പുനലൂർ: പുനലൂരിലെ മാധ്യമ പ്രവർത്തകൻ ടി.എം . തോമസിന് നേരെ കൈയേറ്റ ശ്രമം. തിങ്കളാഴ്ച രാവിലെ പത്തരയോടെ ചൗക്ക റോഡിലാണ് സംഭവം. റേഷൻ കടയുടെ ഉടമ ജി. കുഞ്ഞപ്പനാണ് കൈയേറ്റത്തിന് ശ്രമിച്ചത്.
ഇയാളുടെ റേഷൻ കടയിൽ ഉപഭോക്താക്കൾക്ക് ആവശ്യ സാധനങ്ങൾ നൽകാറില്ലെന്നും സാധനങ്ങളുടെ അളവിലും തൂക്കത്തിലും തട്ടിപ്പ് നടത്തുന്നതായും പരാതികൾ ഉയർന്നിരുന്നു. വിജിലൻസ് കമ്മിറ്റി അംഗവും കൊല്ലം ജില്ലാ ഉപഭോക്തൃ സംരക്ഷണ സമിതി പ്രസിഡന്‍റുമായ ടി.എം തോമസ് ജില്ലാ സപ്ലൈ ഓഫീസർക്ക് ഇതു സംബന്ധിച്ച് പരാതി നൽകി. റേഷൻ കടയിൽ സപ്ലൈ ഓഫീസറുടെ നേതൃത്വത്തിൽ റെയ്ഡ് നടത്തിയതിന്‍റെ വൈരാഗ്യം കാരണമാണ് കൈയേറ്റ ശ്രമമെന്നാണ് ആക്ഷേപം ഉയരുന്നത്.