തൊടുപുഴ: വില്ലേജ് ഇന്‍റർനാഷണൽ സ്കൂളിന്‍റെ സ്ഥാപക ദിനത്തോടനുബന്ധിച്ചു നടുക്കണ്ടം ഐഎംഎ ഹാളിൽ നടത്തിയ സംഗീതസദസ് വേറിട്ടഅനുഭവമായി. ചടങ്ങിൽ സോണി ടിവി സൂപ്പർസ്റ്റാർ അവിർഭവ് വേദിയിലെത്തിയതോടെ സദസ് ആവേശഭരിതമായി. തുടർന്ന് നടന്ന ആഭിമുഖത്തിൽ വിദ്യാർഥികളുടെയും അധ്യാപകരുടെയും ചോദ്യത്തിന് കൃത്യമായ ഉത്തരം നൽകിയും മനോഹര ഗാനങ്ങൾ ആലപിച്ചും ചടങ്ങിന്‍റെ ഉദ്ഘാടകനായി എത്തിയ അവിർഭവ് കാണികളുടെ കൈയടി നേടി. യോഗത്തിൽ പി.ജെ.ജോസഫ് എംഎൽഎ അവിർഭവിന് ഉപഹാരം നൽകി ആദരിച്ചു.
സ്റ്റോറി ടെല്ലിംഗ് മാതൃകയിൽ നാടോടി കഥകളുടെ സങ്കരത്തിൽ തീർത്ത മ്യൂസിക്കൽ കോണ്സർട് അവതരിപ്പിച്ച് വില്ലേജ് ഇന്‍റർനാഷണൽ സ്കൂളിലെ കുട്ടികളും ശ്രദ്ധനേടി. 78 വിദ്യാർഥികൾ സംഗീതസദസിൽ അണിനിരന്നു. പാഠ്യ വിഷയങ്ങളിലെന്ന പോലെ കുട്ടികളുടെ സർഗാത്മക കഴിവുകൾ വളർത്തിയെടുക്കുന്നതിനായി കഴിഞ്ഞ 19 വർഷമായി വ്യത്യസ്തവും പുതുമയുള്ളതുമായ പരിപാടികളാണ് സ്കൂളിൽ സംഘടിപ്പിച്ചുവരുന്നത്. സ്കൂൾ മാനേജർ ആർ.കെ.ദാസ് മലയാറ്റിൽ, പ്രിൻസിപ്പൽ സക്കറിയാസ് ജേക്കബ്, വൈസ് പ്രിൻസിപ്പൽ എം.അനിൽകുമാർ തുടങ്ങിയവർ പ്രസംഗിച്ചു.