ADVERTISEMENT

ADVERTISEMENT

ചങ്ങനാശേരിയില്‍ നാളെ പാപ്പാ അനുസ്മരണവും വിലാപയാത്രയും

ചങ്ങനാശേരി: ഫ്രാന്‍സിസ് പാപ്പായുടെ സംസ്‌കാരം നടക്കുന്ന നാളെ സെന്‍റ് മേരീസ് മെത്രാപ്പോലീത്തന്‍പള്ളിയില്‍ രാവിലെ ഏഴിനുള്ള വിശുദ്ധകുര്‍ബാനയ്ക്കുശേഷം വിലാപയാത്ര നടത്തും. പള്ളിയില്‍നിന്നാരംഭിച്ച് ചന്തക്കടവ് ചുറ്റി കവലയില്‍ എത്തി അവിടെ ഛായാചിത്രത്തില്‍ ആദരവര്‍പ്പിച്ചു തിരികെ പള്ളിയില്‍ എത്തിച്ചേരും.

തുടര്‍ന്ന് അനുസ്മരണ ശുശ്രൂഷയ്ക്ക് വികാരി ഫാ. ജോസഫ് വാണിയപ്പുരയ്ക്കല്‍ കാര്‍മികത്വം വഹിക്കും.

ADVERTISEMENT

തെലുങ്കാന എംബിബിഎസ് പരീക്ഷ: പോൾ ചാക്കോയ്ക്ക് ഒന്നാം റാങ്ക്

എരുമേലി: തെലുങ്കാനയിൽ എംബിബിഎസ് പരീക്ഷയിൽ എരുമേലി സ്വദേശിക്ക് ഒന്നാം റാങ്ക്. എരുമേലി പഴയകൊരട്ടി തോപ്പിൽ ചാക്കോ പോളിന്‍റെയും ജെസി തോമസിന്‍റെയും മകനായ പോൾ ചാക്കോയാണ് റാങ്ക് ജേതാവ്. തെലുങ്കാന മെഡിക്കൽ യൂണിവേഴ്സിറ്റി ഓഫ് ഹെൽത്ത് സയൻസസ് ഫെബ്രുവരിയിൽ നടത്തിയ എംബിബിഎസ് ഫൈനൽ പരീക്ഷയിലാണ് പോൾ ചാക്കോ ഡിസ്റ്റിംഗ്ഷനോടെ ഒന്നാം റാങ്ക് നേടിയത്. തെലുങ്കാനയിലെ ആകെയുള്ള 33 മെഡിക്കൽ കോളജുകളിൽ നിന്നായി 5100ഓളം എംബിബിഎസ് വിദ്യാർഥികളിൽനിന്നാണ് പോൾ ചാക്കോ ഒന്നാം സ്ഥാനം നേടിയത്. ഹൈദരാബാദിനടുത്തുള്ള മെഹബൂബ് നഗർ ഗവൺമെന്‍റ് മെഡിക്കൽ കോളജ് വിദ്യാർഥിയായ പോൾ പത്താം ക്ലാസുവരെ അബുദാബി ഇന്ത്യൻ സ്കൂളിൽ പഠിച്ചപ്പോൾ ആനക്കല്ല് സെന്‍റ് ആന്‍റണീസ് സ്കൂളിലാണ് പ്ലസ്ടു പഠനം നടത്തിയത്. പ്ലസ്ടു പഠനത്തോടൊപ്പം ബ്രില്യന്‍റ് കൊച്ചിംഗിലൂടെ 2020ലെ നീറ്റ് പരീക്ഷയിൽ ആദ്യ തവണ തന്നെ ഉയർന്ന സ്കോർ നേടിയാണ് ഹൈദരാബാദിനടുത്തുള്ള സർക്കാർ മെഡിക്കൽ കോളജിൽ പ്രവേശനം നേടിയത്. പോൾ ചാക്കോ നേടിയ ഉന്നത വിജയം കേരളത്തിനാകെ അഭിമാനം പകരുകയാണെന്ന് അഭിനന്ദനങ്ങൾ അറിയിച്ച് സെബാസ്റ്റ്യൻ കുളത്തുങ്കൽ എംഎൽഎ പറഞ്ഞു.

ഡ്രൈവിംഗ് വിത്ത് ഡിസിപ്ലിൻ: സ്വകാര്യ ബസ് ജീവനക്കാർക്കായുള്ള ശില്പശാല പൂര്‍ത്തിയായി

കാഞ്ഞിരപ്പള്ളി: ഡ്രൈവിംഗ് വിത്ത് ഡിസിപ്ലിൻ, ഒരു സുരക്ഷിത റോഡ് യാത്രയ്ക്കായുള്ള സംയുക്ത ശ്രമം എന്ന പേരിൽ സ്വകാര്യ ബസ് ജീവനക്കാർക്കായി കാഞ്ഞിരപ്പള്ളി അമൽജ്യോതി എൻജിനിയറിംഗ് കോളജിൽ ഏകദിന ശില്പശാല നടത്തി. കോട്ടയം ആർടിഒ കെ. അജിത് കുമാർ ശില്പശാല ഉദ്ഘാടനം ചെയ്തു. ജോയിന്‍റ് ആർടിഒ ശ്രീജിത്ത് അധ്യക്ഷത വഹിച്ചു. അമൽജ്യോതി ഓട്ടോമൊബൈൽ എൻജിനിയറിംഗ് വിഭാഗം അധ്യക്ഷൻ ഡോ. ജെ.പി. അജിത് കുമാർ, സ്റ്റാഫ് കോ-ഓർഡിനേറ്റർ അരുണ്‍ തോമസ് ജോർജ് എന്നിവർ പ്രസംഗിച്ചു. എംവിഐ ആശാകുമാർ, എഎംവിഐ ജോർജ് വർഗീസ് എന്നിവർ ക്ലാസുകൾക്ക് നേതൃത്വം നൽകി. അമൽജ്യോതി എൻജിനിയറിംഗ് കോളജിന്‍റെ ഓട്ടോമൊബൈൽ എൻജിനിയറിംഗ് വിഭാഗമാണ് ശില്പശാല ക്രമീകരിച്ചത്. കാഞ്ഞിരപ്പള്ളി സബ് ആർടി ഓഫീസിന്‍റെയും മോട്ടോർ വാഹന വകുപ്പിന്‍റെയും നേതൃത്വത്തിലും ബസ് ഓപ്പറേറ്റേഴ്സ് അസോസിയേഷൻ കാഞ്ഞിരപ്പള്ളി യൂണിറ്റിന്‍റെയും സഹകരണത്തിലുമാണ് ശില്പശാല നടത്തിയത്. നൂറിലധികം സ്വകാര്യ ബസ് ജീവനക്കാർ പങ്കെടുത്തു. റോഡ് സുരക്ഷ, നിയമങ്ങൾ, യാത്രക്കാരുമായി ഇടപെടൽ തുടങ്ങിയ വിഷയങ്ങളിൽ ജാഗ്രതയും ഉത്തരവാദിത്വവും ഉയർത്തിയായിരുന്നു പരിശീലനം.

പുലിപ്പേടിയിൽ പെരുവന്താനം പഞ്ചായത്ത്

പെരുവന്താനം: മതമ്പ, ചെന്നാപ്പാറ, കൊമ്പുകുത്തി അടക്കമുള്ള വനാതിർത്തി മേഖലയിൽ അനുഭവപ്പെടുന്ന അതിരൂക്ഷമായ കാട്ടാന ശല്യത്തിനു പുറമേ ഇപ്പോൾ പെരുവന്താനം പഞ്ചായത്തിന്‍റെ ജനവാസ മേഖലയിൽ പുലിയുടെ സാന്നിധ്യവും. കഴിഞ്ഞ ഏതാനും മാസങ്ങളായി ജനവാസ മേഖലയിൽ നിരവധി വളർത്തുമൃഗങ്ങളാണ് പുലിയുടെ ആക്രമണത്തിന് ഇരയായിരിക്കുന്നത്. കഴിഞ്ഞദിവസം പുലി മറ്റൊരു ജീവിയെ ആക്രമിക്കുന്നതായി അമലഗിരി പാലക്കുഴി വരിക്കാനിക്കൽ മോളി നേരിൽക്കണ്ടിരുന്നു. വനംവകുപ്പ് ഉദ്യോഗസ്ഥർ കാമറ സ്ഥാപിച്ചെങ്കിലും ദൃശ്യങ്ങൾ ഒന്നും ലഭിച്ചില്ല. ഇതിനു പിന്നാലെയാണ് ഇന്നലെ രാവിലെ കപ്പലുവേങ്ങ നെല്ലിപ്പറമ്പിൽ പാപ്പച്ചന്‍റെ വളർത്തുനായയെ പാതി ഭക്ഷിച്ച നിലയിൽ കണ്ടെത്തിയത്. പുലിയുടെ ആക്രമണമാണെന്നു നാട്ടുകാർ പറയുന്നു. ഒരു മാസം മുന്പ് പാലൂർക്കാവിൽ വളർത്തുനായയെ പുലി ആക്രമിച്ചിരുന്നു. വനംവകുപ്പ് അധികൃതരെത്തി ഇവിടെ പുലിയുടെ സാന്നിധ്യം സ്ഥിരീകരിച്ചിരുന്നു. രണ്ടാഴ്ചകൾക്ക് മുമ്പ് കൊടുകുത്തി നിർമലഗിരിയിൽ തീറ്റ തേടാൻ അഴിച്ചുവിട്ട ആടിനെ പാതി ഭക്ഷിച്ച നിലയിൽ കണ്ടെത്തി. ഇവിടെയും വനംവകുപ്പ് അധികൃതർ കാമറ സ്ഥാപിച്ചെങ്കിലും ദൃശ്യങ്ങൾ ഒന്നും ലഭ്യമായില്ല. അതേസമയം, വീട്ടമ്മ പുലിയെ നേരിട്ടു കണ്ടതോടെ പെരുവന്താനം പഞ്ചായത്തിന്‍റെ ജനവാസ മേഖലകൾ കടുത്ത പുലി ഭീതിയിലാണ്. ആളുകൾ വീടിനു പുറത്തിറങ്ങാൻ പോലും ഭയപ്പെടുകയാണ്. ഏതാനും മാസങ്ങൾക്കുമുമ്പ് പെരുവന്താനം പഞ്ചായത്തിലെ ചെന്നാപാറയിൽ കാട്ടാനയുടെ ആക്രമണത്തിൽ വീട്ടമ്മ കൊല്ലപ്പെട്ടിരുന്നു. മറ്റൊരാളുടെ ജീവൻ നഷ്ടമാകുന്നതിനുമുമ്പ് വനംവകുപ്പ് അധികൃതർ അലംഭാവം വെടിഞ്ഞ് വന്യമൃഗശല്യത്തിൽനിന്നു മേഖലയിലെ ജനങ്ങളെ രക്ഷിക്കണമെന്ന ആവശ്യമാണ് ശക്തമായിരിക്കുന്നത്.

സ്നേഹത്തണലായി 14 വീടുകൾ ഒരുക്കി സെന്‍റ് ഡൊമിനിക് കോളജ് എൻഎസ്എസ് യൂണിറ്റ്

കാഞ്ഞിരപ്പള്ളി: സെന്‍റ് ഡൊമിനിക്‌സ് കോളജിന്‍റെ വജ്രജൂബിലി വര്‍ഷത്തില്‍ കോളജ് എന്‍എസ്എസ് യൂണിറ്റ്, കെ. ചിറ്റിലപ്പിള്ളി ഫൗണ്ടേഷന്‍റെയും എംജി യൂണിവേഴ്‌സിറ്റി എന്‍എസ്എസ് സെല്ലിന്‍റെയും സഹകരണത്തോടെ ഭവനരഹിതര്‍ക്കായി നിര്‍മിച്ച 14 വീടുകളുടെ താക്കോല്‍ദാനം 28നു രാവിലെ 10ന് സഹകരണ, തുറമുഖ, ദേവസ്വം മന്ത്രി വി.എന്‍. വാസവന്‍ നിർവഹിക്കും. സര്‍ക്കാരിന്‍റെയും മറ്റ് ഏജന്‍സികളുടെയും വിവിധ ഭവനപദ്ധതികളില്‍ ഒന്നും ഉള്‍പ്പെടാത്ത ഭവനരഹിതരായ ആളുകളുടെ സ്വന്തമായി വീട് എന്ന സ്വപ്നം സാക്ഷാത്കരിക്കുകയാണ് പദ്ധതിയുടെ ലക്ഷ്യം. ഇടുക്കി ജില്ലയില്‍ കൊക്കയാര്‍, കോട്ടയം ജില്ലയിലെ മുണ്ടക്കയം, തിടനാട്, ചിറക്കടവ്, എലിക്കുളം എന്നീ പഞ്ചായത്തുകളിലായാണ് 14 വീടുകള്‍ നിര്‍മിച്ചത്. അഞ്ചു സെന്‍റിൽ അധികം ഭൂമി സ്വന്തമായി ഇല്ലാത്തവര്‍ക്കാണ് വീടുകള്‍ നിര്‍മിച്ചു നല്‍കിയത്. മൂന്ന് കുടുംബങ്ങള്‍ക്ക് സ്വന്തമായി സ്ഥലം ഇല്ലാതിരുന്നതിനാല്‍ അവര്‍ക്ക് ഭൂമി കണ്ടെത്തി നല്‍കിയാണ് വീട് നിര്‍മിച്ചത്. ആറുമുതല്‍ ഏഴു ലക്ഷം രൂപ വരെ ഒരു വീടിന് ചെലവായി. വാഹനസൗകര്യം ഇല്ലാത്ത സ്ഥലങ്ങളില്‍ നിര്‍മാണ സാമഗ്രികള്‍ ചുമന്ന് എത്തിക്കുന്നതിനും മണ്ണ് കുറവുള്ള പാറ നിറഞ്ഞ പ്രദേശത്ത് തറ കെട്ടുന്നതിന് മണ്ണ് ചുമന്ന് എത്തിക്കുന്നതിനും എന്‍എസ്എസ് വോളണ്ടിയര്‍മാര്‍ മുന്നിട്ടിറങ്ങി. അര്‍ഹരായവരെ കണ്ടെത്തിയതും വിദ്യാര്‍ഥികളായിരുന്നു. വീട് നിര്‍മാണത്തിന് നാട്ടിലെ സുമനസുകളായ ഒട്ടേറെ വ്യക്തികളുടെയും സ്ഥാപനങ്ങളുടെയും സംഘടനകളുടെയും സഹായം ലഭിച്ചതായി പ്രോഗ്രാം ഓഫീസര്‍ ഡോ. ജോജി തോമസ് പറഞ്ഞു. കോളജ് മാനേജര്‍ റവ.ഡോ. കുര്യന്‍ താമരശേരി, പ്രിന്‍സിപ്പല്‍ ഡോ. സീമോന്‍ തോമസ്, എന്‍എസ്എസ് പ്രോഗ്രാം ഓഫീസര്‍മാര്‍ എന്നിവര്‍ക്കൊപ്പം നൂറ് എന്‍എസ്എസ് വോളണ്ടിയര്‍മാര്‍ വീട് നിര്‍മാണത്തിന് നേതൃത്വം നല്‍കി. 28നു രാവിലെ 10ന് കോളജില്‍ നടക്കുന്ന ചടങ്ങില്‍ കോളജ് മാനേജര്‍ റവ.ഡോ. കുര്യന്‍ താമരശേരി അധ്യക്ഷത വഹിക്കും. സെബാസ്റ്റ്യന്‍ കുളത്തുങ്കല്‍ എംഎല്‍എ മുഖ്യാതിഥിയായിരിക്കും. പത്രസമ്മേളനത്തില്‍ പ്രിന്‍സിപ്പല്‍ ഡോ. സീമോന്‍ തോമസ്, എന്‍എസ്എസ് പ്രോഗ്രാം ഓഫീസര്‍മാരായ ഡോ. ജോജി തോമസ്, ഡോ. ജിനു എലിസബത്ത് സെബാസ്റ്റ്യന്‍, വോളണ്ടിയര്‍ സെക്രട്ടറിമാരായ അതുല്‍ കൃഷ്ണന്‍, ഭാഗ്യലക്ഷ്മി രാജ്, ആല്‍ബിന്‍ തോമസ്, ദിയ തെരേസ് ജോഷി എന്നിവര്‍ പങ്കെടുത്തു.

മണിമല പൂജരാജാക്കന്മാരുടെ പള്ളി ഇരുനൂറാം വാര്‍ഷിക നക്ഷത്രശോഭയിൽ

മണിമല: മണിമലയാറിന്‍റെ തീരത്ത് ആത്മീയവിശുദ്ധി ചൊരിയുന്ന പൂജരാജാക്കന്മാരുടെ പൗരാണിക ദേവാലയത്തിന് ഇരുനൂറാം വാര്‍ഷികത്തിന്‍റെ നക്ഷത്രശോഭ. ചങ്ങനാശേരി, കാഞ്ഞിരപ്പള്ളി രൂപതകളിലെ എട്ട് ഇടവകകളുടെ തലപ്പള്ളിയെന്ന നിലയില്‍ മണിമല ഹോളി മാഗി പള്ളിയുടെ പഴമയും പാരമ്പര്യവും പ്രൗഢിയും ഏറെ വലുതാണ്. 1816ല്‍ കാഞ്ഞിരപ്പള്ളി പള്ളിയുടെ പൊതുയോഗം കൂടി മണിമലയില്‍ കുരിശുപള്ളി പണിയാന്‍ അനുമതി നൽകി. പില്‍ക്കാലത്ത് മണിമല കുരിശുപള്ളി ഇടവകയായി ഉയര്‍ത്തപ്പെട്ടു. 1825 ജനുവരി ആറിന് ദഹനാതിരുനാളില്‍ പുതിയ പള്ളിയുടെ വെഞ്ചരിപ്പുകര്‍മം നടത്തി. 1951ല്‍ ഫാ. ജോണ്‍ തലോടില്‍ വികാരിയായിരിക്കുമ്പോഴാണ് നിലവിലെ പള്ളിപണിക്കു തുടക്കം കുറിച്ചത്. 1958 ജനുവരി നാലിനു പുതിയ പള്ളിയുടെ കൂദാശ ആര്‍ച്ച്ബിഷപ് മാര്‍ മാത്യു കാവുകാട്ട് നിര്‍വഹിച്ചു. 1974 ഓഗസ്റ്റ് 15നു മണിമല പള്ളിയെ ഒരു ഫൊറോനയായി ഉയര്‍ത്തി. പള്ളി ആശീര്‍വദിക്കപ്പെട്ട കാലം മുതല്‍ ഡിസംബര്‍ 31 മുതല്‍ ജനുവരി ഏഴുവരെയാണ് പൂജാരാജാക്കന്മാരുടെ വലിയ തിരുനാള്‍. ജനുവരി അഞ്ചിന് വൈകുന്നേരം കറിക്കാട്ടൂര്‍ കപ്പേളയില്‍നിന്ന് ഹോളി മാഗി പള്ളിയിലേക്കു വിശുദ്ധ പൂജരാജാക്കന്മാരുടെ തിരുസ്വരൂപവും വഹിച്ച് അനേകായിരങ്ങള്‍ പങ്കെടുക്കുന്ന നഗരപ്രദക്ഷിണം മണിമലയയുടെ ആത്മീയ ഉത്സവമാണ്. സാംസ്കാരിക സമ്മേളനം ഹോളി മാഗി ഫൊറോന പള്ളി ദ്വിശതാബ്ദിയുടെ ഭാഗമായി മേയ് മൂന്നിനു വൈകുന്നേരം 5.30ന് സാംസ്കാരിക സമ്മേളനം നടക്കും. പ്രതിപക്ഷ നേതാവ് വി.ഡി. സതീശൻ സമ്മേളനം ഉദ്ഘാടനം ചെയ്യും. ചങ്ങനാശേരി അതിരൂപതാധ്യക്ഷൻ മാർ തോമസ് തറയിൽ അധ്യക്ഷത വഹിക്കും. ചീഫ് വിപ്പ് ഡോ.എൻ. ജയരാജ് മുഖ്യപ്രഭാഷണം നടത്തും. ആന്‍റോ ആന്‍റണി എംപി ആശംസപ്രസംഗവും സമ്മാനദാനവും നിർവഹിക്കും. വികാരി ഫാ. മാത്യു താന്നിയത്ത്, ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗർ, മുൻ കേന്ദ്രമന്ത്രി അൽഫോൻസ് കണ്ണന്താനം, ബ്ലോക്ക് പഞ്ചായത്തംഗം കെ.എസ്. എമേഴ്സൺ, പഞ്ചായത്ത് പ്രസിഡന്‍റുമാരായ സിറിൾ തോമസ്, പി.ടി. അനൂപ്, പഞ്ചായത്തംഗങ്ങളായ അതുല്യാ ദാസ്, സുനി സജി, ജനറൽ കൺവീനർ ജോസ് വർഗീസ് കൂനംകുന്നേൽ എന്നിവർ പ്രസംഗിക്കും. സമ്മേളനത്തിനു മുന്നോടിയായി വൈകുന്നേരം 4.30ന് മൂങ്ങാനിയിൽനിന്നു പള്ളിയിലേക്കു സാംസ്കാരിക ഘോഷയാത്ര നടത്തും. വികാരി ഫാ. മാത്യു താന്നിയത്ത് ഘോഷയാത്ര ഫ്ലാഗ് ഓഫ് ചെയ്യും. ഉച്ചകഴിഞ്ഞ് 3.30നു കറിക്കാട്ടൂർ കവലയിൽനിന്ന് ആരംഭിക്കുന്ന ടൂവീലർ ഫാൻസിഡ്രസ് മത്സരം മണിമല-മൂങ്ങാനി ചുറ്റി ഫൊറോന പള്ളി അങ്കണത്തിൽ സമാപിക്കും. മണിമല ഇൻസ്പെക്ടർ ഓഫ് പോലീസ് വി.കെ. ജയപ്രകാശ് മത്സരം ഫ്ലാഗ് ഓഫ് ചെയ്യും. അസി. വികാരി ഫാ. വർഗീസ് ചിറയിൽ, ജോസ് വർഗീസ്, ജോസ് കൊള്ളിക്കൊളവിൽ എന്നിവർ നേതൃത്വം നൽകും.

എല്‍ടിസി ഗ്ലോബല്‍ എക്‌സലന്‍സ് അവാര്‍ഡ് രാമപുരം കോളജിന്

പാലാ: അന്താരാഷ്‌ട്ര വിദ്യാഭ്യാസ കണ്‍സള്‍ട്ടിംഗ് സ്ഥാപനമായ എല്‍ടിസി ഗ്ലോബലിന്‍റെ 2024-25 വര്‍ഷത്തെ എഡ്യൂക്കേഷന്‍ എക്‌സലന്‍സ് അവാര്‍ഡിന് രാമപുരം മാര്‍ ആഗസ്തീനോസ് കോളജ് അര്‍ഹമായി. ലോകോത്തര നിലവാരത്തില്‍ വിവിധ യൂണിവേഴ്‌സിറ്റികളെയും ഉന്നത വിദ്യാഭ്യാസ സ്ഥാപനങ്ങളെയും കോര്‍ത്തിണക്കി പുത്തന്‍ വിദ്യാഭ്യാസശൈലി പ്രദാനം ചെയ്യുന്ന സ്ഥാപനമാണ് ഗ്ലോബല്‍ എല്‍ടിസി. നാക് അക്രഡിറ്റേഷനില്‍ എ ഗ്രേഡ് നേടിയ സ്വാശ്രയ സ്ഥാപനം എന്ന നിലയിലും കോളജിന്‍റെ അക്കാദമിക നിലവാരം, പാഠ്യ-പഠ്യേതര രംഗങ്ങളിലെ നൂതന ആശയങ്ങള്‍, നൈപുണ്യ വികസന സാധ്യതകള്‍, സാമൂഹ്യ പ്രതിബദ്ധത എന്നിവയും മാനദണ്ഡമാക്കിയാണ് അവാര്‍ഡ് ലഭിച്ചത്. മേയ് പത്തിന് നടക്കുന്ന ചടങ്ങില്‍ രാമപുരം കോളജിന് അവാര്‍ഡ് സമര്‍പ്പിക്കുമെന്ന് എല്‍ടിസി ഗ്ലോബല്‍ സിഇഒ മാത്യു അലക്‌സാണ്ടര്‍ അറിയിച്ചു. കോളജിന് ലഭിച്ച അംഗീകാരത്തിന് പ്രിന്‍സിപ്പല്‍ ഡോ. റെജി വര്‍ഗീസ് മേക്കാടന്‍, വൈസ് പ്രിന്‍സിപ്പല്‍മാരായ ഫാ. ജോസഫ് ആലഞ്ചേരില്‍, സിജി ജേക്കബ്, അഡ്മിനിസ്ട്രേറ്റീവ് ഓഫീസര്‍ രാജീവ് ജോസഫ്, അഡ്മിനിസ്ട്രേറ്റീവ് എക്‌സിക്യൂട്ടീവ് പ്രകാശ് ജോസഫ് എന്നിവരെയും സ്റ്റാഫ് അംഗങ്ങളെയും മാനേജര്‍ ഫാ. ബെര്‍ക്കുമാന്‍സ് കുന്നുംപുറം അഭിനന്ദിച്ചു.

മണ്ണില്‍ക്കടവ് റോഡിന് ശാപമോക്ഷം

പാലാ: നഗരസഭയിലെ പന്ത്രണ്ടാം വാര്‍ഡില്‍ പുഴക്കര പാലം-മണ്ണില്‍കടവ് റോഡിന്‍റെ പൊട്ടിപ്പൊളിഞ്ഞതും വെള്ളക്കെട്ട് ഉള്ളതുമായ ഭാഗങ്ങള്‍ ടാറിംഗും പേവിംഗ് ബ്ലോക്കും നിരത്തി പണികള്‍ പൂര്‍ത്തിയാക്കി. മണ്ണില്‍ക്കടവ് ഭാഗത്തേക്കുള്ള റോഡ് പൊട്ടിപ്പൊളിഞ്ഞ് കിടന്നതും പഴയ മൃഗാശുപത്രി ഭാഗത്ത് പുതിയതായി പേവിംഗ് ബ്ലോക്ക് നിരത്തിയ റോഡിന്റെ ബാക്കി ഭാഗത്ത് വെള്ളക്കെട്ട് രൂപപ്പെടുകയും ചെയ്തിരുന്നത് യാത്ര ദുഷ്‌കരമാക്കിയിരുന്നു. ഇതുസംബന്ധിച്ച് സ്റ്റേഡിയം വ്യൂ റെസിഡന്‍റ്സ് അസോസിയേഷനും സമീപവാസികളും നഗരസഭാ ‌വൈസ് ചെയര്‍പേഴ്‌സണ്‍ ബിജി ജോജോക്കു പരാതി നല്‍കിയിരുന്നു. തുടർന്ന് റോഡ് നവീകരണത്തിനായി 4.25 ലക്ഷം രൂപ അനുവദിക്കുകയായിരുന്നു. റോഡ് നവീകരണത്തിനു മുൻകൈയെടുത്ത മുനിസിപ്പൽ ചെയർമാൻ തോമസ് പീറ്റര്‍, വൈസ് ചെയർപേഴ്സൺ ബിജി ജോജോ, വികസനകാര്യ സ്റ്റാന്‍ഡിംഗ് കമ്മിറ്റി ചെയര്‍മാന്‍ സാവിയോ കാവുകാട്ട് തുടങ്ങിയവരെ ജനകീയ കൂട്ടായ്മ അഭിനന്ദിച്ചു.

"വിന്‍സെന്‍ഷ്യന്‍സ് 75' ഒത്തുകൂടി

പാലാ: പാലാ സെന്‍റ് വിന്‍സെന്‍റ് ഇംഗ്ലീഷ് മീഡിയം സ്‌കൂളിലെ 1975ലെ എസ്എസ്എല്‍സി ബാച്ചിലെ കൂട്ടുകാര്‍ പാലായില്‍ കുടുംബസമേതം ഒത്തുകൂടി അവരുടെ അമ്പതു വര്‍ഷം മുമ്പത്തെ സൗഹൃദം പുതുക്കി. ആ ബാച്ചിനെ പഠിപ്പിച്ച ഫാ. ലൂഡോവിക്ക് സിഎംഐ, കെ.എല്‍. ഉലഹന്നാന്‍, വി.ജെ. തോമസ്, പി.എ. മാത്യു, ചെറിയാന്‍ പടവില്‍ തുടങ്ങിയ അധ്യാപകര്‍ വിന്‍സെന്‍ഷ്യന്‍സ് 75 പൂര്‍വവിദ്യാര്‍ഥീ സംഗമത്തില്‍ പങ്കെടുത്തത് ആവേശം പകര്‍ന്നു. 1975 ബാച്ചിലെ 64 പേരില്‍ ഒന്‍പതു പേര്‍ മരണമടഞ്ഞു. ആറു പേര്‍ വിദേശത്താണ്. ബാക്കി 49 പേരില്‍ 45 പേര്‍ സംഗമത്തില്‍ പങ്കെടുത്തു. മുന്‍ ചീഫ് സെക്രട്ടറി ടോം ജോസ്, മുന്‍ ആര്‍മി ജനറല്‍ മൈക്കിള്‍ മാത്യൂസ് കൊട്ടാരം, കോളജ് അധ്യാപകര്‍, ഡോക്ടര്‍മാര്‍, ബാങ്ക് മാനേജര്‍മാര്‍, ബിസിനസുകാര്‍, പ്ലാന്‍റര്‍മാര്‍ അടക്കം 45 പൂര്‍വ വിദ്യാര്‍ഥികള്‍ കുടുംബസമേതം സംഗമത്തില്‍ പങ്കെടുത്തു.

മീനച്ചില്‍ ഫൈന്‍ ആര്‍ട്‌സ് സൊസൈറ്റിയുടെ പ്രവര്‍ത്തനങ്ങള്‍ പ്രശംസനീയമെന്ന്

പാലാ: മുപ്പതു വര്‍ഷമായി പാലായിലെയും മീനച്ചില്‍ താലൂക്കിലെയും കലാ-സാംസ്‌കാരിക മേഖലകളില്‍ നിറഞ്ഞ് നില്‍ക്കുന്ന ഫൈന്‍ ആര്‍ട്‌സ് സൊസൈറ്റിയുടെ പ്രവര്‍ത്തനങ്ങള്‍ ശ്ലാഘനീയവും മറ്റ് കൂട്ടായ്മകള്‍ക്ക് മാതൃകയാക്കാവുന്നതാണെന്നും സെബാസ്റ്റ്യന്‍ കുളത്തുങ്കല്‍ എംഎല്‍എ. മീനച്ചില്‍ ഫൈന്‍ ആര്‍ട്‌സ് സൊസൈറ്റിയുടെ ഈ വര്‍ഷത്തെ പ്രവര്‍ത്തനോദ്ഘാടനം നിര്‍വഹിച്ച് പ്രസംഗിക്കുകയായിരുന്നു അദ്ദേഹം. അന്യംനിന്നു കൊണ്ടിരിക്കുന്ന കലകളെ സമൂഹമധ്യത്തില്‍ എത്തിക്കുന്ന ഫൈന്‍ ആര്‍ട്‌സ് സൊസൈറ്റി പോലുള്ള കൂട്ടായ്മകള്‍ക്ക് ജനങ്ങള്‍ കൂടുതല്‍ പ്രോത്സാഹനങ്ങള്‍ നല്‍കണമെന്നും അദ്ദേഹം ആവശ്യപ്പെട്ടു. നഗരസഭാ ചെയര്‍മാന്‍ തോമസ് പീറ്റര്‍ മുഖ്യപ്രഭാഷണം നടത്തി. പ്രസിഡന്‍റ് അഡ്വ. രാജേഷ് പല്ലാട്ട് അധ്യക്ഷത വഹിച്ചു. സെക്രട്ടറി ബെന്നി മൈലാടൂര്‍, നഗരസഭാ വൈസ് ചെയര്‍പേഴ്‌സണ്‍ ബിജി ജോജോ, ബൈജു കൊല്ലംപറമ്പില്‍, കെ.കെ. രാജന്‍, ഷിബു തെക്കേമറ്റം, വി.എം. അബ്ദുള്ള ഖാന്‍, ഉണ്ണി കുളപ്പുറം, ബേബി വലിയകുന്നത്ത്, ഐഷാ ജഗദീഷ്, വിജി ആര്‍. നായര്‍, വിനയകുമാര്‍ മാനസ, ജോണി വെട്ടിക്കുഴിച്ചാലില്‍, മോനി വി. ആദ്കുഴി എന്നിവര്‍ പ്രസംഗിച്ചു. തുടര്‍ന്ന് ഈ വര്‍ഷത്തെ ആദ്യ പരിപാടി അമ്പലപ്പുഴ അക്ഷര ജ്വാല അവതരിപ്പിച്ച അനന്തരം എന്ന നാടകം അരങ്ങേറി.

ളാലം, ഈരാറ്റുപേട്ട ബ്ലോക്ക് പഞ്ചായത്തുകളിൽ ജോബ് സ്റ്റേഷൻ ആരംഭിച്ചു

പ്രവിത്താനം: സംസ്ഥാന സര്‍ക്കാരിന്‍റെ വിജ്ഞാന കേരളം ജനകീയ കാമ്പയിന്‍റെ ഭാഗമായി ളാലം ബ്ലോക്ക് പഞ്ചായത്തിൽ ജോബ് സ്റ്റേഷന്‍ ആരംഭിച്ചു. ബ്ലോക്ക് പഞ്ചായത്ത് വൈസ് പ്രസിഡന്‍റ് ആനന്ദ് മാത്യു ചെറുവള്ളിയുടെ അധ്യക്ഷതയില്‍ ചേര്‍ന്ന യോഗത്തില്‍ പ്രസിഡന്‍റ് ജെസി ജോര്‍ജ് ഉദ്ഘാടനം നിർവഹിച്ചു. കടനാട് പഞ്ചായത്ത് പ്രസിഡന്‍റ്, ജിജി തമ്പി, ബ്ലോക്ക് ജനപ്രതിനിധികള്‍ ഉദ്യോഗസ്ഥര്‍ തുടങ്ങിയവര്‍ പ്രസംഗിച്ചു. ഇതോടനുബന്ധിച്ച് ആറ് പഞ്ചായത്തുകളിലെ എല്ലാ വാര്‍ഡുകളില്‍നിന്നു തെരഞ്ഞെടുത്ത ലോക്കല്‍ റിസോഴ്‌സ് പേഴ്‌സണ്‍മാരുടെ പരിശീലനം ഇന്ന് ളാലം ബ്ലോക്ക് പഞ്ചായത്ത് ഹാളില്‍ നടക്കും. അഭ്യസ്തവിദ്യരായ തൊഴിലന്വേഷകര്‍ക്ക് വളരെ എളുപ്പത്തില്‍ തൊഴില്‍ കണ്ടെത്തുന്നതിന് ആവശ്യമായ സഹായം നല്‍കുക എന്നതാണ് ജോബ് സ്റ്റേഷനിലൂടെ ലക്ഷ്യമിടുന്നത്. ഈരാറ്റുപേട്ട: ഈരാറ്റുപേട്ട ബ്ലോക്ക് പഞ്ചായത്തിൽ ആരംഭിച്ച ജോബ് സ്റ്റേഷൻ ബ്ലോക്ക് പഞ്ചായത്ത് പ്രസിഡന്‍റ് മറിയാമ്മ ഫെര്‍ണാണ്ടസ് ഉദ്ഘാടനം ചെയ്തു. ബ്ലോക്ക് പഞ്ചായത്ത് അംഗങ്ങളായ ജെറ്റോ ജോസ്, ഓമന ഗോപാലന്‍, മിനി സാവിയോ, സെക്രട്ടറി സാം ഐസക് എന്നിവര്‍ പ്രസംഗിച്ചു. ഈരാറ്റുപേട്ട ബ്ലോക്കിന്‍റെ കീഴില്‍ വരുന്ന എട്ട് പഞ്ചായത്തുകളിലെ എല്ലാ വാര്‍ഡുകളില്‍നിന്നും ലോക്കല്‍ റിസോഴ്സ് പേഴ്സണ്‍മാരെ തെരഞ്ഞെടുക്കും. കൂടാതെ എട്ട് പഞ്ചായത്തുകളിലും ജോബ് സ്റ്റേഷന്‍റെ ഭാഗമായ ഫെസിലിറ്റേഷന്‍ സെന്‍റര്‍ ആരംഭിക്കും.

