മുതലമട: ചുള്ളിയാർമേട് ഗായത്രിപുഴയ്ക്കു കുറുകെയുള്ള പള്ളം- ചുള്ളിയാർ പുഴപ്പാലം പുനർനിർമിക്കണമെന്നാവശ്യപ്പെട്ടു നാട്ടുകാർ മുതലമട ഗ്രാമപഞ്ചായത്ത് കാര്യാലയത്തിനു മുന്നിൽ പ്രതിഷേധിച്ചു.
നിർമാണത്തിൽ പഞ്ചായത്ത് ഉറപ്പുനൽകുന്നതുവരെ സമരം തുടരുമെന്നുപറഞ്ഞ് കുത്തിയിരിപ്പുസമരവും നടത്തി.
കഴിഞ്ഞദിവസം വിദ്യാർഥികൾ അപകടകരമായി പുഴയിലെ ശക്തമായ ഒഴുക്കും കടന്നു സ്കൂളിലെത്തുന്ന വാർത്തകൾ ജനകീയ പ്രതിഷേധത്തിനു കാരണമായിരുന്നു. രാഷ്ട്രീയകക്ഷി നേതൃത്വങ്ങൾ അടുത്ത പഞ്ചായത്തു തെരഞ്ഞെടുപ്പുവരെ രാഷ്ട്രീയലക്ഷ്യം മുന്നിൽകണ്ട് പാലംപുനർനിർമാണം അട്ടിമറിക്കുകയാണെന്നും സമരക്കാർ ആരോപിച്ചു. 2018ലെ പ്രളയത്തിൽ പാലംതകർന്നതു പുനർനിർമിക്കാൻ ജനപ്രതിനിധികൾക്കും താത്പര്യമില്ലെന്നും സമരക്കാർ കുറ്റപ്പെടുത്തി.