മണ്ണാർക്കാട്: പാലക്കാട്- കോഴിക്കോട് ദേശീയപാതയില് നിയന്ത്രണംവിട്ട കണ്ടെയ്നര് ലോറി വീടിന്റെ മതില് തകര്ത്ത് പാടത്തേക്കു മറിഞ്ഞു. നാട്ടുകല് പോലീസ് സ്റ്റേഷനുസമീപം ബുധനാഴ്ച പുലർച്ചെ രണ്ടിനാണു സംഭവം. അപകടത്തിൽ ആർക്കും പരിക്കില്ല. പാലക്കാട് ഭാഗത്തുനിന്നും കോഴിക്കോട്ടേക്കു കാറുകള് കയറ്റിപോവുകയായിരുന്ന കണ്ടെയ്നര് ലോറിയാണ് അപകടത്തില്പ്പെട്ടത്.
വളവുള്ള റോഡില്നിന്നും ലോറി മതില് തകര്ത്തശേഷം പാടത്തേക്കു നിരങ്ങിയിറങ്ങുകയായിരുന്നു. ലോറിയുടെ മുക്കാല്ഭാഗവും പാടത്തേക്കിറങ്ങിയിരുന്നു. വിവരമറിഞ്ഞു നാട്ടുകല് പോലീസ് സ്ഥലത്തെത്തി ക്രെയിനിന്റെ സഹായത്തോടെ ലോറി റോഡിലേക്കുവലിച്ചുനീക്കി. ലോറിക്കു കാര്യമായ കേടുപാടുകള് സംഭവിക്കാത്തതിനാല് യാത്ര തുടരാന് നിര്ദേശം നല്കി. ദേശീയപാതയില് ചെറിയതോതില് ഗതാഗത തടസവും നേരിട്ടു.