ജല്‍ജീവന്‍ മിഷന്‍ പദ്ധതി: കേന്ദ്രവിഹിതം വെട്ടിക്കുറച്ചത് കേരളത്തിനു വിനയാകുമെന്ന് കേരള ഗവ. കോണ്‍ട്രാക്‌ടേഴ്‌സ് അസോസിയേഷൻ

കോട്ടയം: ജല്‍ജീവന്‍ മിഷന്‍ പദ്ധതിയില്‍ കേന്ദ്ര വിഹിതം 46 ശതമാനം വെട്ടിക്കുറച്ചത് കേരളത്തിനു വിനയാകുമെന്ന് കേരള ഗവണ്‍മെന്‍റ് കോണ്‍ട്രാക്‌ടേഴ്‌സ് അസോസിയേഷന്‍. ജല്‍ ജീവന്‍ കുടിവെള്ള പദ്ധതിയുടെ കാലാവധി 2028 ഡിസംബര്‍ 31 വരെ ദീര്‍ഘിപ്പിച്ചെങ്കിലും പദ്ധതി നടത്തിപ്പിനായി കേന്ദ്ര ജല്‍ ശക്തി വകുപ്പ് ആവശ്യപ്പെട്ട തുകയില്‍ കേന്ദ്ര ധനവകുപ്പ് 46 ശതമാനം വെട്ടിക്കുറച്ചു. ആവശ്യപ്പെട്ട 2.79 ലക്ഷം കോടി രൂപയ്ക്കു പകരം 1.51 ലക്ഷം കോടി രൂപ മാത്രമേ അനുവദിച്ചിട്ടുള്ളൂ. അഖിലേന്ത്യാടിസ്ഥാനത്തില്‍ 75 ശതമാനം പണികള്‍ പൂര്‍ത്തീകരിച്ചിട്ടുണ്ടെങ്കിലും കേരളം 33 ശതമാനം മാത്രമേ നടത്തിയിട്ടുള്ളൂ. പ്രവൃത്തികളുടെ നടത്തിപ്പില്‍ കേരളം 31-ാം സ്ഥാനത്തുമാണ്. പണികള്‍ ചെയ്ത കരാറുകാര്‍ക്ക് 4500 കോടിയുടെ കുടിശികയുമുണ്ട്. കേന്ദ്രവും സംസ്ഥാനവും കൂടി 33,000 കോടിയെങ്കിലും ചെലവഴിച്ചാല്‍ മാത്രമേ കേരളത്തിന്‍റെ 44,500 കോടി രൂപയുടെ പദ്ധതി പൂര്‍ത്തിയാക്കാന്‍ കഴിയൂ. കേന്ദ്രവിഹിതം കുറയുന്ന സാഹചര്യത്തില്‍ കേരളം പകുതിയിലേറെ തുക കണ്ടെത്തേണ്ടിവരും. 2025-26 വര്‍ഷത്തെ ബജറ്റില്‍ 560 കോടി രൂപ മാത്രമാണ് സംസ്ഥാനം വകയിരുത്തിയിട്ടുള്ളത്. 14 മാസത്തെ ബില്ലുകളാണ് ഇപ്പോള്‍ കൂടിശികയായിട്ടുള്ളത്. ഈ സാഹചര്യത്തില്‍ പണികള്‍ നിര്‍ത്താന്‍ സര്‍ക്കാര്‍ കരാറുകാരെ അനുവദിക്കണമെന്നും കോണ്‍ട്രാക്ടര്‍മാര്‍ ആവശ്യപ്പെട്ടു. പണി പൂര്‍ത്തിയാക്കി ഒരു മാസത്തിനുള്ളില്‍ ടാക്‌സ് വിഹിതം കരാറുകാരന്‍ അടയ്ക്കണമെന്ന വ്യവസ്ഥ പ്രായോഗികമല്ല. ബില്‍ തുക കൃത്യമായി വ്യക്തമാക്കപ്പെടാതെ കരാറുകാരന് ഇ വോയ്‌സ് നല്‍കാനും സാധ്യമല്ലെന്നും കരാറുകാര്‍ പറയുന്നു. ബില്‍ തുക ലഭിച്ച് ഒരു മാസത്തിനുള്ളില്‍ പിഴ കൂടാതെ ജിഎസ്ടി അടയ്ക്കാന്‍ കരാറുകാരെ അനുവദിക്കണമെന്നും കഴിഞ്ഞ 31നു കാലാവധി പൂര്‍ത്തിയാക്കിയ ലൈസന്‍സുകള്‍ പുതുക്കുന്നതിനുള്ള കാലാവധി ജൂണ്‍ 30 വരെ നല്‍കണമെന്നും കരാറുകാര്‍ ആവശ്യപ്പെട്ടു. പത്രസമ്മേളനത്തില്‍ കേരള ഗവണ്‍മെന്‍റ് കോണ്‍ട്രാക്‌ടേഴ്‌സ് അസോസിയേഷന്‍ സംസ്ഥാന പ്രസിഡന്‍റ് വര്‍ഗീസ് കണ്ണമ്പള്ളി, സെക്രട്ടറി റെജി ടി. ചാക്കോ, ജില്ലാ പ്രസിഡന്‍റ് ഷാജി ഇലവത്തില്‍ എന്നിവര്‍ പങ്കെടുത്തു.

കാഴ്ചകളുടെ ആഘോഷമായി എന്‍റെ കേരളം പ്രദര്‍ശനം

കോട്ടയം: സര്‍ക്കാരിന്‍റെ വികസന നേട്ടങ്ങള്‍ കണ്ടറിഞ്ഞും ഒപ്പം കളിച്ചും ചിരിച്ചും സെല്‍ഫി പോയിന്‍റുകളില്‍ ക്ലിക്കിയും ആഘോഷത്തിന്‍റെയും കാഴ്ചാനുഭവങ്ങളുടെയും അരങ്ങും അനുഭവവുമായി നാഗമ്പടം മൈതാനത്ത് എന്‍റെ കേരളം പ്രദര്‍ശന മേള . മേളയുടെ രണ്ടാം ദിവസമായ ഇന്നലെ പ്രദര്‍ശന വിപണന സ്റ്റാളുകളിലും മെഗാഭക്ഷ്യമേളയിലും വന്‍ തിരക്കാണ് അനുഭവപ്പെട്ടത്. കായിക വകുപ്പ് ഒരുക്കിയ പവലിയനില്‍ മുഴുവന്‍ സമയവും കുട്ടികള്‍ കളിച്ചു തിമിര്‍ത്തു. ടൂറിസം വകുപ്പിന്‍റെ ഡെസ്റ്റിനേഷന്‍ വെഡിംഗ് ഫോട്ടോ പോയിന്‍റിലും വെര്‍ച്വല്‍ ബീച്ചിലും ഫോട്ടോ എടുത്ത് മുതിര്‍ന്നവരും മേള ആഘോഷമാക്കി. ഇന്നലെ രാവിലെ എക്സൈസ് വകുപ്പിന്‍റെ നേതൃത്വത്തില്‍ ലഹരി വിരുദ്ധ സംഗമവും ചര്‍ച്ചയും നടന്നു. ഉച്ചകഴിഞ്ഞ് നടന്ന ഭിന്നശേഷി കലാകാരന്മാരുടെ സംഗമം മേളയുടെ ആകര്‍ഷണമായി. 30 വരെ നടക്കുന്ന മേളയിലേക്കുള്ള പ്രദര്‍ശനം സൗജന്യമാണ്. ആധാര്‍ അടക്കമുള്ള ഓണ്‍ലൈന്‍ സേവനങ്ങള്‍ സൗജന്യം മേളയിലെ ഐടി മിഷന്‍ സ്റ്റാളില്‍ എല്ലാ സര്‍ക്കാര്‍ ഓണ്‍ലൈന്‍ സേവനങ്ങളും സൗജന്യമായി ലഭ്യമാക്കും. ഐടി മിഷനും കോട്ടയം അക്ഷയ ജില്ലാ പ്രോജക്റ്റും ചേര്‍ന്ന് ഒരുക്കിയിരിക്കുന്ന സ്റ്റാളില്‍ പുതിയ ആധാര്‍ എടുക്കല്‍, പഴയ ആധാര്‍ പുതുക്കല്‍, 10 വര്‍ഷം പൂര്‍ത്തിയാക്കിയ ആധാര്‍ പുതുക്കല്‍ തുടങ്ങി എല്ലാ ആധാര്‍ സേവനങ്ങളും ലഭ്യമാണ്. അഞ്ച് വയസില്‍ താഴെയുള്ള കുട്ടികള്‍ക്ക് ആധാര്‍ എടുക്കാനുള്ള അവസരവുമുണ്ട്. തദ്ദേശ സ്വയംഭരണ വകുപ്പിന്‍റെ കെ - സ്മാര്‍ട്ട് സേവനങ്ങള്‍, റേഷന്‍ കാര്‍ഡ്, ഭക്ഷ്യ സുരക്ഷ, തെരഞ്ഞെടുപ്പ് തിരിച്ചറിയല്‍ കാര്‍ഡ്, ജനന മരണ രജിസ്ട്രേഷന്‍ തുടങ്ങി എല്ലാ സര്‍ക്കാര്‍ ഓണ്‍ലൈന്‍ സേവനങ്ങളും ഇവയുമായി ബന്ധപ്പെട്ട സംശയങ്ങള്‍ ദൂരീകരിക്കാനുള്ള അവസരവും സ്റ്റാളില്‍നിന്ന് ലഭിക്കും. നാവിനു രുചിപകര്‍ന്നു ഭക്ഷ്യമേള; സൂപ്പര്‍ ഹിറ്റായി വനസുന്ദരി ചിക്കന്‍ നാവിനും മനസിനും രുചി പകര്‍ന്ന് കുടുംബശ്രീയുടെ മെഗാ ഭക്ഷ്യമേള. എന്‍റെ കേരളം പ്രദര്‍ശന വിപണന മേളയില്‍ ആരംഭിച്ച മെഗാ ഭക്ഷ്യമേളയില്‍ വന്‍ ജനപങ്കാളിത്തമാണുള്ളത്. വ്യത്യസ്തമാര്‍ന്ന വിഭവങ്ങളാല്‍ സമൃദ്ധമായ മേളയില്‍ കോട്ടയത്തിന്‍റെ സ്വന്തം കപ്പയും ബീഫും ഇടുക്കിക്കാരുടെ സ്വന്തം ഏഷ്യാഡും താരങ്ങളാണ്. കോഴിക്കോടന്‍ വിഭവങ്ങളും ഇവിടെയിടം പിടിച്ചിട്ടുണ്ട്. ഒരേ സമയം ഇരുനൂറോളംപേര്‍ക്ക് ഭക്ഷണം കഴിക്കാന്‍ സാധിക്കുന്ന രീതിയിലാണ് ഫുഡ് കോര്‍ട്ട് സജ്ജീകരിച്ചിരിക്കുന്നത്. 10 സ്റ്റാളുകളിലായി വിവിധതരം പായസങ്ങള്‍, സ്‌നാക്‌സുകള്‍, ബിരിയാണികള്‍, ചിക്കന്‍ വിഭവങ്ങള്‍ എന്നിവയും ലഭ്യമാണ്. കുടുംബശ്രീ ഒരുക്കിയിരിക്കുന്ന ഭക്ഷ്യമേളയിലാണ് ഇത്തവണയും കാടിറങ്ങി വനസുന്ദരി ചിക്കൻ എത്തിയത്. രുചി മാത്രമല്ല വനസുന്ദരിയുടെ സവിശേഷത, ആരോഗ്യപരമായ ഗുണങ്ങളുമാണ്. പച്ചക്കുരുമുളകും കാന്താരിയും മല്ലിയും പുതിനയും കാട്ടുജീരകവും ചില പച്ചിലകളും ചേര്‍ത്തരച്ച കൂട്ടിലേക്ക് വേവിച്ച ചിക്കന്‍ ചേര്‍ത്ത് കല്ലില്‍ വച്ച് പൊള്ളിച്ച് ചതച്ചെടുത്താല്‍ വനസുന്ദരി തയാര്‍. കുടുംബശ്രീയുടെ വന്‍ ഹിറ്റായ വനസുന്ദരി മേളയില്‍ എത്തുന്നവരുടെ നാവിനെ കീഴടക്കുകയാണ്. കാണാം കളിമണ്‍പാത്രനിര്‍മാണം കളിമണ്ണ് എങ്ങനെയിത്ര കമനീയ രൂപങ്ങളായി മാറുന്നുവെന്ന് ആലോചിച്ചിട്ടുണ്ടോ? കളിമണ്ണുകൊണ്ട് നിലവിളക്കുള്‍പ്പെടെ കൗതുക രൂപങ്ങള്‍ നിമിഷങ്ങള്‍ക്കുള്ളില്‍ രൂപപ്പെടുത്തിയെടുക്കുന്നത് കണ്ടുനില്‍ക്കാന്‍ രസമാണ്. സ്വന്തം കൈകള്‍കൊണ്ട് ഇവ ഉണ്ടാക്കി നോക്കാനുള്ള അവസരംകൂടി കിട്ടിയാലോ? എന്‍റെ കേരളം പ്രദര്‍ശന വിപണനമേളയുടെ ഭാഗമായി ടൂറിസത്തിന്‍റെ പവലിയനിലാണ് ഇതിനായി അവസരം ഒരുക്കിയിരിക്കുന്നത്. പാരമ്പര്യ കളിമണ്‍പാത്രനിര്‍മാണ തൊഴിലാളിയായ വൈക്കം തോട്ടകം രാജേഷ് ഇണ്ടംതിരുത്തിലാണ് കാണികള്‍ക്കായി നിര്‍മാണം പരിചയപ്പെടുത്തുന്നത്. കളിമണ്‍ വിളക്ക്, ചട്ടി, ഫ്‌ളവര്‍ ബോട്ടില്‍, കൂജ, പാത്രങ്ങള്‍ എന്നിവ ഉണ്ടാക്കിയതും പ്രദര്‍ശിപ്പിച്ചിട്ടുണ്ട്. ആഘോഷ പരിപാടികള്‍ ഇന്ന് ഒഴിവാക്കും കോട്ടയം: ഫ്രാന്‍സിസ് മാര്‍പാപ്പയുടെ സംസ്‌കാരച്ചടങ്ങുകള്‍ നടക്കുന്ന ഇന്ന് അദ്ദേഹത്തോടുള്ള ആദരസൂചകമായുള്ള ഔദ്യോഗിക ദുഃഖാചരണം പ്രഖ്യാപിച്ചിട്ടുള്ളതിനാല്‍ ഇന്നത്തെ എന്‍റെ കേരളം പ്രദര്‍ശന വിപണനമേളയിലെ കലാപരിപാടികളും സംഗമങ്ങളും ഒഴിവാക്കി. ഇന്നു നടത്താനിരുന്ന സൂരജ് സന്തോഷ് ലൈവ് ബാന്‍ഡ് സമാപന ദിവസമായ 30ന് രാത്രി 7.30 ന് നടക്കും. പ്രദര്‍ശന-വിപണനമേളയും ഭക്ഷ്യമേളയും ഉണ്ടായിരിക്കും.

സഹായ പദ്ധതികള്‍ ഫയലില്‍; പശുവും ആടും കൂടൊഴിയുന്നു

കോട്ടയം: ജില്ലയിലെ മൃഗപരിപാലന മേഖല തകര്‍ച്ചയിലേക്കെന്ന് കണക്കുകള്‍. 2019ല്‍ 81,074 പശുക്കളുണ്ടായിരുന്ന ജില്ലയില്‍ ഇന്ന് ഗോക്കളുടെ എണ്ണം 50,495. 2019ല്‍ 94,968 ആടുകള്‍ ഉണ്ടായിരുന്നു. ഇപ്പോള്‍ 46,078. മൃഗസംരക്ഷണത്തിനായി കോടികള്‍ വകയിരുത്തുന്ന സാഹചര്യത്തിലാണ് കന്നുകാലികളുടെ ഗണ്യമായ കുറവ്. തദ്ദേശ സ്വയംഭരണ സ്ഥാപനങ്ങള്‍ മുഖേനയും മൃഗപരിപാലന പദ്ധതികള്‍ ആവിഷ്‌കരിക്കണമെന്ന നിര്‍ദേശം നിലനില്‍ക്കെയാണ് എണ്ണത്തിലെ കുറവ്. പ്രഖ്യാപനങ്ങളേറെയും ഫയല്‍ക്കെട്ടില്‍ ഒതുങ്ങിയതാണ് ഇടിവിന് കാരണമെന്ന് കര്‍ഷക സംഘടനകള്‍ ആരോപിക്കുന്നു. പശുവിനെയും ആടിനെയും വളര്‍ത്താന്‍ പ്രോത്സാഹിപ്പിക്കുമ്പോള്‍ കര്‍ഷകര്‍ക്ക് യാതൊരു സഹായവും സര്‍ക്കാരോ മൃഗവകുപ്പോ ചെയ്യുന്നില്ലെന്നും ഇവര്‍ പറയുന്നു. കോടിക്കണക്കിന് രൂപ വിവിധ പദ്ധതികള്‍ക്കായി വകയിരുത്തി മേന്മ പറയുന്നതല്ലാതെ നടപ്പിലാക്കാന്‍ ശ്രമിക്കുന്നില്ലെന്നാണ് പ്രധാന വിമര്‍ശനം. കാലിത്തീറ്റ, പരിപാലന ചെലവ്, മരുന്നുവില എന്നു തുടങ്ങി അനുദിനചെലവ് വര്‍ധിക്കുന്നതിനാല്‍ സര്‍ക്കാര്‍ പ്രഖ്യാപിക്കുന്ന സഹായം എവിടേക്കാണ് ചോര്‍ന്നു പോകുന്നതെന്നു പരിശോധിക്കണമെന്ന് ക്ഷീരകര്‍ഷകര്‍ ആവശ്യപ്പെടുന്നു.

പ്രത്യാശയുടെ തീര്‍ഥാടകന്‍ ഫ്രാന്‍സിസ് പാപ്പായ്ക്ക് പ്രണാമമര്‍പ്പിച്ച് ചങ്ങനാശേരി അതിരൂപത

ചങ്ങനാശേരി: പ്രത്യാശയുടെ തീര്‍ഥാടകന്‍ യശഃശരീരനായ ഫ്രാന്‍സിസ് പാപ്പായ്ക്ക് പ്രണാമമര്‍പ്പിച്ച് ചങ്ങനാശേരി അതിരൂപത. സെന്‍റ് മേരീസ് മെത്രാപ്പോലീത്തന്‍പള്ളിയില്‍ നടന്ന വിശുദ്ധകുര്‍ബാനയ്ക്കും അനുസ്മരണ ശുശ്രൂഷകള്‍ക്കുംശേഷം പാരിഷ്ഹാളില്‍ സംഘടിപ്പിച്ച സമ്മേളനം ഓര്‍ത്തഡോക്‌സ് സഭയുടെ പരമാധ്യക്ഷന്‍ ബസേലിയോസ് മാര്‍ത്തോമ്മാ മാത്യൂസ് തൃതീയന്‍ കാതോലിക്കാ ബാവ ഉദ്ഘാടനം ചെയ്തു. ഈശോയുടെ വിനയവും സ്‌നേഹവും സ്വജീവിതത്തിലൂടെ ലോകത്തെ പഠിപ്പിച്ച ക്രിസ്തുശിഷ്യനാണ് ഫ്രാന്‍സിസ് പാപ്പായെന്ന് കാതോലിക്കാ ബാവ അനുസ്മരിച്ചു. ജീവിതത്തിന്‍റെ വ്യത്യസ്തമായ അനുഭവങ്ങളിലും പ്രതിസന്ധികളിലും ദൈവികകരുണയില്‍ ആഴമായി ആശ്രയിച്ച് ജീവിച്ച മഹാമനുഷ്യനായിരുന്നു പാപ്പായെന്നും അദ്ദേഹത്തെ രണ്ടുതവണ സന്ദര്‍ശിക്കാനും സഹോദര തുല്യമായ സ്‌നേഹം അനുഭവിക്കാനും തനിക്കു സാധിച്ചുവെന്നും കാതോലിക്കാ ബാവ കൂട്ടിച്ചേര്‍ത്തു. ആര്‍ച്ച്ബിഷപ് മാര്‍ തോമസ് തറയില്‍ അധ്യക്ഷത വഹിച്ചു. ഈശോ എല്ലാവരുടേതുമാണെന്നും സഭ എല്ലാവരുടേതുമാകണമെന്നും പഠിപ്പിച്ച പാപ്പാ വിശാലമായ മാനവിക ദര്‍ശനങ്ങളുടെ ഉടമയായിരുന്നുവെന്നും ആര്‍ച്ച്ബിഷപ് അഭിപ്രായപ്പെട്ടു. ആര്‍ച്ച്ബിഷപ് മാര്‍ ജോസഫ് പെരുന്തോട്ടം, മാര്‍ത്തോമ്മാ സഭയുടെ പ്രതിനിധി ആര്‍ച്ച്ബിഷപ് മാത്യൂസ് മാര്‍ സെറാഫിം, യാക്കോബായ സഭാപ്രതിനിധി ആര്‍ച്ച്ബിഷപ് തിമോത്തിയോസ് മാര്‍ മാത്യൂസ്, സിഎസ്‌ഐ സഭാപ്രതിനിധി ബിഷപ് ഡോ. തോമസ് സാമുവല്‍, കുറിച്ചി അദ്വൈത വിദ്യാശ്രമം അംഗം സ്വാമി വിശാലാനന്ദ, പുതൂര്‍പള്ളി മുസ്‌ലിം ജമാ അത്ത് പ്രസിഡന്‍റ് ടി.പി. അബ്ദുള്‍ ഹമീദ്, അതിരൂപതാ വികാരി ജനറാള്‍ മോണ്‍. ആന്‍റണി എത്തക്കാട്ട്, പാസ്റ്ററല്‍ കൗണ്‍സില്‍ ജോയിന്‍റ് സെക്രട്ടറി ബിജു സെബാസ്റ്റ്യന്‍ എന്നിവര്‍ പ്രസംഗിച്ചു. അതിരൂപത വികാരി ജനറാള്‍മാരായ മോണ്‍. മാത്യു ചങ്ങങ്കരി, മോണ്‍. സ്‌കറിയ കന്യാകോണില്‍, പ്രൊക്യുറേറ്റര്‍ ഫാ. ആന്‍റണി മാളിയേക്കല്‍, ചാന്‍സലര്‍ ഫാ. ജോര്‍ജ് പുതുമനമൂഴിയില്‍, കത്തീഡ്രല്‍ വികാരി ഫാ. ജോസഫ് വാണിയപുരയ്ക്കല്‍ എന്നിവര്‍ നേതൃത്വം നല്‍കി. അതിരൂപതയിലെ വൈദികര്‍, സന്യസ്തര്‍, അത്മായപ്രതിനിധികള്‍ തുടങ്ങി വലിയ വിശ്വാസിസമൂഹം അനുസ്മരണ ചടങ്ങില്‍ പങ്കെടുത്തു.

കാരികാട് ടോപ്പില്‍ ഗ്ലാസ് ടവറും പാര്‍ക്കും വരുന്നു

കോട്ടയം: സഞ്ചാരികളുടെ ഇഷ്ടകേന്ദ്രമായ വാഗമണ്ണിലേക്കുള്ള വഴിയില്‍ തീക്കോയി കാരികാട് ടോപ്പില്‍ ഗ്ലാസ് ടവര്‍ വരുന്നു. മൂന്നാറിലും വാഗമണ്ണിലും പാര്‍ക്ക് ഉള്‍പ്പെടെ നടത്തുന്ന ഗ്രീന്‍ വോക്ക് എന്ന സ്വകാര്യ സംരംഭമാണ് ജില്ലാ ടൂറിസം പ്രമോഷന്‍ കൗണ്‍സിലിന്‍റെ സഹായത്തോടെ സ്വകാര്യ വ്യക്തിയുടെ സ്ഥലത്ത് ഗ്ലാസ് ടവറും പാര്‍ക്കും ഒരുക്കുന്നത്. 25 അടി ഉയരമുള്ള ഗ്ലാസ് ടവറില്‍ ഒരേ സമയം 100 പേര്‍ക്ക് കയറി നില്‍ക്കാം. ചെങ്കുത്തായ ചെരിവിലൂടെ കോടമഞ്ഞിനിടയിലൂടെ വാഹനങ്ങള്‍ കയറിവരുന്നതും താഴ്‌വാരങ്ങളുടെയും മലമടക്കുകളുടെയും വിദൂര ദൃശ്യവും ഇവിടെ നിന്നാല്‍ കാണാം. മനസിനും ശരീരത്തിനും കുളിരേകി കാറ്റില്‍ പറന്നെത്തുന്ന കോടമഞ്ഞും കാഴ്ചക്കാര്‍ക്ക് നവ്യാനുഭൂതി പകരും. ഈരാറ്റുപേട്ട, പാലാ, കോട്ടയം ഭാഗങ്ങളും കൊച്ചി റിഫൈനറിയും ഇവിടെ നിന്നാല്‍ കാണം. ഇതു കൂടാതെ ഫെറാറി വീല്‍, നാലു പേരുള്‍പ്പെടുന്ന ഒരു ഫാമിലിക്ക് പോകാന്‍ പറ്റുന്ന രീതിയിലുള്ള റോപ് റൈഡര്‍ കാര്‍, സെല്‍ഫി, ഫോട്ടോ പോയിന്‍റുകള്‍, വിവിധ റൈഡുകള്‍ ഉള്‍പ്പെടുത്തിയുള്ള കുട്ടികളുടെ പാര്‍ക്ക്, വിശ്രമ കേന്ദ്രം, ടോയ്‌ലറ്റ് സമുച്ചയം, കോഫി-സ്നാക്‌സ് പാര്‍ലര്‍ എന്നിവ ഉള്‍പ്പെടുന്നതാണ് പ്രോജക്ട്. നിര്‍മാണ പ്രവര്‍ത്തനങ്ങള്‍ ആരംഭിച്ചുകഴിഞ്ഞു. ഓണത്തോടെ പാര്‍ക്കും ടവറും പൂര്‍ത്തിയാക്കാനാണ് അധികൃതരുടെ ശ്രമം. കാരികാട് ടോപ്പില്‍ മൂന്നു നിലകളിലായി നിര്‍മിക്കുന്ന വാച്ച് ടവറിന്‍റെ നിര്‍മാണം ഇതുവരെ പൂര്‍ത്തിയായിട്ടില്ല. തീക്കോയി പഞ്ചായത്ത് നല്‍കിയ സ്ഥലത്ത് എംഎല്‍എ ആസ്തിവികസന ഫണ്ട് ഉപയോഗിച്ചാണ് വാച്ച് ടവര്‍ നിര്‍മിച്ചത്. അടുത്തനാളില്‍ 10 ലക്ഷം രൂപ കൂടി ടൂറിസം വകുപ്പ് നിര്‍മാണ പരവര്‍ത്തനങ്ങള്‍ക്കായി അനുവദിച്ചിട്ടുണ്ട്. നിര്‍മാണം പൂര്‍ത്തിയാക്കി ഡിടിപിസിയെ വാച്ച് ടവര്‍ ഏല്‍പ്പിക്കാനാണ് പദ്ധതി. വാഗമണ്‍ യാത്രയില്‍ യാത്രക്കാര്‍ കാഴ്ചകള്‍ കാണുന്നതിനും കാപ്പി കുടിക്കുന്നതിനും വിശ്രമിക്കുന്നതിനുമായി വാഹനങ്ങള്‍ നിര്‍ത്തുന്ന സ്ഥലമാണ് കാരികാട് ടോപ്പ്.

പഴയ പോലല്ല; കോട്ടയത്തിപ്പോള്‍ കാണാനേറെയുണ്ട്...

കോട്ടയം: കോട്ടയത്ത് എന്നാ കാണാനുള്ളത് എന്നു ചോദിച്ചിരുന്ന കാലം പോയി. കുമരകവും വൈക്കവും ഉള്‍പ്പെടുന്ന പടിഞ്ഞാറന്‍ മേഖലയും ഇല്ലിക്കല്‍ക്കല്ലും ഇലവീഴാപൂഞ്ചിറയും വാഗമണ്‍ മലനിരകളും ഉള്‍പ്പെടുന്ന കിഴക്കന്‍ മേഖലയും ഇന്ന് വിദേശികളടക്കമുള്ള ടൂറിസ്റ്റുകളുടെ പ്രധാന ഡെസ്റ്റിനേഷനുകളാണ്. ഇതിനൊപ്പം മലരിക്കല്‍ ആമ്പല്‍വസന്തം പോലെ മനസു കീഴടക്കുന്ന സീസണല്‍ ടൂറിസവും ഗ്രാമപ്രദേശങ്ങളില്‍ തളിരിടുന്ന ഗ്രാമീണ ടൂറിസവും എല്ലാം ചേര്‍ന്ന് വിനോദ സഞ്ചാര ഭൂപടത്തില്‍ ജില്ലയെ അടയാളപ്പെടുത്തിക്കഴിഞ്ഞു. എല്ലാ വര്‍ഷവും ആയിരക്കണക്കിന് സഞ്ചാരികളാണ് ജില്ലയിലേക്ക് എത്തുന്നത്. ജില്ലയിലെ ടൂറിസം വികസനത്തിനായി സര്‍ക്കാര്‍ ഒന്‍പത് വര്‍ഷത്തിനുള്ളില്‍ ചെലവാക്കിയത് 139.24 കോടി രൂപയാണ്. ജില്ലയിലെ കര, കായല്‍, മല എന്നീ മേഖലകളിലെ ടൂറിസം സാധ്യതകള്‍ വളരെ വിപുലമായിട്ടാണ് സര്‍ക്കാര്‍ പ്രയോജനപ്പെടുത്തുന്നത്. കുമരകത്ത് ആരംഭിച്ച വലിയമട വാട്ടര്‍ ഫ്രണ്ട് പദ്ധതി ജില്ലയുടെ ഗ്രാമീണ ടൂറിസം മേഖലയുടെ മുഖമുദ്രയായി മാറിക്കഴിഞ്ഞു. ഗ്രാമീണ ടൂറിസം വികസനത്തിന്‍റെ ഭാഗമായി മറവന്‍തുരുത്ത് പഞ്ചായത്തിലെ തുരുത്തുമ്മ തൂക്കു പാലത്തില്‍ ഫ്‌ളോട്ടിംഗ് ബോട്ട് ജെട്ടിയുടെ നിര്‍മാണവും പൂര്‍ത്തിയാക്കി. കാടുകൾ പുനരുജ്ജീവിപ്പിക്കുന്നതിന്‍റെ ഭാഗമായി മിയാവാക്കി പദ്ധതിയും നടപ്പിലാക്കി. നാലുമണിക്കാറ്റിലെ അടിസ്ഥാന സൗകര്യ വികസനത്തിനായി 8.55 ലക്ഷം രൂപയുടെ പ്രവര്‍ത്തനങ്ങളാണ് നടപ്പിലാക്കിയത്. ചീപ്പുങ്കല്‍ കുമരകം ഡെസ്റ്റിനേഷന്‍ വികസനം, കായല്‍ ടൂറിസം മേഖലയിലെ ശൗചാലയ മാലിന്യ സംസ്‌കരണത്തിന് ഉപയോഗിക്കുന്ന സീവേജ് ബാര്‍ജിന്‍റെ നിര്‍മാണം എന്നിവയും പൂര്‍ത്തീകരിച്ചു. ഇല്ലിക്കല്‍ക്കല്ലിലെ നടപ്പാതയുടെയും കൈവരിയുടെയും നിര്‍മാണത്തിനായി 50 ലക്ഷം രൂപയാണ് മുടക്കിയത്. കോടിമത ബോട്ട് ജെട്ടിയോടനുബന്ധിച്ചുള്ള നടപ്പാതയുടെ അറ്റകുറ്റപ്പണികള്‍ക്കായി 91 ലക്ഷം രൂപയും മുടക്കി. വേങ്ങത്താനം വെള്ളച്ചാട്ടത്തിലെ സുരക്ഷാവേലി നിര്‍മാണത്തിനും സൗന്ദര്യവത്കരണത്തിനുമായി 28 ലക്ഷം രൂപയാണ് ചെലവാക്കിയത്. മനയ്ക്കചിറ ടൂറിസം പ്രോജക്ടിലൂടെ ചങ്ങനാശേരിയും ടൂറിസം മാപ്പിലെത്തി . ചങ്ങനാശേരി ബോട്ട് ടെര്‍മിനലിന്‍റെ സൗന്ദര്യവത്കരണത്തിനായി 99.70 ലക്ഷം രൂപയാണ് മുതല്‍മുടക്കിയത്. കുമരകം ഗോങ്ങിണിക്കരി വ്യു പോയിന്‍റിന്‍റെ സൗന്ദര്യവത്കരണത്തിനും അടിസ്ഥാന സൗകര്യവികസനത്തിനുമായി 75 ലക്ഷവും മുടക്കി. കുമരകത്തെ ബോട്ടിംഗ് സൗകര്യങ്ങളുടെ അടിസ്ഥാന വികസനത്തിന്‍റെ ഭാഗമായി ജലാശയങ്ങള്‍ പുനരുദ്ധരിച്ചു. കവണാറ്റിന്‍കരയിലെ ടൂറിസ്റ്റ് കേന്ദ്രം, വാട്ടര്‍ സ്‌കേപ്പ് എന്നിവ നവീകരിച്ചു. എഴുമാന്തുരുത്ത്, ആപ്പാഞ്ചിറ കനാല്‍ ടൂറിസം സാധ്യതകൾ വിപുലീകരിക്കുന്നതിനായി 50 ലക്ഷം രൂപ വീതവും സര്‍ക്കാര്‍ ചെലവഴിച്ചു.

