പ്ലസ്ടു വിദ്യാർഥിനിയുടെ മരണം: സഹപാഠി അറസ്റ്റിൽ
Saturday, November 30, 2024 1:18 AM IST
അടൂർ: ആശുപത്രിയിൽ ചികിത്സയിൽ കഴിയവേ മരിച്ച പതിനേഴുകാരി ഗർഭിണിയാണെന്നു തെളിഞ്ഞതോടെ സംഭവത്തിന് ഉത്തരവാദിയായ സഹപാഠി അറസ്റ്റിൽ. നൂറനാട് സ്വദേശിയായ പതിനെട്ടുകാരനാണ് അറസ്റ്റിലായത്.
മരിച്ച പെൺകുട്ടി അഞ്ചു മാസം ഗര്‍ഭിണിയാണെന്ന കണ്ടെത്തലിനെത്തുടർന്നുള്ള അന്വേഷണത്തിലാണ് അറസ്റ്റ്. ഗർഭസ്ഥശിശുവിന്‍റെ പിതൃത്വം തെളിയിക്കേണ്ടതുള്ളതിനാൽ അറസ്റ്റിലായ വിദ്യാർഥിയുടെ രക്തസാമ്പിളുകൾ ശേഖരിച്ച് ഡിഎൻഎ പരിശോധന നടത്തും. ഗർഭസ്ഥശിശുവിന്‍റെ ഡിഎൻഎ സാമ്പിളുകൾ നേരത്തേതന്നെ ശേഖരിച്ച് സൂക്ഷിച്ചിരുന്നു.
കഴിഞ്ഞദിവസം വിദ്യാർഥിയെ പോലീസ് വിളിച്ചുവരുത്തി ചോദ്യം ചെയ്തിരുന്നു. കുറ്റസമ്മതമൊഴിയുടെകൂടി അടിസ്ഥാനത്തിലാണ് അറസ്റ്റ്.
പനിക്ക് ആലപ്പുഴ വണ്ടാനം മെഡിക്കൽ കോളജ് ആശുപത്രിയിൽ ചികിത്സ തേടിയ പെൺകുട്ടി തിങ്കളാഴ്ചയാണു മരിച്ചത്. തുടർന്ന് ദുരൂഹത നീക്കാൻ നടത്തിയ പരിശോധനയിൽ കുട്ടി അഞ്ചുമാസം ഗർഭിണിയാണെന്ന് കണ്ടെത്തുകയായിരുന്നു. ആദ്യം അസ്വാഭാവിക മരണത്തിനാണ് പോലീസ് കേസെടുത്തത്.
പിന്നീട് പോക്സോ വകുപ്പുകൂടി ചേര്‍ത്തു. കഴിഞ്ഞദിവസം വിദ്യാർഥിനിയുടെ ബാഗിൽനിന്ന് ഒരു കത്ത് ലഭിച്ചിരുന്നു. താൻ ഗർഭിണിയാണെന്നുള്ള വിവരം കുട്ടിക്ക് അറിയാമായിരുന്നുവെന്ന് കത്തിൽ സൂചന നൽകുന്നുണ്ടായിരുന്നു. തുടർന്ന് പെൺകുട്ടി ജീവനൊടുക്കുകയായിരുന്നുവെന്ന സംശയവും ബലപ്പെട്ടു.