കെഎസ്ആര്‍ടിസി ബസും ബൈക്കും കൂട്ടിയിടിച്ച് രണ്ടു യുവാക്കള്‍ മരിച്ചു
Saturday, November 30, 2024 1:18 AM IST
ചേര്‍ത്തല: കെഎസ്ആര്‍ടിസി സൂപ്പര്‍ഫാസ്റ്റ് ബസും ബൈക്കും കൂട്ടിയിടിച്ച് ബൈക്ക് യാത്രക്കാരായ രണ്ടുപേര്‍മരിച്ചു. ചേര്‍ത്തല നഗരസഭ നാലാം വാര്‍ഡ് നെടുമ്പ്രക്കാട് പുതുവല്‍നികര്‍ത്തില്‍ പരേതനായ രമേശന്‍റെ മകന്‍ നവീന്‍ (അമ്പാടി-24), ചേര്‍ത്തല നാലാം വാര്‍ഡ് സാന്ദ്രനിവാസില്‍ വിജയപ്പന്‍റെ മകന്‍ ശ്രീഹരി (ആരോമല്‍-24) എന്നിവരാണ് മരിച്ചത്.
വെള്ളിയാഴ്ച പുലര്‍ച്ചെ ഒന്നോടെ എസി റോഡില്‍ ചേര്‍ത്തല ഗവ.ബോയ്സ് ഹൈസ്കൂളിന് സമീപമായിരുന്നു അപകടം. ഇവിടെയുള്ള എടിഎമ്മില്‍ നിന്നു പണം പിന്‍വലിച്ചതിനുശേഷം ഇരുവരും ബൈക്കില്‍ റോഡ് മുറിച്ചു കടക്കുന്പോൾ തിരുവനന്തപുരത്തു നിന്നു മലപ്പുറത്തേക്കു പോകുകയായിരുന്ന കെഎസ്ആര്‍ടിസി ബസില്‍ ഇടിക്കുകയായിരുന്നു.
ബസിന്‍റെ വലതുവശത്ത് തട്ടി നിയന്ത്രണം വിട്ട് ഇരുവരും ബസിനടിയിലേക്ക് വീണു. ബൈക്കോടിച്ചിരുന്ന ശ്രീഹരി സംഭവസ്ഥലത്തുതന്നെ മരിച്ചു. നവീനെ സമീപമുള്ള സ്വകാര്യ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.
അയല്‍വാസികളായ നവീനും ശ്രീഹരിയും അടുത്ത സുഹൃത്തുക്കളായിരുന്നു. രണ്ടുപേരുടെയും സംസ്കാരം വീട്ടുവളപ്പില്‍ നടത്തി. നവീന്‍റെ അമ്മ: ലളിത (പിഎച്ച്സി, തൈക്കാട്ടുശേരി). സഹോദരി: നയന. ശ്രീഹരിയുടെ അമ്മ: ശോഭ. സഹോദരി: സാന്ദ്ര.