മുണ്ടക്കയം ടൗണിലെ കൂട്ടത്തല്ല്: പോലീസിനെതിരേ ജനരോഷം ശക്തം

മുണ്ടക്കയം: ടൗണിലുണ്ടായ കൂട്ടത്തല്ലിൽ പോലീസിനെതിരേ ജനരോഷം ശക്തമാകുന്നു. വ്യാഴാഴ്ച ഉച്ചകഴിഞ്ഞ് മൂന്നോടെയാണ് മുണ്ടക്കയം ടൗണിൽ പട്ടാപ്പകൽ നടുറോഡിൽ കൂട്ടത്തല്ല് അരങ്ങേറിയത്. ഇരുപതിലധികം വരുന്ന യുവാക്കൾ ചേരിതിരിഞ്ഞ് പരസ്പരം കൊമ്പുകോർക്കുകയായിരുന്നു. വാഹന പാർക്കിംഗിനെച്ചൊല്ലിയുള്ള തർക്കമാണെന്നും ലഹരിക്കച്ചവടം ചോദ്യം ചെയ്തതിനെത്തുടർന്നുണ്ടായ സംഘർഷമാണെന്നും പറയപ്പെടുന്നു. അതേസമയം, മറ്റൊരു സ്ഥലത്തു നടന്ന സംഘർഷത്തിന്‍റെ ബാക്കി ഭാഗമാണ് മുണ്ടക്കയം ടൗണിൽ അരങ്ങേറിയതെന്നും സംസാരമുണ്ട്. വാഹനം പാര്‍ക്ക് ചെയ്തത് സംബന്ധിച്ചുണ്ടായ തര്‍ക്കം ഡിവൈഎഫ്ഐ മേഖല സെക്രട്ടറി രജീന്ദ്രന്‍ ഇടപെട്ടു പരിഹരിച്ചെന്നും എന്നാല്‍, ഇടപെടല്‍ ഇഷ്ടപ്പെടാതിരുന്നവര്‍ സംഘം ചേര്‍ന്നു രജീന്ദ്രനെ മർദിക്കുകയായിരുന്നുവെന്നും ഡിവൈഎഫ്ഐ ആരോപിക്കുന്നു. മുക്കാല്‍ മണിക്കൂറോളം നീണ്ടുനിന്ന സംഘര്‍ഷത്തില്‍ നിരവധി പേര്‍ക്ക് പരിക്കേറ്റിരുന്നു. പാതയോരത്തു കൂടി കാല്‍നടയായി എത്തിയ സ്ത്രീകളും കുട്ടികളുമടക്കമുളളവര്‍ ഓടി രക്ഷപ്പെടുകയായിരുന്നു. ഇരുചക്രവാഹനയാത്രക്കാര്‍ പലരും അക്രമിസംഘത്തില്‍നിന്ന് അത്ഭുതകരമായാണ് രക്ഷപ്പെട്ടത്. നിരവധി ക്രിമിനല്‍ കേസുകളില്‍ പ്രതിയായവര്‍ വരെ സംഘത്തിലുണ്ടായിരുന്നു. എന്നാല്‍, സംഭവമറിഞ്ഞ് ഒരു പോലീസുകാരന്‍പോലും തിരിഞ്ഞുനോക്കാതിരുന്നതാണ് വ്യാപാരികളിലും നാട്ടുകാരിലും പോലീസിനെതിരേ പ്രതിഷേധിക്കാനിടയാക്കിയിരിക്കുന്നത്. സംഭവം കഴിഞ്ഞു പോലും സംഭവസ്ഥലം സന്ദര്‍ശിക്കാനോ വിവരം എന്താണന്ന് അന്വേഷിക്കാനോ പോലീസ് തയാറായില്ല. സംഭവം നടക്കുമ്പോള്‍ ഉത്തരവാദിത്വപ്പെട്ട പോലീസ് ഉദ്യാഗസ്ഥരെ പലരും വിളിച്ചെങ്കിലും മൊബൈല്‍ഫോണ്‍ സ്വിച്ച്ഓഫായ നിലയിലായിരുന്നു. സംഭവത്തിനുശേഷം രാത്രി കഞ്ചാവ് മാഫിയയ്ക്കെതിരെ പ്രതിഷേധവുമായി ഡിവൈഎഫ്ഐ രംഗത്തു വന്നു. ഡിവൈഎഫ്ഐയുടെ പരാതിയുടെ അടിസ്ഥാനത്തിൽ അഞ്ചു പേർക്കെതിരേ പോലീസ് കേസെടുത്തു. ടൗണിലും സമീപ മേഖലയിലും കഴിഞ്ഞ കുറെ നാളുകളായി അക്രമങ്ങളും മോഷണവും വർധിക്കുകയാണ്. കഴിഞ്ഞ ദിവസം രാത്രിയിൽ മുണ്ടക്കയത്ത് മൂന്ന് വ്യാപാരസ്ഥാപനങ്ങളിൽ മോഷണം നടന്നിരുന്നു. മുണ്ടക്കയം ടൗണിനോട് ചേർന്നുള്ള സിഡിഎസ് അനുബന്ധ സ്ഥാപനത്തിൽ നടന്ന മോഷണത്തിൽ ഒരു ലക്ഷത്തോളം രൂപ നഷ്ടമായെന്ന് പഞ്ചായത്ത് സെക്രട്ടറി പറഞ്ഞിരുന്നു. സംഭവത്തിലും തുടർനടപടികൾ ഒന്നും ആയിട്ടില്ല.

രാമപുരം പഞ്ചായത്ത് ലൈഫ് ഭവന ‌പദ്ധതി പൂര്‍ത്തീകരണ പ്രഖ്യാപനത്തിലേക്ക്

രാമപുരം: ലൈഫ് ട്വന്‍റി-ട്വന്‍റി ഭവനപദ്ധതിയുടെ പൂര്‍ത്തീകരണ പ്രഖ്യാപനത്തിനു രാമപുരം പഞ്ചായത്ത് സജ്ജമായി. ലിസ്റ്റില്‍ ഉള്‍പ്പെട്ടിട്ടുള്ള ഭൂമിയുള്ള എല്ലാവര്‍ക്കും ഭവനം നല്‍കുക വഴി പദ്ധതി പൂര്‍ത്തീകരണത്തിന് പഞ്ചായത്ത് തലത്തില്‍ തയാറെടുപ്പുകള്‍ തുടങ്ങി. 286 പേരുടെ ലിസ്റ്റില്‍നിന്ന് അര്‍ഹരായ എല്ലാവര്‍ക്കും ഭവനം അനുവദിച്ചു കൊണ്ടാണ് ലൈഫ് ട്വന്‍റി-ട്വന്‍റി പൂര്‍ത്തീകരണ പ്രഖ്യാപനത്തിനു പഞ്ചായത്ത് സജ്ജമായത്. ജില്ലയില്‍ ലൈഫ് ട്വന്‍റി-ട്വന്‍റി വഴി ഭവനം ഏറ്റവും കൂടുതല്‍ അനുവദിച്ചിട്ടുള്ളതില്‍ രണ്ടാം സ്ഥാനത്താണ് രാമപുരം പഞ്ചായത്ത്. പദ്ധതി വഴി മാത്രം 340 വീടുകളാണ് നാളിതുവരെ പഞ്ചായത്തിലെ ഭവനരഹിതര്‍ക്കായി അനുവദിച്ചിട്ടുള്ളത്. പ്രസിഡന്‍റ് ലിസമ്മ മത്തച്ചന്‍റെ നേതൃത്വത്തിലുള്ള ഭരണസമിതി നടത്തുന്ന കൃത്യമായ ഇടപെടലിന്‍റെ ഫലമായി ലഭ്യമായ ഫണ്ടുകളെല്ലാം വളരെ കാര്യക്ഷമമായി വിനിയോഗിച്ചതിന്‍റെ ഫലമായാണ് പദ്ധതി പൂര്‍ത്തീകരണത്തിന് ശരവേഗം സാധ്യമായത്. കോട്ടയം ജില്ലയിലെ ഏറ്റവും വിസ്തീര്‍ണമേറിയ പഞ്ചായത്തുകളില്‍ ഒന്നായിട്ടും കെട്ടിട നികുതി പിരിവിലും പദ്ധതി നിര്‍വഹണത്തിലും 92 ശതമാനത്തിൽ എത്താനായി എന്നത് ഭരണസമിതിക്ക് ലഭിച്ച മറ്റൊരു അംഗീകാരമാണ്. വരും വര്‍ഷത്തേക്ക് 14 കോടിയുടെ പദ്ധതികള്‍ക്ക് സാമ്പത്തിക വര്‍ഷത്തിന്‍റെ തുടക്കത്തില്‍ തന്നെ അംഗീകാരം വാങ്ങിയ രാമപുരം പഞ്ചായത്ത് മാലിന്യ സംസ്‌കരണവുമായി ബന്ധപ്പെട്ട് എംസിഎഫ്, ടേക്ക് എ ബ്രേക്ക് (പ്രീമിയം) എന്നിവയും പ്രവര്‍ത്തനസജ്ജമാക്കി നാടിനു സമര്‍പ്പിച്ചിരിക്കുകയാണ്. പദ്ധതി ആനുകൂല്യം അതിന്‍റെ യഥാര്‍ഥ അവകാശികളിലേക്കു സമയബന്ധിതമായി എത്തിക്കുക എന്ന വെല്ലുവിളി സന്തോഷത്തോടെ ഏറ്റെടുത്തുകൊണ്ട് രാമപുരത്തെ രാജപുരമാക്കി മാറ്റുന്ന തിരക്കിലാണ് രാമപുരത്തെ ജനപ്രതിനിധികള്‍.

അരുവിത്തുറ വല്യച്ചന്‍റെ തിരുസ്വരൂപം അൾത്താരയിൽ പുനഃപ്രതിഷ്ഠിച്ചു

അരുവിത്തുറ: പരസ്യവണക്കത്തിനായി അരുവിത്തുറ പള്ളിയുടെ മോണ്ടളത്തിൽ പ്രതിഷ്ഠിച്ച വല്യച്ചന്‍റെ തിരുസ്വരൂപം നൂറുകണക്കിനു വിശ്വാസികളുടെ സാന്നിധ്യത്തിൽ അൾത്താരയിൽ പുനഃപ്രതിഷ്ഠിച്ചു. വികാരി ഫാ. സെബാസ്റ്റ്യൻ വെട്ടുകല്ലേൽ, അസി. വികാരിമാരായ ഫാ. ഏബ്രഹാം കുഴിമുള്ളിൽ, ഫാ.ജോസഫ് ചെങ്ങഴശേരിൽ, ഫാ. ജോസഫ് കുഴിവേലിക്കടത്തിൽ, കോളജ് ബസാർ ഫാ. ബിജു കുന്നക്കാട്ട് എന്നിവർ തിരുസ്വരൂപ പുനഃപ്രതിഷ്ഠയ്ക്ക് കാർമികത്വം വഹിച്ചു. ഇന്നലെ വൈകുന്നേരം 4.30ന് കാഞ്ഞിരപ്പള്ളി ബിഷപ് മാർ ജോസ് പുളിക്കൻ വിശുദ്ധ കുർബാന അർപ്പിച്ച് സന്ദേശം നൽകി. കാലം ചെയ്ത പരിശുദ്ധ ഫ്രാൻസിസ് മാർപാപ്പയോടുള്ള ആദരസൂചകമായി വാദ്യമേളങ്ങളും നഗരപ്രദക്ഷിണവും ഒഴിവാക്കിയിരുന്നു. എട്ടാമിടമായ മേയ് ഒന്നിന് തിരുനാൾ സമാപിക്കും. അന്നേ ദിവസം രാവിലെ 5.30, 6.45, 8.00, 10.30, 12.00, 1.30, 2.45, 6.30 എന്നീ സമയങ്ങളിൽ വിശുദ്ധ കുർബാന, നൊവേന. വൈകുന്നേരം നാലിന് ഷംഷാബാദ് രൂപത സഹായ മെത്രാൻ മാർ ജോസഫ് കൊല്ലംപറമ്പിൽ വിശുദ്ധ കുർബാന അർപ്പിക്കും. തിരുനാളിനോടനുബന്ധിച്ച് വിശുദ്ധ ഗീവർഗീസ് സഹദായുടെ അനുഗ്രഹം തേടിയെത്തിയത് നാനാജാതി മതസ്ഥരുൾ പ്പെടെ ആയിരക്കണക്കിനു വിശ്വാസികളാണ്.

മണിമല ലിറ്റിൽ ഫ്ളവർ എൽപി സ്കൂൾ പഴമ നിലനിർത്തി പുതുക്കിപ്പണിയുന്നു

മണിമല: നിരവധി കുഞ്ഞുങ്ങൾക്ക് അക്ഷരവെളിച്ചം പകർന്ന മണിമല ലിറ്റിൽ ഫ്ളവർ എൽപി സ്കൂൾ പഴമ നിലനിർത്തി പുതുക്കിപ്പണിയുന്നു. 1950ൽ സ്ഥാപിതമായ സ്കൂൾ 75 വർഷം പിന്നിടുന്പോൾ ഇടവകാംഗങ്ങളുടെയും പൂർവവിദ്യാർഥികളുടെയും നാട്ടുകാരുടെയും സഹകരണത്തിലാണ് നവീകരിക്കുന്നത്. കരിങ്കൽ നിർമിതമായ ഭിത്തികൾ ഇപ്പോഴും ബലവത്തായതിനാൽ ഭിത്തികൾ നിലനിർത്തി പ്ലാസ്റ്ററിംഗ് ചെയ്യും. കൂടാതെ കുട്ടികൾക്ക് കൂടുതൽ ടോയ്‌ലറ്റ് സൗകര്യങ്ങളും ഉച്ചഭക്ഷണം പാകം ചെയ്യുന്നതിനുള്ള ക്രമീകരണങ്ങളും വിപുലമാക്കും. നിർമാണ പ്രവർത്തനങ്ങൾക്ക് 85 ലക്ഷം രൂപ ചെലവ് വരുമെന്നാണ് പ്രതീക്ഷിക്കുന്നത്. പുതിയ അധ്യയനവർഷത്തിന് മുന്പ് നവീകരണം പൂർത്തിയാക്കാനാണ് സ്കൂൾ മാനേജ്മെന്‍റ് ലക്ഷ്യമിടുന്നത്.

യൂത്ത്‌ കോണ്‍ഗ്രസ് ഐക്യദാര്‍ഢ്യ സദസ്

ചങ്ങനാശേരി: പഹല്‍ഗാം ഭീകരാക്രമണത്തില്‍ കൊല്ലപ്പെട്ടവര്‍ക്കും ദുരിതം അനുഭവിക്കുന്നവര്‍ക്കും പിന്തുണയര്‍പ്പിച്ചുകൊണ്ട് യൂത്ത് കോണ്‍ഗ്രസ് ചങ്ങനാശേരി നിയോജകമണ്ഡലം കമ്മിറ്റിയുടെ നേതൃത്വത്തില്‍ ഐക്യദാര്‍ഢ്യസദസ് മുന്‍സിപ്പല്‍ ജംഗ്ഷനില്‍ സംഘടിപ്പിച്ചു. കോണ്‍ഗ്രസ് ടൗണ്‍ ഈസ്റ്റ് മണ്ഡലം പ്രസിഡന്‍റ് സിയാദ് അബ്ദുല്‍ റഹ്‌മാന്‍ ഉദ്ഘാടനം ചെയ്തു. യൂത്ത് കോണ്‍ഗ്രസ് നിയോജകമണ്ഡലം പ്രസിഡന്‍റ് അഡ്വ. ഡെന്നീസ് ജോസഫ് അധ്യക്ഷത വഹിച്ചു. എബിന്‍ ആന്‍റണി, സുധി ജോസഫ്, റൗഫ് റഹീം, അശ്വിന്‍ ജിയോ ഏബ്രഹാം സായി സുരേഷ്, ഷാജി കരിമറ്റം, ലിനു ലിജു എന്നിവര്‍ പ്രസംഗിച്ചു.

മികവിന്‍റെ കേന്ദ്രം: സുപ്രധാന ചുവടുവയ്പ്പെന്ന് മന്ത്രി ബിന്ദു

അതിരമ്പുഴ: സംസ്ഥാനത്ത് ഉന്നത വിദ്യാഭ്യാസ മേഖലയില്‍ സര്‍ക്കാര്‍ ആരംഭിക്കുന്ന മികവിന്‍റെ കേന്ദ്രങ്ങള്‍ കാലോചിത മാറ്റങ്ങളുടെ വഴിയിലെ സുപ്രധാന ചുവടുവയ്പ്പാണെന്ന് മന്ത്രി ഡോ.ആര്‍. ബിന്ദു. എംജി സര്‍വകലാശാലയില്‍ സ്ഥാപിക്കുന്ന മികവിന്‍റെ കേന്ദ്രം -കേരള ഇന്‍സ്റ്റിറ്റ്യൂട്ട് ഓഫ് സയന്‍സ് ടെക്‌നോളജി ആന്‍ഡ് ഇന്നവേഷന്‍റെ- ഉദ്ഘാടനം നിര്‍വഹിക്കുകയായിരുന്നു മന്ത്രി. ഗവേഷണ ആശയങ്ങളെ ജനങ്ങള്‍ക്ക് ഉപകരിക്കുന്ന സംരംഭങ്ങളും ഉത്പന്നങ്ങളുമാക്കി മാറ്റാന്‍ ലക്ഷ്യമിടുന്ന സര്‍വകലാശാലയിലെ കേന്ദ്രത്തിന് ഏറെ സാധ്യതകളുണ്ട്. വിജ്ഞാനത്തെ അടിസ്ഥാനമാക്കി സമൂഹത്തിന്‍റെ ജീവിത നിലവാരവും നാടിന്‍റെ സാന്പത്തികാടിത്തറയും മെച്ചപ്പെടുത്തുക എന്ന കാഴ്ചപ്പാടോടെയാണ് ഇത്തരം കേന്ദ്രങ്ങള്‍ പ്രവര്‍ത്തിക്കുകയെന്നും മന്ത്രി പറഞ്ഞു. ഭാഭാ ആണവ ഗവേഷണ കേന്ദ്രം മഹാത്മാ ഗാന്ധി സര്‍വകലാശാലയില്‍ സ്ഥാപിക്കുന്ന അഡ്വാന്‍സ്ഡ് നോളജ് ആൻഡ് റൂറല്‍ ടെക്‌നോളജി ഇംപ്ലിമെന്‍റേഷന്‍ സെന്‍ററിന്‍റെ (അകൃതി) ഉദ്ഘാടനവും മന്ത്രി ബിന്ദു നിര്‍വഹിച്ചു. മന്ത്രി വി.എന്‍. വാസവന്‍ അധ്യക്ഷത വഹിച്ചു. സംസ്ഥാന ഉന്നത വിദ്യാഭ്യാസ കൗണ്‍സില്‍ മെംബര്‍ സെക്രട്ടറി ഡോ. രാജന്‍ വര്‍ഗീസ്, വൈസ് ചാന്‍സലര്‍ ഡോ. സി.ടി. അരവിന്ദകുമാര്‍, സിന്‍ഡിക്കറ്റ് അംഗങ്ങളായ അഡ്വ. റെജി സക്കറിയ, അഡ്വ.പി.ബി. സതീഷ് കുമാര്‍, ജില്ലാ പഞ്ചായത്തംഗം ഡോ. റോസമ്മ സോണി, അതിരമ്പുഴ പഞ്ചായത്ത് പ്രസിഡന്‍റ് ജോസ് അമ്പലക്കുളം, രജിസ്ട്രാര്‍ ഡോ. ബിസ്മി ഗോപാലകൃഷ്ണന്‍, ഡോ. ഇ.കെ. രാധാകൃഷ്ണന്‍ തുടങ്ങിയവര്‍ പങ്കെടുത്തു. കേന്ദ്ര ഗ്രാന്‍റ്: എംജിയെ അഭിനന്ദിച്ച് മന്ത്രി അതിരമ്പുഴ: കേന്ദ്ര ശാസ്ത്ര സാങ്കേതിക മന്ത്രാലയത്തിനു കീഴില്‍ പാര്‍ട്ണര്‍ഷിപ്പ് ഫോര്‍ ആക്‌സിലറേറ്റഡ് ഇന്നവേഷന്‍ ആന്‍ഡ് റിസര്‍ച്ച് (പെയര്‍) പരിപാടിയില്‍ ഗവേഷണ ഗ്രാന്‍റ് നേടിയ എംജി സര്‍വകലാശാലയ്ക്ക് മന്ത്രി ഡോ.ആര്‍. ബിന്ദുവിന്‍റെ അഭിനന്ദനം. സര്‍വകലാശാലയില്‍ മികവിന്‍റെ കേന്ദ്രം ഉദ്ഘാടനം ചെയ്യാനെത്തിയ മന്ത്രി വൈസ് ചാന്‍സലര്‍ ഡോ.സി.ടി. അരവിന്ദകുമാര്‍ ഉള്‍പ്പെടെയുള്ള ഗവേഷണ സംഘാംഗങ്ങള്‍ക്കൊപ്പം കേക്കുമുറിച്ച് സന്തോഷം പങ്കുവച്ചു. സിന്‍ഡിക്കറ്റ് അംഗങ്ങള്‍, സെനറ്റ് അംഗങ്ങള്‍, രജിസ്ട്രാര്‍ ഡോ. ബിസ്മി ഗോപാലകൃഷ്ണന്‍ തുടങ്ങിയവര്‍ സന്നിഹിതരായിരുന്നു. സര്‍വകലാശാല ഉള്‍പ്പെട്ട ബയോമെഡിക്കല്‍ ഗവേഷണ പദ്ധതിക്കു കേന്ദ്ര സര്‍ക്കാരിന്‍റെ നൂറു കോടി രൂപയുടെ ഗ്രാന്‍റാണ് അനുവദിച്ചത്. ഉന്നതവിദ്യാഭ്യാസ മേഖലയില്‍ മികവുറ്റ ഗവേഷണങ്ങള്‍ പ്രോത്സാഹിപ്പിക്കുന്നതിനായി പ്രധാനമന്ത്രി വിഭാവനം ചെയ്ത പദ്ധതിയില്‍ ശാസ്ത്ര സാങ്കേതിക മന്ത്രാലയത്തിന്‍റെ അനുസന്ധാന്‍ നാഷണല്‍ റിസര്‍ച്ച് ഫൗണ്ടേഷനാണ് ഗ്രാന്‍റ് നല്‍കുന്നത്.

ചങ്ങനാശേരി അതിരൂപത കോര്‍പറേറ്റ് മാനേജ്മെന്‍റ് അധ്യാപക കണ്‍വന്‍ഷനുകള്‍ക്ക് തുടക്കം

ചങ്ങനാശേരി: ചങ്ങനാശേരി അതിരൂപത കോര്‍പറേറ്റ് മാനേജ്മെന്‍റ് അധ്യാപക കണ്‍വന്‍ഷനുകള്‍ക്കു തുടക്കമാകുന്നു. 110 സ്‌കൂളുകളിലെ 2,000 അധ്യാപകര്‍ക്ക് ഏഴ് സോണുകളിലായാണു കണ്‍വന്‍ഷന്‍ സംഘടിപ്പിച്ചിരിക്കുന്നത്. ഈശോമിശിഹായുടെ മനുഷ്യാവതാര ജൂബിലിയുടെ പ്രധാന പ്രമേയമായ പ്രത്യാശയുടെ തീര്‍ഥാടകര്‍ എന്നത് സന്ദേശമായി സ്വീകരിക്കുന്ന കണ്‍വന്‍ഷനുകളില്‍ കാലത്തിന്‍റെ മാറ്റങ്ങള്‍ക്കൊത്ത് വിദ്യാഭ്യാസരംഗത്ത് നിര്‍ണായക ശക്തിയാകുന്നതിനുള്ള പരിശീലനങ്ങളും പ്രത്യാശയുടെ തീര്‍ഥാടകരായി മാറുവാന്‍ അധ്യാപകരെ പ്രചോദിപ്പിക്കുന്ന ക്ലാസുകളും വിദ്യാഭ്യാസ സംബന്ധമായ ചര്‍ച്ചകളും നടക്കും. വിദ്യാഭ്യാസ മേഖലയിലെ പ്രഗല‌്‌ഭര്‍ ക്ലാസുകള്‍ക്കും ചര്‍ച്ചകള്‍ക്കും നേതൃത്വം നല്‍കും. 25ന് എടത്വാ സോണില്‍ ആരംഭിച്ച് മേയ് 6നു ചമ്പക്കുളം സോണില്‍ അവസാനിക്കുന്ന ഏഴ് സോണല്‍ കണ്‍വന്‍ഷനുകളിലും ചങ്ങനാശേരി ആര്‍ച്ച്ബിഷപ് മാര്‍ തോമസ് തറയില്‍ സന്ദേശം നല്‍കും. അതിരൂപത വികാരി ജനറാള്‍മാര്‍ സന്നിഹിതരാകും. ചങ്ങനാശേരി അതിരൂപത കോര്‍പറേറ്റ് മാനേജ്മെന്‍റും ടീച്ചേഴ്‌സ് ഗില്‍ഡും സംയുക്തമായി സംഘടിപ്പിക്കുന്ന കണ്‍വന്‍ഷന്‍റെ മുന്നൊരുക്കങ്ങള്‍ പൂര്‍ത്തിയായതായി കോര്‍പറേറ്റ് മാനേജര്‍ റവ.ഡോ. ആന്‍റണി മൂലയില്‍, അസിസ്റ്റന്‍റ് മാനേജര്‍ റവ.ഡോ. ടോണി ചെത്തിപ്പുഴ, ടീച്ചേഴ്‌സ് ഗില്‍ഡ് പ്രസിഡന്‍റ് ഈശോ തോമസ്, ഗില്‍ഡ് ഭാരവാഹികള്‍എന്നിവര്‍ അറിയിച്ചു. അമൃതം ലഹരിവിരുദ്ധ പദ്ധതി ലഹരിക്കെതിരേ സ്‌കൂളുകള്‍ കേന്ദ്രീകരിച്ചുള്ള ശക്തമായ പോരാട്ടത്തിന് കണ്‍വന്‍ഷനില്‍ തുടക്കം കുറിക്കും. ലഹരിക്കെതിരേ ജീവന്‍റെ സംസ്‌കാരത്തിനായി വിദ്യാര്‍ഥികളെ അണിചേര്‍ത്ത്, സര്‍ക്കാരിന്‍റെ ലഹരിവിരുദ്ധ പരിപാടികളോടു ചേര്‍ന്ന് ചങ്ങനാശേരി അതിരൂപത കോര്‍പറേറ്റ് മാനേജ്‌മെന്‍റ് 110 വിദ്യാലയങ്ങളില്‍ 2025-26 അക്കാദമിക വര്‍ഷത്തില്‍ അമൃതം എന്ന പേരിലാണ് ലഹരിവിരുദ്ധ കാമ്പയിന്‍ സംഘടിപ്പിക്കുന്നത്. കുട്ടികള്‍ക്കു വിവിധ ബോധവത്കരണ പ്രവര്‍ത്തനങ്ങള്‍, കൗണ്‍സലിംഗ്, പിടിഎയോട് ചേര്‍ന്ന് ലഹരിവിരുദ്ധ മുന്നേറ്റങ്ങള്‍, ജാഗ്രതാ സെല്ലുകള്‍ തുടങ്ങിയവ അമൃതം പദ്ധതിയില്‍ ഉണ്ടായിരിക്കുമെന്ന് കോര്‍പറേറ്റ് മാനേജര്‍ ഫാ. ആന്‍റണി മൂലയില്‍ അറിയിച്ചു.

ചങ്ങനാശേരിയിൽ നാളെ വ്യാപാര സ്ഥാപനങ്ങള്‍ക്ക് അവധി

ചങ്ങനാശേരി: ആഗോള കത്തോലിക്കാ സഭയുടെ പരമാധ്യക്ഷനും കാരുണ്യത്തിന്‍റെയും സ്‌നേഹത്തിന്‍റെയും സൗഹാര്‍ദത്തിന്‍റെയും പ്രതീകവുമായ ഫ്രാന്‍സിസ് മാര്‍പാപ്പയുടെ വിയോഗത്തില്‍ ചങ്ങനാശേരി മര്‍ച്ചന്‍റ്സ് അസോസിയേഷന്‍ ആദരാഞ്ജലികളര്‍പ്പിച്ചു. വ്യാപാരഭവനില്‍ നടന്ന അനുശോചന യോഗത്തില്‍ പ്രസിഡന്‍റ് ജോണ്‍സണ്‍ ജോസഫ് അധ്യക്ഷത വഹിച്ചു. സണ്ണി ജോസഫ് നെടിയകാലാപറമ്പില്‍, ഡെന്നി ജോണ്‍ മാറാട്ടുകളം, റൗഫ് റഹിം, കുട്ടപ്പായി കരിങ്ങട, ഇ.കെ. കുര്യന്‍, ജോബ് മാത്യു കൊല്ലമന, സാംസണ്‍ വലിയപറമ്പില്‍, സതീഷ് വലിയവീടന്‍, ബിജു ആന്‍റണി കയ്യാലപറമ്പില്‍ എന്നിവര്‍ പ്രസംഗിച്ചു. പാപ്പായോടുള്ള ആദരസൂചകമായി നാളെ ചങ്ങനാശേരിയിലെ വ്യാപാര സ്ഥാപനങ്ങള്‍ തുറുന്നു പ്രവര്‍ത്തിക്കില്ലെന്ന് ഭാരവാഹികള്‍ അറിയിച്ചു.

സര്‍ഗക്ഷേത്രയില്‍ കുട്ടികള്‍ക്ക് അവധിക്കാല പരിശീലനക്കളരി

ചങ്ങനാശേരി: ചെത്തിപ്പുഴ സര്‍ഗക്ഷേത്രയില്‍ കുട്ടികള്‍ക്കായി സമ്മര്‍ ഇന്‍ സര്‍ഗക്ഷേത്ര എന്ന അവധിക്കാല പരിശീലനക്കളരി ആരംഭിച്ചു. ഒരു മാസം നീണ്ടുനില്‍ക്കുന്ന ഈ പ്രോഗ്രാമിന്‍റെ ഉദ്ഘാടനം കുട്ടികളില്‍നിന്നു തെരഞ്ഞെടുത്ത മാസ്റ്റര്‍ സെബാസ്റ്റ്യന്‍ കുര്യന്‍ നിര്‍വഹിച്ചു. സര്‍ഗക്ഷേത്ര ഡയറക്ടര്‍ ഫാ. അലക്‌സ് പ്രായിക്കളം സിഎംഐ അധ്യക്ഷത വഹിച്ചു. രക്ഷിതാക്കള്‍ക്കും കുട്ടികള്‍ക്കുമായുള്ള സെമിനാര്‍ സിജോ പി. ജേക്കബ് നയിച്ചു. സര്‍ഗക്ഷേത്ര സെക്രട്ടറി വര്‍ഗീസ് ആന്‍റണി പ്രസംഗിച്ചു. തിങ്കള്‍ മുതല്‍ വെള്ളി വരെ കുട്ടികള്‍ക്ക് ആവശ്യമായ എല്ലാവിധ ക്ലാസുകളും സര്‍ഗക്ഷേത്രയില്‍ സജ്ജീകരിച്ചിരിക്കുന്നു. മ്യൂസിക്കല്‍ ഇന്‍സ്ട്രമെന്‍റ്സ്, കരാട്ടെ, യോഗ, സുംബ, വെസ്റ്റേണ്‍ ആൻഡ് ക്ലാസിക്കല്‍ ഡാന്‍സ്, ഡ്രോയിംഗ് ആൻഡ് കളറിംഗ് എന്നിങ്ങനെ നിരവധി വിഷയങ്ങളിൽ വിദഗ്ധരുടെ നേതൃത്വത്തില്‍ പരിശീലനം നല്‍കും. കൂടാതെ പ്രസംഗ പരിശീലനം, അബാക്കസ്, ഹാന്‍ഡ് റൈറ്റിംഗ്, ഫൊണറ്റിക്‌സ്, ജര്‍മന്‍ ഫോര്‍ കിഡ്‌സ്, സ്‌പോക്കണ്‍ ഇംഗ്ലീഷ് എന്നിവയുടെ സ്‌പെഷല്‍ പാക്കേജ് എന്നിവയും ആരംഭിച്ചു. കൂടുതല്‍വിവരങ്ങള്‍ക്ക് ഫോണ്‍: 8304926481.

ഫിയാത്ത് മിഷന്‍: ആറാമത് രാജ്യാന്തര കോണ്‍ഗ്രസ് ചെത്തിപ്പുഴയില്‍ 28 മുതല്‍

ചങ്ങനാശേരി: ഫിയാത്ത് മിഷന്‍ സംഘടിപ്പിക്കുന്ന ആറാമത് ഗ്രേറ്റ് ഗാതറിംഗ് ഓഫ് മെഷീന്‍ (ജിജിഎ) രാജ്യാന്തര കോണ്‍ഗ്രസ് 28 മുതല്‍ മേയ് നാലുവരെ ചെത്തിപ്പുഴ തിരുഹൃദയ പള്ളി, ക്രിസ്ത്യുജ്യോതി കാമ്പസ്, മീഡിയ വില്ലേജ്, കാര്‍മല്‍ മൗണ്ട് ധ്യാനകേന്ദ്രം എന്നിവിടങ്ങളിലായി നടത്തും. ധ്യാനം, ഫിയാത്ത് മിഷനെ പരിചയപ്പെടുത്തുന്ന എക്‌സിബിഷനുകള്‍, ബൈബിള്‍ എക്‌സ്‌പോ, രാജ്യാന്തര ചലച്ചിത്രമേള, ക്രിസ്തീയ സംഗീതനിശ, വിശ്വാസ പരിശീലക സംഗമം എന്നിവ രാജ്യാന്തര കോണ്‍ഗ്രസിന്‍റെ ഭാഗമായി നടത്തും. മേജര്‍ ആര്‍ച്ച്ബിഷപ് മാര്‍ റാഫേല്‍ തട്ടില്‍, മേജര്‍ ആര്‍ച്ച്ബിഷപ് കര്‍ദിനാള്‍ മാര്‍ ബസേലിയോസ് ക്ലീമിസ് കാതോലിക്കാ ബാവ, വിവിധ അതിരൂപത അധ്യക്ഷന്‍മാര്‍ എന്നിവര്‍ പങ്കെടുക്കും. രാജ്യാന്തര തലത്തില്‍ പ്രവര്‍ത്തനങ്ങള്‍ നടത്തുന്ന വിവിധ മിഷന്‍ രൂപതകളെ പരിചയപ്പെടുത്തുന്ന സ്റ്റാളുകളും പരിപാടിയുടെ പ്രത്യേകതയാണ്. മിഷന്‍ രൂപതകളെ പ്രതിനിധീകരിച്ച് പ്രതിനിധികളും പങ്കെടുക്കും. ദിവസവും രാവിലെ ഒമ്പതിന് വിശുദ്ധകുര്‍ബാന, 24 മണിക്കൂറും ദിവ്യകാരുണ്യ ആരാധന, രാവിലെ 10 മുതല്‍ രാത്രി ഏഴുവരെ മിഷന്‍ എക്‌സിബിഷന്‍, 7.30ന് ക്രിസ്തീയ സംഗീതനിശ, കാര്‍ലോ ദിവ്യകാരുണ്യ എക്‌സിബിഷന്‍, കാര്‍ലോ ക്വിസ് എന്നീ പരിപാടികള്‍ നടത്തും. പ്രവേശനവും ഭക്ഷണവും സൗജന്യമാണ്. പരിപാടിക്കുള്ള ഒരുക്കങ്ങള്‍ പൂര്‍ത്തിയായതായി ചങ്ങനാശേരി അതിരൂപത വികാരി ജനറല്‍ മോണ്‍. മാത്യു ചങ്ങങ്കരി, ഫാ. തോമസ് കല്ലുകളം, ജനറല്‍ കണ്‍വീനര്‍മാരായ ജോണിക്കുട്ടി സ്‌കറിയ, ബിജു പാണ്ടിശേരി, ജോസ് ഓലിക്കല്‍ എന്നിവര്‍ പറഞ്ഞു.

