ചെറുവത്തൂർ: അന്ധതയുടെ ഇരുട്ടിലും മനസിൽ മൊട്ടിട്ട നക്ഷത്രത്തിളക്കമുള്ള സ്വപ്നങ്ങൾ ആത്മവിശ്വാസത്തിന്‍റെ ഉൾക്കരുത്തിൽ കൈപ്പിടിയിലൊതുക്കിയ തമ്പാൻ എന്ന അധ്യാപകന്‍റെ വാക്കുകൾ കുട്ടികൾക്ക് വിസ്മയമായി. 50,000 പേരെ ഓൺലൈനിലൂടെയും അല്ലാതെയും പഠിപ്പിച്ച അനുഭവങ്ങൾ തന്പാൻ മാഷ് വിദ്യാർഥികളുമായി പങ്കുവച്ചു.
വൈറ്റ് കെയ്ൻ ഡേയുടെ ഭാഗമായി പടന്ന ജിയുപി സ്കൂളിൽ സംഘടിപ്പിച്ച അകക്കണ്ണ് പരിപാടി കാടങ്കോട് സ്വദേശിയായ കാഴ്ച പരിമിതിയുള്ള റിട്ട. അധ്യാപകൻ വി. തമ്പാൻ ഉദ്ഘാടനം ചെയ്തു. മുഖ്യാധ്യാപകൻ എ. ലുക്മാൻ അധ്യക്ഷത വഹിച്ചു. ടി.വി. അനിൽകുമാർ, പി. വേണുഗോപാലൻ, കെ. പ്രമോദ്കുമാർ, എൻ. സന്തോഷ്, പി.പി. ബിന്ദു, ചെറുവത്തൂർ ബിആർസിയിലെ സ്പെഷൽ എഡ്യുക്കേറ്റർ ബി. റോഷ്നി എന്നിവർ പ്രസംഗിച്ചു.