പൂക്കോട്ടുംപാടം: വീട്ടില് വില്പ്പനക്കായി സൂക്ഷിച്ച 250 ഗ്രാം കഞ്ചാവുമായി യുവാവിനെ പോലീസ് അറസ്റ്റ് ചെയ്തു. അമരമ്പലം പുതിയക്കോട് സ്വദേശി പുലികുന്നുമ്മല് ഫലലുല് ഹാബിദി(24)നെയാണ് പൂക്കോട്ടുംപാടം എസ്ഐ ബി.തോമസ് അറസ്റ്റു ചെയ്തത്.
നിലമ്പൂര് ഡിവൈഎസ്പി പി.കെ. സന്തോഷിനു ലഭിച്ച രഹസ്യവിവരത്തെ തുടര്ന്ന് പൂക്കോട്ടുംപാടം പോലീസും നിലമ്പൂര് ഡാന്സാഫ് സംഘവും ചേര്ന്ന് പുതിയക്കോടുള്ള പ്രതിയുടെ വീട്ടില് നടത്തിയ പരിശോധനയിലാണ് കഞ്ചാവ് കണ്ടെടുത്തത്. ചെറിയ പാക്കറ്റുകളിലാക്കിയാണ് ഇയാള് കഞ്ചാവ് വില്പ്പന നടത്തിയിരുന്നത്. പ്രതിയെ നിലമ്പൂര് കോടതിയില് ഹാജരാക്കും. എഎസ്ഐ എ. ജാഫര്, സിപിഒമാരായ ഷൈന്, ആര്യ എന്നിവർ പ്രതിയെ അറസ്റ്റ് ചെയ്ത സംഘത്തിലുണ്ടായിരുന്നു.