എം.എം. ലോറന്‍സിന്‍റെ മൃതദേഹം: അപ്പീലില്‍ ചൊവ്വാഴ്ച വാദം കേള്‍ക്കും
Friday, November 29, 2024 3:53 AM IST
കൊച്ചി: അന്തരിച്ച മുതിര്‍ന്ന സിപിഎം നേതാവ് എം.എം. ലോറന്‍സിന്‍റെ മൃതദേഹം മെഡിക്കല്‍ പഠനത്തിനായി വിട്ടുനല്‍കാന്‍ അനുമതി നല്‍കിയ സിംഗിള്‍ ബെഞ്ച് ഉത്തരവിനെതിരേ മകള്‍ ആശ ലോറന്‍സ് നല്‍കിയ അപ്പീല്‍ ഫയലില്‍ സ്വീകരിച്ച ഹൈക്കോടതി ചൊവ്വാഴ്ച വാദം കേള്‍ക്കും.
ചീഫ് ജസ്റ്റീസ് നിതിന്‍ ജാംദാര്‍, ജസ്റ്റീസ് എസ്. മനു എന്നിവരുള്‍പ്പെട്ട ബെഞ്ചാണ് പരിഗണിക്കുന്നത്. മൃതദേഹം കൊച്ചി മെഡിക്കല്‍ കോളജില്‍ ഫോര്‍മലീന്‍ ലായനിയില്‍ സൂക്ഷിച്ചിരിക്കുകയാണെന്ന് ഹര്‍ജി പരിഗണിക്കവെ സര്‍ക്കാര്‍ അറിയിച്ചു.
പിതാവിന്‍റെ മൃതദേഹം മതാചാരപ്രകാരം സംസ്‌കരിക്കാനായി വിട്ടുനല്‍കണമെന്നാണ് ഹര്‍ജിക്കാരിയുടെ ആവശ്യം. എന്നാല്‍, മൃതദേഹം മെഡിക്കല്‍ പഠനത്തിന് വിട്ടുനല്‍കണമെന്നായിരുന്നു ലോറന്‍സിന്‍റെ ആഗ്രഹമെന്ന് മകന്‍ എം.എല്‍. സജീവ് വ്യക്തമാക്കിയിരുന്നു. ഇതിന് സാക്ഷികളെയും ഹാജരാക്കിയ സാഹചര്യത്തിലായിരുന്നു മൃതദേഹം മെഡിക്കല്‍ കോളജിനു കൈമാറാന്‍ സിംഗിള്‍ ബെഞ്ച് ഉത്തരവിട്ടത്.