കൊച്ചി നടക്കാന്‍ പറ്റാത്ത നഗരമായി ; കോര്‍പറേഷന് കോടതിയുടെ രൂക്ഷ വിമര്‍ശനം
Thursday, November 14, 2024 1:57 AM IST
കൊച്ചി: ഫോര്‍ട്ട്‌കൊച്ചിയില്‍ തകര്‍ന്നുകിടന്ന കാനയില്‍ വീണ് വിദേശ ടൂറിസ്റ്റിന്‍റെ കാലൊടിഞ്ഞ സംഭവത്തില്‍ കൊച്ചി കോര്‍പറേഷനെ രൂക്ഷമായി വിമര്‍ശിച്ച് ഹൈക്കോടതി.
വിനോദസഞ്ചാര കേന്ദ്രമെന്ന് അകാശപ്പെടുമ്പോഴും നടക്കാന്‍ പോലും പറ്റാത്ത നഗരമായി കൊച്ചി മാറി. നടക്കാന്‍ പോലും പേടിക്കേണ്ട നാടെന്നു മറുനാട്ടുകാര്‍ കരുതിയാല്‍ ഇവിടെ എങ്ങനെ ടൂറിസം വളരുമെന്നും കോടതി ചോദിച്ചു.
ഇത്തരം സഭവങ്ങള്‍ നാണക്കേടാണ്. ടൂറിസം മാപ്പില്‍ കൊച്ചിയെ മാത്രമല്ല, കേരളത്തെത്തന്നെ ബാധിക്കുന്ന വിഷയമാണിത്. ഇതേക്കുറിച്ചൊക്കെ അവരുടെ രാജ്യത്ത് പോയി എന്താകും പ്രതികരിക്കുകയെന്നും കൊച്ചിയെക്കുറിച്ചും കേരളത്തെക്കുറിച്ചും പുറംലോകം എന്തു ചിന്തിക്കുമെന്നും ജസ്റ്റിസ് ദേവന്‍ രാമചന്ദ്രന്‍ ചോദിച്ചു.
കൊച്ചിയിലെ റോഡുകളുടെ ശോച്യാവസ്ഥയെക്കുറിച്ചുള്ള ഹര്‍ജികളിലാണ് കോടതിയുടെ വാക്കാലുള്ള വിമര്‍ശനം. സംഭവത്തില്‍ ഹൈക്കോടതി നഗരസഭയില്‍നിന്ന് വിശദീകരണം നേടി.