ലൈംഗിക പീഡന ആരോപണം ഉയർന്ന് മണിക്കൂറുകൾക്കുള്ളിൽ നടൻ സിദ്ദിഖ് താരസംഘടനയായ അമ്മയുടെ ജനറൽ സെക്രട്ടറിസ്ഥാനം രാജിവച്ചതിനു പിന്നാലെയുണ്ടായ സമ്മർദത്തെത്തുടർന്നാണ് രഞ്ജിത്തും രാജി സമർപ്പിച്ചതെന്നാണു വിവരം.
വഴിയൊരുങ്ങിയത് ഇങ്ങനെ ‘സുഖമായിരിക്കട്ടെ’എന്ന സിനിമയുടെ പ്രിവ്യൂ ഷോയ്ക്ക് പങ്കെടുത്ത തന്നെ തിരുവനന്തപുരത്തെ മസ്‌കറ്റ് ഹോട്ടലിലേക്ക് വിളിച്ചുവരുത്തി സിദ്ദിഖ് ലൈംഗികമായി ഉപദ്രവിച്ചു എന്നാണു നടിയുടെ വെളിപ്പെടുത്തല്‍. ചര്‍ച്ചയ്ക്ക് എന്നു പറഞ്ഞാണ് വിളിച്ചത്. ലൈംഗികമായി ഉപദ്രവിക്കാന്‍ ശ്രമിച്ചപ്പോള്‍ അവിടെനിന്നു രക്ഷപ്പെടുകയായിരുന്നു. 2019ല്‍തന്നെ ഇക്കാര്യം തുറന്നുപറഞ്ഞിരുന്നുവെന്നും നടി വിശദമാക്കിയിരുന്നു.
2009-10 കാലത്ത് രഞ്ജിത്ത് സംവിധാനം ചെയ്ത ‘പാലേരി മാണിക്യം’ സിനിമയിൽ അഭിനയിക്കാനെത്തിയപ്പോൾ സംവിധായകൻ മോശമായി പെരുമാറിയെന്നാണു ബംഗാളി നടിയായ ശ്രീലേഖ മിത്ര ആരോപിച്ചത്. ഒരു രാത്രി മുഴുവൻ ഹോട്ടലിൽ പേടിച്ചാണു കഴിഞ്ഞതെന്നും അവർ പറഞ്ഞിരുന്നു. എന്നാൽ, തന്‍റെ റോളിന് ഇവർ ചേരുമോയെന്ന് അറിയാൻ വിളിച്ചുവരുത്തിയശേഷം ശരിയാകില്ലെന്നു മനസിലാക്കിയപ്പോൾ വേണ്ടെന്നുവയ്ക്കുകയായിരുന്നുവെന്നാണ് രഞ്ജിത്ത് പറഞ്ഞത്.