പ്രസ്ഥാനത്തിന്‍റെ തിളക്കമാര്‍ന്ന മുഖം: ബിനോയ് വിശ്വം
Friday, September 13, 2024 2:27 AM IST
തിരുവനന്തപുരം: സീതാറാം യെച്ചൂരിയുടെ വേര്‍പാട് തീവ്രമായ നഷ്ടമാണെന്ന് സിപിഐ സംസ്ഥാന സെക്രട്ടറി ബിനോയ് വിശ്വം.
സിപിഎമ്മിന്‍റെ മാത്രം നഷ്ടമല്ല ഇത്. ഇന്ത്യയിലെ ഇടതുപക്ഷ-മതേതര ശക്തികള്‍ക്കാകെത്തന്നെ ഈ വിയോഗത്തിന്‍റെ ദുഃഖം അനുഭവപ്പെടുന്നുണ്ട്. സീതാറാം കമ്യൂണിസ്റ്റ് പ്രസ്ഥാനത്തിന്‍റെ വര്‍ത്തമാനകാലഘട്ടത്തിലെ ഏറ്റവും തിളക്കമാര്‍ന്ന മുഖമായിരുന്നു. ഇംഗ്ലീഷില്‍ വൈബ്രന്‍റ് എന്ന് പറയും. ഹീ വാസ് എ വൈബ്രന്‍റ് ലീഡര്‍. വിദ്യാര്‍ഥികാലം മുതല്‍ മരണം വരെയും അതുതന്നെയായിരുന്നു.
അദ്ദേഹവുമായി മഹാരാജാസ് കോളജിന്‍റെ മുറ്റത്തുവച്ച് ആരംഭിച്ച ബന്ധമാണ്. സീതാറാം അന്ന് എസ്എഫ്‌ഐയുടെ പ്രസിഡന്‍റായിരുന്നു. ഞാന്‍ എഐഎസ്എഫിന്‍റെ സംസ്ഥാന വൈസ് പ്രസിഡന്‍റും. സംഘര്‍ഷാത്മക സന്ദര്‍ഭമായാലും സങ്കുചിതമായ രാഷ്‌ട്രീയ വിഷയമാണെങ്കില്‍പോലും പ്രശ്‌നങ്ങള്‍ തുറന്നുപറയാനും കാഴ്ചപ്പാടുകള്‍ പങ്കുവയ്ക്കാനുമുള്ള ഇടം എന്നുമുണ്ടായിരുന്നു-ബിനോയ് വിശ്വം കൂട്ടിച്ചേർത്തു.