ചെങ്ങന്നൂര്‍: ബാങ്കില്‍പണയംവച്ച സ്വര്‍ണ ഉരുപ്പടികളുടെ അളവിലും തൂക്കത്തിലും കുറവുണ്ടെന്നു കണ്ടെത്തിയ ഇടപാടുകാര്‍ പരാതിയുമായി ബാങ്ക് ശാഖയിലെത്തിയത് സംഘര്‍ഷം സൃഷ്ടിച്ചു. തുടര്‍ന്ന് ബാങ്ക് അപ്രൈസറെ പോലീസ് അറസ്റ്റ് ചെയ്തതോടെ രംഗം ശാന്തമായി. ഇന്നലെ രാവിലെ കനറാ ബാങ്കിന്‍റെ മുളക്കുഴ ശാഖയിലാണ് സംഭവം.
വിവിധ രാഷ്‌ട്രീയ പ്രവര്‍ത്തകരുടെ നേതൃത്വത്തിലെത്തിയ ചെറുതും വലുതുമായ സംഘങ്ങളും ഇടപാടുകാര്‍ക്കു പിന്തുണ പ്രഖ്യാപിച്ച് ബാങ്കിനകത്തും പുറത്തും കുത്തിയിരുന്നു മുദ്രാവാക്യം വിളിച്ച് പ്രതിഷേധം കടുപ്പിച്ചു. തട്ടിപ്പു നടത്തിയവര്‍ക്കെതിരേ കര്‍ശന നടപടിയെടുക്കണമെന്ന ആവശ്യത്തില്‍ സമരക്കാരും ഉറച്ചുനിന്നു. ഇതേത്തുടര്‍ന്നു പോലീസ് നടത്തിയ പരിശോധനയില്‍ സ്വര്‍ണ ഉരുപ്പടികളില്‍ ബാങ്കില്‍വച്ചുതന്നെ കൃത്രിമം നടത്തിയതാണെന്ന് ബോധ്യപ്പെട്ടതോടെ അപ്രൈസര്‍ ചെങ്ങന്നൂര്‍ കീഴ്ചേരിമേല്‍ കാര്‍ത്തിക നിവാസില്‍ എ. മധു കുമാറി(52)നെ പോലീസ് അറസ്റ്റ് ചെയ്തു.