ADVERTISEMENT

ADVERTISEMENT

കുമരകം വടക്കുംകര പള്ളി തിരുനാൾ ഇന്നു മുതൽ

കുമരകം: വടക്കുംകര പള്ളിയിൽ ഇടവക മധ്യസ്ഥനായ വിശുദ്ധ ജോൺ നെപുംസ്യാനോസിന്‍റെ തിരുനാൾ ഇന്നു മുതൽ 16 വരെ നടക്കും. ഇന്ന് വൈകുന്നേരം 4.30ന് ഇടവക വികാരി ഫാ. തോമസ് പുത്തൻപുരയ്ക്കൽ കൊടിയേറ്റുന്നതോടുകൂടി തിരുനാൾ ആഘോഷങ്ങൾക്ക് തുടക്കമാകും. തുടർന്ന് മധ്യസ്ഥ പ്രാർഥന, വിശുദ്ധ കുർബാന ഫാ. ജോജോ അത്തിക്കളം, സെമിത്തേരി സന്ദർശനം, പൂർവികർക്കു വേണ്ടിയുള്ള പ്രാർഥന, വൈകുന്നേരം ഏഴിന് ഇടവക ദിനാഘോഷങ്ങൾ, കലാസന്ധ്യ.

15ന് രാവിലെ ഏഴിന് വിശുദ്ധ കുർബാന, കുട്ടികളുടെ ആഘോഷമായ ദിവ്യകാരുണ്യ സ്വീകരണം -ഫാ. ജോബിൻ തൈപ്പറമ്പിൽ. വൈകുന്നേരം ആറിന്. യാക്കോബ് ശ്ലീഹായുടെ കുരിശടിയിൽനിന്ന് പള്ളിച്ചിറ കുരിശടിയിലേക്ക് പ്രദക്ഷിണം -ഫാ. ജിതിൻ വെട്ടിത്തുരുത്തിൽ, 6.45ന് പ്രദക്ഷിണം പള്ളിയിലേക്ക്. പ്രസംഗം ഫാ. സിജോ ചേന്നാടൻ

പ്രധാന തിരുനാൾ ദിനമായ 16ന് ആഘോഷമായ തിരുനാൾ കുർബാന- പ്രസംഗം: ഫാ. ജോസ് തെക്കേപ്പുറം, 11.30ന് തിരുനാൾ പ്രദക്ഷിണം കായൽ കുരിശടിയിലേക്ക്: ഫാ. ഏബ്രഹാം തയ്യിൽ, ഫാ. ആൻസിലോ ഇലഞ്ഞിപ്പറമ്പിൽ. തുടർന്ന് കൊടിയിറക്ക്.

ADVERTISEMENT

പൊന്നുരുക്കുംപാറ പാടശേഖരത്തിൽ വർഷകൃഷി ആരംഭിക്കുന്നു

തലയോലപ്പറമ്പ്: പൊന്നുരുക്കുംപാറ പാടശേഖരത്തിൽ 27 വർഷത്തിനുശേഷം വർഷകൃഷി ആരംഭിക്കുന്നു. തലയോലപ്പറമ്പ് കൃഷിഭവൻ ഒഫീസർ ആർ. അനഘ മുതിർന്ന കർഷകൻ രമണന് വിത്ത് കൈമാറി. പാടശേഖരസമിതി ഭാരവാഹികൾ, കൃഷി വകുപ്പ് ഉദ്യോഗസ്ഥർ, കർഷകർ തുടങ്ങിയവർ സംബന്ധിച്ചു.

പഞ്ചായത്ത് ബസ് സ്റ്റാൻഡ് നിർമാണ കരാറിലെ ക്രമക്കേട് : യുഡിഎഫ് അംഗങ്ങൾ ധർണ നടത്തി

തലയോലപ്പറമ്പ്: പഞ്ചായത്ത് ബസ് സ്റ്റാൻഡ് നിർമാണവുമായി ബന്ധപ്പെട്ട ബിഒടി കരാറിലെ ക്രമക്കേടും പഞ്ചായത്തിനുണ്ടായ വരുമാന നഷ്ടവും പഞ്ചായത്ത് ഭരണസമിതി യോഗം ചർച്ച ചെയ്യണമെന്ന യുഡിഎഫ് അംഗങ്ങളുടെ ആവശ്യം നിരാകരിച്ചതിൽ പ്രതിഷേധിച്ച് യുഡിഎഫ് അംഗങ്ങൾ കമ്മിറ്റി ബഹിഷ്കരിച്ചു. പഞ്ചായത്തിൽ 2022-23 സാമ്പത്തിക വർഷത്തെ സർക്കാർ ഓഡിറ്റ് റിപ്പോർട്ടിൽ ബിഒടി വ്യവസ്ഥയിൽ നിർമാണത്തിലിരിക്കുന്ന ബസ് സ്റ്റാൻഡ് ഷോപ്പിംഗ് കോംപ്ലക്സ് പദ്ധതി പഞ്ചായത്തിന് കനത്ത സാമ്പത്തിക നഷ്ടം ഉണ്ടാക്കിയതായി പരാമർശമുണ്ട്. കമ്പനിയുമായുള്ള കരാർ പ്രകാരം നിർമാണം പൂർത്തീകരിച്ചെങ്കിൽ മാത്രമേ പഞ്ചായത്തിന് വരുമാനത്തിന് അർഹതയുള്ളൂ. എന്നാൽ, നിർമാണം സ്തംഭിച്ച നിലയിലാണ് ഇപ്പോൾ‌. പഞ്ചായത്തിന് സാമ്പത്തിക നഷ്ടം വരുത്തിവയ്ക്കുന്ന ബിഒടി കരാറിൽനിന്നും പിന്മാറി അടിയന്തരമായി ബസ് സ്റ്റാൻഡ് നിർമാണം പൂർത്തീകരിക്കണമെന്നാണ് യുഡിഎഫ് ആവശ്യം. പഞ്ചായത്ത് ഓഫീസിന് മുന്നിൽ യുഡിഎഫ് തലയോലപ്പറമ്പ് മണ്ഡലം കമ്മിറ്റിയുടെ നേതൃത്വത്തിൽ നടന്ന ധർണാ സമരം കോൺഗ്രസ് ബ്ലോക്ക് പ്രസിഡന്‍റ് എം.കെ. ഷിബു ഉദ്ഘാടനം ചെയ്തു. ദേവരാജൻ അധ്യക്ഷത വഹിച്ചു. ജോയി കൊച്ചാനാപ്പറമ്പിൽ, ഷിഹാബ് വരുകാല, സജിമോൻ വർഗീസ്, അബ്ദുൾ സത്താർ, ജോസ് വേലിക്കകം, വി.ടി. ജയിംസ് തുടങ്ങിയവർ പ്രസംഗിച്ചു.

ഉദയനാപുരം പഞ്ചായത്തിൽ രണ്ട് ആരോഗ്യക്ഷേമ കേന്ദ്രങ്ങൾകൂടി ആരംഭിക്കുന്നു

ഉദയനാപുരം: പഞ്ചായത്തിൽ രണ്ട് ആരോഗ്യക്ഷേമ കേന്ദ്രങ്ങൾകൂടി ഒരുങ്ങുന്നു. ഉദയനാപുരം ആറാം വാർഡിലെ വൈക്കപ്രയാർ ഈസ്റ്റിലും ഒൻപതാം വാർഡിലെ ചെട്ടിമംഗലത്തുമാണ് സെന്‍ററുകൾ നിർമിക്കുന്നത്. വൈക്കപ്രയാർ ഈസ്റ്റിലെ സെന്‍റർ നിർമാണം പൂർത്തിയായി. ചെട്ടിമംഗലത്തേതിന്‍റെ പെയിന്‍റിംഗ് ജോലികൾകൂടി തീരാനുണ്ട്. ആരോഗ്യ ഗ്രാന്‍റ് ഫണ്ടിൽനിന്നുള്ള 27.75 ലക്ഷം രൂപയാണ് ഓരോ സബ് സെന്‍ററിനും അനുവദിച്ചത്. 1,190 ചതുരശ്ര അടിയിൽ അഞ്ചര സെന്‍റ് സ്ഥലത്താണ് നിർമാണം. ലാബ്, കൺസൾട്ടേഷൻ മുറി, കുത്തിവയ്പ് , വെൽനസ് റൂം, വസ്ത്രം മാറാനുള്ള മുറി, മുലയൂട്ടൽ കേന്ദ്രം, ശൗചാലയം എന്നീ സൗകര്യങ്ങളെല്ലാം സെന്‍ററുകളിൽ ഒരുക്കിയിട്ടുണ്ട്. ആഴ്ചയിൽ ഒരു ദിവസം ഡോക്ടറുടെ സേവനവും ബാക്കി ദിവസങ്ങളിൽ പബ്ലിക് ഹെൽത്ത് നഴ്സ്, സ്റ്റാഫ് നഴ്സ് എന്നിവരുടെ സേവനവും ഉണ്ടാവും. കുഞ്ഞുങ്ങൾക്കുള്ള കുത്തിവയ്പ് ഉൾപ്പെടെ ജനങ്ങൾക്ക് പ്രാഥമിക ചികിത്സ തൊട്ടടുത്ത് ലഭ്യമാക്കുകയെന്ന ലക്ഷ്യത്തോടെയാണ് വെൽനസ് സെന്‍ററുകൾ നിർമിച്ചിരിക്കുന്നത്. ആകെ നാല് വെൽനസ് സെന്‍ററുകളാണ് ഉദയനാപുരം പഞ്ചായത്തിലുള്ളത്. പ്രദേശവാസികൾക്ക് പ്രാഥമിക ചികിത്സ വീടിനു സമീപം ലഭ്യമാക്കുകയാണ് പഞ്ചായത്തിന്‍റെ ലക്ഷ്യമെന്ന് പഞ്ചായത്ത് പ്രസിഡന്‍റ് പി.കെ. ആനന്ദവല്ലി പറഞ്ഞു.

പെരുന്തേനീച്ചക്കൂട്ടത്തെ പിടികൂടി നീക്കം ചെയ്തു

കടുത്തുരുത്തി: ഷോപ്പിംഗ് കോംപ്ലക്‌സിലെ വ്യാപാരികള്‍ക്ക് ഭീഷണിയായിരുന്ന പെരുന്തേനീച്ചക്കൂട്ടത്തെ പിടികൂടി നീക്കം ചെയ്തു. കടുത്തരുത്തി സെന്‍റ് മേരീസ് ഫൊറോനാ താഴത്തുപള്ളിയിലെ മേരിമാതാ ഷോപ്പിംഗ് കോംപ്ലക്‌സിലെ മുകള്‍നിലയില്‍ കൂടുകൂട്ടിയിരുന്ന തേനീച്ചകളെയാണ് നീക്കം ചെയ്തത്. കെട്ടിടത്തിലെ വ്യാപാരികള്‍ക്കും ആളുകള്‍ക്കും തേനീച്ചകള്‍ ഭീഷണി ഉയര്‍ത്തിയിരുന്നു. പൂഞ്ഞാര്‍ പഞ്ചായത്ത് മുന്‍ പ്രസിഡന്‍റ് ജോഷി മൂഴിയാങ്കലിന്‍റെ നേതൃത്വത്തിലാണ് അപകടഭീഷണിയായിരുന്ന പെരുന്തേനീച്ചകളെ സാഹസികമായി നീക്കം ചെയ്തത്. ദിവസങ്ങളായി ഇവിടത്തെ കടക്കാര്‍ക്ക് ഭീഷണിയായി മാറിയ തേനീച്ചകള്‍ ഷോപ്പിംഗ് കോംപ്ലക്‌സിലെ ഓഡിറ്റോറിയത്തില്‍ നടന്ന പരിപാടികള്‍ക്കും തടസമുണ്ടാക്കിയിരുന്നു. ഫയര്‍ഫോഴ്‌സുമായി ബന്ധപ്പെട്ടെങ്കിലും അവര്‍ കൈയൊഴിഞ്ഞതോടെയാണ് ഇടവക വികാരി ഫാ. മാത്യു ചന്ദ്രന്‍കുന്നേലിന്‍റെ നിര്‍ദേശപ്രകാരം ജോഷി മൂഴിയങ്കല്‍ എത്തി തേനീച്ചകളെ നീക്കം ചെയ്തത്. കൂടാതെ പള്ളിമേടയുടെ സമീപത്തെ മാങ്കോസ്റ്റിലും തേനീച്ച കൂട് കൂട്ടിയിരുന്നു. ഇതും നീക്കം ചെയ്തു. photo മേരിമാതാ ഷോപ്പിംഗ് കോംപ്ലക്‌സിലെ മുകള്‍ നിലയില്‍ കൂടുകൂട്ടിയിരുന്ന തേനീച്ചകളെ പൂഞ്ഞാര്‍ പഞ്ചായത്ത് മുന്‍ പ്രസിഡന്‍റ് ജോഷി മൂഴിയാങ്കലിന്‍റെ നേതൃത്വത്തില്‍ നീക്കം ചെയ്യുന്നു.

കുമരകത്ത് ഹമ്പിലെ സൂചനാവരകൾ മാഞ്ഞു, കാറുകൾ കൂട്ടിമുട്ടി തകർന്നു

കുമരകം: പെട്രോൾ പമ്പിന് സമീപത്തെ ഹമ്പിൽ കാറുകൾ കൂട്ടിയിടിച്ചു തകർന്നു. ഹുണ്ടായി വെന്യുകാറിന് പിന്നിൽ മാരുതി ഓൾട്ടോ കാർ ഇടിച്ചാണ് അപകടമുണ്ടായത്. ഹമ്പുണ്ടെന്ന് സൂചന നൽകുന്ന വെളുത്ത വരകൾ മാഞ്ഞതാണ് അപകട കാരണം. മഹാരഷ്‌ട്ര രജിസ്ട്രേഷനുള്ള ചുമന്ന കാർ ഹമ്പിന് സമീപം എത്തിയപ്പോൾ ബ്രേക്കിട്ടു. പിന്നാലെ വന്ന മാരുതിക്കാർ ഹുണ്ടായി കാറിന്‍റെ പിന്നിൽ ഇടിക്കുകയായിരുന്നു. ഇടിയുടെ ആഘാതത്തിൽ മാരുതിക്കാറിന്‍റെ മുൻഭാഗവും ഹുണ്ടായി കാറിന്‍റെ പിൻഭാഗവും തകർന്നു. ഹുണ്ടായി കാറിൽ മൂന്ന് യാത്രക്കാരും മാരുതിയിൽ ഒരു പുരുഷനും ഒരു സ്ത്രീയും ഉണ്ടായിരുന്നതായും യാത്രക്കാർക്ക് ഗുരുതര പരിക്കുകളില്ലാതെ രക്ഷപെട്ടതായും സമീപവാസികൾ പറഞ്ഞു. കുമരകം റോഡിലെ ഹമ്പുകളിലെ മാഞ്ഞുപോയ വെള്ളവരകൾ വീണ്ടും വരക്കേണ്ടതിന്‍റെ ആവശ്യകത ചൂണ്ടിക്കാണിച്ച് ദീപിക ആഴ്ചകൾക്കുമുമ്പേ വാർത്ത നൽകിയിരുന്നു.

മാലിന്യത്തെ അകലെ നിര്‍ത്തി അകലക്കുന്നം പഞ്ചായത്ത്

അകലക്കുന്നം: മാലിന്യനിര്‍മാര്‍ജന രംഗത്ത് ജില്ലയില്‍ മുന്‍പന്തിയിലാണ് അകലക്കുന്നം. പാമ്പാടി ബ്ലോക്ക് പഞ്ചായത്തിന്‍റെ പ്രത്യേക അനുമോദനവും സംസ്ഥാന സര്‍ക്കാരിന്‍റെ മാലിന്യമുക്ത നവകേരളം ജില്ലാതല അവാര്‍ഡും അകലക്കുന്നം കരസ്ഥമാക്കി. ‘ശുചിത്വ ഭവനം സുന്ദര ഭവനം’ എന്ന പദ്ധതിയിലൂടെ വ്യക്തികളെയും കുടുംബങ്ങളെയും മാലിന്യനിര്‍മാര്‍ജന രംഗത്തേക്ക് കടന്നുവരാന്‍ പ്രോത്സാഹിപ്പിക്കുകയാണ് അകലക്കുന്നം പഞ്ചായത്ത്. ശുചിത്വഭവനം, സംസ്ഥാന തലത്തിലെ മികച്ച വിവരവിജ്ഞാന മാതൃകാ പ്രവര്‍ത്തനം എന്നിവയെക്കുറിച്ചുള്ള അവതരണങ്ങള്‍ക്ക് തിരുവനന്തപുരത്ത് നടന്ന ‘വൃത്തി -2025’ ക്ലീന്‍ കേരള കോണ്‍ക്ലേവിലും പഞ്ചായത്തിന് പുരസ്‌കാരം ലഭിച്ചു. പദ്ധതിയിലൂടെ പഞ്ചായത്തിലെ 4,929 കുടുംബങ്ങളെ സ്‌കൂള്‍ വിദ്യാര്‍ഥികള്‍ ഉള്‍പ്പെട്ട ഒന്നാംഘട്ട സര്‍വേ സംഘം ശരിയായ മാലിന്യ നിര്‍മാര്‍ജനത്തിന്‍റെ ആവശ്യകതയെപ്പറ്റി ബോധവാന്മാരാക്കുകയും മാലിന്യ സംസ്‌കരണത്തെ സംബന്ധിച്ചുള്ള ചോദ്യാവലിയുടെ അടിസ്ഥാനത്തില്‍ വീടുകളെ വിലയിരുത്തുകയും ചെയ്തു. ചോദ്യാവലിക്ക് ലഭിച്ച മാര്‍ക്കിന്‍റെ അടിസ്ഥാനത്തില്‍ ഓരോ വാര്‍ഡില്‍നിന്നും 10മുതല്‍ 15 വരെ വീടുകളെ തെരഞ്ഞെടുത്തു. ഇവയില്‍നിന്ന് വാര്‍ഡ് തലത്തില്‍ മികച്ച കുടുംബത്തിനുള്ള ഒന്ന്, രണ്ട്, മൂന്ന് എന്നീ സ്ഥാനങ്ങള്‍ രണ്ടാംഘട്ട സര്‍വേ സംഘം തെരഞ്ഞെടുക്കുകയും സീറോ വേസ്റ്റ് ദിനത്തില്‍ മെമന്‍റോയും പ്രശംസാപത്രവും വിതരണം ചെയ്യുകയും ചെയ്തു.

ഒരു മാസം കഴിഞ്ഞിട്ടും നെല്ലിന്‍റെ വില ലഭിച്ചില്ല; പിആര്‍എസ് കത്തിച്ച് കര്‍ഷക കോണ്‍ഗ്രസ് പ്രതിഷേധം

കോട്ടയം: കൊയ്ത്തു കഴിഞ്ഞ് ഒരു മാസം പിന്നിട്ടിട്ടും കര്‍ഷകര്‍ക്കു നെല്ലിന്‍റെ വില ലഭിച്ചില്ല. നെല്ല് വിറ്റതിന്‍റെ രേഖയായി കിട്ടുന്ന പിആര്‍എസിന്‍റെ ഈടില്‍ ലോണായി കര്‍ഷകര്‍ക്കു വില നല്‍കാന്‍ ഒരു ബാങ്കും തയാറാകുന്നില്ല. ലോണ്‍ അനുവദിച്ചുകൊണ്ടിരുന്ന കനറാ ബാങ്കും സ്‌റ്റേറ്റ് ബാങ്കും മാര്‍ച്ച് 31ന് കരാറില്‍നിന്നും പിന്മാറിയ മട്ടാണ്. കാലാവധി കഴിഞ്ഞിട്ടും സര്‍ക്കാരും ബാങ്കുകളും തമ്മില്‍ പുതിയ കരാറിനു തയാറായിട്ടുമില്ല. കിഴിവിന്‍റെ പേരില്‍ മില്ലുകാര്‍ പകല്‍ക്കൊള്ള നടത്തിയതിനു പിന്നാലെയാണ് കര്‍ഷകര്‍ക്ക് ഈ ഗതി വന്നിരിക്കുന്നത്. 30 കിലോ വരെ കര്‍ഷകരില്‍നിന്നും കിഴിവു വാങ്ങിച്ച സംഭവങ്ങള്‍ ജില്ലയുടെ പല ഭാഗത്തുമുണ്ട്. ഇപ്പോള്‍ കൈകാര്യ ചെലവിനത്തില്‍ കര്‍ഷകര്‍ക്ക് ക്വിന്‍റലിന് 250 രൂപ വരെ ചെലവാകുന്നുമുണ്ട്. സര്‍ക്കാര്‍ നല്‍കുന്നതാകട്ടെ 12 രൂപയും. ഈ പ്രശ്‌നങ്ങള്‍ക്ക് പരിഹാരം കാണാന്‍ സര്‍ക്കാരും കൃഷി, സപ്ലൈകോ വകുപ്പുകളും യാതൊരു നപടിയും സ്വീകരിക്കാത്തതില്‍ പ്രതിഷേധം ശക്തമായിരിക്കുകയാണ്. സര്‍ക്കാര്‍ നടപടിയില്‍ പ്രതിഷേധിച്ച് കര്‍ഷക കോണ്‍ഗ്രസ് ജില്ലാ കമ്മിറ്റിയുടെ ആഭിമുഖ്യത്തില്‍ ജില്ലാ സപ്ലൈകോ ഓഫീസിനു മുമ്പില്‍ കൂട്ടധര്‍ണ നടത്തി. ധര്‍ണയെ തുടര്‍ന്ന് പിആര്‍എസ് കത്തിക്കലും നടത്തി. സമരം കര്‍ഷക കോണ്‍ഗ്രസ് ജില്ലാ പ്രസിഡന്‍റ് തോമസുകുട്ടി മണക്കുന്നേല്‍ ഉദ്ഘാടനം ചെയ്തു. റോയി ജോണ്‍ ഇടയത്തറ അധ്യക്ഷത വഹിച്ചു. കെപിസിസി സെക്രട്ടറി കുഞ്ഞ് ഇല്ലംപള്ളി, ജി. ഗോപകുമാര്‍, അനില്‍ മലരിക്കല്‍, സന്തോഷ് ചാന്നാനിക്കാട്, റെജിമോന്‍ വാഴയില്‍, ജോയിസ് വാഴക്കാല, പള്ളം ജോര്‍ജ്, ജോണ്‍സണ്‍ മുണ്ടക്കയം, എം.സി. കുര്യാക്കോസ്, വിനോദ് മഞ്ഞാമറ്റം, സുമേഷ് കാഞ്ഞിരം, ഇ.എം. മാത്യു എന്നിവര്‍ പ്രസംഗിച്ചു.

ഈഡിസ് കൊതുക് പെരുകി; ഡെങ്കിപ്പനി പടരുന്നു

കോട്ടയം: കാലംതെറ്റിയ വേനല്‍മഴയിൽ പെരുകിയ കൊതുക് ഡെങ്കി പരത്തുന്നു. മലയോര തോട്ടംമേഖലയില്‍ വിവിധയിടങ്ങളായി അന്‍പതോളം പേര്‍ക്ക് ഡെങ്കി ബാധിച്ച സാഹചര്യത്തില്‍ ആരോഗ്യവകുപ്പ് മുന്‍കരുതല്‍ നിര്‍ദേശം നല്‍കി. ഡെങ്കി, സിക, മഞ്ഞപ്പനി, ചികുന്‍ഗുനിയ തുടങ്ങിയ വൈറസുകളെല്ലാം പരത്തുന്നത് ഈഡിസ് കൊതുകുകളാണ്. റബര്‍ തോട്ടങ്ങളില്‍ ലാറ്റക്‌സ് ശേഖരിക്കുന്ന ചിരട്ടകളിലും പാത്രങ്ങളിലും കൊക്കോ തോടുകളിലും വെള്ളക്കെട്ടുകളിലും ഈഡിസ് കൊതുക് വലിയ തോതില്‍ പെരുകിയിട്ടുണ്ട്. വാട്ടര്‍ ടാങ്ക്, ചെടിച്ചട്ടി, വീപ്പ തുടങ്ങിയവയില്‍ വെള്ളം കെട്ടിക്കിടക്കാന്‍ അനുവദിക്കരുത്. ജലാംശം കൂടുതലുള്ള ചാണകക്കുഴികളിലും കൊതുകു പെരുകാന്‍ സാധ്യതയുണ്ട്. കോവിഡിനുശേഷം ചിലരില്‍ ഡെങ്കി മാരകമാകുന്ന സാഹചര്യമുണ്ട്. രക്തം കട്ട പിടിക്കാന്‍ സഹായിക്കുന്ന പ്ലേറ്റ്‌ലെറ്റുകളുടെ എണ്ണം കുറഞ്ഞ് ആന്തരിക രക്തസ്രാവത്തിലേക്കു നീങ്ങുമെന്നതിനാല്‍ ഡെങ്കി നിസാരമല്ല. ശരീരത്തില്‍ ചുവന്ന പാടുകളുണ്ടാകുന്നതു പ്ലേറ്റ്‌ലെറ്റ് കുറയുന്നതിന്‍റെ സൂചനയാണ്. ഈഡിസ് കൊതുകിന്‍റെ കടിയേറ്റ് മൂന്നാഴ്ചയ്ക്കുള്ളില്‍ ലക്ഷണങ്ങള്‍ പ്രകടിപ്പിച്ചു തുടങ്ങും. കടുത്ത പനിയും നടുവേദനയുമാണു പ്രധാന ലക്ഷണം. ചിലരില്‍ ഛര്‍ദിയും വയറുവേദനയുമുണ്ടാകും. രണ്ടാം തവണയും ഡെങ്കി ബാധിക്കുന്ന സാഹചര്യത്തില്‍ വിദഗ്ധ ചികിത്സ ആവശ്യമായി വരും. കെട്ടിക്കിടക്കുന്ന വെള്ളത്തിലാണ് കൊതുകുകള്‍ മുട്ടയിട്ട് വളരുന്നത്. കൊതുകുവഴി മാത്രമേ ഡെങ്കിപ്പനി പകരുകയുള്ളൂ. ഇവയുടെ സഞ്ചാരദൂരം ചെറുതായതിനാല്‍ വീടും പരിസരവും കൊതുക് മുക്തമാക്കണം.

കെപിസിസിക്കു പിന്നാലെ ജില്ലാ കോണ്‍ഗ്രസ് കമ്മിറ്റികളിലും പുനഃസംഘടന ഉടന്‍

കോട്ടയം: പുതിയ കെപിസിസി പ്രസിഡന്‍റ് സണ്ണി ജോസഫിന്‍റെ നേതൃത്വത്തില്‍ പുതിയ ടീം നിലവില്‍ വന്നതോടെ കെപിസിസിക്കു പിന്നാലെ ജില്ലാ കോണ്‍ഗ്രസ് കമ്മിറ്റികളിലും പുനഃസംഘടന ഉടന്‍. പുനഃസംഘടനയുടെ ചര്‍ച്ചകള്‍ക്കായി പുതിയ കെപിസിസി നേതൃത്വം ഡല്‍ഹിയിലേക്ക് യാത്ര തിരിച്ചു. പുനഃസംഘടനാ പ്രവര്‍ത്തനങ്ങളുടെ ചര്‍ച്ചകള്‍ ആരംഭിച്ചതോടെ ജില്ലയില്‍ ഡിസിസി നേതൃത്വം പിടിക്കാന്‍ നീക്കം ശക്തമായി. സംസ്ഥാന തലത്തില്‍ അഞ്ചു ഡിസിസി പ്രസിഡന്‍റുമാരെ മാറ്റാന്‍ കെപിസിസി തലത്തില്‍ ധാരണയായതില്‍ കോട്ടയവുമുണ്ട്. കോട്ടയത്തെ ഡിസിസി പ്രസിഡന്‍റിനെ മാറ്റുവാന്‍ തത്വത്തില്‍ ധാരണയായതോടെ അധ്യക്ഷ പദവിയിലേക്കുള്ള ചരടുവലികള്‍ ശക്തമായിരിക്കുകയാണ്. എ ഗ്രൂപ്പിനും ഉമ്മന്‍ ചാണ്ടിക്കും സര്‍വാധിപത്യമുണ്ടായിരുന്ന ജില്ലയില്‍ ഇപ്പോള്‍ എ ഗ്രൂപ്പ് പല തട്ടിലാണ്. തിരുവഞ്ചൂര്‍ രാധാകൃഷ്ണന്‍ നേതൃത്വം നല്‍കുന്ന ഒരു വിഭാഗം, ചാണ്ടി ഉമ്മന്‍റെ നേതൃത്വത്തിൽ മറ്റൊരു വിഭാഗം, പിന്നെ ഒറിജിനല്‍ എ ഗ്രൂപ്പെന്ന നിലയില്‍ കെ.സി. ജോസഫ് നേതൃത്വം നല്‍കുന്ന വിഭാഗവും. എ വിഭാഗത്തെ ഈ ഗ്രൂപ്പുകളിലെ നേതാക്കന്‍മാരെല്ലാം കെ.സി. വേണുഗോപാലിനെയും പ്രതിപക്ഷ നേതാവ് വി.ഡി. സതീശനെയും പിന്തുണയ്ക്കുന്നവരുമാണ്. നിലവിലെ ഡിസിസി പ്രസിഡന്‍റ് നാട്ടകം സുരേഷ് എ ഗ്രൂപ്പിന്‍റെ പേരിലാണ് ഡിസിസി പ്രസിഡന്‍റായതെങ്കിലും ഇപ്പോള്‍ തിരുവഞ്ചൂര്‍ രാധാകൃഷ്ണനൊപ്പമാണ്. പ്രസിഡന്‍റുസ്ഥാനം നിലനിര്‍ത്താനായി നാട്ടകം സുരേഷ് ശ്രമം നടത്തുന്നുമുണ്ട്. ചാണ്ടി ഉമ്മന്‍റെ നേതൃത്വത്തില്‍ ഒരുപറ്റം നേതാക്കള്‍ ഉമ്മന്‍ ചാണ്ടിയുടെ എ ഗ്രൂപ്പ് എന്ന നിലയിലും പ്രവര്‍ത്തിക്കുന്നുണ്ട്. ക്രൈസ്തവ വിഭാഗത്തിനു നിര്‍ണായക ശക്തിയുള്ള ജില്ലയില്‍ ഈ വിഭാഗത്തില്‍നിന്നൊരാള്‍ പ്രസിഡന്‍റാകണമെന്ന അഭിപ്രായം കെപിസിസിക്കുമുണ്ട്. തിരുവഞ്ചൂര്‍ രാധാകൃഷ്ണന്‍ നേതൃത്വം നല്‍കുന്ന എ ഗ്രൂപ്പ് യുഡിഎഫ് ജില്ലാ കണ്‍വീനര്‍ ഫില്‍സണ്‍ മാത്യൂസിനെയാണ് പ്രസിഡന്‍റ് സ്ഥാനത്തേക്ക് നിര്‍ദേശിക്കുന്നത്. പ്രതിപക്ഷനേതാവിന്‍റെ പിന്തുണയും ഫില്‍സന്‍ മാത്യൂസിനാണ്. കഴിഞ്ഞ തവണ അവസാന നിമിഷമാണ് ഫില്‍സനു സ്ഥാനം നഷ്ടമായത്. ഫിലിപ്പ് ജോസഫിന്‍റെ പേരാണ് ഐ ഗ്രൂപ്പ് മുന്നോട്ടുവയ്ക്കുന്നത്. മുതിര്‍ന്ന അംഗമെന്ന പരിഗണനയും ഫിലിപ്പിന് അനുകൂലമാണ്. കഴിഞ്ഞ പുനഃസംഘടനയില്‍ ഇടുക്കി ജില്ല ക്രൈസ്തവ വിഭാഗത്തിനു നല്‍കിയതിനാല്‍ ഇത്തവണ കോട്ടയം ക്രൈസ്തവ വിഭാഗത്തിനു ലഭിക്കുമെന്നാണ് ഐ ഗ്രൂപ്പിന്‍റെ പ്രതീക്ഷ. കൂടാതെ ഐ ഗ്രൂപ്പിന്‍റെ കൈയിലുള്ള ആലപ്പുഴ കെ.സി. വേണുഗോപാല്‍ വിഭാഗത്തിനു നല്‍കി ഐ ഗ്രൂപ്പിനു കോട്ടയം നല്‍കാനും ചര്‍ച്ചകള്‍ നടക്കുന്നുണ്ട്. വര്‍ഷങ്ങളായി എ ഗ്രൂപ്പ് കൈവശം വച്ചിക്കുന്ന ജില്ല ഇത്തവണ വിട്ടുനല്‍കണമെന്ന നിര്‍ദേശവും ഉയരുന്നുണ്ട്. മുതിര്‍ന്ന നേതാവിനെ പരിഗണിച്ചാല്‍ ജോസഫ് വാഴയ്ക്കന്‍റെ പേരും പരിഗണിക്കുന്നുണ്ട്. ഡിസിസി വൈസ്പ്രസിഡന്‍റ് ബിജു പുന്നത്താനം, ഡിസിസി സെക്രട്ടറി അഡ്വ. സിബി ചേനപ്പാടി, യൂജിന്‍ തോമസ്, അജീസ് ബെന്‍ മാത്യൂസ് തുടങ്ങിയവരുടെ പേരുകളും ചര്‍ച്ചകളില്‍ സജീവമാണ്. അതേസമയം ഇക്കുറി ഒരു തരത്തിലുമുള്ള സമ്മര്‍ദ തന്ത്രങ്ങളും ഗ്രൂപ്പും വിലപ്പോവില്ലെന്നും കഴിവും ആത്മാര്‍ഥതയും സീനിയോരിറ്റിയുമാണ് മാനദണ്ഡമെന്നുമാണ് നേതാക്കള്‍ പറയുന്നത്.

