ചേർപ്പ്: ഗവ. വൊക്കേഷണൽ ഹയർ സെക്കൻഡറി സ്കൂളിൽ പ്രീപെെ്രമറി രംഗത്ത് അന്താരാഷ്ട്ര നിലവാരമുള്ള പഠനസൗകര്യമൊരുക്കുന്നതിനായി പൊതുവിദ്യാഭ്യാസ വകുപ്പ് സമഗ്ര ശിക്ഷാ കേരളം സ്റ്റാർസ് പദ്ധതിയിൽ ഉൾപ്പെടുത്തിയ വർണക്കൂടാരം ഇന്നു തുറക്കും.
മാതൃകാ പ്രീപ്രൈമറി ശാസ്ത്രീയ സ്കൂൾ കേരളത്തിൽ നടപ്പിലാക്കുകയാണു ലക്ഷ്യം. ഘട്ടംഘട്ടമായി കേരളത്തിലെ മുഴുവൻ പ്രീപ്രൈമറി സ്കൂളുകളിലും ഈ പദ്ധതി നടപ്പിലാക്കും.
കുട്ടികൾക്ക് സന്തോഷത്തോടെയും അവരുടെ അഭിരുചിക്കുമനുസരിച്ച് കളികളിൽ ഏർപ്പെടാൻ കഴിയുന്ന വിധത്തിലാണ് വർണക്കൂടാരം ഒരുക്കിയിരിക്കുന്നത്.
വിശാലവും ശിശുസൗഹൃദമായ പതിമൂന്ന് പ്രവർത്തന ഇടങ്ങളാണ് ഇവിടെയുള്ളത്. കുഞ്ഞുങ്ങളുടെ ഭാഷാശേഷി വളർത്താൻ സഹായിക്കുന്ന "ഭാഷാവികസനയിടം', ലഘു ശാസ്ത്ര പരീക്ഷണങ്ങൾക്കും നിരീക്ഷണത്തിനും അവസരം നൽകുന്ന "ശാസ്ത്രീയഇടം', കണക്കിന്‍റെ കളികളുടെ ആദ്യപാഠങ്ങൾ നുണയുന്ന "ഗണിതയിടം', വരയിടം, ആട്ടവും പാട്ടും, ശാസ്ത്രനുഭവയിടം, ഹരിതോദ്യാനം, പഞ്ചേന്ദ്രിയാനുഭവയിടം, നിർമാണയിടം, കരകൗശലയിടം, ഈ ഇടം, അകംകളിയിടം, പുറംകളിയിടം എന്നിങ്ങനെ കുട്ടികളിലെ സർവോന്മുഖമായ വികസനത്തിന് ഉതകുന്ന 13 ഇടങ്ങളാണ് ഇവെടെയുള്ളത്.
കളിച്ചും, ചിരിച്ചും, രസിച്ചും, അനുഭവങ്ങളിലൂടെ പ്രി പ്രൈമറി വിദ്യാർഥികൾക്ക് പഠിക്കാൻ പൊതുവിദ്യാലയങ്ങൾ സൗജന്യമായി സൗകര്യം ഒരുക്കിയിരിക്കുകയാണ് ജിവിഎച്ച്എസ്എസ് ചേർപ്പ് ഗ്രാമോദ്ധാരണം സ്കൂളിൽ.
വർണക്കൂടാരം ഇന്നു രാവിലെ 10ന് സി.സി. മുകുന്ദൻ എം എൽഎ ഉദ്ഘാടനം ചെയ്യും.