ജോലിക്കിടെ റീൽസ് ചിത്രീകരണം ;തിരുവല്ല നഗരസഭാ ജീവനക്കാർ വൈറൽ : Deepika.com Kerala News |

Click here for detailed news of all items

ജോലിക്കിടെ റീൽസ് ചിത്രീകരണം ;തിരുവല്ല നഗരസഭാ ജീവനക്കാർ വൈറൽ

Thursday, July 4, 2024 12:59 AM IST

തിരുവല്ല: ജോലിയിലെ ടെൻഷനിടെ സന്തോഷിക്കുന്നതിൽ എന്താണു തെറ്റ്. തിരുവല്ല നഗരസഭയിലെ ഒന്പത് ജീവനക്കാർ തങ്ങളുടെ സർഗാത്മകതയെ ഒന്നു പൊലിപ്പിക്കാൻ ശ്രമിച്ചത് സമൂഹമാധ്യമങ്ങൾ ഏറ്റെടുത്ത് ചർച്ചയാക്കിയപ്പോൾ അനുകൂലിച്ചും പ്രതികൂലിച്ചും കമന്‍റുകൾ വന്നുകൊണ്ടേയിരുന്നു.

അവധിദിനത്തിൽ ഓഫീസിനുള്ളിൽനിന്നുതന്നെ ഒരു റീൽസ് തട്ടിവിട്ടത് പുലിവാലാകുമെന്നും നടപടി ഉണ്ടാകുമെന്നും ജീവനക്കാരും പ്രതീക്ഷിച്ചിരിക്കുന്പോഴാണ് തദ്ദേശമന്ത്രി തന്നെ ഇവരുടെ രക്ഷയ്ക്കെത്തിയത്.

സർഗാത്മക പ്രവർത്തനമായി ഇതിനെ കണ്ടാൽമതിയെന്നാണ് മന്ത്രി എം.ബി. രാജേഷിന്‍റെ പ്രതികരണം. സമൂഹമാധ്യമങ്ങളിൽ ശ്രദ്ധിക്കുന്ന റീൽസ് തന്നെയാണ് ജീവനക്കാരുടേതായി പുറത്തുവന്നത്.

ജീവനക്കാരുടെ റീൽസ് വിവാദമായതിനു പിന്നാലെ നഗരസഭ സെക്രട്ടറി വിശദീകരണം തേടി. ഓഫീസിനുള്ളിൽ റീൽസ് പകർത്തിയത് അച്ചടക്ക ലംഘനമായതിനാൽ വിശദീകരണം നൽകാനാണ് നോട്ടീസിൽ ആവശ്യപ്പെട്ടിരുന്നത്.

മൂന്നു ദിവസത്തിനകം മറുപടി നൽകാനുള്ള നോട്ടീസാണ് നൽകിയത്. ഇന്നലെ ഇവർ വിശദീകരണം നൽകി. സെക്രട്ടറി അവധിയായിരുന്നിനാൽ സീനിയർ സൂപ്രണ്ടിനാണ് ഒന്പതു പേരും മറുപടി നൽകിയത്.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.