കെഎസ്ആര്‍ടിസി ബസ്‌ സ്റ്റാന്‍ഡ് നിര്‍മാണത്തിനിടെ പഴയ കിണര്‍ കണ്ടെത്തി

ചങ്ങനാശേരി: കെഎസ്ആര്‍ടിസി ബസ്‌സ്റ്റാന്‍ഡിലെ നിര്‍മാണ പ്രവര്‍ത്തനങ്ങള്‍ക്കിടയില്‍ പഴയ കിണര്‍ കണ്ടെത്തി. ഇന്നലെ രാവിലെ സ്റ്റാന്‍ഡിന്‍റെ പാര്‍ക്കിംഗ് ഗ്രൗണ്ടിലെ കോണ്‍ക്രീറ്റ് ജെസിബി ഉപയോഗിച്ച് പൊളിച്ചു മാറ്റുന്നതിനിടെയാണ് ജോലിക്കാര്‍ കിണര്‍ കണ്ടത്. തുടര്‍ന്ന് നിര്‍മാണ പ്രവര്‍ത്തനങ്ങള്‍ നിര്‍ത്തിവച്ചു പരിശോധന നടത്തി. സ്വകാര്യ വ്യക്തികളുടെ പക്കല്‍നിന്നു സ്ഥലം വാങ്ങിയാണ് ഇവിടെ സ്റ്റാന്‍ഡ് നിര്‍മിച്ചത്. മുന്പ് ഇവിടെ താമസിച്ചിരുന്ന വീട്ടുകാരുടെ കിണറാണെന്നാണ് സൂചന ലഭിക്കുന്നത്. കിണര്‍ അതേപടി സംരക്ഷിച്ച നിലയില്‍ കണ്ടെത്തി. സുരക്ഷ കണക്കിലെടുത്ത് കിണര്‍ മണ്ണിട്ടുമൂടി നിര്‍മാണ പ്രവര്‍ത്തനം തുടരുമെന്ന് നിര്‍മാണ കരാറുകാരായ ഊരാളുങ്കല്‍ ലേബര്‍ കോണ്‍ട്രാക്ട് സൊസൈറ്റി അധികൃതര്‍ പറഞ്ഞു. കോണ്‍ക്രീറ്റിനടിയില്‍ കിണര്‍ കണ്ടെത്തിയത് കാഴ്ചക്കാരില്‍ കൗതുകമുണത്തി.

കാര്‍ഷികമേഖലയ്ക്ക് പുത്തന്‍ ഉണര്‍വുമായി ലൈവിലിഹുഡ് സര്‍വീസ് സെന്‍റർ

കുറുപ്പന്തറ: മാഞ്ഞൂര്‍ പഞ്ചായത്ത് സിഡിഎസിന്‍റെ കാര്‍ഷികമേഖലയില്‍ പദ്ധതിയുടെ ഭാഗമായി ലൈവിലിഹുഡ് സര്‍വീസ് സെന്‍ററിന്‍റെ പ്രവര്‍ത്തനമാരംഭിച്ചു. മോന്‍സ് ജോസഫ് എംഎല്‍എ ഉദ്ഘാടനം നിര്‍വഹിച്ചു. മാഞ്ഞൂര്‍ പഞ്ചായത്ത് പ്രസിഡന്‍റ് കോമളവല്ലി രവീന്ദ്രന്‍ അധ്യക്ഷത വഹിച്ചു. കുടുംബശ്രീ ജില്ലാ മിഷന്‍ ഡിപിഎം ശ്രുതി പദ്ധതി വിശദീകരണം നടത്തി. ഡിപിഎം പ്രശാന്ത് ശിവന്‍, എഫ്എല്‍ബിസി ബ്ലോക്ക് കോ-ഓര്‍ഡിനേറ്റര്‍ ബിനിത സെബാസ്റ്റ്യന്‍, പഞ്ചായത്ത് വൈസ് പ്രസിഡന്‍റ് ബിജു സെബാസ്റ്റ്യന്‍, അംഗങ്ങളായ സാലമ്മ ജോളി, ജെയ്‌നി തോമസ്, ചാക്കോ മത്തായി, ലിസി ജോസ്, സുനു ജോര്‍ജ്, ബിനോ സക്കറിയാസ് എന്നിവര്‍ പ്രസംഗിച്ചു.

പഹല്‍ഗാം: ആദരാഞ്ജലി അര്‍പ്പിച്ചു

കടുത്തുരുത്തി; കാഷ്മീരിലെ പഹല്‍ഗാമില്‍ നടന്ന ഭീകരാക്രമണത്തില്‍ മരണമടഞ്ഞവര്‍ക്ക് കടുത്തുരുത്തിയില്‍ ആദരാഞ്ജലിയും ഭീകരവിരുദ്ധ പ്രതിജ്ഞയും നടത്തി. കോണ്‍ഗ്രസ് കടുത്തുരുത്തി ബ്ലോക്ക് കമ്മിറ്റിയുടെ നേതൃത്വത്തില്‍ നടന്ന പരിപാടിയില്‍ ബ്ലോക്ക് കോണ്‍ഗ്രസ് പ്രസിഡന്‍റ് ജയിംസ് പുല്ലാപ്പള്ളി അധ്യക്ഷത വഹിച്ചു. ഡിസിസി സെക്രട്ടറി എം.എന്‍. ദിവാകരന്‍ നായര്‍ ഉദ്ഘാടനം ചെയ്തു. ടോമി പ്രാലടിയില്‍, ബേബി തൊണ്ടംകുഴി, സി.കെ. ശശി, മധു എബ്രഹാം, എം.കെ. ഇന്ദുചൂഡന്‍, ബാബു തുമ്പുങ്കല്‍, നോബി മുണ്ടക്കല്‍, ടോമി നിരപ്പേല്‍, കുര്യാക്കോസ് വടക്കേഓലിത്തടം എന്നിവര്‍ പ്രസംഗിച്ചു. കടുത്തുരുത്തി: ബിജെപി കാണക്കാരി പഞ്ചായത്ത് കമ്മിറ്റിയുടെ നേതൃത്വത്തില്‍ കാണക്കാരി വലിയകവലയില്‍ പഹല്‍ഗാം ഭീകരാക്രമണത്തില്‍ മരണമടഞ്ഞവര്‍ക്ക് ആദരാഞ്ജലി അര്‍പിച്ചു. കാണക്കാരി പഞ്ചായത്ത് പ്രസിഡന്‍റ് രാഗേഷ് പുറമറ്റത്തില്‍ അധ്യക്ഷത വഹിച്ച യോഗത്തില്‍ മണ്ഡലം പ്രസിഡന്‍റ് അശ്വന്ത് മാമലശേരി, മണ്ഡലം ജനറല്‍ സെക്രട്ടറി കലാ വിശ്വംഭരന്‍, പി.പി. രാജേഷ്, അജയകുമാര്‍, മണ്ഡലം സെക്രട്ടറി ഹനീഷ്, പഞ്ചായത്ത് ജനറല്‍ സെക്രട്ടറി ജിഷി തുടങ്ങിയവര്‍ നേതൃത്വം നല്‍കി. വൈക്കം: പഹൽഗാം ഭീകര ആക്രമണത്തിൽ കൊല്ലപ്പെട്ടവർക്ക് ബിജെപി വൈക്കം മണ്ഡലം കമ്മിറ്റിയുടെ ആഭിമുഖ്യത്തിൽ ഗാന്ധി പ്രതിമയ്ക്കു മുന്നിൽ നടന്ന യോഗത്തിൽ കേന്ദ്രമന്ത്രി ജോർജ് കുര്യൻ ആദരാഞ്ജലി അർപ്പിച്ച് ദീപം തെളിച്ചു. മണ്ഡലം പ്രസിഡന്‍റ് എം.കെ. മഹേഷ്, ബിജെപി ജില്ലാ ഭാരവാഹികളായ ലിജിൻലാൽ, രൂപേഷ് മേനോൻ, പി.ആർ. സുഭാഷ്, ലേഖ അശോകൻ തുടങ്ങിയവർ സംബന്ധിച്ചു. ടിവിപുരം: ടിവി പുരം മണ്ഡലം കോൺഗ്രസ്‌ കമ്മിറ്റിയുടെ നേതൃത്വത്തിൽ കാഷ്മീർ പഹൽഗാമിൽ ഭികരാക്രമണത്തിൽ കൊല്ലപ്പെട്ടവർക്ക് പ്രണാമം അർപ്പിച്ചു. ടിവി പുരം മൂത്തേടുത്ത്കാവ് ജംഗ്ഷനിൽ നടന്ന അനുസ്മരണ യോഗത്തിൽ പാർട്ടി പ്രവർത്തകർ മെഴുകുതിരി തെളിച്ച് ദീപാഞ്ജലി സമർപ്പിച്ചു. മണ്ഡലം പ്രസിഡന്‍റ് ടി.എസ്. സെബാസ്റ്റ്യൻ അധ്യക്ഷത വഹിച്ചു. കോൺഗ്രസ്‌ ബ്ലോക്ക്‌ പ്രസിഡന്‍റ് പി.ഡി. ഉണ്ണി, അഡ്വ. എ. സനീഷ്കുമാർ,പി.ആർ. രത്നപ്പൻ, അഡ്വ.പി.എ. സുധീരൻ, അഡ്വ. എസ്. സാനു, ശ്രീരാജ് ഇരുമ്പേപ്പള്ളിൽ, തുടങ്ങിയവർ സംബന്ധിച്ചു.

ക്ലോത്ത് ബാഗ് ചലഞ്ച്

ഇലഞ്ഞി: സെന്‍റ് ഫിലോമിനാസ് പബ്ലിക് സ്‌കൂളിലെ കുട്ടികള്‍ ക്ലോത്ത് ബാഗുകള്‍ നിര്‍മിച്ച് പ്ലാസ്റ്റിക്കിന്‍റെ ഉപയോഗത്തിനെതിരേ ബോധവത്കരണം ആരംഭിച്ചു. കാമ്പസ് പ്ലാസ്റ്റിക് മുക്തമായി പ്രഖ്യാപിച്ചതിനു പിന്നാലെ പ്ലാസ്റ്റിക് ബാഗുകള്‍ക്കു പകരം തുണിസഞ്ചികളിലാണ് പുസ്തകങ്ങള്‍ വിതരണം ചെയ്യുന്നത്. പ്ലാസ്റ്റിക്കിനായും ജൈവ വസ്തുക്കള്‍ക്കായും സ്‌കൂളില്‍ പ്രധാന സ്ഥലങ്ങളിലെല്ലാം ബിന്നുകള്‍ സ്ഥാപിച്ച് ബോധവത്കരണം നടത്തി. ഉപയോഗശൂന്യമായ വസ്തുക്കള്‍ തരംതിരിച്ച് വീട്ടിലും സ്‌കൂളിലും ശേഖരിക്കാന്‍ നിര്‍ദേശം നല്‍കി. പരിപാടികളുടെ ഉദ്ഘാടനം ജോജു ജോസഫിന്‍റെ അധ്യക്ഷതയില്‍ ചേര്‍ന്ന യോഗത്തില്‍ റവ.ഡോ. ജോണ്‍ എര്‍ണ്യാകുളത്തില്‍ നിര്‍വഹിച്ചു.

കീഴൂര്‍ ഭഗവതി ക്ഷേത്രത്തില്‍ ചെറിയപാന

കടുത്തുരുത്തി: കീഴൂര്‍ ഭഗവതി ക്ഷേത്രത്തില്‍ ചെറിയപാന നടന്നു. ഇന്നുച്ചയ്ക്ക് കീഴൂരില്‍ വലിയപാന നടക്കും. ദേവി ദാരികാ നിഗ്രഹത്തിന് പടയാളികളോടൊപ്പം പുറപ്പെടുകയും കര്‍മനിര്‍വഹണം പൂര്‍ത്തിയാക്കുകയും ചെയ്യുന്നതിന്‍റെ അനുസ്മരണമാണ് വലിയപാന. ദാരികനെ തേടിപ്പോകുന്ന സങ്കല്‍പപ്രകാരം പാനക്കാരുടെ (പടയാളികള്‍) ഉടുത്തുകെട്ട് വെള്ളനിറത്തിലുള്ളത് കീഴൂരിന്‍റെ മാത്രം പ്രത്യേകതയാണ്. ക്ഷേത്രത്തിനടുത്തുള്ള പാനക്കണ്ടത്തിലാണ് പാന തുള്ളല്‍ നടക്കുന്നത്. പാനക്കുറ്റിയും പിടിച്ചാണ് പാനക്കാര്‍ ദാരികനെ തേടിപ്പോകുന്നത്. പത്താമുദയം നാളില്‍ രാത്രി ഭദ്രകാളിയമ്പലത്തില്‍ നടന്ന അരിയേറോടുകൂടിയാണ് പാനചടങ്ങുകള്‍ തുടങ്ങിയത്. ഇന്നലെ ഉച്ചയ്ക്ക് പാനക്കഞ്ഞി കുടിച്ചശേഷമാണ് പടയാളികള്‍ ചെറിയപാനയ്ക്ക് പുറപ്പെട്ടത്. പാനപ്പുരയില്‍ നടന്ന ചടങ്ങില്‍ പാനയാചാര്യന്‍ കാരിക്കുന്നത്ത് ഇല്ലം കെ.ഡി. പത്മനാഭന്‍ നമ്പൂതിരിയുടെ കാര്‍മികത്വത്തില്‍ പാനക്കാരുടെ ആയുധമായ പാനക്കുറ്റി പൂജിച്ചു നല്‍കിയതോടെയാണ് ചെറിയപാന ആരംഭിച്ചത്. ക്ഷേത്രത്തെ വലംവച്ചശേഷമാണ് പാനക്കാര്‍ പാനതുള്ളാന്‍ പാനക്കണ്ടത്തിലേക്കു പോയത്. വൈകൂന്നേരം നടന്ന ഇളംപാനയോടെ ചെറിയപാനയുടെ ചടങ്ങുകള്‍ അവസാനിച്ചു. ഇന്നു രാവിലെ 6.30 മുതല്‍ വിവിധ കരകളില്‍നിന്ന് കുംഭകുടം, താലപ്പൊലി ഘോഷയാത്രകള്‍ ക്ഷേത്രത്തില്‍ എത്തിച്ചേരും. 12ന് ഉച്ചപൂജയ്ക്കുശേഷം വലിയപാന കഞ്ഞി വിളമ്പും. 12.30 മുതല്‍ വലിയപാന തുടങ്ങും. വൈകൂന്നേരം 4.30 ന് ഇളംപാനയും തുടര്‍ന്ന് ഒറ്റത്തൂക്കവും രാത്രി ഏഴിന് കൈകൊട്ടിക്കളി, എട്ടിന് തിരുവാതിര, 12ന് ഗരുഡന്‍തൂക്കവും ഉണ്ടാകും. നാളെ രാവിലെ 11ന് നടക്കുന്ന കുരുതിയോടെയാണ് പാനയുടെ ചടങ്ങുകള്‍ സമാപിക്കുന്നത്.

വേമ്പനാട്ടുകായൽ പ്രശ്നങ്ങളും പരിഹാരങ്ങളും: സെമിനാർ നാളെ

വൈക്കം: വൈക്കം മാനേജ്മെന്‍റ് അസോസിയേഷൻ, വൈക്കം ബ്ലോക്ക് പഞ്ചായത്ത് എന്നിവയുടെ സംയുക്താഭിമുഖ്യത്തിൽ വേമ്പനാട്ടുകായൽ പ്രശ്നങ്ങളും പരിഹാരങ്ങളും എന്ന വിഷയത്തിൽ നാളെ ഏകദിന സെമിനാർ നടത്തും. വൈക്കം ബ്ലോക്ക് പഞ്ചായത്ത് ഹാളിൽ രാവിലെ 10ന് നടക്കുന്ന സെമിനാർ ബ്ലോക്ക് പഞ്ചായത്ത് പ്രസിഡന്‍റ് എസ്. ബിജു ഉദ്ഘാടനം ചെയ്യും. വിഎംഎ പ്രസിഡന്‍റ് എ. സൈഫുദ്ദിൻ അധ്യക്ഷത വഹിക്കും. ഡോ.കെ.ജി. പത്മകുമാർ മുഖ്യപ്രഭാഷണം നടത്തും. മുൻ ജലസേചന വകുപ്പ് എൻജിനിയർ കെ.എ. മുഹമ്മദ് കുഞ്ഞ്, ഡോ. എം.എസ്. ഷൈലജകുമാരി, ഡോ.വി.എൻ. സഞ്ജീവൻ, കെ.കെ. രമേശൻ തുടങ്ങിയവർ വിവിധ വിഷയങ്ങളിൽ പ്രബന്ധാവതരണം നടത്തും. പരിസ്ഥിതി ശാസ്ത്രജ്ഞൻ ഡോ. മധു മോഡറേറ്ററാകും. സമാപന സമ്മേളനത്തിൽ മികച്ച പ്രവർത്തനങ്ങൾ കാഴ്ചവച്ച തദ്ദേശ സ്ഥാപനങ്ങൾക്കും കാർഷിക-മത്സ്യ- സംരംഭക മേഖലകളിലെ വ്യക്തികൾക്കുള്ള വിഎംഎ പുരസ്കാരം ആലപ്പുഴ ജില്ലാ കളക്‌ടർ അലക്‌സ് വർഗീസ് സമാപന സമ്മേളനത്തിൽ വിതരണം ചെയ്യും. പരിപാടി വിശദീകരിച്ച വാർത്താ സമ്മേളനത്തിൽ വിഎംഎ സെക്രട്ടറി ജനറൽ അഡ്വ.പി. വേണു, പി.രാജേന്ദ്രപ്രസാദ്, ഡോ.എൻ.കെ. ശശിധരൻ, എം.എൻ. പ്രസാദ്, എം. രാജു എന്നിവർ പങ്കെടുത്തു.

മാന്‍വെട്ടം സെന്‍റ് ജോര്‍ജ് പള്ളിയില്‍ വിശുദ്ധ ഗീവര്‍ഗീസ് സഹദായുടെ തിരുനാൾ

കടുത്തുരുത്തി: മാന്‍വെട്ടം സെന്‍റ് ജോര്‍ജ് പള്ളിയില്‍ വിശുദ്ധ ഗീവര്‍ഗീസ് സഹദായുടെ തിരുനാളിന് കൊടിയേറി. 27ന് പ്രധാന തിരുനാള്‍ ആഘോഷിക്കും. കൊടിയേറ്റിന് രൂപത വികാരി ജനറാൾ മോണ്‍. ജോസഫ് കണിയോടിക്കല്‍ മുഖ്യകാര്‍മികത്വം വഹിച്ചു. വികാരി റവ.ഡോ. തോമസ് കക്കാട്ടുതടത്തില്‍ സഹകാര്‍മികത്വം വഹിച്ചു. ഇന്നു രാവിലെ ആറിനും ഏഴിനും വിശുദ്ധ കുര്‍ബാന, വൈകുന്നേരം അഞ്ചിന് വിശുദ്ധ കുര്‍ബാന, സന്ദേശം - റവ.ഡോ. സൈറസ് വേലംപറമ്പില്‍, 6.30 ന് മെഴുകുതിരി ജപമാല പ്രദക്ഷിണം, ഏഴിന് സമാപനാസീര്‍വാദം. നാളെ രാവിലെ ആറിനും ഏഴിനും വിശുദ്ധ കുര്‍ബാന, തുടര്‍ന്ന് ജോര്‍ജ് നാമധാരികളുടെ സംഗമം. അഞ്ചിന് തിരുസ്വരൂപങ്ങള്‍ പരസ്യവണക്കത്തിനായി മോണ്ടളത്തില്‍ പ്രതിഷ്ഠിക്കും. തുടര്‍ന്ന് പാട്ടുകുര്‍ബാന, സന്ദേശം - മോണ്‍. ജോസഫ് തടത്തില്‍, 6.30 ന് പ്രദക്ഷിണം, 8.30ന് സന്ദേശം - ഫാ. ജോണ്‍സണ്‍ നീലനിരപ്പേല്‍, 9.15ന് ആശീര്‍വാദം. പ്രധാന തിരുനാള്‍ദിനമായ ഞായറാഴ്ച രാവിലെ ആറിനും 7.15 നും വിശുദ്ധ കുര്‍ബാന, 9.30 ന് തിരുനാല്‍ റാസ - ഫാ. അരുണ്‍ തെരുവില്‍ മുഖ്യകാര്‍മികത്വം വഹിക്കും. പത്തിന് തിരുനാള്‍ പ്രസംഗം - റവ ഡോ. ജോര്‍ജ് ഞാറക്കുന്നേല്‍, 11.30 ന് പ്രദക്ഷിണം, തുടര്‍ന്ന് സമാപനാശീര്‍വാദം, പ്രസുദേന്തി വാഴ്ച, കോഴിലേലം, ഏഴിന് മെഗാഷോ. സമാപനദിനമായ 28ന് രാവിലെ ആറിന് മരിച്ചവര്‍ക്കു വേണ്ടിയുള്ള വിശുദ്ധ കുര്‍ബാന, സെമിത്തേരി സന്ദര്‍ശനം, 7.15ന് വിശുദ്ധ കുര്‍ബാന, തിരുസ്വരൂപ പുനഃപ്രതിഷ്ഠ, കൊടിയിറക്കല്‍.

ഫ്രാന്‍സിസ് മാര്‍പാപ്പ മൂന്നാം ക്രിസ്തു: മാര്‍ ജോസഫ് കല്ലറങ്ങാട്ട്

പാലാ: രണ്ടാം ക്രിസ്തു എന്ന് ചരിത്രത്തില്‍ അറിയപ്പെടുന്ന വിശുദ്ധ ഫ്രാന്‍സിസിന്‍റെ നാമം സ്വീകരിച്ച ഫ്രാന്‍സിസ് മാര്‍പാപ്പയെ ചരിത്രം മൂന്നാം ക്രിസ്തു എന്ന് വിശേഷിപ്പിക്കുമെന്ന് പാലാ ബിഷപ് മാര്‍ ജോസഫ് കല്ലറങ്ങാട്ട്. പാലാ സെന്‍റ് തോമസ് കത്തീഡ്രലില്‍ ഇന്നലെ നടന്ന അനുസ്മരണയോഗത്തില്‍ പ്രസംഗിക്കുകയായിരുന്നു ബിഷപ്. ഫ്രാന്‍സിസ് പാപ്പാ നിര്‍വചനങ്ങള്‍ക്ക് അതീതമായി സമാനതകളില്ലാത്ത നേതൃത്വ മികവിലൂടെ ഒരായുസ് മുഴുവന്‍ സുവിശേഷത്തിന്‍റെ മൂല്യങ്ങളെ ലോകത്തിന് പകര്‍ന്നുതന്ന വിശ്വപൗരനാണ് എന്നും അദ്ദേഹം കൂട്ടിച്ചേര്‍ത്തു. ലോകത്തെ മുഴുവന്‍ പ്രകാശിപ്പിക്കുന്ന വെളിച്ചമായിരുന്ന അദ്ദേഹം ഇരുപത്തിയൊന്നാം നൂറ്റാണ്ടില്‍ നമ്മുടെ ചിന്താമണ്ഡലത്തെ നിരന്തരം സ്വാധീനിച്ച വ്യക്തിയാണെന്നും അനുസ്മരണ സന്ദേശത്തില്‍ ബിഷപ് വിശ്വാസികളെ ഓര്‍മിപ്പിച്ചു. അനുസ്മരണയോഗത്തിലും പ്രാര്‍ഥനാ ശുശ്രൂഷയിലും പാലാ രൂപതാ മുന്‍ അധ്യക്ഷന്‍ മാര്‍ ജോസഫ് പള്ളിക്കാപറമ്പിലും രൂപതയിലെ എല്ലാ വൈദികരും പാസ്റ്ററല്‍ കൗണ്‍സില്‍ അംഗങ്ങളും കത്തീഡ്രല്‍ ഇടവകാംഗങ്ങളും പങ്കെടുത്തു. മുഖ്യവികാരി ജനറാള്‍ മോണ്‍. ജോസഫ് തടത്തില്‍ സ്വാഗതം പറഞ്ഞു. എംഎസ്ടി ഡയറക്ടര്‍ ജനറാള്‍ റവ.ഡോ. വിന്‍സെന്‍റ് ജോസഫ് കദളികാട്ടില്‍പുത്തന്‍പുര, വികാരി ജനറാള്‍മാരായ മോണ്‍. ജോസഫ് മലേപ്പറമ്പില്‍, മോണ്‍. സെബാസ്റ്റ്യന്‍ വേത്താനത്ത്, മോണ്‍. ജോസഫ് കണിയോടിക്കല്‍, കത്തീഡ്രല്‍ പള്ളി വികാരി റവ.ഡോ. ജോസ് കാക്കല്ലില്‍, രൂപത പ്രൊക്യുറേറ്റര്‍ റവ.ഡോ. ജോസഫ് മുത്തനാട്ട് എന്നിവര്‍ നേതൃത്വം നല്‍കി. രൂപത ചാന്‍സലര്‍ റവ. ഡോ. ജോസഫ് കുറ്റിയാങ്കല്‍ നന്ദി പറഞ്ഞു.

ട്രെയിനിന് സ്റ്റോപ്പ്: എംപിക്ക് നിവേദനം നൽകി

ഏറ്റുമാനൂർ: ബംഗളൂരുവിൽനിന്നു പുറപ്പെടുന്ന ഐലൻഡ് എക്സ്പ്രസിന് ഏറ്റുമാനൂർ റെയിൽവേ സ്റ്റേഷനിൽ സ്റ്റോപ്പ് അനുവദിക്കുന്നതിനും ബംഗളൂരു - കൊച്ചി ഇന്‍റർസിറ്റി എക്സ്പ്രസ് കോട്ടയം വരെ നീട്ടുന്നതിനും ഇടപെടണമെന്നാവശ്യപ്പെട്ട് ജനകീയ വികസന സമിതി ഫ്രാൻസിസ് ജോർജ് എംപിക്ക് നിവേദനം നൽകി. ഭാരവാഹികളായ എൻ. അരവിന്ദാക്ഷൻ നായർ, ബി. രാജീവ്, അമ്മിണി സുശീലൻ നായർ, ജി. ജഗദീഷ്, പി.എൻ. രാധാകൃഷ്ണൻ നായർ എന്നിവർ ചേർന്നാണ് നിവേദനം നൽകിയത്. ആവശ്യങ്ങൾ റെയിൽവേ മന്ത്രി അശ്വിനി വൈഷ്ണവിനു സമർപ്പിക്കുമെന്ന് ഫ്രാൻസിസ് ജോർജ് എംപി ഉറപ്പു നൽകി.

കേന്ദ്ര ഗ്രാന്‍റ്: എംജിയെ അഭിനന്ദിച്ച് മന്ത്രി

അതിരമ്പുഴ: കേന്ദ്ര ശാസ്ത്ര സാങ്കേതിക മന്ത്രാലയത്തിനു കീഴില്‍ പാര്‍ട്ണര്‍ഷിപ്പ് ഫോര്‍ ആക്‌സിലറേറ്റഡ് ഇന്നവേഷന്‍ ആന്‍ഡ് റിസര്‍ച്ച് (പെയര്‍) പരിപാടിയില്‍ ഗവേഷണ ഗ്രാന്‍റ് നേടിയ എംജി സര്‍വകലാശാലയ്ക്ക് മന്ത്രി ഡോ.ആര്‍. ബിന്ദുവിന്‍റെ അഭിനന്ദനം. സര്‍വകലാശാലയില്‍ മികവിന്‍റെ കേന്ദ്രം ഉദ്ഘാടനം ചെയ്യാനെത്തിയ മന്ത്രി വൈസ് ചാന്‍സലര്‍ ഡോ.സി.ടി. അരവിന്ദകുമാര്‍ ഉള്‍പ്പെടെയുള്ള ഗവേഷണ സംഘാംഗങ്ങള്‍ക്കൊപ്പം കേക്കുമുറിച്ച് സന്തോഷം പങ്കുവച്ചു. സിന്‍ഡിക്കറ്റ് അംഗങ്ങള്‍, സെനറ്റ് അംഗങ്ങള്‍, രജിസ്ട്രാര്‍ ഡോ. ബിസ്മി ഗോപാലകൃഷ്ണന്‍ തുടങ്ങിയവര്‍ സന്നിഹിതരായിരുന്നു. സര്‍വകലാശാല ഉള്‍പ്പെട്ട ബയോമെഡിക്കല്‍ ഗവേഷണ പദ്ധതിക്കു കേന്ദ്ര സര്‍ക്കാരിന്‍റെ നൂറു കോടി രൂപയുടെ ഗ്രാന്‍റാണ് അനുവദിച്ചത്. ഉന്നതവിദ്യാഭ്യാസ മേഖലയില്‍ മികവുറ്റ ഗവേഷണങ്ങള്‍ പ്രോത്സാഹിപ്പിക്കുന്നതിനായി പ്രധാനമന്ത്രി വിഭാവനം ചെയ്ത പദ്ധതിയില്‍ ശാസ്ത്ര സാങ്കേതിക മന്ത്രാലയത്തിന്‍റെ അനുസന്ധാന്‍ നാഷണല്‍ റിസര്‍ച്ച് ഫൗണ്ടേഷനാണ് ഗ്രാന്‍റ് നല്‍കുന്നത്.

മികവിന്‍റെ കേന്ദ്രം: സുപ്രധാന ചുവടുവയ്പ്പെന്ന് മന്ത്രി ബിന്ദു

അതിരമ്പുഴ: സംസ്ഥാനത്ത് ഉന്നത വിദ്യാഭ്യാസ മേഖലയില്‍ സര്‍ക്കാര്‍ ആരംഭിക്കുന്ന മികവിന്‍റെ കേന്ദ്രങ്ങള്‍ കാലോചിത മാറ്റങ്ങളുടെ വഴിയിലെ സുപ്രധാന ചുവടുവയ്പ്പാണെന്ന് മന്ത്രി ഡോ.ആര്‍. ബിന്ദു. എംജി സര്‍വകലാശാലയില്‍ സ്ഥാപിക്കുന്ന മികവിന്‍റെ കേന്ദ്രം -കേരള ഇന്‍സ്റ്റിറ്റ്യൂട്ട് ഓഫ് സയന്‍സ് ടെക്‌നോളജി ആന്‍ഡ് ഇന്നവേഷന്‍റെ- ഉദ്ഘാടനം നിര്‍വഹിക്കുകയായിരുന്നു മന്ത്രി. ഗവേഷണ ആശയങ്ങളെ ജനങ്ങള്‍ക്ക് ഉപകരിക്കുന്ന സംരംഭങ്ങളും ഉത്പന്നങ്ങളുമാക്കി മാറ്റാന്‍ ലക്ഷ്യമിടുന്ന സര്‍വകലാശാലയിലെ കേന്ദ്രത്തിന് ഏറെ സാധ്യതകളുണ്ട്. വിജ്ഞാനത്തെ അടിസ്ഥാനമാക്കി സമൂഹത്തിന്‍റെ ജീവിത നിലവാരവും നാടിന്‍റെ സാന്പത്തികാടിത്തറയും മെച്ചപ്പെടുത്തുക എന്ന കാഴ്ചപ്പാടോടെയാണ് ഇത്തരം കേന്ദ്രങ്ങള്‍ പ്രവര്‍ത്തിക്കുകയെന്നും മന്ത്രി പറഞ്ഞു. ഭാഭാ ആണവ ഗവേഷണ കേന്ദ്രം മഹാത്മാ ഗാന്ധി സര്‍വകലാശാലയില്‍ സ്ഥാപിക്കുന്ന അഡ്വാന്‍സ്ഡ് നോളജ് ആൻഡ് റൂറല്‍ ടെക്‌നോളജി ഇംപ്ലിമെന്‍റേഷന്‍ സെന്‍ററിന്‍റെ (അകൃതി) ഉദ്ഘാടനവും മന്ത്രി ബിന്ദു നിര്‍വഹിച്ചു. മന്ത്രി വി.എന്‍. വാസവന്‍ അധ്യക്ഷത വഹിച്ചു. സംസ്ഥാന ഉന്നത വിദ്യാഭ്യാസ കൗണ്‍സില്‍ മെംബര്‍ സെക്രട്ടറി ഡോ. രാജന്‍ വര്‍ഗീസ്, വൈസ് ചാന്‍സലര്‍ ഡോ. സി.ടി. അരവിന്ദകുമാര്‍, സിന്‍ഡിക്കറ്റ് അംഗങ്ങളായ അഡ്വ. റെജി സക്കറിയ, അഡ്വ.പി.ബി. സതീഷ് കുമാര്‍, ജില്ലാ പഞ്ചായത്തംഗം ഡോ. റോസമ്മ സോണി, അതിരമ്പുഴ പഞ്ചായത്ത് പ്രസിഡന്‍റ് ജോസ് അമ്പലക്കുളം, രജിസ്ട്രാര്‍ ഡോ. ബിസ്മി ഗോപാലകൃഷ്ണന്‍, ഡോ. ഇ.കെ. രാധാകൃഷ്ണന്‍ തുടങ്ങിയവര്‍ പങ്കെടുത്തു.

മെഡിക്കൽ കോളജിൽ ട്രോളിയും വീൽചെയറുമില്ല; അവശരോഗികൾക്ക് ഒപിയിൽ എത്താനാവുന്നില്ല

ഗാന്ധിനഗർ: നടക്കാൻ വയ്യാതെ വാഹനങ്ങളിൽ മെഡിക്കൽ കോളജ് ആശുപത്രിയിൽ എത്തുന്ന രോഗികൾക്ക് ഒപി വിഭാഗത്തിൽ പ്രവേശിക്കുന്നതിന് ട്രോളി, വീൽചെയർ എന്നിവയുടെ അഭാവം നേരിടുന്നതായി പരാതി. എല്ലാ ദിവസവും മെഡിക്കൽ കോളജ് ആശുപത്രിയിൽ ഒപി പ്രവർത്തിക്കുന്നുണ്ട്. അവശതയിലുള്ള നിരവധി രോഗികളെയാണ് ദിവസേന ആംബുലൻസിലും മറ്റു വാഹനങ്ങളിലും ഒപി വിഭാഗത്തിൽ കൊണ്ടുവരുന്നത്. ഒപി കവാടം വരെ വാഹനങ്ങളെത്തുമെങ്കിലും ഡോക്ടറുടെയടുത്ത് ഇവരെ എത്തിക്കണമെങ്കിൽ ട്രോളിയോ വീൽചെയറോ വേണം. എന്നാൽ, ആശുപത്രിയിൽ എത്തുന്ന രോഗികളെ ഒപിയിൽ എത്തിക്കുന്നതിന് ട്രോളിയുടെയും വീൽചെയറിന്‍റെയും അഭാവം നേരിടുന്നതായാണ് പരാതി ഉയർന്നിട്ടുണ്ട്. ആദ്യമെത്തുന്ന രോഗികൾ അവരുടെ ആവശ്യത്തിന് ട്രോളിയും വീൽചെയറും കൊണ്ടുപോകും. വൈകിയെത്തുന്ന രോഗികൾ ട്രോളിയും വീൽചെയറും കിട്ടാതെ വാഹനങ്ങളിൽ കിടക്കേണ്ടിവരുന്നത് നിത്യസംഭവമായിരിക്കുകയാണ്. കഴിഞ്ഞദിവസം പത്തനംതിട്ടയിൽനിന്നും സൈക്കാട്രി വിഭാഗം ഒപിയിലെത്തിയ രോഗിയെ മറ്റൊരു വിഭാഗത്തിലും കൂടി കാണിക്കേണ്ടിയിരുന്നു. അവശനിലയിലുള്ള രോഗിയായതിനാൽ വീൽചെയറിന് രോഗിയുടെ ബന്ധു ട്രോളിയും വീൽചെയറും വിതണം ചെയ്യുന്ന കുടുംബശ്രീ ജീവനക്കാരുടെ അടുത്തെത്തി പറഞ്ഞിട്ട് ഒരു മണിക്കൂർ കഴിഞ്ഞിട്ടും വീൽചെയർ കിട്ടിയില്ല. പ്രകോപിതയായ ബന്ധു പ്രതിഷേധിക്കുകയും ആശുപത്രി അധികൃതർക്കു പരാതി നൽകുമെന്നും പറഞ്ഞു. ഇതുപോലെ നിരവധി പരാതികളാണ് ദിവസേന ഉണ്ടാകുന്നത്. 20ലധികം ട്രോളിയും വീൽചെയറുമാണ് ഒപിയിൽ രോഗികൾക്കായുള്ളത്. ഇതിൽ പലതും തകരാറിലാണെന്നു പറയുന്നു. ദിവസവും നിരവധി രോഗികളെത്തുന്ന മെഡിക്കൽ കോളജ് ഒപിയിൽ ട്രോളി, വീൽ ചെയർ എന്നിവയുടെ കുറവ് രോഗികൾക്ക് ബുദ്ധിമുട്ടാകുകയാണ്. കൂടുതൽ ട്രോളിയും വീൽ ചെയറും ലഭ്യമാക്കി കഷ്ടപ്പാടിന് അറുതിവരുത്തണമെന്നാണ് രോഗികളുടെയും ബന്ധുക്കളുടെയും ആവശ്യം.

