മുട്ടം: നിയന്ത്രണം വിട്ട ടിപ്പർ ലോറി കൈത്തോട്ടിലേക്ക് മറിഞ്ഞു. മുട്ടം ഇടപ്പള്ളി ലയണ്സ് ക്ലബിന് സമീപം ഇന്നലെ വൈകുന്നേരം അഞ്ചോടെയാണ് അപകടം. എതിർ ദിശയിൽ വന്ന മറ്റൊരു വാഹനത്തിന് സൈഡ് കൊടുക്കുന്നതിനിടെ റോഡരികിലുള്ള കുഴിയിലേക്കു വാഹനം മറിയുകയായിരുന്നു.
ലോറി പൂർണമായും തോട്ടിലേക്ക് മറിയുമെന്ന സ്ഥിതി വന്നതോടെ ലോറിയിലെ പാറപ്പൊടി തോട്ടിലേക്കുതന്നെ നിക്ഷേപിച്ചു. പിന്നീട് ജെസിബി ഉപയോഗിച്ച് ലോറി കരയ്ക്കുകയറ്റി. അപകടത്തിൽ ആർക്കും പരിക്കില്ല. ഇവിടെ ഒരു കിലോമീറ്ററോളം ദൂരത്തിൽ റോഡരികിൽ ചെറുതും വലുതുമായ കുഴികൾ ഉണ്ടെന്നും ഇവ നികത്താനുള്ള നടപടി സ്വീകരിക്കണമെന്നും പ്രദേശവാസികൾ ആവശ്യപ്പെട്ടു.