ഇതര സംസ്ഥാന തൊഴിലാളികളുടെ കുട്ടികള്‍ക്കും പഠനം ഉറപ്പാക്കും

കോട്ടയം: ഇതര സംസ്ഥാന തൊഴിലാളികളുടെ മക്കള്‍ക്ക് വിദ്യാഭ്യാസം ഉറപ്പാക്കാന്‍ അധ്യാപകരും ജനപ്രതിനിധികളും കുടുംബശ്രീ അംഗങ്ങളും ലേബര്‍ ക്യാമ്പുകളിലും വാടകവീടുകളിലും സന്ദര്‍ശനം നടത്തും. നിലവില്‍ ജില്ലയില്‍ വിവിധയിടങ്ങളിലായി നാനൂറോളം കുട്ടികൾ വിവിധ ക്ലാസുകളില്‍ പഠനം നടത്തുന്നുണ്ട്. സംസ്ഥാനത്തൊട്ടാകെ ഇരുപത്തിനാലായിരം ഇതര സംസ്ഥാന കുട്ടികള്‍ പഠനം നടത്തുന്നതായാണ് കണക്ക്. അതേസമയം ജില്ലയിലെ തോട്ടം മേഖലകളില്‍ ഉള്‍പ്പെടെ ഇരുന്നൂറിലേറെ കുട്ടികള്‍ സ്‌കൂളുകളില്‍ പ്രവേശനം തേടാതെ ക്യാമ്പുകളില്‍ കഴിയുന്നുണ്ടെന്നാണ് സൂചന. ഇവരില്‍ പലരും സ്വന്തം നാടുകളില്‍നിന്ന് കേരളത്തില്‍ വന്നുപോകുന്നവരുമാണ്. ആശുപത്രികളില്‍ പോകാതെ വീടുകളിലും ക്യാമ്പുകളിലും ജനിച്ച കുട്ടികള്‍ക്ക് ജനന സര്‍ട്ടിഫിക്കറ്റില്ലെന്നത് ഇത്തരം കുട്ടികളുടെ സ്‌കൂള്‍ പ്രവേശനത്തിന് പരിമിതിയാണ്. ആധാര്‍ കാര്‍ഡ് ഉള്‍പ്പെടെ രേഖകളും ഇവര്‍ക്കില്ല. ബംഗാള്‍, ആസാം, ഒഡീഷ, ഉത്തര്‍പ്രദേശ്, ജാര്‍ഖണ്ഡ് സംസ്ഥാനങ്ങളില്‍നിന്നാണ് കൂടുതല്‍ കുട്ടികളും. മലയാളം ‍ അറിയില്ലാത്ത കുട്ടികള്‍ക്ക് പ്രാഥമിക പാഠങ്ങള്‍ പറഞ്ഞുകൊടുക്കുന്നതിലും ഏറെ പരിമിതിയുണ്ട്. ഏതാനും നേപ്പാളി കുട്ടികളും ജില്ലയിലെ സ്‌കൂളുകളില്‍ പഠനം നടത്തുന്നുണ്ട്. ആസാമില്‍ നിന്നെത്തി ലയങ്ങളില്‍ താമസിച്ച് തേയിലത്തോട്ടങ്ങളില്‍ പണിയെടുക്കുന്നവരുടെ നൂറിലേറെ കുട്ടികള്‍ പുള്ളിക്കാനം, ഏലപ്പാറ, വാഗമണ്‍ പ്രദേശങ്ങളില്‍ സ്‌കൂളുകളില്‍ പോകുന്നുണ്ട്. ആസാമി ഭാഷ അറിയാവുന്ന അധ്യാപകരെ ഇവര്‍ക്കായി താത്കാലികമായി നിയമിച്ചിരിക്കുകയാണ്. ഇതര സംസ്ഥാന തൊഴിലാളികളുടെ കുട്ടികളില്‍ ബാലവേല തടയുകയെന്ന ലക്ഷ്യവും ഈ നീക്കത്തിനു പിന്നിലുണ്ട്.

യാത്രയ്ക്കിടെ ഡ്രൈവറുടെ കഴുത്തിൽ കത്തിവച്ച സംഭവത്തിൽ മൂന്നു പേർ അറസ്റ്റിൽ

മല്ലപ്പള്ളി: സ്വകാര്യ ബസുകളുടെ മത്സരയോട്ടവുമായി ബന്ധപ്പെട്ട തർക്കങ്ങൾ മുറുകുന്നതിടെ കഴിഞ്ഞദിവസം യാത്രയ്ക്കിടെ മല്ലപ്പള്ളിയിൽ ഡ്രൈവറുടെ കഴുത്തില്‍ കത്തിവച്ച സംഭവത്തില്‍ മൂന്നു പേർ അറസ്റ്റില്‍. കോട്ടയം മാടപ്പള്ളി മാമ്മൂട് ഇടപ്പള്ളി വട്ടമാക്കല്‍ വി. കെ. ജയകുമാര്‍ (46), കല്ലൂപ്പാറ ചെങ്ങരൂര്‍ കടുവാക്കുഴി പുത്തന്‍പുരയ്ക്കല്‍ വീട്ടില്‍ വാടകയ്ക്ക് താമസിക്കുന്ന തമിഴ്നാട് സ്വദേശി പി. ഉദയരാജ് (29), ആനിക്കാട് നടുകെപ്പടി ആലക്കുളത്തില്‍ വീട്ടില്‍ ജോബിന്‍ രാജന്‍ (24) എന്നിവരാണ് അറസ്റ്റിലായത്. കേസിൽ ഒരാൾകൂടി അറസ്റ്റിലാകാനുണ്ട്. തിരുവല്ല - മല്ലപ്പള്ളി റൂട്ടില്‍ സര്‍വീസ് നടത്തുന്ന തിരുവമ്പാടി ബസിന്‍റെ ഡ്രൈവര്‍ കുറ്റപ്പുഴ സ്വദേശി വി.കെ. കലേഷി (35) നു നേരെയാണ് കഴിഞ്ഞദിവസം മല്ലപ്പള്ളി കടുവാക്കുഴിയിൽ യാത്രയ്ക്കിടെ ആക്രമണമുണ്ടായത്. മല്ലപ്പള്ളിയിലേക്കുള്ള യാത്രയ്ക്കിടെ ഡ്രൈവർ സീറ്റിലായിരുന്ന കലേഷിനെ കൊലപ്പെടുത്തുമെന്ന് പറഞ്ഞ് കഴുത്തിനുനേരെ വടിവാള്‍ വീശുകയായിരുന്നു. ഒഴിഞ്ഞുമാറിയതിനാല്‍ കഴുത്തില്‍ കൊണ്ടില്ല. നാലംഗ സംഘം ബസിനുള്ളില്‍ ഭീകരാന്തരീക്ഷം സൃഷ്ടിച്ച് ഭീഷണി മുഴക്കുകയും ചെയ്തു. സംഭവസമയം സ്ത്രീകളും കുട്ടികളും അടക്കം ബസിൽ യാത്രക്കാരുണ്ടായിരുന്നു. തിരുവല്ല - മല്ലപ്പള്ളി റൂട്ടിലെ തിരുവന്പാടി എന്ന സ്വകാര്യ ബസിലാണ് അക്രമങ്ങൾ അരങ്ങേറിയത്. ഇതിന്‍റെ വീഡിയോ ദൃശ്യങ്ങൾ കൂടി പുറത്തായതോടെ പോലീസ് ഇടപെടുകയായിരുന്നു. കലേഷിന്‍റെ മൊഴി പ്രകാരം പോലീസ് കേസെടുത്തു. ഇതേ റൂട്ടിൽ സർവീസ് നടത്തുന്ന ജാനകി ബസുകാരുമായുള്ള തർക്കമാണ് ആക്രമണത്തിനു പ്രേരിപ്പിച്ചതെന്ന് പറയുന്നു. ജാനകി ബസിലെ ജീവനക്കാരനായ രമേശന്‍റെ സുഹൃത്തുക്കളാണ് പിടിയിലായവരെന്നു പോലീസ് പറഞ്ഞു.

അവസാന സെമസ്റ്റര്‍ ബിരുദ പരീക്ഷ: അടുത്ത പ്രവൃത്തിദിനം ഫലം പ്രസിദ്ധീകരിച്ച് എംജി യൂണിവേഴ്‌സിറ്റി

കോട്ടയം: അവസാന സെമസ്റ്റര്‍ ബിരുദ പരീക്ഷ പൂര്‍ത്തിയായി, തൊട്ടടുത്ത പ്രവൃത്തി ദിവസം എംജി യൂണിവേഴ്‌സിറ്റി ഫലം പ്രസിദ്ധീകരിച്ചു. ഈ വര്‍ഷം ഏപ്രില്‍, മേയ് മാസങ്ങളില്‍ നടന്ന ആറാം സെമസ്റ്റര്‍ റെഗുലര്‍ ബിഎ, ബിഎസ്‌സി, ബികോം, ബിബിഎ, ബിസിഎ, ബിഎസ്ഡബ്ല്യു, ബിടിടിഎം, ബിഎസ്എം തുടങ്ങിയ പരീക്ഷകളുടെ ഫലമാണ് ഇന്നലെ പ്രസിദ്ധീകരിച്ചത്. ആറാം സെമസ്റ്റര്‍ വിജയശതമാനം 76.70 ആണ്.ഈ വര്‍ഷം സംസ്ഥാനത്ത് അവസാന വര്‍ഷ ബിരുദഫലം ആദ്യം പ്രസിദ്ധീകരിക്കുന്നത് എംജി സര്‍വകലാശാലയാണ്. ഒന്പത് കേന്ദ്രങ്ങളിലായി നടന്ന മൂല്യനിര്‍ണയ ക്യാമ്പുകളില്‍ ഒന്നര ലക്ഷത്തോളം ഉത്തരക്കടലാസുകളുടെ പരിശോധന ഏഴിന് അവസാനിച്ചു. ഒന്‍പതിനാണ് അവസാന സെമസ്റ്റര്‍ വൈവ വോസി പരീക്ഷകള്‍ പൂര്‍ത്തിയായത്. കൃത്യമായ ആസൂത്രണവും ചിട്ടയായ പ്രവര്‍ത്തനവുമാണ് റിക്കാര്‍ഡ് വേഗത്തില്‍ ഫലപ്രഖ്യാപനം നടത്താന്‍ സഹായകമായതെന്ന് പരീക്ഷാ നടത്തിപ്പിന്‍റെ ചുമതലയുള്ള സിന്‍ഡിക്കറ്റ് സബ് കമ്മിറ്റി കണ്‍വീനര്‍ ഡോ. ജോജി അലക്‌സ് പറഞ്ഞു. 2023ല്‍ പരീക്ഷ കഴിഞ്ഞ് പതിനാലാം ദിവസവും 2024ല്‍ 10-ാം ദിവസവും യൂണിവേഴ്‌സിറ്റി അവസാന വര്‍ഷ ബിരുദ ഫലം പ്രസിദ്ധീകരിച്ചിരുന്നു. അധ്യാപകരും ജീവനക്കാരും അവധി ദിവസങ്ങളില്‍ ഉള്‍പ്പെടെ പ്രവര്‍ത്തിച്ചാണ് ഈ കാലയളവ് വീണ്ടും മെച്ചപ്പെടുത്തിയത്. നാലു വര്‍ഷ ഓണേഴ്‌സ് ബിരുദ പ്രോഗ്രാമുകളുടെ ഒന്നാം സെമസ്റ്റര്‍ പരീക്ഷാഫലം മൂന്നാം ദിവസം പ്രസിദ്ധീകരിച്ചിരുന്നു. ആറാം സെമസ്റ്റര്‍ പരീക്ഷയ്ക്ക് തൊട്ടു മുന്‍പു നടന്ന അനുബന്ധ സപ്ലിമെന്‍ററി പരീക്ഷാ ഫലങ്ങള്‍ കൂടി ഉള്‍പ്പെടുത്തി സമഗ്രമായ ഫലമാണ് പ്രസിദ്ധീകരിച്ചിരിക്കുന്നതെന്ന് പരീക്ഷാ കണ്‍ട്രോളര്‍ ഡോ. സി.എം. ശ്രീജിത്ത് അറിയിച്ചു. മൂല്യനിര്‍ണയ ജോലികള്‍ ചിട്ടയോടെ പൂര്‍ത്തീകരിച്ച അധ്യാപകര്‍, ക്യാമ്പുകള്‍ക്ക് മേല്‍നോട്ടം വഹിച്ചവര്‍, ഏകോപനച്ചുമതല നിര്‍വഹിച്ച സിന്‍ഡിക്കറ്റംഗങ്ങള്‍, പരീക്ഷാ കണ്‍ട്രോളര്‍, ഐടി, പരീക്ഷാ വിഭാഗങ്ങളിലെ ജീവനക്കാര്‍ എന്നിവരെ വൈസ് ചാന്‍സലര്‍ ഡോ. സി.ടി. അരവിന്ദകുമാര്‍ അഭിനന്ദിച്ചു. പരീക്ഷാ ഫലം സര്‍വകലാശാലാ വെബ് സൈറ്റില്‍(www.mgu.ac.in) ലഭിക്കും.

ഹയര്‍ സെക്കന്‍ഡറി സ്‌കൂളുകളില്‍ ഗസ്റ്റ് അധ്യാപക നിയമനം

കോട്ടയം: സെന്‍റ് ജോസഫ്‌സ് സിഎംഐ കോര്‍പറേറ്റ് എഡ്യൂക്കേഷണല്‍ ഏജന്‍സിയുടെ കീഴിലുള്ള വിവിധ ഹയര്‍ സെക്കന്‍ഡറി സ്‌കൂളുകളില്‍ 2025-26 അക്കാദമികവര്‍ഷം എച്ച്എസ്എസ് ടി (സീനിയര്‍ ) കണക്ക്, ഇംഗ്ലീഷ്, ഹിന്ദി ഒഴിവുകളിലേക്കും എച്ച്എസ്എസ്ടി (ജൂണിയര്‍) കണക്ക്, ഇംഗ്ലീഷ്, ഫിസിക്‌സ്, ഹിന്ദി, കെമിസ്ട്രി, സുവോളജി, മലയാളം, ഇക്കണോമിക്സ് എന്നീ വിഷയങ്ങളിലുണ്ടാകുന്ന ഒഴിവുകളിലേക്കും ഗസ്റ്റ് അധ്യാപകരായി നിയമിക്കപ്പെടുന്നതിന് താത്പര്യമുള്ള നിര്‍ദിഷ്ട യോഗ്യതയുള്ളവര്‍ പൂര്‍ണവിവരങ്ങളടങ്ങുന്ന അപേക്ഷ കോട്ടയം സിഎംഐ പ്രൊവിന്‍ഷ്യല്‍ ഹൗസില്‍ പ്രവര്‍ത്തിക്കുന്ന കോര്‍പറേറ്റ് മാനേജ്‌മെന്‍റ് ഓഫീസില്‍ 23നു മുമ്പ് സമര്‍പ്പിക്കേണ്ടതാണ്. 9497320889.

സിവില്‍ ഡിഫന്‍സ് വോളണ്ടിയര്‍: രജിസ്‌ട്രേഷന്‍ ആരംഭിച്ചു

കോട്ടയം: രക്ഷാപ്രവര്‍ത്തനം, ഒഴിപ്പിക്കല്‍ പ്രവര്‍ത്തനങ്ങള്‍, പ്രഥമശുശ്രൂഷ, അടിയന്തര പരിചരണം, ഗതാഗത മാനേജ്മെന്‍റ്, ജനക്കൂട്ട നിയന്ത്രണം, പൊതുസുരക്ഷ, ദുരന്ത പുനരധിവാസപ്രവര്‍ത്തനം, സര്‍ക്കാര്‍ ഏജന്‍സികളെയും തദ്ദേശ സ്വയംഭരണ സ്ഥാപനങ്ങളെയും സഹായിക്കല്‍ എന്നിവയില്‍ പരിശീലനം ലഭിക്കുന്നതിനായി രാജ്യവ്യാപകമായി മേരാ യുവ ഭാരത് സിവില്‍ ഡിഫന്‍സ് വോളണ്ടിയര്‍മാരെ തെരഞ്ഞെടുക്കുന്നു. ദേശീയ, സംസ്ഥാന ദുരന്ത നിവാരണ ഏജന്‍സികളുമായി ചേര്‍ന്ന് വോളണ്ടിയര്‍മാര്‍ക്ക് ഒരാഴ്ചത്തെ വിദഗ്ധ പരിശീലനം നല്‍കും. സെല്‍ഫ് ഡിഫന്‍സ് വോളണ്ടിയര്‍മാർക്കായി മൈ ഭാരത് പോര്‍ട്ടലില്‍ https://mybharat.gov.in ല്‍ രജിസ്റ്റര്‍ ചെയ്യാം. 8547628819.

തെരുവുനായ ശല്യത്തിനെതിരേ പാലായില്‍ ബൗ ബൗ സമരം

പാലാ: നഗരത്തിലെ തെരുവുനായ ശല്യം നേരിടാന്‍ നഗര ഭരണാധികാരികള്‍ നടപടി സ്വീകരിക്കാത്തതില്‍ പ്രതിഷേധിച്ച് പാലായില്‍ വ്യത്യസ്തവും ശ്രദ്ധേയവുമായ സമര പരിപാടി. പൗരാവകാശ സംരക്ഷണ സമിതിയുടെ നേതൃത്വത്തില്‍ നഗരസഭയ്ക്കു മുമ്പില്‍ ബൗ ബൗ സമരമാണ് നടത്തിയത്. ഇന്നു രാവിലെ മുനിസിപ്പല്‍ ഓഫീസ് പടിക്കല്‍ പൗരാവകാശ സംരക്ഷണ സമിതി പ്രവര്‍ത്തകരെത്തി നായ കുരയ്ക്കുന്നതുപോലെ ഒച്ചയിട്ടായിരുന്നു ബൗ ബൗ സമരം. നഗരസഭാ പ്രതിപക്ഷ നേതാവ് പ്രഫ. സതീഷ് ചൊള്ളാനി ദ്ഘാടനം ചെയ്തു. പൗരാവകാശ സംരക്ഷണ സമിതി പ്രസിഡന്‍റ് അഡ്വ. സന്തോഷ് കെ. മണര്‍കാട്ട് അധ്യക്ഷത വഹിച്ചു. വളരെ ഗൗരവമുള്ള ഈ വിഷയത്തിന്‍റെ പ്രാധാന്യം മനസിലാക്കി അടിയന്തര കൗണ്‍സില്‍ വിളിച്ചുകൂട്ടണമെന്നും പൗരാവകാശ സംരക്ഷണ സമിതി ആവശ്യപ്പെട്ടു. നടപടികള്‍ ഉണ്ടായില്ലെങ്കില്‍ അടുത്ത സമരത്തിൽ തെരുവുനായ്ക്കളെ മുനിസിപ്പല്‍ ഓഫീസിലേക്ക് ഓടിച്ചുകയറ്റുമെന്നും ഭാരവാഹികള്‍ പറഞ്ഞു. മൈക്കിള്‍ കാവുകാട്ട്, ജോസ് വേരനാനി, സാബു ഏബ്രഹാം, പ്രഫ. സണ്ണി സഖറിയാസ്, എം.പി. കൃഷ്ണന്‍നായര്‍, കെ.ആര്‍. മുരളീധരന്‍നായര്‍, ജോര്‍ജുകുട്ടി ചെമ്പകശേരി, തോമസുകുട്ടി നെച്ചിക്കാട്ട് തുടങ്ങിയവർ സമരത്തില്‍ പങ്കെടുത്തു.

പാലാ നിയോജകമണ്ഡലത്തിലെ വികസന പ്രവര്‍ത്തനങ്ങള്‍ ഏറ്റെടുക്കാനുള്ള നീക്കം അപലപനീയം: മാണി സി. കാപ്പന്‍ എംഎല്‍എ

പാലാ: സര്‍ക്കാരില്‍നിന്നു ലഭ്യമാകുന്ന വിവിധ ഫണ്ടുകള്‍ മണ്ഡലത്തിന്‍റെ എല്ലാ ഭാഗത്തും എത്തിക്കുന്ന രീതിയില്‍ ചെലവഴിക്കുന്നുവെങ്കിലും ഇതിന്‍റെ ക്രെഡിറ്റ് അവകാശപ്പെട്ട് ചിലര്‍ രംഗത്തു വരുന്നത് അപലപനീയമെന്ന് മാണി സി. കാപ്പന്‍ എംഎല്‍എ പത്രസമ്മേളനത്തില്‍ പറഞ്ഞു. സര്‍ക്കാരിന്‍റെ വികസന ഫണ്ടുകള്‍ ലഭ്യമാകുന്നത് പ്രധാനമായും മണ്ഡലത്തിലെ തെരഞ്ഞെടുക്കപ്പെട്ട എംഎല്‍എയുടെ ശിപാര്‍ശ പ്രകാരവും ഡിപ്പാര്‍ട്ട്‌മെന്‍റുകള്‍ ഓരോ വര്‍ഷത്തെയും ബജറ്റുകളില്‍ ഉള്‍പ്പെടുത്തുന്നതിന് സമര്‍പ്പിക്കുന്ന പദ്ധതികളുടെ അടിസ്ഥാനത്തിലുമാണ്. നൂറു വര്‍ഷം പൂര്‍ത്തിയായ സ്‌കൂളുകള്‍ നവീകരിക്കുന്നതിനുള്ള പദ്ധതി 2020-21 ബജറ്റില്‍ എംഎല്‍എ എന്ന നിലയില്‍ ക്രമനമ്പര്‍ രണ്ടു മുതല്‍ ഏഴു വരെയായി മുന്‍ഗണന നല്‍കി താന്‍ സമര്‍പ്പിച്ചതാണ്. 2020-21 മുതല്‍ 2025-26 വരെ ബജറ്റില്‍ പ്രൊപ്പോസ് ചെയ്ത എല്ലാ പ്രോജക്‌ടുകളുടെയും പ്രാഥമിക നടപടിക്രമങ്ങള്‍ പൂര്‍ത്തീകരിച്ച് പദ്ധതികള്‍ വിവിധ ഘട്ടങ്ങളിലാണ്. എന്നാല്‍ ഇതിന്‍റെ ഉത്തരവാദിത്വം മറ്റു ചിലര്‍ ഏറ്റെടുക്കുന്നത് ആക്ഷേപകരമാണ്. എംഎല്‍എ ഫണ്ടില്‍ ഗവണ്‍മെന്‍റിന്‍റെ പ്രത്യേകാനുമതിയോടു കൂടി മാത്രം നടപ്പാക്കേണ്ട 12 പദ്ധതികളാണ് ഒരു വര്‍ഷത്തിലധികമായി അനുമതി ലഭിക്കാത്തതിനാൽ തുടങ്ങാന്‍ സാധിക്കാത്തത്. തദ്ദേശ റോഡ് പുനരുദ്ധാരണ പദ്ധതിയില്‍ 2020-21ല്‍ 9.30 കോടി രൂപ പാലാ നിയോജകമണ്ഡലത്തിന് ലഭിച്ചു. 2024-25 സാമ്പത്തിക വര്‍ഷം ബജറ്റില്‍ 1000 കോടി രൂപ വകയിരുത്തിയെങ്കിലും പാലാ നിയോജകമണ്ഡലത്തില്‍ കേവലം 4.25 കോടി രൂപയാണ് ലഭിച്ചത്. താന്‍ എംഎല്‍എ ആകുന്നതിനും ദീര്‍ഘകാലം മുമ്പ് വേണ്ടത്ര പഠനമോ പ്രായോഗികതയോ പരിഗണിക്കാതെ വാക്കാല്‍ നിര്‍ദേശിച്ചും ഉദ്യോഗസ്ഥരുടെ മേല്‍ സമ്മര്‍ദ്ദം ചെലുത്തിയും ഏറ്റെടുത്ത ചില പ്രോജക്‌ടുകള്‍ ഇപ്പോഴും പൂര്‍ത്തിയാവാനുണ്ടെന്നത് യാഥാര്‍ഥ്യമാണ്. പൊതു ആവശ്യത്തിന് ഏറ്റെടുക്കുന്ന വസ്തുവിന് സ്ഥലത്തിന്‍റെ പ്രാധാന്യം പരിഗണിക്കാതെ വ്യക്തിവൈരാഗ്യം തീര്‍ക്കുന്ന രീതിയില്‍ വില നിര്‍ണയിച്ച് ബൈപാസ് നിര്‍മാണം സങ്കീര്‍ണമാക്കിയത് അന്നത്തെ ഭരണാധികാരികള്‍ തന്നെയാണ്. നിരന്തരമായ ഇടപെടലിലൂടെ അതിലൊരു ഭാഗം പൂര്‍ത്തീകരിക്കാന്‍ കഴിഞ്ഞു. മരിയന്‍ ആശുപത്രിയോട് ചേര്‍ന്ന സ്ഥലവും വീടും ഏറ്റെടുക്കല്‍ ഹൈക്കോടതിയുടെ പരിഗണനയിലാണ്. റിവര്‍വ്യൂ റോഡിന്‍റെ അലൈൻ‌മെന്‍റ് നിശ്ചയിച്ചതിലും സ്ഥലം ഏറ്റെടുപ്പിലും വന്ന അപാകത, കളരിയാമ്മാക്കല്‍ ചെക്ക്ഡാം കം ബ്രിഡ്ജിന് അപ്രോച്ച് റോഡ് നിര്‍മിക്കുന്നതിന് സ്ഥലം ഏറ്റെടുക്കല്‍ തുടങ്ങിയ കാര്യങ്ങളില്‍ ഉടനടി തീരുമാനമാകുമെന്നും അദ്ദേഹം പറഞ്ഞു.

വിപണനരംഗത്ത് കർഷകർ നേരിടുന്ന ചൂഷണം ഇല്ലാതാകണം: സെബാസ്റ്റ്യൻ കുളത്തുങ്കൽ എംഎൽഎ

തലനാട്: വിപണനവുമായി ബന്ധപ്പെട്ട് കർഷകർ നേരിടുന്ന ചൂഷണത്തിന്‍റെ തോത് ഇല്ലാതാവുകയും അധ്വാനത്തിന്‍റെ യഥാർഥ പ്രയോജനം ഉത്പാദകരായ കർഷകർക്ക് ലഭ്യമാവുകയും ചെയ്യുന്ന സാഹചര്യം ഉണ്ടാവേണ്ടതുണ്ടെന്ന് സെബാസ്റ്റ്യൻ കുളത്തുങ്കൽ എംഎൽഎ. നബാർഡിന്‍റെ പിന്തുണയോടെ ഭൂമിക പ്രമോട്ട് ചെയ്യുന്ന തലനാട് ഫാർമേഴ്സ് പ്രൊഡ്യൂസർ കമ്പനിയുടെ ഉദ്ഘാടനം നിർവഹിച്ച് പ്രസംഗിക്കുകയായിരുന്നു അദ്ദേഹം. കമ്പനി ചെയർപേഴ്സൺ നിഷാ ഡെന്നീസ് അധ്യക്ഷത വഹിച്ചു. കമ്പനി മാനേജിംഗ് ഡയറക്ടർ പി.എസ്. ബാബു ആമുഖപ്രസംഗം നടത്തി. തീക്കോയിയിൽ ആരംഭിച്ച ഓഫീസും കമ്പനി ഔട്ട്‌ലെറ്റും ഈരാറ്റുപേട്ട ബ്ലോക്ക് പഞ്ചായത്ത് പ്രസിഡന്‍റ് മറിയാമ്മ ഫെർണാണ്ടസ് ഉദ്ഘാടനം ചെയ്തു. കമ്പനി ഓഹരി സർട്ടിഫിക്കറ്റുകളുടെ കൈമാറ്റം ഈരാറ്റുപേട്ട മുനിസിപ്പൽ ചെയർപേഴ്സൺ സുഹ്റ അബ്ദുൾ ഖാദർ, തിക്കോയി പഞ്ചായത്ത് പ്രസിഡന്‍റ് കെ.സി. ജയിംസ്, തലനാട് പഞ്ചായത്ത് പ്രസിഡന്‍റ് രജനി സുധാകരൻ, പൂഞ്ഞാർ പഞ്ചായത്ത് പ്രസിഡന്‍റ് ഗീതാ നോബിൾ, ഈരാറ്റുപേട്ട ബ്ലോക്ക് പഞ്ചായത്ത് വൈസ് പ്രസിഡന്‍റ് കുര്യൻ നെല്ലുവേലിൽ എന്നിവർ നിർവഹിച്ചു. കൃഷി അസിസ്റ്റന്‍റ് ഡയറക്ടർ അശ്വതി വിജയൻ ആദ്യ വില്പന നിർവഹിച്ചു.

