ഓണാഘോഷം അതിരുവിട്ടു; വിദ്യാർഥികൾക്ക് അരലക്ഷത്തോളം രൂപ പിഴ
Friday, September 13, 2024 2:27 AM IST
കോഴിക്കോട്: ഫറൂഖ് കോളജിൽ ഓണാഘോഷത്തിനിടെ വിദ്യാർഥികൾ നടത്തിയ സാഹസിക യാത്രയുമായി ബന്ധപ്പെട്ട് മോട്ടോർ വാഹന വകുപ്പ് നിയമനടപടി തുടങ്ങി. സാഹസികയാത്രയ്ക്ക് ഉപയോഗിച്ച അഞ്ചു വാഹനങ്ങൾക്കായി 47,500 രൂപ പിഴ ചുമത്തി അധികൃതർ വാഹന ഉടമകൾക്കു നോട്ടീസ് അയച്ചു. വിദ്യാർഥികൾക്കെതിരേ മറ്റു നിയമനടപടികളും ആരംഭിച്ചു.
കഴിഞ്ഞ ദിവസം വൈകുന്നേരമായിരുന്നു വിദ്യാർഥികളുടെ സാഹസിക യാത്ര. ആണ്‍കുട്ടികളും പെണ്‍കുട്ടികളുമടങ്ങുന്ന സംഘം വാഹനത്തിന്‍റെ ഡോറിലും മുകളിലും ഇരുന്നാണ് യാത്ര ചെയ്തത്.
നാലുകാറുകളിലും ഒരു ജീപ്പിലുമായാണ് വിദ്യാർഥികൾ നിയമവിരുദ്ധമായി യാത്ര നടത്തിയത്. വാഹനങ്ങൾ ഓടിച്ച വിദ്യാർഥികൾക്ക് ഡ്രൈവിംഗ് ലൈസൻസ് ഉണ്ടോ എന്ന കാര്യവും മോട്ടോർ വാഹനവകുപ്പ് പരിശോധിക്കുന്നുണ്ട്.
വിദ്യാർഥികളുടെ സാഹസിക യാത്ര റോഡിൽ ഗതാഗത തടസം സൃഷ്ടിച്ചിരുന്നു. നാട്ടുകാർ സാഹസിക യാത്രയുടെ വീഡിയോ ദൃശ്യങ്ങൾ ചിത്രീകരിച്ച് പുറത്തുവിട്ടതോടെയാണ് രാമനാട്ടുകര ജോയിന്റ് ആർടിഒ നിയമനടപടികൾ ആരംഭിച്ചത്.