രാജാക്കാട്: പൂപ്പാറയിൽ വീട് കത്തി നശിച്ചു. പൂപ്പാറ തെയിലചെരുവ്‌ പുഞ്ചക്കരയിൽ ഷിജുവിന്‍റെ വീടാണ് നശിച്ചത്.
ഇന്നലെ ഉച്ചയ്ക്ക് ഒന്നിനാണ് വീടിനു തീ പിടിച്ചത്. ഷിജുവും കുടുംബവും ജോലിക്ക് പോയിരുന്നതിനാൽ തീ പടർന്നത് അറിയാൻ വൈകി. വീട്ടിൽനിന്നു പുക ഉയരുന്നത് ശ്രദ്ധയിൽപ്പെട്ട സമീപ വാസികളുടെ സമയോചിതമായ ഇടപെടൽ മൂലം വലിയ ദുരന്തം ഒഴിവായി. പ്രദേശവാസികൾ ഗ്യാസ് സിലണ്ടർ, ഇലട്രോണിക്‌സ് ഉപകരണങ്ങൾ എല്ലാം പുറത്ത് എത്തിച്ചത് അപകടത്തിന്‍റെ വ്യാപ്തി കുറച്ചു. ഓടു മേഞ്ഞ വീട് പൂർണമായും കത്തി നശിച്ചു. തീ പടരുവാനുണ്ടായ സാഹചര്യം വ്യക്‌തമല്ല ഷോർട്ട് സർക്ക്യുട്ട്‌ ആകാമെന്നാണ് പ്രാഥമിക നിഗമനം. വില്ലേജ്, പഞ്ചായത്ത് അധികൃതർ സ്ഥലം സന്ദർശിച്ചു മേൽനടപടികൾ സ്വീകരിച്ചു.