തുക അനുവദിക്കുന്ന പദ്ധതികള്‍ പോലും പാലായില്‍ നടപ്പാക്കുന്നില്ലെന്ന് എല്‍ഡിഎഫ്

പാലാ: മുന്‍ മന്ത്രി കെ.എം. മാണി നടപ്പിലാക്കിയ വികസന പ്രവര്‍ത്തനങ്ങളില്‍ പൂര്‍ത്തീകരിക്കാന്‍ ഉണ്ടായിരുന്നതുപോലും പൂര്‍ത്തീകരിക്കാനോ പുതിയത് നടപ്പിലാക്കാനോ മാണി സി. കാപ്പന്‍ എംഎല്‍എയ്ക്ക് ഇതേവരെ കഴിഞ്ഞിട്ടില്ലെന്ന് എല്‍ഡിഎഫ് പാലാ നിയോജകമണ്ഡലം കമ്മിറ്റി. പഴയതല്ലാതെ എംഎല്‍എയുടെ സ്വന്തമായി പുതിയതായി ഒന്നും ഈ മണ്ഡലത്തില്‍ കാണുന്നില്ല. പാലായിലെ കഴിഞ്ഞ അഞ്ചു വര്‍ഷത്തെ അദ്ദേഹത്തിന്‍റെ വികസന പരാജയത്തിന്‍റെ കണക്കും ഓരോ പഞ്ചായത്തിലെയും മുനിസിപ്പാലിറ്റിയിലെയും വികസനമുടക്കവും കൃത്യമായി എല്‍ഡിഎഫ് ഏതാനും ദിവസങ്ങള്‍ക്കുള്ളില്‍ പാലായിലെ വോട്ടര്‍മാരെ അറിയിക്കുമെന്നും എല്‍ഡിഎഫ് നേതാക്കള്‍ പ്രസ്താവിച്ചു. യോഗത്തില്‍ ബാബു കെ. ജോര്‍ജ് അധ്യക്ഷത വഹിച്ചു. എല്‍ഡിഎഫ് ജില്ലാ കണ്‍വീനര്‍ പ്രഫ. ലോപ്പസ് മാത്യു, ലാലിച്ചന്‍ ജോര്‍ജ്, ടോബിന്‍ കെ. അലക്‌സ് എന്നിവര്‍ പ്രസംഗിച്ചു.

മൂന്നിലവ് കട്ടിക്കയം അരുവിയിൽ ഗാലറിയും വാക്ക് വേയും ഉദ്ഘാടനം ചെയ്തു

മൂന്നിലവ്: പഞ്ചായത്തിലെ പ്രധാന ടൂറിസം കേന്ദ്രമായ കട്ടിക്കയം അരുവിയിലേക്ക് എത്തുന്ന നടപ്പാലത്തിന്‍റെ ഉദ്ഘാടനം ജില്ലാ പഞ്ചായത്ത് മെംബർ ഷോൺ ജോർജ് നിർവഹിച്ചു. മൂന്നിലവ് പഞ്ചായത്ത് പ്രസിഡന്‍റ് ചാർളി ഐസക് അധ്യക്ഷത വഹിച്ചു. ജില്ലാ പഞ്ചായത്ത് പദ്ധതിയിൽ ഉൾപ്പെടുത്തി പത്തുലക്ഷം രൂപ അനുവദിച്ചാണ് പദ്ധതി യാഥാർഥ്യമാക്കിയത്. വെള്ളച്ചാട്ടത്തിന്‍റെ മനോഹാരിത ആസ്വദിക്കാൻ എത്തിച്ചേരുന്ന വിനോദസഞ്ചാരികൾ അപകടത്തിൽപ്പെടുന്നത് നിത്യസംഭവമായിരുന്നു. ഇതിന് പരിഹാരമായാണ് വിനോദസഞ്ചാരികൾക്ക് സുരക്ഷിതമായി വെള്ളച്ചാട്ടം കാണാൻ കഴിയുന്ന രീതിയിൽ പ്രദേശത്തേക്ക് എത്തിച്ചേരാൻ നടപ്പാലം നിർമിച്ചിരിക്കുന്നത്. സമാനമായ രീതിയിൽ മാർമല അരുവിയിലും ഇലവീഴാപൂഞ്ചിറയിലും ടൂറിസം വികസനത്തിനായി കൂടുതൽ തുക അനുവദിച്ചിട്ടുണ്ട്. പൂഞ്ഞാർ ഡിവിഷനിലെ പ്രകൃതിമനോഹരമായ ടൂറിസം കേന്ദ്രങ്ങളുടെ നവീകരണത്തിനായി ജില്ലാ പഞ്ചായത്ത് പദ്ധതിയിൽ ഉൾപ്പെടുത്തി പുതിയ പദ്ധതികൾ വിഭാവനം ചെയ്തിട്ടുണ്ടെന്നും ഷോൺ ജോർജ് പറഞ്ഞു.

മുണ്ടാങ്കലിൽ മോഷണശ്രമം

പാലാ: മുണ്ടാങ്കല്‍, ഇളന്തോട്ടം പ്രദേശങ്ങളിൽ കഴിഞ്ഞ ദിവസം പുലര്‍ച്ചെ പല വീടുകളിലും മോഷണശ്രമം. സിസിടിവി ദൃശ്യങ്ങളില്‍ ഇക്കാര്യം വ്യക്തമായതോടെ ആള്‍ക്കാര്‍ ജാഗ്രത പാലിക്കണമെന്ന് പാലാ ഡിവൈഎസ്പി കെ. സദന്‍ അറിയിച്ചു. ലഭിച്ച സിസിടിവി ദൃശ്യങ്ങള്‍ പരിശോധിച്ചു വരികയാണ്. വിവിധ മോഷണക്കേസുകളിലെ പ്രതിയാണ് മോഷണശ്രമം നടത്തുന്നതെന്നും പരിഭ്രാന്തി വേണ്ടെന്നും ഉള്‍വഴികളില്‍ രാത്രി പട്രോളിംഗ് സജീവമാക്കിയതായും പോലീസ് അറിയിച്ചു.

എസ്എസ്എല്‍സി ഹാട്രിക് വിജയം: പാലാ വിദ്യാഭ്യാസ ജില്ലയെ അനുമോദിച്ചു

കോട്ടയം: എസ്എസ്എല്‍സി പരീക്ഷയില്‍ തുടര്‍ച്ചയായി മൂന്നാം തവണയും നൂറു ശതമാനം വിജയം നേടിയ പാലാ വിദ്യാഭ്യാസ ജില്ലയ്ക്ക് വിദ്യാഭ്യാസ വകുപ്പിന്‍റെ അനുമോദനം. ജില്ലാ വിദ്യാഭ്യാസ ഓഫീസില്‍ നടന്ന യോഗത്തില്‍ ഡിഡിഇ ഇന്‍ ചാര്‍ജ് എം.ആര്‍. സുനിമോള്‍ വിദ്യാഭ്യാസ വകുപ്പിന്‍റെ വകയായുള്ള മെമന്‍റോ പാലാ ഡിഇഒ സി. സത്യപാലന് കൈമാറി. എന്‍റെ കേരളം പ്രദര്‍ശന-വിപണന മേളയില്‍ മികച്ച സ്റ്റാളായി തെരഞ്ഞെടുക്കപ്പെട്ട പൊതു വിദ്യാഭ്യാസ വകുപ്പിന്‍റെ സ്റ്റാളില്‍ മികച്ച പ്രകടനം കാഴ്ചവച്ച സ്‌കൂളുകളെയും ആദരിച്ചു. പനമറ്റം ഗവണ്‍മെന്‍റ് എച്ച്എസ്എസ്, നാട്ടകം ഗവണ്‍മെന്‍റ് വിഎച്ച്എസ്എസ്, മരങ്ങാട്ടുപിള്ളി സെന്‍റ് തോമസ് ഹൈസ്‌കൂളുകളെയാണ് ആദരിച്ചത്. ഡിഡിഇ ഇന്‍ ചാര്‍ജ് എം.ആര്‍. സുനിമോള്‍ ഉദ്ഘാടനം ചെയ്തു. അഡ്മിനിസ്‌ട്രേറ്റീവ് അസിസ്റ്റന്‍റ് എസ്. ശ്രീകുമാര്‍ അധ്യക്ഷത വഹിച്ചു. കാഞ്ഞിരപ്പള്ളി ഡിഇഒ റോഷ്ണ അലിക്കുഞ്ഞ്, എസ്എസ്‌കെ ജില്ലാ പ്രോഗ്രാം ഓഫീസര്‍ കെ.ജെ. പ്രസാദ്, ഡിഐഇടി പ്രതിനിധി പ്രസാദ്, കൈറ്റ് പ്രതിനിധി ജയശങ്കര്‍, വിഎച്ച്എസ്‌സി പ്രതിനിധി തോമസ് മാത്യു, എസ്എസ്‌കെ പ്രതിനിധി ബിനു ഏബ്രഹാം എന്നിവര്‍ പ്രസംഗിച്ചു.

പരിക്കേറ്റു

പാലാ: ബൈക്ക് നിയന്ത്രണംവിട്ട് മറിഞ്ഞ് പരിക്കേറ്റ രണ്ടു പേരെ ചേര്‍പ്പുങ്കല്‍ മാര്‍ സ്ലീവാ മെഡിസിറ്റിയില്‍ പ്രവേശിപ്പിച്ചു. പുന്നവേലിയിലുണ്ടായ അപകടത്തില്‍ മൂവാറ്റുപുഴ സ്വദേശി ആന്‍റണി(47), പള്ളിക്കത്തോടുണ്ടായ അപകടത്തില്‍ ചെങ്ങളം സ്വദേശി ജസ്‌ലിന്‍ ടോമിൻ (24) എന്നിവർക്കാണു പരിക്കേറ്റത്. പാലാ: കാറും സ്‌കൂട്ടറും കൂട്ടിയിടിച്ചു പരിക്കേറ്റ സ്‌കൂട്ടര്‍ യാത്രക്കാരന്‍ പാമ്പാടി സ്വദേശി സലിമോന്‍ കെ. വര്‍ഗീസിനെ (44 ) ചേര്‍പ്പുങ്കല്‍ മാര്‍ സ്ലീവാ മെഡിസിറ്റിയില്‍ പ്രവേശിപ്പിച്ചു. ഇന്നലെ ഉച്ചകഴിഞ്ഞ് രണ്ടോടെ പാലാ ഗവണ്‍മെന്‍റ് ആശുപത്രി ജംഗ്ഷനു സമീപമായിരുന്നു അപകടം.

മാതൃകയായി കാഞ്ഞിരപ്പള്ളി മേരിക്വീൻസ് ആശുപത്രി ജീവനക്കാർ

കാഞ്ഞിരപ്പള്ളി: കാഞ്ഞിരപ്പള്ളി മേരിക്വീൻസ് മിഷൻ ആശുപത്രിയിലെ ഫ്രണ്ട് ഓഫീസ് എക്സിക്യൂട്ടീവുകൾ തങ്ങളുടെ കൊച്ചുകൊച്ച് ആഗ്രഹങ്ങൾ മാറ്റിവച്ച് ആശുപത്രിയിലെത്തുന്ന ഡയാലിസിസ് രോഗികൾക്കായി നാലു മാസം കൊണ്ട് സമാഹരിച്ചത്‌ ഏഴായിരത്തോളം രൂപ. യാതൊരുവിധ പിരിവുകളും നടത്താതെ ഡ്യൂട്ടിക്കിടയിൽ പതിവുള്ള ചായയുടെയും കാപ്പിയുടെയും എണ്ണം കുറച്ചും ഇഷ്ടപ്പെട്ട മധുരപലഹാരങ്ങൾ വേണ്ടെന്നുവച്ചും തങ്ങൾ സമാഹരിച്ച തുകയാണ് അവർ ഒരു കുടുക്കയിൽ സൂക്ഷിച്ചത്. ഇത്തരമൊരു പദ്ധതി നടപ്പിലാക്കുന്ന കാര്യം ആശുപത്രിയിലെ ഫിനാൻഷ്യൽ അഡ്മിനിസ്ട്രേറ്റർ ഫാ. മാർട്ടിൻ മണ്ണനാൽ സിഎംഐയെ മാത്രം മുൻ‌കൂർ അറിയിച്ചിരുന്നു. അനുമതി നേടിയതിനൊപ്പം അച്ചൻ സമ്മാനമായി നൽകിയ മൺകുടുക്കയിൽ നിക്ഷേപം ആരംഭിക്കുകയും ചെയ്തു. നിശബ്‌ദമായി മുന്നോട്ടു പോയി നാലു മാസങ്ങൾ കഴിഞ്ഞപ്പോൾ നിറഞ്ഞു തുളുമ്പിയ മൺകുടുക്കയുമായി ഇന്നലെ രാവിലെ ആശുപത്രിയുടെ പബ്ലിക് റിലേഷൻസ് ഓഫീസിലെത്തി തങ്ങളുടെ ആഗ്രഹം അറിയിച്ചപ്പോഴാണ് ആശുപത്രിയിലെ മറ്റു ജീവനക്കാർ ഈ കാര്യം അറിഞ്ഞത്. ദേശീയ റിസപ്ഷനിസ്റ്റ് ദിനമായ ഇന്നുതന്നെ പണം ആശുപത്രിയുടെ ഡയാലിസിസ് സഹായ നിധിയിലേക്ക് കൈമാറുമെന്നും തങ്ങളുടെ ആഗ്രഹം പൂർത്തീകരിക്കാൻ സാധിച്ചുവെന്നതിൽ അഭിമാനിക്കുന്നുവെന്നും ഇത്തരം പ്രവർത്തനങ്ങൾ തുടരുമെന്നും ഫ്രണ്ട് ഓഫീസ് എക്സിക്യൂട്ടീവ് ഇൻചാർജ് ശരണ്യ സുരേഷ് പറഞ്ഞു. പദ്ധതിയുടെ പിന്നിൽ പ്രവർത്തിച്ച ഫ്രണ്ട് ഓഫീസ് എക്സിക്യൂട്ടീവുകളായ അലീന, സുലു, ജോളി, ജിൻസു, നീതു, ടീന, ക്രിസ്റ്റി, ശില്പ എന്നിവരെ ആശുപത്രി അധികൃതർ അഭിനന്ദിച്ചു.

ഡെങ്കിപ്പനി: പൊരിയന്മല വാർഡിൽ പ്രതിരോധ പ്രവർത്തനങ്ങൾ

എരുമേലി: പൊരിയന്മല വാർഡിൽ നാല് പേർക്ക് ഡെങ്കിപ്പനി ലക്ഷണങ്ങൾ കണ്ടെത്തിയതിനെ തുടർന്ന് എരുമേലി സാമൂഹികാരോഗ്യം ഹെൽത്ത് വിഭാഗത്തിന്‍റെ നേതൃത്വത്തിൽ പ്രതിരോധ പ്രവർത്തനങ്ങൾ തുടങ്ങി. ഹെൽത്ത്‌ ഇൻസ്പെക്ടറുടെ നേതൃത്വത്തിൽ ജൂനിയർ ഹെൽത്ത് ഇൻസ്പെക്ടർമാർ, ജൂനിയർ പബ്ലിക് ഹെൽത്ത് നഴ്സുമാർ, ആശപ്രവർത്തകർ എന്നിവർ ചേർന്ന് കൊതുകുകളുടെ ഊർജ്ജിത ഉറവിട നശീകരണ പ്രവർത്തനം, ഫീവർ സർവെ, ഡെങ്കിപ്പനിയെക്കുറിച്ചുള്ള ബോധവൽക്കരണ നോട്ടീസ് വിതരണം, ആരോഗ്യ ബോധവൽക്കരണ ക്ലാസ് എന്നിവയും ഫോഗിംഗ് ഉൾപ്പെടെയുള്ള ബോധവൽക്കരണ പ്രവർത്തനങ്ങൾ സംഘടിപ്പിച്ചെന്ന് അധികൃതർ അറിയിച്ചു. കൂത്താടികളുടെ സാന്നിധ്യം കൂടുതൽ കാണപ്പെട്ട വീടുകളിൽ പൊതുജനാരോഗ്യ നിയമപ്രകാരം നോട്ടീസുകൾ നൽകി.

സെന്‍റ് ആന്‍റണീസ് കോളജിൽ കോൺവക്കേഷൻ പ്രോഗ്രാം

പെരുവന്താനം: സെന്‍റ് ആന്‍റണീസ് കോളജിലെ പോസ്റ്റ് ഗ്രാജുവേഷന്‍ പ്രോഗ്രാമുകളുടെ കോൺവക്കേഷൻ സംഘടിപ്പിച്ചു. പ്രഫ. ബാബു ജോസഫ് ഉദ്ഘാടനം നിർവഹിച്ചു. കോളജ് ചെയർമാൻ ബെന്നി തോമസ് അധ്യക്ഷത വഹിച്ചു. പ്രിൻസിപ്പൽ ഡോ. ആന്‍റണി ജോസഫ് കല്ലമ്പള്ളി, ഫാ. ജോസഫ് വാഴപ്പനാടി, വകുപ്പ് മേധാവി ടിജോമോൻ ജേക്കബ്‌, ജിനു തോമസ്, വൈസ് പ്രിന്‍സിപ്പല്‍ സുപർണ രാജു എന്നിവർ പ്രസംഗിച്ചു. വര്‍ണാഭമായ കോൺവക്കേഷൻ സെറിമണിക്ക് മുന്നോടിയായി അക്കാദമിക് പ്രോസഷന്‍ സംഘടിപ്പിച്ചു. തുടർന്ന് സർട്ടിഫിക്കറ്റുകളും വിതരണം ചെയ്തു. തുടർന്ന് വിവിധ കലാപരിപാടികളും സംഘടിപ്പിച്ചു. ‌ആധുനിക കാലഘട്ടത്തിൽ വിദ്യാർഥികളിലെ ആത്മവിശ്വാസം വളര്‍ത്തി പ്രതികൂല സാഹചര്യങ്ങളില്‍ പ്രതീക്ഷ കൈവിടാതെ ജീവിതത്തിലെ മുഖ്യലക്ഷ്യത്തിൽ എത്തിച്ചേരാൻ പ്രാപ്തമാക്കുന്നതിനുവേണ്ടിയാണ് ഇത്തരത്തിലുള്ള പ്രോഗ്രാം സംഘടിപ്പിക്കുന്നതെന്ന് കോളജ് അധികൃതർ വ്യക്തമാക്കി.

അകാലത്തിൽ മരണമടഞ്ഞ അരുണിന് മികച്ച വിജയം

കാഞ്ഞിരപ്പള്ളി: പരീക്ഷാഫലം കാത്തിരിക്കവേ അകാലത്തിൽ മരണമടഞ്ഞ അരുൺ ഇഗ്നേഷ്യസിന് സിബിഎസ്ഇ പ്ലസ് ടു പരീക്ഷയിൽ മികച്ച വിജയം. ഇടക്കുന്നം മേരിമാതാ പബ്ലിക് സ്കൂളിലെ വിദ്യാർഥിയായിരുന്ന അരുൺ കാൻസർ ബാധിതനായിരിക്കെ കഴിഞ്ഞ അഞ്ചിനാണ് മരണമടഞ്ഞത്. കീമോതെറാപ്പിയുടെ അവശതകൾക്കിടയും പരീക്ഷയെഴുതിയ അരുണിന് 70 ശതമാനം മാർക്ക് നേടാനായി. ഇഞ്ചിയാനി പുന്നത്തറയിൽ ഇഗ്നേഷ്യസ് ജോസഫ് - മിനി ജോർജ് ദന്പതികളുടെ മകനാണ് അരുൺ.

നൂറുമേനി ഫൊറോന മത്സരം നാളെ

ചങ്ങനാശേരി: ചങ്ങനാശേരി അതിരൂപത ബൈബിൾ അപ്പൊസ്ത‌ലേറ്റും മാക് ടിവിയും ശാലോം ടിവിയും സംയുക്തമായി ജൂബിലി വർഷത്തിൽ നടത്തുന്ന കുടുംബ ബൈബിൾ വചന മനഃപ്പാഠ പദ്ധതി നൂറുമേനി സീസൺ-3 ഫൊറോനാ മത്സരം നാളെ ഉച്ചകഴിഞ്ഞ് രണ്ടിന് അതിരൂപതയുടെ 18 ഫൊറോനകളിലെ പരീക്ഷാകേന്ദ്രങ്ങളിൽ വച്ച് നടത്തപ്പെടും. ഫൊറോന വികാരിമാർ മത്സരം ഉദ്ഘാടനം ചെയ്യും. കുടുംബക്കൂട്ടായ്‌മ - ബൈബിൾ അപ്പൊസ്തലേറ്റ് ഫൊറോന ഡയറക്ടറും ആനിമേറ്ററും ഫൊറോന സമിതിയും മത്സരത്തിന് നേതൃത്വം നൽകും. നൂറുമേനി ഫൊറോനാ മത്സരത്തിൽ പങ്കെടുക്കാൻ യോഗ്യത ലഭിച്ചവരുടെ പേരു വിവരങ്ങൾ നൂറുമേനി സൈറ്റിൽ അപ്‌ലോഡ് ചെയ്തതിന്‍റെ പ്രിന്‍റെടുത്ത് ഇടവക വികാരിയുടെ ഒപ്പോടുകൂടിയ സാക്ഷ്യപത്രം സമർപ്പിക്കണമെന്ന് ഡയറക്ടർ ഫാ. ജോർജ് മാന്തുരുത്തിൽ, നൂറുമേനി ചെയർമാൻ സണ്ണിച്ചൻ ഇടിമണ്ണിക്കൽ എന്നിവർ അറിയിച്ചു. വിശദാംശങ്ങൾക്ക് ഫോൺ: +91 99613 69380, +91 73062 08356.

മണിമല ഹോളി മാഗി ഫൊറോന പള്ളി ദ്വിശതാബ്ദി ആഘോഷ സമാപനവും തിരുനാളും

കാഞ്ഞിരപ്പള്ളി: മണിമല ഹോളി മാഗി ഫൊറോന പള്ളി ദ്വിശതാബ്ദി ആഘോഷങ്ങളുടെ സമാപനവും വിശുദ്ധ ഗീവർഗീസ് സഹദായുടെ തിരുനാളും കല്ലിട്ടതിരുനാളും ഇടവകദിനവും ഇന്നും നാളെയും നടക്കുമെന്ന് വികാരി ഫാ. മാത്യു താന്നിയത്ത് പത്രസമ്മേളനത്തിൽ അറിയിച്ചു. ഇന്ന് രാവിലെ ആറിന് വിശുദ്ധ കുർബാന, 6.45ന് കൊടിയേറ്റ്, ഏഴിന് വിശുദ്ധ കുർബാന, വൈകുന്നേരം അഞ്ചിന് നെല്ലിത്താനം കുരിശടിയിൽ റംശ- കാഞ്ഞിരപ്പള്ളി രൂപതാധ്യക്ഷൻ മാർ ജോസ് പുളിക്കൽ കാർമികത്വം വഹിച്ച് സന്ദേശം നൽകും. ആറിന് പള്ളിയിലേക്ക് പ്രദക്ഷിണം, രാത്രി ഏഴിന് ഗാനമേള. നാളെ രാവിലെ 5.30ന് വിശുദ്ധ കുർബാന, 8.30ന് ഷംഷാബാദ് രൂപത സഹായമെത്രാൻ മാർ തോമസ് പാടിയത്തിന്‍റെ മുഖ്യകാർമികത്വത്തിൽ വിശുദ്ധ കുർബാന. തുടർന്ന് 10.30ന് നടക്കുന്ന പൊതുസമ്മേളനം മാർ തോമസ് പാടിയത്ത് ഉദ്ഘാടനം ചെയ്യും. ചങ്ങനാശേരി അതിരൂപത പ്രോട്ടോസിഞ്ചെല്ലൂസ് മോൺ. ആന്‍റണി എത്തയ്ക്കാട്ട് അധ്യക്ഷത വഹിക്കും. എകെസിസി ചങ്ങനാശേരി അതിരൂപത പ്രസിഡന്‍റ് ബിജു സെബാസ്റ്റ്യൻ ജൂബിലി സന്ദേശം നൽകും. വികാരി ഫാ. മാത്യു താന്നിയത്ത്, അസിസ്റ്റന്‍റ് വികാരി ഫാ. വർഗീസ് ചിറയിൽ, ഫാ. ബിനീഷ് ഏറത്തേടം, ഫാ. സെബാസ്റ്റ്യൻ കളത്തിപ്പറമ്പിൽ, കൈക്കാരൻ റോയിസ് ജോസഫ് കടന്തോട്ട് എന്നിവർ പ്രസംഗിക്കും. പാരീഷ്‌ കൗൺസിൽ സെക്രട്ടറി ബെന്നി തോമസ് റിപ്പോർട്ട് അവതരിപ്പിക്കും. വിവാഹത്തിന്‍റെ 50, 25 വർഷ ജൂബിലിക്കാരെയും നൂറുമേനി സീസൺ മൂന്ന് ഇടവകതല വിജയികളെയും യോഗത്തിൽ അനുമോദിക്കും. ജൂബിലി ജനറൽ കൺവീനർ ജോസ് വർഗീസ് കൂനംകുന്നേൽ, ജോയിന്‍റ് കൺവീനർ എൽ.ജെ. മാത്യു ളാനിത്തോട്ടം, കൈക്കാരന്മാരായ ജോസ് കൊള്ളിക്കുളവിൽ, ജോസ് പുളിച്ചുമാക്കൽ, റോയിസ് ജോസഫ് കടന്തോട്ട്, മീഡിയ കൺവീനർ ജോസഫ് ആന്‍റണി എന്നിവർ നേതൃത്വം നൽകും.

അനുമതിയില്ലാതെ റൗണ്ടാന; പൊല്ലാപ്പായി

പാലാ: നേരം ഇരുട്ടി വെളുത്തപ്പോള്‍ ടൗണില്‍ സിവില്‍ സ്റ്റേഷന്‍ ജംഗ്ഷനില്‍ ഒരു റൗണ്ടാന. സിമന്‍റ് ഇഷ്ടിക ഉപയോഗിച്ചുള്ള റൗണ്ടാന രാത്രിയില്‍ ഒരു സംഘം പൊതുപ്രവര്‍ത്തകരാണ് ഉണ്ടാക്കിയത്. സദുദ്ദേശ്യത്തോടെയാണ് താത്കാലിക റൗണ്ടാന സ്ഥാപിച്ചതെങ്കിലും നേരം പുലര്‍ന്നതോടെ വാഹന ഗതാഗതം താറുമാറായി. അധികൃതരുടെ അനുമതി ഇല്ലാതെ സ്ഥാപിച്ച റൗണ്ടാന ചില്ലറ പണിയൊന്നുമല്ല പോലീസിന് ഉണ്ടാക്കിയത്. പുലര്‍ച്ചെ മുതല്‍ പോലീസുംസമീപത്തെ ഓട്ടോറിക്ഷാ ഡ്രൈവര്‍മാരും ഏറെ പണിപ്പെട്ടിട്ടും ഈ ഭാഗത്ത് ഗതാഗതം നിയന്ത്രിക്കാനായില്ല. ഗതാഗത തടസത്തെത്തുടര്‍ന്ന് പ്രതിഷേധം രൂക്ഷമായതോടെ നഗരസഭയും പോലീസും ഇടപെട്ട് സിമന്‍റ് ഇഷ്ടിക മാറ്റുകയായിരുന്നു. അനുമതിയില്ലാതെ റൗണ്ടാന സ്ഥാപിച്ച പൊതുപ്രവര്‍ത്തകരുടെ പ്രവൃത്തിയില്‍ നടപടിയെടുക്കുമെന്ന് പോലീസ് പറഞ്ഞു.

കിണറ്റിലെ കുടിവെള്ളത്തില്‍ ദ്രാവക രൂപത്തിലുള്ള കീടനാശിനി ഒഴിച്ച് കുടുംബാംഗങ്ങളെ അപായപ്പെടുത്താന്‍ ശ്രമം

കടുത്തുരുത്തി: കിണറ്റിലെ കുടിവെള്ളത്തില്‍ ദ്രാവക രൂപത്തിലുള്ള കീടനാശിനി ഒഴിച്ച് കുടുംബാംഗങ്ങളെ അപായപ്പെടുത്താന്‍ ശ്രമിച്ചതായി പരാതി. ഞീഴൂര്‍ പഞ്ചായത്തിലെ ഒന്നാംവാര്‍ഡില്‍പ്പെട്ട കാഞ്ഞിരംപാറ മാവേലില്‍ എം.ടി. പൗലോസി(ബാബു-60)ന്‍റെ വീട്ടിലെ കിണറ്റിലാണ് കഴിഞ്ഞദിവസം സാമൂഹികവിരുദ്ധര്‍ കീടനാശിനി ഒഴിച്ചത്. കിണറിലെ മലിനമായ വെള്ളം വറ്റിച്ച് കിണര്‍ വൃത്തിയാക്കിയാല്‍ മാത്രമേ കുടുംബത്തിന് കിണര്‍ വെള്ളം ഉപയോഗിക്കാനാകൂ. പൗലോസും കുടുംബവും മരണാനന്തര ചടങ്ങിനായി തൃശൂരില്‍ പോയി തിരികെ രാത്രിയിലാണ് വീട്ടില്‍വന്നത്. ടാങ്കിലെ വെള്ളം തീര്‍ന്നതിനെത്തുടര്‍ന്ന് മോട്ടോര്‍ അടിച്ചപ്പോള്‍ പൈപ്പിലൂടെ ലഭിച്ച വെള്ളം പൗലോസിന്‍റെ ഭാര്യ ലീലാമ്മ കുടിക്കാനെടുത്തപ്പോഴാണ് ദുർഗന്ധം അനുഭവപ്പെട്ടത്. തുടര്‍ന്ന് നടത്തിയ പരിശോധനയിലാണ് കിണറിനുള്ളിലെ വെള്ളത്തില്‍ കീടനാശിനി ഒഴിച്ചതാണ് വെള്ളം മോശമാകാന്‍ കാരണമെന്ന് വീട്ടുകാര്‍ക്ക് മനസിലായത്. ബാബുവും ഭാര്യയും കൂടാതെ മകനും വിവാഹിതയായ മകളും ഇവരുടെ രണ്ട് കൊച്ചുകുട്ടികളുമാണ് വീട്ടില്‍ താമസം. ഞീഴൂര്‍ പഞ്ചായത്തിലും ആരോഗ്യവകുപ്പ് അധികൃതരേയും വിവരം അറിയിച്ചതായി പൗലോസ് പറഞ്ഞു. സംഭവം സംബന്ധിച്ച് പൗലോസിന്‍റെ മകള്‍ എം.പി. ലിബിയ കടുത്തുരുത്തി പോലീസില്‍ പരാതി നല്‍കി.

