തൃശൂർ: 2.50 കോടി രൂപയുടെ പ്രാഥമികചെലവിൽ മനക്കൊടി- പുള്ള്- പള്ളിപ്പുറം കോള് ടൂറിസം പദ്ധതിക്കു വഴിയൊരുങ്ങുന്നു. ഫാം ടൂറിസം, പക്ഷിനിരീക്ഷണം, സായാഹ്നസവാരി, ജലയാത്ര, സെല്ഫി പോയിന്റുകള്, കലാകേന്ദ്രം, വിശ്രമം, സൈക്കിള്സവാരി, കഫ്റ്റീരിയ, ടേക്ക് എ ബ്രേക്ക്, വാട്ടര് കിയോസ്ക് സൗകര്യങ്ങള് ഏര്പ്പെടുത്തിയാണു പദ്ധതി നടപ്പാക്കുക. സൗന്ദര്യവത്കരണം, പാര്ക്കിംഗ്, ഇരിപ്പിടങ്ങള്, നടപ്പാതകള് എന്നിവയും ഒരുക്കും.
ചാഴൂര്, അരിമ്പൂര്, പാറളം, പഞ്ചായത്ത് പ്രദേശങ്ങള് പദ്ധതിയില് ഉള്പ്പെടും. സി.സി. മുകുന്ദന് എംഎല്എ രണ്ടു കോടി രൂപയും ചാഴൂര് ഗ്രാമപഞ്ചായത്ത് 50 ലക്ഷം രൂപയും പദ്ധതിക്കായി വകയിരുത്തി. വിവിധ വകുപ്പുകളിലെ വിദഗ്ധരെയും ജനപ്രതിനിധികളെയും ഉള്പ്പെടുത്തി പഠനം നടത്തി പദ്ധതിക്കു രൂപരേഖ തയാറാക്കുമെന്നു ആലോചനായോഗത്തിൽ ജില്ലാ പഞ്ചായത്ത് പ്രസിഡന്റ് വി.എസ്. പ്രിൻസ് പറഞ്ഞു.
ഹരിതകേരളം മിഷന് ജില്ല കോ ഓര്ഡിനേറ്റര് സി. ദിദിക പദ്ധതി വിശദീകരിച്ചു. ചാഴൂര്, പാറളം, ഗ്രാമപഞ്ചായത്ത് പ്രസിഡന്റുമാരായ കെ.എസ്. മോഹന്ദാസ്, മിനി വിനയന്, അരിമ്പൂര് ഗ്രാമപഞ്ചായത്ത് വൈസ് പ്രസിഡന്റ് സജീഷ്, കെഎല്ഡിസി, ടൂറിസം വകുപ്പ്, ശുചിത്വമിഷന്, മഹാത്മാഗാന്ധി ദേശീയ ഗ്രാമീണ തൊഴിലുറപ്പുപദ്ധതി, കൃഷി, മൈനര് ഇറിഗേഷന്, പൊതുമരാമത്തുവകുപ്പ് വകുപ്പുകളിലെ ജില്ലാതല ഉദ്യോഗസ്ഥര് ചര്ച്ചയില് പങ്കെടുത്തു.