റോ​ഡ​രി​കി​ലെ പാ​ഴ്മ​രം യാത്രക്കാർക്കു ഭീ​ഷ​ണി​യാ​കു​ന്നു
Friday, July 26, 2024 6:41 AM IST
നെ​ടു​മ​ങ്ങാ​ട് : ക​ര​കു​ളം പ​ഞ്ചാ​യ​ത്തി​ലെ മു​ല്ല​ശേ​രി കാ​യ്പാ​ടി റോ​ഡി​ൽ നെ​ട്ട​റ​യി​ൽ റോ​ഡ​രി​കി​ൽ നി​ൽ​കു​ന്ന പാ​ഴ്മ​രം നാ​ട്ടു​കാ​ർ​ക്കും വാ​ഹ​ന യാ​ത്രി​ക​ർ​ക്കും ഭീ​ഷ​ണി​യാ​കു​ന്ന​താ​യി പ​രാ​തി. അ​പ​ക​ട ഭീ​ഷ​ണി​യി​ൽ റോ​ഡി​നോ​ട് ചേ​ർ​ന്നാ​ണ് മു​പ്പ​തോ​ളം വ​ർ​ഷം പ​ഴ​ക്ക​മു​ള്ള പാ​ഴ്മ​രം സ്ഥി​തി ചെ​യ്യു​ന്ന​ത്. പ​ല ത​വ​ണ പ​ഞ്ചാ​യ​ത്തി​ൽ പ​രാ​തി ന​ൽ​കി​യെ​ങ്കി​ലും ന​ട​പ​ടി​യാ​യി​ല്ല.

പ്ര​ദേ​ശ​ത്തു​ള്ള റ​സി​ഡ​ൻ​സ് അ​സോ​സി​യേ​ഷ​ൻ നി​ര​ന്ത​ര​മാ​യി പ​ഞ്ചാ​യ​ത്തു​മാ​യി ബ​ന്ധ​പ്പെ​ട്ട​പ്പോ​ൾ നാ​ട്ടു​കാ​ർ ത​ന്നെ മ​രം മു​റി​ച്ച് മാ​റ്റ​ണ​മെ​ന്ന് ആ​വ​ശ്യ​പ്പെ​ട്ട​താ​യും സ​മീ​പ​വാ​സി​ക​ൾ പ​റ​ഞ്ഞു. എ​ന്നാ​ൽ സ​ർ​ക്കാ​ർ വ​ക ഭൂ​മി​യി​ൽ അ​നു​മ​തി​യി​ല്ലാ​തെ എ​ങ്ങ​നെ മ​രം മു​റി​ച്ച് മാ​റ്റും എ​ന്ന ചോ​ദ്യ​മാ​ണ് നാ​ട്ടു​കാ​രി​ൽ നി​ന്ന് ഉ​യ​രു​ന്ന​ത്.

ഇ​പ്പോ​ൾ അ​പ​ക​ട ഭീ​ഷ​ണി​യി​ൽ മ​രം എ​ന്ന് ബോ​ർ​ഡും സ്ഥാ​പി​ച്ചി​ട്ടു​ണ്ട് . മ​ര​ത്തി​ന് പു​റ​കി​ലാ​യി തോ​ട് ഒ​ഴു​കു​ന്നു​ണ്ട്. തോ​ടി​ന് മു​ക​ളി​ലൂ​ടെ​യു​ള്ള പാ​ല​ത്തി​ൽ ആ​ണ് മ​രം നി​ൽ​ക്കു​ന്ന​ത്. ഇ​ത് കാ​ര​ണം പാ​ല​ത്തി​ന്‍റെ കോ​ൺ​ക്രീ​റ്റ് ഭാ​ഗ​ങ്ങ​ൾ​ക്കും കേ​ടു​പാ​ടു​ക​ൾ സം​ഭ​വി​ക്കു​ന്നു​ണ്ട്. ര​ണ്ടാ​ഴ്ച്ച മു​ൻ​പാ​ണ് ക​ര​കു​ളം പ​ഞ്ചാ​യ​ത്തി​ലെ ആ​റാം​ക​ല്ലി​ൽ വ​ച്ച് ആ​ൽ​മ​രം കാ​റി​ന് മു​ക​ളി​ലൂ​ടെ ക​ട​പു​ഴ​കി വീ​ണ് തൊ​ളി​ക്കോ​ട് പ​ര​പ്പാ​റ സ്വ​ദേ​ശി​നി ഒ. ​മോ​ളി മ​രി​ച്ച​ത്.


കൂ​ടാ​തെ സ​മി​പ​ത്താ​യി ഒ​രു അ​പ​ക​ട വ​ള​വും ഭീ​ഷ​ണി​യാ​ണ്. റോ​ഡ് പ​ണി​ത​പ്പോ​ൾ ഇ​രു ഭാ​ഗ​വും കോ​ൺ​ക്രീ​റ്റ് ചെ​യ്യു​മെ​ന്ന് പ​റ​ഞ്ഞി​രു​ന്നു. എ​ന്നാ​ൽ അ​ത് പാ​ലി​ക്ക​പ്പെ​ട്ടി​ല്ല. ഇ​തോ​ടെ പ​ല​പ്പോ​ഴും ഇ​രു​ച​ക്ര​വാ​ഹ​ന​ങ്ങ​ൾ വ​ള​വി​ലെ വ​ലി​യ​കു​ഴി​യി​ലേ​ക്ക് പ​തി​ക്കാ​റു​ണ്ടെ​ന്ന് നാ​ട്ടു​കാ​ർ പ​റ​യു​ന്നു.

ഈ ​കാ​ര​ണ​ങ്ങ​ൾ ചൂ​ണ്ടി കാ​ട്ടി മു​ല്ല​ശേ​രി ചൈ​ത​ന്യ റ​സി​ഡ​ൻ​സ് അ​സോ​സി​യേ​ഷ​ൻ ക​ള​ക്ട​ർ​ക്ക് പ​രാ​തി ന​ൽ​കി.