വൈക്കം പുളിഞ്ചുവട്ടിൽ വീട് കത്തിനശിച്ചു

വൈക്കം: പുളിഞ്ചുവട്ടിൽ നാലാംഗ കുടുംബം താമസിച്ചിരുന്ന വീട് കത്തി നശിച്ചു. പുളിഞ്ചുവട് തോട്ടുപുറത്ത് ചെല്ലപ്പന്‍റെ വീടാണ് കത്തി നശിച്ചത്. ചെല്ലപ്പനും കുടുംബവും താമസിച്ചുവന്നിരുന്ന ആസ്ബറ്റോസ് ഷീറ്റുകൊണ്ട് നിർമിച്ചിരുന്ന വീടാണ് പൂർണമായി കത്തി നശിച്ചത്. ഇന്നലെ രാവിലെ 10.30നായായിരുന്നു സംഭവം. വീടിനു തീപിടിക്കുമ്പോൾ ചെല്ലപ്പന്‍റെ മകൻ ഉണ്ണികൃഷ്ണൻ മാത്രമാണ് വീട്ടിൽ ഉണ്ടായിരുന്നത്. പെട്ടെന്ന് തീ പടരുന്നതുകണ്ട് ഉണ്ണികൃഷ്ണൻ വീട്ടിൽനിന്ന് പുറത്തേക്ക് ഓടിയതിനാൽ ആളപായം ഉണ്ടായില്ല. തീ ആളികത്തുന്നതുകണ്ട് തൊഴിലുറപ്പ് ജോലിക്കായി പോയിരുന്ന അമ്മ ഓടിയെത്തി. തുടർന്ന് അടുത്തുള്ള നാട്ടുകാരെ അറിയിക്കുകയും ഇവർ ഫയർഫോഴ്സിൽ വിവരം അറിയിച്ച് ഫയർഫോഴ്സ് സംഘം എത്തിയാണ് തീ അണച്ചത്. ഇതിനകംതന്നെ വീട് പൂർണമായി കത്തി നശിച്ചിരുന്നു. കുടുംബാംഗങ്ങളുടെ ആധാർ, റേഷൻ കാർഡ്, വിദ്യാഭ്യാസ രേഖകൾ തുടങ്ങി പ്രധാനപ്പെട്ട എല്ലാ രേഖകളും ആധാരവും ഉൾപ്പെടെ കത്തി നശിച്ചു. ചെല്ലപ്പനും ഇളയ മകനും ഈ സമയം സ്ഥലത്ത് ഉണ്ടായിരുന്നില്ല. ഷോർട്ട് സർക്യൂട്ടാണ് തീപിടുത്തത്തിന് കാരണമായതെന്ന് കരുതുന്നു. വർഷങ്ങളായി കഴിയുന്ന വീടിനോട് ചേർന്ന് ലൈഫ് പദ്ധതിയിൽ ഉൾപ്പെടുത്തി പുതിയ വീടിന്‍റെ നിർമാണം നടന്നു വരുന്നതിനിടയിലാണ് താമസിച്ചുകൊണ്ടിരിക്കുന്ന വീട് ഇപ്പോൾ കുടുംബത്തിന് പൂർണമായി നഷ്ടപ്പെട്ടത്. വർഷങ്ങളായി താമസിച്ചുവന്നിരുന്ന വീട് നഷ്ടപ്പെട്ടതോടെ നിർധന കുടുംബം ദുരിതത്തിലായി.

ടോൾ - ചെമ്മനാകരി റോഡ് ഉദ്ഘാടനം 16ന്

വൈക്കം: സംസ്ഥാന ബജറ്റില്‍പ്പെടുത്തി ബിഎം ആൻഡ് ബിസി നിലവാരത്തില്‍ പുനര്‍നിര്‍മിച്ച മറവന്‍തുരുത്ത് പഞ്ചായത്തിലെ ടോള്‍ - ചെമ്മനാകരി റോഡ് 16ന് നാടിന് സമർപ്പിക്കും. വൈകുന്നേരം നാലിന്‌ മുഖ്യമന്ത്രി പിണറായി വിജയന്‍ ഓണ്‍ലൈനായാണ് ഉദ്ഘാടനം നിര്‍വഹിക്കുന്നത്. 2021-22 സംസ്ഥാന ബജറ്റില്‍പ്പെടുത്തി അഞ്ചു കോടി രൂപ വിനിയോഗിച്ചാണ് റോഡ് നവീകരിച്ചത്. റോഡിന്‍റെ ഉദ്ഘാടനവുമായി ബന്ധപ്പെട്ട് മറവന്‍തുരുത്ത് പഞ്ചായത്ത് ഹാളില്‍ ചേര്‍ന്ന സംഘാടകസമിതി രൂപീകരണയോഗം സി.കെ. ആശ എംഎല്‍എ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് പി. പ്രീതി അധ്യക്ഷത വഹിച്ചു. വൈസ് പ്രസിഡന്‍റ് വി.ടി. പ്രതാപന്‍, പഞ്ചായത്തംഗങ്ങളായ സീമബിനു, ബി. ഷിജു, ബിന്ദു പ്രദീപ്, സി. സുരേഷ്, പോള്‍ തോമസ്, മോഹന്‍ കെ. തോട്ടുപുറം എന്നിവര്‍ പ്രസംഗിച്ചു. സംഘാടകസമിതി ചെയര്‍മാനായി പഞ്ചായത്ത് പ്രസിഡന്‍റ് പി. പ്രീതിയെയും കണ്‍വീനറായി സെക്രട്ടറി കെ.സുരേഷ് കുമാറിനെയും തെരഞ്ഞെടുത്തു.

തിരുനാളിന് കൊടിയേറി

വെള്ളൂർ: മേവെള്ളൂർ മേരി ഇമ്മാക്കുലേറ്റ് ദേവാലയത്തിൽ പരിശുദ്ധ അമലോത്ഭവ മാതാവിന്‍റെ തിരുനാളിന് കൊടിയേറി. ഫാ. ജോർജ് കാട്ടേത്തിന്‍റെ കാർമ്മികത്വത്തിലാണ് കൊടിയേറിയത്. വികാരി ഫാ. അലക്സ് മേയ്ക്കാൻ തുരുത്തിൽ സഹകാർമികത്വം വഹിച്ചു. കൈക്കാരൻമാരായ കുര്യാക്കോസ് താഴക്കുഴി, സാബു തോട്ടത്തിൽ, വൈസ് ചെയർമാൻ കെ.സി. ജയിംസ്, പ്രസുദേന്തി ഷിബു പോൾ പടിഞ്ഞാറെവാലയിൽ, തിരുനാൾ കമ്മിറ്റി കൺവീനർ മാത്തുകുട്ടി തുരുത്തേൽ തുടങ്ങിയവർ നേതൃത്വം നൽകി. തുടർന്ന് നടന്ന വിശുദ്ധ കുർബാനയ്ക്ക് ഫാ. സാന്‍റോ കണ്ണമ്പുഴ കാർമികത്വം വഹിച്ചു. ഫാ. പീറ്റർ തിരുതനത്തിൽ വചനസന്ദേശം നൽകി.

സിപിഐ തലയോലപ്പറമ്പ് മണ്ഡലം സമ്മേളനം തുടങ്ങി

തലയോലപ്പറമ്പ്: അധികാര സ്ഥാനങ്ങളില്‍ ഉണ്ടെങ്കിലും ഇല്ലെങ്കിലും ജനങ്ങളുടെ കാവലായി നിലകൊള്ളേണ്ടവരാണ് കമ്യൂണിസ്റ്റുകാരെന്ന് സിപിഐ സംസ്ഥാന എക്‌സിക്യൂട്ടീവ് അംഗം മുല്ലക്കര രത്‌നാകരന്‍. സിപിഐ തലയോലപ്പറമ്പ് മണ്ഡലം സമ്മേളനത്തിന് തുടക്കംകുറിച്ച് ചെമ്പ് പോസ്റ്റ് ഓഫീസ് ജംഗ്ഷനിൽ നടന്ന പൊതുസമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. മണ്ഡലം സെക്രട്ടറി സാബു പി. മണലൊടി അധ്യക്ഷത വഹിച്ചു. സംസ്ഥാന കൗണ്‍സില്‍ അംഗം ആര്‍. സുശീലന്‍, ജില്ലാ അസിസ്റ്റന്‍റ് സെക്രട്ടറി ജോണ്‍ വി. ജോസഫ്, ജില്ലാ എക്‌സിക്യൂട്ടീവ് അംഗം ടി.എന്‍. രമേശന്‍, എം.ഡി. ബാബുരാജ്, കെ.ഡി. വിശ്വനാഥന്‍, പി.എസ്. പുഷ്പമണി, കെ.എസ്. രത്‌നാകരന്‍, എ.എം. അനി, കെ.എം. അബ്ദുല്‍ സലാം, എം.കെ. ശീമോന്‍, വി.കെ. ശശിധരന്‍ എന്നിവര്‍ പ്രസംഗിച്ചു.

നൂറുമേനി ഫൊറോനാതല മത്സരം നാളെ

ചങ്ങനാശേരി: ചങ്ങനാശേരി അതിരൂപത ബൈബിൾ അപ്പൊസ്ത‌ലേറ്റും മാക് ടിവിയും ശാലോം ടിവിയും സംയുക്തമായി ജൂബിലി വർഷത്തിൽ നടത്തുന്ന കുടുംബ ബൈബിൾ വചന മനഃപ്പാഠ പദ്ധതി നൂറുമേനി സീസൺ-3 ഫൊറോനാ മത്സരം നാളെ ഉച്ചകഴിഞ്ഞ് രണ്ടിന് അതിരൂപതയുടെ 18 ഫൊറോനകളിലെ പരീക്ഷാകേന്ദ്രങ്ങളിൽ വച്ച് നടത്തപ്പെടും. ഫൊറോന വികാരിമാർ മത്സരം ഉദ്ഘാടനം ചെയ്യും. കുടുംബക്കൂട്ടായ്‌മ - ബൈബിൾ അപ്പൊസ്തലേറ്റ് ഫൊറോന ഡയറക്ടറും ആനിമേറ്ററും ഫൊറോന സമിതിയും മത്സരത്തിന് നേതൃത്വം നൽകും. നൂറുമേനി ഫൊറോനാ മത്സരത്തിൽ പങ്കെടുക്കാൻ യോഗ്യത ലഭിച്ചവരുടെ പേരു വിവരങ്ങൾ നൂറുമേനി സൈറ്റിൽ അപ്‌ലോഡ് ചെയ്തതിന്‍റെ പ്രിന്‍റെടുത്ത് ഇടവക വികാരിയുടെ ഒപ്പോടുകൂടിയ സാക്ഷ്യപത്രം സമർപ്പിക്കണമെന്ന് ഡയറക്ടർ ഫാ. ജോർജ് മാന്തുരുത്തിൽ, നൂറുമേനി ചെയർമാൻ സണ്ണിച്ചൻ ഇടിമണ്ണിക്കൽ എന്നിവർ അറിയിച്ചു.

മാന്നാനം ആശ്രമ ദേവാലയത്തിൽ നാല്പതുമണി ആരാധന സമാപനം ഇന്ന്

മാന്നാനം: സെന്‍റ് ജോസഫ്സ് ആശ്രമ ദേവാലയത്തിൽ വിശുദ്ധ യൗസേപ്പിതാവിന്‍റെ തിരുനാളിനോടനുബന്ധിച്ചു നടന്നുവരുന്ന നാല്പതുമണി ആരാധന ഇന്നു സമാപിക്കും. ഇന്ന് രാവിലെ 5.30 മുതൽ 6.30 വരെ ആരാധന. 6.30ന് വിശുദ്ധ കുർബാന, പ്രസംഗം, മധ്യസ്ഥ പ്രാർഥന: സിഎംഐ തിരുവനന്തപുരം പ്രൊവിൻഷ്യൽ ഫാ. ആന്‍റണി ഇളന്തോട്ടം മുഖ്യ കാർമികത്വം വഹിക്കും. തുടർന്ന് ദിവ്യകാരുണ്യ പ്രദക്ഷിണത്തോടെ നാല്പതുമണി ആരാധന സമാപിക്കും. വിശുദ്ധ യൗസേപ്പിതാവിന്‍റെ തിരുനാളിന്‍റെ പ്രധാന ആഘോഷങ്ങൾ ഇന്നും നാളെയും നടക്കും. ഇന്ന് രാവിലെ ഒമ്പതിന് തിരുസ്വരൂപ പ്രതിഷ്ഠ. തുടർന്ന് വിശുദ്ധ കുർബാന, മധ്യസ്ഥ പ്രാർഥന. 11ന് വിശുദ്ധ കുർബാന, പ്രസംഗം, മധ്യസ്ഥപ്രാർഥന: ഫാ. സെബാസ്റ്റ്യൻ അട്ടിച്ചിറ (വികാർ പ്രൊവിൻഷ്യൽ, തിരുവനന്തപുരം പ്രോവിൻസ്). തുടർന്ന് വൈദിക വിദ്യാർഥികളുടെ മാതാപിതാക്കളുടെ സംഗമം. ഉച്ചകഴിഞ്ഞ് 3.30ന് പ്രസുദേന്തി കൂട്ടായ്മ. 4.30ന് തിരുനാൾ കുർബാന, മധ്യസ്ഥ പ്രാർഥന: മോൺ. ആന്‍റണി എത്തയ്ക്കാട്ട് (വികാരി ജനറാൾ, ചങ്ങനാശേരി അതിരൂപത). തുടർന്ന് പ്രദക്ഷിണം, ലദീഞ്ഞ്. തിരുനാൾ സന്ദേശം (ഫാത്തിമമാതാ കപ്പേളയിൽ): ഫാ. മാത്യു ചന്ദ്രൻകുന്നേൽ. തിരുനാൾ ദിനമായ നാളെ രാവിലെ 5.15ന് വിശുദ്ധ കുർബാന, മധ്യസ്ഥപ്രാർഥന. 6.15ന് സപ്രാ, വിശുദ്ധ കുർബാന, മധ്യസ്ഥ പ്രാർഥന: ഫാ. സന്തോഷ് മാത്തൻകുന്നേൽ (വികാർ പ്രൊവിൻഷ്യൽ, കോട്ടയം പ്രൊവിൻസ്). എട്ടിന് വിശുദ്ധ കുർബാന, മധ്യസ്ഥ പ്രാർഥന. 10ന് വിശുദ്ധ കുർബാന, പ്രസംഗം, മധ്യസ്ഥ പ്രാർഥന: മാർ ജോർജ് മഠത്തിക്കണ്ടത്തിൽ (കോതമംഗലം ബിഷപ്). സഹകാർമികർ: ഫാ. ജോസി താമരശേരി (വികാർ ജനറൽ സിഎംഐ കോൺഗ്രിഗേഷൻ), ഫാ. മാർട്ടിൻ മള്ളാത്ത് (ജനറൽ കൗൺസിലർ, സിഎംഐ കോൺഗ്രിഗേഷൻ). തുടർന്ന് ജോസഫ് നാമധാരികളുടെ സംഗമം, പ്രദക്ഷിണം, ഊട്ടുനേർച്ച. ഉച്ചകഴിഞ്ഞ് രണ്ടിന് സിഎംഐ വിദ്യാഭ്യാസ വത്സര പ്രഖ്യാപന സമ്മേളനം. ചങ്ങനാശേരി ആർച്ച്ബിഷപ് മാർ തോമസ് തറയിൽ മുഖ്യാതിഥിയാകും. വൈകുന്നേരം 4.30ന് വിശുദ്ധ കുർബാന, മധ്യസ്ഥപ്രാർഥന, ആറിന് വചന പ്രഘോഷണവും ആരാധനയും ബ്രദർ മാർട്ടിൻ പെരുമാലിൽ നയിക്കും.

കാളകെട്ടി അസീസിയിലെ വിദ്യാർഥികൾക്ക് മികച്ച വിജയം

കാഞ്ഞിരപ്പള്ളി: അകക്കണ്ണിന്‍റെ വെളിച്ചത്തിൽ കാളകെട്ടി അസീസി അന്ധവിദ്യാലയത്തിൽ നിന്നു പരീക്ഷയെഴുതിയ വിദ്യാർഥികൾക്ക് മികച്ച വിജയം. പാലപ്ര പുളിമൂട്ടിൽ മുഹമ്മദ് അൻസാർ, ഇടുക്കി എഴുകുംവയൽ ഡൊണാൾഡ് ഷാജി, പത്തനംതിട്ട അൻസി മൻസിൽ കുലശേഖരപതി ജെ. അൽ റിസാൻ, കോതമംഗലം ധർമഗിരി വികാസ് അനുമോൾ രാജു, കൊപ്രാക്കളം കൊച്ചുപുരയ്ക്കൽ ഗംഗാമോൾ ജനിഷ്, പത്തനംതിട്ട പന്തളം പടിഞ്ഞാറോ പീടികയിൽ സോനാ ബിജു, മോനിക്ക (ചിൽഡ്രൻസ് ഹോം, കാക്കനാട്) എന്നിവരാണ് സ്ക്രൈബിന്‍റെ സഹായത്തോടെ പരീക്ഷയെഴുതി വിജയിച്ചത്. ഒന്നുമുതല്‍ ഏഴുവരെ ക്ലാസുകളില്‍ അസീസി അന്ധവിദ്യാലയത്തിലും ഹൈസ്‌കൂള്‍ പഠനം അച്ചാമ്മ മെമ്മോറിയല്‍ സ്‌കൂളിലുമായിരുന്നു. കലാമത്സരങ്ങളിലും സ്‌പെഷല്‍ സ്‌കൂള്‍ സംസ്ഥാന കലോത്സവത്തിലും ഇവര്‍ കഴിവ് തെളിയിച്ചിട്ടുണ്ട്.

മണിമല ഹോളി മാഗി ഫൊറോന പള്ളി ദ്വിശതാബ്ദി ആഘോഷങ്ങളുടെ സമാപനവും തിരുനാളും

കാഞ്ഞിരപ്പള്ളി: മണിമല ഹോളി മാഗി ഫൊറോന പള്ളി ദ്വിശതാബ്ദി ആഘോഷങ്ങളുടെ സമാപനവും വിശുദ്ധ ഗീവർഗീസ് സഹദായുടെ തിരുനാളും കല്ലിട്ട തിരുനാളും ഇടവകദിനവും ഇന്നും നാളെയും നടക്കുമെന്ന് വികാരി ഫാ. മാത്യു താന്നിയത്ത് പത്രസമ്മേളനത്തിൽ അറിയിച്ചു. ഇന്ന് രാവിലെ ആറിന് വിശുദ്ധ കുർബാന, 6.45ന് കൊടിയേറ്റ്, ഏഴിന് വിശുദ്ധ കുർബാന, വൈകുന്നേരം അഞ്ചിന് നെല്ലിത്താനം കുരിശടിയിൽ റംശ - കാഞ്ഞിരപ്പള്ളി രൂപതാധ്യക്ഷൻ മാർ ജോസ് പുളിക്കൽ കാർമികത്വം വഹിച്ച് സന്ദേശം നൽകും. ആറിന് പള്ളിയിലേക്ക് പ്രദക്ഷിണം, രാത്രി ഏഴിന് ഗാനമേള. നാളെ രാവിലെ 5.30ന് വിശുദ്ധ കുർബാന, 8.30ന് ഷംഷാബാദ് രൂപത സഹായ മെത്രാൻ മാർ തോമസ് പാടിയത്തിന്‍റെ മുഖ്യകാർമികത്വത്തിൽ വിശുദ്ധ കുർബാന നടക്കും. 10.30ന് നടക്കുന്ന പൊതുസമ്മേളനം മാർ തോമസ് പാടിയത്ത് ഉദ്ഘാടനം ചെയ്യും. ചങ്ങനാശേരി അതിരൂപത പ്രോട്ടോസിഞ്ചെല്ലൂസ് ഫാ. ആന്‍റണി എത്തയ്ക്കാട്ട് അധ്യക്ഷത വഹിക്കും. എകെസിസി ചങ്ങനാശേരി അതിരൂപത പ്രസിഡന്‍റ് ബിജു സെബാസ്റ്റ്യൻ ജൂബിലി സന്ദേശം നൽകും. വികാരി ഫാ. മാത്യു താന്നിയത്ത്, അസിസ്റ്റന്‍റ് വികാരി ഫാ. വർഗീസ് ചിറയിൽ, കടയനിക്കാട് സെന്‍റ് മേരീസ് പള്ളി വികാരി ഫാ. ബിനീഷ് ഏറത്തേടം, കുറുന്പനാടം സെന്‍റ് ആന്‍റണീസ് ഫൊറോന പള്ളി അസിസ്റ്റന്‍റ് വികാരി ഫാ. സെബാസ്റ്റ്യൻ കളത്തിപറമ്പിൽ, കൈക്കാരൻ റോയിസ് ജോസഫ് കടന്തോട്ട് എന്നിവർ പ്രസംഗിക്കും. പാരിഷ്‌ കൗൺസിൽ സെക്രട്ടറി ബെന്നി തോമസ് റിപ്പോർട്ട് അവതരിപ്പിക്കും. വിവാഹത്തിന്‍റെ 25, 50 വർഷത്തെ ജൂബിലിക്കാരെയും 100 മേനി സീസൻ മൂന്ന് ഇടവകതല വിജയികളെയും യോഗത്തിൽ അനുമോദിക്കും. ജൂബിലി ജനറൽ കൺവീനർ ജോസ് വർഗീസ് കുനംകുന്നേൽ, ജോയിന്‍റ് കൺവീനർ എൽ.ജെ. മാത്യു ളാനിത്തോട്ടം, കൈക്കാരന്മാരായ ജോസ് കൊള്ളികുളവിൽ, ജോസ് പുളിച്ചുമാക്കൽ, റോയിസ് ജോസഫ് കടന്തോട്ട്, മീഡിയ കൺവീനർ ജോസഫ് ആന്‍റണി എന്നിവർ നേതൃത്വം നൽകും.

കാഞ്ഞിരപ്പള്ളി രൂപതാദിനം: ജൂബിലിദീപം അണക്കരയിൽ

കാഞ്ഞിരപ്പള്ളി: നാല്പത്തിയെട്ടാമത് രൂപതാദിന വേദിയായ അണക്കര സെന്‍റ് തോമസ് ഫൊറോന പള്ളിയിൽ ജൂബിലിദീപം സ്വീകരിച്ചു. നാല്പത്തിയേഴാമത് രൂപതാദിന വേദിയായിരുന്ന എരുമേലി ഫൊറോനയിൽ നിന്ന് ഈ വർഷത്തെ രൂപതാദിന ആതിഥേയരായ അണക്കര ഫൊറോന ഏറ്റുവാങ്ങിയ ജൂബിലിദീപം ഫൊറോനയിലെ 11 ഇടവകകളിലും പ്രാർഥനാദിനങ്ങൾ പൂർത്തിയാക്കിയാണ് അണക്കര ഫൊറോന പള്ളിയിൽ എത്തിച്ചേർന്നത്. രൂപതാദിനത്തോടനുബന്ധിച്ച് നാളെ വിശുദ്ധ കുർബാനയ്ക്ക് ശേഷം രൂപതയിലെ എല്ലാ പള്ളികളിലും രൂപതാദിന പതാക ഉയർത്തുകയും ദൈവജനം ഒന്നുചേർന്ന് ജൂബിലി ആന്തം ആലപിക്കുകയും ചെയ്യും. 12ന് നടത്തപ്പെടുന്ന രൂപതാദിനത്തിനൊരുക്കമായ അണക്കര ഫൊറോന നേതൃസംഗമം നാളെ അണക്കര ഫൊറോന പള്ളിയിൽ നടക്കും. രൂപത വികാരി ജനറാൾ ഫാ. ബോബി അലക്സ് മണ്ണംപ്ലാക്കലിന്‍റെ കാർമികത്വത്തിൽ രാവിലെ ഒന്പതിന് വിശുദ്ധ കുർബാന അർപ്പിക്കും. അണക്കര ഫൊറോനയിലെ ഇടവകകളിൽ നിന്നുള്ള പാരിഷ് കൗൺസിൽ അംഗങ്ങൾ, കുടുംബകൂട്ടായ്മ ലീഡേഴ്സ്, വിശ്വാസജീവിത പരിശീലകർ, സംഘടനാ ഭാരവാഹികൾ എന്നിവർ പങ്കെടുക്കുന്ന സമ്മേളനം ഫാ. ജിസൺ പോൾ വേങ്ങശേരി നയിക്കും.

എസ്എസ്എല്‍സി ; ജില്ലയില്‍ 99.81 ശതമാനം വിജയം

കോട്ടയം: എസ്എസ്എല്‍സി പരീക്ഷയില്‍ കോട്ടയം ജില്ലയിലെ സ്‌കൂളുകള്‍ക്ക് 99.81 ശതമാനം വിജയം. സംസ്ഥാനത്ത് 100 ശതമാനം വിജയം നേടിയ രണ്ട് വിദ്യാഭ്യാസ ജില്ലകളിലൊന്ന് പാലാ ആണെന്നതും ജില്ലയ്ക്ക് അഭിമാനമായി. പാലായില്‍ പരീക്ഷയെഴുതിയ 3,054 വിദ്യാര്‍ഥികളും പാസായി. ജില്ലയില്‍ ആകെ പരീക്ഷയെഴുതിയ 18,531 കുട്ടികളില്‍ 18,495 പേര്‍ തുടര്‍വിദ്യാഭ്യാസ യോഗ്യത നേടി. 9,326 ആണ്‍കുട്ടികള്‍ പരീക്ഷയെഴുതിയതില്‍ 9,302 പേരും 9,205 പെണ്‍കുട്ടികളില്‍ 9,193 പേരും പാസായി. 2,632 പേര്‍ എല്ലാ വിഷയങ്ങള്‍ക്കും എ പ്ലസ് നേടി (ആണ്‍കുട്ടികള്‍- 857, പെണ്‍കുട്ടികള്‍-1,775). കാഞ്ഞിരപ്പള്ളി വിദ്യാഭ്യാസജില്ലയില്‍ 99.53 ശതമാനവും (5,082ല്‍ 5,058) കോട്ടയം വിദ്യാഭ്യാസ ജില്ലയില്‍ 99.89 ശതമാനവും (7,375ല്‍ 7,367) കടുത്തുരുത്തിയില്‍ 99.87 ശതമാനം പേരും (3,020ല്‍ 3,016) തുടര്‍പഠനത്തിന് അര്‍ഹരായി. കോട്ടയം വിദ്യാഭ്യാസ ജില്ലയില്‍ 977 പേരും കാഞ്ഞിരപ്പള്ളിയില്‍ 629 പേരും പാലായില്‍ 590 പേരും കടുത്തുരുത്തിയില്‍ 436 പേരും മുഴുവന്‍ വിഷയങ്ങള്‍ക്കും എ പ്ലസ് നേടി. ഏറ്റവും കൂടുതല്‍ പേര്‍ എ പ്ലസ് നേടിയത് ഇന്‍ഫര്‍മേഷന്‍ ടെക്‌നോളജിക്കാണ് (14,928). കുറവ് ഗണിതത്തിനും(4,310).

നീർപ്പാറ ബധിര വിദ്യാലയത്തിന് നൂറുമേനി വിജയം

തലയോലപ്പറമ്പ്: നീർപ്പാറ അസീസി മൗണ്ട് വിദ്യാലയത്തിന് എസ്എസ്എൽസി പരീക്ഷയിൽ 29-ാം വർഷവും തുടർച്ചയായി നൂറുമേനി വിജയം. പരീക്ഷയെഴുതിയ ഒൻപതു വിദ്യാർഥികളിൽ രണ്ടുപേർ ഫുൾ എ പ്ലസ് നേടി. ശ്രവണ പരിമിതികളോട് പൊരുതി പഠനത്തിൽ മികച്ച വിജയം നേടുന്ന നീർപ്പാറയിലെ വിദ്യാർഥികൾ കലാ- കായിക പ്രവൃത്തിപരിചയ മേഖലകളിലും മികച്ച വിജയം നേടിയിരുന്നു. സ്കൂളിൽ വിദ്യാർഥികൾക്ക് നീന്തൽ പരിശീലനവും നൽകുന്നുണ്ട്. സൗജന്യ ഭക്ഷണവും ഹോസ്റ്റൽ സൗകര്യവും ലഭ്യമാണ്.

ഇടിമണ്ണിക്കൽ ഗോൾഡ് ആൻഡ് ഡയമണ്ട് ഇനി ചെങ്ങന്നൂരിലും

ചെങ്ങന്നൂർ: പതിറ്റാണ്ടുകളായി പരിശുദ്ധിയുടെ തിളക്കവും മാറ്റേറുന്ന വിശ്വാസവും ചേർന്ന ഇടിമണ്ണിക്കൽ ഗോൾഡ് ആൻഡ് ഡയമണ്ടിന്‍റെ ഏറ്റവും പുതിയ ഷോറൂം ചെങ്ങന്നൂരിൽ തുറക്കുന്നു. 12ന് രാവിലെ 10.30ന് സജി ചെറിയാൻ എംഎൽഎ ഷോറൂമിന്‍റെ ഉദ്ഘാടനം നിർവഹിക്കും. ചലച്ചിത്രതാരം മംമ്ത മോഹൻദാസ് മുഖ്യാതിഥിയായി പങ്കെടുക്കും. കൂടാതെ സാമൂഹിക- സാംസ്കാരിക രംഗങ്ങളിലെ പ്രമുഖരും ചടങ്ങിൽ സന്നിഹിതരാകുമെന്ന് ഉദ്ഘാടനവേളയിലേക്ക് ചെങ്ങന്നൂരിനെ സ്വാഗതം ചെയ്തുകൊണ്ട് മാനേജിംഗ് ഡയറക്ടർ ഷാജി തോമസ് അറിയിച്ചു. ഉദ്ഘാടനത്തോടനുബന്ധിച്ച് മികച്ച ഓഫറുകളാണ് ഇടിമണ്ണിക്കൽ ഗോൾഡ് ആൻഡ് ഡയമണ്ട് ഒരുക്കിയിരിക്കുന്നത്. നറുക്കെടുപ്പിലൂടെ അഞ്ച് പേർക്ക് അര പവൻ വീതം സ്വർണനാണയം സമ്മാനമായി നൽകും. ഉദ്ഘാടനത്തിന് ശേഷമുള്ള ആദ്യത്തെ ആറ് ദിവസം ആറ് ഡയമണ്ട് റിംഗുകളും നറുക്കെടുപ്പിലൂടെ സമ്മാനമായി നേടാം. 45 ദിവസം നീണ്ടുനിൽക്കുന്ന മികച്ച ഓഫറുകളും സ്വന്തമാക്കാം. സ്വർണം, ഡയമണ്ട്, ലൈറ്റ് വെയ്റ്റ്, വെഡിംഗ് ആഭരണങ്ങളുടെ ഏറ്റവും മികച്ച ശേഖരമാണ് പുതിയ ഷോറൂമിൽ ഒരുക്കിയിട്ടുള്ളത്. പുത്തൻ ഡിസൈനുകളും മികച്ച കളക്‌ഷനും സ്വന്തമാക്കാൻ പുതിയ ഷോറൂമിലേക്ക് ഏവരെയും സ്വാഗതം ചെയ്യുന്നുവെന്ന് ഷാജി തോമസ് കൂട്ടിച്ചേർത്തു.