ഭീകരാക്രമണത്തിൽ കൊല്ലപ്പെട്ടവർക്ക് ആദരാഞ്ജലി

അതിരമ്പുഴ: ജമ്മു-കാഷ്മീരിലെ പഹൽഗാമിൽ ഭീകരാക്രമണത്തിൽ കൊല്ലപ്പെട്ടവർക്ക് കോൺഗ്രസ് അതിരമ്പുഴ മണ്ഡലം കമ്മിറ്റിയുടെ നേതൃത്വത്തിൽ മെഴുകുതിരി തെളിച്ച് ആദരാഞ്ജലികളർപ്പിച്ചു. കോൺഗ്രസ് അതിരമ്പുഴ മണ്ഡലം പ്രസിഡന്‍റ് ജൂബി ഐക്കക്കുഴി അധ്യക്ഷത വഹിച്ച അനുശോചന യോഗത്തിൽ കോൺഗ്രസ് ബ്ലോക്ക് പ്രസിഡന്‍റ് ജോറോയി പൊന്നാറ്റിൽ, പി.വി. മെക്കിൾ, ടോം പണ്ടാരക്കളം, ഹരി പ്രകാശ് മാന്നാനം, ജോയി വേങ്ങച്ചുവട്ടിൽ, ജോർജ് പുളിങ്കാല, മഹേഷ് രാജ്, മത്തായി കല്ലുവെട്ടാംകുഴി, കുര്യാക്കോസ് കക്കുത്തനായിൽ, ജോജി വട്ടമല, ബിജു കുറുമുള്ളുംകാല, തങ്കച്ചൻ കൂർക്കക്കാല, കെ.ഒ. വർക്കി, ജോജോ പുന്നക്കാപ്പള്ളി എന്നിവർ പ്രസംഗിച്ചു. ഏറ്റുമാനൂർ: കോൺഗ്രസ് ബ്ലോക്ക് കമ്മിറ്റിയുടെ ആഭിമുഖ്യത്തിൽ പഹൽഗാമിലെ ഭീകരാക്രമണത്തിൽ കൊല്ലപ്പെട്ടവർക്ക്‌ ബാഷ്പാഞ്ജലി അർപ്പിച്ചു. ഭീകരതയെയും വിഘടന വാദത്തെയും ചെറുത്തു തോല്പിച്ചു രാജ്യം ഒറ്റക്കെട്ടായി പ്രതികരിക്കുമെന്ന് യോഗം പ്രതിജ്ഞയെടുത്തു. ബ്ലോക്ക്‌ കോൺഗ്രസ് പ്രസിഡന്‍റ് ജോറോയി പൊന്നാറ്റിൽ അധ്യക്ഷത വഹിച്ചു. ഭാരവാഹികളായ ജോയി പൂവംനിൽക്കുന്നതിൽ, ജൂബി ഐക്കരക്കുഴി, ടി.എസ്‌. അൻസാരി, ജോസഫ് ചാക്കോ എട്ടുകാട്ടിൽ, ജയിംസ് പ്ലാക്കിത്തൊട്ടിൽ, ടോം പണ്ടാരക്കളം, ജോൺസൺ തീയാട്ടുപറമ്പിൽ, ആർ. രവികുമാർ, ഐസക്ക് പാടിയത്ത്, വിഷ്ണു ചെമ്മുണ്ടവള്ളി, സജി പിച്ചകശേരി, സജീവ് അബ്ദുൽ കാദർ, ജയിസ് കട്ടച്ചിറ, ജസ്റ്റിൻ പാറശേരി, സബീർ ടി.എച്ച്. എന്നിവർ പ്രസംഗിച്ചു.

ഇങ്ങനെപോയാൽ കോണത്താറ്റു പാലം എന്നു ഗതാഗത യോഗ്യമാകും?

നിർമാണത്തിനായി വളച്ചിട്ട ഇരുമ്പുകമ്പികൾ കാണാനില്ല കുമരകം: നിർമാണം നടന്നുകൊണ്ടിരിക്കുന്ന കോണത്താറ്റ് പാലത്തിന്‍റെ പ്രവേശന പാതയുടെ ഇരുമ്പുകമ്പികൾ കാണാതായി. കഴിഞ്ഞ ചൊവ്വാഴ്ച രാത്രിയാണ് 1881 കിലോ ഇരുമ്പു കമ്പികൾ കാണാതായത്. കമ്പി മോഷണം പോയതായി കാണിച്ചു കരാറുകാരായ പെരുമാലിൽ കൺസ്ട്രക്ഷൻസിന്‍റെ ഉടമ അലക്സ് കുമരകം പോലീസിൽ പരാതി നൽകിയിട്ടുണ്ട്. ഗർഡർ നിർമാണത്തിനു വളച്ചിട്ട കമ്പികളാണ് കാണാതായതിലേറെയുമെന്ന് പെരുമാലിൽ അലക്സ് പറഞ്ഞു. പാലത്തിന്‍റെ പടിഞ്ഞാറെ കരയിൽനിന്നാണ് കമ്പി കാണാതായത്. ഇതിനുമുമ്പും ഇവിടെനിന്നും കമ്പി മോഷണം പോയിട്ടുണ്ടെങ്കിലും കള്ളനെ പിടികൂടാനായിട്ടില്ല. അപ്രോച്ച് റോഡിനുള്ള സ്പാനിന്‍റെ മുകളിൽ സ്ഥാപിക്കാനുള്ള ഗർഡറിന്‍റെയും മുകളിലൂടെയുള്ള പാതയുടെയും നിർമാണമാണ് ഇപ്പോൾ നടക്കുന്നത്. കമ്പി മോഷണം പോയതായി പരാതി ലഭിച്ചിട്ടുണ്ടെന്നും പ്രത്യേക സംഘം അന്വേഷണം ആരംഭിച്ചതായും കുമരകം എസ്എച്ച്ഒ കെ. ഷിജി അറിയിച്ചു.

ചങ്ങനാശേരി അതിരൂപത കോര്‍പറേറ്റ് മാനേജ്മെന്‍റ് അധ്യാപക കണ്‍വന്‍ഷനുകള്‍ക്ക് തുടക്കം

ചങ്ങനാശേരി: ചങ്ങനാശേരി അതിരൂപത കോര്‍പറേറ്റ് മാനേജ്മെന്‍റ് അധ്യാപക കണ്‍വന്‍ഷനുകള്‍ക്കു തുടക്കമാകുന്നു. 110 സ്‌കൂളുകളിലെ 2,000 അധ്യാപകര്‍ക്ക് ഏഴ് സോണുകളിലായാണു കണ്‍വന്‍ഷന്‍ സംഘടിപ്പിച്ചിരിക്കുന്നത്. ഈശോമിശിഹായുടെ മനുഷ്യാവതാര ജൂബിലിയുടെ പ്രധാന പ്രമേയമായ പ്രത്യാശയുടെ തീര്‍ഥാടകര്‍ എന്നത് സന്ദേശമായി സ്വീകരിക്കുന്ന കണ്‍വന്‍ഷനുകളില്‍ കാലത്തിന്‍റെ മാറ്റങ്ങള്‍ക്കൊത്ത് വിദ്യാഭ്യാസരംഗത്ത് നിര്‍ണായക ശക്തിയാകുന്നതിനുള്ള പരിശീലനങ്ങളും പ്രത്യാശയുടെ തീര്‍ഥാടകരായി മാറുവാന്‍ അധ്യാപകരെ പ്രചോദിപ്പിക്കുന്ന ക്ലാസുകളും വിദ്യാഭ്യാസ സംബന്ധമായ ചര്‍ച്ചകളും നടക്കും. വിദ്യാഭ്യാസ മേഖലയിലെ പ്രഗത്‌ഭര്‍ ക്ലാസുകള്‍ക്കും ചര്‍ച്ചകള്‍ക്കും നേതൃത്വം നല്‍കും. 25ന് എടത്വാ സോണില്‍ ആരംഭിച്ച് മേയ് 6നു ചമ്പക്കുളം സോണില്‍ അവസാനിക്കുന്ന ഏഴു സോണല്‍ കണ്‍വന്‍ഷനുകളിലും ചങ്ങനാശേരി ആര്‍ച്ച്ബിഷപ് മാര്‍ തോമസ് തറയില്‍ സന്ദേശം നല്‍കും. അതിരൂപത വികാരി ജനറാള്‍മാര്‍ സന്നിഹിതരാകും. ചങ്ങനാശേരി അതിരൂപത കോര്‍പറേറ്റ് മാനേജ്മെന്‍റും ടീച്ചേഴ്‌സ് ഗില്‍ഡും സംയുക്തമായി സംഘടിപ്പിക്കുന്ന കണ്‍വന്‍ഷന്‍റെ മുന്നൊരുക്കങ്ങള്‍ പൂര്‍ത്തിയായതായി കോര്‍പറേറ്റ് മാനേജര്‍ റവ.ഡോ. ആന്‍റണി മൂലയില്‍, അസിസ്റ്റന്‍റ് മാനേജര്‍ റവ.ഡോ. ടോണി ചെത്തിപ്പുഴ, ടീച്ചേഴ്‌സ് ഗില്‍ഡ് പ്രസിഡന്‍റ് ഈശോ തോമസ്, ഗില്‍ഡ് ഭാരവാഹികള്‍എന്നിവര്‍ അറിയിച്ചു. അമൃതം ലഹരിവിരുദ്ധ പദ്ധതി ലഹരിക്കെതിരേ സ്‌കൂളുകള്‍ കേന്ദ്രീകരിച്ചുള്ള ശക്തമായ പോരാട്ടത്തിന് കണ്‍വന്‍ഷനില്‍ തുടക്കം കുറിക്കും. ലഹരിക്കെതിരേ ജീവന്‍റെ സംസ്‌കാരത്തിനായി വിദ്യാര്‍ഥികളെ അണിചേര്‍ത്ത്, സര്‍ക്കാരിന്‍റെ ലഹരിവിരുദ്ധ പരിപാടികളോടു ചേര്‍ന്ന് ചങ്ങനാശേരി അതിരൂപത കോര്‍പറേറ്റ് മാനേജ്‌മെന്‍റ് 110 വിദ്യാലയങ്ങളില്‍ 2025-26 അക്കാദമിക വര്‍ഷത്തില്‍ അമൃതം എന്ന പേരിലാണ് ലഹരിവിരുദ്ധ കാമ്പയിന്‍ സംഘടിപ്പിക്കുന്നത്. കുട്ടികള്‍ക്കു വിവിധ ബോധവത്കരണ പ്രവര്‍ത്തനങ്ങള്‍, കൗണ്‍സലിംഗ്, പിടിഎയോട് ചേര്‍ന്ന് ലഹരിവിരുദ്ധ മുന്നേറ്റങ്ങള്‍, ജാഗ്രതാ സെല്ലുകള്‍ തുടങ്ങിയവ അമൃതം പദ്ധതിയില്‍ ഉണ്ടായിരിക്കുമെന്ന് കോര്‍പറേറ്റ് മാനേജര്‍ ഫാ. ആന്‍റണി മൂലയില്‍ അറിയിച്ചു.

വാരിശേരിയില്‍ മൂന്നു കടകളില്‍ മോഷണം

കോട്ടയം: വാരിശേരിയില്‍ മൂന്നു കടകളില്‍ മോഷണം. വാരിശേരി കവലയില്‍ പ്രവര്‍ത്തിക്കുന്ന കൈലാസം ഹോട്ടല്‍, എ ഫോര്‍ അങ്ങാടി പലചരക്ക് കട, സമീപത്തുള്ള കോഴിക്കട എന്നിവിടങ്ങളിലാണ് ബുധനാഴ്ച രാത്രിയില്‍ മോഷണം നടന്നത്. ഇന്നലെ പുലര്‍ച്ചെ ഹോട്ടല്‍ തുറക്കാനെത്തിയ ഹോട്ടല്‍ ജീവനക്കാരാണു മോഷണ വിവരമറിയുന്നത്. കൈലാസം ഹോട്ടലിലാണ് മോഷ്ടാവ് ആദ്യം കയറിയത്. ഹോട്ടലിന്‍റെ പിന്‍വശത്തെ വാതില്‍ തകര്‍ത്ത് അകത്തുകയറിയ കള്ളന്‍ മേശയില്‍ ഉണ്ടായിരുന്ന 7000 രൂപ മോഷ്ടിച്ചു. ഹോട്ടലും പലചരക്ക് കടയും ഒരു കെട്ടിടത്തിലാണ് പ്രവര്‍ത്തിക്കുന്നത്. രണ്ടു കടകളും തമ്മില്‍ വേര്‍തിരിക്കുന്ന ഭിത്തിയുടെ ഒരു ഭാഗം ഗ്ലാസാണ്. ഈ ഗ്ലാസ് തകര്‍ത്താണ് പലചരക്ക് കടയ്ക്കുള്ളില്‍ മോഷ്ടാവ് കയറിയത്. ഹോട്ടലിലെ കുക്കര്‍ ഉപയോഗിച്ചാണ് ഗ്ലാസ് തകര്‍ത്തത്. പലചരക്ക് കടയില്‍നിന്ന് 600 രൂപയും മോഷ്ടിച്ചു. പൊട്ടിയ ക്ലാസിന് ഇടയിലുടെ കയറിയ കള്ളനു പരിക്കേല്‍ക്കുകയും ചെയ്തിട്ടുണ്ട്. ഹോട്ടലില്‍ മോഷ്ടാവിന്‍റെ രക്തത്തുള്ളികളും വീണുകിടപ്പുണ്ട്. പലചരക്ക് കടയിലെ മോഷണത്തിനുശേഷം പൊട്ടിയ ഗ്ലാസിന്‍റെ ഇടയിലൂടെ തന്നെ കള്ളന്‍ ഹോട്ടലിലേക്കു തിരികെയെത്തി പുറകുവശം വഴി പോവുകയും ചെയ്തു. ഈ കടകളില്‍നിന്ന് അലപം മാറിയാണ് കോഴിക്കടയുള്ളത്. ഇവിടെ കയറിയ മോഷ്ടാവിനു പണമൊന്നും ലഭിച്ചില്ല. ഇവിടത്തെ സാധനങ്ങള്‍ വാരിവലിച്ചിടുകയും സിസിടിവി കാമറ പിടിച്ചു തിരിച്ചുവയ്ക്കുകയും കൗണ്ടര്‍ നശിപ്പിക്കുകയും ചെയ്തു. പോലീസ് സ്ഥലത്തെത്തി സിസിടിവി ദൃശ്യങ്ങള്‍ ശേഖരിച്ചു അന്വേഷണം ആരംഭിച്ചു. ചുങ്കം, വാരിശേരി, എസ്എച്ച് മൗണ്ട് പ്രദേശങ്ങളില്‍ നടക്കുന്ന മോഷണത്തില്‍ വ്യാപാരകള്‍ക്ക് വന്‍തോതില്‍ നഷ്ടം സംഭവിക്കുന്നുവെന്ന് വ്യാപാരി വ്യവസായി സമിതി. പ്രതിയെ പിടികൂടുന്നതില്‍ പോലീസ് ഇടപെടണമെന്നും സമിതി ചുങ്കം യൂണിറ്റ് സെക്രട്ടറി ഷാന്‍ കോട്ടയവും പ്രസിഡന്‍റ് പുഷ്പനാഥും ആവശ്യപ്പെട്ടു.

അഗ്രികള്‍ച്ചറല്‍ പെന്‍ഷനേഴ്‌സ് വെല്‍ഫയര്‍ അസോ. സംസ്ഥാന സമ്മേളനം

കോട്ടയം: അഗ്രികള്‍ച്ചറല്‍ പെന്‍ഷനേഴ്‌സ് വെല്‍ഫയര്‍ അസോസിയേഷന്‍റെ 10-ാമത് സംസ്ഥാന സമ്മേളനം മേയ് മൂന്നിന് നടക്കും. കോട്ടയം പടിഞ്ഞാറേക്കര ഓഡിറ്റോറിയത്തില്‍ വൈകുന്നേരം നാലിനു നടക്കുന്ന സമ്മേളനം ഫ്രാന്‍സിസ് ജോര്‍ജ് എംപി ഉദ്ഘാടനം ചെയ്യും. സംസ്ഥാന പ്രസിഡന്‍റ് ടി.എം. വര്‍ഗീസ് അധ്യക്ഷത വഹിക്കും. തിരുവഞ്ചൂര്‍ രാധാകൃഷ്ണന്‍ എംഎല്‍എ, വി.ബി. ബിനു, എം.എം. ഉമ്മന്‍, ജോര്‍ജ് ജോസഫ്, കെ.എ. ഗോപാലകൃഷ്ണന്‍ നായര്‍, കെ.ടി. സ്‌കറിയ, വി.ഡി. വിജയചന്ദ്ര കൈമള്‍, വി.സി. ഏബ്രഹാം എന്നിവര്‍ പ്രസംഗിക്കും. 100 വയസ് പൂര്‍ത്തിയാക്കിയ അസോസിയേഷന്‍ രക്ഷാധികാരി സഖറിയ തുടിപ്പാറയെയും കര്‍ണാടക സംഗീതത്തില്‍ പിഎച്ച്ഡി നേടിയ ഡോ. പ്രശാന്ത് വി. കൈമളിനെയും സമ്മേളനത്തില്‍ ആദരിക്കും.

മെഡി. കോളജ് ബസ് സ്റ്റാൻഡ് തുറന്നു

ഗാന്ധിനഗർ: നവീകരണത്തിനായി അടച്ചിട്ട മെഡിക്കൽ കോളജ് ബസ് സ്റ്റാൻഡ് ജനങ്ങൾക്ക് തുറന്നുകൊടുത്തു. ഫ്രാൻസിസ് ജോർജ് എംപിയാണ് നവീകരിച്ച ബസ് സ്റ്റാൻഡ് തുറന്നു കൊടുത്തത്. 2024-25 വാർഷിക പദ്ധതിയിൽ ഉൾപ്പെടുത്തി പഞ്ചായത്തിന്‍റെ തനത് ഫണ്ടിൽനിന്നു 40 ലക്ഷം രൂപ ചെലവഴിച്ചാണ് സ്റ്റാൻഡ് നവീകരണത്തിന്‍റെ ഭാഗമായി കോൺക്രീറ്റ് ചെയ്തത്. യോഗത്തിൽ പഞ്ചായത്ത് പ്രസിഡന്‍റ് ദീപ ജോസ് അധ്യക്ഷത വഹിച്ചു. ജില്ലാ പഞ്ചായത്ത് മെംബർ ഡോ. റോസമ്മ സോണി, പഞ്ചായത്ത് വൈസ് പ്രസിഡന്‍റ് അരുൺ ഫിലിപ്പ്, ബ്ലോക്ക് പഞ്ചായത്ത് മെംബർമാരായ അന്നമ്മ മാണി, എസ്സി തോമസ്, പഞ്ചായത്ത് മെംബർമാരായ ജസ്റ്റിൻ ജോസഫ്, സുനിതാ ബിനു, ഓമന സണ്ണി, റോസിലി ടോമിച്ചൻ, ലൂക്കോസ് ഫിലിപ്പ്, റോയി മാത്യു പുതുശേരി, അഞ്ജു മനോജ്, പഞ്ചായത്ത് ഉദ്യോഗസ്ഥൻ ജെ.എസ്. ശിവൻകുട്ടി എന്നിവർ പ്രസംഗിച്ചു. നടപ്പുവർഷത്തെ പദ്ധതിയിൽ ഉൾപ്പെടുത്തി സ്റ്റാൻഡിൽ നിലവിലുള്ള കെട്ടിടം പൊളിച്ചു നീക്കി മിനി ഷോപ്പിംഗ് കോംപ്ലക്സ് കെട്ടിടവും ശുചിമുറി, ആധുനിക രീതിയിലുള്ള വെയിറ്റിംഗ് ഏരിയ എന്നിവ നിർമിക്കുന്നതിനും പദ്ധതിയുണ്ട്.

കുറവിലങ്ങാട് പള്ളിയിൽ പുറത്ത് നമസ്‌കാരവും പുതുഞായർ ആചരണവും

കുറവിലങ്ങാട്: ആഗോളമരിയൻ തീർഥാടന കേന്ദ്രമായ മേജർ ആർക്കിഎപ്പിസ്‌കോപ്പൽ തീർഥാടന പള്ളിയിൽ 26ന് പുറത്ത് നമസ്‌കാരം നടക്കും. പുതുഞായർ ആചരണത്തിന്‍റെ ഭാഗമായാണ് പുറത്ത് നമസ്‌കാരം. പരിശുദ്ധ ദൈവമാതാവ് പ്രത്യക്ഷപ്പെട്ട് ഉയർത്തിനാട്ടിയ ഒറ്റക്കൽകുരിശിന് മുന്നിലാണ് പുറത്ത് നമസ്‌കാരം. പുതുഞായറിന്‍റെ തലേദിനമായ 26ന് വൈകുന്നേരം അഞ്ചിന് വിശുദ്ധ കുർബാന, മുത്തിയമ്മയുടെ നൊവേന, ജപമാലപ്രദക്ഷിണം. തുടർന്ന് ആർച്ച്പ്രീസ്റ്റ് റവ.ഡോ. തോമസ് മേനാച്ചേരിയുടെ കാർമികത്വത്തിൽ പുറത്തുനമസ്‌കാരം നടക്കും. അസി. വികാരി ഫാ. തോമസ് താന്നിമലയിൽ സന്ദേശം നൽകും. പുതുഞായറാചരണത്തിനൊപ്പം വിശുദ്ധ ഗീവർഗീസ് സഹദായുടെ തിരുനാളാഘോഷവും നടത്തും. 27ന് രാവിലെ 5.30, 7.00, 8.45, 11.00 എന്നീസമയങ്ങളിൽ വിശുദ്ധ കുർബാന. അഞ്ചിന് ആർച്ച്പ്രീസ്റ്റ് റവ.ഡോ. തോമസ് മേനാച്ചേരിയുടെ കാർമികത്വത്തിൽ തിരുനാൾ കുർബാന. തുടർന്ന് പ്രദക്ഷിണം. ഫ്രാൻസിസ് മാർപാപ്പായുടെ മരണത്തോടനുബന്ധിച്ച് ദുഃഖാചരണം നടക്കുന്നതിനാൽ ആഘോഷങ്ങളൊഴിവാക്കിയാണ് തിരുനാൾ ആചരണം.

വെള്ളക്കെട്ട് യാത്രക്കാരെ വലയ്ക്കുന്നു

പാലാ: ഒറ്റ മഴ പെയ്താല്‍ റോഡില്‍ വെള്ളക്കെട്ട് രൂപപ്പെടുന്നത് യാത്രക്കാരെ വലയ്ക്കുന്നു. പാലാ സെന്‍റ് തോമസ് ഹൈസ്‌കൂളിനു മുന്‍വശമാണ് വെള്ളക്കെട്ട് രൂപപ്പെടുന്നത്. ഇവിടത്തെ ഓടകള്‍ക്ക് വീതിയില്ലാത്തതും യഥാസമയം ക്ലീനാക്കാത്തുമാണു കാരണമെന്ന് നാട്ടുകാര്‍ പറയുന്നു. വെള്ളം കെട്ടിനില്‍ക്കാതിരിക്കാന്‍ തക്ക വീതി മുമ്പ് ഇവിടത്തെ ഓടയ്ക്ക് ഉണ്ടായിരുന്നു. യഥാര്‍ഥ ഓടയുടെ അതിര്‍ത്തി രേഖപ്പെടുത്താന്‍ മുനിസിപ്പാലിറ്റി അധികാരികളും റവന്യു അധികൃതരും മുന്‍കൈയെടുക്കണമെന്നും ആവശ്യമുയര്‍ന്നു.

ഒരു പതിറ്റാണ്ടിന്‍റെ കാത്തിരിപ്പിന് വിരാമം; സയൻസ് സിറ്റിയുടെ ആദ്യഘട്ടം അടുത്ത മാസം

കുറവിലങ്ങാട്: 2014ൽ നിർമാണം തുടങ്ങിയ സയൻസ് സിറ്റിയുടെ ആദ്യഘട്ടമായ സയൻസ് സെന്‍റർ അടുത്തമാസം നാടിന് സമർപ്പിക്കും. കോഴായിലെ സയൻസ് സിറ്റിയിൽ സന്ദർശനം നടത്തിയ മന്ത്രി ഡോ. ആർ ബിന്ദുവാണ് അടുത്തമാസം സയൻസ് സിറ്റി മുഖ്യമന്ത്രി നാടിന് സമർപ്പിക്കുമെന്ന് അറിയിച്ചത്. ആദ്യഘട്ടത്തിൽ സയൻസ് ഗാലറികൾ, സയൻസ് പാർക്ക്, ആക്ടിവിറ്റി സെന്‍റർ തുടങ്ങിയവയാണ് സയൻസ് സെന്‍ററിന്‍റ ഭാഗമായി നാടിന് സമർപ്പിക്കുന്നത്. ഫുഡ് കോർട്ട്, വാനനിരീക്ഷണകേന്ദ്രം, ഇലക്‌ട്രിക്കൽ സബ്സ്റ്റേഷൻ, കോമ്പൗണ്ട് വാൾ, ഗേറ്റുകൾ, റോഡ്, ഓട നിർമാണം, വാട്ടർ ടാങ്ക് തുടങ്ങിയവയും ആദ്യഘട്ടത്തിലൂടെ പൂർത്തീകരിച്ചിട്ടുണ്ട്. രണ്ടാംഘട്ടത്തിൽ സ്‌പേസ് തിയേറ്റർ, മോഷൻ സ്റ്റിമുലേറ്റർ എൻട്രൻസ് പ്ലാസ, ആംഫി തിയേറ്റർ, റിംഗ് റോഡ്, പാർക്കിംഗ് തുടങ്ങിയവ യാഥാർഥ്യമാക്കും. ശാസ്ത്ര സാങ്കേതിക മ്യൂസിയം ഉദ്യോഗസ്ഥരും മന്ത്രിക്കൊപ്പം സയൻസ് സിറ്റിയിലെത്തിയിരുന്നു. കഴിഞ്ഞ ആഴ്ചകളിൽ തൊഴിലുറപ്പ് പദ്ധതിയിൽ ഉൾപ്പെടുത്തി സയൻസ് സിറ്റിയിൽ പശ്ചാത്തല സൗകര്യങ്ങളൊരുക്കുന്നുണ്ട്.

ഫ്രാന്‍സിസ് മാര്‍പാപ്പ മൂന്നാം ക്രിസ്തു: മാര്‍ ജോസഫ് കല്ലറങ്ങാട്ട്

പാലാ: രണ്ടാം ക്രിസ്തു എന്ന് ചരിത്രത്തില്‍ അറിയപ്പെടുന്ന വിശുദ്ധ ഫ്രാന്‍സിസിന്‍റെ നാമം സ്വീകരിച്ച ഫ്രാന്‍സിസ് മാര്‍പാപ്പയെ ചരിത്രം മൂന്നാം ക്രിസ്തു എന്ന് വിശേഷിപ്പിക്കുമെന്ന് പാലാ ബിഷപ് മാര്‍ ജോസഫ് കല്ലറങ്ങാട്ട്. പാലാ സെന്‍റ് തോമസ് കത്തീഡ്രലില്‍ ഇന്നലെ നടന്ന അനുസ്മരണയോഗത്തില്‍ പ്രസംഗിക്കുകയായിരുന്നു ബിഷപ്. ഫ്രാന്‍സിസ് പാപ്പാ നിര്‍വചനങ്ങള്‍ക്ക് അതീതമായി സമാനതകളില്ലാത്ത നേതൃത്വ മികവിലൂടെ ഒരായുസ് മുഴുവന്‍ സുവിശേഷത്തിന്‍റെ മൂല്യങ്ങളെ ലോകത്തിന് പകര്‍ന്നുതന്ന വിശ്വപൗരനാണ് എന്നും അദ്ദേഹം കൂട്ടിച്ചേര്‍ത്തു. ലോകത്തെ മുഴുവന്‍ പ്രകാശിപ്പിക്കുന്ന വെളിച്ചമായിരുന്ന അദ്ദേഹം ഇരുപത്തിയൊന്നാം നൂറ്റാണ്ടില്‍ നമ്മുടെ ചിന്താമണ്ഡലത്തെ നിരന്തരം സ്വാധീനിച്ച വ്യക്തിയാണെന്നും അനുസ്മരണ സന്ദേശത്തില്‍ ബിഷപ് വിശ്വാസികളെ ഓര്‍മിപ്പിച്ചു. അനുസ്മരണയോഗത്തിലും പ്രാര്‍ഥനാ ശുശ്രൂഷയിലും പാലാ രൂപതാ മുന്‍ അധ്യക്ഷന്‍ മാര്‍ ജോസഫ് പള്ളിക്കാപ്പറമ്പിലും രൂപതയിലെ എല്ലാ വൈദികരും പാസ്റ്ററല്‍ കൗണ്‍സില്‍ അംഗങ്ങളും കത്തീഡ്രല്‍ ഇടവകാംഗങ്ങളും പങ്കെടുത്തു. മുഖ്യവികാരി ജനറാള്‍ മോണ്‍. ജോസഫ് തടത്തില്‍ സ്വാഗതം പറഞ്ഞു.എംഎസ്ടി ഡയറക്ടര്‍ ജനറാള്‍ റവ.ഡോ. വിന്‍സെന്‍റ് ജോസഫ് കദളികാട്ടില്‍പുത്തന്‍പുര, വികാരി ജനറാള്‍മാരായ മോണ്‍. ജോസഫ് മലേപ്പറമ്പില്‍, മോണ്‍. സെബാസ്റ്റ്യന്‍ വേത്താനത്ത്, മോണ്‍. ജോസഫ് കണിയോടിക്കല്‍, കത്തീഡ്രല്‍ പള്ളി വികാരി റവ.ഡോ. ജോസ് കാക്കല്ലില്‍, രൂപത പ്രൊക്യുറേറ്റര്‍ റവ.ഡോ. ജോസഫ് മുത്തനാട്ട് എന്നിവര്‍ നേതൃത്വം നല്‍കി. രൂപത ചാന്‍സലര്‍ റവ. ഡോ. ജോസഫ് കുറ്റിയാങ്കല്‍ നന്ദി പറഞ്ഞു.

ഫ്രാൻസിസ് മാർപാപ്പ സ്മരണയിൽ കാഞ്ഞിരപ്പള്ളി രൂപതയിൽ പ്രാർഥനാദിനം

കാഞ്ഞിരപ്പള്ളി: ഫ്രാൻസിസ് മാർപാപ്പയുടെ കബറടക്ക ശുശ്രൂഷകൾ നടത്തപ്പെടുന്ന നാളെ കാഞ്ഞിരപ്പള്ളി രൂപതയിൽ പ്രത്യേക പ്രാർഥനാദിനമായി ആചരിക്കുന്നതിന് കാഞ്ഞിരപ്പള്ളി രൂപതാധ്യക്ഷൻ മാർ ജോസ് പുളിക്കൽ നിർദേശം നൽകി. രൂപതയിലെ എല്ലാ ഇടവകകളിലും പരിശുദ്ധ പിതാവിനെ അനുസ്മരിച്ച് വിശുദ്ധ കുർബാന അർപ്പിക്കുകയും ഒപ്പീസ് നടത്തുകയും ചെയ്യും. യാമ ശുശ്രൂഷകളിലുൾപ്പെടെ കുടുംബ നമസ്കാരങ്ങളിൽ പരിശുദ്ധ പിതാവിനെ പ്രത്യേകം സ്മരിക്കും. രൂപതയിലെ എല്ലാ ഓഫീസുകൾക്കും വിദ്യാഭ്യാസ സ്ഥാപനങ്ങളുൾപ്പെടെയുള്ള സ്ഥാപനങ്ങൾക്കും അവധിയായിരിക്കും. ‌മുൻകൂട്ടി നിശ്ചയിച്ച പരീക്ഷകൾ നടത്തപ്പെടുന്നതാണ്. പരിശുദ്ധ പിതാവിന്‍റെ കബറടക്ക ശുശ്രൂഷയിൽ ദൃശ്യ- ശ്രാവ്യ മാധ്യമങ്ങളിലൂടെ ആത്മനാ പങ്കുചേരുന്നതിനും നിർദേശം നൽകിയിട്ടുണ്ട്. പ്രാർഥനാദിനങ്ങളായാചരിക്കുന്ന ഒന്പതു ദിവസങ്ങളിലും രൂപതയിലെ ഇടവകകളിലെയും സ്ഥാപനങ്ങളിലെയും എല്ലാ ആഘോഷ പരിപാടികളും ഒഴിവാക്കേണ്ടതാണ്. മുൻകൂട്ടി നിശ്ചയിച്ച തിരുനാളുകളും പ്രത്യേക പ്രാധാന്യമുള്ള പരിപാടികളും മാറ്റി വയ്ക്കാനാവാത്ത സാഹചര്യമാണെങ്കിൽ മാത്രം പരിശുദ്ധ പിതാവിനെ അനുസ്മരിച്ചും അദ്ദേഹത്തോടുള്ള ആദരവ് പ്രകടിപ്പിച്ചും ആഘോഷങ്ങൾ ഒഴിവാക്കി നടത്താവുന്നതാണെന്ന് രൂപത കേന്ദ്രത്തിൽനിന്ന് അറിയിച്ചു.

