നീലേശ്വരം വെടിക്കെട്ടപകടം: മരണം ആറായി
Friday, November 15, 2024 2:15 AM IST
നീലേശ്വരം: നീലേശ്വരം വെടിക്കെട്ടപകടത്തില്‍ മരണം ആറായി. നീലേശ്വരം തേര്‍വയല്‍ സ്വദേശിയായ ജില്ലാ സഹകരണ ബാങ്ക് റിട്ട.സീനിയര്‍ മാനേജര്‍ പി.സി. പദ്മനാഭന്‍ (68) ആണ് മരിച്ചത്. ഗുരുതരമായി പൊള്ളലേറ്റ് കണ്ണൂര്‍ ആസ്റ്റര്‍ മിംസ് ആശുപത്രി ഐസിയുവില്‍ 15 ദിവസമായി ചികിത്സയിലായിരുന്ന പത്മനാഭന്‍ ഇന്നലെ വൈകുന്നേരത്തോടെയാണ് മരിച്ചത്.
ഭാര്യ: എം.ടി. ഭാര്‍ഗവി. മക്കള്‍: റോജന്‍ രഞ്ജിത് ബാബു (വൈസ് പ്രസിഡന്‍റ്, മഷ്രീക് ബാങ്ക്, ദുബായ്), ഷൈന്‍ജിത് (എന്‍ജിനിയര്‍). മരുമക്കള്‍: വീണ (തളിപ്പറമ്പ്), ശ്രീയുക്ത (വടകര). സഹോദരങ്ങള്‍: ഭാനുമതി (വെള്ളൂര്‍), രമണി (തളിപ്പറമ്പ്), രാജന്‍ (റിട്ട. മാനേജര്‍, കാര്‍ഷിക ഗ്രാമവികസന ബാങ്ക്, കാഞ്ഞങ്ങാട്), പരേതനായ രാഘവന്‍. സംസ്‌കാരം ഇന്നു നടക്കും.
നീലേശ്വരം അഞ്ഞൂറ്റമ്പലം വീരര്‍ക്കാവ് ക്ഷേത്രത്തിലെ വെടിക്കെട്ട് അപകടം നടന്ന് രണ്ടാഴ്ച പിന്നിടുമ്പോള്‍ 37 പേര്‍ ഇപ്പോഴും കോഴിക്കോട്, കണ്ണൂര്‍, മംഗളൂരു എന്നിവിടങ്ങളിലെ ആശുപത്രിയില്‍ ചികിത്സയില്‍ കഴിയുകയാണ്. ഇതില്‍ അഞ്ചുപേര്‍ ഐസിയുവിലാണുള്ളത്.
കിനാനൂര്‍-കരിന്തളം കിനാവൂര്‍ റോഡിലെ സി.സന്ദീപ് (38), ചോയ്യങ്കോട് കിനാവൂരിലെ യു.രതീഷ് (40), കൊല്ലമ്പാറ മഞ്ഞളംകാടിലെ കെ.ബിജു (37), ചെറുവത്തൂര്‍ തുരുത്തി ഓര്‍ക്കളത്തെ ഷിബിന്‍രാജ് (19), കിനാവൂര്‍ സ്വദേശി രഞ്ജിത് (28) എന്നിവര്‍ നേരത്തേ ചികിത്സയിലിരിക്കേ മരിച്ചിരുന്നു.