പ്രഫഷണല്‍ സ്റ്റുഡന്‍റ്സ് സമ്മിറ്റും മുഖ്യമന്ത്രിയുമായി മുഖാമുഖവും

കോട്ടയം: സര്‍ക്കാരിന്‍റെ നാലാം വാര്‍ഷികാഘോഷത്തിന്‍റെ ഭാഗമായി ഉന്നതവിദ്യാഭ്യാസ, ആരോഗ്യവകുപ്പുകളുടെ നേതൃത്വത്തില്‍ ഗവേഷണ വിദ്യാര്‍ഥികള്‍ ഉള്‍പ്പെടെയുള്ള പ്രഫഷണല്‍ വിദ്യാര്‍ഥികളുമായി മുഖ്യമന്ത്രിയുടെ മുഖാമുഖം നാളെ രാവിലെ 10നു മുതല്‍ ഏറ്റുമാനൂരില്‍ നടക്കും. പ്രഫഷണല്‍ സ്റ്റുഡന്‍റ്സ് സമ്മിറ്റും മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. ഏറ്റുമാനൂര്‍ പട്ടിത്താനം ഗ്രാന്‍ഡ് അരീന കണ്‍വന്‍ഷന്‍ സെന്‍ററാണ് വേദിയാകുന്നത്. സര്‍ക്കാരിന്‍റെ വിവിധ സംരംഭങ്ങളെക്കുറിച്ച് വിദ്യാര്‍ഥി-ഗവേഷക സമൂഹവുമായി മുഖ്യമന്ത്രി സംവദിക്കും. സംസ്ഥാനത്ത് വിവിധ പ്രഫഷണല്‍ കോഴ്സുകള്‍ ചെയ്യുന്ന രണ്ടായിരത്തി അഞ്ഞൂറോളം തെരഞ്ഞെടുക്കപ്പെട്ട വിദ്യാര്‍ഥികളാണ് സമ്മിറ്റില്‍ പങ്കാളികളാവുക. രാവിലെ 8.30നു പ്രതിനിധികളുടെ രജിസ്‌ട്രേഷന്‍. 10നു സമ്മിറ്റിന് തുടക്കമാവും. മന്ത്രി ഡോ. ആര്‍. ബിന്ദു അധ്യക്ഷയാകും. 10.30ന് മുഖ്യമന്ത്രി പിണറായി വിജയന്‍ സമ്മിറ്റിന്‍റെ ഉദ്ഘാടനം നിര്‍വഹിക്കും. മന്ത്രി വി.എന്‍. വാസവന്‍, മന്ത്രി വീണ ജോര്‍ജ് എന്നിവര്‍ മുഖ്യാതിഥികളാവും. ചീഫ് വിപ്പ് ഡോ. എന്‍. ജയരാജ്, സംസ്ഥാന ആസൂത്രണ ബോര്‍ഡ് വൈസ് ചെയര്‍മാന്‍ ഡോ. വി.കെ. രാമചന്ദ്രന്‍, സംസ്ഥാന ഉന്നതവിദ്യാഭ്യാസ കൗണ്‍സില്‍ വൈസ് ചെയര്‍മാന്‍ ഡോ. രാജന്‍ ഗുരുക്കള്‍, സര്‍വകലാശാലാ വൈസ് ചാന്‍സലര്‍ ഡോ. സി.ടി. അരവിന്ദകുമാര്‍, കുസാറ്റ് വൈസ് ചാന്‍സലര്‍ ഡോ. എം. ജുനൈദ് ബുഷിരി, ശ്രീനാരായണഗുരു ഓപ്പണ്‍ സര്‍വകലാശാലാ വൈസ് ചാന്‍സലര്‍ ഡോ. വി.പി. ജഗതിരാജ്, ട്രസ്റ്റ് റിസര്‍ച്ച് പാര്‍ക്ക് ചെയര്‍മാന്‍ ഡോ. സാബു തോമസ്, അസാപ് കേരള സിഎംഡി ഡോ. ഉഷ ടൈറ്റസ്, ഉന്നതവിദ്യാഭ്യാസ വകുപ്പ് പ്രിന്‍സിപ്പല്‍ സെക്രട്ടറി ഡോ. ഷര്‍മിള മേരി ജോസഫ്, ജില്ലാ കളക്ടര്‍ ജോണ്‍ വി. സാമുവല്‍ കോട്ടയം ഗവ. മെഡിക്കല്‍ കോളജ് പ്രിന്‍സിപ്പൽ ഡോ. വര്‍ഗീസ് പി. പുന്നൂസ് തുടങ്ങിയവര്‍ പങ്കെടുക്കും.

അന്താരാഷ്‌ട്ര നേട്ടവുമായി പാലാ സെന്‍റ് ജോസഫ്സ് എന്‍ജിനിയറിംഗ് കോളജ്

പാലാ: പാലാ സെന്‍റ് ജോസഫ്സ് കോളജ് ഓഫ് എന്‍ജിനിയറിംഗ് ആന്‍ഡ് ടെക്നോളജി ഓട്ടോണമസിന് അമേരിക്കന്‍ സൊസൈറ്റി ഓഫ് മെക്കാനിക്കല്‍ എന്‍ജിനിയേഴ്സിന്‍റെ (എഎസ്എംഇ) അംഗീകാരം. എഎസ്എംഇ നല്‍കുന്ന ചാള്‍സ് ടി മെയിന്‍ സ്റ്റുഡന്‍റ് സെക്‌ഷന്‍ ലീഡര്‍ഷിപ്പ് അവാര്‍ഡിന് മെക്കാനിക്കല്‍ എന്‍ജിനിയറിംഗ് വിഭാഗം അവസാനവര്‍ഷ വിദ്യാര്‍ഥി ആശിഷ് ജോസഫ് അര്‍ഹനായി. അഞ്ഞൂറ് ഡോളര്‍ ക്യാഷ്‌പ്രൈസും സര്‍ട്ടിഫിക്കറ്റും അടങ്ങുന്നതാണ് പുരസ്‌കാരം. കോളജിലെ സ്റ്റുഡന്‍റ്സ് ഡീന്‍ ഡോ. ലിജോ പോള്‍ എഎസ്എംഇ ഔട്ട്സ്റ്റാൻഡിംഗ് സെക്‌ഷന്‍ അഡ്വൈസര്‍ അവാര്‍ഡ് (പ്രത്യേക പരാമര്‍ശം) നേടി. അഞ്ഞൂറ് ഡോളര്‍ കാഷ്‌പ്രൈസും സര്‍ട്ടിഫിക്കറ്റും അടങ്ങുന്നതാണ് പുരസ്‌കാരം. മെക്കാനിക്കല്‍ എന്‍ജിനിയറിംഗ് വിഭാഗം അസോസിയേറ്റ് പ്രഫസറാണ് ഡോ. ലിജോ പോള്‍. മികച്ച നേട്ടം സ്വന്തമാക്കിയ ഇരുവരെയും കോളജ് ചെയര്‍മാന്‍ മോണ്‍. ജോസഫ് തടത്തില്‍ അനുമോദിച്ചു. ഡയറക്ടര്‍ റവ. ഡോ. ജയിംസ് മംഗലത്ത്, പ്രിന്‍സിപ്പല്‍ ഡോ. വി.പി. ദേവസ്യ, വൈസ് പ്രിന്‍സിപ്പല്‍ എന്നിവര്‍ പ്രസംഗിച്ചു.

ഇന്‍ഫന്‍റ് ജീസസ് മൈനര്‍ സെമിനാരി സുവര്‍ണ ജൂബിലി നിറവില്‍

കോട്ടയം: വിജയപുരം രൂപതയുടെ വൈദികപരിശീലന കേന്ദ്രമായ കോട്ടയം കീഴുക്കുന്ന് ഇന്‍ഫന്‍റ് ജീസസ് മൈനര്‍ സെമിനാരി സ്ഥാപിതമായിട്ട് 50 വര്‍ഷങ്ങള്‍ പൂര്‍ത്തിയായി. സുവര്‍ണ ജൂബിലി ആഘോഷങ്ങള്‍ നാളെയും 12നുമായി നടത്തും. നാളെ രാവിലെ 10ന് രൂപതാ വൈദികര്‍, വൈദികവിദ്യാര്‍ഥികള്‍, വൈദികരുടെയും സന്യസ്തരുടെയും മാതാപിതാക്കള്‍ എന്നിവരുടെ സംഗമം വിജയപുരം സോഷ്യല്‍ സര്‍വീസ് സൊസൈറ്റി ഹാളില്‍(അമലനിലയം) നടക്കും. തുടര്‍ന്ന് 11.30ന് ആലപ്പുഴ രൂപതാ ബിഷപ് ഡോ.ജെയിംസ് ആനാപറമ്പില്‍ മുഖ്യ കാര്‍മികനായി ഇന്‍ഫന്‍റ് ജീസസ് സെമിനാരിയില്‍ സമൂഹബലി അര്‍പ്പിക്കും. നാലിന് ഇന്‍ഫന്‍റ് ജീസസ് മൈനര്‍ സെമിനാരിയില്‍നിന്ന് വിമലഗിരി കത്തീഡ്രലിലേക്ക് ദിവ്യകാരുണ്യ പ്രദക്ഷിണം. കോട്ടയം, പട്ടിത്താനം, മൂവാറ്റുപുഴ, മുണ്ടക്കയം, തിരുവല്ല മേഖലകളില്‍നിന്നുള്ള വിശ്വാസികള്‍, ലിജിയണ്‍ ഓഫ് മേരി, ചെറുപുഷ്പ മിഷന്‍ ലീഗ് തുടങ്ങിയ സംഘടനകളിലെ അംഗങ്ങള്‍, ഈ വര്‍ഷം പ്രഥമ ദിവ്യകാരുണ്യവും സ്ഥൈര്യലേപനവും സ്വീകരിച്ച കുട്ടികള്‍ തുടങ്ങിയവര്‍ പ്രദക്ഷിണത്തില്‍ പങ്കെടുക്കും. ദിവ്യകാരുണ്യ പ്രദക്ഷിണം കത്തീഡ്രലില്‍ എത്തിയതിനു ശേഷം സ്‌പെയിനിലെ വിറ്റോറിയ രൂപതയുടെ ബിഷപ് ഡോ. യുവാന്‍ കാര്‍ലോസിന്‍റെ നേതൃത്വത്തില്‍ ദിവ്യകാരുണ്യ ആശീര്‍വാദം. തുടര്‍ന്ന് മുന്‍ റെക്ടര്‍മാര്‍, വൈസ് റെക്ടര്‍മാര്‍, ആധ്യാത്മിക ഉപദേഷ്ടാക്കള്‍, അധ്യാപകര്‍ എന്നിവരെ ആദരിക്കും. തുടര്‍ന്നു സെമിനാരി വിദ്യാര്‍ഥികളുടെ കലാപരിപാടികളും ഉണ്ടായിരിക്കും. 12നു രാവിലെ 11ന് വിമലഗിരി കത്തീഡ്രലില്‍ വിജയപുരം ബിഷപ് ഡോ. സെബാസ്റ്റ്യന്‍ തെക്കത്തെച്ചേരില്‍ മുഖ്യകാർമികത്വം വഹിക്കുന്ന കൃതജ്ഞതാ സമൂഹബലിയില്‍ ബിഷപ് ഡോ. ജസ്റ്റിന്‍ മഠത്തില്‍പ്പറമ്പില്‍, ബിഷപ് ഡോ. യുവാന്‍ കാര്‍ലോസ് എന്നിവരും രൂപതയിലെ വൈദികരും സഹകാര്‍മികരായിരിക്കും. സ്നേഹവിരുന്നോടെ ആഘോഷങ്ങള്‍ സമാപിക്കും.

അനുമതിയില്ലാതെ റൗണ്ടാന; പൊല്ലാപ്പായി

പാലാ: നേരം ഇരുട്ടി വെളുത്തപ്പോള്‍ ടൗണില്‍ സിവില്‍ സ്റ്റേഷന്‍ ജംഗ്ഷനില്‍ ഒരു റൗണ്ടാന. സിമന്‍റ് ഇഷ്ടിക ഉപയോഗിച്ചുള്ള റൗണ്ടാന രാത്രിയില്‍ ഒരു സംഘം പൊതുപ്രവര്‍ത്തകരാണ് ഉണ്ടാക്കിയത്. സദുദ്ദേശ്യത്തോടെയാണ് താത്കാലിക റൗണ്ടാന സ്ഥാപിച്ചതെങ്കിലും നേരം പുലര്‍ന്നതോടെ വാഹന ഗതാഗതം താറുമാറായി. അധികൃതരുടെ അനുമതി ഇല്ലാതെ സ്ഥാപിച്ച റൗണ്ടാന ചില്ലറ പണിയൊന്നുമല്ല പോലീസിന് ഉണ്ടാക്കിയത്. പുലര്‍ച്ചെ മുതല്‍ പോലീസുംസമീപത്തെ ഓട്ടോറിക്ഷാ ഡ്രൈവര്‍മാരും ഏറെ പണിപ്പെട്ടിട്ടും ഈ ഭാഗത്ത് ഗതാഗതം നിയന്ത്രിക്കാനായില്ല. ഗതാഗത തടസത്തെത്തുടര്‍ന്ന് പ്രതിഷേധം രൂക്ഷമായതോടെ നഗരസഭയും പോലീസും ഇടപെട്ട് സിമന്‍റ് ഇഷ്ടിക മാറ്റുകയായിരുന്നു. സുഗമമായ ട്രാഫിക് നിയന്ത്രണത്തിനായി റൗണ്ടാന സ്ഥാപിക്കണമെന്നുകാണിച്ച് അധികൃതർക്കു കൊടുത്ത പരാതിയില്‍ ഒരു വര്‍ഷമായിട്ടും പരിഹാരം കാണാത്തതുകൊണ്ടാണ് ഇങ്ങനെ ചെയ്യേണ്ടി വന്നതെന്ന് പൊതുപ്രവര്‍ത്തകര്‍ പറയുന്നു. പോലീസ്, പൊതുമരാമത്ത്, നഗരസഭ, ട്രാഫിക് അഡ്വൈസറി കമ്മിറ്റി എന്നിവയുടെ അനുമതിയില്ലാതെ റൗണ്ടാന സ്ഥാപിച്ച പൊതുപ്രവര്‍ത്തകരുടെ പ്രവൃത്തിയില്‍ നടപടിയെടുക്കുമെന്ന് പോലീസ് പറഞ്ഞു.

വിളവെടുപ്പനന്തര നഷ്ടങ്ങള്‍ കുറയ്ക്കാനുള്ള നടപടികള്‍ സ്വീകരിക്കും: മന്ത്രി പി. പ്രസാദ്

പൂഞ്ഞാര്‍: ഫലവൃക്ഷ കൃഷിയില്‍ വിളവെടുപ്പനന്തര നഷ്ടങ്ങള്‍ കുറയ്ക്കുന്നതിനുള്ള നടപടികള്‍ സ്വീകരിക്കുന്നതിനുള്ള സംവിധാനങ്ങള്‍ ഒരുക്കുമെന്നു മന്ത്രി പി. പ്രസാദ്. പൂഞ്ഞാര്‍ നിയോജകമണ്ഡലത്തില്‍ ഫലവൃക്ഷ കൃഷികള്‍ പ്രോത്സാഹിപ്പിക്കുന്നതിന് സംസ്ഥാന കൃഷിവകുപ്പും സംസ്ഥാന ഹോര്‍ട്ടിക്കള്‍ച്ചര്‍ മിഷനും പൂഞ്ഞാര്‍ എംഎല്‍എ സര്‍വീസ് ആര്‍മിയും ചേര്‍ന്ന് നടപ്പാക്കുന്ന ഫലസമൃദ്ധി പദ്ധതി ഉദ്ഘാടനം ചെയ്തു പ്രസംഗിക്കുകയായിരുന്നു മന്ത്രി. കഴിഞ്ഞവര്‍ഷം 1500 കോടി രൂപയോളം വിളവെടുപ്പനന്തര നഷ്ടമുണ്ടായി എന്നാണു കണക്കാക്കുന്നത്. ശീതീകരണ സംവിധാനങ്ങള്‍ ശക്തിപ്പെടുത്തിയും മൂല്യവര്‍ധിത ഉത്പന്നങ്ങള്‍ സൃഷ്ടിച്ചും ഈ നഷ്ടം നികത്താന്‍ സാധിക്കും. എളുപ്പത്തില്‍ കേടുവന്നുപോകുന്ന പാളയംകോടന്‍ പഴം പോലുള്ള ഫലവര്‍ഗങ്ങളില്‍നിന്നു വൈന്‍ ഉത്പാദിപ്പിക്കുന്നതിനുള്ള സാങ്കേതികവിദ്യ കാര്‍ഷിക സര്‍വകലാശാല കണ്ടുപിടിച്ചിട്ടുണ്ട്. കൃഷിക്കാര്‍ക്കും ഇതുപകരിക്കുന്ന രീതിയില്‍ ലൈസന്‍സ് ചട്ടങ്ങളിലടക്കം മാറ്റം കൊണ്ടുവരാനാണ് സര്‍ക്കാര്‍ ശ്രമിക്കുന്നത്. കൃഷിരീതികള്‍ സ്മാര്‍ട്ടാകുന്ന സ്മാര്‍ട്ട് ഫാമിംഗിലേക്ക് മാറാനുള്ള നടപടികളാണ് സര്‍ക്കാര്‍ ഇപ്പോള്‍ ചുവടുവച്ചിരിക്കുന്നത്. അതിനായി ഒരുക്കിയിട്ടുള്ള കതിര്‍ ആപ്പ് ഉടന്‍ സജ്ജമാകുമെന്നും മന്ത്രി പറഞ്ഞു. തിടനാട് പഞ്ചായത്ത് ഹാളില്‍ നടന്ന സമ്മേളനത്തിൽ സെബാസ്റ്റ്യന്‍ കുളത്തുങ്കല്‍ എംഎല്‍എ അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍, ഈരാറ്റുപേട്ട ബ്ലോക്ക് പഞ്ചായത്ത് പ്രസിഡന്‍റ് മറിയാമ്മ ഫെര്‍ണാണ്ടസ്, തിടനാട് പഞ്ചായത്ത് പ്രസിഡന്‍റ് സ്‌കറിയ പൊട്ടനാനിയില്‍, പഞ്ചായത്ത് പ്രസിഡന്‍റുമാരായ ജോര്‍ജ് മാത്യു അത്യാലില്‍, രേഖാ ദാസ്, ബിജോയ് ജോസ്, ജില്ലാ പഞ്ചായത്തംഗങ്ങളായ പി.ആര്‍. അനുപമ, ഷോണ്‍ ജോര്‍ജ്, ജില്ലാ കൃഷി ഓഫീസര്‍ സിജോ ജോസ്, കൃഷി ഡെപ്യൂട്ടി ഡയറക്ടര്‍ മീന മാത്യൂ, അസിസ്റ്റന്‍റ് ഡയറക്ടര്‍ അശ്വതി വിജയന്‍, ഫലസമൃദ്ധി ചീഫ് കോ-ഓർഡിനേറ്റര്‍ ജോര്‍ജ് ജോസഫ്, ബ്ലോക്ക്-പഞ്ചായത്ത് മെംബർമാർ തുടങ്ങിയവർ പ്രസംഗിച്ചു.

ഹരികുമാര്‍ കോയിക്കല്‍ എന്‍എസ്എസ് സെക്രട്ടറി

നായര്‍ സര്‍വീസ് സൊസൈറ്റി സെക്രട്ടറിയായി ഹരികുമാര്‍ കോയിക്കല്‍ ചുമതലയേറ്റു. സംഘടനയുടെ ഔദ്യോ ഗിക കാര്യങ്ങളില്‍ ജനറല്‍ സെക്രട്ടറിയെ സഹായിക്കുകയാണ് ചുമതല. എന്‍എസ്എസ് എക്‌സിക്യൂട്ടീവ് കൗണ്‍സിലംഗവും കൃഷിവിഭാഗം സെക്രട്ടറിയും ചങ്ങനാശേരി താലൂക്ക് യൂണി യന്‍ പ്രസിഡന്‍റുമാണ്.

ദേശീയ സമ്പാദ്യപദ്ധതി നിക്ഷേപം സമ്പദ്ഘടനയുടെ ഷോക് അബ്‌സോര്‍ബര്‍: മന്ത്രി വി.എന്‍. വാസവന്‍

കോട്ടയം: പ്രതിസന്ധിഘട്ടങ്ങളില്‍ രാജ്യത്തിന്‍റെ സമ്പദ്ഘടനയ്ക്ക് കോട്ടം തട്ടാതെ സംരക്ഷിക്കുന്നത് ദേശീയ സമ്പാദ്യപദ്ധതിയിലൂടെ സ്വരൂപിക്കുന്ന സമ്പത്താണെന്ന് മന്ത്രി വി.എന്‍. വാസവന്‍. ദേശീയ സമ്പാദ്യ വകുപ്പിന്‍റെ ജില്ലാ സംഗമം ഉദ്ഘാടനം ചെയ്യുകയായിരുന്നു അദ്ദേഹം. കോട്ടയം മാമ്മന്‍ മാപ്പിള ഹാളില്‍ നടന്ന യോഗത്തില്‍ ജില്ലാ കളക്ടര്‍ ജോണ്‍ വി. സാമുവല്‍ അധ്യക്ഷത വഹിച്ചു. ദേശീയ സമ്പാദ്യപദ്ധതി ഡയറക്ടര്‍ എസ്. മനു, അഡീഷണല്‍ ഡയറക്ടര്‍ പി. അജിത്ത് കുമാര്‍, ഡെപ്യൂട്ടി ഡയറക്ടര്‍ ജ്യോതി ദാമോദരന്‍, അസിസ്റ്റന്‍റ് ഡയറക്ടര്‍ കെ.ജെ. ഷോബിച്ചന്‍, വിദ്യാഭ്യാസവകുപ്പ് ഡെപ്യൂട്ടി ഡയറക്ടര്‍ ഇന്‍-ചാര്‍ജ് കെ.എ. സുനിമോള്‍,കോട്ടയം ഡിവിഷന്‍ പോസ്റ്റല്‍ സൂപ്രണ്ട് സ്വാതി റാണ എന്നിവര്‍ പ്രസംഗിച്ചു. മികച്ച പ്രവര്‍ത്തനം കാഴ്ചവച്ച മഹിളാ പ്രധാന്‍ ഏജന്‍റുമാരെയും എസ്എഎസ് ഏജന്‍റുമാരെയും ചടങ്ങില്‍ ആദരിച്ചു. സ്റ്റുഡന്‍റ്സ് സേവിംഗ്സ് സ്‌കീം പ്രവര്‍ത്തനങ്ങളില്‍ മികച്ച പ്രകടനം കാഴ്ചവച്ച സ്‌കൂളുകള്‍ക്കും നേതൃത്വം നല്‍കിയ ഡിഇഒ., എഇഒ ഓഫീസുകള്‍ക്കും പുരസ്‌കാരങ്ങള്‍ വിതരണം ചെയ്തു.

ചങ്ങനാശേരി മാര്‍ക്കറ്റ് പൈതൃക നവീകരണം: ചര്‍ച്ചകള്‍ പുരോഗതിയില്‍

ചങ്ങനാശേരി: ചങ്ങനാശേരി മാര്‍ക്കറ്റ് മുഖം മിനുക്കുവാനുള്ള ചര്‍ച്ചകള്‍ അടുത്തഘട്ടത്തിലേക്ക് കടന്നു. ബോട്ട് ജെട്ടിയില്‍നിന്നാരംഭിച്ച് 1.3കിലോ മീറ്റര്‍ ദൂരമാണ് പൈതൃക നവീകരണത്തിനായി തെരഞ്ഞെടുത്തിരിക്കുന്നത്. ഇതിന്‍റെ ആദ്യഘട്ടത്തിലെ 120 മീറ്റര്‍ ദൂരത്തില്‍ സാധ്യതാ പഠനം നടത്തുകയും അതിന്‍റെ ഭാഗമായി ഈ പ്രദേശത്തുള്ള കച്ചവടം സുഗമമാക്കുന്നതിന്‍റെ ഭാഗമായി മഴയത്തും വെയിലത്തും ഒരു പോലെ കച്ചവടം നടത്തുന്നതിനും ജനങ്ങള്‍ക്കും വ്യാപാരികള്‍ക്കും വാഹനയാത്രികർക്കും തൊഴിലാളികള്‍ക്കും ഉപകാരപ്രദമാകുന്ന രീതിയിലുള്ള റൂഫിംഗ് സംവിധാനം ഒരുക്കും. വൈദ്യുത ലൈനുകള്‍ മാറ്റി ഭൂമിക്കടിയിൽ പ്രത്യേക ചാലുകള്‍ നിര്‍മിച്ച് അതില്‍ സ്ഥാപിക്കും. അതിലൂടെതന്നെ ഉപരിതലത്തിലുള്ള വയറുകള്‍ കൊണ്ടുള്ള കുരുക്ക് അഴിയും. വെള്ളം ഒഴുകുന്നതിന് പ്രത്യേക ഡ്രെയിനേജുകള്‍ നിര്‍മിക്കും. ജോബ് മൈക്കിള്‍ എംഎല്‍എയുടെ ബജറ്റ് വിഹിതത്തില്‍നിന്നു മൂന്നു കോടി രൂപ മുടക്കിയാണ് പദ്ധതി നടപ്പിലാക്കുന്നത്. എംഎല്‍എയുടെ നിര്‍ദേശാനുസരണം ചങ്ങനാശേരി മര്‍ച്ചന്‍റ് അസോസിയേഷന്‍ ഹാളില്‍ ചേര്‍ന്ന യോഗത്തില്‍ പൊതുമരാമത്ത് കെട്ടിടവിഭാഗം എക്‌സിക്യൂട്ടീവ് എന്‍ജിനിയര്‍ ശ്രീലേഖ, അസിസ്റ്റന്‍റ് എക്‌സിക്യൂട്ടീവ് എന്‍ജിനിയര്‍ മഞ്ജുള, അസിസ്റ്റന്‍റ് എന്‍ജിനിയര്‍ അര്‍ച്ചന, ഓവര്‍സിയര്‍ പ്രമോദ്, നിരത്ത് വിഭാഗം അസിസ്റ്റന്‍റ്എക്‌സിക്യൂട്ടീവ് എന്‍ജിനിയര്‍ സിനി മെറിന്‍ ഏബ്രഹാം, ഓവര്‍സിയര്‍ ലാവണ്യ, പൊതുമരാമത്ത് വകുപ്പ് ആര്‍ക്കിടെക്ട് ഋതു, മര്‍ച്ചന്‍റ് അസോസിയേഷന്‍ പ്രസിഡന്‍റ് ജോണ്‍സണ്‍ പ്ലാന്തോട്ടം മറ്റ് പ്രതിനിധികള്‍ തുടങ്ങിയവര്‍ പങ്കെടുത്തു.

