കെഎസ്ആർടിസിയിൽ ഹിതപരിശോധന 30ന്
Friday, April 4, 2025 2:26 AM IST
ചാത്തന്നൂർ: കെഎസ്ആർടിസിയിൽ അംഗീകൃത യൂണിയനുകളെ തെരഞ്ഞെടുക്കുന്നതിനുള്ള ഹിതപരിശോധന 30ന് നടത്തും. തെരഞ്ഞെടുപ്പിനുള്ള വിജ്ഞാപനം ബുധനാഴ്ച വൈകുന്നേരം പ്രസിദ്ധീകരിച്ചു.
വരണാധികാരിയായ അഡീഷണൽ ലേബർ കമ്മീഷണർ (ഐആർ) കെ.എം. സുനിൽ ബുധനാഴ്ച വിളിച്ചുചേർത്ത മാനേജ്മെന്റിന്റെയും യൂണിയൻ പ്രതിനിധികളുടെയും യോഗത്തിന്റെ തീരുമാനപ്രകാരമാണ് ഹിതപരിശോധനയുടെ ഷെഡ്യൂൾ തയാറാക്കിയത്.
കരട് വോട്ടർ പട്ടിക ഇന്ന് പ്രസിദ്ധീകരിക്കും. ഇതിന്മേലുള്ള ആക്ഷേപങ്ങൾ 11 വരെ സ്വീകരിക്കും. ഉച്ചകഴിഞ്ഞ് രണ്ടിന് ഹിയറിംഗ് നടത്തും. 12ന് അന്തിമ വോട്ടർ പട്ടിക പ്രസിദ്ധീകരിക്കും.
നാമനിർദേശപത്രികകൾ 15ന് രാവിലെ 10 മുതൽ മൂന്നുവരെ സമർപ്പിക്കാം. വൈകുന്നേരം നാലിന് സൂക്ഷ്മപരിശോധന നടത്തും. 16ന് രാവിലെ 10 മുതൽ ഒന്നു വരെ നാമനിർദേശ പത്രികകൾ പിൻവലിക്കാം.
വോട്ടെടുപ്പ് 30ന് രാവിലെ എട്ടു മുതൽ അഞ്ചുവരെ. വോട്ടെണ്ണൽ മേയ് മൂന്നിന് രാവിലെ ഒന്പതു മുതൽ. പോളിംഗ് സ്റ്റേഷനുകൾ കെഎസ്ആർടി സി യൂണിറ്റ് ഓഫീസുകളായിരിക്കും. വോട്ടെണ്ണൽ തിരുവനന്തപുരം ലേബർ കമ്മീഷണറുടെ കാര്യാലയത്തിൽ നടക്കും.