നെന്മാറ: അയിലൂർ ചെട്ടികുളമ്പിൽ കാറ്റിൽ മരം വീടിനു മുകളിലേക്ക് മറിഞ്ഞുവീണു. ചെട്ടികുളമ്പ് കക്കാട്ടുകുടി ബേബിയുടെ വീടിന്റെ മുകളിലേക്കാണ് റബർ മരം വീണത്. മരംമറിഞ്ഞ് വീണതോടെ കഴുക്കോൽ, പട്ടിക, ഓട് ഉൾപ്പെടെ മേൽപ്പുര തകർന്നു. 6 ലക്ഷം രൂപയുടെ നഷ്ടം കണക്കാക്കുന്നു. വീട് തകർന്നതോടെ ഭിന്നശേഷിക്കാരനായ ബേബിക്ക് വാസയോഗ്യമായ വീട് ഇല്ലാതായി.
പ്രദേശവാസികളുടെ സഹായത്തോടെ താത്കാലികമായി പ്ലാസ്റ്റിക് ഷീറ്റ് വലിച്ചു കെട്ടിയാണ് കിടന്നുറങ്ങാനുള്ള സംവിധാനം ഒരുക്കിയത്. വീട് തകർന്നത് വില്ലേജ് അധികൃതരെ അറിയിച്ചതിനെ തുടർന്ന് തിരുവഴിയാട് വില്ലേജ് ഓഫീസറും സംഘവും സ്ഥലത്തെത്തി നാശനഷ്ടം വിലയിരുത്തി. സാമ്പത്തികശേഷിയില്ലാത്തതും ഭിന്നശേഷിക്കാരനുമായ ബേബിയുടെ വീട് പുനർനിർമാണത്തിന് സർക്കാർ സാമ്പത്തിക സഹായം നൽകണമെന്ന് വീട് സന്ദർശിച്ച എൻസിപി ജില്ലാ നിർവാഹക സമിതി അംഗം മുഹമ്മദ് ഇബ്രാഹിം ആവശ്യപ്പെട്ടു. പഞ്ചായത്ത്അംഗം എം. ദേവദാസനും വീട് സന്ദർശിച്ചു.