കെഎസ്ആര്‍ടിസി ടെര്‍മിനല്‍ നിര്‍മാണം : പെരുന്ന മുതല്‍ മതുമൂല വരെയുള്ള ഗതാഗതക്കുരുക്കിനു പരിഹാരം കാണണം

ചങ്ങനാശേരി: കെഎസ്ആര്‍ടിസി ടെര്‍മിനല്‍ നിര്‍മാണം നടക്കുന്ന സാഹചര്യത്തില്‍ പെരുന്ന മുതല്‍ മതുമൂലവരെയുള്ള ഗതാഗതക്കുരുക്കിന് പരിഹാരം കാണണമെന്ന ആവശ്യം ശക്തമാകുന്നു. കോട്ടയം ഭാഗത്തേക്കുള്ള ബസുകള്‍ക്ക് കെഎസ്ആര്‍ടിസി സ്റ്റാന്‍ഡിനു മുമ്പിലും തിരുവല്ല ഭാഗത്തേക്കുള്ള ബസുകള്‍ക്ക് മുനിസിപ്പല്‍ കാര്യാലയത്തിനു മുമ്പിലും നിര്‍ത്തി യാത്രക്കാരെ ഇറക്കുകയും കയറ്റുകയും ചെയ്യുന്നതിന് സ്റ്റോപ്പ് അനുവദിച്ചിരിക്കുകയാണ്. കെഎസ്ആര്‍ടിസി ബസുകള്‍ക്കൊപ്പം സ്വകാര്യ ബസുകളും കെഎസ്ആര്‍ടിസി സ്റ്റേഷനു മുമ്പില്‍ നിര്‍ത്തുന്നുണ്ട്. ഈ സാഹചര്യത്തില്‍ കെഎസ്ആര്‍ടിസി ജംഗ്ഷനില്‍ പകല്‍സമയങ്ങളില്‍ ഗതാഗതക്കുരുക്കും തിരക്കും പതിവാണ്. ഇത് ഏറെത്തിരക്കുള്ള എന്‍എച്ച്-183 (എംസി റോഡ്)ല്‍ പെരുന്ന മുതല്‍ മതുമൂല വരെയുള്ള ഭാഗത്ത് ഗതാഗതം കുരുങ്ങുന്നത് പതിവാകുന്നുണ്ട്. ഈ വിഷയം പഠിച്ച് ചര്‍ച്ച ചെയ്തു പരിഹരിക്കാൻ‍ നഗരസഭയുടെ നേതൃത്വത്തില്‍ പോലീസ്, മോട്ടോര്‍ വാഹനവകുപ്പ്, പൊതുമരാമത്ത്, വൈദ്യുതി, രാഷ്‌ട്രീയ പ്രതിനിധികള്‍, ട്രേഡ് യൂണിയന്‍ നേതാക്കള്‍ തുടങ്ങിയവരുടെ അടിയന്തര യോഗം വിളിച്ചുചേര്‍ക്കണമെന്ന ആവശ്യമാണ് ഉയര്‍ന്നിരിക്കുന്നത്. ഭാരവാഹനങ്ങളും ആംബുലന്‍സുകളും ബൈപാസുവഴി തിരിച്ചുവിടണം >തിരുവല്ല ഭാഗത്തുനിന്നു കോട്ടയത്തേക്കും കോട്ടയം ഭാഗത്തുനിന്നും തിരുവല്ല ഭാഗത്തേക്കും പോകേണ്ട ഭാരവാഹനങ്ങളും ആംബുലന്‍സുകളും ചങ്ങനാശേരി ബൈപാസുവഴി തിരിച്ചുവിടണം. >പെരുന്ന മുതല്‍ സെന്‍ട്രല്‍ ജംഗ്ഷന്‍ വരെ റോഡിന്‍റെ വശങ്ങളിലെ അനധികൃത പാര്‍ക്കിംഗ് ഒഴിവാക്കണം. ഈ ഭാഗത്ത് ഓട്ടോകളുടെ യുടേണ്‍ നിരോധിക്കണം. >കെഎസ്ആര്‍ടിസി ജംഗ്ഷനില്‍ ട്രാഫിക് നിയന്ത്രണത്തിനും യാത്രക്കാരെ സുരക്ഷിതരായി റോഡ് കുറുകെ കടത്തുന്നതിനും പോലീസിന്‍റെ സാന്നിധ്യം ഉറപ്പുവരുത്തണം. റോഡില്‍ ഡിവൈഡറുകളും സീബ്രാലൈനുകളും സ്ഥാപിക്കണം >ടാറിംഗ് പൂര്‍ത്തിയാക്കിയ എന്‍എച്ച്-183 (എംസി റോഡ്)ല്‍ പൂര്‍ണമായും പെരുന്ന എന്‍എസ്എസ് ജംഗ്ഷന്‍ മുതല്‍ മതുമൂലവരെയുള്ള ഭാഗത്ത് അടിയന്തരമായും ഡിവൈഡര്‍ ലൈനും സീബ്രാ ക്രോസിംഗുകളും സ്ഥാപിക്കാന്‍ പൊതുമരാമത്തു വകുപ്പിന് കര്‍ശന നിര്‍ദേശം നല്‍കണം. >യാത്രക്കാര്‍ ബസ് കാത്തുനില്‍ക്കുന്നതിനായി കെഎസ്ആര്‍ടിസി, മുനിസിപ്പല്‍ ജംഗ്ഷനുകളില്‍ സജ്ജമാക്കിയ കാത്തിരിപ്പു കേന്ദ്രങ്ങളില്‍ സ്‌പോണ്‍സര്‍മാരുടെ സഹായത്തോടെ കുടിവെള്ളം ഉറപ്പുവരുത്തണം. ഇവിടെ രാത്രികാലങ്ങളില്‍ വെളിച്ചം ലഭ്യമാക്കണം. >പുതിയ അധ്യയനവര്‍ഷം ആരംഭിക്കുന്നതിനു മുന്നോടിയായി വിദ്യാര്‍ഥികള്‍ക്കുള്ള സുരക്ഷാ ക്രമീകരണങ്ങളും കര്‍ശനമാക്കണം.

നൂറുമേനി വചനം ജീവിക്കാനുള്ള തീവ്ര ശ്രമം: മോൺ. സ്കറിയ കന്യാകോണിൽ

ചങ്ങനാശേരി: ചങ്ങനാശേരി അതിരൂപതയിൽ വളരെ പ്രാധാന്യത്തോടെ നടത്തപ്പെടുന്ന വിശുദ്ധ ബൈബിൾ പഠന പദ്ധതിയായ നൂറുമേനി, ദൈവവചനം അനുദിന ജീവിതത്തിൽ ജീവിക്കാനുള്ള തീവ്രപരിശ്രമം ആണെന്നും താല്പര്യത്തോടെ അതിൽ പങ്കുചേരുന്ന എല്ലാവരെയും പ്രത്യേകം അഭിനന്ദിക്കുന്നുവെന്നും വികാരിജനറാൾ മോൺ. സ്കറിയ കന്യാകോണിൽ. ചങ്ങനാശേരി മോർ ക്കുളങ്ങര എകെഎം പബ്ലിക് സ്കൂളിൽ നടന്ന സന്യസ്തരുടെ നൂറുമേനി അതിരൂപത മത്സരം ഉദ്ഘാടനം ചെയ്തു പ്രസംഗിക്കുകയായിരുന്നു. തിരക്കുകളും അനിശ്ചിതത്വവും നിറഞ്ഞ ഇന്നത്തെ ജീവിത സാഹചര്യത്തിൽ ദൈവത്തിനും വിശുദ്ധ ബൈബിളിനും ജീവിതത്തിൽ ഒന്നാം സ്ഥാനം നൽകുമ്പോഴാണ് ജീവിതത്തിന്‍റെ ദിശാബോധം കണ്ടെത്താൻ കഴിയുന്നതും പ്രത്യാശയോടെ മുന്നേറാൻ കഴിയുന്നതെന്നും ദൈവവചന പഠനം നമ്മെ ആത്യന്തികമായി പ്രേഷിതരായാണ് രൂപാന്തരപ്പെടുത്തേണ്ടതെന്നും വികാരി ജനറാൾ ഓർമിപ്പിച്ചു. ഉദ്ഘാടന സമ്മേളനത്തിൽ ചങ്ങനാശേരി അതിരൂപത ബൈബിൾ അപ്പൊസ്തലേറ്റ് ഡയറക്ടർ ഫാ. ജോർജ് മാന്തുരുത്തിൽ, നൂറുമേനി ചെയർമാൻ സണ്ണി തോമസ് ഇടിമണ്ണിക്കൽ,എഫ്സിസി പ്രൊവിൻഷ്യൽ മദർ വിജി എഫ്സിസി, എകെഎം സ്കൂൾ മാനേജർ സിസ്റ്റർ ലിസ് മരിയ വാഴേക്കളം എസ്എബിഎസ്, പ്രിൻസിപ്പൽ സിസ്റ്റർ സാങ്റ്റാ മരിയ തുരുത്തിമറ്റത്തിൽ എസ്എബിഎസ്, ടോമിച്ചൻ കൈതക്കളം എന്നിവർ പ്രസംഗിച്ചു. അതിരൂപതയിലെ 51 കോൺഗ്രിഗേഷനുകളിൽ നിന്നായി സന്യസ്തർക്കും സന്യാസാർത്ഥിനികൾക്കുമായി നാലു കാറ്റഗറികളിലായി കോൺഗ്രിഗേഷൻ തല മത്സരങ്ങളിൽ നിന്ന് വിജയികളായി വന്ന 150 ഓളം പേരാണ് അതിരൂപത മത്സരത്തിൽ പങ്കെടുത്തത്. കുടുംബങ്ങൾക്കായുള്ള നൂറുമേനി ഫൊറോന മത്സരം മേയ് 11 ഞായറാഴ്ച ഉച്ചയ്ക്ക് 1.30ന് അതിരൂപതയിലെ 18 ഫൊറോനകളിൽ വച്ച് നടത്തപ്പെടുന്നു. ഫൊറോന വികാരിമാർ മത്സരം ഉദ്ഘാടനം ചെയ്യുന്നതാണ്. ഇടവകകളിൽ നടന്ന നൂറുമേനി മത്സരത്തിൽ കുടുംബമായി 150 മാർക്കോ അതിലധികമോ, വ്യക്തിപരമായി 75 മാർക്കോ അതിലധികമോ ലഭിച്ചവരാണ് കുടുംബ നൂറുമേനി ഫൊറോന മത്സരത്തിൽ പങ്കെടുക്കുന്നത്. വിശദവിവരങ്ങൾക്ക്: +91 99613 69380, +91 73062 08356

ഗ്രാമീണ കാര്‍ഷിക-അക്വാ ടൂറിസം പദ്ധതി നടപ്പാക്കാനൊരുങ്ങി മാഞ്ഞൂര്‍ പഞ്ചായത്ത്

കടുത്തുരുത്തി: സുസ്ഥിര ടൂറിസം വികസനം ലക്ഷ്യമിട്ട് സംയോജിത ഗ്രാമീണ കാര്‍ഷിക-അക്വാ ടൂറിസം പദ്ധതി നടപ്പാക്കാനൊരുങ്ങി മാഞ്ഞൂര്‍ പഞ്ചായത്ത്. കാഴ്ചകള്‍ ഒരുക്കുന്നതിനും ടൂറിസം വളര്‍ച്ചയ്ക്കുമൊപ്പം പഞ്ചായത്തിനും ഇവിടത്തെ ജനങ്ങള്‍ക്കും വരുമാനം ലഭിക്കുന്ന രീതിയിലാണ് പദ്ധതി നടപ്പാക്കുക. പഞ്ചായത്തിലെ ടൂറിസം സാധ്യതകളെക്കുറിച്ച് എംജി യൂണിവേഴ്‌സിറ്റി സ്‌കൂള്‍ ഓഫ് ടൂറിസം സ്റ്റഡീസ് നടത്തിയ പഠനത്തത്തുടര്‍ന്ന് തയാറാക്കിയ വിശദമായ പദ്ധതി റിപ്പോര്‍ട്ട്(ഡിപിആര്‍) പഞ്ചായത്തിന് കൈമാറി. മാഞ്ഞൂര്‍ പഞ്ചായത്തും യൂണിവേഴ്‌സിറ്റി ടൂറിസം വിഭാഗവും തമ്മില്‍ കരാറിലെത്തിയാല്‍ പദ്ധതി നടപ്പാക്കാനാകും. പദ്ധതി നടപ്പായാല്‍ 1400 പേര്‍ക്ക് നേരിട്ടും അല്ലാതെയും തൊഴില്‍ ലഭിക്കും. ഭൂമിയും കെട്ടിടങ്ങളും വില കൊടുത്ത് വാങ്ങുന്നതിനു പകരം ഇവയെല്ലാം വരുമാനമായി നിശ്ചിത തുക നല്‍കാമെന്ന കരാറിലാണ് പദ്ധതിക്കായി ഏറ്റെടുക്കുന്നത്. വിദേശ രാജ്യങ്ങളില്‍ കഴിയുന്ന 2500നടുത്ത് കുടുംബങ്ങളുടെ വെറുതേ കിടക്കുന്ന ഭൂമിയും വസ്തുക്കളും തദ്ദേശീയരുടേതിനൊപ്പം പദ്ധതിക്കായി പ്രയോജനപ്പെടുത്താനാകും. പദ്ധതി വിവരം പഞ്ചായത്തിലെ മുഴുവന്‍ വാര്‍ഡുകളെയും ഗ്രാമീണ കാര്‍ഷിക-അക്വാ ടൂറിസം പദ്ധതിയുടെ ഭാഗമാക്കും. 15 കോടി രൂപ ചെലവിലാണ് പദ്ധതി നടപ്പാക്കുക. ഘട്ടംഘട്ടമായി ഫണ്ട് ചെലവിട്ടാകും പദ്ധതി പൂര്‍ണ പ്രവര്‍ത്തനക്ഷമമാക്കുക. ആദ്യഘട്ടമായി 46 ലക്ഷം രൂപ പഞ്ചായത്ത് വകയിരുത്തിയിട്ടുണ്ട്. പദ്ധതി മുഴുവനായും നടപ്പായാല്‍ 90 കോടി രൂപ വാര്‍ഷിക വരുമാനം പ്രതീക്ഷിക്കുന്ന രീതിയിലാണ് പദ്ധതികള്‍ വിഭാവനം ചെയ്തിരിക്കുന്നത്. വിയറ്റ്‌നാം, ജപ്പാന്‍, തായ്‌ലന്‍ഡ്, ചൈന, മലേഷ്യ, ഫിലിപ്പീന്‍സ് എന്നീ രാജ്യങ്ങളിലെ ടൂറിസം പദ്ധതികളുടെ മാതൃകയിലാണ് ഇവിടെ പ്രോജക്ടുകള്‍ ഉള്‍പ്പെടുത്തിയിരിക്കുന്നത്. പാടശേഖരങ്ങളും തോടുകളും കുളങ്ങളും നിറഞ്ഞ പ്രദേശമാണ് മാഞ്ഞൂര്‍. എംജി യൂണിവേഴ്‌സിറ്റി സ്‌കൂള്‍ ഓഫ് ടൂറിസം വകുപ്പ് മേധാവി ടോണി കെ.തോമസ്, ഡയറക്ടര്‍ ഡോ. റോബിനറ്റ് ജേക്കബ്, പ്രൊജക്ട് ഓഫീസര്‍ റിയാസ് മുഹമ്മദ് എന്നിവരുടെ നേതൃത്വത്തിലുള്ള സംഘം പഞ്ചായത്തിന്‍റെ വിവിധ മേഖലകള്‍ സന്ദര്‍ശിച്ചാണ് പദ്ധതി റിപ്പോര്‍ട്ട് തയാറാക്കിയിട്ടുള്ളത്. പദ്ധതിയുടെ നടപ്പാക്കല്‍ മാഞ്ഞൂര്‍ ടൂറിസം വികസന അഥോറിറ്റി രൂപീകരിക്കും. ജപ്രതിനിധികളും യൂണിവേഴ്‌സിറ്റി ടൂറിസം വിഭാഗം ഉദ്യോഗസ്ഥര്‍, സര്‍ക്കാര്‍ ഉദ്യോഗസ്ഥര്‍, ടൂറിസം രംഗത്തെ വിദഗ്ധര്‍ ഉള്‍പ്പെടുന്ന കമ്മിറ്റിയാകും ഇത് നിയന്ത്രിക്കുക. ഇതിന് പൊതുവായി പോര്‍ട്ടല്‍ ഉണ്ടാകും. ഇതില്‍ രജിസ്റ്റര്‍ ചെയ്യുന്നവര്‍ക്ക് തങ്ങളുടെ വസ്തുവോ കെട്ടിടമോ, ഉപകരണങ്ങളോ പദ്ധതിക്കായി വിട്ടുനല്‍കാനാകും. അതിലൂടെ വരുമാനവും സ്വന്തമാക്കാം. ഇതില്‍ ലാഭവിഹിതത്തിന്‍റെ നിശ്ചിത ശതമാനം പഞ്ചായത്തിന് വരുമാനമായി ലഭിക്കും. ഇതിലൂടെ സ്വയംപര്യാപ്തതയിലേക്ക് പഞ്ചായത്തിന് എത്താനും ആകുമെന്നാണ് പ്രതീക്ഷ.

ദേശീയ സമ്പാദ്യപദ്ധതി നിക്ഷേപം സമ്പദ്ഘടനയുടെ ഷോക് അബ്‌സോര്‍ബര്‍: മന്ത്രി വി.എന്‍. വാസവന്‍

കോട്ടയം: പ്രതിസന്ധിഘട്ടങ്ങളില്‍ രാജ്യത്തിന്‍റെ സമ്പദ്ഘടനയ്ക്ക് കോട്ടം തട്ടാതെ സംരക്ഷിക്കുന്നത് ദേശീയ സമ്പാദ്യപദ്ധതിയിലൂടെ സ്വരൂപിക്കുന്ന സമ്പത്താണെന്ന് മന്ത്രി വി.എന്‍. വാസവന്‍. ദേശീയ സമ്പാദ്യ വകുപ്പിന്‍റെ ജില്ലാ സംഗമം ഉദ്ഘാടനം ചെയ്യുകയായിരുന്നു അദ്ദേഹം. കോട്ടയം മാമ്മന്‍ മാപ്പിള ഹാളില്‍ നടന്ന യോഗത്തില്‍ ജില്ലാ കളക്ടര്‍ ജോണ്‍ വി. സാമുവല്‍ അധ്യക്ഷത വഹിച്ചു. ദേശീയ സമ്പാദ്യപദ്ധതി ഡയറക്ടര്‍ എസ്. മനു, അഡീഷണല്‍ ഡയറക്ടര്‍ പി. അജിത്ത് കുമാര്‍, ഡെപ്യൂട്ടി ഡയറക്ടര്‍ ജ്യോതി ദാമോദരന്‍, അസിസ്റ്റന്‍റ് ഡയറക്ടര്‍ കെ.ജെ. ഷോബിച്ചന്‍, വിദ്യാഭ്യാസവകുപ്പ് ഡെപ്യൂട്ടി ഡയറക്ടര്‍ ഇന്‍-ചാര്‍ജ് കെ.എ. സുനിമോള്‍,കോട്ടയം ഡിവിഷന്‍ പോസ്റ്റല്‍ സൂപ്രണ്ട് സ്വാതി റാണ എന്നിവര്‍ പ്രസംഗിച്ചു. മികച്ച പ്രവര്‍ത്തനം കാഴ്ചവച്ച മഹിളാ പ്രധാന്‍ ഏജന്‍റുമാരെയും എസ്എഎസ് ഏജന്‍റുമാരെയും ചടങ്ങില്‍ ആദരിച്ചു. സ്റ്റുഡന്‍റ്സ് സേവിംഗ്സ് സ്‌കീം പ്രവര്‍ത്തനങ്ങളില്‍ മികച്ച പ്രകടനം കാഴ്ചവച്ച സ്‌കൂളുകള്‍ക്കും നേതൃത്വം നല്‍കിയ ഡിഇഒ., എഇഒ ഓഫീസുകള്‍ക്കും പുരസ്‌കാരങ്ങള്‍ വിതരണം ചെയ്തു.

അറുനൂറ്റിമംഗലം സെന്‍റ് ജോസഫ് ക്നാനായ കാത്തോലിക്ക പള്ളിയിൽ തിരുനാളിന് ഇന്നു കൊടിയേറും

അറുനൂറ്റിമംഗലം: സെന്‍റ് ജോസഫ് ക്നാനായ കാത്തോലിക്ക പള്ളിയിൽ വിശുദ്ധ യൗസേപ്പ് പിതാവിന്‍റെ തിരുനാളിന് ഇന്നു വൈകുന്നേരം അഞ്ചിന് വികാരി ഫാ. ജയിംസ് പൊങ്ങാനയില്‍ കൊടിയേറ്റും. നാളെ രാവിലെ ഏഴിന് വിശുദ്ധ കുര്‍ബാന: ഫാ. കോള്‍ബെ പുത്തന്‍പുരയില്‍, വൈകുന്നേരം 6.45ന് ലദീഞ്ഞ്: ഫാ. അഗസ്റ്റിന്‍ വരിക്കമാക്കല്‍. ഏഴിന് പ്രദക്ഷിണം. 8.45ന് വചനസന്ദേശം: സഹവികാരി ഫാ. ഓനായി മണക്കുന്നേല്‍. തുടര്‍ന്ന് ആശീര്‍വാദം: ഫാ.ഫിലിപ്പ് രാമച്ചനാട്ട്. പ്രധാന തിരുനാള്‍ ദിനമായ 11നു രാവിലെ 6.30ന് വിശുദ്ധ കുര്‍ബാന. 9.30ന് ആഘോഷമായ തിരുനാള്‍ റാസ: ഫാ. ജയിംസ് പന്നാങ്കുഴി ഒഎസ്ബി മുഖ്യകാര്‍മികത്വും ഫാ. ജോമേഷ് ഇലഞ്ഞിപ്പള്ളില്‍, ഫാ. കോള്‍ബെ പുത്തന്‍പുരയില്‍, ഫാ. ജസ്റ്റിന്‍ പെരുമ്പളത്തുശേരില്‍, ഫാ. ജയ്‌സ് നീലാനിരപ്പേല്‍ എന്നിവര്‍ സഹകാര്‍മികത്വും വഹിക്കും. ഫാ. സനില്‍ മയില്‍ക്കുന്നേല്‍ തിരുനാള്‍ സന്ദേശം നല്‍കും. 12ന് തിരുനാള്‍ പ്രദക്ഷിണം.

ഉമ്മന്‍ ചാണ്ടി സ്നേഹസ്പര്‍ശത്തിനു തുടക്കം

കടുത്തുരുത്തി: സമൂഹത്തിലെ പിന്നാക്കാവസ്ഥയിലുള്ളവരുടെ സമഗ്ര വളര്‍ച്ചയ്ക്കുവേണ്ടി പ്രവര്‍ത്തിക്കുന്ന മന്ന ചാരിറ്റബിള്‍ ട്രസ്റ്റ് ജില്ലയില്‍ നടപ്പാക്കുന്ന ഉമ്മന്‍ ചാണ്ടി സ്നേഹസ്പര്‍ശം പദ്ധതികള്‍ക്ക് തുടക്കമായി. മാന്‍വെട്ടം സെന്‍റ് ജോര്‍ജ് കത്തോലിക്കാ പള്ളി ഓഡിറ്റോറിയത്തില്‍ മന്ന ചാരിറ്റബിള്‍ ട്രസ്റ്റ് മാനേജിംഗ് ട്രസ്റ്റി ഡോ. മറിയ ഉമ്മന്‍റെ അധ്യക്ഷതയില്‍ ചേര്‍ന്ന സമ്മേളനം മോന്‍സ് ജോസഫ് എംഎല്‍എ ഉദ്ഘാടനം ചെയ്തു. മള്ളിയൂര്‍ പരമേശ്വരന്‍ നമ്പൂതിരി, കോട്ടയം അതിരൂപത വികാരി ജനറാള്‍ ഫാ. മൈക്കിള്‍ ജോസഫ്, വികാരി ഫാ. തോമസ് കക്കാട്ട് തടം, ഫാ. ജോണ്‍ കുഴിക്കണ്ണി, ശോഭ ജയിംസ് തുടങ്ങിയവര്‍ പ്രസംഗിച്ചു. പദ്ധതികള്‍ക്കു തുടക്കംകുറിച്ചു കോട്ടയം കാരിത്താസ് ആശുപത്രിയുമായി സഹകരിച്ച് സൗജന്യ മെഡിക്കല്‍ ക്യാമ്പും സംഘടിപ്പിച്ചു. ഓര്‍ത്തോ, ഇഎന്‍ടി, കാര്‍ഡിയോളജി, ജനറല്‍ മെഡിസിന്‍, ഗൈനക്കോളജി, ഡെര്‍മറ്റോളജി, പള്‍മനോളജി തുടങ്ങിയ വിഭാഗങ്ങളുടെ സേവനം ക്യാമ്പില്‍ ലഭ്യമായിരുന്നു.

ഓരുമുട്ടുകൾ തുറന്നു

വൈക്കം: കൃഷിയിടങ്ങളിൽ ഓരുജലം കലരാതിരിക്കാൻ ഇടയാറിലും നാട്ടുതോടുകൾക്ക് കുറുകെയും സ്ഥാപിച്ച ഓരുമുട്ടുകൾ പൊളിച്ചുനീക്കിത്തുടങ്ങി. വേമ്പനാട്ടു കായലിനെയും കരിയാറിനെയും ബന്ധിപ്പിക്കുന്ന വൈക്കം തോട്ടുവക്കത്ത് കെവി കനാലിനു കുറുകെയുള്ള ഓരുമുട്ടാണ് ഇന്നലെ പൊളിച്ചുനീക്കിയത്. വൈക്കം വടയാർ വാഴമന മുട്ടുങ്കലിൽ മൂവാറ്റുപുഴയാറിന്‍റെ കൈവഴിയിൽ സ്ഥാപിച്ച പുത്തൻപാലം ഓരുമുട്ട് കഴിഞ്ഞ ദിവസം പൊളിച്ചുനീക്കിയിരുന്നു. തണ്ണീർമുക്കം ബണ്ടിന്‍റെ ഷട്ടർ തുറന്ന് ദിവസങ്ങൾക്കകം കരിയാർ സ്പിൽവേ തുറക്കുകയും തുടർന്ന് ഓരുമുട്ടുകൾ തുറന്ന് ഉൾപ്രദേശത്തെ മലിനീകരണമൊഴിവാക്കാൻ ഓരുജലം കയറ്റുന്നതായിരുന്നു പതിവ്. നെൽകൃഷി വിളവെടുപ്പ് വൈകിയതിനാൽ കരിയാർ സ്പിൽവേയുടെ ഷട്ടറുകളും ഇക്കുറി വൈകിയാണ് തുറന്നത്.ഓരുമുട്ടുകൾ നിശ്ചിത സമയം കഴിഞ്ഞിട്ടും തുറക്കാത്തതിരുന്നതിനാൽ ഉൾപ്രദേശത്തെ ജലാശയങ്ങളിലെ തോടുകളിൽ മാലിന്യങ്ങൾ ചീഞ്ഞളിഞ്ഞ് വെള്ളം കറുത്ത നിറത്തിലായിരുന്നു.ജനരോഷം ശക്തമായതോടെയാണ് അധികൃതർ ഓരുമുട്ട് പൊളിക്കാൻ തീരുമാനിച്ചത് .

കപിലിന് ജന്മനാട് കണ്ണീരോടെ വിടനൽകി

വൈക്കം: മൂകാംബികയിൽ പുഴയിൽ മുങ്ങി മരിച്ച സിനിമ ജൂണിയർ ആർട്ടിസ്റ്റ് വൈക്കം പള്ളിപ്രത്തുശേരി പട്ടശേരി മൂശാറത്തറ ഫൽഗുനന്‍റെ മകൻ എം.എഫ്.കപിലി(32)ന് ജന്മനാടിന്‍റെ കണ്ണീരിൽ കുതിർന്ന യാത്രാമൊഴി. ഇന്നലെ രാവിലെ മൃതദേഹം വീട്ടിലെത്തിച്ചപ്പോൾ നൂറുകണക്കിനാളുകളാണ് തങ്ങളുടെ പ്രിയപ്പെട്ടവനെ അവസാന നോക്കു കാണാനായി കാത്തുനിന്നത്.നാട്ടിലെയും ബന്ധുക്കളുടെയും വിവാഹം, മരണം തുടങ്ങി എല്ലാകാര്യങ്ങളിലും മുന്നിൽ നിന്നു സഹായിച്ചിരുന്ന കപിലിന്‍റെ അകാലവിയോഗം നാടിനാകെ നൊമ്പരമായി. ഹ്രസ്വ ചിത്രങ്ങളിലെയും റീൽസുകളിലെയും പ്രകടനത്തിലൂടെ വലിയ ആരാധകവൃന്ദത്തെ കപിൽ നേടിയിരുന്നു. കാന്താര-2 എന്ന കന്നഡ സിനിമയിൽ അഭിനയിക്കാൻ തെരഞ്ഞെടുക്കപ്പെട്ടതിനെത്തുടർന്നാണ് കപിൽ സുഹൃത്തുക്കളുമായി മൂകാംബികയിലെത്തിയത്. സിനിമയോട് കടുത്ത പ്രണയത്തിലായിരുന്ന കപിലിന് സിനിമയിൽ ലഭിച്ച അവസരം വിനിയോഗിക്കുന്നതിനു മുമ്പേ രംഗമൊഴിയേണ്ടി വന്നത് ഉറ്റവർക്കും സുഹൃത്തുക്കൾക്കും കനത്ത ആഘാതമായി. മൂകാംബിയിൽ ചൊവ്വാഴ്ച വൈകുന്നേരം നാലോടെ സുഹൃത്തുക്കളുമായി പുഴിയിൽ കുളിക്കുന്നതിനിടയിൽ കപിൽ കയത്തിൽ മുങ്ങിത്താഴുകയായിരുന്നു. സുഹൃത്തുക്കളും മറ്റും ചേർന്ന് ഉടൻ മുങ്ങിയെടുത്ത് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

അധികൃതരുടെ അനാസ്ഥ : കുറുപ്പന്തറ ബസ് സ്റ്റാന്‍ഡ് വീണ്ടും ഉപേക്ഷിക്കപ്പെട്ട നിലയില്‍

കുറുപ്പന്തറ: അധികൃതരുടെ അനാസ്ഥ മൂലം കുറുപ്പന്തറ ബസ് സ്റ്റാന്‍ഡ് വീണ്ടും ഉപേക്ഷിക്കപ്പെട്ട നിലയില്‍. സ്റ്റാന്‍ഡില്‍ ബസുകള്‍ പ്രവേശിക്കാതായിട്ട് മൂന്നു മാസമായി. ലോറികള്‍ക്കും മറ്റ് സ്വകാര്യ വാഹനങ്ങള്‍ക്കുമുള്ള പാര്‍ക്കിംഗ് ഗ്രൗണ്ടായി സ്റ്റാന്‍ഡിനെ മാറ്റിയതായി യാത്രക്കാരും നാട്ടുകാരും ആക്ഷേപം ഉന്നയിക്കുന്നു. ഏറ്റൂമാനൂര്‍-എറണാകുളം പ്രധാന പാതയിലാണ് സ്റ്റാന്‍ഡ് സ്ഥിതിചെയ്യുന്നത്. സ്റ്റാന്‍ഡിലേക്കുള്ള പ്രവേശനകവാടത്തിലെ ഓടയുടെ മുകളിലിട്ടിരിക്കുന്ന കോണ്‍ക്രീറ്റ് സ്ലാബുകള്‍ തകര്‍ന്നതോടെയാണ് ബസുകള്‍ സ്റ്റാന്‍ഡില്‍ പ്രവേശിക്കാതായത്. പ്രതിഷേധത്തെത്തുടര്‍ന്ന് പൊതുമരാമത്ത് വകുപ്പ് കോണ്‍ക്രീറ്റ് സ്ലാബ് മാറ്റി മെറ്റല്‍ സ്ലാബുകള്‍ സ്ഥാപിച്ചെങ്കിലും കെഎസ്ആര്‍ടിസി, സ്വകാര്യ ബസുകള്‍ സ്റ്റാന്‍ഡിനുള്ളില്‍ കയറാന്‍ തയാറാകുന്നില്ല. ഇതിനെതിരേ നടപടി സ്വീകരിക്കേണ്ട മാഞ്ഞൂര്‍ പഞ്ചായത്തും പോലീസും മോട്ടോര്‍ വാഹന വകുപ്പും യാതൊരു നടപടിയും സ്വീകരിക്കുന്നി ല്ലെന്ന് ആരോപണവുമുണ്ട്. ബസ്‌സ്റ്റാന്‍ഡില്‍ പ്രവേശിക്കാതെ പുറത്ത് പ്രധാന റോഡില്‍ ബസുകൾ നിര്‍ത്തിയാണ് നിലവില്‍ യാത്രക്കാരെ കയറ്റുന്നതും ഇറക്കുന്നതും. സ്റ്റാന്‍ഡില്‍ പ്രവേശിക്കാതെ ബസുകള്‍ സര്‍വീസ് നടത്തുന്നത് യാത്രക്കാര്‍ക്ക് ബുദ്ധിമുട്ടുണ്ടാക്കുന്നു. സ്റ്റാന്‍ഡിനു പുറത്ത് തോന്നുന്നിടത്ത് ബസുകള്‍ നിര്‍ത്തുന്നതിനാല്‍ വാഹനത്തില്‍ കയറിക്കൂടാനായി റോഡിലൂടെ അങ്ങോട്ടുമിങ്ങോട്ടും ഓടേണ്ട സ്ഥിതിയാണ്. ഇത് അപകടം ക്ഷണിച്ചുവരുത്തുന്നു. സ്റ്റാന്‍ഡിന്‍റെ ഉള്‍ഭാഗത്തെ ടാറിംഗ് തകര്‍ന്നു കുണ്ടും കുഴിയുമായി. പ്രവേശന കവാടവും പുറത്തേക്കിറങ്ങുന്ന ഭാഗവും പൂര്‍ണമായും തകര്‍ന്നു കിടക്കുകയാണ്. മെറ്റലും ടാറിംഗും ഇളകിയതോടെ വലിയ കുഴികളാണ് സ്റ്റാന്‍ഡില്‍ രൂപപ്പെട്ടിരിക്കുന്നത്. ബസുകള്‍ സ്റ്റാന്‍ഡില്‍ കയറ്റി യാത്രക്കാര്‍ക്ക് സുരക്ഷിതമായ യാത്രാസൗകര്യം ഒരുക്കുന്നതിന് വേണ്ട നടപടികള്‍ അധികൃതര്‍ സ്വീകരിച്ചില്ലെങ്കില്‍ സമരത്തിലേക്ക് പോകേണ്ടിവരുമെന്ന് നാട്ടുകാർ പറഞ്ഞു.

