ് കരീമഠം, അഞ്ചാം വാർഡ് മെംബർ ബിജു മാന്താറ്റിൽ, ബിയൂഷ് ചന്ദ്രൻ, വിനോ മാത്യു, അഡ്വ. സജി എസ്. നായർ എന്നിവർ പങ്കെടുത്തു.

പുതുപ്പള്ളി പള്ളിയിൽ വിശുദ്ധ ഗീവര്‍ഗീസ് സഹദായുടെ തിരുനാൾ

പുതുപ്പള്ളി: ജോര്‍ജിയന്‍ തീര്‍ഥാടന കേന്ദ്രമായ പുതുപ്പള്ളി സെന്‍റ് ജോര്‍ജ് ഓര്‍ത്തഡോക്‌സ് പള്ളിയില്‍ വിശുദ്ധ ഗീവര്‍ഗീസ് സഹദായുടെ രക്തസാക്ഷി ദിനമായ 23 മുതല്‍ മേയ് 23വരെ സഹദാ സാന്നിധ്യാനുസ്മരണ ദിനങ്ങളായി ആചരിക്കും. ദിവസവും രാവിലെ വിശുദ്ധ കുര്‍ബാനയും മധ്യസ്ഥപ്രാര്‍ഥനയും ഉണ്ടായിരിക്കും. 28ന് കൊടിയേറ്റ്. മേയ് അഞ്ച് മുതല്‍ ഏഴുവരെയാണു പ്രധാനപെരുന്നാള്‍ ദിനങ്ങള്‍. അഞ്ചിനു തീര്‍ഥാടന സംഗമവും വിവിധ കുരിശടികളില്‍നിന്നുള്ള പ്രദക്ഷിണവും. ആറിനു വിശുദ്ധ അഞ്ചിന്മേല്‍ കുര്‍ബാനയ്ക്കുശേഷം പൊന്നിന്‍കുരിശ് വിശുദ്ധ മദ്ബഹായില്‍ സ്ഥാപിക്കും. വലിയ പെരുന്നാള്‍ ദിനമായ ഏഴിന് രാവിലെ അഞ്ചിനും എട്ടിനും വിശുദ്ധ കുര്‍ബാന ഉണ്ടായിരിക്കും. ബസേലിയോസ് മാര്‍ത്തോമാ മാത്യൂസ് തൃതീയന്‍ കാതോലിക്കാ ബാവയുടെ മുഖ്യകാര്‍മികത്വത്തില്‍ രണ്ടാമത്തേത് വിശുദ്ധ ഒന്പതിന്മേല്‍ കുര്‍ബാനയാണ്. തുടര്‍ന്ന് വെച്ചൂട്ട് നേര്‍ച്ചസദ്യയും കുട്ടികള്‍ക്കുള്ള ആദ്യചോറൂട്ടും. ഉച്ചയ്ക്കുശേഷം രണ്ടിനു ഇരവിനല്ലൂര്‍ കവല ചുറ്റിയുള്ള പ്രദക്ഷിണം. തുടര്‍ന്ന് നാലിന് അപ്പവും പാകപ്പെടുത്തിയ കോഴിയിറച്ചിയും നേര്‍ച്ചയായി ഭക്തര്‍ക്ക് നല്‍കും.

വീടുകയറി ആക്രമിച്ചതായി പരാതി

തിരുവാർപ്പ്: ഇന്നലെ പുലർച്ചെ രണ്ടംഗസംഘം വീടുകയറി അമ്മയെയും മകനെയും ആക്രമിച്ചതായി പരാതി. പുലർച്ചെ രണ്ടാേടെ കിളിരൂരിലായിരുന്നു സംഭവം. കൊച്ചുപറമ്പിൽ ഓമന ബാബു, മകൻ പ്രമോദ് എന്നിവർക്കാണ് മർദനമേറ്റത്. വീടിന്‍റെ ജനൽ ചില്ലുകളും തകർത്തു. ഇരുവരും കോട്ടയം ജില്ലാ ആശുപത്രിയിൽ ചികിത്സ തേടി. മുൻവൈരാഗ്യമാണ് ആക്രമണ കാരണമെന്നാണ് സൂചന. വാദികളെയും പ്രതികളെയും ഇന്ന് സ്റ്റേഷനിലെത്തിച്ച് തുടർനടപടികൾ സ്വീകരിക്കുമെന്നു കുമരകം എസ്എച്ച്ഒ കെ. ഷിജി അറിയിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]