ദൈവദാസന്‍ ഫാ. ആര്‍മണ്ട് മാധവത്ത് അനുസ്മരണ സമ്മേളനം ഇന്ന്
Saturday, November 30, 2024 1:18 AM IST
മരങ്ങാട്ടുപിള്ളി: കേരള കരിസ്മാറ്റിക് പ്രസ്ഥാനത്തിന്‍റെ സ്ഥാപകന്‍ ദൈവദാസന്‍ ഫാ. ആര്‍മണ്ട് മാധവത്ത് അനുസ്മരണ സമ്മേളനവും കൃതജ്ഞതാബലിയും ഇന്ന് മരങ്ങാട്ടുപിള്ളിയില്‍ നടത്തും. രാവിലെ 10.30നു സെന്‍റ് ഫ്രാന്‍സിസ് അസീസി പള്ളിയില്‍ കര്‍ദിനാള്‍ മാര്‍ ജോര്‍ജ് ആലഞ്ചേരിയുടെ മുഖ്യകാര്‍മികത്വത്തില്‍ സമൂഹബലി.
11.45നു പാരീഷ് ഹാളില്‍ നടക്കുന്ന അനുസ്മരണ സമ്മേളനം കര്‍ദിനാള്‍ മാര്‍ ജോര്‍ജ് ആലഞ്ചേരി ഉദ്ഘാടനം ചെയ്യും. മണിയമ്പ്രാ കുടുംബയോഗം രക്ഷാധികാരി റവ.ഡോ. തോമസ് മേല്‍വെട്ടം അധ്യക്ഷത വഹിക്കും. ബിഷപ് മാര്‍ ജോസഫ് കല്ലറങ്ങാട്ട് അനുഗ്രഹ പ്രഭാഷണവും വൈദ്യുതി റെഗുലേറ്ററി കമ്മീഷന്‍ ചെയര്‍മാന്‍ ടി.കെ. ജോസ് മുഖ്യപ്രഭാഷണവും നടത്തും.
മലയാളത്തിലെ ആദ്യ കരിസ്മാറ്റിക് ധ്യാനം 1976 സെപ്റ്റംബര്‍ 24 മുതല്‍ ഭരണങ്ങാനം അസീസിയില്‍ സംഘടിപ്പിച്ചത് ഫാ. ആര്‍മണ്ടാണ്. കരിസ്മാറ്റിക് നവീകരണ മുന്നേറ്റത്തിന്‍റെ വിജയത്തിനായി ജീവിതം സമര്‍പ്പിച്ചു. ദാരിദ്ര്യത്തിലും എളിമയിലും പ്രാര്‍ഥനയിലും പരിത്യാഗത്തിലും സാഹോദര്യത്തിലും സമഭാവനയിലും ജീവിച്ച ഫാ.ആര്‍മണ്ട് 2001 ജനുവരി 12ന് അന്തരിച്ചു.