ശ്രേഷ്ഠ ബാവയെ അനുസ്മരിച്ച് പ്രധാനമന്ത്രി
Wednesday, November 13, 2024 1:58 AM IST
കൊച്ചി: അഗാധമായ ആത്മീയ അറിവും ജ്ഞാനവും അനുകമ്പ നിറഞ്ഞ ഹൃദയവും കൊണ്ട് അനുഗൃഹീതനായിരുന്നു യാക്കോബായ സുറിയാനി സഭാ ശ്രേഷ്ഠ കാതോലിക്ക ബസേലിയോസ്‌ തോമസ് പ്രഥമന്‍ കാതോലിക്ക ബാവയെന്നു പ്രധാനമന്ത്രി നരേന്ദ്ര മോദി അനുസ്മരിച്ചു.
ശ്രേഷ്ഠ ബാവയുടെ വിയോഗം വളരെ ദുഃഖകരമാണെന്നും ബാവയുടെ നഷ്ടം ഒരിക്കലും നികത്താനാവാത്ത ശൂന്യതയാണ് സമൂഹത്തില്‍ അവശേഷിപ്പിക്കുന്നതെന്നും അദ്ദേഹം അനുശോചന സന്ദേശത്തിൽ പറഞ്ഞു.
നിസ്വാര്‍ഥ മനോഭാവത്തോടെ ജനങ്ങളെ സേവിക്കാന്‍ സമര്‍പ്പിതനായി നിലകൊണ്ട അദ്ദേഹം പതിറ്റാണ്ടുകളായി സഭയ്ക്കും സമൂഹത്തിനും പ്രചോദനാത്മകമായ നേതൃത്വം നല്‍കിക്കൊണ്ട് വിവിധ പദവികളില്‍ പ്രവര്‍ത്തിച്ചു.
പ്രതിസന്ധികള്‍ നിറഞ്ഞ സമയങ്ങളില്‍ യാക്കോബായ സുറിയാനി സഭയെ അദ്ദേഹം ഐക്യത്തോടെയും ശക്തിയോടെയും സംരക്ഷിച്ച് നിലനിര്‍ത്തിയെന്നും പ്രധാനമന്ത്രി അനുശോചന സന്ദേശത്തില്‍ പറഞ്ഞു.