മാര്‍ ജോര്‍ജ് കൂവക്കാട്ടിന് ചിത്രം സമ്മാനിച്ച് അലീന
1481782
Sunday, November 24, 2024 7:33 AM IST
ചങ്ങനാശേരി: നിയുക്ത കര്‍ദിനാള്‍ മാര്‍ ജോര്‍ജ് കൂവക്കാട്ടിനു താന്‍ വരച്ച ചിത്രം സമ്മാനിച്ച് ചിത്രകാരിയായ മുണ്ടത്താനം സ്വദേശിനി അലീന. അലീന വരച്ച മാര്‍ ജോര്‍ജ് കൂവക്കാട്ടിന്‍റെ ചിത്രം കഴിഞ്ഞ ദിവസമാണ് അദ്ദേഹത്തിനു കൈമാറിയത്.
ഫ്രാന്‍സിസ് മാർ പാപ്പയുടെ ചിത്രവും കൈമാറിയിട്ടുണ്ട്. മുണ്ടത്താനം ഇടവകാംഗങ്ങളായ പരത്തമല റെജിയുടെയും റെനിയുടെയും മകളാണ് അലീന. ചെറുപ്പം മുതല്‍ക്കേ ചിത്രരചനയില്‍ പ്രത്യേക അഭിരുചിയുള്ള അലീനയ്ക്ക് നിരവധി പുരസ്‌കാരങ്ങള്‍ ലഭിച്ചിട്ടുണ്ട്.
പഠനകാലത്തുതന്നെ ധാരാളം പ്രശസ്തരുടെ ഛായാചിത്രങ്ങള്‍ വരച്ച അലീന, പലതും അവര്‍ക്ക് സമ്മാനമായി നല്‍കിയിട്ടുമുണ്ട്. ജോണ്‍ പോള്‍ രണ്ടാമന്‍ മാര്‍ പാപ്പ, മാര്‍ ജോസഫ് പെരുന്തോട്ടം, മാര്‍ ജോസഫ് പവ്വത്തില്‍, മാര്‍ തോമസ് തറയില്‍, ഉമ്മന്‍ ചാണ്ടി എന്നിവരുടെ ചിത്രങ്ങള്‍ അവയില്‍ ചിലതുമാത്രം.
താന്‍ വരച്ച 2,000ത്തോളം ചിത്രങ്ങളുടെ വലിയ ശേഖരം അലീന ഒരു നിധിപോലെ കാത്തുസൂക്ഷിക്കുന്നു. ബറോഡ എംഎസ് യൂണിവേഴ്‌സിറ്റിയില്‍ ബിഎ ഫൈന്‍ ആര്‍ട്‌സ് വിദ്യാർഥിനിയാണ് അലീന.