നി​ർ​മാ​ണം പൂ​ർ​ത്തി​യാ​യി​ട്ട് വ​ർ​ഷ​ങ്ങ​ൾ; ഇനിയും തുറക്കാതെ ചു​രു​ളി​യി​ലെ പൊ​തുശൗ​ചാ​ല​യം
Sunday, August 25, 2024 4:22 AM IST
ചെ​റു​തോ​ണി: അ​ടി​മാ​ലി -കു​മ​ളി ദേ​ശീ​യ​പാ​ത​യോ​ര​ത്ത് ചേ​ല​ച്ചു​വ​ടി​നും ചു​രു​ളി​ക്കു​മി​ട​യി​ൽ ജി​ല്ലാ പ​ഞ്ചാ​യ​ത്ത് 14 ല​ക്ഷം രൂ​പ മു​ട​ക്കി നി​ർ​മി​ച്ച പൊ​തു ശൗ​ചാ​ല​യ​വും വി​ശ്ര​മ കേ​ന്ദ്ര​വും പൊ​തു​ജ​ന​ങ്ങ​ൾ​ക്ക് തു​റ​ന്നു​കൊ​ടു​ക്കാ​തെ കാ​ടു​ക​യ​റി ന​ശി​ക്കു​ന്നു.

2017 -18 സാ​മ്പ​ത്തി​ക വ​ർ​ഷ​ത്തി​ൽ ജി​ല്ലാ പ​ഞ്ചാ​യ​ത്ത് ശു​ചി​ത്വ മി​ഷ​ൻ ഫ​ണ്ടു​പ​യോ​ഗി​ച്ച് നി​ർ​മി​ച്ച പൊ​തു ശൗ​ചാ​ല​യ​മാ​ണ് നാ​ല് വ​ർ​ഷം പി​ന്നി​ടു​മ്പോ​ഴും ഉ​ദ്ഘാ​ട​നം​പോ​ലും ചെ​യ്യാ​തെ ന​ശി​ക്കു​ന്ന​ത്.

ക​ഞ്ഞി​ക്കു​ഴി പ​ഞ്ചാ​യ​ത്തി​ലെ പ്ര​ധാ​ന പ്ര​ള​യ​ബാ​ധി​ത മേ​ഖ​ല​യാ​യ ചു​രു​ളി​യി​ൽ മ​ണ്ണി​ടി​ച്ചി​ൽ സാ​ധ്യ​ത​യു​ള്ള ഭാ​ഗ​ത്ത് നി​ർ​മി​ച്ചി​രി​ക്കു​ന്ന ഈ ​കെ​ട്ടി​ടം അ​ഴി​മ​തി​യു​ടെ സ്മാ​ര​ക​മാ​ണെ​ന്ന ആ​രോ​പ​ണം വ്യാ​പ​ക​മാ​ണ്.

നി​ർ​മാ​ണം പൂ​ർ​ത്തി​യാ​ക്കി​യ കെ​ട്ടി​ടം പൊ​തു​ജ​ന​ങ്ങ​ൾ​ക്ക് തു​റ​ന്നു കൊ​ടു​ക്കാ​ത്ത​തി​ൽ വ​ർ​ഷ​ങ്ങ​ൾ​ക്കു​മു​മ്പേ പ​രാ​തി​യു​യ​ർ​ന്നി​രു​ന്നു. ശൗ​ചാ​ല​യ​ത്തി​ലേക്ക് ​വെ​ള്ളം ല​ഭ്യ​മ​ല്ലാ​തി​രു​ന്ന​തി​നാ​ലാ​യി​രു​ന്നു കെ​ട്ടി​ടം തു​റ​ന്നു കൊ​ടു​ക്കാ​തി​രു​ന്ന​ത്. പി​ന്നീ​ട് ഇ​വി​ടെ ഒ​രു കു​ഴ​ൽ​ക്കി​ണ​ർ നി​ർ​മി​ച്ച് വെ​ള്ള​ത്തി​ന്‍റെ ല​ഭ്യ​ത ഉ​റ​പ്പു വ​രു​ത്തി. എ​ന്നാ​ൽ കു​ഴ​ൽ​ക്കി​ണ​റി​ൽ​നി​ന്നും മീ​റ്റ​റു​ക​ൾ ഉ​യ​ര​ത്തി​ലേ​ക്ക് വെ​ള്ളം ശ​ക്ത​മാ​യി പു​റ​ത്തേ​ക്ക് പ്ര​വ​ഹി​ച്ച​ത് ശൗ​ചാ​ല​ത്തി​ന്‍റെ പ്ര​വ​ർ​ത്ത​ന​ത്തി​ന് ത​ട​സ​മാ​യി.


കു​ഴ​ൽ​ക്കി​ണ​റി​ലെ വെ​ള്ള​ത്തി​ന്‍റെ ഒ​ഴു​ക്ക് നി​യ​ന്ത്രി​ക്കാ​ൻ ജ​ല​വി​ഭ​വ വ​കു​പ്പ് മ​ന്ത്രി 68,000 രൂ​പ അ​നു​വ​ദി​ച്ചു. പ​ക്ഷേ, ജ​ല​ത്തി​ന്‍റെ ഒ​ഴു​ക്ക് ത​ട​യാ​നാ​യി​ല്ല. അ​ങ്ങ​നെ ടൗ​ണി​ൽ​നി​ന്നും വ​ള​രെ അ​ക​ലെ ജ​ന​ങ്ങ​ൾ​ക്ക് കാ​ര്യ​മാ​യ പ്ര​യോ​ജ​ന​മി​ല്ലാ​ത്ത പൊ​തു ശൗ​ചാ​ല​യ​വും വി​ശ്ര​മ കേ​ന്ദ്ര​വും ദൂ​ർ​ത്തി​നും അ​ഴി​മ​തി​ക്കും​വേ​ണ്ടി മാ​ത്രം നി​ർ​മി​ച്ച​താ​ണെ​ന്ന നാ​ട്ടു​കാ​രു​ടെ ആ​ക്ഷേ​പം ശ​ക്ത​മാ​യി.

അ​പ​ക​ടം​നി​റ​ഞ്ഞ വ​ള​വി​ൽ വാ​ഹ​ന​ങ്ങ​ൾ​ക്ക് പാ​ർ​ക്ക് ചെ​യ്യാ​ൻ​പോ​ലും സൗ​ക​ര്യ​മി​ല്ലാ​ത്ത സ്ഥ​ല​ത്താ​ണ് കെ​ട്ടി​ടം നി​ർ​മി​ച്ചി​രി​ക്കു​ന്ന​തെ​ന്ന​തും നാ​ട്ടു​കാ​രു​ടെ ആ​ക്ഷേ​പ​ത്തി​ന് കാ​ര​ണ​മാ​യി​ട്ടു​ണ്ട്. നി​ർ​മാ​ണം പൂ​ർ​ത്തീ​ക​രി​ച്ച കെ​ട്ടി​ടം പൊ​തു​ജ​ന​ത്തി​ന് തു​റ​ന്നു കൊ​ടു​ക്കാ​ൻ ഇ​നി​യും വൈ​കി​യാ​ൽ ഇ​വി​ടെ സ​മ​ര പ​രി​പാ​ടി​ക​ൾ ആ​രം​ഭി​ക്കു​മെ​ന്ന് പ്ര​ദേ​ശ​വാ​സി​ക​ൾ മു​ന്ന​റി​യി​പ്പു ന​ൽ​കി.