കത്തോലിക്ക കോണ്‍ഗ്രസ് സമുദായത്തിന്‍റെ രാഷ്‌ട്രീയ-സാമൂഹിക വക്താക്കള്‍: മാര്‍ റാഫേല്‍ തട്ടില്‍ : Deepika.com Kerala News |

കൊച്ചി: സമകാലിക സാഹചര്യത്തില്‍ കത്തോലിക്ക സമുദായത്തിന്‍റെ രാഷ്‌ട്രീയ സാമൂഹിക വക്താക്കള്‍ കത്തോലിക്ക കോണ്‍ഗ്രസാണെന്ന് സീറോ മലബാര്‍ സഭയുടെ മേജര്‍ ആര്‍ച്ച് ബിഷപ് മാര്‍ റാഫേല്‍ തട്ടില്‍.

കത്തോലിക്ക കോണ്‍ഗ്രസ് ഗ്ലോബല്‍ സമതിയുടെ 2024-27 വര്‍ഷത്തെ ഭാരവാഹികളുടെ സ്ഥാനാരോഹണ ചടങ്ങ് കാക്കനാടുള്ള സീറോ മലബാര്‍ സഭാ ആസ്ഥാനമായ മൗണ്ട് സെന്‍റ് തോമസില്‍ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. ആഗോള തലത്തില്‍ സംഘടന നടത്തിയ മുന്നേറ്റത്തിന് ഊര്‍ജം കൂട്ടാന്‍ പുതിയ സമിതിക്കു കഴിയണമെന്ന് അദ്ദേഹം ആഹ്വാനം ചെയ്തു.

സംഘടന കരുതലും സ്‌നേഹവും പകര്‍ന്നു നല്‍കിയപ്പോള്‍ ലോകമെങ്ങുമുള്ള സമുദായ നേതാക്കള്‍ കത്തോലിക്ക കോണ്‍ഗ്രസിന്‍റെ കൂടെ അണിനിരന്നു എന്ന് അധ്യക്ഷപ്രസംഗം നടത്തിയ അഡ്വ. ബിജു പറയന്നിലം പറഞ്ഞു.

കത്തോലിക്ക കോണ്‍ഗ്രസ് ബിഷപ് ലെഗേറ്റ് മാര്‍ റെമിജിയൂസ് ഇഞ്ചനാനിയില്‍ മുഖ്യ സന്ദേശം നല്‍കി. വിദേശ കുടിയേറ്റം വര്‍ധിച്ചുവരുന്ന സാഹചര്യത്തില്‍ പ്രവാസി സമൂഹത്തിന്‍റെ ഇടയില്‍ കത്തോലിക്ക കോണ്‍ഗ്രസ് പ്രവര്‍ത്തനം സംഘടിത രീതിയില്‍ ക്രമീകരിക്കണം എന്ന് അദ്ദേഹം പറഞ്ഞു.

സീറോ മലബാര്‍ സഭ കൂരിയ ബിഷപ് മാര്‍ സെബാസ്റ്റ്യന്‍ വാണിയപ്പുരയ്ക്കല്‍, രാഷ്‌ട്രദീപിക മാനേജിംഗ് ഡയറക്ടര്‍ ഫാ. ബെന്നി മുണ്ടനാട്ട്, സീറോ മലബാര്‍ മാതൃവേദി ജനറല്‍ സെക്രട്ടറി ആന്‍സി മാത്യു, എസ്എംവൈ എം ഗ്ലോബല്‍ പ്രസിഡന്‍റ് അഡ്വ. സാം സണ്ണി എന്നിവര്‍ യോഗത്തില്‍ ആശംസ അര്‍പ്പിച്ചു.

ഗ്ലോബല്‍ പ്രസിഡന്‍റായി രാജീവ് കൊച്ചുപറമ്പില്‍, ജനറല്‍ സെക്രട്ടറിയായി പ്രഫ . ജോസുകുട്ടി ഒഴുകയില്‍, ട്രഷററായി അഡ്വ. ടോണി പുഞ്ചക്കുന്നേല്‍ എന്നിവരും 55 അംഗ ഭാരവാഹി സമതിയും 150 അംഗ ഗ്ലോബല്‍ പ്രവര്‍ത്തക സമിതിയും സത്യപ്രതിജ്ഞ ചെയ്ത് അധികാരമേറ്റെടുത്തു.

വി.വി.അഗസ്റ്റിന്‍, ജേക്കബ് മുണ്ടയ്ക്കല്‍, ഡോ.ജോബി കാക്കശേരി, പ്രഫ. കെ.എം. ഫ്രാന്‍സീസ്, രാജേഷ് ജോണ്‍, ബെന്നി ആന്‍റണി, ട്രീസാ ലിസ് സെബാസ്റ്റ്യന്‍, ഡേവീസ് ഇടക്കളത്തൂര്‍, ബെന്നി മാത്യു എന്നിവര്‍ പ്രസംഗിച്ചു.