ഹേമ കമ്മിറ്റി കാട്ടിയത് വിശ്വാസവഞ്ചന: മാലാ പാര്‍വതി
Saturday, November 30, 2024 1:18 AM IST
കൊച്ചി: ഹേമ കമ്മിറ്റി കാട്ടിയതു വിശ്വാസ വഞ്ചനയാണെന്ന് നടി മാലാ പാര്‍വതി. തങ്ങള്‍ക്കുണ്ടായ ദുരനുഭവമാണ് മൊഴിയായി നല്‍കിയത്. മറ്റുള്ളവര്‍ക്കുണ്ടായ കേട്ടറിവുകളും പറഞ്ഞിരുന്നു. കേസിനു താത്പര്യമില്ലെന്ന് അന്നേ പറഞ്ഞതാണ്. റിപ്പോര്‍ട്ടില്‍ പേരുപോലും വരരുതെന്ന് ആവശ്യപ്പെട്ടിരുന്നുവെന്നും മാലാ പാര്‍വതി സ്വകാര്യചാനലിന് അനുവദിച്ച അഭിമുഖത്തില്‍ പറഞ്ഞു.
ഹേമ കമ്മിറ്റി മുന്പാകെ ഹാജരായി മൊഴി നല്‍കിയ നടി സുപ്രീംകോടതിയെ സമീപിച്ചിരിക്കുകയാണ്. ഹേമ കമ്മിറ്റിയോടു സംസാരിച്ചതിന്‍റെ അടിസ്ഥാനത്തില്‍ പോലീസ് സ്വീകരിക്കുന്ന തുടര്‍ നടപടികള്‍ക്കെതിരേയാണു നടിയുടെ ഹര്‍ജി.
സിനിമയില്‍ സ്ത്രീകള്‍ക്ക് സുരക്ഷിതത്വം ഉറപ്പുവരുത്താന്‍ നിയമനിര്‍മാണമായിരുന്നു ലക്ഷ്യം. മൊഴിയുടെ പേരില്‍ കേസെടുക്കുന്നത് ശരിയല്ല. പ്രത്യേക അന്വേഷണസംഘം ചലച്ചിത്ര പ്രവര്‍ത്തകരെ വിളിച്ച് മാനസികമായി ബുദ്ധിമുട്ടിക്കുകയാണ്.
വിഷയവുമായി ബന്ധമില്ലാത്ത ആളുകളെപ്പോലും പോലീസ് ചോദ്യം ചെയ്യലിന്‍റെ പേരില്‍ വിളിച്ചുവരുത്തുന്നു. കേസിനില്ലെന്നു നേരത്തേ വ്യക്തമാക്കിയതാണ്. അതുകൊണ്ടാണ് സുപ്രീംകോടതിയെ സമീപിച്ചതെന്നും മാലാ പാര്‍വതി പറയുന്നു.
കേസുമായി മുന്നോട്ടു പോകാന്‍ താത്പര്യമില്ലെന്ന് എസ്‌ഐടിയെ അറിയിച്ചിരുന്നുവെന്നും എന്നിട്ടും പോലീസ് തുടര്‍നടപടികള്‍ സ്വീകരിച്ചുവെന്നും അവര്‍ വ്യക്തമാക്കി.
മാലാ പാര്‍വതിക്കെതിരേ ഡബ്ല്യുസിസി
നടി മാലാ പാര്‍വതിയുടെ ഹര്‍ജിയില്‍ നോട്ടീസ് അയയ്ക്കുന്നതിനെ എതിര്‍ത്ത് ഡബ്ല്യുസിസി രംഗത്തെത്തി. സുപ്രീംകോടതിയില്‍ നടി നല്‍കിയ ഹര്‍ജി അപ്രസക്തമാണെന്നും ഡബ്ല്യുസിസി ചൂണ്ടിക്കാട്ടി. ഹര്‍ജിയില്‍ കക്ഷി ചേരാന്‍ സംഘടന അപേക്ഷ നല്‍കി.