എൻ.സി. ശേഖർ പുരസ്‌കാരം മധുവിന്
Thursday, November 14, 2024 1:00 AM IST
കണ്ണൂർ: കമ്യൂണിസ്റ്റ് പാർട്ടിയുടെ സ്ഥാപക നേതാവായിരുന്ന എൻ.സി. ശേഖറുടെ സ്‌മരണാർത്ഥം എൻ.സി. ശേഖർ ഫൗണ്ടേഷൻ നൽകുന്ന പത്തൊന്പതാമത്തെ പുരസ്‌കാരം മലയാളത്തിന്‍റെ മഹാനടൻ മധുവിന്.
ചലച്ചിത്രരംഗത്ത് ബഹുമുഖമായ പ്രവർത്തനങ്ങളിലൂടെയും തന്‍റേതായ സംഭാവനകളിലൂടെയും മലയാള സിനിമയുടെ അവിഭാജ്യഘടകമായി മാറിയ ഉജ്വലപ്രതിഭയ്ക്കുള്ള അംഗീകാരമായാണ് മധുവിനെ പുരസ്‌കാരത്തിന് തെരഞ്ഞെടുത്തതെന്നു പുരസ്കാര സമിതി അറിയിച്ചു.
എം.വി. ഗോവിന്ദൻ ചെയർമാനും കവിയും മാധ്യമപ്രവർത്തകനുമായ എൻ. പ്രഭാവർമ, ഡോ. വി.പി.പി. മുസ്തഫ, ഇടയത്ത് രവി എന്നിവരും ഉൾപ്പെട്ട കമ്മിറ്റിയാണ് പുരസ്കാര ജേതാവിനെ തെരഞ്ഞെടുത്തത്.
10,000 രൂപയും പ്രശസ്തി പത്രവും ഉൾപ്പെടുന്ന പുരസ്‌കാരം എൻ.സി. ശേഖറുടെ മുപ്പത്തിയെട്ടാമത് ചരമവാർഷികം പ്രമാണിച്ച് ഡിസംബർ നാലിന് തിരുവനന്തപുരത്തുള്ള മധുവിന്‍റെ വസതിയിൽ വച്ച് നൽകും. പത്രസമ്മേളനത്തിൽ എം.വി. ഗോവിന്ദൻ, ഡോ. വി.പി.പി. മുസ്തഫ, ഇടയത്ത് രവി എന്നിവർ പങ്കെടുത്തു.