സുൽത്താൻ ബത്തേരി: കേരള ഹോട്ടൽ ആൻഡ് റസ്റ്ററന്‍റ് അസോസിയേഷൻ ജില്ലാ കമ്മിറ്റിയുടെ ആഭിമുഖ്യത്തിൽ നാളെ കളക്ടറേറ്റ് പടിക്കൽ ധർണ നടത്തുമെന്ന് സംസ്ഥാന സെക്രട്ടറി അനീഷ് ബി. നായർ, ജില്ലാ പ്രസിഡന്‍റ് മുഹമ്മദ് അസ്ലം, ജില്ലാ സെക്രട്ടറി യു. സുബൈർ, ട്രഷറർ അബ്ദുറഹ്മാൻ പ്രാണിയത്ത്, മുജീബ് ചുണ്ട, ഇ.സി. അരവിന്ദ്, റഷീദ് ബാംബു എന്നിവർ വാർത്താസമ്മേളനത്തിൽ അറിയിച്ചു.
പൊതുവിപണിയിൽ അവശ്യസാധനങ്ങളുടെ വിലക്കയറ്റം നിയന്ത്രിക്കാൻ സർക്കാർ ഇടപെടുക, ഹോട്ടലുകളിൽ പരിശോധനയുടെ മറവിൽ ഉദ്യോഗസ്ഥരിൽ ചിലർ നടത്തുന്ന അധികാര ദുർവിനിയോഗം അവസാനിപ്പിക്കുക, പിടിച്ചെടുക്കുന്ന സാധനങ്ങൾ പഴയതാണെന്ന് തെളിയിക്കുന്നതിന് ലാബ് പരിശോധന നടത്തുക, അവശ്യസാധനങ്ങളുടെ പൂഴിത്തിവയ്പ് തടയുക, ഹോട്ടൽ വ്യവസായ മേഖലയെ ജിഎസ്ടി പരിധിയിൽനിന്നു ഒഴിവാക്കുക, വാണിജ്യ സിലിണ്ടറിനു സബ്സിഡി ഏർപ്പെടുത്തുക തുടങ്ങിയ ആവശ്യങ്ങൾ ഉന്നയിച്ചാണ് സമരം. രാവിലെ 11ന് സംസ്ഥാന ജനറൽ സെക്രട്ടറി ബാലകൃഷ്ണ പൊതുവാൾ ഉദ്ഘാടനം ചെയ്യും. ഭക്ഷണസാധനങ്ങൾക്ക് 20 ശതമാനം വരെ വില വർധിപ്പിക്കേണ്ട സാഹചര്യമാണുള്ളതെന്നു ഭാരവാഹികൾ പറഞ്ഞു.