ഏകീകൃത കുർബാന: എതിർക്കുന്നവരുടെ പരാതി വത്തിക്കാൻ തള്ളി
Thursday, November 7, 2024 1:39 AM IST
കൊച്ചി: എറണാകുളം-അങ്കമാലി അതിരൂപതയിൽ ഏകീകൃത കുർബാനയെ എതിർക്കുന്നവർ നൽകിയ പരാതി വത്തിക്കാൻ തള്ളി.
ഏകീകൃത കുർബാനയെ എതിർക്കുന്നവർക്കെതിരേ നടപടിയെടുക്കുന്നതിൽ മേജര്‍ ആര്‍ച്ച്ബിഷപ്പും അപ്പസ്‌തോലിക് അഡ്മിനിസ്‌ട്രേറ്ററും ചേര്‍ന്ന് 2024 ജൂണ്‍ ഒമ്പതിന് പുറപ്പെടുവിച്ച സര്‍ക്കുലറിലെ നിര്‍ദേശങ്ങള്‍ക്കെതിരേ, അതിരൂപതയിലെ ഏതാനും വൈദികര്‍ നല്‍കിയ പരാതിയാണ് വത്തിക്കാന്‍ തള്ളിയത്.
ഇതുസംബന്ധിച്ച അറിയിപ്പ് മേജര്‍ ആര്‍ച്ച്ബിഷപ്പിന് ഇന്ത്യയിലെ അപ്പസ്‌തോലിക് നുണ്ഷ്യോ ആര്‍ച്ച്ബിഷപ് ഡോ. ലെയോപോള്‍ദോ ജിറേല്ലി കൈമാറി. വിശുദ്ധ കുര്‍ബാനയര്‍പ്പണത്തിന്‍റെ ഏകീകൃതരൂപം നടപ്പാക്കുന്നതു സംബന്ധിച്ച് മാര്‍പാപ്പയുടെയും സിനഡിന്‍റെയും നിര്‍ദേശങ്ങള്‍ അനുസരിക്കാത്തവര്‍ക്കെതിരേ നടപടി സ്വീകരിക്കാനുള്ള തടസങ്ങള്‍ നീക്കിയെന്നും കത്തിലൂടെ അറിയിച്ചിട്ടുണ്ട്.
ജൂണ്‍ ഒമ്പതിലെ സര്‍ക്കുലറിലെ രണ്ടാമത്തെ നിര്‍ദേശത്തിന്‍റെ ഉള്ളടക്കം ഇങ്ങനെ: “ഏകീകൃത കുര്‍ബാന സംബന്ധിച്ച് മാര്‍പാപ്പയുടെയും സിനഡിന്‍റെയും നിര്‍ദേശങ്ങള്‍ അനുസരിക്കാത്തവര്‍ ശീശ്മയിലാണ്. അതു കത്തോലിക്കാസഭയുടെ കൂട്ടായ്മയില്‍നിന്ന് ബഹിഷ്‌കരിക്കപ്പെടുന്നതിന് ഇടവരുത്തും. അതിനാല്‍, ഇതുവരെ അനുസരിക്കാത്തവര്‍ക്കുള്ള അന്ത്യശാസനം ഈ സര്‍ക്കുലറിലൂടെ നല്‍കുന്നു.
2024 ജൂലൈ മൂന്നിനെങ്കിലും അനുസരിച്ച് ഏകീകൃത കുർബാനയര്‍പ്പണം ആരംഭിക്കാത്ത സീറോമലബാര്‍ സഭാവൈദികരെല്ലാം പിറ്റേദിവസം മുതല്‍ കത്തോലിക്കാസഭയില്‍നിന്ന് സ്വയമേ പുറത്തുപോയവരായി കണക്കാക്കപ്പെടും. അവര്‍ക്ക് കത്തോലിക്കാസഭയില്‍ വൈദിക ശുശ്രൂഷ ചെയ്യുന്നതില്‍നിന്ന് വിലക്കേര്‍പ്പെടുത്തും.”
2024 മേയ് 15ന് ഫ്രാന്‍സിസ് മാര്‍പാപ്പയുടെ നിര്‍ദേശപ്രകാരം റോമില്‍ നടന്ന സീറോമലബാര്‍ സഭാധികാരികളുടെ യോഗത്തിലെ തീരുമാനങ്ങളാണ് ജൂണ്‍ ഒമ്പതിലെ സംയുക്ത സര്‍ക്കുലറിലൂടെ അതിരൂപതയിലെ വൈദികരെയും വിശ്വാസികളെയും അറിയിച്ചത്.
ആ യോഗത്തില്‍ മാര്‍പാപ്പയെ പ്രതിനിധീകരിച്ച് വത്തിക്കാന്‍ സ്റ്റേറ്റ് സെക്രട്ടറി കര്‍ദിനാള്‍ ഡോ. പിയേത്രോ പരോളിനും പേപ്പല്‍ ഡെലഗേറ്റ് ആര്‍ച്ച്ബിഷപ് മാർ സിറില്‍ വാസിലും പൗരസ്ത്യ കാര്യാലയത്തിന്‍റെ പ്രീഫെക്‌ട് കര്‍ദിനാള്‍ ക്ലൗവുദിയോ ഗുജറോത്തിയും സീറോമലബാര്‍ സഭ മേജര്‍ ആര്‍ച്ച്ബിഷപ്പും പങ്കെടുത്തിരുന്നു.