എരഞ്ഞിപ്പാലം കൊലപാതകം: പ്രതി ചെന്നൈയില്‍ അറസ്റ്റില്‍
Saturday, November 30, 2024 1:18 AM IST
കോഴിക്കോട്: എരഞ്ഞിപ്പാലത്തെ ലോഡ്ജില്‍ മലപ്പുറം സ്വദേശിയായ യുവതിയെ കൊലപ്പെടുത്തിയ കേസില്‍ പ്രതി പിടിയില്‍. തിരുവില്വാമല കുതിരംപാറക്കല്‍ അബ്ദുല്‍ സനൂഫ് ആണ് ഇന്നലെ വൈകുന്നേരം ചെന്നൈയില്‍ പിടിയിലായത്.
നടക്കാവ് പോലീസാണു പ്രതിയെ അറസ്റ്റ് ചെയ്തത്. ചെന്നൈയില്‍വച്ച് സനൂഫ് സുഹൃത്തിനെ ബന്ധപ്പെടാന്‍ ശ്രമിച്ചിരുന്നു. ഇതു കേന്ദ്രീകരിച്ച് നടത്തിയ അന്വേഷണത്തിലാണു പ്രതി പിടിയിലായത്. ഇയാളെ ഇന്ന് പുലര്‍ച്ചെയോടെ കോഴിക്കോട്ടെത്തിക്കും.
കഴിഞ്ഞ ദിവസം പ്രതിക്കായി ലുക്കൗട്ട് നോട്ടീസ് പുറത്തിറക്കിയിരുന്നു. ലോറികളില്‍ ഡ്രൈവറായി ജോലി ചെയ്തിരുന്ന സനൂഫിനു തമിഴ്നാട്ടിലും കര്‍ണാടകയിലും തെലുങ്കാനയിലുമെല്ലാം സുഹൃത്തുക്കളുണ്ട്. ഈ സാഹചര്യത്തില്‍ കേരളം വിടാനുള്ള സാധ്യത പോലീസ് മുന്‍കൂട്ടികണ്ടിരുന്നു.
ചൊവ്വാഴ്ച രാവിലെയാണ് മലപ്പുറം വെട്ടത്തൂര്‍ കാപ്പ് പൊതാക്കല്ല് റോഡിലെ പന്തലാന്‍ വീട്ടില്‍ ഫസീല(33)യെ എരഞ്ഞിപ്പാലത്തെ ലോഡ്ജില്‍ മരിച്ച നിലയില്‍ കണ്ടെത്തിയത്.
ഫസീലയുടെ ആഭരണങ്ങള്‍ ഒന്നും നഷ്ടപ്പെട്ടിരുന്നില്ല. കൊലപാതക കാരണം സനൂഫിനെ ചോദ്യം ചെയ്താല്‍ മാത്രമേ വ്യക്തമാകൂ. അതേസമയം സനൂഫിനെതിരേ ഫസീല മുൻപ് പെരിന്തൽമണ്ണ പോലീസിൽ പരാതി നൽകിയിരുന്നു. എന്നാല്‍ പീന്നീട് ഈ കേസ് ഒത്തുതീര്‍പ്പായി.