മുണ്ടക്കയം ടൗണിൽ യുവാക്കൾ ചേരിതിരിഞ്ഞ് ഏറ്റുമുട്ടി

മുണ്ടക്കയം: പട്ടാപ്പകൽ മുണ്ടക്കയം ടൗണിൽ യുവാക്കൾ ചേരിതിരിഞ്ഞ് തമ്മിലടിച്ചു. ഇന്നലെ ഉച്ചകഴിഞ്ഞു മൂന്നോടെയായിരുന്നു സംഭവം. എക്സൈസ് റോഡിൽനിന്ന് ആരംഭിച്ച തമ്മിലടി ദേശീയപാതയിൽ കൂട്ടിക്കൽ ജംഗ്ഷൻ വരെയെത്തി. വാഹന പാർക്കിംഗിനെ ചൊല്ലിയുള്ള തർക്കമാണെന്നും ലഹരി വസ്തു കൈമാറ്റം ചെയ്തത് ചോദ്യം ചെയ്തതിനുള്ള തർക്കമാണെന്നും പറയപ്പെടുന്നു. ഇതിനിടയിൽ ചില ആളുകൾ വന്ന് ഇവരെ പിന്തിരിപ്പിക്കാനും ശ്രമിച്ചു. പട്ടാപ്പകൽ നടുറോട്ടിൽ യുവാക്കൾ തമ്മിൽ ഏറ്റുമുട്ടിയതോടെ വാഹനഗതാഗതം പൂർണമായും നിലച്ചു. അരമണിക്കൂറിൽ അധികം നേരം മുണ്ടക്കയം ടൗൺ പൂർണമായും ഗതാഗതക്കുരുക്കിലമർന്നു. ടൗണിന്‍റെ നടുവിൽ യുവാക്കൾ കൂട്ടം ചേർന്ന് തമ്മിലടിച്ചിട്ടും പോലീസ് ഇവിടെ എത്തിയില്ലെന്ന് നാട്ടുകാർ പറയുന്നു. ഹോംഗാർഡിന്‍റെ സേവനം പോലും ഗുണ്ടാവിളയാട്ട നേരത്ത് ടൗണിൽ ഉണ്ടായിരുന്നില്ലെന്നും ആക്ഷേപമുണ്ട്.

മണിമല ലിറ്റിൽ ഫ്ലവർ എൽപി സ്കൂൾ പഴമ നിലനിർത്തി പുതുക്കിപ്പണിയുന്നു

മണിമല: നിരവധി കുഞ്ഞുങ്ങൾക്ക് അക്ഷരവെളിച്ചം പകർന്ന മണിമല ലിറ്റിൽ ഫ്ലവർ എൽപി സ്കൂൾ പഴമ നിലനിർത്തി പുതുക്കിപ്പണിയുന്നു. 1950ൽ സ്ഥാപിതമായ സ്കൂൾ 75 വർഷം പിന്നിടുന്പോൾ ഇടവകാംഗങ്ങളുടെയും പൂർവവിദ്യാർഥികളുടെയും നാട്ടുകാരുടെയും സഹകരണത്തിലാണ് നവീകരണം നടത്തിവരുന്നത്. കരിങ്കൽ നിർമിതിയായ ഭിത്തികൾ ഇപ്പോഴും ബലവത്തായതിനാൽ ഭിത്തികൾ നിലനിർത്തി പ്ലാസ്റ്ററിംഗ് ചെയ്യും. കൂടാതെ കുട്ടികൾക്ക് കൂടുതൽ ടോയ്‌ലറ്റ് സൗകര്യങ്ങളും ഉച്ചഭക്ഷണം പാകം ചെയ്യുന്നതിനുള്ള ക്രമീകരണങ്ങളും വിപുലമാക്കും. നിർമാണ പ്രവർത്തനങ്ങൾക്ക് 85 ലക്ഷം രൂപ ചെലവ് വരുമെന്നാണ് പ്രതീക്ഷിക്കുന്നത്. പുതിയ അധ്യയനവർഷത്തിന് മുന്പ് നവീകരണം പൂർത്തിയാക്കാനാണ് സ്കൂൾ മാനേജ്മെന്‍റ് ലക്ഷ്യമിടുന്നത്.

മുട്ടപ്പള്ളി താന്നിക്കപ്പടിയിൽ റോഡിൽ സംരക്ഷണഭിത്തി നിർമാണം

മുക്കൂട്ടുതറ: ദുർബലമായ സംരക്ഷണ ഭിത്തിമൂലം ഇടിയാറായിരുന്ന റോഡിൽ അപകടാവസ്ഥ പരിഹരിക്കാൻ നിർമാണം തുടങ്ങി. പഴയ സംരക്ഷണഭിത്തി പൊളിച്ചുമാറ്റി കരിങ്കൽക്കെട്ട് തറ നിർമിച്ച് കോൺക്രീറ്റ് ചെയ്തു സംരക്ഷണഭിത്തി നിർമിക്കാനുള്ള പ്രവൃത്തികളാണ് ആരംഭിച്ചത്. മുട്ടപ്പള്ളി പിആർഡിഎസ് മന്ദിരം - താന്നിക്കപ്പടി റോഡിൽ ആണ് അപകടാവസ്ഥ പരിഹരിക്കാൻ പഞ്ചായത്ത്‌ ഫണ്ട് ഉപയോഗിച്ച് നിർമാണം തുടങ്ങിയത്. നൂറുകണക്കിന് പേർ ദിവസവും സഞ്ചരിക്കുന്ന ഈ റോഡിൽ വാഹനങ്ങൾ അപകടത്തിൽപ്പെടാൻ സാധ്യത ഏറെയുണ്ടായിരുന്ന കരിങ്കൽക്കെട്ട് ദുർബലമായിരുന്ന ഭാഗമാണ് അപകട രഹിതമാക്കുന്നത്. 1.80 ലക്ഷം രൂപയാണ് ഇതിനായി അനുവദിച്ചിട്ടുള്ളതെന്ന് വാർഡ് അംഗം എം.എസ്. സതീശ് അറിയിച്ചു. മുട്ടപ്പള്ളി വാർഡിൽ ഇതിനോടകം 13 റോഡുകളുടെ നവീകരണം പൂർത്തിയാക്കിയെന്നും അംഗം പറഞ്ഞു.

തിരുനാൾ

ഏന്തയാർ സെന്‍റ് ജോസഫ് പള്ളിയിൽ ഏന്തയാർ: സെന്‍റ് ജോസഫ് പള്ളിയിൽ വിശുദ്ധ യൗസേപ്പ് പിതാവിന്‍റെ തിരുനാൾ ഇന്നു മുതൽ മേയ്‌ നാലുവരെ നടക്കുമെന്ന് വികാരി ഫാ. സേവ്യർ മാമ്മൂട്ടിൽ അറിയിച്ചു. ഇന്ന് വൈകുന്നേരം അഞ്ചിന് ജപമാല, 5.30ന് കൊടിയേറ്റ്, വിശുദ്ധ കുർബാന, നൊവേന. നാളെ വൈകുന്നേരം അഞ്ചിന് ജപമാല, 5.30ന് വിശുദ്ധ കുർബാന, നൊവേന. 27ന് രാവിലെ 8.30ന് ജപമാല, ഒന്പതിന് വിശുദ്ധ കുർബാനയും സ്ഥൈര്യലേപന സ്വീകരണവും, നൊവേന. 28 മുതൽ മേയ് രണ്ടുവരെ വൈകുന്നേരം അഞ്ചിന് ജപമാല, 5.30ന് വിശുദ്ധ കുർബാന, നൊവേന. മേയ് മൂന്നിന് വൈകുന്നേരം അഞ്ചിന് ജപമാല, 5.30ന് വിശുദ്ധ കുർബാന, ആറിന് വേളാങ്കണ്ണി പള്ളി റോഡിലൂടെ ടൗൺചുറ്റി പള്ളിയിലേക്ക് പ്രദക്ഷിണം, ദിവ്യകാരുണ്യ ആശീർവാദം. നാലിന് രാവിലെ 9.30ന് ജപമാല, 10ന് തിരുനാൾ കുർബാന, തുടർന്ന് ഏന്തയാർ ടൗൺ കുരിശുപള്ളി ചുറ്റി പ്രദക്ഷിണം, ദിവ്യകാരുണ്യ ആശീർവാദം, സ്നേഹവിരുന്ന്. എലിക്കുളം സെന്‍റ് തോമസ് നഗർ ചാപ്പലിൽ എലിക്കുളം: സെന്‍റ് തോമസ് നഗർ ചാപ്പലിൽ മാർ തോമാശ്ലീഹായുടെയും പരിശുദ്ധ കന്യകാമറിയത്തിന്‍റെയും വിശുദ്ധ സെബസ്ത്യാനോസിന്‍റെയും സംയുക്ത തിരുനാൾ ഇന്നു മുതൽ 27 വരെ നടക്കുമെന്ന് വികാരി ഫാ. ജയിംസ് തെക്കുംചേരിക്കുന്നേൽ അറിയിച്ചു. ഇന്ന് ഉച്ചകഴിഞ്ഞ് 3.30ന് ജപമാല, വൈകുന്നേരം നാലിന് കൊടിയേറ്റ്, നൊവേന, 4.15ന് വിശുദ്ധ കുർബാന, വചനസന്ദേശം. നാളെ വൈകുന്നേരം 4.15ന് നൊവേന, 4.30ന് വിശുദ്ധ കുർബാന, വചനസന്ദേശം. 27ന് വൈകുന്നേരം 4.20ന് നൊവേന, 4.30ന് തിരുനാൾ കുർബാന, വചനസന്ദേശം, തുടർന്ന് പള്ളി ചുറ്റി പ്രദക്ഷിണം, നേർച്ച വിതരണം. പനച്ചേപ്പള്ളി ഉണ്ണിമിശിഹാ ചാപ്പലിൽ കാഞ്ഞിരപ്പള്ളി: പനച്ചേപ്പള്ളി ഉണ്ണിമിശിഹാ ചാപ്പലിൽ ഉണ്ണിമിശിഹായുടെ തിരുനാൾ ഇന്നു മുതൽ മേയ് നാലുവരെ നടക്കുമെന്ന് വികാരിയും ആർച്ച് പ്രിസ്റ്റുമായ റവ.ഡോ. കുര്യൻ താമരശേരി, അസിസ്റ്റന്‍റ് വികാരിമാരായ ഫാ. ജോസഫ് ആലപ്പാട്ടുകുന്നേൽ, ഫാ. തോമസ് മുളങ്ങാശേരിൽ എന്നിവർ അറിയിച്ചു. ഇന്നു വൈകുന്നേരം നാലിന് കൊടിയേറ്റ്, വിശുദ്ധ കുർബാന, നൊവേന. നാളെ മുതൽ മേയ് മൂന്നുവരെ വൈകുന്നേരം നാലിന് വിശുദ്ധ കുർബാന, നൊവേന. മേയ് നാലിന് രാവിലെ 9.30ന് വിശുദ്ധ കുർബാന, തുടർന്ന് പ്രദക്ഷിണം, നേർച്ച സാധനങ്ങളുടെ ലേലം, സ്നേഹവിരുന്ന്. മേയ് രണ്ടിന് വൈകുന്നേരം നാലു മുതൽ 4.30 വരെ വിശുദ്ധ കുർബാനയുടെ ആരാധനയുണ്ടായിരിക്കുന്നതാണ്.

കണമലയിൽ അപകടമൊഴിയണം; 10 കോടിയുടെ പദ്ധതി പോരാ

കണമല: പത്ത് കോടി ചെലവിട്ട് എരുമേലി - കണമല റോഡ് ഉടനെ നവീകരിക്കുന്നതിനുള്ള പദ്ധതിയിൽ കണമല ഇറക്കത്തിലെ അപകട സാധ്യതകൾ പൂർണമായി പരിഹരിക്കുന്ന പദ്ധതി പ്രത്യേകമായി തയാറാക്കി നടപ്പിലാക്കണമെന്ന് ആവശ്യം. കണമല ഇറക്കത്തിനായി പ്രത്യേകമായി പദ്ധതി വേണമെന്നാണ് ആവശ്യം. അല്ലാത്ത പക്ഷം എരുമേലി മുതൽ കണമല വരെ നീളുന്ന റോഡ് നവീകരണ പ്രവൃത്തിയിൽ കണമല ഇറക്കത്തിലെ സുരക്ഷാ പ്രവൃത്തികൾക്ക് വേണ്ടത്ര ഫണ്ടും പ്രാധാന്യവുമില്ലാതെയാകുമെന്നും ഇറക്കം വീണ്ടും പഴയപടി സ്ഥിരം അപകട മേഖലയായി തുടരുമെന്നും നാട്ടുകാർ പറയുന്നു. എരുമേലി - കണമല റോഡിൽ കരിങ്കല്ലുമുഴി കയറ്റം, എംഇഎസ് ജംഗ്ഷൻ, എരുത്വാപ്പുഴ എന്നിവിടങ്ങളും അപകട മേഖലകളാണ്. കണമല ഇറക്കത്തിലെ അപകട കാരണങ്ങൾ ശാസ്ത്രീയമായി പഠനം നടത്തി വിശകലനം ചെയ്ത് പരിഹാരം ഒരുക്കിയുള്ള സുരക്ഷാ പദ്ധതി നടപ്പിലാക്കണമെന്നാണ് ആവശ്യം. ഇതിനായി മരാമത്ത്, പോലീസ്, റോഡ് സുരക്ഷാ അഥോറിറ്റി ഉൾപ്പടെ വിവിധ സർക്കാർ വകുപ്പുകളിലെ വിദഗ്ധരടങ്ങുന്ന സമിതി രൂപീകരിച്ച് പഠനം നടത്തിയാൽ മികച്ച സുരക്ഷാ പദ്ധതി ഒരുക്കാമെന്ന് നിർദേശമുയരുന്നു. ഇക്കഴിഞ്ഞ ദിവസമാണ് എരുമേലി - കണമല റോഡിന് സർക്കാർ പത്ത് കോടി രൂപ അനുവദിച്ചതായി എംഎൽഎ സെബാസ്റ്റ്യൻ കുളത്തുങ്കൽ അറിയിച്ചത്. ഇതിന് ദിവസങ്ങൾക്ക് മുമ്പാണ് ശബരിമല തീർഥാടക ബസ് ഇറക്കത്തിൽ മറിഞ്ഞ് ഒരാൾ മരണപ്പെട്ടത്. ഈ വർഷത്തിന്‍റെ ആദ്യ ദിനമായ പുതുവത്സര ദിനത്തിൽത്തന്നെ ഇവിടെ ബസ് മറിഞ്ഞ് ഒരാൾ മരണപ്പെട്ടത്. രണ്ട് വർഷത്തിനിടെ 32 അപകടങ്ങൾ കഴിഞ്ഞ രണ്ട് വർഷത്തിനിടെ കണമല ഇറക്കത്തിലെ അപകടങ്ങളുടെ മാത്രം കണക്കെടുത്താൽ ഞെട്ടിപ്പിക്കുന്നതാണ്. 32 അപകടങ്ങളാണ് രണ്ട് വർഷത്തിനിടെ മാത്രം സംഭവിച്ചത്. മരണപ്പെട്ടവരുടെ എണ്ണം അഞ്ചാണ്. 16 വർഷം മുമ്പ് ശബരിമല തീർഥാടനത്തിന് എളുപ്പമുള്ള പാതയായി എരുമേലി - കണമല റോഡ് പ്രചാരത്തിലായതു മുതലാണ് കണമല ഇറക്കം സ്ഥിരം അപകട മേഖലയായി മാറിയത്. 2009 ഫെബുവരി 17നായിരുന്നു ആദ്യ അപകടം. ആന്ധ്രയിൽനിന്നുള്ള ഭക്തർ സഞ്ചരിച്ച ബസ് മറിഞ്ഞ് 14 ജീവനാണ് പൊലിഞ്ഞത്. 36 പേർക്ക് പരിക്കേറ്റു. 2010 ജനുവരി 12നുണ്ടായ അപകടത്തിൽ 11 പേർ മരിച്ചു. ഇതേത്തുടർന്ന് ഐജി ബി. സന്ധ്യയുടെ നേതൃത്വത്തിൽ വിവിധ വകുപ്പുകളിലെ ഉദ്യോഗസ്ഥർ ഉൾപ്പെട്ട അന്വേഷണ കമ്മീഷൻ നടത്തിയ പഠനമാണ് കണമല ഇറക്കത്തിലെ അപകടങ്ങളുടെ കാരണം തേടിയുള്ള ഏക പഠനം. എന്നാൽ, അന്വേഷണ കമ്മീഷൻ നൽകിയ പഠന റിപ്പോർട്ടിലെ നിർദേശങ്ങൾ ഇതുവരെയും നടപ്പിലായിട്ടില്ല. ഇപ്പോൾ വർഷങ്ങൾ പിന്നിട്ടിട്ടും അപകടങ്ങൾ കൂടുന്നതല്ലാതെ കുറയുന്നില്ല. ഈ സാഹചര്യത്തിൽ കോടികൾ ചെലവിട്ട് റോഡ് നവീകരണം നടത്തുന്നത് അപകടങ്ങൾ ഒഴിവാക്കുന്നതിന് കൂടുതൽ പ്രാധാന്യം നൽകി വേണമെന്നാണ് നാട്ടുകാർ ആവശ്യപ്പെടുന്നത്.

ജര്‍മനിയില്‍ സ്‌റ്റൈപെന്‍റോടെ സൗജന്യ ഉപരിപഠനം: സെമിനാര്‍ നാളെ തിരുവല്ലയില്‍

കോട്ടയം: ജൻറൈസ് ഗ്ലോബല്‍ സ്റ്റാഫിംഗും ബഥനി ഇന്‍സ്റ്റിറ്റ്യൂട്ട് ഓഫ് ലാംഗ്വേജ് സ്റ്റഡീസും ചേര്‍ന്ന് ജര്‍മനിയിലെ ഉപരിപഠന സാധ്യതകള്‍ പരിചയപ്പെടുത്തുന്നതിനായി സെമിനാര്‍ സംഘടിപ്പിക്കും. നാളെ രാവിലെ 10 മുതല്‍ തിരുവല്ല തോലശേരി പുഷ്പഗിരി റോഡിലുള്ള ബഥനി ഇന്‍സ്റ്റിറ്റ്യൂട്ട് ഓഫ് ലാംഗ്വേജ് സ്റ്റഡീസിലാണ് (ബില്‍സ്) സെമിനാര്‍ നടക്കുന്നത്. പ്ലസ് ടു വിന് 55 ശതമാനം മാര്‍ക്ക് നേടിയവര്‍ക്ക് അപേക്ഷിക്കാം. പഠന കാലത്ത് പ്രതിമാസം ഒരു ലക്ഷം രൂപ വരെ സ്‌റ്റൈപെന്‍റ് ലഭിക്കും. പഠനം പൂര്‍ത്തിയാക്കിയശേഷം പ്ലേസ്മെന്‍റ് അവസരങ്ങളും പിആര്‍ സാധ്യതകളും ലഭിക്കും. നഴ്‌സിംഗ് കൂടാതെ ഫുഡ് ടെക്‌നോളജി, ലോജിസ്റ്റിക്‌സ്, മെക്കട്രോണിക്, ഹോസ്പിറ്റാലിറ്റി മാനേജ്‌മെന്‍റ്-ഇലക്‌ട്രിക്കല്‍ മെക്കാനിക്‌സ് കോഴ്‌സുകളും സ്‌റ്റൈപെന്‍റോടെയും ഫീസില്ലാതെയും പഠിക്കാം. ജൻറൈസിലൂടെ കേരളത്തില്‍നിന്ന് ധാരാളം കുട്ടികള്‍ക്കു പ്ലേസ്മെന്‍റ് ലഭിച്ചു. മുന്‍കൂട്ടി പേര് രജിസ്റ്റര്‍ ചെയ്യുന്ന 100 പേര്‍ക്കാണ് പ്രവേശനം. ഇപ്പോള്‍ രജിസ്റ്റേര്‍ഡ് നഴ്‌സ്മാര്‍ക്കും അവസരമുണ്ട്. ബിഎസ്‌സി, ജിഎന്‍എം രജിസ്റ്റര്‍ഡ് നഴ്‌സുമാര്‍ക്ക് ജര്‍മന്‍ ഭാഷ പരിശീലനവും താമസ ഭക്ഷണ സൗകര്യവും നല്‍കും. 704242 19 27, 7428 548800. info@ genrise.in.

പരിഭ്രാന്തി പരത്തി കളക്ടറേറ്റില്‍ ബോംബ് ഭീഷണി

കോട്ടയം: പരിഭ്രാന്തി പരത്തി കളക്ടറേറ്റില്‍ ബോംബ് ഭീഷണി. ഇന്നലെ ഉച്ചയോടെ കളക്ടറുടെ മെയിലിലേക്കാണ് ഭീഷണിസന്ദേശം ലഭിച്ചത്. രണ്ടിനു ബോംബ് സ്ഫോടനം ഉണ്ടാകുമെന്നായിരുന്നു ഭീഷണി. തുടര്‍ന്ന് ബോംബ് സ്‌ക്വാഡ് പരിശോധന നടത്തി. സര്‍ക്കാറിന്‍റെ നാലാം വാര്‍ഷികാഘോഷങ്ങളുടെ ഭാഗമായി കോട്ടയത്തെ വിവിധ പരിപാടികള്‍ നടക്കുന്നതിനിടയാണ് വ്യാജ സന്ദേശം. ഭീഷണി ലഭിച്ചതിനെത്തുടര്‍ന്ന് ജീവനക്കാരെയും വിവിധ ആവശ്യങ്ങള്‍ക്കായി കളക്ടറേറ്റില്‍ എത്തിയവരെയും സുരക്ഷാ ഉദ്യോഗസ്ഥര്‍ പുറത്തിറക്കി. ബോംബ് കണ്ടെത്താന്‍ വിദഗ്ധ പരിശീലനം നേടിയ നായ്കളെ ഉപയോഗിച്ചു പരിശോധന നടത്തിയെങ്കിലും സംശയാസ്പദമായ ഒന്നും കണ്ടെത്താന്‍ സാധിച്ചില്ല. തുടര്‍ന്ന് എല്ലാവര്‍ക്കും ഓഫീസില്‍ പ്രവേശിക്കാന്‍ അനുമതി നല്‍കുകയായിരുന്നു. കോട്ടയം കൂടാതെ പാലക്കാട്, കൊല്ലം കളക്ടറേറ്റുകളിലും സമാനമായ ബോംബ് ഭീഷണി സന്ദേശം ലഭിച്ചു.

അക്ഷരനഗരിയെ വർണാഭമാക്കി സാംസ്കാരിക ഘോഷയാത്ര

കോട്ടയം: വിവിധ കലാരൂപങ്ങളുടെ അകന്പടിയോടെ എന്‍റെ കേരളം പ്രദർശന -വിപണന മേളയുടെ സാംസ്കാരിക ഘോഷയാത്ര നടത്തി. ജില്ലാ പഞ്ചായത്ത് പ്രസിഡന്‍റ് ഹേമലത പ്രേം സാഗർ ദീപശിഖ ജില്ലസ്പോർട്സ് കൗൺസിൽ പ്രസിഡൻ്റ് ഡോ. ബൈജു വർഗീസ് ഗുരുക്കൾക്ക് കൈമാറി. ജില്ല സ്പോർട്സ് കൗൺസിൽ അംഗം വി. രാജേഷ് ദീപശിഖയേന്തി ഘോഷയാത്ര നയിച്ചു. കേരളത്തനിമയും പൈതൃകവും വിളിച്ചോതുംവിധം വർണാഭമായ ഘോഷയാത്രയിൽ ജനപ്രതിനിധികൾ, തദ്ദേശ സ്വയംഭരണ സ്ഥാപനങ്ങൾ, കുടുംബശ്രീ, ഹരിതകർമ സേനാംഗങ്ങൾ, സാംസ്കാരിക പ്രവർത്തകർ തുടങ്ങിയവരുടെ പങ്കാളിത്തമുണ്ടായിരുന്നു. 33 സർക്കാർ വകുപ്പുകളിൽനിന്നുമുള്ള ജീവനക്കാർ വിവിധ നിശ്ചല ദൃശ്യങ്ങളുടെ അകമ്പടിയോടെ ഘോഷയാത്രയിൽ പങ്കെടുത്തു. ശിങ്കാരിമേളവും ബാൻഡ് മേളവും ചെണ്ടമേളവും നഗര വീഥികളിൽ ശബ്ദ വിസ്മയം തീർത്തു. കളരിപ്പയറ്റ്, വാദ്യമേളം, മുത്തുക്കുടകൾ, കാവടി എന്നിവ ഘോഷയാത്രയ്ക്ക് ചാരുത പകർന്നു. കുട്ടികളുടെ റോളർ സ്‌കെയ്റ്റിങ് ഘോഷയാത്രയുടെ പ്രധാന ആകർഷണമായി. ജില്ലയിലെ മുഴുവൻ ഗ്രാമപഞ്ചായത്തുകളും നഗരസഭകളും ബ്ലോക്കുകളും ഘോഷയാത്രയുടെ ഭാഗമായി. ഉച്ചകഴിഞ്ഞു മൂന്നിന് തിരുനക്കര മൈതാനത്തുനിന്ന് ആരംഭിച്ച ഘോഷയാത്ര നാലോടെ നാഗമ്പടം മൈതാനത്ത് അവസാനിച്ചു. ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗർ, ചങ്ങനാശേരി നഗരസഭ അധ്യക്ഷ കൃഷ്ണകുമാരി രാജശേഖരൻ, ജില്ലാ പഞ്ചായത്തംഗങ്ങളായ ഹൈമി ബോബി, പി.ആർ. അനുപമ, മഞ്ജു സുജിത്ത്, പി.എം. മാത്യു, നിർമല ജിമ്മി, ജെസി ഷാജൻ, രാജേഷ് വാളിപ്ലാക്കൽ, പഞ്ചായത്ത് പ്രസിഡന്‍റ്സ് അസോസിയേഷൻ സെക്രട്ടറി അജയൻ കെ. മേനോൻ, ബ്ലോക്ക് പഞ്ചായത്ത് പ്രസിഡന്‍റ്സ് അസോസിയേഷൻ ജില്ലാ പ്രസിഡന്‍റ് പി.വി. സുനിൽ, തദ്ദേശസ്വയംഭരണ ഡയറക്ടർ ബിനു ജോൺ, ജില്ലാ ഇൻഫർമേഷൻ ഓഫീസർ എ. അരുൺ കുമാർ എന്നിവർ നേതൃത്വം നൽകി.

സമഗ്ര മേഖലയിലും കേരളത്തിന് വലിയ മുന്നേറ്റം: മന്ത്രി വി.എന്‍. വാസവന്‍

കോട്ടയം: സമഗ്ര മേഖലയിലുമുണ്ടായ കേരളത്തിന്‍റെ നേട്ടങ്ങൾ രാജ്യത്തിനാകെ മാതൃകയാണെന്ന് മന്ത്രി വി.എന്‍. വാസവന്‍. രണ്ടാം പിണറായി വിജയന്‍ മന്ത്രിസഭയുടെ നാലാം വാര്‍ഷികാഘോഷത്തിന്‍റെയും എന്‍റെ കേരളം പ്രദര്‍ശന-വിപണനമേളയുടെയും ഉദ്ഘാടനം നാഗമ്പടം മൈതാനത്തു നിർവഹിച്ചു പ്രസംഗിക്കുകയായിരുന്നു അദ്ദേഹം. ചീഫ് വിപ്പ് ഡോ. എന്‍. ജയരാജ് അധ്യക്ഷത വഹിച്ചു. സെബാസ്റ്റ്യന്‍ കുളത്തുങ്കല്‍ എംഎൽഎ വിശിഷ്ടാതിഥിയായി. ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍, ജില്ലാ കളക്ടര്‍ ജോണ്‍ വി. സാമുവല്‍, ജില്ലാ പോലീസ് ചീഫ് എ. ഷാഹുല്‍ ഹമീദ്, സബ് കളക്ടര്‍ ഡി. രഞ്ജിത്ത്, കൃഷ്ണകുമാരി രാജശേഖരൻ, മുകേഷ് കെ. മണി, പി.വി. സുനില്‍, അജയന്‍ കെ. മേനോന്‍, ജോസ് പുത്തന്‍കാലാ, മഞ്ജു സുജിത്, പി.എം. മാത്യു, പി.ആർ. അനുപമ, ഹൈമി ബോബി, നിർമല ജിമ്മി എന്നിവര്‍ പങ്കെടുത്തു. മേളയില്‍ സര്‍ക്കാര്‍ വകുപ്പുകളുടെയും പൊതുമേഖലാ-സ്വയംഭരണ സ്ഥാപനങ്ങളുടെയും 186 സ്റ്റാളുകളാണുള്ളത്. 45,000 ചതുരശ്ര അടി ശീതീകരിച്ച പവലിയന്‍ ഉള്‍പ്പെടെ 69,000 ചതുരശ്ര അടിയിലാണ് പ്രദര്‍ശന വിപണനമേള നടക്കുന്നത്. എല്ലാദിവസവും രാവിലെ 9.30 മുതല്‍ രാത്രി 9.30 വരെയാണ് മേള. പ്രവേശനം സൗജന്യം. കാഴ്ചകളുടെ വിസ്മയമൊരുക്കി പവിലിയനുകൾ കോട്ടയം: എന്‍റെ കേരളം പ്രദർശന വിപണനമേളയിൽ വൈവിധ്യമാർന്ന ഏഴ് പവിലിയനുകൾ പ്രധാന ശ്രദ്ധാകേന്ദ്രങ്ങളാ കുന്നു. ക്ഷേമ പെൻഷൻ മുതൽ ലൈഫ് മിഷൻ പദ്ധതി വരെ സർക്കാരിന്‍റെ നേതൃത്വത്തിൽ നടപ്പാക്കിയിട്ടുള്ള പദ്ധതികളേപ്പറ്റിയുള്ള കൃത്യമായ വിവരങ്ങൾ ജനങ്ങളിൽ എത്തിച്ചുകൊണ്ടാണ് ഇൻഫർമേഷൻ പബ്ലിക് റിലേഷൻസ് വകുപ്പ് തയാറാക്കിയ എന്‍റെ കേരളം തീം പവലിയൻ ക്രമീകരിച്ചിരിക്കുന്നത്. എന്‍റെ കേരളം മാഗസിൻ കവർ സ്റ്റാറായി തിളങ്ങാനുള്ള അവസരവും ഇവിടെ കാണിക്കളെ കാത്തിരിക്കുന്നു. പിണറായി വിജയൻ സർക്കാർ ഭരണകാലത്തെ പ്രധാനപ്പെട്ട നിമിഷങ്ങൾ കോർത്തിണക്കിക്കൊണ്ട് സജ്ജീകരിച്ചിട്ടുള്ള ഫോട്ടോവോളും പ്രധാന ആകർഷണമാണ്. സർക്കാർ ധനസഹായ പദ്ധതികളേപ്പറ്റി വിശദീകരിക്കുന്ന പുസ്തകത്തിന്‍റെ സൗജന്യ വിതരണവും പവിലിയനിൽ ഉണ്ട്. കേരള സ്റ്റാർട്ടപ്പ് മിഷൻ പവലിയനിൽ നിര്‍മിത ബുദ്ധി, ഓഗ്മെന്‍റഡ് റിയാലിറ്റി/ വെര്‍ച്വല്‍ റിയാലിറ്റി, ഡ്രോണ്‍, റോബോട്ടിക്സ്, ഐഒടി തുടങ്ങിയ സാങ്കേതികവിദ്യകളുടെ പ്രദര്‍ശനമാണ് നടത്തുന്നത്. ഫിറ്റ്നസ് സോണും ഹെൽത്ത്‌ സോണുമാണ് പ്രധാനമായും കായിക വകുപ്പിന്‍റെ പവലിയനിൽ ഒരുക്കിയിരിക്കുന്നത്. ഒരു വെള്ളച്ചാട്ടത്തിലൂടെ കടന്നുപോകുന്ന അനുഭൂതി പകർന്നു നൽകുന്നതാണ് 17 അടി പൊക്കത്തിൽ നിർമിച്ചിരിക്കുന്ന കിഫ്‌ബി പവിലിയൻ. കിഫ്‌ബി ഫണ്ട്‌ ചെയ്തിരിക്കുന്ന പ്രോജക്ടുകളുടെ ദൃശ്യാവിഷ് കാരമാണ് ഈ തുരങ്കമാതൃകയിൽ സൃഷ്ടിച്ചിരിക്കുന്ന പവിലിയനിൽ ഒരുക്കിയിരിക്കുന്നത്. ടൂറിസം-പൊതുമരാമത്ത് വകുപ്പുകളുടെ പവലിയൻ സന്ദർശിക്കുന്ന ഏവർക്കും വ്യത്യസ്തമായ അനുഭവം പകർന്നു നൽകുന്നതാണ് വികസനപാലം. ടൂറിസം വകുപ്പിൽ നിന്ന് പൊതുമരാമത്ത് വകുപ്പിന്‍റെ പ്രദർശനത്തിലേക്ക് ജനങ്ങൾക്ക് ഈ പാലത്തിലൂടെ നടന്നു കയറാം. കൃഷിവകുപ്പിന്‍റെ ഫാമുകളിൽ ഉത്പാദിപ്പിക്കുന്ന കേരളഗ്രോ ബ്രാൻഡ് ഉത്പന്നങ്ങളുടെ വമ്പിച്ച ശേഖരമാണ് കൃഷിവകുപ്പിന്‍റെ പവലിയനിയിൽ ഒരുങ്ങിയിരിക്കുന്നത്. എക്കാലവും ചലച്ചിത്ര ആസ്വാദകരുടെ മനസിൽ നിറഞ്ഞ് നിൽക്കുന്ന ഒരു പിടി നല്ല സിനിമകളുമായി മിനി തിയറ്ററും മേളയുടെ ഭാഗമായി ഒരുങ്ങിക്കഴിഞ്ഞു.