വൈക്കം കായലോരത്തെ നാഴികമണിശിൽപ്പം പുനഃസ്ഥാപിക്കണമെന്ന്

വൈക്കം: വൈക്കം കായലോരത്ത് കുട്ടികളുടെ പാർക്കിനു മുൻവശത്തായി സ്ഥാപിച്ചിരുന്ന കൂറ്റൻ നാഴികമണിശിൽപ്പം കാറ്റിൽ തകർന്നുവീണിട്ട് ഒരു വർഷമായിട്ടും പുനഃസ്ഥാപിക്കാത്തതിൽ പ്രതിഷേധം ശക്തമായി. വൈക്കം കായലോരബീച്ചിൽ കെടിഡിസി മോർട്ടലിനു സമീപത്തായി വെയിലും മഴയുമേറ്റ് നിറം മങ്ങിയ നിലയിലാണ് ശിൽപ്പമിപ്പോൾ. കൊച്ചിയിൽ ബിനാലെയിൽ കുറുപ്പന്തറ സ്വദേശിയായ ശിൽപി ജിജി സ്കറിയ ക്രോണിക്കിൾ ഓഫ് ദ സീഷോർ ഫോർ ടോൾഡ് എന്ന പേരിൽ ഒരുക്കിയ ഇൻസ്റ്റലേഷനായിരുന്നു ഈ നാഴികമണിശിൽപ്പം. മണിയുടെ ദ്വാരത്തിലുടെ ജലം തുള്ളിയായി വാർന്നു വീഴുന്ന വിധത്തിലായിരുന്നു നാഴികമണി ശിൽപ്പം. കാലത്തിന്‍റെ അനസ്യൂതമായ പ്രവാഹത്തെ വെളിവാക്കുന്ന ശിൽപം ലളിതകലാ അക്കാദമിയാണ് 2014ൽ ചരിത്രമുറങ്ങുന്ന വൈക്കത്ത് സ്ഥാപിച്ചത്. കായലോരത്ത് ഇരുമ്പുതൂണുകളിലായിരുന്നു ഉറപ്പിച്ചിരുന്നത്. അറ്റകുറ്റപ്പണി നടത്താതിരുന്നതിനാൽ ശിൽപ്പത്തിന്‍റെ ഇരുമ്പുകാലുകൾ തുരുമ്പിച്ച നിലയിലായിരുന്നു. ശക്തമായ കാറ്റിൽ നാഴികമണിശിൽപ്പം തകർന്നു വീണതിനെത്തുടർന്ന് യന്ത്രസഹായത്തോടെയാണ് കായലോര ബീച്ചിലേക്ക് മാറ്റിയത്. ലളിതകലാ അക്കാദമി നാഴികമണിശിൽപ്പം പുനഃസ്ഥാപിക്കുന്നതിന് പദ്ധതി തയാറാക്കിയെങ്കിലും അക്കാദമിയുടെ സാമ്പത്തിക പരാധീനതയാണ് തുടർനടപടികൾ തടസപ്പെടുത്തിയത്. ഫണ്ട് ലഭിച്ചാലുടൻ നാഴികമണിശിൽപ്പം വിനോദ സഞ്ചാരമേഖലയ്ക്കുകൂടി ഗുണപ്രദമാകുന്ന തരത്തിൽ സ്ഥാപിക്കാനാണ് അധികൃതരുടെ തീരുമാനം.

സ്രാങ്ക് കിഷോർ കുമാറിനെ ആദരിച്ചു

കുമരകം: പാൻ ഇന്ത്യ മാസ്റ്റേഴ്സ് ഗെയിം ഫെഡറേഷന്‍റെ നാലാമത് മാസ്റ്റേഴ്സ് വെയിറ്റ് ലിഫ്റ്റിംഗ് ആൻഡ് പവർ ലിഫ്റ്റിംഗ് ചാമ്പ്യൻഷിപ്പിൽ 83 കിലോ വിഭാഗത്തിൽ കേരളത്തെ പ്രതിനിധീകരിച്ച് നാലു സ്വർണമെഡലുകൾ കരസ്ഥമാക്കിയ കുമരകം -മുഹമ്മ റൂട്ടിലെ സ്രാങ്ക് കിഷോർ കുമാറിനെ ആദരിച്ചു. ഇന്നലെ രാവിലെ 10.30ന് ജലഗതാഗത വകുപ്പ് മുഹമ്മ സ്റ്റേഷന്‍മാസ്റ്റർ ഷാനവാസ് ഖാന്‍റെ അധ്യക്ഷതയിൽ ചേർന്ന ചടങ്ങിൽ സ്റ്റാഫ് കമ്മിറ്റിയാണ് കിഷോർ കുമാറിനെ ആദരിച്ചത്. കമ്മിറ്റി പ്രസിഡന്‍റ് മനോജ്, പി.ആർ. സന്തോഷ് കുമാർ, രാധാകൃഷ്ണൻ, കെ.കെ. രാജേഷ്, ടി. സന്തോഷ് തുടങ്ങിയവർ പ്രസംഗിച്ചു.

വിജ്ഞാനകേരളം നവകേരളത്തിന്‍റെ പുതുവഴികളിൽ സുപ്രധാനം: മന്ത്രി വി.എന്‍. വാസവന്‍

കോട്ടയം: നവകേരളത്തിന്‍റെ പുതുവഴികളിലെ ഏറ്റവും സുപ്രധാനമായ കാര്യമായിരിക്കും വിജ്ഞാനകേരളമെന്ന് മന്ത്രി വി.എന്‍. വാസവന്‍. ജില്ലാ ആസൂത്രണസമിതി കോണ്‍ഫറന്‍സ് ഹാളില്‍ വിജ്ഞാനകേരളം ജില്ലാ കൗണ്‍സില്‍ രൂപീകരണവും തുടര്‍പ്രവര്‍ത്തന രൂപരേഖയും സംബന്ധിച്ചു നടന്ന യോഗത്തില്‍ അധ്യക്ഷത വഹിച്ചു പ്രസംഗിക്കുകയായിരുന്നു മന്ത്രി. വിജ്ഞാനകേരളം ജില്ലാ കൗണ്‍സിലും യോഗത്തില്‍ രൂപീകരിച്ചു. ജില്ലയിലെ എംഎല്‍എമാര്‍, ജില്ലാ പഞ്ചായത്ത് പ്രസിഡന്‍റ്, ജില്ലാ കളക്ടര്‍, ജില്ലാ പഞ്ചായത്ത് ഭാരവാഹികള്‍, ബ്ലോക്ക് പഞ്ചായത്ത് പ്രസിഡന്‍റുമാര്‍, നഗരസഭാ അധ്യക്ഷര്‍, പഞ്ചായത്ത് പ്രസിഡന്‍റ് അസോസിയേഷന്‍ ഭാരവാഹികള്‍, തദ്ദേശ സ്വയംഭരണവകുപ്പ് ജോയിന്‍റ് ഡയറക്ടര്‍, ജില്ലാ പ്ലാനിംഗ് ഓഫീസര്‍, പിഎംയു പ്രതിനിധികള്‍, യുവജനക്ഷേമബോര്‍ഡ് പ്രതിനിധികള്‍, അസാപ്, കെയ്സ് എന്നിവയുടെ പ്രതിനിധികള്‍, പ്രഫഷണല്‍ കമ്യൂണിറ്റി മെന്‍റര്‍മാരുടെ പ്രതിനിധികള്‍ എന്നിവര്‍ അംഗങ്ങളായിരിക്കും. തൊഴിലന്വേഷകരുടെ പട്ടിക ജില്ലയില്‍ ഈ മാസം അവസാനത്തോടെ പൂര്‍ത്തിയാക്കണമെന്നു വിഷയാവതരണം നടത്തിയ വിജ്ഞാനകേരളം പദ്ധതി ഉപദേഷ്ടാവ് ഡോ. ടി.എം. തോമസ് ഐസക്ക് പറഞ്ഞു. നോളജ് എക്കണോമി മിഷനും കുടുംബശ്രീയും തദ്ദേശ സ്വയംഭരണ വകുപ്പും ചേര്‍ന്നാണ് വിജ്ഞാനകേരളം ജനകീയ കാമ്പയിന്‍ നടപ്പാക്കുന്നത്. ചാണ്ടി ഉമ്മന്‍ എം.എല്‍.എ, ജില്ലാ പഞ്ചായത്ത് പ്രസിഡന്‍റ് ഹേമലതാ പ്രേം സാഗര്‍, ജില്ലാ കളക്ടര്‍ ജോണ്‍ വി. സാമുവല്‍, ചങ്ങനാശേരി നഗരസഭാധ്യക്ഷ കൃഷ്ണകുമാരി രാജശേഖരന്‍, ബ്ലോക്ക് പഞ്ചായത്ത് പ്രസിഡന്‍റുമാരായ മുകേഷ് കെ. മണി, ബെറ്റി റോയി, റാണി ജോസ്, രാജു ജോണ്‍ ചിറ്റേത്ത്, എസ്.ബിജു, ജില്ലാ പഞ്ചായത്തംഗം മഞ്ജു സുജിത്ത്, പി.ആര്‍. അനുപമ, പഞ്ചായത്ത് പ്രസിഡന്‍റ്സ് അസോസിയേഷന്‍ ജില്ലാ സെക്രട്ടറി അജയന്‍ കെ. മേനോന്‍, തദ്ദേശ സ്വയം ഭരണവകുപ്പ് ജോയിന്‍റ് ഡയറക്ടര്‍ ബിനു ജോണ്‍, ജില്ലാ പ്ലാനിംഗ് ഓഫീസര്‍ എം.പി. അനില്‍കുമാര്‍, കെ. ഡിസ്‌ക് പ്രതിനിധി ജിന്‍റോ സെബാസ്റ്റ്യന്‍ എന്നിവര്‍ പ്രസംഗിച്ചു.

വള്ളാറ പുത്തൻ പള്ളിയിൽ തിരുനാൾ

കുമരകം: വള്ളാറ പുത്തന്‍ പള്ളിയില്‍ വിശുദ്ധ ജോണ്‍ നെപുംസ്യാനോസിന്‍റെ തിരുനാളിനും പരിശുദ്ധ അമലോത്ഭവ മാതാവിന്‍റെ ദര്‍ശനത്തിരുനാളിനും 12നു കൊടിയേറും. രാവിലെ ഒമ്പതിനു വികാരി ഫാ. മാത്യു കുഴിപ്പിള്ളിൽ കൊടിയേറ്റും. തുടര്‍ന്ന് വിശുദ്ധ കുര്‍ബാനയും കുട്ടികളുടെ ദിവ്യകാരുണ്യസ്വീകരണവും. കോട്ടയം അതിരൂപത സഹായ മെത്രാന്‍ മാര്‍ ജോസഫ് പണ്ടാരശേരിൽ കാർമികത്വം വഹിക്കും. വൈകുന്നേരം ആറിന് സണ്‍ഡേസ്‌കൂളിന്‍റെയും വിവിധ ഭക്തസംഘടനകളുടെയും വാര്‍ഷികവും കലാസന്ധ്യയും നടക്കും. സിനി ആര്‍ട്ടിസ്റ്റ് കാശ്മീര സുജീഷ് ഉദ്ഘാടനം ചെയ്യും. 13നു രാവിലെ ഒമ്പതിനു വിശുദ്ധ കുര്‍ബാന ഫാ. ഏബ്രഹാം കൊച്ചുപറമ്പില്‍, തുടര്‍ന്നു പള്ളിക്കു ചുറ്റും പ്രദക്ഷിണം. ഏഴിന് കൊച്ചിൻ ഡാസിലേഴ്‌സിന്‍റെ മെഗാഷോ. 14നു രാവിലെ ഒമ്പതിന് സുറിയാനി പാട്ടു കുര്‍ബാന ഫാ. ജയിംസ് പൊങ്ങാനയില്‍. 630നു പ്രദക്ഷിണം. 8.30ന് പ്രസംഗം: ഫാ. റെനി കട്ടേല്‍. പ്രസംഗം: ഫാ. സജി മലയില്‍ പുത്തന്‍പുര. കപ്ലോൻ വാഴ്ച. 15നു രാവിലെ 6.30നു വിശുദ്ധ കുര്‍ബാന, 10.30നു തിരുനാള്‍ റാസ. മുഖ്യകാര്‍മികന്‍: ഫാ. ലിജോ കൊച്ചുപറമ്പില്‍. സഹകാര്‍മികര്‍: ഫാ. ജോണ്‍സണ്‍ ചെത്തിക്കുന്നേല്‍, ഫാ. ജിബിന്‍ കീച്ചേരില്‍. ഫാ. നിധിന്‍ വെട്ടിക്കാട്ട്, ഫാ. മാത്യു കുളക്കാട്ടുകൂടിയില്‍, പ്രസംഗം: ഫാ. ജോണ്‍സണ്‍ നിലനിരപ്പേല്‍. പ്രസംഗം: ഫാ. മാത്യു മണക്കാട്ട്, പ്രദക്ഷിണം. ഏഴിനു മെഗാ ഇവന്‍റ്സ് മാസ് കമ്യുണിക്കേഷന്‍സ്. 16നു രാവിലെ ഏഴിനു മരിച്ചവര്‍ക്കു വേണ്ടിയുള്ള സമൂഹബലിയും സെമിത്തേരി സന്ദര്‍ശനവും.

നീലംപേരൂര്‍ സെന്‍റ് ജോര്‍ജ് വലിയപള്ളി വലിയ പെരുന്നാള്‍ ഇന്നും നാളെയും

കുറിച്ചി: നീലംപേരൂര്‍ സെന്‍റ് ജോര്‍ജ് ക്നാനായ വലിയ പള്ളിയിലെ വലിയ പെരുന്നാള്‍ ഇന്നും നാളെയും ആഘോഷിക്കും. ഇന്നു വൈകുന്നേരം ആറിനു സന്ധ്യാ പ്രാര്‍ഥന, ഏഴിന് പ്രസംഗം: ഫാ. ബിബിന്‍ ആന്‍ഡ്രൂസ് കുന്നുംപുറം, 7.15 ന് റാസ. 9.30 ന് സുത്താറ നമസ്‌കാരം, ആശീര്‍വാദം, ആകാശവിസ്മയ കാഴ്ചകള്‍, ബാന്‍റ്സെറ്റ്, ചെണ്ടമേളം, വയലിന്‍ ഫ്യൂഷന്‍ എന്നിവ ഉണ്ടായിരിക്കും. നാളെ രാവിലെ ഏഴിന് വിശുദ്ധ കുര്‍ബാന ഫാ. കെ.സി. ഏബ്രഹാം കട്ടത്തറ, ഒന്‍പതിനു ഏഴിന്മേല്‍ കുര്‍ബാന ആര്‍ച്ച്ബിഷപ് കുര്യാക്കോസ് മാര്‍ സേവേറിയോസ്, സന്ദേശം, 11ന് നേര്‍ച്ചവിതരണം സെമിത്തേരിയില്‍ ധൂപപ്രാര്‍ഥന, ഉച്ചകഴിഞ്ഞ് 3.30ന് റാസ, ആശീര്‍വാദം, കൊടിയിറക്ക്‌.

ക്നാനായ കാത്തലിക് വിമന്‍സ് അസോസിയേഷന്‍ മാതൃദിനാഘോഷം‍ ഇന്ന്

കോട്ടയം: ക്നാനായ കത്തോലിക്കാ വിമെന്‍സ് അസോസിയേഷന്‍ മാതൃദിനത്തോടനുബന്ധിച്ച് ഇന്നു മാതൃസംഗമം സംഘടിപ്പിക്കും. രാവിലെ 9.30 മുതല്‍ തെള്ളകം ചൈതന്യ പാസ്റ്ററല്‍ സെന്‍ററിലാണ് മാതൃദിനാഘോഷം സംഘടിപ്പിക്കുന്നത്. സഹായമെത്രാന്‍ മാര്‍ ജോസഫ് പണ്ടാരശേരില്‍ ഉദ്ഘാടനം ചെയ്യും. കെസിഡബ്ല്യുഎ പ്രസിഡന്‍റ് ഷൈനി ചൊള്ളമ്പേല്‍ അധ്യക്ഷത വഹിക്കും. അതിരൂപത പ്രൊ-പ്രോട്ടോസിഞ്ചെലൂസ് ഫാ. തോമസ് ആനിമൂട്ടില്‍, ഇടയ്ക്കാട്ട് ഫൊറോന വികാരി ഫാ. സജി മലയില്‍പുത്തന്‍പുരയില്‍, അപ്നാദേശ് ചീഫ് എഡിറ്റര്‍ ഫാ. മാത്യു കുര്യത്തറ, കാരിത്താസ് സെക്കുലര്‍ ഇന്‍സ്റ്റിറ്റ്യൂട്ട് ഡയറക്ട്രസ് ജനറല്‍ സിസ്റ്റര്‍ ലിസി മുടക്കോടില്‍ എന്നിവര്‍ പ്രസംഗിക്കും. വനിതാ കൗണ്‍സലിംഗ് സെല്‍ ഉദ്ഘാടനവും ക്നാനായ മങ്ക മത്സരവും നടത്തും. കൂടുതല്‍ മക്കളുള്ള മാതാക്കളെ ചടങ്ങില്‍ ആദരിക്കും.

മലയാള ബ്രാഹ‌്മ‌‌‌ണ സമാജം സമ്മേളനം

കോട്ടയം: മലയാള ബ്രാഹ്മണ സമാജം നവതിയാഘോഷ സമാപനവും സംസ്ഥാന സമ്മേളനവും 11നു ചൈതന്യ ഓഡിറ്റോറിയത്തില്‍ നടക്കും. രാവിലെ എട്ടിനു പതാക ഉയര്‍ത്തും. 8.30നു ശബരിമല തന്ത്രി മഹേഷ് മോഹനര് ഉദ്ഘാടനം ചെയ്യും. ഉച്ചകഴിഞ്ഞ് 1.30നു പൊതുസമ്മേളനത്തില്‍ സമാജം സംസ്ഥാന പ്രസിഡന്‍റ് ടി.വി. നാരായണശര്‍മ അധ്യക്ഷത വഹിക്കും. കവി വി. മധുസൂദനന്‍ നായര്‍ ഉദ്ഘാടനം ചെയ്യും. ഡോ. അലക്‌സാണ്ടര്‍ ജേക്കബ് മുഖ്യപ്രഭാഷണം നടത്തും. മലയാള ബ്രാഹ്മണ സമാജം കേന്ദ്ര ജനറല്‍ സെക്രട്ടറി മോഹന്‍കുമാര്‍ പുതുമന, കേന്ദ്ര ട്രഷറര്‍ ത്രിവിക്രമന്‍ നമ്പൂതിരി, എകെബിഎഫ് സംസ്ഥാനപ്രസിഡന്‍റ് എച്ച്. ഗണേഷ്, ജനറല്‍ സെക്രട്ടറി മുരളീധരന്‍ നമ്പൂതിരി, പുഷ്പക ബ്രാഹ്മണ സേവാ സംഘം സംസ്ഥാനപ്രസിഡന്‍റ് എല്‍. വിശ്വനാഥന്‍, ഗൗഡ സാരസ്വത ബ്രാഹ്മണ ക്ഷേമ സഭാ സംസ്ഥാന പ്രസിഡന്‍റ് രംഗദാസപ്രഭു, സുരേഷ് മൂസത് തുടങ്ങിയവർ പ്രസംഗിക്കും.

അംശദായം ഓണ്‍ലൈനായി അടയ്ക്കാം

കോട്ടയം: സംസ്ഥാന അസംഘടിത തൊഴിലാളി സാമൂഹികസുരക്ഷാ ബോര്‍ഡില്‍ ഓണ്‍ലൈന്‍ പേമെന്‍റ് സംവിധാനം നടപ്പാക്കുന്നതിന്‍റെ ഭാഗമായി ചീഫ് എക്‌സിക്യൂട്ടീവ് ഓഫീസറുടെ പേരിലുള്ള 57037145715 എന്ന അക്കൗണ്ട് നമ്പറിലേക്ക് അംശദായം അടയ്ക്കുന്നത് അവസാനിപ്പിച്ചു. ജില്ലാ ഓഫീസില്‍നിന്ന് അംഗത്വം എടുത്തിട്ടുള്ളവര്‍ ഈ അക്കൗണ്ടിലേക്ക് അംശദായം അടയ്ക്കാന്‍ പാടില്ലെന്നും ജൂലൈ 31നുള്ളില്‍ അംഗങ്ങളുടെ വിവരങ്ങള്‍ സോഫ്റ്റ്‌വേറില്‍ ഡേറ്റാ എന്‍ട്രി നടത്തണമെന്നും ജില്ലാ എക്‌സിക്യൂട്ടീവ് ഓഫീസര്‍ അറിയിച്ചു. ഇതുവരെയുള്ള അംശദായത്തുക ഓഫീസില്‍നിന്ന് അപ്രൂവ്ചെയ്ത് വാങ്ങണം. ഓഗസ്റ്റ് മുതല്‍ പണമിടപാടുകള്‍ പൂര്‍ണമായും ഓണ്‍ലൈന്‍ വഴിയായിരിക്കും. അതിനാല്‍, എല്ലാ അംഗങ്ങളും ഓണ്‍ലൈന്‍ സംവിധാനത്തിലേക്ക് മാറുന്നതിന്‍റെ ഭാഗമായി ഫോട്ടോ, ആധാര്‍ കോപ്പി, ബാങ്ക് പാസ്ബുക്ക് സിംഗിള്‍ അക്കൗണ്ട് കോപ്പി, വയസു തെളിയിക്കുന്ന രേഖ, ക്ഷേമനിധി ഐ.ഡി. കാര്‍ഡ് (ഒറിജിനല്‍), മുഴുവന്‍ അടവുരേഖകള്‍, നോമിനിയുടെ പേരും വയസും എന്നീ രേഖകളുമായി അസംഘടിത തൊഴിലാളി സാമൂഹ്യ സുരക്ഷാ ബോര്‍ഡിന്‍റെ ഓഫീസുമായി ബന്ധപ്പെടണം. 0481-2300762.

ദേശീയ സമ്പാദ്യപദ്ധതി നിക്ഷേപം സമ്പദ്ഘടനയുടെ ഷോക് അബ്‌സോര്‍ബര്‍: മന്ത്രി വി.എന്‍. വാസവന്‍

കോട്ടയം: പ്രതിസന്ധിഘട്ടങ്ങളില്‍ രാജ്യത്തിന്‍റെ സമ്പദ്ഘടനയ്ക്ക് കോട്ടം തട്ടാതെ സംരക്ഷിക്കുന്നത് ദേശീയ സമ്പാദ്യപദ്ധതിയിലൂടെ സ്വരൂപിക്കുന്ന സമ്പത്താണെന്ന് മന്ത്രി വി.എന്‍. വാസവന്‍. ദേശീയ സമ്പാദ്യ വകുപ്പിന്‍റെ ജില്ലാ സംഗമം ഉദ്ഘാടനം ചെയ്യുകയായിരുന്നു അദ്ദേഹം. കോട്ടയം മാമ്മന്‍ മാപ്പിള ഹാളില്‍ നടന്ന യോഗത്തില്‍ ജില്ലാ കളക്ടര്‍ ജോണ്‍ വി. സാമുവല്‍ അധ്യക്ഷത വഹിച്ചു. ദേശീയ സമ്പാദ്യപദ്ധതി ഡയറക്ടര്‍ എസ്. മനു, അഡീഷണല്‍ ഡയറക്ടര്‍ പി. അജിത്ത് കുമാര്‍, ഡെപ്യൂട്ടി ഡയറക്ടര്‍ ജ്യോതി ദാമോദരന്‍, അസിസ്റ്റന്‍റ് ഡയറക്ടര്‍ കെ.ജെ. ഷോബിച്ചന്‍, വിദ്യാഭ്യാസവകുപ്പ് ഡെപ്യൂട്ടി ഡയറക്ടര്‍ ഇന്‍-ചാര്‍ജ് കെ.എ. സുനിമോള്‍,കോട്ടയം ഡിവിഷന്‍ പോസ്റ്റല്‍ സൂപ്രണ്ട് സ്വാതി റാണ എന്നിവര്‍ പ്രസംഗിച്ചു. മികച്ച പ്രവര്‍ത്തനം കാഴ്ചവച്ച മഹിളാ പ്രധാന്‍ ഏജന്‍റുമാരെയും എസ്എഎസ് ഏജന്‍റുമാരെയും ചടങ്ങില്‍ ആദരിച്ചു. സ്റ്റുഡന്‍റ്സ് സേവിംഗ്സ് സ്‌കീം പ്രവര്‍ത്തനങ്ങളില്‍ മികച്ച പ്രകടനം കാഴ്ചവച്ച സ്‌കൂളുകള്‍ക്കും നേതൃത്വം നല്‍കിയ ഡിഇഒ., എഇഒ ഓഫീസുകള്‍ക്കും പുരസ്‌കാരങ്ങള്‍ വിതരണം ചെയ്തു.

വേളാങ്കണ്ണിക്ക് ഒരു ട്രെയിൻകൂടി‍; ആദ്യയാത്ര 14ന്

ചങ്ങനാശേരി: മധ്യകേരളത്തിലെയും തമിഴ്‌നാട്ടിലെയും യാത്രക്കാരുടെയും തീര്‍ഥാടകരുടെയും ആവശ്യം പരിഗണിച്ച് എറണാകുളത്തുനിന്നു വേളാങ്കണ്ണിയിലേക്ക് പുതിയൊരു സ്‌പെഷല്‍ ട്രെയിന്‍കൂടി (06061/62) അനുവദിച്ചതായി കൊടിക്കുന്നില്‍ സുരേഷ് എംപി അറിയിച്ചു. 14ന് രാത്രി 11.50ന് എറണാകുളത്തുനിന്ന് ആരംഭിക്കുന്ന ആദ്യ സര്‍വീസ് അടുത്തദിവസം വൈകുന്നേരം 3.15ന് വേളാങ്കണ്ണിയില്‍ എത്തിച്ചേരും. 15ന് വൈകുന്നേരം 6.40ന് വേളാങ്കണ്ണിയില്‍നിന്നു പുറപ്പെടുന്ന ട്രെയിന്‍ 16ന് പകല്‍ 11.55ന് എറണാകുളത്ത് എത്തും. ആറ് ജനറല്‍ കമ്പാര്‍ട്ട്‌മെന്‍റുകള്‍ അടക്കം 18 കോച്ചുകള്‍ ഉണ്ട്. കഴിഞ്ഞയാഴ്ച മധുരയില്‍ നടന്ന ദക്ഷിണ റെയില്‍വേ ജനറല്‍ മാനേജര്‍മായുള്ള കൂടിക്കാഴ്ചയില്‍ വേളാങ്കണ്ണിയിലേക്ക് അധിക ട്രെയിന്‍ അനുവദിക്കണമെന്ന് കൊടിക്കുന്നില്‍ സുരേഷ് ആവശ്യപ്പെട്ടിരുന്നു. തമിഴ്‌നാട്ടില്‍നിന്നു യോഗത്തില്‍ പങ്കെടുത്ത മുഴുവന്‍ എംപിമാരും ആവശ്യത്തെ പിന്തുണച്ചു. കേരളത്തില്‍നിന്ന് വേളാങ്കണ്ണിയിലേക്ക് പ്രത്യേക സര്‍വീസ് അനുവദിക്കുന്നതിന് ആവശ്യമായ ഇടപെടല്‍ തേടി വേളാങ്കണ്ണി പള്ളി മാനേജ്‌മെന്‍റ് കമ്മിറ്റി നേരത്തേ കൊടിക്കുന്നില്‍ സുരേഷിന് നിവേദനം നല്‍കിയിരുന്നു.

ഉമ്മൻ ചാണ്ടി സപ്തതി സ്മാരക ഓഡിറ്റോറിയം ഉദ്ഘാടനം ചെയ്തു

കോട്ടയം: കോട്ടയം നഗരസഭയുടെ ഉടമസ്ഥതയിലുള്ള നാഗമ്പടം ബസ് സ്റ്റാന്‍ഡ് ഷോപ്പിംഗ് കോംപ്ലക്‌സ് കെട്ടിടത്തില്‍ നിര്‍മാണം പൂര്‍ത്തീകരിച്ച ഉമ്മന്‍ ചാണ്ടിയുടെ പേരിലുള്ള സപ്തതി സ്മാരക ഓഡിറ്റോറിയത്തിന്‍റെ പ്രവര്‍ത്തനോദ്ഘാടനം തിരുവഞ്ചൂര്‍ രാധാകൃഷ്ണന്‍ എംഎല്‍എ നിര്‍വഹിച്ചു. 2014ല്‍ ഉമ്മന്‍ ചാണ്ടിക്കു 70 വയസ് തികഞ്ഞതിന്‍റെ ആദരസൂചകമായിട്ടാണ് നഗരസഭാ സ്മാരക ഓഡിറ്റോറിയം എന്ന പേരില്‍ കെട്ടിടം നിര്‍മിക്കാന്‍ തീരുമാനിച്ചത്. നിര്‍മാണം പൂര്‍ത്തീകരിച്ചിരുന്നെങ്കിലും കെട്ടിടം ഓഡിറ്റോറിയമായി പ്രവര്‍ത്തിപ്പിക്കുന്നതിനുള്ള സൗകര്യം ഈ ഭരണ സമിതിയുടെ സമയത്താണ് പൂര്‍ത്തിയാക്കിയത്. 300 പേര്‍ക്കു ഒരേസമയം ഇരിക്കാവുന്ന എസി ഓഡിറ്റോറിയമാണിത്. വാടകയിനത്തില്‍ 8000 രൂപയും ജിഎസ്്ടിയുമാണ് ഈടാക്കുന്നത്. .നഗരസഭാ ചെയര്‍പേഴ്‌സണ്‍ ബിന്‍സി സെബാസ്റ്റ്യന്‍ അധ്യക്ഷത വഹിച്ചു. ചാണ്ടി ഉമ്മന്‍ എംഎല്‍എ, കൗണ്‍സിലര്‍മാരായ സിന്‍സി പാറേല്‍, ബിന്ദു സന്തോഷ്‌കുമാര്‍, എം.പി. സന്തോഷ്‌കുമാര്‍, സാബു മാത്യു, ജൂലിയസ് ചാക്കോ, ജയമോള്‍ ജോസഫ്, ധന്യമ്മ രാജ്, ലിസി കുര്യന്‍, മോളിക്കുട്ടി സെബാസ്റ്റ്യന്‍, ലിസി മണിമല, ടി.സി. റോയി, ടോം കോര അഞ്ചേരില്‍, ഷൈനി ഫിലിപ്, എന്‍. ജയചന്ദ്രന്‍ എന്നിവര്‍ പ്രസംഗിച്ചു.

