എസ്എസ്എൽസി, ഹയർ സെക്കൻഡറി മൂല്യനിർണയം ആരംഭിച്ചു; ഫലം മേയിൽ
Friday, April 4, 2025 2:26 AM IST
തിരുവനന്തപുരം: എസ്എസ്എൽസി, ഹയർ സെക്കൻഡറി ഉത്തരക്കടലാസുകളുടെ മൂല്യനിർണയം ആരംഭിച്ചു. എസ്എസ്എൽസി, ടിഎച്ച്എസ്എൽസി, എച്ച്എസ്എൽസി പരീക്ഷകളുടെ ഉത്തരക്കടലാസ് മൂല്യനിർണയം രണ്ടു ഘട്ടങ്ങളിലായി 72 കേന്ദ്രീകൃതമൂല്യനിർണയ ക്യാമ്പുകളിൽ ഈ മാസം 26വരെ നടക്കും.
ഇന്നലെ ആരംഭിച്ച ഒന്നാംഘട്ട മൂല്യനിർണയം 11ന് അവസാനിക്കും. രണ്ടാംഘട്ടം ഈമാസം 21ന് ആരംഭിച്ച് 26ന് പൂർത്തിയാക്കും. മൂല്യനിർണയ ക്യാമ്പുകളിൽ 952 അഡീഷണൽ ചീഫ് എക്സാമിനർമാരെയും 8975 എക്സാമിനർമാരെയും നിയോഗിച്ചിട്ടുണ്ട്.
മൂല്യനിർണയത്തിനുശേഷം ഓണ്ലൈൻ ആയി മാർക്ക് എൻട്രി നടത്തുന്നതിന് 144 ഐടി മാനേജർമാരും 288 ഡേറ്റാ എൻട്രി അധ്യാപകരും ഉൾപ്പെടെ ആകെ 720 പേരുടെ സേവനം മൂല്യനിർണയ ക്യാമ്പുകളിൽ ലഭ്യമാക്കിയിട്ടുണ്ട്.
ഹയർ സെക്കൻഡറി ഉത്തരക്കടലാസ് മൂല്യനിർണയത്തിനായി 89 ക്യാമ്പുകൾ സജീകരിച്ചിട്ടുണ്ട്.