ഫ്രാന്‍സിസ് പാപ്പായ്ക്ക് ചങ്ങനാശേരി അതിരൂപതയുടെ പ്രണാമം ഇന്ന്

ചങ്ങനാശേരി: ഫ്രാന്‍സിസ് പാപ്പായ്ക്ക് പ്രണാമമര്‍പ്പിച്ചു ചങ്ങനാശേരി അതിരൂപത സെന്‍റ് മേരീസ് മെത്രാപ്പോലീത്തന്‍ പള്ളിയില്‍ പ്രര്‍ഥനാശുശ്രൂഷകളും അനുസ്മരണ സമ്മേളനവും നടത്തും. ഉച്ചകഴിഞ്ഞ് മൂന്നിനു നടക്കുന്ന വിശുദ്ധകുര്‍ബാനയ്ക്കും തുടര്‍ന്നുള്ള ഒപ്പീസിനും ആര്‍ച്ച്ബിഷപ് മാര്‍ തോമസ് തറയില്‍ മുഖ്യകാര്‍മികനായിരിക്കും. തുടര്‍ന്നു നടക്കുന്ന അനുസ്മരണ സമ്മേളനത്തില്‍ ആര്‍ച്ച്ബിഷപ് മാര്‍ തോമസ് തറയില്‍ അധ്യക്ഷത വഹിക്കും. മന്ത്രി വി.എന്‍. വാസവന്‍ ഉദ്ഘാടനം ചെയ്യും. മലങ്കര ഓര്‍ത്തഡോക്സ് സഭാധ്യക്ഷന്‍ ബസേലിയോസ് മാര്‍ത്തോമ മാത്യൂസ് തൃതീയന്‍ കാതോലിക്കാ ബാവ അനുഗ്രഹപ്രഭാഷണവും അനുസ്മരണവും നടത്തും. ആര്‍ച്ച്ബിഷപ് മാര്‍ ജോസഫ് പെരുന്തോട്ടം, മാര്‍ത്തോമാ സഭ അടൂര്‍ ഭദ്രാസനാധിപന്‍ മാത്യൂസ് മാര്‍ സെറാഫിം എപ്പിസ്‌കോപ്പ, സുറിയാനി ഓര്‍ത്തഡോക്‌സ് സഭ ജറൂസലേം പാത്രിയര്‍ക്കല്‍ വികാര്‍ മാത്യൂസ് മാര്‍ തിമോത്തിയോസ് മെത്രാപ്പോലീത്ത, റവ.ഡോ. തോമസ് സാമുവല്‍, കുറിച്ചി അദ്വൈത വിദ്യാശ്രമത്തിലെ സ്വാമി വിശാലാനന്ദ, പുതൂര്‍പള്ളി മുസ്‌ലിം ജമാ അത്ത് പ്രസിഡന്‍റ് ടി.പി. അബ്ദുള്‍ ഹമീദ്, ചങ്ങനാശരി അതിരൂപത മുഖ്യ വികാരി ജനറാള്‍ മോണ്‍. ആന്‍റണി ഏത്തക്കാട്ട്, പാസ്റ്ററല്‍ കൗണ്‍സില്‍ ജോയിന്‍റ് സെക്രട്ടറി ബിജു സെബാസ്റ്റ്യന്‍ എന്നിവര്‍ പ്രസംഗിക്കും. അതിരൂപത വികാരി ജനറാള്‍മാരായ മോണ്‍. മാത്യു ചങ്ങങ്കരി, മോണ്‍. സ്‌കറിയ കന്യാകോണില്‍, പ്രൊക്കുറേറ്റര്‍ ഫാ. ആന്‍റണി മാളേക്കല്‍, ചാന്‍സിലര്‍ ഫാ. ജോര്‍ജ് പുതുമനമൂഴിയില്‍, കത്തീഡ്രല്‍ വികാരി ഫാ. ജോസഫ് വാണിയപുരയ്ക്കല്‍ എന്നിവര്‍ നേതൃത്വം നല്‍കും. അനുസ്മരണ കുർബാനയിലും സമ്മേളനത്തിലും എല്ലാ ഫൊറോനാ വികാരിമാരും അതിരൂപത-സന്യസ്ത വൈദീകർ, സമർപ്പിതർ, പാസ്റ്ററൽ-ഫൊറോനാ കൗൺസിൽ അംഗങ്ങൾ, പാരീഷ്കൗൺസിൽ അംഗങ്ങൾ, സംഘടനാ ഭാരവാഹികൾ, മതാധ്യാപകർ, കുടുംബകൂട്ടായ്മ ഭാരവാഹികൾ തുടങ്ങിയവർ പങ്കെടുക്കും.

ഫ്രാന്‍സിസ് പാപ്പാ നൽകിയ സമ്മാനങ്ങള്‍ നിധിപോലെ സൂക്ഷിച്ച് പി.യു. തോമസ്

കോട്ടയം: ആര്‍പ്പൂക്കര നവജീവന്‍ കേന്ദ്രമന്ദിരത്തില്‍ ഫ്രാന്‍സിസ് മാര്‍പാപ്പ ആശിര്‍വദിച്ചു സമ്മാനിച്ച മെഡലും കോട്ടും സര്‍ട്ടിഫിക്കറ്റും അതിപൂജ്യമായി സൂക്ഷിക്കുകയാണ് മാനേജിംഗ് ട്രസ്റ്റി പി.യു. തോമസ്. അഗതികള്‍ക്ക് അഭയവും അനേകര്‍ക്ക് അന്നവും അനാഥര്‍ക്ക് അശ്വാസവും പകരുന്ന പി.യു. തോമസിന് തികച്ചും യോഗ്യന്‍ എന്ന ബഹുമതിയാണ് ഫ്രാന്‍സിസ് മാര്‍പാപ്പ സമ്മാനിച്ചത്. 2014 നവംബര്‍ 24ന് ചാവറ കുര്യാക്കോസ് ഏലിയാസച്ചനെ വിശുദ്ധനായി പ്രഖ്യാപിച്ച ചടങ്ങില്‍ പങ്കെടുക്കാന്‍ വത്തിക്കാനിലെത്തിയപ്പോള്‍ ഫ്രാന്‍സിസ് മാര്‍പാപ്പയെ കാണാന്‍ കഴിഞ്ഞതും നവജീവന്‍ ട്രസ്റ്റ് നടത്തുന്ന ജീവകാരുണ്യ വിവരങ്ങളടങ്ങിയ ആല്‍ബം കൈമാറാന്‍ സാധിച്ചതും പി.യു. തോമസിന് വലിയ അഭിമാനം പകര്‍ന്ന നിമിഷമാണ്. നവജീവന്‍റെ പ്രവര്‍ത്തനങ്ങള്‍ അറിഞ്ഞ മാര്‍പാപ്പ പി.യു. തോമസിനുള്ള ആദരം ചങ്ങനാശേരി ആര്‍ച്ച്ബിഷപ്പായിരുന്ന മാര്‍ ജോസഫ് പെരുന്തോട്ടത്തിന് അയച്ചുകൊടുത്തു. എടത്വയില്‍ നടന്ന ഒരു ചടങ്ങില്‍ മാര്‍പാപ്പ അയച്ചുകൊടുത്ത കോട്ടും മെഡലും സര്‍ട്ടിഫിക്കറ്റും തോമസിന് കൈമാറി. തനിക്ക് ലഭിച്ച ആദരം പി.യു. തോമസും നവജീവന്‍ പ്രവര്‍ത്തകരും നിധിപോലെ സൂക്ഷിക്കുകയാണ്. മഞ്ഞയും വെള്ളയും കലര്‍ന്ന പേപ്പല്‍ റിബണില്‍ പതിച്ച കാശുരൂപവും ചുവപ്പുനിറമുള്ള കോട്ടും ഇറ്റാലിയന്‍ ഭാഷയിലുള്ള അനുഗ്രഹപത്രവും നവജീവനു ലഭിച്ച ഏറ്റവും വലിയ ആദരവായിരുന്നു.

അരുവിത്തുറ വല്യച്ചൻ എഴുന്നള്ളി; അനുഗ്രഹനിറവിൽ വിശ്വാസികൾ

അരുവിത്തുറ: വിശുദ്ധ ഗീവർഗീസ് സഹദായുടെ അനുഗ്രഹംതേടി വിശ്വാസികളുടെ തിരക്കേറി. ആഘോഷങ്ങളും മേളങ്ങളും മാറ്റിനിർത്തി തിരുക്കർമങ്ങൾ മാത്രമായി നടത്തിയ തിരുനാളിൽ രാവിലെ മുതൽ പള്ളിയും പരിസരവും വിശ്വാസികളെക്കൊണ്ട് നിറഞ്ഞിരുന്നു. ആയിരങ്ങളാണ് വല്യച്ചന്‍റെ അനുഗ്രഹംതേടി തിരുക്കർമങ്ങളിലും പ്രദക്ഷിണത്തിലും പങ്കെടുത്തത്. രാവിലെ 10ന് സീറോമലബാർ കൂരിയ ബിഷപ് മാർ സെബാസ്റ്റ്യൻ വാണിയപ്പുരയ്ക്കലിന്‍റെ മുഖ്യകാർമികത്വത്തിൽ തിരുനാൾ റാസ അർപ്പിച്ച് സന്ദേശം നൽകി. കാലം ചെയ്ത പരിശുദ്ധ ഫ്രാൻസിസ് മാർപാപ്പയ്ക്ക് വി. പത്രോസിന്‍റെ ബസിലിക്കയിൽ ലോകമെമ്പാടുമുള്ള വിശ്വാസീസമൂഹം ആദാരഞ്‌ജലി അർപ്പിക്കുന്ന വേളയിൽ അദ്ദേഹത്തിന്‍റെ ആത്മശാന്തിക്കായും പുതിയ മാർപാപ്പയെ തെരഞ്ഞെടുക്കുന്ന പ്രക്രിയയിൽ ഉൾപ്പെട്ടവരെ ആത്മാവിൽ നിറയ്ക്കാനും ഈ ബലിയിൽ പങ്കെടുക്കുന്ന എല്ലാവരും പ്രാർഥിക്കണമെന്ന് അദ്ദേഹം പറഞ്ഞു. റാസയ്ക്കു ശേഷം ആചാരങ്ങളോടെ വി. ഗീവർഗീസ് സഹദായുടെയും മറ്റ് വിശുദ്ധരുടെയും തിരുസ്വരൂപങ്ങൾ സംവഹിച്ച് പള്ളിക്ക് ചുറ്റും നടത്തിയ പ്രദക്ഷിണം ഭക്തിയാദര, വിശ്വാസ നിർഭരമായി. ജപമാല സമർപ്പിച്ച് നടത്തിയ പ്രദക്ഷിണത്തിൽ ആയിരങ്ങളാണ് പങ്കുചേർന്നത്. മുത്തുക്കുടകളും ആലവട്ടവും വെഞ്ചാമരവും പള്ളിമണിനാദങ്ങളും പ്രദക്ഷിണത്തിന് അകമ്പടിയേകി. ഇന്ന് ഏപ്രിൽ 25ന് ഇടവകക്കാരുടെ തിരുനാൾ. രാവിലെ 5.30നും 6.45നും എട്ടിനും 9.15നും 10.30നും 12നും 1.30 നും 2.45നും വിശുദ്ധ കുർബാന, നൊവേന. 4.30ന് കാഞ്ഞിരപ്പള്ളി രൂപതാ മെത്രാൻ മാർ ജോസ് പുളിക്കൽ വി. കുർബാന അർപ്പിക്കും. ഏഴിന് വി. ഗീവർഗീസ് സഹദായുടെ തിരുസ്വരൂപം അൾത്താരയിൽ പുനഃപ്രതിഷ്ഠിക്കും. നാളെ രാവിലെ 5.30നും 6.30നും 7.30നും 10.30നും വൈകുന്നേരം നാലിനും നൊവേന. 28, 29, 30 തീയതികളിൽ രാവിലെ 5.30നും 6.30നും 7.30നും 10.30നും നാലിനും വൈകുന്നേരം ഏഴിനും വിശുദ്ധ കുർബാന, നൊവേന. എട്ടാമിടമായ മേയ് ഒന്നിന് തിരുനാൾ സമാപിക്കും. രാവിലെ 5.30, 6.45, 8.00, 10.30, 12.00, 1.30, 2.45, 6.30 സമയങ്ങളിൽ വിശുദ്ധ കുർബാന, നൊവേന. നാലിന് ഷംഷാബാദ് രൂപത സഹായ മെത്രാൻ മാർ ജോസഫ് കൊല്ലംപറമ്പിൽ വി. കുർബാന അർപ്പിക്കും. മേയ് രണ്ട് മരിച്ചവരുടെ ഓർമ ദിനം, സെമിത്തേരി സന്ദർശനം. രാവിലെ 5.30നും 6.30നും എട്ടിനും ഒന്പതിനും 10.30നും 12നും 2.30നും നാലിനും വിശുദ്ധ കുർബാന.

ഡിജിറ്റല്‍ സര്‍വേ: ഭൂവുടമകള്‍ രേഖകള്‍ ഹാജരാക്കണം

ചങ്ങനാശേരി: വൈക്കം ഒന്ന് റീസര്‍വേ സൂപ്രണ്ട് ഓഫീസിന്‍റെ കീഴില്‍ ഡിജിറ്റല്‍ സര്‍വേ നടന്നുവരുന്ന വാഴപ്പള്ളി കിഴക്ക് വില്ലേജിന്‍റെ ഫീല്‍ഡ് ജോലികള്‍ പൂര്‍ത്തിയാക്കി 9(2) നോട്ടീസ് പ്രസിദ്ധപ്പെടുത്തിയിരുന്നെങ്കിലും കുറെ ഭൂവുടമകളുടെ റിക്കാര്‍ഡുകള്‍ പരിശോധിച്ച് രേഖപ്പെടുത്താനും മൊബൈല്‍ നമ്പര്‍ വെരിഫിക്കേഷനും നടത്താനുണ്ട്. വെരിഫിക്കേഷന്‍ നടത്താത്ത ഭൂവുടമകള്‍ ചങ്ങനാശേരി അരമനയ്ക്ക് എതിര്‍വശത്തുള്ള പാസ്റ്ററല്‍ സെന്‍ററില്‍ പ്രവര്‍ത്തിക്കുന്ന ഡിജിറ്റല്‍ സര്‍വേ ക്യാമ്പ് ഓഫീസില്‍ ഭൂമിയുടെ അവകാശരേഖകളുമായി ഹാജരാകണമെന്ന് റീസര്‍വേ സൂപ്രണ്ട് അറിയിച്ചു. ഫോൺ: 7559913263, 8943803623.

ചെത്തിപ്പുഴയിൽ അന്താരാഷ്‌ട്ര ലാബ് വാരം ആഘോഷം

ചെത്തിപ്പുഴ: അന്താരാഷ്‌ട്ര ലാബ് വീക്കിന്‍റെ ഭാഗമായി ചെത്തിപ്പുഴ സെന്‍റ് തോമസ് ആശുപത്രിയും ചെത്തിപ്പുഴ സെന്‍റ് തോമസ് കോളജ് ഓഫ് അലൈഡ് ഹെല്‍ത്ത് സയന്‍സസും ചേര്‍ന്ന് പരിപാടികള്‍ സംഘടിപ്പിക്കുന്നു. ജില്ലാ കളക്ടര്‍ ജോണ്‍ വി. സാമുവല്‍ ഉദ്ഘാടനം നിര്‍വഹിച്ചു. ലബോറട്ടറി മേഖലയിലെ പുതിയ ശാസ്ത്രീയ മുന്നേറ്റങ്ങളെക്കുറിച്ചും ഭാവിയിലെ സാധ്യതകളെക്കുറിച്ചും വിദ്യാര്‍ഥികള്‍ക്കും ലബോറട്ടറി ടെക്‌നിഷന്‍മാര്‍ക്കുമായി സംഘടിപ്പിച്ച സയന്‍റിഫിക് കോണ്‍ഫറന്‍സില്‍ വിവിധ കോളജുകളില്‍നിന്നും ലബോറട്ടറി മേഖലയില്‍നിന്നുമായി മുന്നൂറോളം പേര്‍ പങ്കെടുത്തു. ലാബ് വാരാചരണത്തിന്‍റെ ഭാഗമായി പൊതുജനങ്ങള്‍ക്കായി 1510 രൂപ വിലയുള്ള പ്രത്യേക ഹെല്‍ത്ത് ചെക്കപ്പ് പാക്കേജ് 1100 രൂപയ്ക്ക് ഒരുക്കിയിട്ടിട്ടുണ്ട്. വരുംദിവസങ്ങളില്‍ പൊതുജനങ്ങള്‍ക്കായി വിവിധയിടങ്ങളില്‍ സൗജന്യ ഷുഗര്‍ പരിശോധന, കലാ-കായിക-സാംസ്‌കാരിക പരിപാടികള്‍ എന്നിവ സംഘടിപ്പിക്കും. ലാബ് മേഖലയിലെ പ്രവര്‍ത്തകരുടെ സംഭാവനകളെ അംഗീകരിക്കുകയും പുതിയ തലമുറയെ ഈ മേഖലയിലേക്ക് ആകര്‍ഷിക്കുകയും ചെയ്യുന്ന വേദിയാണ് ലാബ് വീക്ക് ആഘോഷങ്ങളുടെ ലക്ഷ്യമെന്ന് ഹോസ്പിറ്റല്‍ എക്‌സിക്യൂട്ടീവ് ഡയറക്ടര്‍ ഫാ. ജയിംസ് പി. കുന്നത്ത് അറിയിച്ചു. അസോസിയേറ്റ് ഡയറക്ടര്‍മാരായ ഫാ. ജോഷി മുപ്പതില്‍ചിറ, ഫാ. ജേക്കബ് അത്തിക്കളം, ഫാ. ജോസ് പുത്തന്‍ചിറ, പ്രഫ.ഡോ.എന്‍. രാധാകൃഷ്ണന്‍, പ്രഫ.ഡോ. ജി. സുലോചന, ഡോ. ആന്‍ മേരി ജോണ്‍, ഡോ. ശ്രുതി തോമസ്, മെജിന്‍ തെരേസ ജയിംസ് എന്നിവര്‍ നേതൃത്വം നല്‍കി.

മഹാസംഗമ ദിനത്തില്‍ മാടപ്പള്ളിയില്‍ സില്‍വര്‍ലൈന്‍ പ്രതിഷേധ സംഗമം

മാടപ്പള്ളി: സര്‍ക്കാരിന്‍റെ നാലാംവാര്‍ഷികത്തോടനുബന്ധിച്ച് കോട്ടയത്ത് മഹാസംഗമം സംഘടിപ്പിക്കുന്ന 29ന് രാവിലെ പത്തിന് മാടപ്പള്ളിയിലെ സില്‍വര്‍ലൈന്‍വിരുദ്ധ സമരപ്പന്തലില്‍ പ്രതിഷേധസംഗമം സംഘടിപ്പിക്കുന്നു. നിര്‍ദിഷ്‌ട സില്‍വര്‍ലൈന്‍ പദ്ധതി പ്രഖ്യാപനത്തിന്‍റെ ഭാഗമായി ദുരിതമനുഭവിക്കുന്നവര്‍, പ്രതിഷേധിച്ചതിന്‍റെ പേരില്‍ കേസുകളില്‍ അകപ്പെട്ടവര്‍, പോലീസ് മര്‍ദനത്തിനിരയായവര്‍ തുടങ്ങി സമരാനുഭാവികളെ ഉള്‍പ്പെടുത്തിയാണ് സംഗമം സംഘടിപ്പിക്കുന്നതെന്ന് സമരസമിതി ജില്ലാ ചെയര്‍മാന്‍ ബാബു കുട്ടന്‍ചിറ പറഞ്ഞു.

എന്‍എച്ച് 183ൽ ടാറിംഗ് പൂര്‍ത്തിയായ ഉടനെ ചങ്ങനാശേരി കെഎസ്ആര്‍ടിസി ജംഗ്ഷനില്‍ പൈപ്പ് പൊട്ടി റോഡ് തകര്‍ന്നു

ചങ്ങനാശേരി: എന്‍എച്ച് 183 റോഡ് ടാറിംഗ് പൂര്‍ത്തിയായ ഉടനെ കെഎസ്ആര്‍ടിസി ജംഗ്ഷനില്‍ പൈപ്പുപൊട്ടി റോഡ് തകര്‍ന്നു. പെരുന്ന മലേക്കുന്നിലെ ഓവര്‍ഹെഡ് ടാങ്കില്‍ നിന്നു ജനറല്‍ ആശുപത്രിയിലേക്ക് ശുദ്ധജലം എത്തിക്കുന്ന പൈപ്പാണ് പൊട്ടിയത്. പൈപ്പ് പൊട്ടിയതിനെത്തുടര്‍ന്ന് ഈ ലൈനില്‍ രണ്ടുദിവസം ശുദ്ധജലവിതരണം തടസപ്പെട്ടു. ടാറിംഗ് പൂര്‍ത്തിയായിട്ട് രണ്ടാഴ്ച പിന്നിടുമ്പോഴാണ് പൈപ്പ് പൊട്ടിയത്. പ്രധാനപ്പെട്ട റേഡായതിനാല്‍ വാട്ടര്‍ അഥോറിറ്റി അധികൃതര്‍ പൊടുന്നനെ ഇടപെട്ട് പൊട്ടിയ പൈപ്പുമാറ്റി സ്ഥാപിച്ച് ഇന്നലെ രാത്രിയോടെ ജലവിതരണം പുനരാരംഭിച്ചു. പൈപ്പ് മാറ്റി സ്ഥാപിക്കുന്നതിനായി കുഴിച്ച ഭാഗത്ത് അറ്റകുറ്റപ്പണികള്‍ നടത്തുന്നതിന് നടപടി സ്വീകരിക്കുമെന്ന് വാട്ടര്‍ അഥോറിറ്റി അധികൃതര്‍ പറഞ്ഞു. കേന്ദ്രവിഷ്‌കൃത ഫണ്ട് വിനിയോഗിച്ച് നഗരസഭ 15 വര്‍ഷംമുമ്പ് സ്ഥാപിച്ചതാണ് മലേക്കുന്ന് ജലവിതരണ പദ്ധതി. ഏഴുവര്‍ഷംമുമ്പ് കെഎസ്ടിപി എംസി റോഡ് നവീകരണം നടത്തിയെങ്കിലും പെരുന്ന മുതല്‍ കെഎസ്ആര്‍ടിസി ജംഗ്ഷന്‍വരെയുള്ള മലേക്കുന്ന് പദ്ധതിയുടെ പൈപ്പ് മാറ്റി സ്ഥാപിച്ചിരുന്നില്ല.

വാഴൂർ റോഡിൽ മാന്തുരുത്തി ഭാഗത്ത് അപകടങ്ങൾ പതിവ്; സുരക്ഷ ഒരുക്കാതെ അധികൃതർ

മാന്തുരുത്തി: കറുകച്ചാൽ -വാഴൂർ റോഡിലെ കോക്കുന്നേൽപ്പടി, ആഴാംചിറ, മാന്തുരുത്തി കുരിശുകവല ഭാഗങ്ങളിൽ അപകടങ്ങൾ പതിവായിട്ടും സുരക്ഷാ മുൻകരുതലുകൾ ഒരുക്കുന്നതിൽ അധികൃതർ വീഴ്ച വരുത്തുന്നതായി ആക്ഷേപം. മാന്തുരുത്തി കുരിശുകവല മുതൽ നെടുംകുന്നം നോർത്ത് 12 -ാം മൈൽ വരെയുള്ള മുക്കാൽ കിലോമീറ്ററോളം ഭാഗത്ത് ഉണ്ടായ അപകടങ്ങൾ നിരവധിയാണ്. കൊടുംവളവുകളും റോഡ് നിർമാണത്തിലെ അപാകതകളും വാഹനങ്ങളുടെ അമിതവേഗവുമാണ് അപകടങ്ങൾക്കു കാരണമെന്ന് നാട്ടുകാർ പറയുന്നു. ആഴാംച്ചിറപ്പടി, കോക്കുന്നേൽപ്പടി, ചേർക്കോട്ട് ഭാഗം തുടങ്ങിയ ഭാഗങ്ങളിൽ കൊടുംവളവാണ്. ഇവിടങ്ങളിൽ മുന്നറിയിപ്പ് ബോർഡുകൾ നിലവിലില്ല. കുരിശുകവലയിലെ അപകടങ്ങൾക്കു കാരണം റോഡിലെ വഴുക്കലും സുരക്ഷാ ക്രമീകരണങ്ങളുടെ അഭാവവുമാണ്. കോക്കുന്നേൽപ്പടിയിൽ കഴിഞ്ഞദിവസം കാർ ബസിലിടിച്ച് കാർ യാത്രികരായ സഹോദരങ്ങൾക്കു സാരമായ പരിക്കേറ്റിരുന്നു. ആറുമാസം മുന്പ് ഇതേ സ്ഥലത്ത് ദിശതെറ്റിയെത്തിയ കാർ ബസിലിടിച്ച് ഒരാൾ മരിച്ചു. മൂന്നുപേർക്ക് സാരമായി പരിക്കേറ്റു. ഓട്ടോറിക്ഷയിൽ കാറിടിച്ച് ഓട്ടോ ഡ്രൈവറും മരിച്ചിരുന്നു. കോക്കുന്നേൽപ്പടി മുതൽ മാന്തുരുത്തി വരെ റോഡിനു വളവുകളും ചെറിയ ഇറക്കവുമാണ് . ഇരുഭാഗത്തുനിന്നു വരുന്ന വാഹനങ്ങൾ നല്ല വേഗത്തിലുമായിരിക്കും. ആഴാംചിറ വളവിൽ ദിശതെറ്റിയെത്തുന്ന വാഹനങ്ങളാണ് അപകടത്തിൽപ്പെടുന്നതിലേറെയും. അപകടം പതിവായ കോക്കുന്നേൽപ്പടി-പന്ത്രണ്ടാംമൈൽ ഭാഗത്ത് റംബിൾ സ്ട്രിപ്പുകൾ സ്ഥാപിച്ചതോടെ അപകടങ്ങൾ കുറഞ്ഞു. ആഴാംചിറ ഭാഗത്തും കുരിശുകവലയിലും കൂടുതൽ സുരക്ഷ ഒരുക്കണമെന്നാണ് നാട്ടുകാരുടെ ആവശ്യം. പാമ്പാടി റോഡിൽനിന്നു വാഴൂർ റോഡിലേക്ക് തിരിയുന്ന കുരിശുകവലയിൽ യെല്ലോ ബോക്സും റംബിൾ സ്ട്രിപ്പുകളും വേണമെന്നാണ് ഡ്രൈവർമാർ പറയുന്നത്.

മാര്‍ക്കറ്റില്‍ മോരുംവെള്ളം വിതരണവുമായി മാതൃ-പിതൃവേദി പ്രവര്‍ത്തകര്‍

ചങ്ങനാശേരി: മാതൃ-പിതൃ വേദി ചങ്ങനാശേരി ഫൊറോനസമിതിയുടെ നേതൃത്വത്തില്‍ മാര്‍ക്കറ്റിലെ കുളത്തുങ്കല്‍ ബില്‍ഡിംഗില്‍ ആരംഭിച്ച തണ്ണീര്‍പന്തല്‍ നൂറു കണക്കിനാളുകള്‍ക്ക് ആശ്രയമാകുന്നു. തണ്ണീര്‍പന്തലില്‍ മേയ് ഒമ്പതുവരെ മോരുംവെള്ളം വിതരണം ചെയ്യും. ആദ്യദിവസം ഫൊറോന സമിതി തണ്ണീർപന്തലിനു നേതൃത്വം നൽകി. രണ്ടാം ദിവസം മുതൽ ഫൊറോനാ പരിധിയിലെ ഇടവകകളിൽനിന്നുള്ള മാതൃ-പിതൃവേദി യൂണിറ്റുകളാണ് നേതൃത്വം നൽകുന്നത്. രാവിലെ 11നാണ് തണ്ണീര്‍പന്തൽ പ്രവർത്തനം തുടങ്ങുന്നത്. മാടപ്പള്ളി ബ്ലോക്ക് പഞ്ചായത്ത് മുന്‍ പ്രസിഡന്‍റ് വി.ജെ. ലാലി കത്തീഡ്രല്‍ പള്ളി അസിസ്റ്റന്‍റ് വികാരി ഫാ. ഷെറിന്‍ കുറശേരിക്ക് മോരുംവെള്ളം നല്‍കി ഉദ്ഘാടനം നിർവഹിച്ചു. പിതൃവേദി ഫൊറോനാ പ്രസിഡന്‍റ് ജോര്‍ജി തേവലക്കര അധ്യക്ഷത വഹിച്ചു. മാതൃവേദി പ്രസിഡന്‍റ് ആശ ജോസഫ്, ബിനോ ജോണ്‍, ലവ്‌ലി മാളേക്കല്‍, ഷിനോയ് സെബാസ്റ്റ്യന്‍, എബിന്‍ ആന്‍റണി, സാനിയ റോബിന്‍, ജൈനമ്മ സജി, പ്രിന്‍സി ഷാജി, സാലി ജോജി, ടോണ്‍ ഐസക്, ഷൈല രാജു, വർഗീസ് മാമ്പറന്പില്‍, മാര്‍ട്ടിന്‍ പുല്ലുകാട്ടുപറമ്പില്‍ എന്നിവര്‍ പ്രസംഗിച്ചു.

ഫ്രാന്‍സിസ് പാപ്പാ അനുസ്മരണം

ചങ്ങനാശേരി: ഫ്രാന്‍സിസ് പാപ്പായുടെ വിയോഗത്തില്‍ അതിരൂപത കെസിബിസി മദ്യവിരുദ്ധ സമിതി ദുഃഖം രേഖപ്പെടുത്തി. അതിരൂപത ഡയറക്ടര്‍ ഫാ. ജോണ്‍ വടക്കേക്കളത്തിന്‍റെ അധ്യക്ഷതയില്‍ ചേര്‍ന്ന യോഗത്തില്‍ ടി.എം. മാത്യു അനുശോചന പ്രമേയം അവതരിപ്പിച്ചു. ജെ.ടി. റാംസേ, തോമസുകുട്ടി മണക്കുന്നേല്‍, ബേബിച്ചന്‍ പുത്തന്‍പറമ്പില്‍, ജോസി കല്ലുകളം, കെ.പി. മാത്യു, സണ്ണി ചിറവാലയില്‍, എബിന്‍ ആന്‍റണി, മേരിക്കുട്ടി പാറക്കടവില്‍, ലൗലി മാളിയേക്കല്‍, ജെമിനി കണ്ണമ്പള്ളി എന്നിവര്‍ പ്രസംഗിച്ചു. ചങ്ങനാശേരി: ഫ്രാന്‍സിസ് മാര്‍പാപ്പയുടെ വേര്‍പാടില്‍ ചങ്ങനാശേരി ഫൊറോന കൗണ്‍സില്‍ അനുശോചനം രേഖപ്പെടുത്തി. പ്രസിഡന്‍റ് ഫാ. ജോസഫ് വാണിയപ്പുരയ്ക്കല്‍ അധ്യക്ഷത വഹിച്ചു. ഫാ. തോമസ് പുത്തന്‍പുരയ്ക്കല്‍, സെക്രട്ടറി സൈബി അക്കര, ഡോ. ജിന്‍സി ജോസഫ്, ഷിജോ ജേക്കബ്, റോഷന്‍ ചെന്നിക്കര എന്നിവര്‍ പ്രസംഗിച്ചു. പായിപ്പാട്: ലൂര്‍ദ്മാതാ പള്ളിയില്‍ എകെസിസിയുടെ നേതൃത്വത്തില്‍ ഫ്രാന്‍സിസ് മാര്‍പാപ്പ അനുസ്മരണം നടത്തി. വികാരി ഫാ. ജോര്‍ജ് നൂഴായ്ത്തടം അനുസ്മരണ സന്ദേശം നല്‍കി. പ്രസിഡന്‍റ് അഡ്വ. ഡെന്നീസ് ജോസഫ് അധ്യക്ഷത വഹിച്ചു. സോജി കൈലാത്ത്, സിസ്റ്റര്‍ മേരി ടോം, സിസ്റ്റര്‍ തെരേസ്, മെര്‍ലിന്‍ വട്ടപ്പറമ്പില്‍, ജോര്‍ജുകുട്ടി ആറ്റാവേലില്‍ എന്നിവര്‍ പ്രസംഗിച്ചു.

കെഎസ്ആര്‍ടിസി ജംഗ്ഷനിലും നഗരസഭാ‍ കാര്യാലയത്തിനു മുമ്പിലും കാത്തിരിപ്പു കേന്ദ്രങ്ങള്‍ വൈകരുത്

ചങ്ങനാശേരി: നിര്‍മാണത്തിനായി കെഎസ്ആര്‍ടിസി ബസ് ഡിപ്പോ അടച്ച സാഹചര്യത്തില്‍ യാത്രക്കാര്‍ക്ക് മഴയും വെയിലുമേല്‍ക്കാതെ ബസ് കാത്തുനില്‍ക്കുന്നതിനായി കെഎസ്ആര്‍ടിസി ജംഗ്ഷനിലും മുനിസിപ്പല്‍ കാര്യാലയത്തിനു മുമ്പിലും താത്കാലിക കാത്തിരിപ്പുകേന്ദ്രങ്ങള്‍ സ്ഥാപിക്കണമെന്ന ആവശ്യം ശക്തമാകുന്നു. നിര്‍മാണത്തിനായി ബസ്‌സ്റ്റാന്‍ഡ് അടച്ചിട്ട് മൂന്നാഴ്ച പിന്നിടുകയാണ്. ബസ് സ്റ്റോപ്പുകള്‍ അനുവദിച്ച കെഎസ്ആര്‍ടിസി ജംഗ്ഷനിലും നഗരസഭാ കാര്യാലയത്തിനു മുമ്പിലും താത്കാലിക കാത്തിരിപ്പുകേന്ദ്രങ്ങള്‍ സ്ഥാപിക്കാന്‍ കെഎസ്ആര്‍ടിസി അധികൃതര്‍ തീരുമാനം എടുത്തിരുന്നു. കാത്തിരിപ്പുകേന്ദ്രങ്ങള്‍ ഇല്ലാത്തതുമൂലം കുട്ടികളും സ്ത്രികളും ഉള്‍പ്പെടുന്ന യാത്രക്കാര്‍ പൊള്ളുന്ന വെയിലും കനത്തമഴയുമേറ്റ് ദുരിതപ്പെടുകയാണ്. ഈ അവസ്ഥയ്ക്ക് പരിഹാരമുണ്ടാക്കാന്‍ ബന്ധപ്പെട്ട അധികൃതര്‍ സത്വര നടപടികള്‍ സ്വീകരിച്ചേ മതിയാകൂ എന്നാണ് യാത്രക്കാരുടെ ആവശ്യം. അതേസമയം കോട്ടയം ഭാഗത്തുനിന്നും തിരുവല്ല ഭാഗത്തേക്കു പോകുന്ന കെഎസ്ആര്‍ടിസി ബസുകള്‍ നിര്‍ത്തുന്ന സ്റ്റോപ്പ് സംബന്ധിച്ച് യാത്രക്കാരില്‍ ഇപ്പോഴും കണ്‍ഫ്യൂഷന്‍ നിലനില്‍ക്കുകയാണ്. നിരവധി യാത്രക്കാര്‍ ഇപ്പോഴും പഞ്ചവടി ഹോട്ടലിനു മുമ്പില്‍ ബസ് കാത്തുനില്‍ക്കുന്നുണ്ട്.