പിആര്‍എസ് സ്വീകരിക്കുന്നില്ല : നെല്‍കര്‍ഷകര്‍ ഇന്ന് കനറാ ബാങ്ക് വളയും

ചങ്ങനാശേരി: സംഭരിച്ച നെല്ലിന്‍റെ പിആര്‍എസ് സ്വീകരിക്കാത്ത കനറാ ബാങ്കിന്‍റെ നയത്തിലും പിആര്‍എസ് സ്വീകരിച്ചിട്ട് പണം നല്‍കാത്ത എസ്ബിഐയുടെ നയത്തിലും പ്രതിഷേധിച്ച് നെല്‍കര്‍ഷക സംസ്ഥാന സമിതിയുടെ നേതൃത്വത്തില്‍ ഇന്നു രാവിലെ 10ന് ചങ്ങനാശേരി മാര്‍ക്കറ്റ് റോഡിലുള്ള കനറാ ബാങ്കിലേക്ക് നെല്‍കര്‍ഷകരുടെ മാര്‍ച്ചും ധര്‍ണയും നടത്തും. കേന്ദ്രം വര്‍ധിപ്പിച്ച തുകയായ ക്വിന്‍റലിന് 32.32 രൂപ നല്‍കുക, കിഴിവ് കൊള്ള അവസാനിപ്പിക്കുക, പമ്പിംഗ് സബ്‌സിഡി കുടിശിക നല്‍കുക, കൈകാര്യച്ചെലവ് വര്‍ധിപ്പിക്കുക തുടങ്ങിയ ആവശ്യങ്ങളും നെല്‍ കര്‍ഷക സംരക്ഷണ സമിതി ധര്‍ണയില്‍ ഉന്നയിക്കുമെന്ന് സംസ്ഥാന രക്ഷാധികാരി വി.ജെ. ലാലി, പ്രസിഡന്‍റ് റജീന അഷറഫ്, ജനറല്‍ സെക്രട്ടറി സോണിച്ചന്‍ പുളിങ്കുന്ന് എന്നിവര്‍ അറിയിച്ചു. പെരുന്ന ബസ് സ്റ്റാന്‍ഡില്‍നിന്നും ആരംഭിക്കുന്ന മാര്‍ച്ച് കവലയിലൂടെ ബാങ്കിനുമുമ്പില്‍ എത്തിച്ചേര്‍ന്ന ശേഷമാണ് ധര്‍ണ നടത്തുന്നത്. തുടര്‍ന്നുള്ള ദിവസങ്ങളില്‍ എസ്ബിഐ, കാനറാ ബാങ്ക് ശാഖകള്‍ക്കു മുമ്പിലും സിവില്‍ സപ്ലൈസ്, പാഡി, കൃഷി ഓഫീസുകള്‍ക്കു മുമ്പിലും കര്‍ഷകര്‍ കരിങ്കൊടി ഉയര്‍ത്തി സമരങ്ങള്‍ സംഘടിപ്പിക്കും.

പാലാ രൂപതാ മിഷനറി സംഗമം പാര്‍ക്കിംഗ് നിര്‍ദേശങ്ങള്‍

പ്രവിത്താനം: നാളെ മാര്‍ ആഗസ്തിനോസ് പള്ളിയില്‍ രാവിലെ 9.15ന് ആരംഭിക്കുന്ന പാലാ രൂപത മിഷനറി സംഗമത്തിന് വിപുലമായ പാര്‍ക്കിംഗ് ക്രമീകരണങ്ങളാണ് ഒരുക്കിയിരിക്കുന്നതെന്ന് പാര്‍ക്കിംഗ് കമ്മിറ്റി ചെയര്‍മാന്‍ അറിയിച്ചു. പങ്കെടുക്കുന്നവര്‍ പ്രധാന പ്രവേശന കവാടത്തിലൂടെ പ്രവേശിക്കണം. വാഹനങ്ങള്‍ പാര്‍ക്കിംഗ് സ്ഥലങ്ങളിലേക്കു പ്രവേശിച്ചതിന് ശേഷം ആളുകളെ ഇറക്കണം. നടക്കാന്‍ ബുദ്ധിമുട്ടുള്ളവര്‍രെ സമ്മേളനവേദിയോടു ചേര്‍ന്നുള്ള വഴിയില്‍ വാഹനം നിര്‍ത്തി ആളുകളെ ഇറക്കിയ ശേഷം പാര്‍ക്കിംഗ് ഗ്രൗണ്ട് രണ്ടില്‍ (സ്‌കൂള്‍ ഗ്രൗണ്ട്) ലേക്കു പോകണം. വിശിഷ്ടാതിഥികള്‍ക്കായി വാഹനപാര്‍ക്കിംഗ് ഗ്രൗണ്ട് നാലില്‍ (ഓഡിറ്റോറിയം) ക്രമീകരിച്ചിരിച്ചിട്ടുണ്ട്. മീഡിയ, ഫോട്ടോഗ്രാഫേര്‍സ് തുടങ്ങിയവര്‍ക്ക് രണ്ടാം പ്രവേശന കവാടത്തിലൂടെ പ്രവേശിച്ച് സമ്മേളന വേദിയില്‍ ഏത്താം. സമ്മേളന സമയത്തു രാവിലെ എട്ടു മുതല്‍ ഉച്ചകഴിഞ്ഞ് മൂന്നു വരെ പ്രവിത്താനം കുരിശുപള്ളിക്കവല മുതല്‍ ഫോറോന പള്ളി കഴിഞ്ഞ് മാര്‍ക്കറ്റ് ജംഗ്ഷന്‍ വരെ വാഹനങ്ങള്‍ റോഡരികില്‍ പാര്‍ക്ക് ചെയ്യരുത്. വലിയ വാഹനങ്ങള്‍ പാര്‍ക്കിംഗ് ഗ്രൗണ്ട് മൂന്നില്‍ (ഓഡിറ്റോറിയത്തിന്‍റെ താഴ്ഭാഗത്തെ ഗ്രൗണ്ട്) പാര്‍ക്ക് ചെയ്യണം. ആളുകളെ ഇറക്കി തിരിച്ചു പോകുന്നവര്‍ തിരക്കു കുറയ്ക്കാന്‍ പാര്‍ക്കിംഗ് ഗ്രൗണ്ട് മൂന്നില്‍ പ്രവേശിച്ച് പ്രവേശനകവാടം രണ്ടിലൂടെ പുറത്തു പോകണം. മിഷനറി സംഗമത്തിന് എത്തിച്ചേരാന്‍ ഭരണങ്ങാനം ഫോറോന പള്ളിയുടെ ഓഡിറ്റോറിയത്തിനു മുന്‍പില്‍നിന്നും, പ്രവിത്താനം എംകെഎം ഹോസ്പിറ്റലിനു മുന്‍പില്‍നിന്നും സമ്മേളനസ്ഥലത്തേക്ക് രാവിലെ എട്ടു മുതല്‍ 9.30 വരെയും പൊതുമീറ്റിംഗ് അവസാനിച്ച് അരമണിക്കൂറിനുശേഷം ഇതേ ഇടങ്ങളിലേക്കു തിരിച്ചും എസ്‌ജെസിഇടി കോളജ് ബസ് സൗകര്യം ഉണ്ടായിരിക്കും.

പാലാ രൂപത പ്ലാറ്റിനം ജൂബിലി മ്യൂസിക്കല്‍ ആല്‍ബം തയാറായി

പാലാ: പാലാ കമ്യൂണിക്കേഷന്‍സും എസ്എച്ച് മീഡിയയും സംയുക്തമായി പാലാ രൂപത പ്ലാറ്റിനം ജൂബിലിക്കു വേണ്ടി വിശുദ്ധീകരിക്കുന്ന ബലിപീഠമേ എന്ന മ്യൂസിക്കല്‍ ആല്‍ബം പുറത്തിറക്കി. ഇന്നലെ പാലാ അല്‍ഫോന്‍സിയന്‍ പാസ്റ്ററല്‍ ഇന്‍സ്റ്റിറ്റ്യൂട്ടില്‍ നടന്ന ചടങ്ങില്‍ മുന്‍ അപ്പസ്‌തോലിക് ന്യൂണ്‍ഷ്യോ മാര്‍ ജോര്‍ജ് കോച്ചേരില്‍ മുന്‍ കൊല്ലം ബിഷപ് ഡോ. സ്റ്റാലിന്‍ റോമന് നല്‍കി ആല്‍ബം പ്രകാശനം ചെയ്തു. ബലിപീഠം കേന്ദ്രീകൃതമായ ആധ്യാത്മികതയെ പ്രകീര്‍ത്തിക്കുന്ന ഈ ഗാനം കഴിഞ്ഞ 75 വര്‍ഷത്തെ പാലാ രൂപതയ്ക്ക് ലഭിച്ച ആത്മീയ അനുഗ്രഹങ്ങളെ മാര്‍ ജോസഫ് പള്ളിക്കാപറമ്പില്‍ സ്മരിക്കുന്ന രീതിയിലാണ് ഒരുക്കിയിരിക്കുന്നത്. ഫാ. ജോസ് തറപ്പേലാണ് ഗാനരചന. സംഗീത സംവിധാനം വിദ്യാധരന്‍ മാസ്റ്ററും ആലാപനം ചലച്ചിത്ര പിന്നണി ഗായകന്‍ സുധീപ് കുമാറും നിര്‍വഹിച്ചിരിക്കുന്നു. സംവിധാനം ഫാ. ക്രിസ്റ്റി പന്തലാനിയാണ്. ഓര്‍ക്കാസ്‌ട്രേഷന്‍ വിജയന്‍ പൂഞ്ഞാര്‍, ഛായാവിഷ്‌ക്കരണം ഷിനൂബ് ചേന്നാട്, വീഡിയോ എഡിറ്റിംഗ് സിസ്റ്റര്‍ ഏയ്ഞ്ചല്‍ എസ്എച്ച് എന്നിവരുമാണ്. ബലിപീഠം ഹൃദയത്തോടു ചേര്‍ത്ത വിശുദ്ധ അല്‍ഫോന്‍സാമ്മ, വാഴ്ത്തപ്പെട്ട കുഞ്ഞച്ചന്‍, ധന്യന്‍ കദളിക്കാട്ടില്‍ അച്ചന്‍, ദൈവദാസന്‍ ബ്രൂണോ അച്ചന്‍, ദൈവദാസി മേരി കൊളോത്താ എഫ്‌സിസി എന്നിവരെയെല്ലാം ചിത്രീകരിച്ചിരിക്കുന്ന ആല്‍ബം ബലിപീഠ കേന്ദ്രീകൃതമായ ആധ്യാത്മികതയുടെ മഹത്വം പ്രകീര്‍ത്തിക്കുന്നതാണ്. നാളെ പ്രവിത്താനത്തു നടക്കുന്ന ചടങ്ങില്‍ ആല്‍ബത്തിലെ ഗാനങ്ങള്‍ ആലപിക്കും.

റബര്‍ ശിഖരം റോഡിനു മുകളിലേക്ക്; നാളുകളായിട്ടും നടപടിയില്ല

കാഞ്ഞിരപ്പള്ളി: കാറ്റില്‍ ഒടിഞ്ഞ റബര്‍ ശിഖരം റോഡിനു മുകളില്‍ തൂങ്ങിക്കിടക്കാന്‍ തുടങ്ങിന്നിട്ട് നാളുകളായിട്ടും നടപടിയില്ല. ആനക്കല്ല് - പൊന്മല - പൊടിമറ്റം റോഡില്‍ പൊന്മലയ്ക്കു സമീപമാണ് സ്വകാര്യ വ്യക്തിയുടെ പറമ്പില്‍നിന്ന് മരത്തിന്‍റെ ശിഖരം ഒടിഞ്ഞ് റോഡിലേക്ക് തൂങ്ങിക്കിടക്കുന്നത്. രണ്ടാഴ്ച പിന്നിട്ടതോടെ ശിഖരത്തിന്‍റെ ഇലകള്‍ കൊഴിഞ്ഞു. നിരവധി വാഹങ്ങള്‍ കടന്നുപോകുന്ന റോഡില്‍ വാഹനത്തിനു മുകളിലേക്ക് മരശിഖരം വീണാല്‍ വലിയ അപകടങ്ങള്‍ക്ക് കാരണമാകും. ദേശീയപാത 183ല്‍ പൊടിമറ്റത്തുനിന്ന് കാഞ്ഞിരപ്പള്ളി ടൗണില്‍ പ്രവേശിക്കാതെ എളുപ്പമാര്‍ഗം ഈരാറ്റുപേട്ട - കാഞ്ഞിരപ്പള്ളി റോഡില്‍ ആനക്കല്ലില്‍ പ്രവേശിക്കാന്‍ കഴിയുന്നതാണ് ഈ റോഡ്.

ബസ് കാത്തിരിപ്പുകേന്ദ്രം കൈയേറി നായകൾ

പൊൻകുന്നം: രണ്ടാം മൈലിൽ തെരുവുനാശല്യം രൂക്ഷമാകുന്നതായി പരാതി. പൊൻകുന്നം - പാലാ സംസ്ഥാന പാതയിലെ ബസ് കാത്തിരിപ്പ് കേന്ദ്രത്തിലാണ് ഇവയുടെ വാസം. ആളുകൾക്ക് വഴിനടക്കാൻപോലും കഴിയാത്ത അവസ്ഥയാണെന്ന് നാട്ടുകാർ പറയുന്നു. ആളുകൾക്കുനേരേ കുരച്ചുകൊണ്ട് പാഞ്ഞടുക്കുന്നതും പതിവ് സംഭവമാണ്. ബസ് കാത്തിരിപ്പ് കേന്ദ്രത്തിൽ ആളുകൾക്ക് പ്രവേശിക്കാൻ പോലും കഴിയുന്നില്ല. കൊച്ചുകുട്ടികൾ ഉൾപ്പെടെയാണ് ഇവിടെ ഭീതിയോടെ നിൽക്കുന്നത്. ഇവരെ കണ്ടാൽ നായ ആക്രമിക്കും. തെരുവ് നായ ശല്യത്തിനെതിരേ അധികൃതർ ശക്തമായ നടപടി സ്വീകരിക്കണമെന്നാണ് നാട്ടുകാരുടെ ആവശ്യം.

കള്ളടാക്സികളെ നിയന്ത്രിക്കണമെന്ന്

പൊൻകുന്നം: കാഞ്ഞിരപ്പള്ളി താലൂക്കിന്‍റെ വിവിധ മേഖലകളിലെ കള്ള ടാക്സികളെ നിയന്ത്രിക്കണമെന്ന ആവശ്യം ശകതമായി. ഇതു സംബന്ധിച്ച് മാസങ്ങൾക്കു മുമ്പ് ഡ്രൈവർമാരുടെ സംയുക്ത ട്രേഡ് യൂണിയൻ പ്രതിനിധികൾ മോട്ടോർ വാഹന വകുപ്പിന്‍റെ കാഞ്ഞിരപ്പള്ളി സബ് ആർടി ഓഫീസിൽ പരാതി നൽകിയെങ്കിലും നടപടികൾ ഉണ്ടായിട്ടില്ലെന്ന ആക്ഷേപം ശക്തമാണ്. മേഖലയിൽ റെന്‍റ് എ കാറും കള്ളടാക്സികളുമായി ഓടുന്ന 40 വാഹനങ്ങളുടെ നമ്പരുകൾ സഹിതമാണ് പരാതി നൽകിയിരുന്നതെന്ന് ഡ്രൈവർമാർ പറഞ്ഞു. കള്ളടാക്സികൾ കേന്ദ്രീകരിച്ചാണ് പലവിധ സാമൂഹ്യവിരുദ്ധ പ്രവർത്തനങ്ങൾ നടക്കുന്നതെന്ന് ഇവർ ആരോപിച്ചു. വാടകയും മറ്റും കുറവായതിനാൽ പലരും കള്ള ടാക്സികളെ ആശ്രയിക്കാറുണ്ട്. എന്നാൽ, ഇത്തരം വാഹനങ്ങൾ അപകടത്തിൽപ്പെട്ടാൽ അതിലുള്ള യാത്രക്കാർക്ക് യാതൊരുവിധ നിയമപരിരക്ഷയും ലഭിക്കില്ല. ടാക്സി തൊഴിലാളികളുടെ ഉപജീവനത്തെ കാര്യമായി ബാധിക്കുന്ന കള്ളടാക്സികളെ നിയന്ത്രിക്കാൻ മോട്ടോർ വാഹന വകുപ്പ് അടിയന്തര നടപടികൾ സ്വീകരിക്കണമെന്ന് സംയുക്ത ട്രേഡ് യൂണിയൻ ആവശ്യപ്പെട്ടു.

പൂഞ്ഞാർ നിയോജക മണ്ഡലത്തിൽ ഫലസമൃദ്ധി പദ്ധതി ഉദ്ഘാടനം ഇന്ന്

പൂഞ്ഞാർ: നിയോജക മണ്ഡലത്തിൽ ഫലവൃക്ഷ കൃഷികൾ പ്രോത്സാഹിപ്പിക്കുന്നതിന് സംസ്ഥാന കൃഷി വകുപ്പും സംസ്ഥാന ഹോർട്ടിക്കൾച്ചർ മിഷനും പൂഞ്ഞാർ എംഎൽഎ സർവീസ് ആർമിയും ചേർന്ന് നടപ്പിലാക്കുന്ന ഫലസമൃദ്ധി പദ്ധതിക്ക് ഇന്നു തുടക്കം. രാവിലെ 10ന് തിടനാട് ഗ്രാപഞ്ചായത്ത് ഹാളിൽ നടക്കുന്ന ചടങ്ങിൽ മന്ത്രി പി. പ്രസാദ് പദ്ധതി ഉദ്ഘാടനം ചെയ്യും. സെബാസ്റ്റ്യൻ കുളത്തുങ്കൽ എംഎൽഎ അധ്യക്ഷത വഹിക്കും. ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗർ മുഖ്യപ്രഭാഷണം നടത്തും. കുമരകം കൃഷി വിജ്ഞാന കേന്ദ്രം മേധാവി ഡോ. ജി. ജയലക്ഷ്മി ഫലവർഗങ്ങളുടെ മൂല്യവർധിത ഉത്പന്നങ്ങൾ എന്ന വിഷയത്തിൽ ക്ലാസെടുക്കും.

ഹോമിയോപ്പതി ദിനാചരണവും സൗജന്യ സ്‌പെഷാലിറ്റി മെഡിക്കല്‍ ക്യാമ്പും

വാഴൂർ: ജില്ലാ ആയുഷ് ഹോമിയോപ്പതി വകുപ്പും നാഷണല്‍ ആയുഷ്മിഷനും ചേര്‍ന്ന് വാഴൂര്‍ പഞ്ചായത്തിന്‍റെ സഹകരണത്തോടെ ജില്ലാതല ഹോമിയോപ്പതി ദിനാചരണം 13ന് രാവിലെ 10ന് പഞ്ചായത്ത് കമ്യൂണിറ്റി ഹാളിൽ നടത്തും. ചീഫ് വിപ്പ് ഡോ.എന്‍. ജയരാജ് ഉദ്ഘാടനം ചെയ്യും. വാഴൂര്‍ പഞ്ചായത്ത് പ്രസിഡന്‍റ് തോമസ് വെട്ടുവേലില്‍ അധ്യക്ഷത വഹിക്കും. ഹോമിയോപ്പതി ദിനാചരണത്തോടനുബന്ധിച്ച് ബോധവത്കരണ ക്ലാസുകളും സൗജന്യ രക്തപരിശോധന, ഫിസിയോതെറാപ്പി, സ്‌പെഷാലിറ്റി മെഡിക്കല്‍ ക്യാമ്പ് എന്നിവയും നടത്തും. ‘ആര്‍ത്തവവിരാമം - അറിയേണ്ടതെല്ലാം’ എന്ന വിഷയത്തില്‍ ഡോ. അശ്വതി ബി. നായരും ഹോമിയോപ്പതി വകുപ്പിന്‍റെ സ്‌പെഷാലിറ്റി പ്രോജക്ടുകളെക്കുറിച്ച് ഡോ. അപ്പു ഗോപാലകൃഷ്ണനും ലഹരി വിരുദ്ധ ബോധവത്കരണത്തെക്കുറിച്ച് പൊന്‍കുന്നം സിവില്‍ എക്‌സൈസ് ഓഫീസര്‍ കെ.എ. നവാസും ക്ലാസുകള്‍ നയിക്കും. സ്‌പെഷാലിറ്റി മെഡിക്കല്‍ ക്യാമ്പ് രജിസ്‌ട്രേഷന്‍ 9.30ന് ആരംഭിക്കും. ജില്ലാ പഞ്ചായത്തംഗങ്ങളായ ടി.എന്‍. ഗിരീഷ് കുമാര്‍, ജെസി ഷാജന്‍, വാഴൂര്‍ ബ്ലോക്ക് പഞ്ചായത്ത് വൈസ് പ്രസിഡന്‍റ് ഗീത എസ്. പിള്ള, ബ്ലോക്ക് പഞ്ചായത്ത് അംഗങ്ങളായ പി.എം. ജോണ്‍, രഞ്ജിനി ബേബി, വാഴൂര്‍ പഞ്ചായത്ത് വൈസ് പ്രസിഡന്‍റ് സേതുലക്ഷ്മി, പഞ്ചായത്തംഗങ്ങളായ ശ്രീകാന്ത് പി. തങ്കച്ചന്‍, ശോശാമ്മ, ജിജി ജോസഫ്, സുബിന്‍ നെടുംപുറം, ഓമന അരവിന്ദാക്ഷന്‍, വി.പി. റെജി, പ്രഫ.എസ്. പുഷ്‌കലാദേവി, നിഷ രാജേഷ്, സൗദ ഇസ്മായില്‍, ഡെല്‍മ ജോര്‍ജ്, ഷാനിദ അഷറഫ്, എസ്. അജിത്കുമാര്‍, സിന്ധു ചന്ദ്രന്‍, ജിജി പൊടിപാറയ്ക്കല്‍, സിഡിഎസ് ചെയര്‍പേഴ്‌സണ്‍ സ്മിത ബിജു, നാഷണല്‍ ആയുഷ്മിഷന്‍ ഡിപിഎം ഡോ. ശരണ്യ ഉണ്ണികൃഷ്ണന്‍, ജില്ലാ മെഡിക്കല്‍ ഓഫീസര്‍ (ഹോമിയോ) ഡോ. സാജന്‍ ചെറിയാന്‍, പാലാ ജനറല്‍ ആശുപത്രി ആര്‍എംഒ ഡോ. നീന റോഷ്‌നി ഫിഗരെദോ, മൈലാടിക്കര ഹോമിയോ ഡിസ്‌പെന്‍സറി മെഡിക്കല്‍ ഓഫീസര്‍ ഡോ.ടി.ആര്‍. അനശ്വര എന്നിവര്‍ പ്രസംഗിക്കും.

റബറിന്‍റെ തലതൊട്ടപ്പൻ ജെ.ജെ. മർഫി അനുസ്മരണം ഇന്ന്

ഏന്തയാർ: കേരളത്തിന്‍റെ കാർഷികമേഖലയ്ക്കു നിർണായക സംഭാവനകൾ നൽകിയ റബർ കൃഷിയുടെ തലതൊട്ടപ്പൻ എന്നറിയപ്പെടുന്ന ജോൺ ജോസഫ് മാര്‍ഫിയുടെ അനുസ്മരണം ഇന്നു നടക്കും. അദ്ദേഹത്തിന്‍റെ 68-ാം ചരമവാർഷികത്തോടനുബന്ധിച്ച് രാവിലെ പത്തിന് ഏന്തയാർ സെന്‍റ് ജോസഫ് പള്ളിയുടെ മാത്തുമലയിലെ സെമിത്തേരിയിൽ പ്രത്യേക പ്രാർഥനയും അനുസ്മരണവും നടക്കും. അയർലൻഡുകാരനായ ജോൺ ജോസഫ് മാര്‍ഫിയാണ് വ്യാവസായിക അടിസ്ഥാനത്തിൽ ആദ്യമായി കേരളത്തിൽ റബർകൃഷി ആരംഭിക്കുന്നത്. ‌1904ൽ വിദേശത്തുനിന്നു ശ്രീലങ്ക വഴി കേരളത്തിൽ റബർ എത്തിച്ച് വാഗമൺ മലനിരകളുടെ താഴ്‌വാരത്ത് ഏന്തയാറ്റിൽ കാട് വെട്ടിത്തെളിച്ച് റബർകൃഷി ആരംഭിച്ചു. തോട്ടവ്യവസായങ്ങളോടൊപ്പം റോഡുകളും പാലങ്ങളും ഫാക്ടറികളും വിദഗ്ധ തൊഴിലാളികളും, പശ്ചാത്തലസൗകര്യങ്ങളും കടന്നുവന്നു. ഇതു കേരളത്തിന്‍റെതന്നെ വികസനത്തിന് തുടക്കം കുറിച്ചു. 1927ൽ ആഗോള കാതോലിക്ക തലവനായിരുന്ന 11- പീയുസ് മാർപാപ്പ അദ്ദേഹത്തിന്‍റെ സേവനങ്ങളെ ആദരിച്ചു. സ്വാതന്ത്ര്യാനന്തരം വിദേശികള്‍ തിരിച്ചു പോയപ്പോഴും തന്‍റെ തൊഴിലാളികളെയും ഈ നാടിനെയും സ്നേഹിച്ച മർഫി സായിപ്പ് തന്‍റെ ശിഷ്ടകാലം ഇവിടെത്തന്നെ ജീവിക്കാന്‍ തീരുമാനിച്ചു. 1957 മേയ്‌ ഒമ്പതിന് അദ്ദേഹം ഈ ലോകത്തോടു വിട പറഞ്ഞു. ഏന്തയാർ മാത്തുമലയിലെ സെമിത്തേരിയിലാണ് അദ്ദേഹത്തെ സംസ്കരിച്ചത്.

ട്രെയിൻ യാത്രയ്ക്കിടെ വെച്ചൂച്ചിറ സ്വദേശിയെ കാണാതായി

എരുമേലി : ട്രെയിനിൽ സുഹൃത്തുക്കൾക്കൊപ്പം യാത്ര ചെയ്യുന്നതിനിടെ വെച്ചൂച്ചിറ സ്വദേശിയായ യുവാവ് തെറിച്ചുവീണ് അപകടത്തിൽപ്പെട്ടന്ന് സംശയം. പരാതിയെത്തുടർന്ന് പോലീസ് അന്വേഷണം ആരംഭിച്ചെങ്കിലും കണ്ടെത്താനായില്ല. വെച്ചൂച്ചിറ കുമ്പിത്തോട് വേഴക്കാട്ട് വിശ്വനാഥന്‍റെ മകന്‍ വിനീതിനെ(32)യാണ് ഇക്കഴിഞ്ഞ ഏഴിന് പുലർച്ചെ മൂന്നരയ്ക്കു ശേഷം കോഴിക്കോടിനും കുറ്റിപ്പുറത്തിനും ഇടയിൽവച്ച് കാണാതായത്. മംഗലാപുരത്ത് അലൂമിനിയം ഫാബ്രിക്കേഷന്‍ ജോലി കഴിഞ്ഞു വിനീത് ഉൾപ്പടെ അഞ്ചു പേർ നാട്ടിലേക്കു ട്രെയിനിൽ വരുമ്പോഴാണ് സംഭവം. ട്രെയിന്‍ കോഴിക്കോട് സ്റ്റേഷന്‍ വിട്ടതിനു പിന്നാലെ ശുചിമുറിയില്‍ പോകുന്നതിനായി വിനീത് കംമ്പാര്‍ട്ടുമെന്‍റില്‍നിന്നു പോയതാണെന്നും പിന്നെ തിരികെ വന്നില്ലന്നുമാണ് ഒപ്പമുണ്ടായിരുന്ന സുഹൃത്തുക്കൾ പോലീസിനെ അറിയിച്ചത്. അഞ്ചു മിനിറ്റ് കഴിഞ്ഞ് സുഹൃത്തുക്കൾ ശുചിമുറിയിൽ വിനീതിനെ തിരക്കിയെങ്കിലും കണ്ടെത്താനായില്ല. ഈ സമയം ട്രെയിനിൽ പിന്നിലെ കംമ്പാര്‍ട്ടുമെന്‍റില്‍ ഇരുന്നയാള്‍ ഒരാള്‍ വാതിലിലൂടെ പുറത്തേക്കു വീണതായി കണ്ടെന്നു സംശയം പ്രകടിപ്പിച്ചതിനെത്തുടര്‍ന്ന് സുഹൃത്തുക്കള്‍ കുറ്റിപ്പുറം സ്റ്റേഷനില്‍ ഇറങ്ങി പരിശോധന നടത്തി. നാട്ടുകാരുടെ സംഘവും പരിശോധനക്ക് കൂടിയെങ്കിലും വിനീതിനെ കണ്ടെത്താനായില്ല. വീണതായി സംശയം തോന്നിയ സ്ഥലത്ത് മൂന്നൂറു മീറ്ററിന് ഇടക്ക് രണ്ടു പാലം ഉള്ളതായി പൊലീസ് പറയുന്നു. ബന്ധുക്കള്‍ വെച്ചൂച്ചിറ പൊലീസില്‍ പരാതി നല്‍കി. കേസെടുത്ത പൊലീസ് പരാതി വിശദമായ അന്വേഷണത്തിനായി റെയില്‍വേ പൊലീസിനു കൈമാറി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]