കുടുംബവഴക്ക്; മകൻ അമ്മയെ കോടാലികൊണ്ട് മർദിച്ചു

കട്ടപ്പന: കുടുംബവഴക്കിനെത്തുടര്‍ന്ന് അമ്മയെ മകന്‍ കോടാലി ഉപയോഗിച്ച് ക്രൂരമായി മര്‍ദിച്ച് പരിക്കേല്‍പ്പിച്ചു. കട്ടപ്പന പാറക്കടവിലാണ് സംഭവം. കൊല്ലപ്പള്ളി കമലമ്മ (75)യ്ക്കാണ് പരിക്കേറ്റത്. കൈകാലുകള്‍ക്കും തലയ്ക്കും ഗുരുതരമായി പരിക്കേറ്റ ഇവരെ കോട്ടയം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. മകന്‍ പ്രസാദിനെ (46) കട്ടപ്പന പോലീസ് കസ്റ്റഡിയിലെടുത്തു. ബുധനാഴ്ച രാവിലെയാണ് സംഭവം. കമലമ്മയും പ്രസാദും തമ്മില്‍ വര്‍ഷങ്ങളായി കുടുംബപ്രശ്‌നം നിലനില്‍ക്കുന്നുണ്ട്. ഇതേത്തുടര്‍ന്ന് കട്ടപ്പന കോടതിയില്‍ കേസും നിലവിലുണ്ട്. കോടതിയുടെ നിര്‍ദേശാനുസരണം വീടിനു സമീപത്ത് ചെറിയ മുറി നിര്‍മിച്ച് ഇവിടെയാണ് കമലമ്മ താമസിച്ചുവന്നത്. കഴിഞ്ഞദിവസം കമലമ്മ പുറത്തേക്കുപോകുന്ന വഴിയില്‍ മകനും മരുമകളും കോഴിക്കൂട് സ്ഥാപിച്ചു. ഇതോടെ കമലമ്മയുടെ യാത്രാമാര്‍ഗം തടസപ്പെട്ടു. ഇതേച്ചൊല്ലി വാക്കുതര്‍ക്കമുണ്ടായി. തുടര്‍ന്ന് പ്രസാദ് കോടാലി ഉപയോഗിച്ച് കമലമ്മയെ ക്രൂരമായി മർദിക്കുകയായിരുന്നു. മര്‍ദനത്തില്‍ വൃദ്ധയുടെ കാല് ഒടിഞ്ഞു. കട്ടപ്പന താലൂക്ക് ആശുപത്രിയില്‍ പ്രവേശിപ്പിച്ചെങ്കിലും പരിക്ക് ഗുരുതരമായതിനാല്‍ കോട്ടയം മെഡിക്കല്‍ കോളജ് ആശുപത്രിയിലേക്ക് കൊണ്ടുപോയി. പ്രസാദിനെതിരേ പോലീസ് വധശ്രമത്തിന് കേസെടുത്തു. വര്‍ഷങ്ങളായി ഇവര്‍ തമ്മില്‍ കുടുംബപ്രശ്‌നമുള്ളതായി നാട്ടുകാര്‍ പറയുന്നു. പ്രസാദിന്‍റെ ഭാര്യയും കമലമ്മയെ നിരന്തരം മർദിക്കുകയും ആക്ഷേപിക്കുകയും ചെയ്യുമായിരുന്നെന്നു നാട്ടുകാർ പറയുന്നു. കമലമ്മയുടെ ഭര്‍ത്താവ് ദിവാകരന്‍ പശുത്തൊഴുത്തിന് സമീപത്ത് ഷെഡ്ഡിലാണ് താമസിക്കുന്നത്. പ്രസാദിനും ഇയാളുടെ ഭാര്യക്കുമെതിരേ നിരവധി ആരോപണങ്ങളാണ് ഉള്ളത്. പ്രസാദിന്‍റെ ഭാര്യക്കെതിരേയും നടപടി ഉണ്ടാകുമെന്നറിയുന്നു.

വൈക്കത്ത് പ്രളയപ്രതിരോധ മോക് ഡ്രില്‍ സംഘടിപ്പിച്ചു

വൈക്കം: പ്രളയപ്രതിരോധ പ്രവര്‍ത്തനങ്ങളുടെ ഭാഗമായി സംസ്ഥാന ദുരന്തനിവാരണ അഥോറിറ്റി, ജില്ലാ ദുരന്തനിവാരണ അഥോറിറ്റി, കില എന്നിവ സംയുക്തമായി വൈക്കം താലൂക്കിലെ ഉദയനാപുരം പഞ്ചായത്തില്‍ മോക് ഡ്രില്‍ സംഘടിപ്പിച്ചു. ഗ്രാമപഞ്ചായത്തിലെ അഞ്ചാം വാര്‍ഡിലെ ആറ്റുവേലക്കടവിലാണ് മോക് ഡ്രില്‍ നടന്നത്. തദ്ദേശസ്വയംഭരണ സ്ഥാപനങ്ങളുടെ ദുരന്ത തയാറെടുപ്പും കാര്യശേഷിയും വര്‍ധിപ്പിക്കുന്നതിനായി പമ്പാനദീതട ജില്ലകളില്‍ റീ- ബില്‍ഡ് കേരള പ്രോഗ്രാം ഫോര്‍ റിസള്‍ട്ട്സ് പദ്ധതിയുടെ ഭാഗമായാണ് മോക് ഡ്രില്‍ നടത്തിയത്. വൈക്കം നഗരസഭ, ഉദയനാപുരം, മറവന്തുരുത്ത്, വെച്ചൂര്‍, തലയാഴം, ടിവി പുരം, ചെമ്പ് , തലയോലപ്പറമ്പ്, മുളക്കുളം, കടുത്തുരുത്തി,കല്ലറ, വെള്ളൂര്‍ എന്നീ തദ്ദേശ സ്വയംഭരണ സ്ഥാപനങ്ങളെ ഉള്‍പ്പെടുത്തിക്കൊണ്ടുള്ള മോക് ഡ്രില്ലാണ് സംഘടിപ്പിച്ചത്. പോലീസ്, അഗ്‌നിരക്ഷാസേന, ആരോഗ്യം, മോട്ടോര്‍ വാഹന വകുപ്പ്, കെഎസ്ഇബി, ജല അഥോറിറ്റി, തുടങ്ങിയ വിവിധ വകുപ്പുകളുടെ ഏകോപനം ഉറപ്പുവരുത്തുന്ന പ്രവര്‍ത്തനങ്ങളാണു നടന്നത്. വൈക്കം സര്‍ക്കിള്‍ ഇന്‍സ്പെക്ടര്‍ എന്‍. ജയന്‍ ഓണ്‍ സൈറ്റ് ഇന്‍സിഡന്‍റ് കമാന്‍ഡര്‍ ആയി പ്രവര്‍ത്തിച്ചു. അഗ്നിരക്ഷാസേനയില്‍ നിന്ന് സ്റ്റേഷന്‍ ഓഫീസര്‍ ടി. പ്രതാപ്, മോട്ടോര്‍ വെഹിക്കിള്‍ ഡിപ്പാര്‍ട്ട്മെന്‍റില്‍നിന്ന് കെ.പി. പ്രജീഷ്, ആരോഗ്യ വകുപ്പില്‍നിന്ന് ഡോ. അലക്സ് തോമസ്, ഡോ. എന്‍.ജി. ജയലാല്‍ എന്നിവര്‍ രക്ഷാപ്രവര്‍ത്തനങ്ങള്‍ക്ക് നേതൃത്വം നല്‍കി.

കീഴൂര്‍ ഭഗവതീ ക്ഷേത്രത്തിൽ പാനമഹോത്സവത്തിനു തുടക്കം

കടുത്തുരുത്തി: കീഴൂര്‍ ഭഗവതി ക്ഷേത്രത്തിലെ പാനമഹോത്സവത്തിന് തുടക്കമായി. ഇന്ന് ചെറിയപാന നടക്കും. പത്താമുദയ ദിവസമായ ഇന്നലെ രാത്രി പാന ആചാര്യന്‍ കാരിക്കുന്നത്ത് ഇല്ലം കെ.ഡി. പത്മനാഭന്‍ നമ്പൂതിരിയുടെ കാര്‍മികത്വത്തില്‍ നടന്ന അരിയേറ് പാനയോടെയാണ് പാന ഉത്സവത്തിന്‍റെ പ്രധാന ചടങ്ങുകള്‍ തുടങ്ങിയത്. ഇന്ന് ചെറിയപാന ദിവസം രാവിലെ 6.30ന് ഭാഗവതപാരായണം, എട്ടിന് വേലന്‍പാട്ട്, 11.30ന് ചെറിയപാന, വൈകുന്നേരം നാലിന് ഇളംപാന. നാളെ രാവിലെ 6.30ന് വിവിധ കരകളില്‍നിന്ന് കുംഭകുടം, താലപ്പൊലി ഘോഷയാത്രകള്‍ ക്ഷേത്രത്തില്‍ എത്തിച്ചേരും. 12ന് ഉച്ചപൂജ, തുടര്‍ന്ന് വലിയപാന, 12.15ന് ക്ഷേത്രം മേല്‍ശാന്തി ദീപപ്രോജ്വലനം നടത്തും, തുടര്‍ന്ന് വലിയപാന കഞ്ഞി, 4.30ന് ഇളംപാന, തുടര്‍ന്ന് ഒറ്റത്തൂക്കം, രാത്രി ഏഴിന് കോല്‍കളി, 12ന് ഗരുഡന്‍തൂക്കം വരവ്, 26നു രാവിലെ 11-ന് കുരുതി.

ലൈംഗികാതിക്രമം: വയോധികന് മൂന്നുവര്‍ഷം കഠിനതടവ്

പത്തനംതിട്ട: ശബരിമല ദര്‍ശനത്തിനെത്തിയ പെണ്‍കുട്ടിയോടു ലൈംഗികാതിക്രമം കാട്ടിയ വയോധികന് മൂന്നു വര്‍ഷം കഠിനതടവും 50,000 രൂപ പിഴയും. മലപ്പുറം പൂക്കോട് നെല്ലാട് വീട്ടില്‍ സുബ്രഹ്‌മണ്യനെയാണ് (63) പത്തനംതിട്ട അതിവേഗസ്പെഷല്‍ കോടതി ജഡ്ജി ഡോണി തോമസ് വര്‍ഗീസ് ശിക്ഷിച്ചത്. മലപ്പുറത്തുനിന്നും അച്ഛനൊപ്പം ദര്‍ശനത്തിനെത്തിയ കുട്ടിക്കാണ് ഒപ്പം വന്ന ബന്ധുവില്‍ നിന്നും ദുരനുഭവമുണ്ടായത്. 2023 ഡിസംബര്‍ 22ന് പുലര്‍ച്ചെ മൂന്നിന് നടപ്പന്തലില്‍ വച്ചായിരുന്നു ലൈംഗികാതിക്രമം. പിതാവ് മലപ്പുറം കുളത്തൂര്‍ പൊലീസ് സ്റ്റേഷനില്‍ പരാതി നല്‍കി. പിന്നീട് കേസ് പരാതികാസ്പദമായ സ്ഥലപരിധി ഉള്‍പ്പെടുന്ന പമ്പ പൊലിസിന് കൈമാറുകയും ചെയ്തു. അന്നത്തെ എസ്‌ഐ ബി. എസ്. ആദര്‍ശ് ആണ് കേസ് രജിസ്റ്റര്‍ ചെയ്ത് അന്വേഷണം പൂര്‍ത്തിയാക്കി പ്രതിക്കെതിരേ കോടതിയില്‍ കുറ്റപത്രം സമര്‍പ്പിച്ചത് .

കാറുകൾ കൂട്ടിയിടിച്ച് അപകടം

കടുത്തുരുത്തി: നിയന്ത്രണംവിട്ട കാര്‍ എതിരേവന്ന കാറുമായി കൂട്ടിയിടിച്ച് അപകടം. കാര്‍ യാത്രികാര്‍ നിസാര പരിക്കുകളോടെ രക്ഷപ്പെട്ടു. രണ്ട് കാറുകളുടെയും മുന്‍ഭാഗം തകര്‍ന്നു. ഏറ്റുമാനൂര്‍-എറണാകുളം റോഡില്‍ കുറുപ്പന്തറ ആറാംമൈലിലാണ് അപകടം. ഇന്നലെ വൈകുന്നേരം അഞ്ചോടെയാണ് അപകടം. മുട്ടുചിറ ഭാഗത്തുനിന്നു കോട്ടയത്തേക്ക് പോകുകയായിരുന്ന വാഗണര്‍ കാര്‍ നിയന്ത്രണംവിട്ട് കുറുപ്പന്തറ ഭാഗത്തുനിന്നു വരികയായിരുന്ന കാറില്‍ ഇടിക്കുകയായിരുന്നു. വാഗണര്‍ കാറിന്‍റെ ഡ്രൈവര്‍ ഉറങ്ങിയതാണ് അപകട കാരണമെന്നു നാട്ടുകാര്‍ പറഞ്ഞു. ഇതുവഴിയുള്ള ഗതാഗതം 15 മിനിറ്റ്‌ തടസപ്പെട്ടു.

നാട്ടുമത്സ്യങ്ങളുടെ ലഭ്യത കുറയുന്നു : മത്സ്യത്തൊഴിലാളികള്‍ പ്രതിസന്ധിയില്‍

കടുത്തുരുത്തി: തോടുകളിലും പുഴകളിലും നാട്ടുമത്സ്യങ്ങളുടെ ലഭ്യത കുറയുന്നു. ഉള്‍നാടന്‍ മത്സ്യത്തൊഴിലാളികള്‍ പ്രതിസന്ധിയില്‍. സാധാരണ വെള്ളപ്പൊക്കസമയത്ത് മീന്‍ പിടിക്കാനിറങ്ങുന്നവർക്ക് കുട്ട നിറയെ മീന്‍ കിട്ടുമായിരുന്നു. എന്നാല്‍ അടുത്ത കാലങ്ങളിലൊന്നും വെള്ളപ്പൊക്കത്തില്‍ പറയുന്നത്ര മീനൊന്നും കിട്ടിയില്ലെന്നാണ് ഈ മേഖലയില്‍ പ്രവര്‍ത്തിക്കുന്നവര്‍ പറയുന്നത്. കടുത്തുരുത്തിയുടെ പടിഞ്ഞാറന്‍ പ്രദേശങ്ങളിലെ തോടുകളിലും പുഴകളിലും നാട്ടുമത്സ്യങ്ങളുടെ ലഭ്യത കുറയുകയാണ്. ഇതോടെ ഉള്‍നാടന്‍ മത്സ്യത്തൊഴിലാളികളുടെ ജീവിതമാണ് പ്രതിസന്ധിയിലായിരിക്കു ന്നത്. അപ്പര്‍കുട്ടനാടന്‍ മേഖലയിലെ പാടശേഖരങ്ങളിലും ചെറുതോടുകളിലും മത്സ്യങ്ങളുടെ ലഭ്യത കുറഞ്ഞതോടെ ഒരു പകല്‍ മുഴുവന്‍ പണിയെടുത്താലും കാര്യമായ നേട്ടമില്ലാത്ത അവസ്ഥയാണെന്ന് ഉള്‍നാടന്‍ മത്സ്യത്തൊഴിലാളികള്‍ പറയുന്നു. മുന്‍കാലങ്ങളില്‍ ദിവസം 20 മുതല്‍ 25 കിലോ വരെ മത്സ്യം കിട്ടിയിരുന്നു. തോടുകളില്‍നിന്നു കാരി, വരാല്‍, വാള, കൂരി, ചെമ്പല്ലി, പരല്‍, പള്ളത്തി, മണല്‍വാള, ആറ്റുചെമ്പല്ലി, മഞ്ഞക്കൂരി എന്നിങ്ങനെയുള്ള മീനുകളാണ് ലഭിച്ചിരുന്നത്. ഇത്തരം നാട്ടുമത്സ്യങ്ങള്‍ മാര്‍ക്കറ്റില്‍ എത്തിച്ചാല്‍ മറ്റു മത്സ്യങ്ങളേക്കാള്‍ ആവശ്യക്കാരുണ്ടായിരുന്നു. അതുകൊണ്ടുതന്നെ ഇവയ്ക്കു ഉയര്‍ന്ന വിലയും ലഭിച്ചിരുന്നു. കരിമീനിന് കിലോ 300 മുതല്‍ 500 വരെയാണ് വലുപ്പത്തിനനുസരിച്ച് വില. മഞ്ഞക്കൂരി - 300, വരാല്‍ - 500 മുതല്‍ 600, കാരി - 400, വാള - 200 മുതല്‍ 400 വരെ, ചെമ്പല്ലി - 250, കറൂപ്പ് - 200 എന്നിങ്ങനെയാണ് വിവിധയിടങ്ങളിലെ വില. കടുത്തുരുത്തി മാര്‍ക്കറ്റ്, കുറുപ്പന്തറ, കല്ലറ, മാന്നാര്‍, തലയോലപ്പറമ്പ്, മുളക്കുളം എന്നിവിടങ്ങളിലെല്ലാം ഇത്തരം മത്സ്യങ്ങള്‍ വില്പന നടക്കുന്നുണ്ട്. കല്ലറ, കടുത്തുരുത്തി, മാഞ്ഞൂര്‍, നീണ്ടൂര്‍, തലയാഴം, വെച്ചൂര്‍, ചെമ്പ്, മുളക്കുളം, തലയോലപ്പറമ്പ്, മറവന്തുരുത്ത്, വെള്ളൂര്‍ പഞ്ചായത്തുകളിലെ തോടുകളും പുഴകളും ഒരുകാലത്ത് മത്സ്യസമൃദ്ധമായിരുന്നു. പ്ലാസ്റ്റിക് ഉള്‍പ്പെടെയുള്ള മാലിന്യങ്ങള്‍ മത്സ്യസമ്പത്ത് നശിപ്പിക്കാനിടയാക്കിയതായി മത്സ്യതൊഴിലാളിയായ മുണ്ടാര്‍ സ്വദേശി പത്മനാഭന്‍ പറഞ്ഞു. പാടശേഖരങ്ങളിലെ നെല്ലിന് അമിതമായി കീടനാശിനിയും രാസവളപ്രയോഗവും നടത്തിയതും ഈ വെള്ളം തോടുകളിലേക്ക് ഒഴുക്കുന്നതും മീനുകളുടെ നാശത്തിന് കാരണമായി. കായലില്‍നിന്ന് ഉപ്പുവെള്ളം കയറ്റിവിടാത്തതും ചില മത്സ്യങ്ങളുടെ വളര്‍ച്ചയെ കാര്യമായി ബാധിച്ചു. തോടുകളില്‍ നാട്ടുമത്സ്യങ്ങള്‍ കുറഞ്ഞതോടെ മത്സ്യഫെഡ് രോഹു, കട്‌ല, വലിയവാള എന്നിവയുടെ കുഞ്ഞുങ്ങളെ നിക്ഷേപിക്കാറുണ്ടെങ്കിലും ഇത്തരം വലിയ മത്സ്യങ്ങള്‍ ചെറി നാട്ടുമത്സ്യങ്ങളെ തിന്നൊടുക്കിയെന്ന് പരമ്പരാഗത മത്സ്യത്തൊഴിലാളിയായ കുട്ടപ്പന്‍ പറഞ്ഞു.

മരിയൻ കോളജിൽ കിക്‌ബോക്സിംഗ് പരിശീലനക്യാമ്പ്

കുട്ടിക്കാനം: മരിയൻ കോളജിൽ 30 വരെ നടക്കുന്ന പത്താമത് അന്തർദേശീയ കിക്‌ബോക്സിംഗ് പരിശീലന ക്യാമ്പ് ആരംഭിച്ചു. വാക്കോ ഇന്ത്യ കേരള അസോസിയേഷനും മരിയൻ കോളജിലെ ഹെൽത്ത് ആൻഡ് വെൽനെസ് ഡിപ്പാർട്ട്മെന്‍റും സംയുക്തമായാണ് ക്യാമ്പ് സംഘടിപ്പിച്ചിരിക്കുന്നത്. ദേശീയ, അന്തർദേശീയ തലത്തിൽ അംഗീകരിക്കപ്പെട്ടിട്ടുള്ള പരിശീലകരുടെ നേതൃത്വത്തിലാണ് ക്യാമ്പ് നടത്തപ്പെടുന്നത്. ഏകദേശം 200ഓളം കായികപ്രതിഭകൾ പരിശീലനത്തിൽ പങ്കെടുക്കുന്നുണ്ട്. കിക്‌ബോക്സിംഗിനെപ്പറ്റി ആഴത്തിൽ പഠിക്കാൻ സാധിക്കുന്നതോടൊപ്പം ആഗോളതലത്തിൽ അംഗീകരിക്കപ്പെടുന്ന പരിശീലന മാതൃകകൾ വഴി താരങ്ങൾക്ക് അത്യുന്നതമായ പരിശീലനം ലഭ്യമാകുന്നു. വിവിധ സംസ്ഥാനങ്ങളിൽനിന്നുമെത്തിയ കായികതാരങ്ങൾക്കും ഉയർന്ന നിലവാരത്തിലുള്ള പരിശീലനം നേടാൻ ആഗ്രഹിക്കുന്നവർക്കും ഈ ക്യാമ്പ് പുതിയ അനുഭവങ്ങളും അറിവുകളും പകരുന്ന പ്രധാന വേദിയായിരിക്കുമെന്ന് സംഘാടകർ വ്യക്തമാക്കി.

കോട്ടയം നഗരത്തില്‍ ഇന്ന് ഉച്ചകഴിഞ്ഞ് ഗതാഗത ക്രമീകരണം

കോട്ടയം: സംസ്ഥാന സർക്കാരിന്‍റെ നാലാം വാര്‍ഷികത്തിന്‍റെ ഭാഗമായ “എന്‍റെ കേരളം പ്രദര്‍ശന വിപണന മേള’’യുടെ ഉദ്ഘാടനത്തോടനുബന്ധിച്ചുള്ള സാംസ്‌കാരിക ഘോഷയാത്രയുടെ ഭാഗമായി കോട്ടയം നഗരത്തില്‍ ഇന്നു മൂന്നുമുതല്‍ അഞ്ചുവരെ ഗതാഗത ക്രമീകരണം ഏര്‍പ്പെടുത്തി. എംസി റോഡിലൂടെ നാട്ടകം ഭാഗത്തുനിന്നു വരുന്ന വലിയ വാഹനങ്ങള്‍ സിമന്‍റ് കവലയില്‍നിന്ന് ഇടത്തേക്കു തിരിഞ്ഞ് പാറേച്ചാല്‍ ബൈപാസ്, തിരുവാതുക്കല്‍, കുരിശുപള്ളി വഴി അറുത്തൂട്ടി ജംഗ്ഷനിലെത്തി വലത്തേക്ക് തിരിഞ്ഞു ചാലുകുന്ന് ജംഗ്ഷനിലെത്തി മെഡിക്കല്‍ കോളജ് ഭാഗത്തേക്ക് പോവുക. കുമരകം ഭാഗത്തേക്കു പോകേണ്ട വാഹനങ്ങള്‍ തിരുവാതുക്കല്‍, അറുത്തൂട്ടി വഴി പോവുക. എംസി റോഡിലൂടെ വരുന്ന കിഴക്കോട്ടു പോകേണ്ട ചെറുവാഹനങ്ങള്‍ മണിപ്പുഴനിന്നു വലത്തോട്ടു തിരിഞ്ഞ് ബൈപാസ് റോഡ്, ഈരയില്‍ക്കടവ് വഴി മനോരമ ജംഗ്ഷനിലെത്തി കിഴക്കോട്ടു പോവുക. വലിയ വാഹനങ്ങള്‍ മണിപ്പുഴ ജംഗ്ഷനിൽനിന്നു തിരിഞ്ഞ് കടുവാക്കുളം, കൊല്ലാടുവഴി കഞ്ഞിക്കുഴിയിലെത്തി പോവുക. എംസി റോഡ് നാഗമ്പടത്തുനിന്നു വരുന്ന വാഹനങ്ങള്‍ സീസേഴ്സ് ജംഗ്ഷന്‍, റെയില്‍വേ സ്റ്റേഷന്‍, ലോഗോസ് വഴി ചന്തക്കവലയിലെത്തി എംഎല്‍ റോഡിലൂടെ കോടിമത ഭാഗത്തേക്കു പോവുക. കഞ്ഞിക്കുഴിക്ക് പോകേണ്ട വാഹനങ്ങള്‍ റെയിൽവേ സ്റ്റേഷന്‍ വഴി ലോഗോസിലെത്തി പോവുക. ഏറ്റുമാനൂരിൽനിന്നു വരുന്ന വലിയ വാഹനങ്ങള്‍ ഗാന്ധിനഗറില്‍നിന്നു തിരിഞ്ഞ് ചുങ്കം, ചാലുകുന്ന്, അറുത്തൂട്ടി വഴി തിരുവാതുക്കല്‍ എത്തി സിമെന്‍റ് കവലവഴി പോവുക.കുമരകം ഭാഗത്തു നിന്നുവരുന്ന വാഹനങ്ങള്‍ ബേക്കര്‍ ജംഗ്ഷനിലെത്തി സീസേഴ്സ് ജംഗ്ഷന്‍ വഴി വലത്തേക്കു തിരിഞ്ഞ് ബസ് സ്റ്റാന്‍ഡിലേക്ക് പോവുക. നാഗമ്പടം സ്റ്റാന്‍ഡില്‍നിന്നു കാരാപ്പുഴ, തിരുവാതുക്കല്‍ ഭാഗത്തേക്കു പോകേണ്ട ബസുകള്‍ ബേക്കര്‍ ജംഗ്ഷനിലെത്തി അറുത്തൂട്ടി വഴി തിരുവാതുക്കല്‍ ഭാഗത്തേക്ക് പോവുക. കെകെ റോഡിലൂടെ വരുന്ന ചങ്ങനാശേരി ഭാഗത്തേക്കു പോകേണ്ട വലിയ വാഹനങ്ങള്‍ കഞ്ഞിക്കുഴി, ദേവലോകം, കടുവാക്കുളം വഴി പോവുക. ആര്‍.ആര്‍. ജംഗ്ഷനില്‍നിന്നുള്ള എല്ലാ വാഹനങ്ങളും തിരുനക്കര സ്റ്റാന്‍ഡുവഴി ചിത്രാ സ്റ്റുഡിയോയുടെ മുന്‍വശത്തുകൂടി ബേക്കര്‍ ജംഗ്ഷനിലെത്തി പോവുക. കുമരകം റോഡിലൂടെ വരുന്ന എല്ലാ വാഹനങ്ങളും ബേക്കര്‍ ജംഗഷനില്‍ നിന്നും എം.സി. റോഡ് സീസേഴ്സ് ജംഗ്ഷനിലെത്തി നാഗമ്പടം വഴി പോവുക. കെകെ റോഡിലൂടെ വരുന്ന കെഎസ്ആര്‍ടിസി ഒഴികെയുള്ള ബസുകള്‍ കളക്‌ടറേറ്റ് ജംഗ്ഷനില്‍നിന്നു തിരിഞ്ഞ് ലോഗോസ് വഴി നാഗമ്പടം സ്റ്റാന്‍ഡിലേക്കും അവിടെനിന്നു തിരികെ മുന്‍സിപ്പല്‍ പാര്‍ക്കിനു മുന്‍വശത്തുവന്ന് ഇടത്തേക്കു തിരിഞ്ഞ് ലോഗോസ് ജംഗ്ഷന്‍ വഴിയും പോകേണ്ടതാണ്.

പുതുപ്പള്ളി പള്ളി പെരുന്നാളിന് 28നു കൊടിയേറും

പുതുപ്പള്ളി: ജോര്‍ജിയന്‍ തീര്‍ഥാടനകേന്ദ്രമായ സെന്‍റ് ജോര്‍ജ് ഓര്‍ത്തഡോക്‌സ് വലിയ പള്ളിയില്‍ വിശുദ്ധ ഗീവര്‍ഗീസ് സഹദായുടെ പെരുന്നാളിന് 28നു കൊടിയേറും. ഉച്ചകഴിഞ്ഞു രണ്ടിനു പുതുപ്പള്ളി, എറികാട് കരകളില്‍നിന്നു കൊടിമര ഘോഷയാത്ര ആരംഭിക്കും. വൈകുന്നേരം അഞ്ചിനു വികാരി ഫാ. വര്‍ഗീസ് വര്‍ഗീസ് കൊടിയേറ്റും. 29നും 30നും രാവിലെ 6.30നു പ്രഭാത നമസ്‌കാരം, വിശുദ്ധ കുര്‍ബാന. വൈകുന്നേരം 5.30നു സന്ധ്യാ നമസ്‌കാരം. മേയ് ഒന്നു മുതല്‍ മൂന്നു വരെ രാത്രി 6.15നു പുതുപ്പള്ളി കണ്‍വന്‍ഷനും രാത്രി എട്ടിനു മധ്യസ്ഥപ്രാര്‍ഥനയും നടക്കും. മേയ് ഒന്നിനു രാവിലെ ഒന്പതിനു വെച്ചൂട്ടിനുള്ള മാങ്ങാ അരിയല്‍ ആരംഭിക്കും.നാലിനു രാവിലെ 11.30നു സാംസ്‌കാരിക സമ്മേളനം മഹാരാഷ്‌ട്ര ഗവര്‍ണര്‍ സി.പി. രാധാകൃഷ്ണന്‍ ഉദ്ഘാടനം ചെയ്യും. ഓര്‍ഡര്‍ ഓഫ് സെന്‍റ് ജോര്‍ജ് പുരസ്‌കാരം കുര്യാക്കോസ് മാര്‍ ക്ലീമീസിനു സമ്മാനിക്കും. അഞ്ചിനു രാത്രി ആറിനു വിവിധ കുരിശടികളില്‍നിന്നുള്ള പുതുപ്പള്ളി തീര്‍ഥാടനം. രാത്രി ഏഴിനു വിശുദ്ധ ഗീവര്‍ഗീസ് സഹദാ അനുസ്മരണം. ആറിനു രാവിലെ 11നു പൊന്നിന്‍കുരിശ് മദ്ബഹയില്‍ പ്രതിഷ്ഠിക്കും. ഉച്ചകഴിഞ്ഞു രണ്ടിനു വിറകിടീല്‍ ഘോഷയാത്ര, വൈകുന്നേരം 4.30നു പന്തിരുനാഴി പുറത്തെടുക്കല്‍. 5.30നു ബസേലിയോസ് മാര്‍ത്തോമ്മാ മാത്യൂസ് തൃതീയന്‍ കാതോലിക്കാ ബാവായുടെ മുഖ്യകാര്‍മികത്വത്തില്‍ പെരുന്നാള്‍ സന്ധ്യാനമസ്‌കാരം. ഏഴിനു പ്രദക്ഷിണം. വലിയ പെരുന്നാള്‍ ദിനമായ ഏഴിനു പുലര്‍ച്ചെ ഒന്നിന് വെച്ചൂട്ടിനുള്ള അരിയിടീല്‍. രാവിലെ 7.30നു പ്രഭാത നമസ്‌കാരം, 8.30നു ബസേലിയോസ് മാര്‍ത്തോമ്മാ മാത്യൂസ് തൃതീയന്‍ കാതോലിക്കാ ബാവായുടെ മുഖ്യകാര്‍മികത്വത്തില്‍ ഒന്പതിന്മേല്‍ കുര്‍ബാന. 11.15നു വെച്ചൂട്ട് നേര്‍ച്ചസദ്യ, വടക്കേപ്പന്തലില്‍ കുട്ടികള്‍ക്ക് ആദ്യ ചോറൂട്ട്. ഉച്ചകഴിഞ്ഞു രണ്ടിനു പ്രദക്ഷിണം, നാലിനു നേര്‍ച്ചവിളമ്പ്. മേയ് 23നു രാവിലെ വിശുദ്ധ കുര്‍ബാനയ്ക്കുശേഷം കൊടിയിറക്കും.

തക്കാളിയുമായി പോയ പിക്കപ്പ് വാന്‍ മറിഞ്ഞു

കോട്ടയം: തക്കാളിയുമായി പോയ പിക്കപ്പ് വാന്‍ മറിഞ്ഞു റോഡ് നിറയെ തക്കാളി. ഇന്നലെ പുലര്‍ച്ചെ എംസി റോഡില്‍ കോട്ടയം എസ്എച്ച് മൗണ്ട് ജംഗ്ഷനിലാണ് തക്കാളിവണ്ടി മറിഞ്ഞത്. മൈസൂരില്‍നിന്നു തക്കാളിയുമായി കൊല്ലത്തേക്ക് പോകുകയായിരുന്നു പിക്കപ്പ് വാന്‍. അലക്ഷ്യമായി പാഞ്ഞുവന്ന വാഹനത്തെ ഇടിക്കാതിരിക്കാൻ വെട്ടിച്ചപ്പോഴാണ് അപകടമുണ്ടായത്. അപകടത്തില്‍ ആര്‍ക്കും പരിക്കില്ല. മറിഞ്ഞ പിക്കപ്പ് വാനിലുണ്ടായിരുന്ന തക്കാളി മുഴുവന്‍ റോഡില്‍ നിരന്നു. രാവിലെ നാട്ടുകാരും സമീപവാസികളും റോഡില്‍ നിരന്ന തക്കാളി പെറുക്കിയെടുത്തു. ഏതാനു നാളുകള്‍ക്ക് മുമ്പ് എസ്എച്ച് മൗണ്ടിനു സമീപം ചെമ്പരത്തിമൂട്ടില്‍ കോഴിയുമായി പോയ ലോറി മറിഞ്ഞിരുന്നു. അന്നു റോഡില്‍ വീണ കോഴികളെ നാട്ടുകാര്‍ കൊണ്ടുപോയിരുന്നു.

കോട്ടയം നഗരസഭയുടെ പദ്ധതികൾക്ക് അംഗീകാരം

കോട്ടയം: കോട്ടയം നഗരസഭയുടെ 2024-25 വാർഷിക പദ്ധതിയിലെ പുതിയ പദ്ധതികൾക്ക് സർക്കാർ മാർഗനിർദേശ പ്രകാരമുള്ള സമയക്രമം പാലിച്ച് ജില്ലാ ആസൂത്രണ സമിതിയുടെ അംഗീകാരം ലഭിച്ചു. നഗരസഭയുടെ സ്പിൽ ഓവർ പദ്ധതികൾ റദ്ദു ചെയ്ത സർക്കാർ നടപടികൾ പിൻവലിച്ചതായി അറിയിപ്പു ലഭിച്ചെന്നും നഗരസഭാ ചെയർപേഴ്സൺ ബിൻസി സെബാസ്റ്റ്യൻ അറിയിച്ചു. സ്പിൽ ഓവർ പദ്ധതികൾ ഉൾപ്പെടുത്തി 2024-25 സന്പൂർണ വാർഷിക പദ്ധതിക്ക് അംഗീകാരം വാങ്ങണമെന്നുള്ള സർക്കാർ നിർദേശത്തിന്‍റെ അടിസ്ഥാനത്തിൽ സ്പിൽ ഓവർ പദ്ധതികൾക്കു നഗരസഭാ കൗൺസിൽ അംഗീകാരം നൽകിയിരുന്നു. എന്നാൽ, ഒരു കൗൺസിലർ സ്പിൽ ഓവർ പദ്ധതികൾ അംഗീകരിച്ച കൗൺസിൽ തീരുമാനം റദ്ദാക്കണമെന്നാവശ്യപ്പെട്ടു സർക്കാരിനു പരാതി നൽകുകയായിരുന്നു. തുടർന്ന് സർക്കാർ സ്പിൽ ഓവർ പദ്ധതികൾ നടപ്പാക്കുന്നത് തടഞ്ഞിരുന്നു. പൊതുമരാമത്ത് വർക്കുകൾ ഉൾപ്പെടെ തടസപ്പെട്ടതോടെ നഗരസഭാ കൗൺസിൽ സർക്കാർ ഉത്തരവ് പിൻവലിക്കണമെന്ന് ആവശ്യപ്പെട്ടിരുന്നു. ഈയാവശ്യം ഉന്നയിച്ച് നഗരസഭാ കൗൺസിൽ സർക്കാരിന് പലതവണ കത്തുനൽകുകയും ചെയ്തിരുന്നു. ഇതേത്തുടർന്ന് നഗരസഭയുടെ ആവശ്യം പരിഗണിച്ച സർക്കാർ ഉത്തരവ് പിൻവലിക്കുകയായിരുന്നു. ഉത്തരവു വന്നതോടെ സ്പിൽ ഓവർ പദ്ധതികളുടെ പേയ്മെന്‍റ് ഉൾപ്പെടെയുള്ള നടപടികൾ പൂർത്തീകരിക്കാൻ സാധിച്ചെന്നും ചെയർപേഴ്സൺ അറിയിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]